1, 2. Hari ina negai, dahaka dainai ogoḡami taudia na momo?

HARI ina negai moni ena hekwakwanai na bada. Eregabe momo ese moni ḡaukara na asie davarimu. Bona taunimanima momo na taḡa tanodia e laomu. Tanobada heḡeḡemadai, taḡa tanodia ai danu, taunimanima na e ogoḡamimu. Bona taḡa bona ogoḡami taudia edia namba na e bada e laomu. Ripoti haida ese e hahedinaraimu, taḡa taudia 1 pesen edia kohu ese taunimanima iboudiai edia na e hereaiamu. Ena be una na e varamu, to ta itaiamu taunimanima bilion momo na ogoḡami ai e nohomu, a haida edia taḡa na heḡereḡere dainai edia bese na bae naridia diba. Iesu na una mai dibana dainai ini e gwau toma: “Ogoḡami taudia na nega idoidiai dekemui ai.” (Mar. 14:7) Dahaka dainai una na e varamu?

² Iesu na mai dibana Dirava ena Basileia bainema neganai moni ena hekwakwanai na baine haorea. Politikol bona tomadiho oreadia, bona Apokalupo 18:3 ese e herevalaia “hoihoi taudia,” o mataḡaniḡani bisnes oreadia na Satana ena tanobada kahana ta. Ena be Dirava ena taunimanima ese politikol bona tomadiho koikoi na e dadaraidiamu, to momo na bisnes karadia lalodiai e vareaimu.

3. Ededia henanadai baita herevalaimu?

³ Ita na Kristen tauda dainai, namona na hari ina negai e karamu bisnes karadia baita haerodia namonamo bona siboda baita  henanadai: ‘Edena dala ai egu kohu baina ḡaukaralai diba unu amo baina hahedinaraia lau na Dirava na abidadama heniamu? Dahaka baina kara diba unu amo bisnes karadia ai basina vareai momo? Ededia haheitalai ese e hahedinaraimu Dirava ena taunimanima na Ia e abidadama heniamu, ena be hekwakwanai e davarimu?’

4, 5. (a) Iesu ena parabole ai e herevalaia kohu ireḡuna tauna enai be dahaka e vara? (b) Iesu ese ena hahediba be dahaka sisiba e henidia?

⁴ Luka 16:1-9 ba duahi. Iesu ese kohu ireḡuna tauna mai koikoina ena haheitalai e herevalaia. Haida ese ia na e hahebadelaia, biaguna ena kohu na se ḡaukaralai namonamova, una dainai ia na mai “lalo-pararana ida” kara ta e karaia ma haida baine “hetura” henidia totona, unu amo ena dagi baine haboioa neganai bae durua diba. * Iesu ese ena hahediba na se haḡanidia koikoi dalanai bae kara edia mauri iduruna ḡaudia bae abi totona. Una na ina “tanobada taudia” edia kara, to Iesu ese una haheitalai amo mai anina bada ḡauna ta e hadibadia.

⁵ Iesu na mai dibana una kohu ireḡuna tauna heḡereḡerena, iena hahediba taudia momo na ina tanobada dikana ai edia mauri iduruna ḡaudia iabidia totona ḡau haida bae kara na namo. Iesu ese e haḡanidia, eto: “Kohu dikadia amo taunimanima lalodia bavani, idia ida ba hetura heheni, bena ba dabu negana ai na basie ore rumadia ai [Iehova bona Iesu ese] bae abimui dae.” Iesu ena sisiba amo dahaka ta dibamu?

6. Ede ta diba tomamu moni momo itahuna karana na dia Dirava ena ura?

⁶ Ena be Iesu ese taḡa e gwauraidia “kohu dikadia” badina na se herevalaia, to Baibul ese e hahedinaraiamu moni momo itahuna karana na dia Dirava ena ura. Eden imeana ai Iehova ese Adam bona Heva edia ura ḡaudia iboudiai e heni. (Gen. 2:15, 16) Gabeai, Dirava ena lauma helaḡa ese horoa taudia ginigunadia e rohedia neganai, “ta ena kohu sibona ena se gwauraiava, a edia ḡau iboudiai e abi bouva.” (Kara 4:32) Peroveta tauna Isaia ese taunimanima iboudiai na tanobada ena ḡau namodia bae moalelai negana e herevalaia. (Isa. 25:6-9; 65:21, 22) To una nega ta nariamu lalonai, namona na mai ‘lalopararada’ ida ina tanobada ena “kohu” baita ḡaukaralai namonamo Dirava baita hamoalea totona.

7. Luka 16:10-13 ena sisiba be dahaka?

⁷ Luka 16:10-13 ba duahi. Iesu ese e herevalaia kohu ireḡuna tauna na sibona ena namo dainai haida e hetura henidia. To, Iesu ese ena hahediba e haḡanidia ia bona Iehova bae hetura henidia na namo. Murina siridia ese e hahedinaraimu tanobada ena “kohu” iḡaukaralaidia karana na Dirava iabidadama henina karana. Iesu ena hereva anina na ina tanobada ena kohu baita ḡaukaralai namonamomu neganai, ita na Dirava iabidadama henina karana baita hahedinaraiamu. Edena dalai?

8, 9. Haida ese edia kohu be ede e ḡaukaralai tomamu?

⁸ Eda abidadama baita hahedinaraia dalana ta na, eda kontribiusen amo Iesu ese e perovetalaia haroro ḡaukarana baita durua. (Mat. 24:14) India ai, kekeni ta na maua maraḡina ta ai moni e habouva, bona ena gadara ḡaudia haida danu e hoihoilai. Una  maua e honu neganai, ena moni na e heni haroro ḡaukara iduruna totona. India ai, tadikaka ta na mai ena niu umana bona ia ese niu haida na Malayalam trensleisen ofesi e laohai. Ia na e gwa, idia na e ura niu bae hoi dainai niu e henidia unu amo idia e durudia, una ese ia baine heni monina na e hereaia. Una na aonega karana. Greece ai danu, tadikaka taihu na nega momo olive dehoro, sisi, bona aniani ma haida na Betele famili e henidiamu.

⁹ Sri Lanka tadikakana ta na hari tano ma ta ai e nohomu dainai, Sri Lanka ai ena ruma bona tano na e heni tadikaka ese kongrigeisen heboudia bona hebouhebou ma haida bae kara totona, bona ful-taim hesiai ḡaukara e karamu taudia ese bae noholaia. Una tadikaka na ena kohu e heni karana amo e dabuva tadikakadia e durudia. Haroro ḡaukara e taravatua tanodia ai, tadikaka ese edia ruma na Kingdom Hall ai e halaomu, unu amo painia taudia momo bona pablisa ma haida na unuseni ai bae hebou diba bona moni basie nege.

10. Ma haida baita durudiamu neganai, dahaka hahenamo baita abimu?

¹⁰ Tame herevalai haheitalaidia ese e hahedinaraimu, Dirava ena taunimanima na ‘ḡau maraḡidia e kara maoromu,’ anina na, edia kohu e ḡaukaralaimu Dirava ena hesiai ḡaukara iduruna totona. (Luka 16:10) Iehova turana na unu e kara tomamu dainai edia hemami be ede bamona? Idia na e lalopararamu hariharibada karana bae hahedinaraia dalana amo kohu “namodia” bae abi diba. (Luka 16:11) Basileia ḡaukaradia ai e heduru hanaihanaimu taihuna ta ese e abi hahenamodia na ini e herevalai toma: “Ma haida idurudia totona egu kohu na ḡaukaralaimu dainai, laḡani momo lalodiai egu kara na e idau. Harihari bada karana ese lau na e durugu ma haida baina kara namo henidia. Heḡereḡere, edia dika na gwautaomu, na haheaukamu, egu lalohisihisi na hahanaidiamu bona sisiba na abi daemu.” Momo na e dibamu hariharibada karana bae hahedinaraia neganai lauma dalanai hahenamo momo bae abi diba.​—Sal. 112:5; Her. 22:9.

11. (a) Edena dala ai eda hariharibada karana amo aonega karana ta hahedinaraiamu? (b) Dirava ena taunimanima ese kontribiusen monina be ede e ḡaukaralaia tomamu? (Rau 7 ai laulau ba itaia.)

¹¹ Eda kohu amo Basileia ḡaukaradia ta durumu neganai, ita na “laloparara” o aonega karana ta hahedinaraiamu. Una ese be durudamu eda noho dalana heḡereḡerenai ma haida baita durudia. Ena be mai edia moni bona kohu taudia haida na ful-taim hesiai ḡaukara asie karaiamu eiava pablisa dia momo gabudia asie laomu, to e moalemu badina e dibamu edia kontribiusen amo haroro ḡaukarana e duruamu. (Her. 19:17) Kontribiusen monina amo ogoḡami tanodia ai eda pablikeisen e siaimu bona haroro ḡaukara e duruamu, badina unu tano ai momo na e uramu hereva momokani bae diba. Laḡani momo lalodiai, tano haida heḡereḡere Congo, Madagascar, bona Rwanda ai, tadikaka taihu na nega momo abi hidi e karamu, edia ruma bese daidiai aniani bae hoi eiava  Baibul bae hoi, badina unuseniai Baibul ta davana na wiki ta eiava hua ta bae ḡaukara davana heḡereḡerena. Momo edia kontribiusen monina amo Iehova ena orea ese Baibul ihahanaina bona ihariharilaina ḡaukarana e duruamu, unu amo ruma bese taudia ta ta bona Baibul stadi taudia ese Baibul ta bae abia diba. (2 Korinto 8:13-15 ba duahi.) Una dainai, kontribiusen e henimu taudia bona heduru e abimu taudia na Iehova turana ai baela diba.

12. Edena dalai Abraham ese e hahedinaraia ia na Dirava e abidadama henia?

¹² Iehova baita hetura henia dalana ma ta na, bisnes karadia lalodiai basita vareai momo, to eda noho dalana heḡereḡerena ai kohu “maorodia” baita tahu. Idaunegai abidadama tauna Abraham na Dirava e kamonai henia dainai taḡa hanuana Uru e rakatania bona kalaḡa ai e nohova, bona Iehova ihetura henina karana na e laloa bada. (Heb. 11:8-10) Ia na hanaihanai Dirava e abidadama heniava, bona kohu momo se tahuva badina una ese ena abidadama baine hadikaia garina. (Gen. 14:22, 23) Iesu ese ma haida e hagoadadia una abidadama karana bae hahedinaraia, ia ese taḡa tauna ta e hamaoroa: “Boma ura boma ḡoevadae, emu kohu boma ha hoi, ogoḡami taudia boma harihari henidia, guba kohuna boma abia; bena murigu ai boma raka.” (Mat. 19:21) Una tau ese abidadama karana na se hahedinaraia, dia Abraham heḡereḡerena, to ma haida hari Dirava e abidadama henia.

13. (a) Paulo ese Timoteo be dahaka sisiba e henia? (b) Hari ina negai Paulo ena sisiba be edena dalai baita badinaia?

¹³ Timoteo na abidadama tauna ta. Paulo ese Timoteo na e gwauraia “Keriso Iesu ena tuari tauna namona na heto,” bena e hamaoroa: “Tuari tauna ese ina mauri ḡaudia [“bisnes karadia idauidau,” NWT] basine hatuarilai; unu amo tuari oreana lalonai e abia vareai tauna baine hamoalea.” (2 Tim. 2:3, 4) Hari ina negai, Iesu murinai e rakamu taudia bona ful-taim hesiai ḡaukara e karamu taudia milion ta mai kahana na edia noho dalana heḡereḡerena Paulo ena sisiba e badinaiamu. Idia ese tanobada ena lalo veri ḡaudia e dadaraimu, bona ina hahekau herevana e laloataomu: “Abi-torehai tauna ese e henia torehai tauna isiaina e lao heniamu.” (Her. 22:7) Satana na e uramu eda nega bona goada na iena tanobada ena bisnes karadia lalodiai baita haore. Ta karamu abi hididia haida daidiai eda abitorehai monidia na laḡani momo lalodiai baita haloumu. Reana unu moni ta abimu badina ta uramu ruma badana ta baita hoia, o sikuli davadia baita heni, o dava bada motukana ta baita hoia, eiava wedin namona ta baita karaia. To bema kohu momo basita tahumu, bona basita abitorehai momomu eiava moni bada basita negemu, ita na laloparara o aonega karana ta hahedinaraiamu, unu amo Dirava baita hesiai henia dibamu to dia ina tanobada ena bisnes oreadia.​—1 Tim. 6:10.

14. Laloda baita hadai dahaka baita kara na namo? Haheitalai ta ba gwauraia.

¹⁴ Eda mauri ai ḡau momo basita tahu totona, mai anina bada ḡaudia baita ato guna. Tadikaka ta bona adavana na mai edia bisnes ta. To, idia na e ura ful-taim hesiai ḡaukara bae karaia dainai edia bisnes, dingi, bona kohu ma haida e hoihoilaidia. Bena Warwick, New York ai, hedkota ihaginina ḡaukarana e durua. E abia hahenamona ta na, idia na natudia kekenina bona adavana ida Betele ai e ḡaukara, bona wiki haida lalodiai una tadikaka tamana bona sinana danu Warwick ai hedkota ihaginina ḡaukarana e durua. Colorado, U.S.A. ai, painia taihuna ta na banka ta ai pat-taim moni ḡaukara e karaiava. Banka taudia ese iena ḡaukara na e moalelaia dainai e noia  baine ful-taim bona ena pei na nega toi bae habadaia. To, e diba una ḡaukara ese ena hesiai ḡaukara na baine hadikaia diba dainai, una noinoi na se abia dae. Unu na Iehova ena hesiai taudia ese e kara karadia haida. Mai eda ura ida Basileia baita atoa gunamu neganai, baita hahedinaraiamu eda hetura karana Dirava ida bona Ia ihesiai henina ḡaukarana na ta lalo badamu, to dia ina tanobada ena bisnes karadia.

15. Dahaka ese baine hamoaleda diba?

¹⁵ Basitato taḡa na Dirava ese e henimu hahenamona ta. Iehova ese “kara namodia” e karamu taudia na e hanamodiamu. (1 Timoteo 6:17-19 ba duahi.) Heḡereḡere, Lucia * na e diba Albania ai haroro taudia na dia momo neganai, laḡani 1993 ai ia na Italy e rakatania bona una gabu ela, ena be moni ḡaukara se karava to Iehova e abidadama henia momokani. Ia ese Albania gado e dibaia bona taunimanima 60 mai kahana e durudia ela bona e bapatiso. Ena be ita momo na teritori unu bamodia ai asita haroromu, to ma haida ta durudiamu mauri dalana e badinaiamu neganai, ita bona idia na ta moalemu.​—Mat. 6:20.

16. (a) Ina tanobada ena bisnes oreadia ediai be dahaka be varamu? (b) Vaira neganai be varamu ḡaudia ta dibamu dainai eda kohu be ede baita ḡaukaralaidia toma?

¹⁶ Iesu ese e hahedinaraia hari ina negai e varamu bisnes karadia na be oremu. (Luka 16:9) Ina dina gabedia ai, banka haida ese moni na se ḡaukaralai namonamomu bona moni ena hekwakwanai na e badamu, to vaira neganai una hekwakwanai na be bada hereamu. Satana ena tanobada idoinai​—politikol, tomadiho, bona bisnes oreadia​—na be oremu. Peroveta taudia Esekiel bona Sefania na e gwa, gold bona silver, bisnes oreadia ese e lalo badamu ḡaudia, na ḡau asi anidia ai be laomu. (Ese. 7:19; Sef. 1:18) Eda hemami be ede bamona bema baita burukamu neganai baita lalopararamu ita na dia kohu maorodia ta tahuva, to ina tanobada ena “kohu dikadia” itahudia ai eda nega bada ta haoreamu? Una na heḡereḡere tau ta na ena mauri lalonai e ḡaukara goada moni momo e habou, to gabeai e diba e habou monidia na moni koikoidia. (Her. 18:11) Oibe, unu kohu na be ore vaitanimu, una dainai namona na eda kohu bona moni baita ḡaukaralai Iehova bona Iesu baita “hetura” henidia totona. Iehova ena Basileia baita duruamu neganai lauma dalanai baita goadamu.

17, 18. Dirava e hetura heniamu taudia ese dahaka hahenamo be moalelaimu?

¹⁷ Dirava ena Basileia be maimu neganai, ruma na basita rentimu eiava loun basita karamu, aniani na be momo hereamu bona asi davadia, bona dokta o muramura na basita tahumu. Iehova e hetura heniamu taudia ese tanobada ai ḡau namodia momo be moalelaimu. Gold, silver bona dava bada ḡaudia ma haida na herahera ḡaudia ai be halaomu, to dia hoihoi ḡaudia ai be halaomu. Au, nadi bona auri namo hereadia be ḡaukaralaimu ruma namodia be haginimu. Turada na mai moaledia ida be durudamu, to dia moni dainai be hedurumu. Tano ese be havaramu aniani namodia iboudiai baita moalelaimu.

¹⁸ Unu na Iehova bona Iesu e hetura heniamu taudia ese bae moalelai hahenamodia haida. Tanobada ai Iehova e tomadiho heniamu taudia ese Iesu ena hereva bae kamonai neganai mai moaledia ida bae lolo. Iesu na eto: “Aoma, Tamagu ese e hanamomuimu taumui e, basileia avabia, tanobada e karaia negana ai vada e seua umui emui.”​—Mat. 25:34.