MAJWI aaya aali atala akaambwa a Davida wamu Israyeli yansiku ciindi naakali kutembaula mukaintu umwi ngwaakayaanya. Izina lyakwe wakali Abigayeli. Ino ncinzi cakapa Davida kuti amutembaule mukaintu ooyu, alimwi mbuti cikozyanyo cakwe mbocikonzya kutugwasya?

Davida wakaswaanganya mukaintu ooyu uukwetwe ciindi naakali kutija Mwami Saulo. Abigayeli wakakwetwe kuli Nabala, imwaalumi muvwubi iwakajisi zivwubwa zinji kapati munyika yamalundu aa Juda nkoili kumusanza. Davida abaalumi bakwe bakali ‘mbuli bwaanda bwakucingilila’ beembezi ba Nabala azivwubwa zyakwe. Mukuya kwaciindi Davida wakatuma batumwa kuli Nabala, kutegwa bakalombe ‘kufwumbwa ncaakajisi’ ikwaamba zyakulya. (1Sam. 25:8, 15, 16) Tiicakali cintu cibi ikulomba zyakulya nkaambo Davida abaalumi bakwe bakakwabilila zintu zya Nabala.

Pele Nabala, ooyo zina lyakwe ilyaamba kuti ‘Mufwubafwuba’ naa muntu ‘Utajisi maano,’ wakacita zintu kweelana ambolyaamba zina lyakwe. Wakavwiila cabukali, wakabelesya majwi mabi alimwi wakamwiima ncaakalomba Davida. Aboobo Davida wakalibambila kuti amusubule Nabala akaambo kakutamuvwiila kabotu. Nabala alimwi abamukwasyi wakwe bakeelede kusubulwa akaambo kabufwubafwuba bwakwe.—1Sam. 25:2-13, 21, 22.

Naakayeeya zibi zyakali kunoocitika ikuti Davida waazuzikizya makanze aakwe, cabusicamba Abigayeli wakaanjilila makani. Cabulemu wakabandika a Davida, akumuyeezya cilongwe ncaakajisi a Jehova. Alimwi wakapa Davida, walo iwakali kuyooba mwami, abaalumi bakwe zyakulya zinji. Aboobo Davida wakazyiba kuti Jehova wabelesya Abigayeli kumulesya kucita cintu icakali kunoomupa kuti abe amulandu kuli Jehova. Davida wakaambila Abigayeli kuti: “Leza akulongezye akaambo kabusongo bwako! Ulongezyegwe akaambo kakundilesya sunu kuba amulandu wabulowa.”—1Sam. 25:18, 19, 23-35.

Cakutadooneka twabona kuti tatweelede kuba mbuli Nabala, ikutalumba akaambo kazintu zibotu bantu nzyobatucitila. Kuyungizya waawo, ikuti naa twabona kuti kuli cintu cibi iciyanda kucitika, tweelede kusolekesya kubona mbotukonzya kwaabamba makani aayo. Inzya, tulakonzya kwaamba majwi ngaakaamba sintembauzyo iwakaambila Leza kuti: “Kondiyiisya maano mabotu aluzyibo.”—Int. 119:66.

Bantu bamwi inga babubona busongo naa maano muzintu nzyotucita. Kufwumbwa naa balatwaambila naa pe, balakonzya kulimvwa mbuli Davida, iwakaamba kuti: “Leza akulongezye akaambo kabusongo bwako!”