1, 2. (a) Ana ngani jakusosekwa mnope kwa ŵandu wosopewe jili japi? (b) Ligongo cici kujigala mbali pa ngani jeleji kuli kwakusosekwa?

KWA ŵandu ŵajinji masiku agano, ngani jakusosekwa jili mbiya. Jemanjaji akusaŵika nganisyo syawo syosope pakupata cipanje kapena kusamala yindu yakwete. Kwa ŵanesoni ngani jakusosekwa jikusaŵa liŵasa, kola cilu cambone, kapena kwanilisya yakulinga yawo.

² Nambope, ngani jakusosekwa mnope kwa wosopewe jili kulosya kuŵajilwa kwa ulamusi wekulungwa wa Yehofa. Tukusosekwa kusamala kuti tukaleka kujiwona nganiji kuŵa jakusosekwa mnope. Ana cici campaka citulepelekasye kujiwona nganiji kuŵa jakusosekwa mnope? Mpaka tumalileje ndaŵi jetu pa yakutendekwa ya lisiku ni lisiku paumi wetu mwamti ni kuliŵalila kusosekwa kwa kulosya kuŵajilwa kwa ulamusi wekulungwa wa Mlungu. Kapena mpaka tukunde kuti yakusawusya yetu yituliŵasye ngani jakusosekwa mnopeji. Nambope, naga tukujigala nawo mbali pakulosya kuŵajilwa kwa ulamusi wekulungwa wa Yehofa, yicitukamucisya kuti tumalaneje ni yakusawusya yetu soni tucim’ŵandicila mnope Yehofa.

3. Ana Satana ŵasasile yamtuli pakwamba ya ulamusi wa Mlungu?

³ Satana ŵasasile yindu yakulosya kayicila kuti Yehofa ali jwakulamulila  jwambone. Jwalakwe ŵasasile kuti ulamusi wa Mlungu nganiwuŵa wakuŵajilwa soni kuti Yehofa akusayijima yakupanganyikwa yakwe yindu yambone. Pakusala yeleyi, Satana ŵagopolelaga kuti ŵandu mpaka aŵe ŵakusangalala naga akulilamulila acimsyene. (Gen. 3:1-5) Satana ŵasasilesoni kuti ŵandu nganaŵa ŵakulupicika kwa Mlungu ni mtima wosope, mwamti pasimene ni yakusawusya mpaka akane ulamusi wa Mlungu. (Yobu 2:4, 5) M’yoyo, mwakamulana ni yaŵasasile Satanayi, Yehofa akundile kuti papite ndaŵi jelewu kuti ŵandu alole mwawukusaŵela umi naga ngatukulongoleledwa ni ulamusi wakwe wakulungama.

4. Ligongo cici ngani jakwayana ni ulamusi wa Mlungu jikusosekwa kujimasya?

⁴ Yehofa akusamanyilila kuti yaŵasasile Satana yili yaunami. Nambi ligongo cici jwalakwe akundile kuti nganiji jijendelecelepe, mwakumpa Satana ndaŵi jakuti alosye naga yaŵasasileyo yili yisyesyene? Kwanga kwa ciwusyoci kukukwaya jwalijose kwinani soni pacilambo capasi. (Aŵalanje Salimo 83:18.) Tukumbucile kuti liŵasa lyandanda lyakanile ulamusi wa Yehofa. Nambosoni kutandila ndaŵi jelejo ŵandu ŵajinji aŵele ali mkutenda yakulandanayo. Yeleyi mpaka yatendekasye ŵane ganisya kuti yaŵasasile Satana yili yisyene. Pakuŵa nganiji nganijiŵe kumala, pacilambopa nganipaŵa paŵele mtendele soni mkamulano. Nambo panyuma pakusimicisya kuti ulamusi wa Yehofa uli wakuŵajilwa, wosope caciŵa pasi pa ulamusi wakulungamawu kwangamala. Pandaŵijo, pacilambo cosope paciŵa mtendele.—Aef. 1:9, 10.

5. Ana mpaka tutende wuli kuti tuŵe ku mbali ja ulamusi wa Yehofa?

⁵ Wosope pacacisimicisya kuti ulamusi wa Mlungu uli wakuŵajilwa, yiciwonecela kuti ulamusi wa Satana soni ŵandu uli wakulepela soni caciwutyosya. Ulamusi wa Mlungu kupitila mu Ucimwene wa Umesiya ucipunda, soni ŵandu ŵakulupicika caciŵa ali alosisye kuti yili yakomboleka kuŵa ku mbali ja ulamusi wa Mlungu. (Yes. 45:23, 24) Mwangakayicila, wawojo akusaka kuŵa m’likuga lya ŵandu ŵakulupicika ŵakusakamucisya ulamusi wa Yehofa. Kuti atende yeleyi akusosekwa kuŵika nganisyo syawo pa ngani jakusosekwa mnopeji.

6. Ana ngani jakulosya kuŵajilwa kwa ulamusi wa Yehofa jili jakusosekwa mnope kupunda cici?

⁶ Ngani jakulosya kuŵajilwa kwa ulamusi wa Yehofa jili jakusosekwa mnope kupunda cikulupusyo. Nambo ana yeleyi yikugopolela kuti cikulupusyo cetu cili cangali mate kapena kuti Yehofa jwangasamala ya m’weji? Iyayi. Ligongo cici tukuti m’yoyo?

7, 8. Ana tucipata majali gamtuli pandaŵi jele Yehofa cacilosyaga kuŵajilwa kwa ulamusi wakwe?

⁷ Yehofa akusiŵanonyela mnope ŵandu soni akusiŵawona kuŵa ŵakusosekwa. Jwalakwe mwakusacilila ŵakamulicisye masengo miyasi ja Mwanace jwakwe pakusaka kwakulupusya ŵandu. (Yoh. 3:16; 1 Yoh. 4:9) Yikaŵe kuti Yehofa nganakwanilisya yeleyi nikuti Satana akapatilepo upile wakuŵeceta kuti Mlungu ali jwaunami, akusiŵajima ŵandu yambone soni kuti akusalamulila mwangali cilungamo. Yikawonecesoni mpela kuti ŵandu ŵakusisya akusasala yisyene. Jemanjaji akusaŵeceta mwakunyosya kuti, “Kuŵapo kwakwe kwaŵakulagucisye kula kuli kwapi? Alole, kutandila lisiku lyaŵawile acinangolo ŵetu, yindu yosope yikwendelecela kuŵa mpela muyaŵelele kutandila pandanda pene.” (2 Pet. 3:3, 4) Nambo Yehofa pacacilosyaga kuŵajilwa kwa ulamusi wakwe, cacilolecesya kuti ŵakulupwisyesoni ŵandu ŵakupikanila. (Aŵalanje Yesaya 55:10, 11.) Nambosoni, ulamusi wa Yehofa uli wacinonyelo. M’yoyo, mpaka tuŵe ŵakusimicisya kuti jwalakwe ndaŵi syosope cacanonyela ŵakutumicila ŵakwe soni kwawona kuŵa ŵakusosekwa mnope.—Eks. 34:6.

 ⁸ Patukusala kuti ngani ja ulamusi wa Yehofa jili jakusosekwa mnope, ngayikulosya kuti ngani ja cikulupusyo jili jangasosekwa kwa jwalakwejo. Jwalakwe akusasamala mnope ya m’weji. M’yoyo, tukusosekwa kukumbucilaga ndaŵi syosope cacili cakusosekwa mnope soni tukamucisyeje ulamusi wa Yehofa mwakulupicika.

9. Ana Satana ŵasasile yamtuli yakwamba Yobu? (Alole ciwulili cacili kundanda kwanganiji.)

⁹ Buku ja Yobu jikusatukamucisya kumanyilila kusosekwa kwa kuyiwona yindu mwakuŵajilwa. M’bukuji tukusaŵalangamo yaŵasasile Satana kuti naga Yobu akusimana ni yipwetesi mpaka amkane Mlungu. Satana ŵamsalile Mlungu kuti ampe yipwetesi Yobu. Yehofa nganatenda yeleyi, nambo ŵamkundile Satanajo kuti amlinje Yobu. Jwalakwe ŵatite, “Yosope yakwete yili m’miyala mwenu.” (Aŵalanje Yobu 1:7-12.) Kwandaŵi jamnono, yindu yosope ya Yobu yajonasice soni ŵanace ŵakwe ŵakunonyelwa ŵakwana 10 ni ŵamasengo ŵakwe ŵawile. Satana ŵatendekasisye yeleyi m’litala lyalyawonece mpela kuti Mlungu ni juŵatendekasisye yakusawusya ya Yobu. (Yobu 1:13-19) Kaneko Satana ŵatendekasisye kuti Yobu alwale ulwele wakupweteka mnope. (Yobu 2:7) Konjecesya pelepa, Yobu ŵatengwice mnope ni maloŵe gakupweteka gaŵam’ŵecetele ŵamkwakwe soni acimjakwe ŵatatu.—Yobu 2:9; 3:11; 16:2.

10. (a) Ana Yobu ŵatesile yamtuli yakulosya kuti ŵaliji jwakulupicika kwa Mlungu? (b) Nambo ana jwalakwe ŵalemwisye cici?

¹⁰ Ana yaŵasasile Satana yaliji yisyene? Iyayi. Atamose kuti Yobu ŵasimene ni yipwetesi yosopeyi, nambo jwalakwe ŵajendelecele kuŵa jwakulupicika kwa Mlungu. (Yobu 27:5) Nambope, kwandaŵi jamnono Yobu ŵalesile kuyiwona yindu mwakuŵajilwa. Jwalakwe ŵatandite kuliwona kuŵa jwakulungama, soni ŵatandite kum’wusya Yehofa ligongo lyakwe jwalakwejo ŵalagasikaga. (Yobu 7:20; 13:24) Mpaka tukombolece kumpikanicisya Yobu pakuganicisya yakusawusya yosope yaŵasimene nayo. Nambope, Mlungu ŵayiweni kuti ŵasosekwaga kumkamucisya Yobu kuti acenje muŵayiwonelaga yindu. Ana Yehofa ŵamsalile yamtuli Yobu?

11, 12. Ana Yehofa ŵamkamucisye camtuli Yobu kuti acenje kaganisye kakwe, soni ana Yobu ŵatesile cici?

¹¹ Maloŵe ga Mlungu gakwawula kwa Yobu gatandile mu caputala 38 mpaka 41 ca buku ja Yobu. Nambo ngatukusaŵalanga palipose pakulosya Mlungu ali mkumsalila Yobu ligongo lyakwe ŵalagasikaga. Yehofa ŵasakaga kumkamucisya Yobu kumanyilila kuti jwalakwe ŵaliji jwamwana pakulandanya ni ukulungwa wa Mlungu. Ŵamkamucisyesoni kumanyilila kuti papali yindu yaŵasosekwaga kuyiganicisya. (Aŵalanje Yobu 38:18-21.) Yeleyi yamkamucisye Yobu kuti atandesoni kuyiwona yindu mwakuŵajilwa.

 ¹² Ana yaŵatesile Yehofa pakumpa camuko camacili Yobu panyuma pakuti apilile yipwetesi yekulungwa yalosisye kuti jwaliji jwangali canasa? Iyayi, soni Yobu nganaganicisya yeleyo. Atamose kuti jwalakwe ŵasimene ni yipwetesi, nambo pambesi pakwe ŵatandite kuŵeceta yakum’yamicila Mlungu. Ŵayikene pakuŵeceta kuti, ‘Nguwusya maloŵe gosope gambecete, soni ngupitikuka mtima m’luwundu ni mu liwu.’ Jwalakwe ŵatesile yeleyi ligongo lya macili ga camuko ca Yehofa. (Yobu 42:1-6) Yobu ŵaliji ali apocelesoni camuko kutyocela kwa Elihu. (Yobu 32:5-10) Panyuma pakuti Yobu apikanile camuko ca Mlungu soni kucenga kaganisye kakwe, Yehofa ŵasalile acimjakwe wa Yobu ŵala kuti ŵasangalele ni Yobu ligongo lya kulupicika kwakwe paŵalagasikaga.—Yobu 42:7, 8.

13. Ana camuko caŵapocele Yobu camkamucisye camtuli atamose yipwetesi yakwe payamasile?

¹³ Mwangakayicila, camuko caŵapocele Yobu camkamucisye atamose payamasile yipwetesi yakwe. Camtuli? Yili yisyene kuti ‘Yehofa ŵamjaliwe Yobu pamasiku gakwe gakumalisya kupunda pandanda,’ nambo pajigele ndaŵi kuti yindu yakwe yiwujile. Jwalakwe “ŵakwetesoni ŵanace ŵacalume 7 soni ŵacakongwe ŵatatu” panyuma pa ndaŵi jelewu. (Yobu 42:12-14) Mwangakayicila, Yobu ŵasoŵaga ŵanace ŵakwe ŵaŵawile ligongo lya Satana. Kombolekasoni kuti ndaŵi sine ŵaganicisyaga ya yakusawusya yaŵasimene nayo. Atamose kuti mkupita kwandaŵi jwalakwe ŵapikanicisye ligongo lyakwe ŵalagasikaga, nambope ndaŵi sine ŵaganicisyaga ligongo lyakwe jwalakwe ŵasosekwaga kulagasika camti m’yoyo. Cinga jwalakwe ŵaganicisyaga yamtuli, nambo ŵakumbucilaga camuko caŵapocele kwa Mlungu. Kutenda yeleyi kwamkamucisye kuti ajendelecele kuyiwona yindu mwakuŵajilwa soni yamtamikaga mtima pasi.—Sal. 94:19.

14. Ana ngani ja Yobu jikutujiganya cici?

¹⁴ Ngani ja Yobu mpaka jitukamucisye kuti tuyiwoneje yindu mwakuŵajilwa soni mpaka jitutamice mtima pasi. Yehofa ŵasunjile nganiji m’Malemba “kuti jitukamucisyeje. Malembaga gakusatupa cembeceyo ligongo gakusatukamucisya kupilila nambosoni gakusatutondoya.” (Alo. 15:4) Ana tukulijiganya cici panganiji? Lijiganyo lyekulungwa lili lyakuti, tukakunda kuti yakutendekwa yapaumi wetu yitutendekasye kuleka kuganicisya ya ngani jakusosekwa mnopeji, jajili kulosya kuŵajilwa kwa ulamusi wekulungwa wa Yehofa. Mpela Yobu, tukusosekwa kamucisya ulamusi wekulungwa wa Yehofa mwakwendelecela kuŵa ŵakulupicika atamose patukusimana ni yakusawusya.

15. Ana kupilila kwetu patukusimana ni yakusawusya kukusaŵa ni umbone wamtuli?

¹⁵ Ligongo cici kuganicisya ya kusosekwa kwa  kulupicika kwetu kuli kwakulimbikasya? Ligongo yikusalosya kuti yakulingwa yetu yikwete lisosa. Yakulingwayi ngayikusalosya kuti Yehofa atutumbilile, nambo yikusatupa upile wakulosya kuti tuli ku mbali ja ulamusi wa Mlungu. (Miy. 27:11) Kupilila kwetu kucitendekasya kuti Mlungu asangalale nawe soni kucilimbisya cembeceyo cetu. (Aŵalanje Aloma 5:3-5.) Ngani ja Yobu jikulosya kuti ‘Yehofa ali jwacinonyelo soni jwacanasa.’ (Yak. 5:11) M’yoyo, mpaka tuŵe ŵakusimicisya kuti jwalakwe cacitupa mbote naga tukukamucisya ulamusi wakwe wekulungwa. Nambosoni kumanyilila yeleyi mpaka kutukamucisye “kupilila yindu yosope ni kuŵa ŵakulitimalika soni ŵakusangalala.”—Akolo. 1:11.

16. Ligongo cici tukusosekwa kulikumbusyaga ya kusosekwa kwa ulamusi wekulungwa wa Yehofa?

¹⁶ Yili yisyene kuti ndaŵi sine mpaka yiŵe yakusawusya kuganicisya ya ulamusi wekulungwa wa Yehofa. Ndaŵi sine yakusawusya yetu, atamose yiŵe yamwana mpaka yitusokonasye naga tukuyiganicisya mnope. M’yoyo tukusosekwa kulikumbusyaga ndaŵi syosope ya kusosekwa kwakamucisya ulamusi wekulungwa kwa Mlungu atamose patukusimana ni yakusawusya.

17. Ana kujigala nawo mbali mwakutamilicika pa masengo ga Yehofa mpaka kutukamucisye camtuli kuti tuganicisyeje ya ngani jakusosekwa mnope?

¹⁷ Kujigala nawo mbali mwakutamilicika pa masengo ga Yehofa mpaka kutukamucisye kuti tuganicisyeje ya ngani jakusosekwa mnope. Mwambone, mlongo jwine lina lyakwe Renee jwalwasile mnope ulwele wakuwa yiŵalo soni kansa. Paŵapocelaga cikamucisyo m’yipatala yakulekanganalekangana, jwalakwe ŵalalicilaga ŵakamula masengo m’yipatalamo, ŵakulwala soni ŵane ŵaŵayikaga kukwalola ŵakulwala. Pa cipatala cine, jwalakwe ŵalalicile maawala 80 kwa yijuma yiŵili ni hafu. Atamose ali asigele panandi kuwa, Renee ŵajendelecele kuganicisya ya ulamusi wekulungwa wa Yehofa. Yeleyi yamkamucisye kunandiya kulaga nganisyo.

18. Ana cisyasyo ca Jennifer cikulosya camtuli umbone wakuganicisya ya ulamusi wa Yehofa?

¹⁸ Mpaka tukombolesoni kukamucisya ulamusi wa Yehofa kwineku tuli mkulimbana ni yakusawusya ya lisiku ni lisiku soni yindu yangayijembeceya. Mlongo jwine lina lyakwe Jennifer ŵatemi ku luŵala lwa ndege kwa masiku gatatu ali mkulindilila ndege jakwawula kumangwakwe. Paliji pangali ndege jajanyakwice pa gele masikugo. Yeleyi yatendekasisye kuti jwalakwe akole lipowo soni ŵapesile mnope. Nambope, ŵapopesile kwa Yehofa kuti amkamucisye kwalalicila ngani syambone ŵandu ŵane ŵaŵalindililagasoni ndege. Ana yakuyicisya yakwe yaliji yamtuli? Jwalakwe ŵalalicile kwa ŵandu ŵajinji soni ŵagaŵile mabuku gejinji. Jennifer ŵasasile kuti, “Nalipikene kuti Yehofa ŵambele majali soni macili gakwasalila ŵane ya lina lyakwe.” Yisyene, jwalakwe ŵaŵisile nganisyo syakwe syosope pa lisosa lya Yehofa.

19. Ana ŵandu ŵa Yehofa akusaŵa mbali japi pangani ja ulamusi wakwe wekulungwa?

¹⁹ Ŵandu ŵa Yehofape ni ŵakusamanyilila kusosekwa kwa ulamusi wekulungwa wa Yehofa, soni yeleyi ni yayikusiyamanyikasya kuti ali ŵakulambila ŵasyesyene. M’yoyo wosopewe tukusosekwa kwendelecela kamucisya ulamusi wekulungwa wa Yehofa.

20. Ana Yehofa akusapikana wuli mumtima patukulingalinga kamucisya ulamusi wakwe?

²⁰ Yehofa akusayiwona soni akusayamicila yosope yatukusatenda pakamucisya ulamusi wakwe wekulungwa soni kupilila yakulingwa. (Sal. 18:25.) Ngani jakuyicisya jicitagulilasoni ligongo lyakwe tukusosekwa kamucisya ulamusi wa Yehofa ni mtima wosope soni mwampaka tutendele yeleyi.