NÉ CA diidxaʼ riʼ bisisaca David, ti hombre bibani ndaaniʼ guidxi Israel dxiqué, ti gunaa láʼ Abigail. ¿Xiñee bíʼnibe ni yaʼ? ¿Xi rizíʼdinu de ejemplu stiʼ gunaa riʼ yaʼ?

Binibiáʼ David Abigail tiempu canazananda rey Saúl laa. Xheelabe nga Nabal, ti hombre ricu ni gupa stale dendxuʼ ladu gueteʼ stiʼ Judá, ti región ra nuu stale dani. Guca David né ca hombre stiʼ casi ti muru para ca pastor stiʼ Nabal né ca dendxuʼ stiʼ. Ngue runi biseendaʼ David caadxi hombre stiʼ para guinabaʼ laabe ni gocaʼ, intiica nápabe gudiibe laacaʼ (1 Sam. 25:8, 15, 16). Biaʼsi ngue ni canabaʼ David laabe, purtiʼ gúpacabe ca cosa stiʼ Nabal.

Peru jmaruʼ si bisihuinni Nabal biáʼsipeʼ ni riníʼ lá né ni biʼniʼ, labe riníʼ ni «Nahuati» o «Gastiʼ xpiaaniʼ». Naduxhuʼ modo bicábibe ca hombre stiʼ David ne gudindenebe laacaʼ. Ngue runi guyuu listu para guni castigar laabe pur qué niníʼ íquebe modo bicábibe ne pur gudindenebe laacaʼ. Nabé feu modo zaguixe Nabal guendahuati ni biʼniʼ que ne cadi laasi dede né cani nuu ra lidxi (1 Sam. 25:2-13, 21, 22).

Ora bidii Abigail cuenta xi guirá zazaaca pur qué niníʼ ique David xi chiguni, gúcabe nadxibalú né gudixhe íquebe gúnibe xiixa. Né respetu gunábabe laa guiníʼ ique xii ngue chiguni, zaqué bisietenaláʼdxibe laa amistad ni napané Jiobá. Ne cadi ngasi, bidiibe stale guendaró hombre riʼ, ni chigaca rey stiʼ Israel, ne ca xpinni. Zaqué bidii David cuenta Dios ngue caquiiñeʼ Abigail para gucueeza laa ti cadi guni xiixa guizáʼ malu nezalú Jiobá. Ngue runi gúdxibe laa ca diidxaʼ riʼ: «Guisácaluʼ purtiʼ nuu xpiaaniluʼ, ne uguu Dios ndaayaʼ lii purtiʼ bicueezuʼ naa yannadxí de guuteʼ binni» (1 Sam. 25:18, 19, 23-35).

Cadi nagana nga gudiʼnu cuenta cadi naquiiñeʼ gácanu casi Nabal, ti binni ni qué nudii xquíxepeʼ. Ne ora gudiʼnu cuenta chiguizaaca ti cosa ni cadi jneza, gúninu ni nuu lu nanu para guni chaahuinu ni. Guinábanu Dios ni gunabaʼ salmista riʼ: «Dané naa guendanuuxpiaaniʼ ne guendananna» (Sal. 119:66).

Zándaca gudii xcaadxi binni cuenta bíninu xiixa né cuidadu ne guendabiaaniʼ. Pa guiníʼcabe ni o pa coʼ, zándaca guiníʼcabe casi guníʼ David: «Guisácaluʼ purtiʼ nuu xpiaaniluʼ».