1, 2. (a) Oshinima shini sha simanenena kaantu ayehe? (b) Omolwashike sha simana okukala tu na olupandu lwuunamapangelo waJehova?

OSHIMALIWA osho oshinima sha simanenena kaantu oyendji kunena. Ohaya kala yi ipyakidhila okwiikongela oshimaliwa oshindji nenge haya kala ya kakatela iinima mbyoka ye na. Yamwe oya tala ko uukwanegumbo wawo, uukolele wawo nokugwanitha po iinima yawo yopaumwene yi li iinima ya simanenena.

² Ihe opu na oshinima sha simanenena kaantu ayehe shi vulithe ayihe mbyoka, ano okuyukipalitha uunamapangelo waJehova. Otu na okukala twa tonata, opo kaatu ethe po okugandja eitulomo kwaashoka sha simanenena. Ongiini shoka tashi vulu okuningwa? Otashi vulika tu kale twi ipyakidhila unene niimpwiyu yonkalamwenyo yakehe esiku e tatu dhimbwa kutya okuyukipalitha uunamapangelo waKalunga okwo oshinima sha simana lela. Nenge tashi vulika tu ethe uupyakadhi wetu wu tu gwilile po e tatu kala kaatu wete kutya okuyukipalitha uunamapangelo waKalunga okwo oshinima sha simana. Shimwe ishewe, olupandu lwomuule lwokupandula eyukipalitho lyuunamapangelo waJehova, otalu ke tu kwathela tu vule okuungaunga nomashongo gonkalamwenyo yakehe esiku. Nolupandu lwa tya ngaka otalu ke tu hedhitha popepi naJehova.

3. Satana okwa popi shike shi na ko nasha nokupangela kwaKalunga?

³ Iilonga yaSatana Ondiyapoli oya tula momalimbililo uuthemba waJehova wokupangela. Okwa ti kutya epangelo lyaKalunga ewinayi nonokutya Jehova okwi indika iishitwa ye shoka oshiwanawa. Ondiyapoli oya ti kutya aantu otaya ka kala ya nyanyukwa lela uuna tayi ipangele yo yene. (Gen. 3:1-5) Satana okwa ti wo kutya kapu na omuntu ta vulu okukala omudhiginini kuKalunga uuna e li monkalo ondhigu. (Job 2:4, 5) Sho Satana a popi ngawo, Jehova okwe etha pu pite ethimbo aantu tayi ipangele yo yene, opo ya mone kutya onkalamwenyo kaayi li kohi yepangelo lyaKalunga ondhigu shili.

4. Omolwashike uupyakadhi wu na ko nasha nuunamapangelo waJehova wu na okukandulwa po?

⁴ Odhoshili kutya Jehova okwa li e shi kutya omapopyo gOndiyapoli ogiifundja. Ihe omolwashike a pe Satana ompito u ulike kutya shoka a popi kashi li mondjila? Eyamukulo olya kwatela mo iishitwa ayihe iinandunge. (Lesha Episalomi 83:18.) Konima sho aayihokani yotango ya tindi okupangelwa kuJehova, nayalwe oyendji okuza kethimbo ndyono oya kala inaaya hala okupangelwa kuJehova. Shoka osha ningitha yalwe ya dhiladhile kutya Ondiyapoli oyi li mondjila. Manga ngaa omalimbililo ngoka ge li momadhiladhilo gaantu nogaayengeli inaaga za mo, ombili yashili nuukumwe itayi kala po mokati kiigwana, komihoko, komaukwanegumbo nokoohandimwe. Konima ngele uunamapangelo waJehova wa yukipalithwa, aantu ayehe otaya ka kala nomwenyo sigo aluhe kohi yepangelo lyaJehova li li pauyuuki. Eshito alihe otali ka kala ishewe li na ombili. —  Ef. 1:9, 10.

5. Ongiini tatu vulu okuulika kutya otatu ambidhidha uunamapangelo waJehova?

⁵ Uunamapangelo waJehova otawu ka yukipalithwa, nepangelo lyaSatana otali ka hanagulwa po thiluthilu. Epangelo lyaKalunga kohi yOmukwaniilwa gwopaMesiasa otali ka pondola, naantu mboka aadhiginini otaye ke shi ulika kutya aantu otaya vulu okwaambidhidha epangelo lyaKalunga. (Jes. 45:23, 24) Mbela owa hala okukala gumwe gwomwaambono ye li aadhiginini kuunamapangelo waJehova? Osha yela kutya owa hala okukala gumwe gwomuyo. Opo tu kakatele uudhiginini wetu, otwa pumbwa okugandja eitulomo kiinima ya simana nokumona kutya oya simana shi thike peni.

6. Okuyukipalitha uunamapangelo waJehova okwa simana shi thike peni?

⁶ Ngaashi sha popiwa nale, okuyukipalitha uunamapangelo waJehova okwo oshinima sha simanenena shoka sha kwatela mo aantu ayehe. Okwa simana ku vule enyanyu lyomuntu kehe. Mbela otashi ti kutya ehupitho lyetu inali simana nenge kutya Jehova ke na ko nasha natse shili? Hasho nando. Omolwashike mbela?

7, 8. Omolwashike okuyukipalitha uunamapangelo waKalunga kwa kwatela mo okugwanithwa kwomauvaneko ge?

⁷ Jehova oku hole aantu noonkondo nokwe ya lenga. Okwa longitha nehalo ewanawa ombinzi yOmwana, opo tu vule okuhupithwa sigo aluhe. (Joh. 3:16; 1 Joh. 4:9) Ando Jehova ka li a gwanitha po omauvaneko ge, ando Ondiyapoli oyi ipopile tayi ti kutya Kalunga omufundja noina halela aantu uuwanawa, nota pangele momukalo omwiinayi. Oshikwawo, ando aapataneki oya sheke taya ti: “Oye oku uvaneke tuu, ta ka galuka? Oku li peni? Ootate oya sa nale, ihe iinima ayihe oyi li, ngaashi ya kala shito okuza keshito lyuuyuni.” (2 Pet. 3:3, 4) Onkee ano, Jehova ota ka sa oshimpwiyu, opo uunamapangelo we wu yukipalithwe mwa kwatelwa ehupitho lyaantu. (Lesha Jesaja 55:10, 11.) Jehova oha pangele pahole. Onkee ano, otatu vulu okukala nuushili  kutya Jehova ota ka kala aluhe e hole aapiya ye, e ya lenga nokwa pandula uudhiginini wawo. —  Eks. 34:6.

⁸ Okuzimina kutya uunamapangelo waJehova owa simana, itashi ti kutya ehupitho lyetu inali simana nenge inatu simana momeho gaJehova. Otu na okukala tu na etaloko li li pandjele shi na ko nasha nuunamapangelo waJehova nehupitho lyetu. Etaloko ewanawa olya simana ngele otwa kala tatu gandja eitulomo kwaashoka sha simana e tatu popile epangelo lyaJehova li li pauyuuki.

9. Satana okwa popi shike shi na ko nasha naJob? (Tala kethano lyopetameko.)

⁹ Embo lyaJob, limwe lyomomambo ngoka ga nyolwa nale mOmbiimbeli, olye shi ulika sha yela kutya etaloko li li mondjila olya pumbiwa. Membo moka Satana okwa ti kutya ngele Job ta mono iihuna noonkondo ote ki iteka po Kalunga. Okwa ti wo kutya Kalunga oye e etele Job uupyakadhi. Jehova ina ninga nando oshinima sha tya ngaaka, ihe okwa li e etha Satana a makele Job, sho a ti: “Ayihe e yi na, otandi yi tula miikaha yoye.” (Lesha Job 1:7-12.) Konima yethimbo, Job okwa li a silwa aapiya ye, iimuna ye nosho wo aanona ye mboka a li e hole ye li omulongo. Satana shika okwe shi ningi momukalo ngoka tagu shi monikitha sha fa Kalunga oye e etela Job uupyakadhi. (Job 1:13-19) Satana okwa li e etele Job uuwehame nuuvu wu nyanyalitha. (Job 2:7) Onkalo yaJob oya pimbilikwa kokuulwa omalaka omawinayi komukadhi nokookuume ke yatatu. —  Job 2:9; 3:11; 16:2.

10. (a) Job okwa a li a ningi shike, opo u ulike uudhiginini we muKalunga? (b) Omomukalo guni a li a yono?

¹⁰ Oshilanduliko oshini? Osha monika mo kutya shoka Satana a popi iifundja iitokele. Job okwa tindi okupilamena Kalunga. (Job 27:5) Ihe nonando ongawo, Job okwa kanitha etaloko lye ewanawa pakathimbo. Okwa li a popi kutya ye ina ninga sha sha puka, nokwa li nokuli u uvite a gwana okutseya kutya omolwashike ta monene iihuna. (Job 7:20; 13:24) Otashi vulika tu dhiladhile kutya sho Job a li ta mono iihuna osha li tashi vulu okuuviwa ko. Ihe nando ongawo, Kalunga okwa li a mono kutya Job okwa pumbwa okupukululwa. Jehova okwa li a ningi po shike?

11, 12. Jehova okwa li a kwathele ngiini Job a kale e na olupandu, nokwa li i inyenge ngiini?

¹¹ Oohapu ndhoka Kalunga a lombwele Job otadhi adhika membo lyaJob ontopolwa 38 sigo 41. Ihe moohapu adhihe ndhoka kapu na nando mpoka Jehova a lombwela Job kondandalunde kutya omolwashike ta mono iihuna. Elalakano lyaJehova kalya li okulombwela Job kutya omolwashike ta mono iihuna, a fa ando ti iyukipalitha. Pehala lyaashono, Jehova Kalunga okwa li a hala okukwathela Job a mone kutya Ye omunene e vule ngoka te mu etele uupyakadhi. Okwa li wo a hala a kwathele Job a  mone kutya opu na oshinima sha simanenena shoka shi na okuungaungiwa nasho. (Lesha Job 38:18-21.) Shika osha kwathele Job a kale e na etaloko li li mondjila.

¹² Sho Job a li ti idhidhimikile uupyakadhi, mbela Jehova okwa li e mu pe omayele momukalo omwiinayi? Hasho nando, na Job hasho a li a dhiladhila ngawo. Nonando Job okwa li a popi iinima haayo, hugunina okwa li a pandula Jehova. Okwa li wo a popi nokuli a ti: “Onda sa ohoni molwaayihe mbyoka nde yi popi, notandi itedhulula nokukuutumba montsi nomomutoko.” Omayele ngoka Job a li a pewa kuJehova oga li ge mu talaleke. (Job 42:1-6) Konima yethimbo okwa ka pewa ishewe omayele tage mu pukulula komugundjuka Elihu. (Job 32:5-10) Konima sho Job a taamba ko epukululo ndyoka a pewa kuJehova Kalunga, Jehova okwa li a lombwele yalwe kutya okwa hokwa Job, molwaashoka okwa kala omudhiginini sho ta makelwa. —  Job 42:7, 8.

13. Job okwa kwathelwa ngiini komayele ngoka a pewa kuJehova konima sho a kala ta mono iihuna ethimbo ele?

¹³ Job okwa tsikile okumona uuwanawa momayele gaJehova nokuli naasho a za mo muudhigu. Ngiini mbela? Ombiimbeli oya ti: “Omuwa okwa yambeke ohugunina yaJob shi vulithe nale.” Mokweendela ko kwethimbo okwa ka monununa “oyana aamati yaheyali naakadhona yatatu.” (Job 42:12-14) Odhoshili kutya Job okwa li a yuulukwa oyana mboka ya dhipagithwa kuSatana. Omathimbo gamwe otashi vulika a li ha dhimbulukwa uupyakadhi mboka a pita muwo. Nonando ando Job okwa li e shi kutya omolwashike ta mono iihuna, otashi vulika ando omathimbo gamwe a kala ta dhiladhila kutya omolwashike e na okumona iihuna yi thike mpono. Kutya nduno okwa li ta dhiladhila shike, okwa li e na okukala ta dhiladhila komayele ngoka a pewa kuKalunga. Uuna te shi ningi osha li tashi ke mu kwathela a kale e na etaloko li li nawa notashi ke mu hekeleka. —  Eps. 94:19.

14. Oshike tatu ilongo moshiholelwa shaJob?

¹⁴ Natse otatu vulu okukala tu na etaloko ewanawa nokumona ehekeleko mehokololo lyaJob. Osha yela kutya Jehova okwe li nyolitha li “tu longe, opo tu kale tu na etegameno tali zi mokwiidhidhimika notu mone omukumo, ngele tatu lesha oohapu dhaKalunga.” (Rom. 15:4) Otatu ilongo mo shike? Shotango: Inatu kala unene tatu dhiladhila iinima yonkalamwenyo yetu e tatu kala itaatu gandja eitulomo kwaashoka sha simanenena, ngaashi okuyukipalitha uunamapangelo waJehova. Natu pandule sho tatu ambidhidha uunamapangelo waJehova mokukala tu li aadhiginini ngaashi Job, nonando otu li moonkalo oondhigu.

15. Uudhiginini wetu ohawu tu kwathele ngiini ngele tatu mono iihuna?

¹⁵ Omolwashike tashi hekeleke okukala hatu dhiladhila kutya uudhiginini wetu oshinima shi na ongushu? Owu na ongushu, molwaashoka  sho tatu mono iihuna itashi ti kutya Jehova oye e tu geela. Shoka otashi tu pe ompito tu ambidhidhe uunamapangelo waJehova. (Omayel. 27:11) Meidhidhimiko otamu tu zile “omukumo” notali koleke etegameno lyetu. (Lesha Aaroma 5:3-5.) Ehokololo lyaJob otali ulike kutya “Omuwa oye omunesilohenda nomunalukeno.” (Jak. 5:11) Otatu vulu okukala nuushili kutya ote ke tu pa ondjambi pamwe naayehe mboka taya ambidhidha uunamapangelo we. Uuna tu shi shi otashi ke tu kwathela tu ‘idhidhimikile ashihe shoka tashi tu adha.’ —  Kol. 1:11.

16. Omolwashike tu na okukala hatu dhimbulukwa aluhe kutya osha simana okwaambidhidha uunamapangelo waJehova?

¹⁶ Okugandja eitulomo keyukipalitho lyuunamapangelo waJehova otashi vulu okukala eshongo. Omathimbo gamwe otashi vulika tu kale tu wete uupyakadhi wetu wa fa uunene. Nokuli nuupyakadhi mboka uushona lela, otawu vulu okumonika wa fa uunene ngele otwa kala tatu dhiladhila unene kuwo. Onkee ano, otashi ka kala shi li nawa tu kale hatu dhimbulukwa aluhe kutya osha simana okwaambidhidha uunamapangelo waJehova uuna tu li muudhigu.

17. Okukutha ombinga aluhe miilonga yaJehova otaku ke tu kwathela ngiini tu gandje eitulomo kwaashoka sha simanenena?

¹⁷ Uuna tatu tsikile okukutha ombinga aluhe miilonga yaJehova otashi ke tu kwathela tu gandje eitulomo kwaashoka sha simanenena. Pashiholelwa, Onzapo yedhina Renee, oya kala tayi hepekwa kuuvu wombanda, kuuwehame woshinamenena nokokankela. Sho a li ta pangwa moshipangelo, okwa kala ta gandja uunzapo kwaamboka haya longo mo, kaapangwa nokaatalelipo. Oshikando shimwe sho a li moshipangelo iiwike iyali netata, okwa li a longo oowili 80. Nokuli naasho a li e li pokusa, okwa kala ta gandja eitulomo kuunamapangelo waJehova. Shoka osha li sha hwepopaleke uupyakadhi we.

18. Oshimoniwa shomumwameme gumwe oshu ulike ngiini kutya okwaambidhidha uunamapangelo waJehova oku na uuwanawa?

¹⁸ Odhoshili kutya otwa hala okugandja eitulomo kuunamapangelo waJehova nuuna tu li momathiminiko gakehe esiku nomuupyakadhi kehe. Jennifer okwa li a kala pokapale koondhila uule womasiku gatatu a tegelela ondhila ndjoka tayi yi koshilongo shawo. Oondhila ndhoka dhi na okuya koshilongo shawo odha kala tadhi kalekwa. Okwa li ta vulu okukala i iyetela ohenda, molwaashoka okwa li ta si ezaza nokwa li a vulwa. Pehala lyaashono, okwa galikana a mone nkene ta vulu okukwathela yalwe pambepo mboka nayo ya li yu uvite nayi omolwokutegelela. Oshizemo osha li shini? Okwa li u uvithile aantu oyendji nokwa gandja iileshomwa oyindji. Okwa ti: “Onda li ndu uvite kutya Jehova okwa yambeka ndje, nonando onda li muudhigu, nokwa li a pe ndje oonkondo ndi simanekithe edhina lye.” Osha yela kutya okwa kala ta gandja eitulomo kelalakano lyaJehova.

19. Oshigwana shaJehova osha tala ko ngiini uunamapangelo we?

¹⁹ Okuulika olupandu omolwuunamapangelo waJehova okwa yoolola ko elongelokalunga lyashili kwaandyoka lyiifundja. Aapiya yaJehova oya kala nokwaambidhidha uunamapangelo we ethimbo ele. Tu li aayambidhidhi yelongelokalunga lyashili, otu na okuninga oonkambadhala tu kale tu na etaloko li li nawa.

20. Jehova oku uvitile ngiini oonkambadhala dhoye dhokwaambidhidha uunamapangelo we?

²⁰ Kala wu shi kutya Jehova okwa lenga oonkambadhala dhoye dhokwaambidhidha uunamapangelo we mokukala omudhiginini miilonga ye nomokwiidhidhimikila uudhigu. (Eps. 18:25) Oshitopolwa tashi landula otashi ka kundathana kutya omolwashike wa gwana okwaambidhidha uunamapangelo waJehova nomutima aguhe.