1, 2. (a) Nguyiphi intfo lemcoka sonkhe sintfu lekufanele sikhatsateke ngayo? (b) Kungani kubalulekile kutsi sikujabulele kusekela bukhosi baJehova?

BANTFU labanyenti lamuhla bacabanga kutsi imali yintfo lemcoka. Banake kakhulu kucongelela umcebo noma kuvikela imicebo yabo. Labanye bacabanga kutsi intfo lemcoka ekuphileni kwabo kuba nemndeni, nemphilo lekahle noma kuphumelela emphilweni.

² Nobe kunjalo, intfo lemcoka kakhulu sonkhe lokufanele sikhatsateke ngayo, kusekela bukhosi baJehova. Ngalesinye sikhatsi singase sitikhandze sesingasabusekeli bukhosi baJehova. Kungenteka njani loku? Kungenteka ngekutsi sitikhandze sesinake kakhulu kuphila kwetfu kwamalanga onkhe size sikhohlwe kutsi kubaluleke kanganani kusekela bukhosi baJehova. Singaphindze sivumele tinkinga letisivelelako kutsi tibe tinkhulu kakhulu bese sinaka tona kakhulu kunekusekela bukhosi baNkulunkulu. Ngakulolunye luhlangotsi, nangabe sikujabulela kusekela bukhosi baJehova, sitawukhona kubhekana netinkinga tamalanga onkhe. Nasenta njalo sitawusondzelana kakhulu naJehova.

3. Yini Sathane layisho mayelana nekubusa kwaNkulunkulu?

³ Sento saSathane Develi saphakamisa umbuto ngelilungelo laJehova lekubusa. Ngalesento, waveta kutsi kubusa kwaNkulunkulu bekungakalungi nekutsi Jehova ugodlela tikhonti takhe noma  tidalwa takhe tintfo letinhle. Ngekusho kwaDeveli, bantfu bebatawuphila imphilo lejabulisako nalencono nangabe batibusa bona. (Gen. 3:1-5) Sathane waphindze waveta nekutsi kute umuntfu longetsembeka kuNkulunkulu futsi noma ngubani locindzetelekile angabushiya bukhosi baJehova. (Jobe 2:4, 5) Mayelana nalenselele leyabekwa nguDeveli, Jehova unike bantfu sikhatsi sekutsi batibonele bona kutsi kunjani kuphila nabangabuswa nguye.

4. Kungani kufanele lenkinga yebukhosi ilungiswe?

⁴ Liciniso, Jehova uyati kutsi tinsolo taDeveli tingemanga. Nangabe kunjalo, kungani Nkulunkulu avumele letinsolo kutsi titsatse sikhatsi lesidze kangaka, futsi anikete Sathane litfuba lekuveta kutsi abecinisile yini? Imphendvulo yalombuto itsintsa tonkhe tidalwa letihlakaniphile. (Fundza Tihlabelelo 83:18, NW.) Ngetulu kwaloko, umndeni wekucala wala kubuswa nguJehova, ngako kusukela ngaleso sikhatsi bantfu labanyenti abasafuni kubuswa nguye. Loku kwenta labanye bacabange kutsi kungenteka Develi bekacinisile ngaloko lakusho. Nangabe lombuto solo ungaphendvuleki etingcondvweni tebantfu nasetingilosini, kutawuba khona kungevani emkhatsini wetive, tinhlanga, netilimi, imindeni kanye nabo bonkhe labakhona. Nasekubuyiselwe bukhosi baJehova endzaweni yabo, bonkhe bantfu batawutitfoba ekubuseni kwakhe kwekulunga. Kutawuba nekuthula emhlabeni wonkhe.​—Ef. 1:9, 10.

5. Yini lokufanele siyente kute sisekele bukhosi baJehova?

⁵ Lilungelo laNkulunkulu lekubusa litawubuyiselwa futsi kubusa kwaSathane kanye nebantfu kutawuphela. Kubusa kwaNkulunkulu ngaphansi kweMbuso waMesiya kutawuphumelela futsi labo labacotfo batawube bakhombisile kutsi bantfu bangakhona kumelela bukhosi baNkulunkulu. (Isa. 45:23, 24) Uyafuna yini kuba ngulomunye walabo lokutawutsiwa bacotfo futsi basekela bukhosi baJehova? Asingabati kutsi uyafuna. Kute sibe cotfo, kufanele sinake kakhulu kusekela bukhosi baJehova futsi sikucondze kubaluleka kwako.

6. Kubaluleke kangakanani kusekela bukhosi baJehova?

⁶ Njengoba kuvetiwe, kusekela bukhosi baJehova kuyindzaba lebalulekile nalokufanele inakwe ngibo bonke bantfu. Kubaluleke kwengca injabulo yanoma ngumuphi umuntfu. Ngabe loku kusho kutsi kukhululwa akukabaluleki yini noma ngabe kuveta kutsi Jehova akanendzaba yini natsi? Cha. Kungani kunjalo?

7, 8. Kungani bukhosi baNkulunkulu bufaka ekhatsi kugcwaliseka kwetetsembiso takhe?

⁷ Jehova usitsandza kakhulu sintfu futsi usitsatsa njengalesiligugu. Bekatimisele kusebentisa ingati yeNdvodzana yakhe kute sikhululwe phakadze. (Joh. 3:16; 1 Joh. 4:9) Nangabe Jehova angehluleka kufeza tetsembiso takhe, Develi angatfola sizatfu sekubita Nkulunkulu ngekutsi ungumcambimanga nalogodlela bantfu lokuhle futsi ungumbusi longakalungi. Kungaphindze kusite labo labadzelelako labatsi: “Kuphi lokuba khona kwakhe lokwetsenjiswa? Ngobe kusukela ngesikhatsi bokhokho betfu labafa ngaso, tonkhe tintfo tisachubeka njengobe betinjalo ekucaleni kwendalo.” (2 Phet. 3:3, 4) Siyajabula ngekwati kutsi Jehova utawuciniseka kutsi umbuso wakhe ukhulula labo labamlalelako! (Fundza Isaya 55:10, 11.) Ngetulu kwaloko, lutsandvo lwaJehova lukhatimulisa bukhosi bakhe. Ngako singaciniseka kutsi utawuhlala asitsandza, asitsatsa njengalababalulekile, futsi atijabulela tikhonti takhe letetsembekile.​—Eks. 34:6.

⁸ Nangabe sibutsatsa njangalobubalulekile bukhosi baJehova, sisuke singakutsatseli phansi kukhululwa kwetfu noma kubaluleka  kwetfu phambi kwaJehova. Kunaloko sisuke sibeka bukhosi bakhe kanye nekukhululwa kwetfu endzaweni yako lefanele. Kuba nembono lokahle kubalulekile nangabe sifuna kuhlala sinake bukhosi bakhe futsi simelele kubusa kwaJehova lokulungile.

9. Taba yini tinsolo taSathane ngaJobe? (Buka sitfombe lesisekucaleni kwalesihloko.)

⁹ Incwadzi yaJobe, lengulenye yetincwadzi letabhalwa ekucaleni, ikucacisa kahle kuba nembono lokahle. Kulencwadzi sifundza kutsi Sathane wafunga wagomela ngekutsi Jobe nangaviswa buhlungu, angayekela kukhonta Nkulunkulu. Sathane waveta kutsi akube nguNkulunkulu locindzetela Jobe. Jehova akazange akwente loko, kodvwa wavumela Sathane kutsi avivinye Jobe, ngekutsi atsi: “Konkhe lanako kusetandleni takho.” (Fundza Jobe 1:7-12.) Ngesikhashana nje, Jobe wafelwa tisebenti takhe, walahlekelwa ngiko konkhe labetiphilisa ngako, waphindze wafelwa bantfwana bakhe labalishumi. Sathane wenta loku ngendlela yekutsi kubonakale shengatsi nguNkulunkulu matfupha lobangele kuhlupheka kwaJobe. (Jobe 1:13-19) Kamuva Sathane wabangela Jobe kutsi eve buhlungu futsi abe nesifo lesenyanyekako. (Jobe 2:7) Emavi labuhlungu lakhulunywa ngumkakhe kanye nebangani bakhe labatsatfu lebenta shengatsi bayamdvudvuta, afucela linyeva ekhatsi.​—Jobe 2:9; 3:11; 16:2.

10. (a) Yini Jobe layenta kute akhombise bucotfo bakhe kuNkulunkulu? (b) Jobe wamlahlekela njani umbono lokahle?

¹⁰ Waba yini umphumela? Tinsolo taSathane taba ngemanga laluhlata. Jobe akazange ayekele kukhonta Nkulunkulu. (Jobe 27:5) Noma kunjalo, Jobe walahlekelwa ngumbono lokahle kwesikhashana. Watibona alunge kakhulu, kangangekutsi waze wafuna nesizatfu sekutsi kungani ahlupheka. (Jobe 7:20; 13:24) Singase sicabange kutsi bekufanele kutsi ative kanjalo nasibuka indlela lahlupheka ngayo. Noma kunjalo, Nkulunkulu wasibona sidzingo sekulungisa indlela Jobe lebekacabanga ngayo. Yini Jehova layisho kuJobe?

11, 12. Jehova wasita Jobe kutsi enteni, futsi Jobe wenta njani?

¹¹ Emavi Nkulunkulu lawasho kuJobe asetehlukweni letine tencwadzi yaJobe​—tahluko 38 kuya ku-41. Noma kunjalo, kute lasifundza khona kutsi Nkulunkulu watjela Jobe sizatfu lebesimenta ahlupheke. Lokubalulekile kulamavi aJehova bekungasiko kuchaza kutsi kungani Jobe abehlupheka, kungazutsi Nkulunkulu bekufanele ativete amsulwa. Kunaloko, Jehova bekafuna kusita Jobe kutsi abone liphutsa lakhe lekuticatsanisa nebukhulu bakhe. Waphindze wasita Jobe kutsi abone tintfo letibalulekile lebekufanele acabange ngato. (Fundza Jobe 38:18-21.)  Loku kwasita Jobe kutsi aphindze abe nembono lokahle.

¹² Bekanelunya yini Jehova ngekululeka Jobe kamatima ngemuva kwekuba asahlupheke kabuhlungu kangaka? Cha, futsi naJobe akazange acabange kanjalo. Ngisho noma abebhekene nelusizi, Jobe wacala kukhuluma kahle ngaNkulunkulu. Waze watsi: “Manje sengiyatenyanya, ngiyaphendvuka ngitilahla elutfulini nasemlotseni.” Loku kwaba ngumphumela wemavi lacinile aJehova kodvwa lebekaseluleko lesifike ngesikhatsi. (Jobe 42:1-6) Ngaphambi kwaloku, Jobe bekake watfola seluleko lesilusito ku-Elihu, lobekamncane kunaye. (Jobe 32:5-10) Ngemuva kwekube Jobe sekakwemukele kulungiswa nguNkulunkulu futsi sekawulungisile umbono wakhe loliphutsa, Jehova wenta nalabanye bati kutsi ukujabulele kwetsembeka kwaJobe ngesikhatsi acindzetelekile.​—Jobe 42:7, 8.

13. Seluleko saJehova samsita njani Jobe ngisho nome sekwendlulile kuhlupheka kwakhe?

¹³ Seluleko saJehova sasita Jobe ngisho nangemuva kwekuhlupheka kwakhe. Kwenteka kanjani loko? “Simakadze imphilo yaJobe yamuva wayibusisa kakhulu kwengca yakucala,” futsi kubuyiselwa kwetintfo takhe kanye nekuphulukiswa kwakhe kwatsatsa sikhatsi. Kamuva waba “nemadvodzana lasikhombisa nemadvodzakati lamatsatfu.” (Jobe 42:12-14) Asingabati kutsi Jobe wabakhumbula bantfwana bakhe lababulawa nguSathane. Ngekuhamba kwesikhatsi, kungenteka bekahle akukhumbula kuhlupheka kwakhe. Ngisho noma agcina sekasicondza kahle sizatfu sekuhlupheka kwakhe, kodvwa kungenteka ngaletinye tikhatsi bekahle atibuta kutsi bekudzingeke ngani kutsi ahlupheke kangaka. Kungakhatsaliseki kutsi yini lebekangahle ayicabange, bekangatikhumbuta ngeseluleko saNkulunkulu. Kwenta kwakhe kanjalo, kwamsita kutsi ahlale anembono lokahle futsi loko kwamdvudvuta.​—Hla. 94:19.

14. Yini lesingayifundza kuloko lokwenteka kuJobe?

¹⁴ Natsi singaba nembono lokahle futsi sitfole indvudvuto encwadzini yaJobe. Ngetulu kwako konkhe, Jehova ugcine lencwadzi kute kufundziswe “tsine, kuze kutsi ngekucinisela kwetfu nangendvudvuto lesiyitfola emiBhalweni sitewuba nelitsemba.” (Rom. 15:4) Sifundzani tsine kuloku? Ngalokuyinhloko: Asingalokotsi sinake kakhulu tidzingo tekuphila bese silahlekelwa ngumbono lokahle ngalendzaba lebalulekile, lokukusekela bukhosi baJehova. Asiyijabulele incenye lesinayo ekusekeleni bukhosi baJehova lokufaka ekhatsi kwetsembeka ngisho noma sibhekene netimo letimatima, njengobe kwenta Jobe.

15. Kufezani kwetsembeka kwetfu nangabe sibhekene neluvivinyo?

¹⁵ Kungani kudvudvuta kuhlala setsembekile?  Kungoba kubeketela kwetfu kufeza lukhulu lapho sicindzetelekile. Ngetulu kwekutsi Jehova akajabuli nakabona sihlupheka, kuphindze kusinikete litfuba lekusekela bukhosi bakhe. (Taga 27:11) Kucinisela kwetfu “kusenta semukeleke” futsi kucinise nelitsemba lesinalo. (Fundza Roma 5:3-5.) Incwadzi yaJobe iveta kutsi “Jehova unelutsandvo lolukhulu kanye nemusa.” (Jak. 5:11) Ngako singaciniseka kutsi utasiniketa umvuzo kanye nabo bonkhe labasekela bukhosi bakhe. Kwati loku kutasisita kutsi sicinisele “ngalokuphelele ngekubeketela nenjabulo.”​—Khol. 1:11.

16. Kungani kufanele sitikhumbute ngekubaluleka kwekusekela bukhosi baJehova?

¹⁶ Kuliciniso kutsi kusekela bukhosi baJehova ngaso sonkhe sikhatsi akusimelula. Ngaletinye tikhatsi tinkinga lesinato tingabonakala titinkhulu kakhulu. Ngisho naleto letincane tingabonakala titinkhulu nasihlale sicabanga ngato. Ngako-ke, senta kahle nangabe sihlale sicabanga ngekubaluleka kwekusekela bukhosi baNkulunkulu ngisho nalapho sibhekene netimo letimatima.

17. Kuhlala simatasa emsebentini waJehova wekushumayela kungasisita njani kutsi sihlale sinake loko lokubalulekile?

¹⁷ Nangabe sihlale senta umsebenti waJehova wekushumayela, kutasisita kutsi sihlale sinake loko lokumcoka. Nasi sibonelo, lomunye Fakazi longuRenee, wafa luhlangotsi, wahlaselwa tinhlungu letingapheli kanye nesifo samdlavuza. Ngesikhatsi alashwa etibhedlela letehlukene, wafakaza etisebentini tasesibhedlela, etigulaneni kanye nakulabo lebebatewuhlola labagulako. Ngesikhatsi akulesinye sibhedlela, washumayela ema-awa langu-80 ngemaviki lamabili nahhafu nje kuphela. Ngisho nalapho sekatawukufa, Renee wachubeka asekela bukhosi baJehova. Loko kwamsita wanganaki letinhlungu lebekativa.

18. Loko lokwenteka kulomunye dzadze kwamsita njani kutsi asekele bukhosi baJehova?

¹⁸ Kuliciniso kutsi siyafuna kuhlala sinake bukhosi baJehova ngisho nalapho sibhekene netinkinga tamalanga onkhe kanye nalapho sicindzetelekile. Kwaphela emalanga lamatsatfu Jennifer solo alindze kwekuhamba aye ekhaya esikhumulweni setindiza. Tonkhe tindiza lebetingamtfwala betisolo tihlehliswa. Njengobe bekayedvwana futsi adziniwe, bekungaba melula ngaye kutsi anake lenkinga lebekakuyo. Kunaloko, wathantazela kutsi akhone kusita labo lebebasenkingeni njengaye ngekutsi abacocele tindzaba letivela kuNkulunkulu. Waba yini umphumela? Wafakaza kubantfu labanyenti futsi wahambisa netincwadzi letisekelwe eBhayibhelini letinyenti. Jennifer utsi: “Ngabona kutsi Jehova bekangibusisa ngisho noma bengibhekene nesimo lesibuhlungu futsi wanginika nemandla ekutsi ngimelele libito lakhe ngendlela lekahle.” Loko kwamsita wanaka kakhulu injongo yaJehova.

19. Bantfu baJehova bativa njani ngebukhosi bakhe?

¹⁹ Kusekela bukhosi baJehova kwehlukanisa kukhulekela kweliciniso ekukhulekeleni kwemanga. Sekusikhatsi lesidze bantfu baNkulunkulu basekela bukhosi bakhe. Njengoba sisekela kukhulekela kweliciniso, ngamunye wetfu kufanele atimisele kuhlala asekela bukhosi baJehova.

20. Jehova utiva njani ngemetamo yakho yekuchubeka usekela bukhosi bakhe?

²⁰ Ciniseka kutsi Jehova uyayijabulela imetamo yakho yekusekela bukhosi bakhe ngekutsi wente umsebenti wakho wekushumayela ngekwetsembeka kanye nekukhutsatela ngisho noma ubhekene nekuhlupheka. (Hla. 18:25) Sihloko lesilandzelako sitawuchubeka sicoce ngekutsi kungani bukhosi baJehova budzinga kutsi sibusekele ngenhlitiyo yetfu yonkhe nekutsi singachubeka njani nekwenta loko.