KO E ngaahi lea ‘i ‘olungá na‘e lea‘aki ia ‘e Tēvita ‘o ‘Isileli ‘o e kuonga mu‘á ‘i he‘ene fakahīkihiki‘i ha fefine na‘á ne fetaulaki mo ia. Ko hono hingoá ko ‘Apikale. Ko e hā na‘á ne ue‘i ‘a Tēvita ke ne fakahīkihiki‘i iá, pea ‘e lava fēfē ke tau ma‘u ‘aonga mei he‘ene fa‘ifa‘itaki‘angá?

Na‘e fetaulaki ‘a Tēvita mo e fefine mali ko ení ‘i he taimi na‘á ne hola holo ai meia Tu‘i Saulá. Na‘e mali ‘a ‘Apikale mo Nāpale, ko ha tangata tu‘umālie ‘a ia na‘e fakakaikai ‘ene fu‘u tākanga sipi ‘i he feitu‘u mo‘unga‘ia ‘o e fakatonga ‘o Siutá. Ko Tēvita mo ‘ene kau tangatá na‘a nau “hangē ha ‘ā malu‘i” ki he kau tauhi-sipi mo e tākanga sipi ‘a Nāpalé. Na‘e fekau atu ‘e Tēvita ‘ene kau talafekaú ke nau ‘alu kia Nāpale ‘o kole ‘ha me‘a pē ‘e lava ke ne foaki’ mai ke nau ma‘u me‘atokoni mei ai. (1 Sām. 25:8, 15, 16) Na‘e ‘ikai ‘aupito ke ta‘e‘uhinga ‘a e kolé ‘i he fakakaukau atu ki hono malu‘i ‘e Tēvita mo ‘ene kau tangatá ‘a e ngaahi me‘a ‘a Nāpalé.

Ka ko Nāpalé na‘á ne hangē pē ko hono hingoá ‘a ia ‘oku ‘uhingá ko e “Ta‘e‘atamai” pe “Vale.” Na‘á ne fakafeangai ‘i ha founga na‘e fefeka mo fakatupu ‘ita ‘o ‘ikai ke ne tali ‘a e kole ‘a Tēvitá. Ko ia na‘e teuteu leva ‘a Tēvita ke ne tautea‘i ‘a Nāpale ‘i he‘ene anga-kovi mo ta‘efaka‘atu‘í. ‘E fua ‘e Nāpale mo hono falé ‘a e nunu‘a ‘o ‘ene tō‘onga valé.—1 Sām. 25:2-13, 21, 22.

‘I hono ‘ilo‘i ‘e ‘Apikale ‘a e nunu‘a mafatukituki ‘o e palani na‘e teu ke fakahokó, na‘á ne loto-to‘a ke tu‘u vaha‘a ai. Na‘á ne kōlenga anga-faka‘apa‘apa kia Tēvita makatu‘unga ‘i hono vaha‘angatae mo Sihová. Pea na‘á ne tokonaki ha fu‘u me‘akai lahi ma‘a Tēvita, ‘a ia ‘e hoko ko e tu‘i hono hokó, pea ki he‘ene kau tangatá. Ko ia na‘e fakahaa‘i ‘e Tēvita na‘e ngāue‘aki ‘e Sihova ‘a ‘Apikale ke ta‘ofi ia mei hono fai ha me‘a na‘á ne mei ‘ai ia ke ne halaia ‘i he ‘ao ‘o e ‘Otuá. Na‘e pehē ‘e Tēvita kia ‘Apikale: “Ke faitāpuekina koe ‘i ho‘o fakakaukau leleí! ‘Ofa ke faitāpuekina koe ‘i hono ta‘ota‘ofi au he ‘ahó ni mei hono ‘ai ke hoko ha halaia ‘i he totó.”—1 Sām. 25:18, 19, 23-35.

‘Oku faingofua ‘etau sio he‘ikai ‘aupito te tau loto ke hangē ko Nāpalé, ‘o ta‘ehounga‘ia ‘i he ngaahi me‘a lelei kuo fai ma‘atautolú. ‘Ikai ko ia pē, ‘i he‘etau sio ki he hoko ha tu‘unga ‘oku kovi, ‘oku lelei ke tau fai ‘a e me‘a te tau malavá ke ta‘ofi ia. ‘Io, ‘oku lava ke tau fakaongo atu ‘a e fakakaukau ‘a e tokotaha-tohi-sāmé ‘i he‘ene kole ki he ‘Otuá: “Ako‘i mai kiate au ‘a e fakakaukau lelei mo e ‘ilo.”—Saame 119:66.

Ko e ni‘ihi te nau fakatokanga‘i nai ‘a e poto pe fakakaukau lelei ‘oku hā ‘i he‘etau tō‘ongá. Tatau ai pē pe te nau tala mai pe ‘ikai, te nau ma‘u nai ‘a e ongo‘i ‘o hangē ko Tēvitá, ‘a ia na‘á ne pehē: “Ke faitāpuekina koe ‘i ho‘o fakakaukau leleí!”