1, 2. Mɛni hewɔ mɛi baaya nɔ aye ohia yɛ shihilɛ gbɛjianɔtoo nɛɛ mli lɛ?

ŊMƐNƐ lɛ, shika taomɔ ewa waa. Oblahii kɛ oblayei pii miitao nitsumɔ shi amɛnáaa. Mɛi komɛi hu kɛ amɛwala woɔ oshara mli kɛfãa gbɛ kɛyaa maji ni niiatsɛmɛi fa yɛ jɛmɛ lɛ anɔ. Yɛ maji nɛɛ po anɔ lɛ, mɛi pii miiye ohia. Kɛfata he lɛ, yɛ je lɛŋ fɛɛ lɛ, niiatsɛmɛi miiya nɔ amɛmiiná nii, ni ohiafoi miiya nɔ amɛmiiye ohia. Akɔntaa ko ni abu nyɛsɛɛ nɛɛ nɔŋŋ lɛ tsɔɔ akɛ, mɛi ni ená nii kpɔtɔɔ yɛ je lɛ mli lɛ ateŋ oha mlijaa ekome yɛ nii fe je lɛ mli bii ni eshwɛ lɛ fɛɛ anii ni amɛyɔɔ lɛ ni abua naa. Kɛ́ akɔntaabuu nɛɛ ejaaa po diɛŋtsɛ lɛ, wɔle akɛ mɛi akpekpei abɔ miiye ohia waa, tsɛbelɛ mɛi krokomɛi hu yɛ nii ni fa bɔ ni amɛbaanyɛ amɛkɛkwɛ yinɔbii babaoo ni baaba yɛ amɛsɛɛ lɛ po. Yesu le enɛ, ni no hewɔ lɛ, ewie akɛ: “Ohiafoi lɛ nyɛkɛ amɛ yɛ daa.” (Mar. 14:7) Mɛni hewɔ je lɛŋ shihilɛ yɔɔ nakai?

² Yesu le akɛ Nyɔŋmɔ Maŋtsɛyeli lɛ pɛ baanyɛ ahã shihilɛ nɛɛ atsake. Biblia lɛ hãa wɔleɔ akɛ, nibii etɛ feɔ Satan je lɛ. Nomɛi ji, maŋkwramɔ gbɛjianɔtoi, jamɔ gbɛjianɔtoi, kɛ je lɛŋ “jarayelɔi” loo jarayeli gbɛjianɔtoi ni yeee anɔkwa lɛ. (Kpoj. 18:3) Nyɔŋmɔ webii lɛ nyɛɔ amɛtsiɔ amɛhe kwraa kɛjeɔ je lɛŋ maŋkwramɔ gbɛjianɔtoi kɛ amale jamɔi ahe. Shi amɛteŋ mɛi pii nyɛŋ amɛtsi amɛhe kwraa kɛje jarayeli gbɛjianɔtoi ni yɔɔ Satan je lɛ mli lɛ ahe.

3. Mɛɛ sanebimɔi ahe wɔbaasusu?

 ³ Akɛ Kristofoi lɛ, esa akɛ wɔpɛi wɔmli wɔkwɛ kɛji wɔhiɛ jwɛŋmɔ ni ja yɛ je lɛŋ jarayeli gbɛjianɔtoi lɛ ahe. Wɔbaanyɛ wɔbi wɔhe akɛ: ‘Mɛɛ gbɛ nɔ manyɛ mikɛ heloonaa nibii ni miyɔɔ lɛ atsu nii kɛtsɔɔ akɛ miyeɔ Nyɔŋmɔ anɔkwa? Te mafee tɛŋŋ maba bɔ ni mikɛ mihe woɔ heloonaa nitsumɔi kɛ jarayelii amli lɛ shi kwraa? Mɛɛ gbɛ nɔ Nyɔŋmɔ tsuji komɛi etsɔɔ akɛ yɛ bɔ ni shihilɛ lɛ mli ewa lɛ fɛɛ sɛɛ lɛ, amɛkɛ amɛhiɛ fɔ̃ɔ Nyɔŋmɔ nɔ kɛ amɛtsui fɛɛ?’

4, 5. (a) Mɛɛ shihilɛ mli shĩa nɔkwɛlɔ ni yɔɔ Yesu nɔkwɛmɔnɔ lɛ mli lɛ yaje? (b) Mɛɛ ŋaa Yesu wo esɛɛnyiɛlɔi lɛ?

⁴ Kanemɔ Luka 16:1-9. Esa akɛ Yesu nɔkwɛmɔnɔ ni kɔɔ shĩa nɔkwɛlɔ ni yeee anɔkwa lɛ he lɛ ahã wɔsusu nii ahe waa. Awie shĩa nɔkwɛlɔ nɛɛ he sane fɔŋ atsɔɔ enuŋtsɔ lɛ akɛ eekpãta enuŋtsɔ lɛ nibii ahiɛ. No hewɔ lɛ, enuŋtsɔ lɛ kpɛ eyiŋ akɛ ebaashwie lɛ. * Shi shĩa nɔkwɛlɔ lɛ kɛ “hiɛshikamɔ ni sa” tsu nii. Ekɛ mɛi bɔ naanyo koni kɛ́ ashwie lɛ lɛ, amɛye amɛbua lɛ. Yesu egbaaa nɔkwɛmɔnɔ nɛɛ ni ekɛwo ekaselɔi lɛ hewalɛ ni amɛfee nibii ni ejaaa kɛtao amɛdaaŋ ŋmaa yɛ jeŋ fɔŋ nɛɛ mli. Ewie akɛ “shihilɛ gbɛjianɔtoo nɛɛ bii lɛ” ji mɛi ni feɔ nakai. Moŋ lɛ, egba amɛ nɔkwɛmɔnɔ lɛ koni ekɛtsɔɔ amɛ nɔ ko ni he hiaa waa.

⁵ Yesu le akɛ, tamɔ bɔ ni ehe bahia ni shĩa nɔkwɛlɔ lɛ akwɛ he ni ebaaná edaaŋ ŋmaa yɛ lɛ, ebaawa kɛhã ekaselɔi lɛ ateŋ mɛi pii akɛ amɛbaaná shika kɛkwɛ amɛhe yɛ jeŋ ni ayeee anɔkwa yɛ mli nɛɛ mli. No hewɔ lɛ, ewo amɛ hewalɛ akɛ: “Nyɛkɛ ninámɔ ni ejaaa lɛ atsua nii kɛfea nanemɛi nyɛhãa nyɛhe koni kɛ́ etã lɛ, nanemɛi nɛɛ [ni ji Yehowa kɛ Yesu] ahere nyɛ kɛya naanɔ shihilɛhei lɛ.” Mɛni wɔkaseɔ yɛ ŋaa ni Yesu wo nɛɛ mli?

6. Te wɔfeɔ tɛŋŋ wɔleɔ akɛ jarayeli fataaa Nyɔŋmɔ yiŋtoo kɛhã adesai lɛ he?

⁶ Eyɛ mli akɛ Yesu etsɔɔɔ nɔ hewɔ ni ewie akɛ ninámɔ ejaaa lɛ moŋ, shi Biblia lɛ hãa wɔleɔ faŋŋ akɛ, jarayeli fataaa Nyɔŋmɔ yiŋtoo kɛhã adesai lɛ he. Yɛ Eden abɔɔ lɛ mli lɛ, Yehowa duro Adam kɛ Hawa nibii pii fe bɔ ni he hiaa amɛ po. (1 Mose 2:15, 16) Afii pii asɛɛ be ni Nyɔŋmɔ hã mɛi ni afɔ amɛ mu ni hi shi yɛ klɛŋklɛŋ afii 100 lɛ mli lɛ mumɔ krɔŋkrɔŋ lɛ, “amɛteŋ mɔ ko mɔ ko po tsɛɛɛ enibii ni eyɔɔ lɛ amli eko akɛ lɛ diɛŋtsɛ enɔ, shi moŋ amɛfee nibii ni amɛyɔɔ lɛ fɛɛ ekome.” (Bɔf. 4:32) Gbalɔ Yesaia wie akɛ, be baashɛ ni adesai fɛɛ baaná nibii kpakpai fɛɛ ni yɔɔ shikpɔŋ nɔ lɛ ahe sɛɛ. (Yes. 25:6-9; 65:21, 22) Shi kɛyashi nakai be lɛ baashɛ lɛ, ehe baahia ni Yesu sɛɛnyiɛlɔi lɛ kɛ “hiɛshikamɔ ni sa” atsu nii. Ehe baahia ni amɛkɛ “ninámɔ ni ejaaa” lɛ atsu nii kɛkwɛ amɛhe, ni yɛ nakai beiaŋ nɔŋŋ lɛ, amɛbɔ mɔdɛŋ akɛ amɛbaafee Nyɔŋmɔ suɔmɔnaa nii.

7. Mɛɛ ŋaa Yesu wo yɛ Luka 16:10-13?

⁷ Kanemɔ Luka 16:10-13. Shĩa nɔkwɛlɔ ni yɔɔ Yesu nɔkwɛmɔnɔ lɛ mli lɛ kɛ mɛi bɔ naanyo kɛhã lɛ diɛŋtsɛ esɛɛnamɔ. Yesu wo esɛɛnyiɛlɔi lɛ hewalɛ ni amɛ hu amɛfee nanemɛi yɛ ŋwɛi. Kɛ̃lɛ, jeee nɔ ni amɛ pɛ amɛbaaná yɛ mli lɛ hewɔ ekɛɛ amɛ nakai lɛ. Yɛ kukuji ni nyiɛ nɔkwɛmɔnɔ nɛɛ sɛɛ lɛ amli lɛ, Yesu hã efee faŋŋ akɛ, bɔ ni wɔkɛ “ninámɔ ni ejaaa” lɛ tsuɔ nii wɔhãa lɛ baatsɔɔ kɛji wɔyeɔ Nyɔŋmɔ anɔkwa aloo wɔyeee lɛ anɔkwa. Yɛ mɛɛ gbɛ nɔ?

8, 9. Gbaa bɔ ni mɛi komɛi kɛ ninámɔ ni ejaaa lɛ etsu nii amɛhã.

⁸ Yesu gba akɛ abaashiɛ yɛ jeŋ fɛɛ. (Mat. 24:14) Gbɛ kome ni wɔbaanyɛ wɔtsɔ nɔ wɔkɛ heloonaa nibii ni wɔyɔɔ lɛ atsu nii kɛtsɔɔ akɛ  wɔyeɔ anɔkwa ji, ni wɔbaatsu onia kɛfi shiɛmɔ nitsumɔ nɛɛ sɛɛ. Akɛ nɔkwɛmɔnɔ lɛ, gbekɛ yoo fioo ko ni yɔɔ India lɛ kɛ shika ni ebaanyɛ ekɛhe tsobi kɛ nibii krokomɛi lɛ to adeka bibioo ko mli. Be ni adeka lɛ yi lɛ, ejie shika lɛ ni ekɛyahã koni akɛfi shiɛmɔ nitsumɔ lɛ sɛɛ. Nyɛmi nuu ko ni yɔɔ India lɛ yahã nyɛmimɛi ni tsuɔ nii yɛ Malayalam wiemɔ shishitsɔɔmɔ ɔfis lɛ akooshi pii. Nyɛmi nuu nɛɛ yɛ akooshi ŋmɔ, ni enuɔ he akɛ, akɛni ɔfis lɛ yaheɔ akooshi hewɔ lɛ, kɛ́ ekɛ eko yahã amɛ lɛ, ebaawa amɛ waa fe ni ebaahã amɛ shika. Enɛ tsɔɔ akɛ ehiɛ kã shi waa. Nyɛmimɛi ni yɔɔ Greece lɛ hu kɛ oliv mu, tsiisi, kɛ niyenii krokomɛi yahãa Betel weku lɛ daa.

⁹ Nyɛmi nuu ko ni jɛ Sri Lanka, ni amrɔ nɛɛ eyahi maŋ kroko nɔ lɛ kɛ eshĩa kɛ eshikpɔŋ ni yɔɔ Sri Lanka lɛ ehã koni akɛfee asafoŋ kpeei kɛ kpeei wuji, ní be fɛɛ sɔɔlɔi hu ahi mli. Nyɛmi nuu nɛɛ kɛ shika ni kulɛ ebaaná yɛ shĩa lɛ kɛ shikpɔŋ lɛ mli lɛ eshã afɔle, ni nyɛmimɛi ni yɔɔ jɛmɛ lɛ miiná he sɛɛ waa, ejaakɛ amɛbɛ nɔ ko tsɔ. Yɛ maŋ ko ni aŋmɛɛɛ Odasefoi gbɛ ni amɛsɔmɔ Yehowa yɛ toiŋjɔlɛ mli lɛ mli lɛ, nyɛmimɛi lɛ kɛ amɛshĩai hãa akɛ Maŋtsɛyeli Asai. Enɛ hewɔ lɛ, gbɛgbalɔi kɛ mɛi krokomɛi ni bɛ nɔ ko tsɔ lɛ náa he ko amɛkpeɔ yɛ ní aheee amɛ nɔ ko nɔ ko.

10. Kɛ́ wɔfee mɛi ejurɔ lɛ, mɛɛ jɔɔmɔi wɔnáa?

¹⁰ Nɔkwɛmɔnii nɛɛ ehã wɔna akɛ, Nyɔŋmɔ webii lɛ “yeɔ nɔ ko bibioo kwraa mli anɔkwa.” (Luka 16:10) Amɛkɛ heloonaa nibii ni amɛyɔɔ lɛ tsuɔ nii bɔ ni mɛi krokomɛi baaná he sɛɛ. Te Yehowa nanemɛi nɛɛ nuɔ he amɛhãa tɛŋŋ yɛ afɔlei ni amɛshãa lɛ ahe? Amɛmii shɛɔ amɛhe waa, ejaakɛ amɛle akɛ gbɛ kome ni amɛbaanyɛ amɛtsɔ nɔ amɛná “anɔkwa ninámɔ” ji, ni amɛbaafee mɛi ejurɔ. (Luka 16:11) Nyɛmi yoo ko ni tsuɔ onia daa kɛfiɔ Maŋtsɛyeli nitsumɔ lɛ sɛɛ lɛ wie akɛ: “Ejurɔ ni mifeɔ lɛ hewɔ lɛ, nɔ ko ni yɔɔ naakpɛɛ etee nɔ yɛ mishihilɛ mli yɛ afii nɛɛ amli fɛɛ. Mina akɛ kɛ́ mike mɛi nii lɛ, ehãa mikɛ mɛi yeɔ jogbaŋŋ fe tsutsu lɛ. Mikɛ mɛi ni tɔ̃ɔ minɔ lɛ ahe keɔ amɛ, mitoɔ mitsui shi mihãa mɛi, ni kɛ́ minijiaŋ je wui loo awo mi ŋaa lɛ, mimli fuuu.” Mɛi pii ena akɛ, kɛ́ amɛfee mɛi ejurɔ lɛ, amɛnáa he sɛɛ waa.​—Lala 112:5; Abɛi 22:9.

11. (a) Mɛɛ gbɛ kroko nɔ wɔbaanyɛ wɔkɛ heloonaa nibii ni wɔyɔɔ lɛ atsu nii yɛ hiɛshikamɔ mli? (b) Mɛɛ gbɛ nɔ oniai ni atsuɔ lɛ yeɔ ebuaa Nyɔŋmɔ webii ni yɔɔ maji ni ohiafoi fa yɛ jɛmɛ lɛ anɔ? (Kwɛmɔ mfoniri ni yɔɔ nikasemɔ lɛ shishijee lɛ.)

¹¹ Gbɛ kroko ni wɔbaanyɛ wɔtsɔ nɔ wɔkɛ heloonaa nibii ni wɔyɔɔ lɛ atsu nii yɛ “hiɛshikamɔ” mli ji, ni wɔkɛbaaye wɔbua mɛi krokomɛi koni amɛ hu amɛnyɛ amɛtsu shiɛmɔ nitsumɔ lɛ. Kɛ́ wɔnyɛɛɛ wɔkɛ wɔhe awo be fɛɛ sɔɔmɔ nitsumɔ lɛ mli loo wɔfã kɛya maŋsɛɛ wɔyasɔmɔ po lɛ, wɔle akɛ mɛi krokomɛi baaná oniai ni wɔtsuɔ lɛ ahe sɛɛ. (Abɛi 19:17) Akɛ nɔkwɛmɔnɔ lɛ, oniai ni wɔtsuɔ lɛ yeɔ ebuaa ni anyɛɔ atsuɔ shiɛmɔ nitsumɔ lɛ yɛ maji ni mɛi pii miiye ohia shi anɔkwale lɛ miishwere yɛ jɛmɛ lɛ anɔ. Agbɛnɛ hu, oniai nɛɛ yeɔ ebuaa ni anyɛɔ akɛ Bibliai kɛ woji krokomɛi majeɔ mɛi ni yɔɔ hei nɛɛ. Yɛ maji tamɔ Congo, Madagascar, kɛ Rwanda lɛ, Bibliai ajara wa waa. Ekomɛi ajara baashɛ otsi loo nyɔɔŋgbele nyɔmɔwoo. No hewɔ lɛ, be ko ni eho lɛ, ja nyɛmimɛi lɛ kɛ shika ni amɛkɛbaahe niyenii amɛhã amɛwekui lɛ eshã afɔle dani amɛnine baanyɛ ashɛ Biblia  lɛ eko nɔ. Shi oniai ni nyɛmimɛi ni yɔɔ hei krokomɛi lɛ tsuɔ lɛ ahewɔ lɛ, Yehowa asafo lɛ enyɛ etsɔɔ Biblia lɛ shishi ni ejara ehã nyɛmimɛi ni yɔɔ hei nɛɛ. No hewɔ lɛ amrɔ nɛɛ, wekui ni yɔɔ hei nɛɛ amli bii lɛ ateŋ mɔ fɛɛ mɔ yɛ lɛ diɛŋtsɛ e-Biblia, ni amɛ-Biblia mli nikaselɔi hu ená eko. (Kanemɔ 2 Korintobii 8:13-15.) No hewɔ lɛ, mɛi ni feɔ ejurɔ lɛ kɛ mɛi ni afeɔ amɛ ejurɔ lɛ fɛɛ baanyɛ abatsɔmɔ Yehowa nanemɛi.

12. Mɛni Abraham fee ni tsɔɔ akɛ ekɛ ehiɛ fɔ̃ Nyɔŋmɔ nɔ?

¹² Gbɛ kroko ni wɔbaanyɛ wɔtsɔ nɔ wɔtsɔmɔ Yehowa nanemɛi ji, ni wɔbaaba bɔ ni wɔkɛ wɔhe woɔ heloonaa nitsumɔi kɛ jarayelii amli lɛ shi kwraa, koni wɔnyɛ wɔtiu “anɔkwa” ninámɔ sɛɛ. Nakai Abraham fee. Be ni Yehowa kɛɛ lɛ akɛ eshi ogbɔjɔ shihilɛ ni eyɔɔ mli yɛ Ur lɛ ni eyahi bui loo mama tsũi amli lɛ, ejie hemɔkɛyeli kpo ni ebo lɛ toi, ejaakɛ eesumɔ ni ekɛ Yehowa abɔ naanyo. (Heb. 11:8-10) Ekɛ ehiɛ fɔ̃ Nyɔŋmɔ nɔ moŋ fe heloonaa nibii. (1 Mose 14:22, 23) Yesu wo mɛi hewalɛ ni amɛná hemɔkɛyeli tamɔ Abraham. Be ko lɛ, ekɛɛ oblanyo niiatsɛ ko akɛ: “Kɛ́ ootao oye emuu lɛ, yaahɔ̃ɔ onibii ni okɛhã ohiafoi, ni obaaná jwetri yɛ ŋwɛi; ni oba obatsɔ misɛɛnyiɛlɔ.” (Mat. 19:21) Oblanyo nɛɛ ejieee hemɔkɛyeli kpo tamɔ Abraham fee lɛ, shi mɛi krokomɛi kɛ amɛnifeemɔi tsɔɔ akɛ amɛkɛ amɛhiɛ fɔ̃ɔ Nyɔŋmɔ nɔ kɛ amɛtsui fɛɛ.

13. (a) Mɛɛ ŋaa Paulo wo Timoteo? (b) Mɛɛ gbɛ nɔ wɔbaanyɛ wɔkɛ ŋaa ni Paulo wo lɛ atsu nii ŋmɛnɛ?

¹³ Timoteo jie hemɔkɛyeli kpo. Paulo tsɛ lɛ “Kristo Yesu asraafonyo kpakpa,” kɛkɛ ni ekɛɛ lɛ akɛ: “Mɔ ko mɔ ko bɛ ni sɔmɔɔ akɛ asraafonyo ní kɛ ehe woɔ shihilɛ mli guɔyelii amli, bɔ ni afee ni esa mɔ ni he lɛ ewo asraafoi anitsumɔ lɛ mli lɛ hiɛ.” (2 Tim. 2:3, 4) Ŋmɛnɛ lɛ, mɛi akpei akpe kome kɛ sɛɛ ni miisɔmɔ akɛ be fɛɛ sɔɔlɔi lɛ, kɛ Yesu sɛɛnyiɛlɔi krokomɛi fɛɛ ni yɔɔ je lɛ mli lɛ bɔɔ mɔdɛŋ waa akɛ amɛkɛ ŋaa ni Paulo wo lɛ baatsu nii. Amɛdiii nibii srɔtoi ni atswaa he ŋoŋo yɛ je lɛ mli ŋmɛnɛ lɛ asɛɛ. Moŋ lɛ, amɛhãa shishitoo mla ni nyiɛ sɛɛ nɛɛ hiɔ amɛjwɛŋmɔ mli be fɛɛ be, akɛ: “Mɔ ni yafaa nii tsɔɔ nyɔŋ ehãa mɔ ni fa lɛ nii lɛ.” (Abɛi 22:7, Ga Biblia hee) Satan miitao wɔtsɔmɔ nyɔji wɔhã lɛ. Eetao wɔkɛ wɔbe kɛ wɔhewalɛ fɛɛ atao shika yɛ je nɛɛ mli. Mɛi komɛi yafaa shikai wuji kɛheɔ shĩai, loo tsɔji. Amɛteŋ mɛi komɛi hu yafaa koni amɛkɛya skul, loo amɛkɛkpee yoo. Shikai nɛɛ batsɔmɔɔ nyɔji ni kã shi ni esa akɛ amɛkɛ afii babaoo awo. Kristofoi ni hiɛ kã shi lɛ hãa amɛshihilɛ feɔ mlɛo. Amɛkwɛɔ jogbaŋŋ koni amɛkahiɛ mɛi nyɔmɔ, loo amɛfite shika pii. Enɛ hewɔ lɛ, amɛfiteee amɛbe kɛ amɛhewalɛ fɛɛ kɛtaooo shika, ni no hãa amɛnáa hejɔlɛ kɛsɔmɔɔ Nyɔŋmɔ.​—1 Tim. 6:10.

14. Mɛni esa akɛ wɔtswa wɔfai shi akɛ wɔbaafee? Okɛ enɛ he nɔkwɛmɔnii ahã.

¹⁴ Kɛ́ wɔhã Nyɔŋmɔ Maŋtsɛyeli lɛ he hia wɔ fe nibii krokomɛi fɛɛ lɛ, no dani wɔbaanyɛ wɔhã wɔshihilɛ afee mlɛo. No mli lɛ nyɛmi nuu ko kɛ eŋa ni be ko ni eho lɛ amɛji be fɛɛ sɔɔlɔi lɛ, yɛ nitsumɔ wulu ko ni hãa amɛnáa shika waa. Shi amɛshwe waa akɛ amɛkɛ amɛhe awo be fɛɛ sɔɔmɔ lɛ mli ekoŋŋ. No hewɔ lɛ, amɛhɔ̃ɔ amɛnitsumɔ lɛ, amɛlɛlɛ lɛ, kɛ amɛheloonaa nibii krokomɛi. Kɛkɛ ni amɛkɛ amɛhe hã akɛ amɛbaasumɔ ni amɛye amɛbua kɛma nitsumɔhe yitso hee ni yɔɔ Warwick, yɛ New York lɛ. No mli lɛ, amɛbiyoo lɛ kɛ ewu miisɔmɔ yɛ Betel, no hewɔ lɛ, ebafee hegbɛ kpele ni amɛná akɛ amɛkɛ amɛ baafee ekome kɛsɔmɔ. Amɛná hegbɛ amɛkɛ nyɛmi nuu lɛ fɔlɔi hu tsu nii otsii fioo komɛi, ejaakɛ amɛ hu amɛbaye amɛbua kɛ tsũ lɛ maa. Nyɛmi yoo gbɛgbalɔ ko ni yɔɔ Colorado, yɛ U.S.A. lɛ ná nitsumɔ yɛ shikatoohe ko. Akɛni jeee ebe fɛɛ ekɛtsuɔ nii lɛ hewɔ lɛ, enyɛ ekɛ shiɛmɔ nitsumɔ lɛ ye klɛŋklɛŋ gbɛhe  yɛ eshihilɛ mli. Shi be ko lɛ, nitsumɔ lɛ mli onukpai lɛ kɛɛ amɛbaasumɔ ni ekɛ ebe fɛɛ atsu nii, ejaakɛ amɛna akɛ etsuɔ nii waa. Amɛwie po akɛ amɛbaaku enyɔmɔwoo lɛ amɛbɔ he toi etɛ amɛhã lɛ. Shi nyɛmi yoo nɛɛ ekpɛlɛɛɛ nɔ, ejaakɛ ele akɛ ebaasa eshiɛmɔyaa he. Yehowa tsuji krokomɛi hu kɛ nibii eshã afɔle, ejaakɛ amɛtswa amɛfai shi akɛ, amɛhãŋ nɔ ko nɔ ko he ahia amɛ fe Maŋtsɛyeli lɛ. Amɛkɛ amɛnifeemɔ etsɔɔ akɛ, amɛbuɔ naanyobɔɔ ni yɔɔ amɛ kɛ Nyɔŋmɔ teŋ lɛ akɛ nɔ ko ni jara wa fe shika kɛ heloonaa nibii.

15. Mɛɛ nitsumɔ hãa mɔ náa miishɛɛ fe fɛɛ?

¹⁵ Kɛ́ mɔ ko yɛ shika kɛ heloonaa nibii pii lɛ, no etsɔɔɔ doo akɛ Nyɔŋmɔ ejɔɔ lɛ. Yehowa jɔɔ mɛi ni kɛ hiɛdɔɔ tsuɔ “nitsumɔi kpakpai.” (Kanemɔ 1 Timoteo 6:17-19.) Akɛ nɔkwɛmɔnɔ lɛ, be ko lɛ nyɛmi yoo ko ni atsɛɔ lɛ Lucia * lɛ ná ele akɛ shiɛlɔi ahe miihia waa yɛ Albania. No hewɔ lɛ, efã kɛjɛ Italy ni eyahi jɛmɛ yɛ afi 1993. Be ni etee lɛ, enáaa nitsumɔ, shi ekɛ ehiɛ fɔ̃ Yehowa nɔ akɛ ebaakwɛ lɛ. Ebɔ mɔdɛŋ ekase Albania wiemɔ lɛ jogbaŋŋ, ni eye ebua mɛi fe 60 ni amɛtee amɛhiɛ ni abaptisi amɛ. Eyɛ mli akɛ jeee he fɛɛ he shiɛmɔ nitsumɔ lɛ woɔ yibii waa nɛkɛ moŋ, kɛ̃lɛ nɔ fɛɛ nɔ ni wɔfeɔ kɛyeɔ wɔbuaa mɛi koni amɛna wala gbɛ lɛ ni amɛnyiɛ nɔ lɛ, ji nɔ ko ni wɔ kɛ amɛ fɛɛ hiɛ baasɔ kɛya naanɔ.​—Mat. 6:20.

16. (a) Wɔsɛɛ lɛ, mɛni baaba shika kɛ heloonaa nibii ni yɔɔ je lɛ mli ŋmɛnɛ lɛ anɔ? (b) Mɛɛ gbɛ nɔ esa akɛ enɛ asa bɔ ni wɔnaa heloonaa nibii wɔhãa lɛ he?

¹⁶ Nɔ ni Yesu wie yɛ Luka 16:9 lɛ hãa wɔnaa akɛ, be ko baaba ni shika kɛ heloonaa nibii ahiɛ baakpãtã. Yɛ naagbee gbii nɛɛ amli lɛ, shikatoohei komɛi ejwa, ni maji komɛi hu ashika sane efee basaa. Shi etsɛŋ tsɔ, nibii baafite fe nɛkɛ po. Maŋkwramɔ, jamɔ, kɛ jarayeli he gbɛjianɔtoi fɛɛ ni yɔɔ Satan nibii agbɛjianɔtoo nɛɛ mli lɛ baafite. Gbalɔ Ezekiel kɛ gbalɔ Zefania gba akɛ, shika kɛ jwiɛtɛi, ni ji nibii komɛi ni kɛjɛ blema beebe lɛ jarayelɔi buɔ akɛ amɛjara wa waa lɛ, ahe baŋ sɛɛnamɔ. (Ezek. 7:19; Zef. 1:18) Kɛ́ wɔkã wɔgbele saa nɔ, ni wɔyɔse akɛ wɔyatiuuu anɔkwa ninámɔ sɛɛ, shi moŋ wɔyatiu je nɛŋ “ninámɔ ni ejaaa” lɛ sɛɛ lɛ, te wɔbaanu he wɔhã tɛŋŋ? Ekolɛ wɔbaanu he tamɔ nuu ko ni gbo deŋme ewala gbii fɛɛ kɛbua shika pii naa, shi yɛ naagbee mli dani eyɔse akɛ shika fɛɛ ni ená lɛ, jeee shika kpakpa ni. (Abɛi 18:11) Bɔ fɛɛ bɔ ni fee lɛ, yɛ naagbee lɛ, heloonaa nibii ni yɔɔ je nɛɛ mli lɛ ahiɛ baakpãtã. No hewɔ lɛ, kaahã hegbɛ ni oná akɛ okɛ heloonaa nibii ni oyɔɔ lɛ baatsu nii ‘kɛfee nanemɛi’ yɛ ŋwɛi lɛ ŋmɛɛ bo. Nibii fɛɛ ni wɔfeɔ kɛfiɔ Yehowa Maŋtsɛyeli lɛ sɛɛ lɛ hãa wɔtsɔmɔɔ niiatsɛmɛi yɛ Nyɔŋmɔ hiɛ.

17, 18. Wɔsɛɛ lɛ, mɛni Nyɔŋmɔ nanemɛi baaná?

¹⁷ Kɛ́ Nyɔŋmɔ Maŋtsɛyeli lɛ ba lɛ, ehe ebahiaŋ ni wɔhai tsũ, loo wɔyafa shika kɛyahe eko. Niyenii baabu ni ahɔŋ. Nyɔmɔ ni wɔbɔɔ yɛ helatsamɔ kɛ tsofai ahe lɛ fɛɛ sɛɛ baafo. Yehowa baakwɛ ni enanemɛi ni baahi shikpɔŋ lɛ nɔ lɛ aye emli nibii kpakpai lɛ amli ŋɔɔmɔ. Mɔ ko mɔ ko tĩaŋ shika, jwiɛtɛi, kɛ ojarawa tɛi anaa ehãŋ ehe. Moŋ lɛ, akɛ nibii nɛɛ baafee wulamɔ nibii. Wɔbaaná tsei, tɛi, kɛ dadei kpakpai kɛmamɔ shĩai fɛfɛji, ni mɔ ko mɔ ko heŋ wɔ tɔrɔ. Wɔnanemɛi baajɛ amɛsuɔmɔ mli amɛye amɛbua wɔ, ni amɛheŋ wɔ shika ko kwraa. Abaaja nibii fɛɛ ni yɔɔ shikpɔŋ lɛ nɔ lɛ koni mɔ fɛɛ mɔ aná eko.

¹⁸ Nibii kpakpai ni mɛi ni feɔ nanemɛi yɛ ŋwɛi lɛ baaná lɛ amli fioo ko pɛ wɔwie he nɛɛ. Yehowa tsuji ni yɔɔ shikpɔŋ lɛ nɔ lɛ amii baashɛ amɛhe kɛteke nɔ, ejaakɛ Yesu baakɛɛ amɛ akɛ: “Nyɛbaa, nyɛ mɛi ni mi-Tsɛ ejɔɔ nyɛ, nyɛŋɔa Maŋtsɛyeli ni asaa ato nyɛ kɛjɛ be ni ato je lɛ shishi lɛ.”​—Mat. 25:34.