Davide nga guko naadu bakuru kusayo Yisaraere yo nagumba agu afugo du kuari re ka tambua dee ko agbiatiko na ri. Rimori angia Abigaira. Gine naafõngbadu Davide yo ko tambua ri, na wai du rengbe ani ka gbia undo ti gari kpiapai?

Davide agbia gi diakumba re ho ko aazubo ni be Bakindo Saura. Kumbaku Abigaira angia Nabara, nga gu kumukokumuko kumba naariga gako bakere rimbasa akandoro rogo gu papara Yuda du ku nodiyo nga ringara agangara. Davide na gako akumba adu wakina “ndugu” fu ga Nabara ababanda akandoro. Kusa, Davide akedi sunge fuo Nabara ka sanako tipa ‘guhe kadu beko’ wa riahe. (1 Sam. 25:​8, 15, 16) Gupai Davide asanahe tipaha re aadunga ni kere mbumbupai te nibipa wai ko gbiati gako akumba abanda ga Nabara ahe.

Ono Nabara du rogo rimoko yo nga “Mumungo Boro” watadu “Gu Boro Adunga Berã Riniyo Ya,” amangipai ringbisihe kina kuti rimoko. Ko akaragapai ngba gbegberẽ gene na rogo sengahe yo, ki ká ka manga gupai Davide asanahe tipaha. Sidu, Davide ambakadi tiko ka fu mbusa fu Nabara tipa gako sengahe na gako gbegberẽ karagapai. Nabara na gako aborokporo aandu ka gbia mbusa tipa gako zingo berã.​—1 Sam. 25:​2-​13, 21, 22.

Fuo Abigaira inipa gu kere sangbanapai naaye kuriyo mbiko gu kere gbarakagbaraka pai i aasogima ha, ri amangipai na wingbaduse ka rugusaha. Ri azungodi Davide na irisa riimburu gako pagume na Yekova. Ri aye na bandara riahe fu Davide nga guko si adu nga ko nika ngia bakindo, na fu gako akumba. Tipa Davide tigako, ko aidi kuti gupai nga Yekova amangisunge na ri ka zako ti manga gupai ka ye na bape kure kuriko barangba Mbori. Davide aya fu Abigaira: “Maku dú foro tipa ga tatamana, maku dú foro naza re areme ti uka kure.”

Ani ima rengba ka bi gupai ni ipo nga si aidanga ani duwa Nabara ka zanga du na tambuahe tipa gu weneapai aboro amangaha furani te. Kurigure, ho ani abi gupai ni nga gbegberẽpai naida ka manga, si adu ni wenepai ka ani mangipai ka zeresa gupai re. Nirengo, ani ima rengba ka gumba agu afugo bake papara atambuahe nga guko naaya fu Mbori wẽ: “Mo raba re na wene sarangbanga na inahe.”​—Tam. 119:66.

Kura aboro ima rengba ka bi gu tatamana du rogo gaani mangaapai yo. Singia i nape paha furani watadu i apenga ha te, i ima rengba kadu wakina gu Davide adu, nga guko naaya: “Maku dú foro tipa ga tatamana.”