ITO nga mga pulong iginyakan ni David han kadaan nga Israel basi dayawon an usa nga babaye nga iya nakilala. Hiya hi Abigail. Ano an nagpagios kan David nga dayawon ini nga babaye, ngan paonan-o kita magpapahimulos ha ehemplo ni Abigail?

Nakilala ni David inin inasaw-an nga babaye han panahon nga pinalagiw hiya tikang kan Hadi Saul. An bana ni Abigail amo hi Nabal, usa nga riko nga tawo nga may damu nga panon hin mga hayop ha kabukiran ha sur han Juda. Hi David ngan an iya kaupod nga kalalakin-an nagin sugad hin “kuta” ha mga paraataman han mga karnero ngan panon ni Nabal. Ha urhi, nagpadara hin mga mensahero hi David kan Nabal basi mangaro ha iya hin “bisan ano” nga pagkaon nga iya maihahatag. (1 Sam. 25:8, 15, 16) Makatadunganon la an hangyo ni David kon huhunahunaon an ginhimo niya ngan han iya kaupod nga kalalakin-an nga pagpanalipod ha mga panag-iya ni Nabal.

Pero hi Nabal, nga an ngaran nangangahulogan hin “Waray Pulos” o “Lurong,” nagkinabuhi uyon ha iya ngaran. Binaton hiya hin nakakainsulto ngan waray respeto, ngan waray niya ihatag an gin-aaro ni David. Salit nagplano hi David nga sirotan hi Nabal tungod han iya nakakapasina ngan diri makatadunganon nga ginbuhat. Maghihikaraot hi Nabal ngan an iya panimalay tungod han iya kalurongan.​—1 Sam. 25:2-13, 21, 22.

Tungod kay nasabtan ni Abigail an maraot nga magigin resulta han waray hunahunaa nga desisyon ni David, maisugon nga ginios hi Abigail. May pagtahod nga nanginyupo hiya kan David nga diri isakripisyo an iya maopay nga relasyon kan Jehova. Ngan gintagan niya hin damu nga pagkaon hi David, nga amo an sunod nga magigin hadi, ngan an iya kaupod nga kalalakin-an. Ha luyo nga bahin, ginkilala ni David nga gin-gamit ni Jehova hi Abigail basi pugngan hiya nga makasala ha Dios. Hi David nagsiring kan Abigail: “Bulahan an imo sarabutan, ngan bulahan ka, nga nagpugung ha akon niyan nga adlaw ha pakasala tungud han pagpaagay hin dugo.”​—1 Sam. 25:18, 19, 23-35.

Sigurado nga diri gud naton karuyag subaron hi Nabal nga waray apresasyon ha mag-opay nga butang nga ginbubuhat ha aton. Lugod, kon naoobserbaran naton nga an usa nga sitwasyon mahimo magresulta hin maraot, maopay gud nga buhaton naton an ngatanan basi mapugngan ito. Aabaton naton an inabat han salmista nga nagsiring ha Dios: “Pagtutdui ako hin maopay nga paghukom [o, sarabotan] ngan kinaadman.”​—Sal. 119:66.

Posible nga maobserbaran han iba an aton kinaadman, o sarabotan, pinaagi han aton mga buhat. Isumat man nira ito ha aton o diri, posible nga inaabat nira an pariho han inabat ni David nga nagsiring: “Bulahan an imo sarabutan.”