1, 2. (a) Lelo i mwanda’ka wa mvubu mpata utala bantu bonso? (b) Mwanda waka uno mwanda i wa mvubu kotudi?

BANTU bavule dyalelo, bamwene lupeto bu kintu kya mvubu mpata. Kyo kintu kyobalangulukila’po ne kukambakanya mutyima. Bajimijanga kitatyi kyabo na kukimba lupeto luvule nansha kulama lupeto lobadi nalo kala. Bantu bakwabo bamwene’mba, kisaka, bukomo bwa ngitu, nansha byobalanga kulonga mu būmi byo bintu bya mvubu mpata kobadi.

² Inoko kudi kintu kya mvubu kupita bino byonso’bi. I mwanda utala kubingija bubikadi bwa Yehova. Kuta nyeke mutyima ku uno mwanda kyo kintu kya mvubu mpata. Inoko shi ketutele’kopo mutyima, tubwanya kuvudilwa bya kulonga mu būmi bwetu bwa difuku ne difuku nansha kukambakanya mutyima bininge pa makambakano etu twailwa ne mvubu ya uno mwanda mine. Shi tukwatakanye bubikadi bwa Yehova, nabya tukapēlelwa kulwa na makambakano a mu būmi bwetu bwa difuku ne difuku kadi tukekala pabwipi na Yehova.

3. Le i bika bifwatakanyanga Satana pa bubikadi bwa Yehova?

³ Satana Dyabola wātatene lupusa lwa Yehova lwa kuludika. Satana usakanga bantu balange amba Yehova i Muludiki mubi ne amba ketusakilangapo bintu biyampe. Satana wāfwatakenye amba bantu bakekala na nsangaji shi beludike abo bene. (Ngalwilo 3:1-5) Ufwatakanyanga kadi amba i kutupu muntu ukōkele Leza bya binebine ne amba muntu yense ukapela Leza bu Muludiki wandi shi atanwe na masusu mavule mu būmi. (Yoba 2:4, 5) O mwanda Yehova i muleke papite bidi kitatyi pa kusaka muntu ense emwene patōkelela’mba, pampikwa buludiki bwa Leza, būmi kebubwanyapo kulumbuluka.

4. I kika kine kifwaninwe kupwijija mwanda utala bubikadi?

⁴ Na bubine, Yehova uyukile amba byonso byenda na Dyabola i bya bubela. Penepa mwanda waka Yehova i mulekele Satana kitatyi kya kulombola milangwe yandi? Kilondololwa kitala muntu yense momwa mūlu ne pano pa ntanda pene. (Tanga Ñimbo ya Mitōto 83:18.) Ba Adama ne Eva bāpelele buludiki bwa Yehova, kadi tamba pene’pa bantu bavule baloñanga uno muswelo. Kino kibwanya padi kulengeja bantu bamo balange amba Dyabola udi na bubinga. Uno mwanda byoukivutakanya bantu ne bamwikeulu ñeni, o mwanda kekubwanyapo kwikala ndoe ne bumo. Inoko kitatyi kikabingijibwa bubikadi bwa Yehova, muntu yense ukekala nyeke munshi mwa buludiki bwandi bwa kutendelwa. Kukekalanga ndoe mūlu ne pano pa ntanda ponso.​—Efisesa 1:9, 10.

5. Le i muswelo’ka otutalwa na mwanda utala bubikadi?

⁵ Bubikadi bwa Leza bukabingijibwa, ino buludiki bwa Satana ne bwa bantu bukaponejibwa ne kufundulwa’ko lonso. Buludiki bwa Leza bukanekenya kupityila ku Bulopwe bupelwe Meshiasa. Bantu ba kikōkeji bakabingija’mba bantu babwanya kulama bululame bwabo ne kukwatakanya na kikōkeji buludiki bwa Leza. (Isaya 45:23, 24) Lelo tusakanga netu kubadilwa mu bano bantu ba kikōkeji? Na bubine i amo! Ino, tusakilwa kwivwanija mvubu minemine ya uno mwanda.

6. Le kubingija bubikadi bwa Yehova kudi na mvubu muswelo’ka?

⁶ Kubingija bubikadi bwa Yehova i kintu kya mvubu mpata kupita nsangaji yetu batwe bene. Inoko kino kekishintululapo amba lupandilo lwetu keludipo na mvubu nansha amba Yehova ketutelepo mutyima bya binebine. Le tubekiyuka namani?

7, 8. I muswelo’ka otukamwena mu kubingijibwa kwa bubikadi bwa Leza?

⁷ Yehova usenswe bantu bininge. Na bubine, twi balēme mpata kwadi, o mwanda wētupele wandi Mwana amba tukamone būmi bwa nyeke. (Yoano 3:16; 1 Yoano 4:9) Shi Yehova aleke kufikidija milao yandi ya kumeso, nabya Satana ne balwana na Leza bakwabo bakekala na bubinga. Satana unenanga’mba Yehova i mbepai, ufyanga bintu biyampe ku bantu, kadi wibaludikanga mu muswelo mubi. Balwana na Yehova bafutululanga milao yandi na kunena’mba: “Lelo kitatyi kya kwikala’po kwandi kyalailwe kidi pi? Mwanda tamba difuku dyālēle bakulutuba betu mu tulo twa lufu, bintu byonso byendanga muswelo  umo onka na mobyādi bikadile tamba ku ngalwilo ya bupangi.” (2 Petelo 3:3, 4) Inoko Yehova aye, usa kufikidija milao yandi. I mulombole’kyo kala’mba kubingijibwa kwa bubikadi bwandi kukaletela bantu ba kikōkeji lupandilo. (Tanga Isaya 55:10, 11.) Bubikadi bwa Yehova i bwa buswe. O mwanda tubwanya kukulupila’mba ukasanswa nyeke bengidi bandi ba kikōkeji ne kwibamona na mvubu.​—Divilu 34:6.

⁸ Kwikala kwikele bubikadi bwa Yehova bu mwanda wa mvubu kekushintululapo amba lupandilo lwetu i lwa kubulwa mvubu ku meso andi. Yehova witutele mutyima bya binebine. O mwanda tufwaninwe kulama mu ñeni bintu bya mvubu mikatampe ne kukwatakanya na kikōkeji bubikadi bwa Yehova.

9. Le i bika byānenene Satana padi Yoba? (Tala kifwatulo ku ngalwilo.)

⁹ I kya mvubu twikale na mumweno muyampe pa bubikadi bwa Yehova. Tukevwanija kino na kutanga mukanda wa Yoba, mwine ubadilwa mu mikanda ya mu Bible mibajinji kulembwa. Tutanga’mo amba Satana wānenene amba shi Yoba asusuke bininge, nabya ukapela Leza. Satana wānenene’nka ne Leza asusule Yoba. Yehova kālongelepo kino, inoko wālekele Satana akatompe Yoba na kumunena’mba: “Byonsololo byadi nabyo bidi mu dikasa dyobe.” (Tanga Yoba 1:7-12.) Papita’tu kitatyi kityetye, Yoba wājimija bengidi bandi ne bintu byandi byonso. Kupwa bamusapwila’mba bandi bana dikumi i bafwe. Satana wādi usaka kumwekeja’mba Leza ye wālengeje bino byamalwa. (Yoba 1:13-19) Kupwa Satana wābeleka Yoba luba lusansa kadi lwa munyanji. (Yoba 2:7) Pa kubipija myanda, mukaja Yoba ne balunda nandi basatu ba bubela bāmunenene binenwa bitapa kadi bityumuna mutyima.​—Yoba 2:9; 3:11; 16:2.

10. (a) I muswelo’ka wālamine Yoba bululame bwandi kudi Leza? (b) Mwanda waka Yoba wādi usakilwa kulemununwa?

¹⁰ Le byānenene Satana i bya bine? Mhm. Nansha Yoba byaāsusukile bininge na byamalwa, kātombokelepo Yehova. (Yoba 27:5) Inoko kitatyi kimo, Yoba wāidilwe bintu bya mvubu mpata ne kwilangila aye mwine bipitepite. Wādi unena’nka kunena’mba i kutupu kibi kyalongele. Kadi Yoba wāmwene amba ufwaninwe kuyuka kine kyasusukila. (Yoba 7:20; 13:24) Padi tubwanya kwivwanija senene mweivwanine Yoba. Inoko, Yehova wāmwene amba Yoba udi na mumweno mubi, kupwa wāmulemununa. Le wāmulemunwine namani?

11, 12. Le Yehova wākweshe Yoba ate mutyima ku bika? Le Yoba wālongele’po namani?

¹¹ Tubwanya kutanga byobya byobālombwele  Yoba kudi Yehova mu mukanda wa Yoba​—shapita 38 kutūla ku 41. Yehova kāshintulwidilepo Yoba kine kyaādi ususukila. Inoko, Yehova wādi usaka kumukwasha evwanije mwaikadile mutyetyetyetye ku meso a Leza. Wāfundije Yoba amba kudi mwanda wa mvubu mikatampe kupita makambakano andi. (Tanga Yoba 38:18-21.) Binenwa bya Yehova byākweshe Yoba alemunune mumweno wandi.

¹² Lelo Yehova wābudilwe kanye pa kwisamba na Yoba uno muswelo aye papo ususuka? Ke amopo, ne Yoba mwine kālangilepo uno muswelo. Yoba wātejeje madingi a Yehova ne kwiakwata na mutyika. Wāfula’nka ne kukunena’mba: “Nālamuka pa mutyima kwitūta luvumbi ne buto.” (Yoba 42:1-6) Kadi, nkasampe umo witwa bu Edihu nandi wākweshe Yoba alemunune mulangilo wandi. (Yoba 32:5-10) Yoba pa kuteja madingi a Yehova a buswe ne kushinta mumweno wandi, Yehova wālombweje bantu bakwabo amba kikōkeji kya Yoba kyāmusangeje.​—Yoba 42:7, 8.

13. Le madingi a Yehova ākweshe Yoba namani pa kupwa kwa byamalwa byāmutene?

¹³ Yoba wāendelele kumwena mu madingi a Yehova enka ne pāpwile makambakano andi. “Yehova waesela kumfulo kutabuka ne ku ngalwilo.” Enka mu kine kitatyi’kya, ‘wābutula bāna bakwabo, bana-balume basamba-babidi ne bana-bakaji basatu.’ (Yoba 42:12-14) Nansha shi Yoba wāsenswe bano bana, inoko wādi na bushiyena bwa boba bāfwile. Padi kadi kāidilwepo byamalwa byonso byāmutene aye ne kisaka kyandi. Shi Yoba wāyukile mwenda mafuku kine kyāmutanine byamalwa, padi ye uno wēipangwile kine kyālekele Leza asusuke bininge. Shi Yoba wālangile uno muswelo, nanshi ye uno wāvulukile byobya byāmusapwidile Yehova. Bine byāmusengele ne kumukwasha ekale na mumweno muyampe.​—Ñimbo ya Mitōto 94:19.

14. Le i bika byotubwanya kwifunda ku myanda yātene Yoba?

¹⁴ Kulangulukila pa byātene Yoba kubwanya kwitukwasha tulemunune mulangilo wetu ne kwitusenga. Mukanda wa Yoba ubadilwa mu myanda yālembeje Yehova “mwanda wa kwitufundija, amba pa kūminina kwetu ne pa kusengwa na Bisonekwa twikale na lukulupilo.” (Loma 15:4) Witufundija amba ketufwaninwepo kuta mutyima bininge pa makambakano a batwe bene twailwa ne kuta mutyima ku kubingijibwa kwa bubikadi bwa Yehova. Pamo bwa Yoba, tukwatakanyanga bubikadi bwa Yehova na kumukōkela nyeke nansha ke potwikonda na bikoleja bya mu būmi.

15. Le i bika bikalupuka ku kikōkeji kyetu mu matompo?

 ¹⁵ Myanda yātene Yoba ibwanya kwitukankamika, mwanda ilombola’mba byamalwa kebishintululapo amba Yehova wetukalabela. Byamalwa bitupanga mukenga wa kukwatakanya bubikadi bwa Yehova. (Nkindi 27:11) Potwibyūminina na kikōkeji, tusangajanga Yehova, ne kukomeja lukulupilo lwetu lwa kumeso. (Tanga Loma 5:3-5.) Myanda yātene Yoba ilomboja’mba “Yehova i muyule kisanso kya ku mutyima kadi wa lusa.” (Yakoba 5:11) Shi tukwatakanya bubikadi bwa Yehova, nabya uketupala mpalo. Kuyuka kino kwitukwashanga tūminine “ne pa mfulo na kitūkijetyima ne nsangaji.”​—Kolose 1:11.

16. Mwanda waka tufwaninwe kuvuluka nyeke amba kubingija bubikadi bwa Yehova kyo kintu kya mvubu mpata?

¹⁶ Kibamweka patōka’mba bibwanya kwitukomena kuta mutyima ku kubingija bubikadi bwa Yehova potwikonda na makambakano a mu būmi. Enka ne makambakano matyetye mene abwanya kumweka bu makatampe shi twiata mutyima bininge. O mwanda tufwaninwe kuvuluka kyaba kyonso mvubu ya kukwatakanya bubikadi bwa Yehova nansha shi tubatanwa na makambakano’ka.

17. Le kuvudilwa bya kulonga mu mwingilo wa Yehova kwitukwashanga namani tute mutyima ku bintu bya mvubu mikatampe?

¹⁷ Kuvudilwa bya kulonga mu mwingilo wa Yehova kubwanya kwitukwasha tulame mu ñeni bintu bya mvubu mikatampe. Kimfwa, kaka umo witwa bu Renee wabelele misongo ya bulebe ne dyaya, wadi ulwa na misanshi. Paadi mu lupitalo, wadi usapwila bengila’ko, babela bakwabo, ne bāya kwibapempula. Mu mayenga abidi ne kipindi alongele Renee mu lupitalo, wasapwile’mo mansá 80. Nansha byaadi uyukile amba usa kufwa, kaidilwepo nansha dimo kintu kya mvubu mikatampe. Bine, kukwatakanya bubikadi bwa Yehova kwamuletele ndoe.

18. Le myanda yatene Jennifer itufundija bika pa mwanda utala kukwatakanya bubikadi bwa Yehova?

¹⁸ Kadi tubwanya kukwatakanya bubikadi bwa Yehova enka ne mu tumyanda tutyetutye twa mu būmi bwa difuku ne difuku. Kaka umo witwa bu Jennifer wapwile mafuku asatu ku kiwanza kya amviyo utengele lwendo. Lwendo byolwadi lutundululwa’nka kutundululwa, Jennifer wafītyilwe ne kwimona bu i kutupu umutele mutyima. Wadi ubwanya kwidilakena. Inoko, Jennifer walombele Yehova amukwashe asapwile boba bobadi batengele nabo lwendo myanda miyampe. Wasapwidile bantu bavule ne kupāna mabuku mavule. Jennifer unena’mba, “Namwene amba Yehova waungesela ne kumpa bukomo mwanda wa nsele dijina dyandi mu muswelo mufwaninwe nansha byonatenwe na ano makambakano.”

19. Lelo i bika biyukanyanga batōtyi ba bine?

¹⁹ Enka bantu ba Yehova kete bo bayukile mvubu ya bubikadi bwa Yehova. Kino kibayukanyanga bu batōtyi ba bine. O mwanda batwe bonso tufwaninwe kulombola’mba tukwatakanyanga bubikadi bwa Yehova.

20. Le Yehova umonanga namani byonso byolonga mwanda wa kukwatakanya bubikadi bwandi?

²⁰ Yehova uyukile kadi umonanga na mvubu byonso byolonga mwanda wa kukwatakanya bubikadi bwandi pomwingidila na kikōkeji ne kūminina matompo. (Ñimbo ya Mitōto 18:25) Kishinte kilonda’ko kikashintulula kine kyofwaninwe kukwatakenya bubikadi bwa Yehova ne muswelo obwanya kwibukwatakanya ne pa mfulo.