1, 2. 1) ¿Kunas jukʼamp wakiskirejja? 2) ¿Kunatsa uk sum amuyañajj wali wakiskirejja?

 JILA parte jaqenakatakejja, qollqew jukʼamp wakiskiri, qollqetwa jukʼamp llakisipjje. Ukatwa jukʼamp qollqenïñatakisa, qollqep sum imañatakisa wal chʼamachasipjje. Yaqhepatakejj familiapa, jan usuntas jakasiñaw jukʼamp wakiskiriraki, yaqhepatakisti kunanak lurañtï munki ukanak phoqañaw jukʼamp wakiskiriraki.

² Taqe ukanakat sipansa, ¿kunas jukʼamp wakiskirïpacha? Jehová Diosajj taqe kunjjar munañanïtap arjjatañaw jukʼamp wakiskirejja. Uksti janipuniw armañasäkiti. Armsna ukhajja, yaqha lurañanakaw jiwasatak nayrankjjaspa, jan ukajj Jehová Diosajj taqe kunjjar munañanïtap arjjatañajj kunja wakiskirisa uksa, kuna llakinakatï utjkistu ukanakaw armtʼayistaspa. Jiwasatï Jehová Diosar Apnaqerisarjam uñjañänejja, kuna llakinakatï utjkistu ukanakamp jan aynachtʼañatakejj wakichtʼatäñäniwa, Jehová Diosarus jukʼamp jakʼachasirakiñäni.

3. ¿Supayajj kamsänsa Jehová Diosatjja?

³ Jehová Diosajj janiw jaqenakar apnaqañatak derechonïkiti  sasaw Supayajj säna. Ukatsti, Diosajj jan wali apnaqeriwa, janiw jaqenakat llakiskiti, jaqenakatï jupanak kikpa gobernasipjjaspajja, wali sumaw jakasipjjaspa sasaw Supayajj sarakïna (Gén. 3:1-5). Janiw khiti jaqes Diosar taqe chuyma sirvkaspati, jan walinakan uñjasisajj Diosat jitheqtapjjakispawa sasaw sarakïna (Job 2:4, 5). Ukatwa Jehová Diosajj uka kʼarinak qhanstañapatak tiempo churäna. Ukhamat marka apnaqerinakajj kuna jan walinaksa utjayapjje uk taqeni amuyapjjañapataki.

4. ¿Kunatsa khitis taqe kunjjar munañani ukajj sum qhanstañapa?

⁴ Supayan kʼarisitap Jehová Diosajj yatiskänwa. Ukhamajj ¿kunatsa Supayan arunakapajj cheqäskapuniti janicha uk qhanstañapatak tiempo churäna? Uk sum qhanstañapaw angelanakatakisa jaqenakatakis wali wakiskirejja (Salmo 83:18 liytʼañataki). * Jaqenakat waljaniw Adanampi Evampjamajj Jehová Diosampi apnaqatäñ jan munapkiti. Uk uñjasajja, inas yaqhepajj Supayajj razonaniw ukham parlaskpachäna sapjjchispa. Jaqenakasa angelanakasa Supayajj kʼarisiskapunitap sum amuyapjjani ukhakiw mayachtʼata suman jakasiñajj utjaspa. Jehová Diosan taqe kunjjar munañanïtap qhanstkani ukhajja, wiñayatakiw Diosan Reinopan sum jakasjjañäni. Alajjpachansa oraqensa sumankañajj jilarkiriw utjani (Efe. 1:9, 10).

5. ¿Kunjamsa Jehová Diosan taqe kunjjar munañanïtap arjjatsna?

⁵ Jehová Dios sapaki taqe kunjjar munañanïtapajj sum qhanstani, Supayan gobiernopasa, jaqenakan gobiernopasa jan walïtapaw qhanstani, qʼala tukjatäpjjarakiniwa. Jehová Diosaw Jesucristo Reyimpejj apnaqestani. Jaqenakajj Diosan gobiernop arjjatapjjaspawa, ukwa Diosan taqe chuyma servirinakapajj uñachtʼayapjjani (Isa. 45:23, 24). Diosar taqe chuyma servir jaqenakjamäñ munstanjja, Jehová Diosajj taqe kunjjar munañanïtap arjjatañajj kunja wakiskirisa uk sum amuytʼañasawa.

6. ¿Kunas jukʼamp wakiskirejja?

⁶ Kunjamtï saniwayktanjja, kusisit jakasiñ thaqañat sipansa, Jehová Diosajj taqe kunjjar munañanïtap arjjatañaw jukʼamp wakiskirejja. Ukhamajja, ¿janit salvasiñasajj wakiskpacha, jan ukajj Jehová Diosajj janit jiwasat llakiskpacha? Janiw uk sañ munktanti. ¿Kunatsa ukham sistanjja?

7, 8. Jehová Diosan taqe kunjjar munañanïtap qhanstkani ukhajja, ¿kunsa Diosajj lurarakini?

⁷ Jehová Diosajj walpun jaqenakar munasi. Ukatwa wali munat Wawapar jiwas layku jiwañapatak khitanïna, ukhamat wiñay jakañ katoqañasataki (Juan 3:16; 1 Juan 4:9). Diosajj arunakap jan phoqkaspajja, Diosajj kʼarïskapuniwa, jan wali apnaqerïskapuniwa, janiw jaqenakan sum jakasipjjañapsa munkiti sasaw Supayajj saspa. Diosan enemigonakapajj akham sapjjarakispawa: “Criston kuttʼaniñap tiempojj ¿kawkinkarakisti? Nayra awkinakasajj jiwañan iktʼjjapjjäna ukhat jichhakamajja, taqe kunas pachpakïskiwa, jaqenakajj luratäkäna ukhatpachaw ukhamäski” sasa (2 Ped. 3:3, 4). Ukatwa Diosajj taqe arunakap phoqani. Taqe kunjjar munañanïtap qhanstkani ukhasa, istʼasiri taqe jaqenakaruw Diosajj qhespiyarakini (Isaías 55:10, 11 liytʼañataki). Jehová Diosajj munasiñampipuniw jaqenakar apnaqe. Ukatwa Diosajj wiñayatakiw munasiñampi uñjistani,  taqe chuyma servirinakapat janipuniw armaskaniti sasin confiytanjja (Éxo. 34:6).

⁸ Jehová Diosajj taqe kunjjar munañanïtap qhanstañapajj wali wakiskiriwa, ukampis salvasiñasajj janis wakiskaspa, Diosajj janis jiwasat llakiskaspa ukham janiw amuyañasäkiti. Jan ukasti, Jehová Diosajj taqe kunjjar munañanïtap arjjatañaw taqe kunat sipansa jiwasatak nayrankañapa, ukatwa Diosan gobiernopar taqe chuyma yanaptʼañasa.

9. ¿Job chachat Supayajj kamsänsa? (22 paginankir dibujo uñjjattʼäta).

⁹ Jehová Diosajj taqe kunjjar munañanïtap sum amuyañajj wali wakiskiriwa. Kunja wakiskirisa uk amuyañatakejj Bibliankir Job librow yanaptʼistaspa, uka librojj nayrïr qellqat libronak taypinkiwa. Uka librorjamajja, Job chachatï tʼaqesiñanakan uñjasispajja Dios conträjjaspawa sasaw Supayajj säna. Job chachar tʼaqesiyam sas kunaw Supayajj Diosar säna. Jehová Diosajj janipuniw ukham lurkaspati. Ukampis Supayar akham sänwa: “Kunjämarutejj munkta ukhamaru [yantʼam]” sasa (Job 1:7-12 liytʼañataki). Mä jukʼa tiempotsti, Job chachan taqe servirinakapaw jiwapjjäna, janirakiw kunapas utj-jjänti, wawanakapas taqpachaniw jiwapjjäna. Diosas taqe uka jan walinak lurkaspa ukhamwa Supayajj amuyayäna (Job 1:13-19). Ukatsti, Job chacharojj jan qollkaña llejjti usumpiw Supayajj usuntayäna (Job 2:7). Esposapasa, kimsa jan wali amigonakapasa, arunakapampiw jukʼampi aynachtʼayapjjäna (Job 2:9; 3:11; 16:2).

10. 1) ¿Diosar taqe chuyma servitap kunjamsa Job chachajj uñachtʼayäna? 2) ¿Kunatsa Job chachar cheqañchañajj wakisïna?

¹⁰ Supayan arunakapajj janiw cheqäkänti, Job chachajj walsa tʼaqeskchïnjja, janipuniw Diosat jitheqtkänti (Job 27:5, NM). Ukampis kunas jukʼamp wakiskirïna ukwa mä tiempojj armtʼasïna. Jupa pachpatwa jukʼamp llakisïna, janiw juchanïkti sänwa. Kunatsa tʼaqesiskta uk yatiñajaw wakisi sarakïnwa (Job 7:20; 13:24). Jiwasajj inas akham amuysna, Job chachajj wal tʼaqesïna ukatwa ukham sispachäna sasa. Ukampis Diosajj uka amuyunakap cheqañchañ wakisitapwa uñjäna. ¿Kamsasas ewjjtʼpachäna?

11, 12. 1) ¿Jehová Diosan yanaptʼapampejj kunjamsa Job chachajj amuyjjäna? 2) ¿Ewjjtʼanak kunjamsa Job chachajj katoqasïna?

¹¹ Diosajj Job chachar kamsänsa ukajj Job 38-41 capitulonakankiwa. Ukampis janiw kunatsa tʼaqesïna uk qhanañchkänti. Jehová Dios nayraqatanjja, Job chachajj janiw kunäkänsa uk amuyañapatakiw yanaptʼäna.  Tʼaqeski ukat sipansa kunas jukʼampi wakiskiri uk amuyañapatakiw Diosajj yanaptʼarakïna (Job 38:18-21 liytʼañataki). Ukatwa Job chachajj amuyunakap cheqañchasjjäna.

¹² Diosajj janiw ukham sañapäkänti, Job chachajj wal tʼaqesïna sasajj janiw amuyañasäkiti. Janirakiw Job chachas ukham amuykänti. Antisas sum amuytʼasjjäna, cheqañchatas sum katoqasirakïna. Jupa kikparakiw akham säna: “Jichhajj chuymas usuta parlatanakajjatsa jumat jayana pisayastjja, laqʼa qhellaru qontʼata” sasa (Job 42:1-6). Uka nayrajj Elihú sat waynaw cheqañcharakïna (Job 32:5-10). Job chachajj Jehová Diosan ewjjtʼap taqe chuyma katoqaskäna, amuyunakapsa cheqañchasirakïna uka qhepatjja, Job chachajj taqe chuyma serviripätapwa Jehová Diosajj mayninakar yatiyäna (Job 42:7, 8).

13. ¿Kunas Job chachar qhepakam yanaptʼaskakïna?

¹³ Job chachan tʼaqesiñapajj tukusjjchïnsa, Jehová Diosan arunakapajj yanaptʼaskakïnwa. “Diosasti Job chacharojj jukʼampwa bendisjjarakïna nayra maranakat sipansa”. Tiempompisti mayampwa ‘paqallqo yoqanakani, kimsa phuchanakanëjjäna’ (Job 42:12-14, NM). Job chachajj uka wawanakapar walsa munaskchïnjja, Supayajj jiwaykäna uka nayra wawanakapat llakisiskakpachänwa. Kunjamsa jupajj tʼaqesïna uksa amtarakpachänwa. Khitis ukham tʼaqesiyäna uk sumsa Job chachajj amuyjjchïnjja, inas kunatsa ukham tʼaqesiñajajj wakispachäna sasin jisktʼaschïna. Ukampis Jehová Diosan arunakap amtañaw yanaptʼpachäna. Ukarakiw chuymachtʼpachäna, kunas jukʼamp wakiskiri uk amtañatakis yanaptʼarakpachäna (Sal. 94:19).

14. ¿Kunsa Job chachan experienciapat yateqsna?

¹⁴ Job chachan experienciapat amuytʼañajj yanaptʼistuwa, jan wali amuyunakasa cheqañchañatakis yanaptʼarakistuwa. Job librojj Bibliankir mayni libronakjamarakiwa, “jiwasar yatichañatakiw qellqasiwayi, ukhamat kuntï Diosajj jutïrin churkistani uk suytʼañasataki. Uka Qellqatanakaw aguantañasatak yanaptʼistu, chuymachtʼarakistu” (Rom. 15:4). ¿Kunsa Job librojj yatichistu? Llakinakasat sinti lupʼiñajja, Jehová Diosajj taqe kunjjar munañanïtap arjjatañajj kunja wakiskirisa ukwa armayistaspa. Wali llakinakan uñjaskasasa, Job chachat yateqasisin Diosar taqe chuyma serviskakisajja, Jehová Diosajj taqe kunjjar munañanïtapwa arjjatasktanjja.

15. ¿Kunatsa tʼaqesiñanakan aguantañasajj wakisi?

¹⁵ Job chachan experienciapat amuytʼañajj wal yanaptʼistu. Tʼaqesiñanakan uñjaskañäni ukhajja, janiw Jehová Diosas jiwasatak  coleratäkaspa ukham amuyañasäkiti. Tʼaqesiñanakan aguantasajja, Jehová Diosajj taqe kunjjar munañanïtapwa arjjatasktanjja (Pro. 27:11, NM). Tʼaqesiñanakan aguantasajja Jehová Diosaruw kusisiytanjja, Diosan arsutanakaparus taqe chuymaw confiyaraktanjja (Romanos 5:3-5 liytʼañataki). “Jehová Diosajj wali munasir chuymaniwa, wali khuyaptʼayasirirakiwa”, ukaw Job chachan sarnaqäwipan amuyasi (Sant. 5:11). Ukhamasti, taqe kunjjar munañanïtap arjjatapki ukanakarojja, Diosaw bendisini. Uk yatiñajj taqe jan walinakan pacienciampi aguantaskakiñatakiw yanaptʼistu (Col. 1:11).

16. Jehová Diosajj taqe kunjjar munañanïtap arjjatañaw jukʼamp wakiskiri, ¿kunatsa uk amtañasapuni?

¹⁶ Wali llakinakan uñjasktan ukhajja, Jehová Diosajj taqe kunjjar munañanïtap arjjatañajj kunja wakiskirisa ukwa amtañasa. Mä llakisat sinti lupʼsnajja, wali jachʼa problemäkaspas ukhamwa amuysna. Llakinakan uñjasisajja, Jehová Diosajj taqe kunjjar munañanïtap arjjatañ jukʼamp wakiskirïtap amtañasapuniwa.

17. Kun lurañtï Diosajj jaytkistu ukampi phoqañajja, ¿kunjamsa kunatï jukʼamp wakiskirïki uk jan armañatak yanaptʼistu?

¹⁷ Kun lurañtï Jehová Diosajj jaytawaykistu ukampi taqe chuyma phoqañaw kunas jukʼamp wakiskiri uk jan armañatak yanaptʼistani. Renee sat mä kullakan experienciapat parltʼañäni, wilaw pʼeqepan phalläna (derrame cerebral), wal usurakïna, ukatsti cáncer usunirakïnwa. Qollayasir sarirïkäna ukhajja, hospitalan trabajirinakaru, mayni usutanakaru, visitirinakaruw Bibliat yatiyirïna. Mä kutejja, pä seman chikatani hospitalankkäna ukhajj 80 horanakwa yatiyäna. Jiwjjañap yatiskchïnsa, kunas jukʼamp wakiskiri uk janiw armkänti. Ukaw jan sinti llakisiñatakis yanaptʼarakïna.

18. ¿Kunsa Jennifer kullakan experienciapajj yatichistu?

¹⁸ Sapürurakiw kuna jan walinakansa uñjastanjja, ukhamanakan uñjasisas Jehová Diosajj taqe kunjjar munañanïtap amtañaw yanaptʼarakistaspa. Jennifer kullakat parltʼañäni, jupajj markapar sarjjañatakiw aeropuerton kimsa uru suyäna, avionan sarañapajj cancelasjjewa sasaw sapürus suyayapjjäna. Jennifer kullakajj sapaki, qarita ukhamaw uñjasïna. Ukhaman uñjasisajj inas llakimp aynachtʼchispäna, ukampis aeropuerton suyaskir jaqenakar Bibliampi yatiyañatakiw Jehová Diosar yanaptʼa mayïna. Waljaniruw yatiyäna, walja qellqatanak jaqenakar churarakïna. Jennifer kullakajj akham siwa: “Aeropuerton suyasajj qarjjayätwa, ukampis Jehová Diosaw arunakapat jaqenakar yatiyañatakejj yanaptʼitäna, ukasti mä bendicionapuniwa” sasa. Uka kullakajja, llakin uñjaskasas kunas jukʼamp wakiskiri uk janiw armkänti.

19. ¿Kunatsa mayni religionanakampi jan igualäktanjja?

¹⁹ Jehová Diosajj taqe kunjjar munañanïtap qhanstañapajj kunja wakiskirisa ukjja markapakiw sum amuyi. Ukatwa mayni religionanakampi jan igualäktanti. Sapa mayniw Jehová Dios sapaki taqe kunjjar munañanïtap arjjatañasa.

20. ¿Taqe chuyma arjjatatas kunjamsa Jehová Diosajj uñji?

²⁰ Tʼaqesiñanakan uñjaskasas aguantaskaktan taqe chuyma serviskaktan ukhajja, Jehová Diosajj taqe kunjjar munañanïtapwa arjjatasktanjja, uk uñjasasti Jehová Diosajj wal kusisiraki (Sal. 18:25, NM). Jutïr yatichäwinjja, Jehová Diosajj taqe kunjjar munañanïtap arjjatañajj kunatsa wali wakiskiri, kunjamsa arjjataraksna ukwa yatjjataskañäni.