ENEO maipfi o ambiwa nga Davida wa Isiraele ḽa kale musi a tshi khou khoḓa mufumakadzi we a ṱangana nae. Onoyo mufumakadzi o vha a tshi pfi Abigaili. Ndi mini zwo itaho uri Davida a mu khoḓe nahone ri nga vhuyelwa hani nga tsumbo yawe?

Davida o ṱangana na onoyu mufumakadzi o vhingwaho musi a tshi khou shavha Khosi Saulo. Abigaili o vha o vhingwa nga Nabali, munna we a vha o pfuma nahone sambi ḽawe ḽihulu ḽo vha ḽi tshi fula thavhani dza ngei tshipembe ha Yuda. Davida na vhanna vhawe vho vha “vha tshi nga mutsheṱo” we vhalisa vha Nabali na sambi ḽawe vha khuda ngawo. Nga murahu, Davida o rumela vhaḓinḓa vhawe kha Nabali uri vha humbele uri a vha ṋee zwiḽiwa u ya nga ‘zwine tshanḓa tshawe tsha zwi kona.’ (1 Sam. 25:8, 15, 16) Zwo vha zwi sa ṱoḓei uri Davida a ite yeneyo khumbelo ngauri ene na vhanna vhawe vho tsireledza sambi ḽa Nabali na vhalisa vhawe.

Fhedzi Nabali we dzina ḽawe ḽa vha ḽi tshi amba Tsilu kana Dodo, o tshila u tendelana na dzina ḽawe. O fhindula nga vhuhali na lunyadzo nahone a si ṱanganedze khumbelo ya Davida. Nga zwenezwo, Davida o vha a tshi ṱoḓa u lifhedza Nabali nge a mu fhindula nga nḓila ya lunyadzo na vhutsilu. Nabali na vha muṱa wawe vho vha vha tshi ḓo vhulahwa nga nṱhani ha vhutsilu hawe.—1 Sam. 25:2-13, 21, 22.

Musi Abigaili a tshi pfa nga ha zwe Davida a vha o dzudzanya u zwi ita, o dzhenelela nga tshivhindi. Nga ṱhonifho, o vhudza Davida nga ha vhushaka hawe na Yehova. Nahone o lugiselela zwiḽiwa zwinzhi Davida we a vha a tshi ḓo vha khosi i tevhelaho na vhanna vhawe. Davida o ṱhogomela uri Yehova o shumisa onoyo mufumakadzi uri a mu thivhele u ita zwithu zwe zwa vha zwi tshi ḓo ita uri a vhe na mulandu phanḓa ha Mudzimu. Davida o amba na Abigaili a ri: “Nga hu rendiwe vhuṱali hau; hu rendiwe henewe, ngauri ṋamusi wo ndzivhela ndi si ovhe mulandu wa malofha.”—1 Sam. 25:18, 19, 23-35.

Zwi tou vha khagala uri ri nga si vhuye ra ṱoḓa u fana na Nabali, nga u sa sumbedza u livhuha zwithu zwavhuḓi zwe ra itelwa zwone. Zwiṅwe hafhu, musi ri tshi vhona vhuimo vhu si havhuḓi vhu tshi thoma u vha hone, ri ita zwavhuḓi musi ri tshi ita zwoṱhe zwine ra nga kona u iledza honoho vhuimo. Vhukuma, ri nga ḓipfa nga nḓila i fanaho na ya mupsalme we a vhudza Mudzimu uri: “Mpfunze ṱhalukanyo-vhukuma na nḓivho.”—Ps. 119:66.

Zwine ra zwi ita zwi nga ita uri vhaṅwe vha ṱhogomele vhuṱali kana ṱhalukanyo ine ra vha nayo. Hu sa londwi uri vha a ri vhudza kana a vha ri vhudzi, vha nga ḓipfa nga nḓila i fanaho na ya Davida we a ri: “Nga hu rendiwe vhuṱali hau.”