1, 2. a) Mun lo kɔrɔtanin lo ka tɛmɛ fɛɛn bɛɛ kan? b) Mun na o kɔrɔtanin lo an fɛ?

MƆGƆ caaman fɛ bi, wari lo kɔrɔtanin lo ka tɛmɛ fɛɛn bɛɛ kan. U ɲɛnako fɔlɔ ye ka nafolo lajɛn. Min b’u bolo fana, u t’a fɛ dɔ ka bɔ o la. Dɔ wɛrɛw fɛ, min kɔrɔtanin lo ka tɛmɛ fɛɛn bɛɛ kan, o ye u ka denbaya, u ka kɛnɛyako wala u b’a fɛ ka laɲinita minw dafa.

² Nka, fɛɛn min kɔrɔtanin lo ka tɛmɛ fɛɛn bɛɛ kan, o ye ka Jehova ka masabaya lafasa. N’an ma banba, an be se ka ɲinɛ o kɔ. O be se ka kɛ cogo di? An be koo minw kɛ loon o loon, o be se k’an ka wagati bɛɛ ta. An ka gwɛlɛyaw fana be se k’an hakili ɲagami. O bɛɛ be se k’a to an be ɲinɛ pewu ko fɛɛn min kɔrɔtanin lo kosɔbɛ, o ye ka Jehova ka masabaya lafasa. N’an be Jehova ka masabaya lafasa, an bena se k’an ka loon o loon gwɛlɛyaw muɲu koɲuman ani an bena an magwɛrɛ Jehova la kosɔbɛ.

3. Sutana ye mun lo fɔ Ala ka kuntigiya koo la?

³ Sutana ka murutili ye ɲiningali dɔ lawuli: Joo be Jehova fɛ ka kuntigiya kɛ adamadenw kun na wa? A ko Ala tɛ kuntigiya kɛ cogo tilennin na ani ko a tɛ sɔn ka fɛɛn ɲumanw  di a ka danfɛnw ma. Sutana y’a fɔ ko ni adamadenw tun be u yɛrɛ mara, u tun bena ninsɔndiyaba sɔrɔ kosɔbɛ (Zɛnɛzi 3:1-5). A y’a fɔ fana ko mɔgɔ si tɛ kantigiya kɛra Ala ye n’a dusukun bɛɛ ye. A ko gwɛlɛyaw wagati la, mɔgɔw bena ban Jehova ka kuntigiya ma (Zɔbu 2:4, 5). O kosɔn, Ala ye wagati to Sutana ye walisa bɛɛ k’a lɔn ko ni Ala tɛ adamadenw ka Kuntigi ye, u bena tɔɔrɔ u ka ɲɛnamaya kɔnɔ.

4. Mun na a kɔrɔtanin lo Jehova ka masabaya ka lafasa?

⁴ Jehova kɔni b’a lɔn ko Sutana ka kumaw ye ngalon lo ye. N’o lo, mun na a ye wagati to Sutana ye walisa a k’a yira ni joo b’a fɛ? A y’o kɛ sabu o koo ɲɛsinna adamadenw ni mɛlɛkɛw bɛɛ ma (Zaburuw 83:19 kalan). Adama ni Awa banna Jehova ka kuntigiya ma. Kabi o wagati la, mɔgɔ caaman banna Jehova ka kuntigiya ma fana. O be se k’a to mɔgɔ dɔw b’a miiri ko joo be Sutana fɛ. Ni o sɔsɔliko ma ɲɛnabɔ adamadenw ni mɛlɛkɛw fɛ, bɛnbaliya tɛna ban jamanaw, siyaw, denbayaw ani mɔgɔw ni ɲɔgɔn cɛ. Nka, ni Jehova ka masabaya lafasara, bɛɛ bena sɔn a ka kuntigiya tilennin ma fɔɔ abada. Hɛɛrɛ bena kɛ duniɲa kuru bɛɛ kɔnɔ.—Efɛz. 1:9, 10.

5. An ka ɲi ka mun lo kɛ walisa ka Jehova ka masabaya lafasa?

⁵ Joo min be Jehova fɛ ka kuntigiya kɛ, o bena lafasa. Nka, Sutana ni adamadenw ka kuntigiya tɛna ɲɛ u bolo hali dɔɔni. Ala bena daan sigi o la. Ala be kuntigiya min kɛra Masiya ka Masaya sababu fɛ, o bena ɲɛ. Mɔgɔ kantigiw bena a yira ko adamadenw be se ka kantigiya kɛ Ala ye ani u bena sɔn Ala ka kuntigiya ma (Ezayi 45:23, 24). Minw be Ala ka masabaya lafasa ni kantigiya ye, i b’a fɛ ka kɛ olu dɔ ye wa? Siga si t’o lo. Walisa ka kantigiya kɛ Ala ye, an ka ɲi ka Jehova ka masabaya koo kɛ an ɲɛnako fɔlɔ ye. An k’a to an hakili la fana ko o lo kɔrɔtanin lo kosɔbɛ.

6. Ka Jehova ka masabaya lafasa, o kɔrɔtanin lo ka tɛmɛ mun lo kan?

⁶ Ka Jehova ka masabaya lafasa, o kɔrɔtanin lo ka tɛmɛ fɛɛn bɛɛ kan. A yɛrɛ kɔrɔtanin lo ka tɛmɛ an kelen kelen bɛɛ ka hɛɛrɛko kan. Yala o kɔrɔ ko an ka kisili tɛ foyi ye Ala ɲɛɛ kɔrɔ ani ko a t’a mako don an na wa? Ayi. Mun na an b’o fɔ?

7, 8. Ni Jehova ka masabaya lafasara, o bena an nafa cogo di?

⁷ Jehova be adamadenw kanu kosɔbɛ ani u koo ka gwɛlɛ a ma. A sɔnna k’a Dencɛ di ka kɛ saraka ye walisa an ka se ka ɲɛnamaya banbali sɔrɔ (Zan 3:16; 1 Zan 4:9). Ni Jehova m’a ka layiduw dafa, o bena joo di Sutana n’a kɔmɔgɔw ma. Sutana y’a fɔ ko Ala ye ngalontigɛla ye, ko a be adamadenw jɛn fɛɛn ɲuman na ani ko Ala tɛ kuntigiya kɛ cogo tilennin na. Mɔgɔ murutininw be Jehova lɔgɔbɔ a ka layiduw koo la ko: “A m’a fɔ ko a bena kɔsegi ka na wa? A do be min? An faaw bɛɛ sara ka ban. Halibi koow b’u cogokɔrɔ le la kabini diɲɛ dantuma.” (2 Piyɛri 3:3, 4). Walisa k’a ka masabaya lafasa, Jehova bena mɔgɔ kantigiw kisi! (Ezayi 55:10, 11 kalan). Ka fara o kan, Jehova ka masabaya basiginin be kanuya lo kan. O kosɔn, an be se ka la a la ko minw be kantigiya kɛ a ye, u koo ka di a ye, a bena to k’u kanu ani k’a janto u la tuma bɛɛ.—Ɛkiz. 34:6.

⁸ An b’a jati ko Jehova ka masabaya kɔrɔtanin lo kosɔbɛ. O kɔrɔ tɛ ko an b’an ka kisili mafiɲɛyara wala ko nafa foyi  t’an na Ala ɲɛɛ kɔrɔ. Nka, an b’a lɔn ko Ala ka masabaya n’an ka kisili cɛ, min kɔrɔtanin lo ka tɛmɛ, o ye Ala ka masabaya lo ye. An ka ɲi ka koow jati o cogo la n’an b’a fɛ ka Ala ka masabaya kɛ an ɲɛnako fɔlɔ ye ani k’a yira ko an sɔnna Jehova ka kuntigiya tilennin ma.

9. Sutana ye mun lo fɔ Zɔbu koo la? (Jaa lajɛ, barokun daminɛ na.)

⁹ A kɔrɔtanin lo an ka kɛ ni miiriya tilennin ye Jehova ka masabaya koo la. Zɔbu ka kitabu b’o lo yira. Bibulu ka kitabu minw kɔnna ka sɛbɛ, Zɔbu ka kitabu b’u cɛma. O kitabu kɔnɔ, Sutana y’a fɔ ko ni tɔɔrɔba be Zɔbu kan, a bena ban Ala la. A ko Ala yɛrɛ k’a kɛ Zɔbu be tɔɔrɔ. Nka Jehova m’o kɛ. A y’a to Sutana yɛrɛ k’o kɛ. Jehova ko: “A bololafɛnw bɛɛ b’i bolo.” (Zɔbu 1:7-12 kalan). Dɔɔni o kɔ, Zɔbu ka baaradenw bɛɛ sara, a bɔnɛna a ka bololafɛnw bɛɛ la ani a ka deen kanulen tan sara. Sutana y’o koow kɛ cogo dɔ la walisa Zɔbu k’a miiri ko a ka tɔɔrɔw ye Ala yɛrɛ lo nɔɔ ye (Zɔbu 1:13-19). O kɔ, Sutana ye bana jugu dɔ bila Zɔbu la (Zɔbu 2:7). Zɔbu muso n’a teri jugu saba ka jigitigɛ kumaw ye koo tɔɔ bɛɛ juguya.—Zɔbu 2:9; 3:11; 16:2.

10. a) Zɔbu y’a yira cogo di ko a be kantigiya kɛ Ala ye? b) Nka, a filila mun lo la?

¹⁰ Mun lo sɔrɔla o la? Koow y’a yira ko Sutana ye min fɔ Zɔbu koo la, o ye ngalon lo ye. Zɔbu ka tɔɔrɔ bɛɛ n’a ta, a tora ka Jehova bato ni kantigiya ye (Zɔbu 27:5). Nka koo min kɔrɔtanin lo, Zɔbu ɲinɛna o kɔ wagati dɔ la. A tora k’a fɔ ko ale ma koo jugu si kɛ ani ka Ala ɲininga fɛɛn min kosɔn ale be tɔɔrɔla (Zɔbu 7:20; 13:24). N’a sɔrɔ an bena a fɔ ko an be Zɔbu ka dusukunnakow faamu. Nka, Jehova tun b’a lɔn ko Zɔbu ka miiriyaw tun tilennin tɛ ani a y’a dɛmɛ k’a ka miiriyaw latilen. A y’o kɛ cogo di do?

11, 12. Jehova ye Zɔbu dɛmɛ ka mun lo faamu? Zɔbu y’o koo ta cogo di?

¹¹ Jehova ye min fɔ Zɔbu ye, o be sɔrɔ Zɔbu sapitiri 38-41 kɔnɔ. A ma fɔ yɔrɔ si ko Ala y’a fɔ Zɔbu ye fɛɛn min kama a be tɔɔrɔla. Jehova ka kumaw kuun tun tɛ k’a ɲɛfɔ Zɔbu ye fɛɛn min kama a be tɔɔrɔla i n’a fɔ mɔgɔ min b’a ɲinina ka joo sɔrɔ. Nka, Jehova tun b’a fɛ ka Zɔbu dɛmɛ a k’a faamu ko a tɛ se ka suma ni ale Ala kɔrɔtaninba ye. A ye Zɔbu dɛmɛ fana k’a faamu ko min kɔrɔtanin lo ka tɛmɛ fɛɛn bɛɛ kan, o tɛ ale Zɔbu ka tɔɔrɔ ye (Zɔbu 38:18-21 kalan). Jehova ka kumaw ye Zɔbu dɛmɛ k’a ka miiriyaw latilen.

 ¹² Jehova ye Zɔbu ka miiriyaw latilen hali ka sɔrɔ Zɔbu ye kɔrɔbɔliba muɲu. Yala o kɔrɔ ko Jehova ma Zɔbu minɛ ka ɲɛ wa? Ayi! Zɔbu yɛrɛ m’o miiri fana. Zɔbu ka gwɛlɛyaw bɛɛ n’a ta, a y’a daminɛ ka Jehova waleɲuman lɔn a ka ladiliw kosɔn. A ko: “Ne be nimisa n ka fɔta la. N be lɔ n ka fili la ka nimisa ka sigi buguri ni bugurigwɛ kan dusukasi bolo.” Zɔbu nimisara sabu Jehova y’a ladi ni kanuya ye (Zɔbu 42:1-6). Ka kɔn o ɲɛ, Eliyu fana tun ye Zɔbu ladi walisa k’a bila sira ɲuman kan (Zɔbu 32:5-10). Zɔbu ye mɛnni kɛ Ala fɛ ani a y’a ka miiriyaw yɛlɛma. O kosɔn, Jehova y’a yira ko Zɔbu koo ka di ale ye sabu a ye kantigiya kɛ kɔrɔbɔliw bɛɛ n’a ta.—Zɔbu 42:7, 8.

13. Jehova ka ladiliw ye Zɔbu nafa cogo di a ka tɔɔrɔ bannin kɔ?

¹³ Jehova ka ladiliw ye Zɔbu nafa hali a ka tɔɔrɔ bannin kɔ. Cogo di do? Bibulu b’a fɔ ko: “[Jehova] ye Zɔbu ta ɲa kosɔbɛ ka tɛmɛ fɔlɔ kan.” Nka, Zɔbu ye wagati dɔ kɛ bana na ka sɔrɔ ka kɛnɛya. A tun bɔnɛna fɛɛn minw na, a ma segi k’u bɛɛ sɔrɔ loon kelen na sabu o kɔ, a nana “dencɛ wolonwula ni denmuso saba sɔrɔ.” (Zɔbu 42:12-14). Siga t’a la, Sutana tun ye Zɔbu deen minw faga, u lɔgɔ tun be Zɔbu minɛ. N’a sɔrɔ wagatijan kɔnɔ, a hakili tun be jigi a ka tɔɔrɔ la. Hali n’a nana faamu fɛɛn min kama a tɔɔrɔla, n’a sɔrɔ tuma dɔw la, a tun b’a yɛrɛ ɲininga fɛɛn min kama ale tɔɔrɔla ten. A ka kɛ min o min ye, a miirila Ala ka ladiliw la. N’a sɔrɔ o lo y’a dɛmɛ ka kɛ ni miiriya tilennin ye a ka tɔɔrɔ koo la ani ka dususalo sɔrɔ.—Zab. 94:19.

14. Zɔbu ka koo be mun lo yira an na?

¹⁴ Min ye Zɔbu sɔrɔ, n’an be miiri o la, o be se k’an dɛmɛ ka kɛ ni miiriya tilennin ye an ka gwɛlɛyaw koo la ani k’an dusu saalo. Jehova y’a kɛ u ye Zɔbu ka maana sɛbɛ Bibulu kɔnɔ walisa “ka hakili d’an ma, janko an jaa ka gwɛlɛya ani ka muɲu, ka jigi sɔrɔ o barika la.” (Ɔrɔm. 15:4). O be mun lo yira an na? O b’a yira ko an be koo minw kɛ loon o loon, an man ɲi k’a to o k’an ka wagati bɛɛ ta. N’o tɛ, an bena ɲinɛ ko Jehova ka masabaya lo kɔrɔtanin lo ka tɛmɛ fɛɛn bɛɛ kan. Ka fara o kan, an kelen kelen bɛɛ ka ɲi ka kantigiya kɛ Jehova ye gwɛlɛyaw bɛɛ n’a ta i ko Zɔbu. O la, an b’a yira ko an be Jehova ka masabaya lafasa.

15. N’an be kantigiya kɛ gwɛlɛyaw wagati la, nafa jumanw lo b’o la?

¹⁵ Nafa min b’a la ka kantigiya kɛ Jehova ye, n’an be miiri o la, mun na o  b’an dusu saalo? Sabu o b’a yira ko kuun b’an ka tɔɔrɔ la. An ka tɔɔrɔ t’a yira ko an koo man di Jehova ye dɛ! Nka, u be sababu di an ma ka Jehova ka masabaya lafasa (Talenw 27:11). An ka muɲuli b’a to an koo be diya Jehova ye ani o b’an ka jigiya sabati (Ɔrɔmukaw 5:3-5 kalan). Zɔbu ka koo b’a yira ka gwɛ ko “[Jehova] ye ɲumanya ni makaritigi ye.” (Zaki 5:11). O kosɔn, an be se ka la a la ko minw bɛɛ b’a ka masabaya lafasa, a bena olu duga. N’an b’o to an hakili la, o bena an dɛmɛ “ka koo bɛɛ muɲu ni ninsɔndiya ye.”—Kɔlɔs. 1:11.

16. Mun na an ka ɲi k’a to an hakili la ko a kɔrɔtanin lo an ka Jehova ka masabaya lafasa?

¹⁶ Tiɲɛn na, a man nɔgɔ k’a to an hakili la ko an ka ɲi ka Jehova ka masabaya lafasa. Tuma dɔw la, an ka gwɛlɛyaw be se k’an hakili ɲagami. Koo fitinin dɔ be se ka kɛ gwɛlɛyaba ye an ɲɛɛ na, n’an be to ka miiri o la. O kama, an k’an seko kɛ k’a to an hakili la ko min kɔrɔtanin lo gwɛlɛyaw wagati la, o ye ka Ala ka masabaya lafasa.

17. Ka baara kɛ Jehova ye, o b’an dɛmɛ cogo di k’a to an hakili la ko an ka ɲi ka Jehova ka masabaya lo lafasa?

¹⁷ An ka to ka baara kɛ Jehova ye. O lo bena an dɛmɛ k’a to an hakili la ko, ka Jehova ka masabaya lafasa, o lo kɔrɔtanin lo ka tɛmɛ fɛɛn bɛɛ kan. Ɲɛyirali fɛ, bana jugu dɔ ye balimamuso dɔ minɛ min tɔgɔ ko Renee. A sɛgɛnna kansɛri bana ni tɔɔrɔ kosɔn. K’a to dɔgɔtɔrɔso la, a ye mɔgɔ nunu waaju: mɔgɔ minw be baara kɛ yen, banabagatɔ tɔɔw ani minw tun be na bɔ banabagatɔw ye. Wagati dɔ la, a ye lɔgɔkun fila ni tilancɛ kɛ dɔgɔtɔrɔso dɔ la ani a ye mɔgɔw waaju lɛri 80 kɔnɔ. Hali n’a satuma tun surunyana, Renee ye Jehova ka masabaya koo to a hakili la. O lo y’a dɛmɛ k’a ka tɔɔrɔ muɲu.

18. Jennifer ka koo b’a yira an na cogo di ko nafa b’a la ka Jehova ka masabaya lafasa?

¹⁸ An be se ka Jehova ka masabaya lafasa fana an ka loon o loon gwɛlɛyaw la. Balimamuso dɔ tɔgɔ ko Jennifer. A tun ka ɲi ka awiyɔn min ta ka taga dugu la, a y’o kɔnɔ fɔɔ tile saba. Siɲɛ caaman, u ko a ka awiyɔn tun ka kan ka wuli, nka, u be tila k’a fɔ ko a tɛna wuli tugun. Ɲɛnafin tun b’a la sabu a lɔnbaga si tun tɛ n’a ye ani a tun sɛgɛnnin lo. A tun be se ka jɔrɔ a yɛrɛ koo la. Nka, a ye delili kɛ walisa mɔgɔ minw tun be kɔnɔni kɛra fana, a ka se k’olu waaju. Mun lo sɔrɔla o la do? A ye mɔgɔ caaman waaju ani a ye gafe caaman to u ye. A ko: “Ne y’a ye ko Jehova ye n’ duga o gwɛlɛya wagati la. A ye n’ jaa gwɛlɛya walisa n’ ka se k’ale kofɔ.” A sera k’o kɛ sabu a tora ka miiri Jehova sagonata koo la.

19. Jehova sagokɛlaw b’a ka masabaya jati cogo di?

¹⁹ Jehova sagokɛlaw dɔrɔn lo b’a faamu ko a kɔrɔtanin lo kosɔbɛ k’a ka masabaya lafasa. O lo b’a yira k’u ye Jehova batobaga sɔbɛw ye. O kosɔn, an kelen kelen bɛɛ k’an seko bɛɛ kɛ ka Jehova ka masabaya lafasa.

20. I be jijali minw kɛra walisa ka Jehova ka masabaya lafasa, Jehova be mun lo miiri o koo la?

²⁰ I b’a yira ko i be Jehova ka masabaya lafasa, n’i b’i seko kɛ ka kantigiya kɛ Jehova ye ani ka kɔrɔbɔliw muɲu. I ka la a la ko o ka di Jehova ye kosɔbɛ (Zab. 18:26). Mun na an ka ɲi ka Jehova ka masabaya lafasa n’an dusukun bɛɛ ye? An be se k’o kɛ cogo di? Barokun nata la, an bena o ɲiningaliw jaabiliw lajɛ ka ɲɛ tugun.