1, 2. Chifukwa wuli ŵakavu ŵalutilirenge kuŵapo mu charu ichi?

MAZUŴA ghano, chuma chikwenda makora yayi mu charu. Ntchakusuzga chomene kuti ŵachinyamata ŵasange ntchito. Ŵanandi ŵakuŵika umoyo wawo pangozi kuti ŵakasange ntchito ku vyaru visambazi. Kweni ukavu uli palipose, nanga ni mu vyaru visambazi. Pali mphambano yikuru chomene pakati pa ŵasambazi na ŵakavu. Ŵakufufuza ŵakasanga kuti ndalama izo ŵanthu ŵasambazi ŵachoko waka ŵaŵenge nazo sonosono apa, ziyanenge waka na ndalama za waliyose pa charu chose chapasi para tasazga. Nangauli ntchakusuzga kumanya usange uwu mbunenesko nadi, kweni palije uyo wangakana kuti ŵanthu ŵanandi mbakavu chomene, apo ŵanyake ŵali na chuma chakuti chimarenge yayi umoyo wawo wose. Yesu wakamanyanga fundo iyi, ndipo wakati: “Ŵakavu muŵenge nawo nyengo zose.” (Mrk. 14:7) Chifukwa wuli vili nthena?

² Yesu wakamanyanga kuti vinthu visinthengepo yayi m’paka Ufumu wa Chiuta wize. Magulu gha vyamalonda, agho ghakuyowoyeka pa Chivumbuzi 18:3 kuti “wamalonda,” pamoza na ŵandyali na visopa vyautesi, ndivyo vikupanga charu cha Satana. Ŵateŵeti ŵa Chiuta ŵakuchitako yayi ndyali ndipo ŵali kufumamo mu chisopa chautesi. Nangauli  vili nthena, kweni ŵanandi ŵangalekerathu yayi kuchitako malonda agho ghakuchitika mu charu cha Satana ichi.

3. Kasi tidumbiskanenge mafumbo wuli?

³ Pakuŵa ŵateŵeti ŵa Chiuta, tingachita makora kujisanda umo tikuwonera malonda mu charu ichi. Tingajifumba kuti: ‘Kasi ningachita wuli na ivyo nili navyo kuti nigomezgeke kwa Chiuta? Ningachita wuli kuti nileke kutangwanika chomene na malonda? Ni vichi vikulongora kuti ŵateŵeti ŵa Chiuta ŵakugomezga chomene Yehova mu charu cha masuzgo ichi?

4, 5. (a) Mu chiyelezgero cha Yesu, kasi muteŵeti mulara wakasangana na masuzgo wuli? (b) Ni ulongozgi wuli uwo Yesu wakapeleka ku ŵalondezgi ŵake?

⁴ Ŵerengani Luka 16:1-9. Tikwenera kughanaghanirapo chomene pa chiyelezgero cha muteŵeti mulara wambura urunji icho Yesu wakayowoya. Bwana wake wati wamuphalira kuti wakusakaza waka chuma, muteŵeti mulara yura “wakachita mwavinjeru.” Pambere wandaleke uteŵeti wake, wakawovwira ŵanthu ŵanyake kuti nawo ŵazakamovwire para uteŵeti wake wamara. * Apa, Yesu wakaphaliranga ŵasambiri ŵake kuti ŵachitenge vinthu vyambura urunji yayi kuti vinthu viŵayenderengeko makora mu charu ichi. Iyo wakati ndivyo “ŵana ŵa mu nyengo iyi” ŵakuchita. Wakayowoya chiyelezgero ichi kuti waŵasambizge fundo yinyake yakuzirwa.

⁵ Yesu wakamanya kuti masuzgo agho wakakumana nagho muteŵeti uyu ndigho ŵalondezgi ŵake ŵanandi ŵazamukumana nagho mu charu ichi. Wakamanya kuti chizamuŵa chakusuzga kuti vinthu viŵayendere makora mu charu cha malonda ichi. Ntheura wakaŵaphalira kuti: “Sangani ŵabwezi kwizira mu usambazi wambura urunji, mwakuti para uwu wamara, ŵazakamupokelerani mu malo ghakukhalamo ghamuyirayira.” Kasi ulongozgi wa Yesu ungatisambizga vichi?

6. Tikumanya wuli kuti likaŵa khumbo la Chiuta yayi kuti ŵanthu ŵachitenge malonda?

⁶ Nangauli Yesu wandalongosore chifukwa icho wakayowoyera usambazi kuti ‘ngwambura urunji,’ kweni Baibolo likulongora kuti Chiuta wakakhumbanga kuti tichitenge malonda yayi. Mu munda wa Edeni, Yehova wakapeleka vinthu vyose vyakukhumbikwa pa umoyo kwa Adamu na Eva. (Gen. 2:15, 16) Pamanyuma, mzimu utuŵa ukati wamba kovwira Ŵakhristu ŵakuphakazgika ŵakwambilira, “pakaŵavya nanga njumoza uyo wakayowoya kuti vinthu ivyo wakaŵa navyo vikaŵa vyake pera. Kweni vyose ivyo ŵakaŵa navyo vikaŵa vya wose.” (Mil. 4:32) Ntchimi Yesaya yikayowoya kuti nyengo yikwiza iyo ŵanthu wose ŵazamukondwa na vinthu ivyo vili mu charu. (Yes. 25:6-9; 65:21, 22) Kweni pasono, ŵalondezgi ŵa Yesu ŵakwenera kuchita “mwavinjeru” kuti ŵasange vyakukhumbikwa pa umoyo na “usambazi wambura urunji.” Apo ŵakuchita nthena, ŵakwenera kuluwa yayi kukondweska Chiuta.

7. Kasi pa Luka 16:10-13 pali ulongozgi wuli?

⁷ Ŵerengani Luka 16:10-13. Muteŵeti uyo Yesu wakayowoya mu chiyelezgero chake wakapanga mabwezi kuti wasangirepo phindu. Kweni Yesu wakaphaliranga ŵalondezgi ŵake kuti ŵasange ŵabwezi kuchanya kuti ŵasangirepo phindu yayi. Mavesi gha panthazi pake ghakuyowoya za kukolerana pakati pa kugwiliskira ntchito “usambazi wambura urunji” na kugomezgeka kwa Chiuta. Fundo yikuru ya Yesu yikaŵa yakuti tingalongora kuti ndise ‘ŵakugomezgeka’ kwa Chiuta para tikuchita mwamahara na chuma chithu panji para tikuleka kupenjisiska chuma. Tingachita wuli nthena?

8, 9. Kasi ŵanyake ŵakuchita wuli na usambazi wawo?

 ⁸ Nthowa yimoza iyo tingalongolera kuti tili ŵakugomezgeka na vinthu ivyo tili navyo, ni para tikovwirapo pa ntchito yakupharazga iyo yikuchitika pa charu chose, iyo Yesu wakayowoya. (Mat. 24:14) Kasungwana kanyake ku India kakasunga kabokosi ako kakaponyangamo ndalama zamanjawara. Kweniso kakaleka kugura vidoli kuti kasunge ndalama. Kabokosi kakati kazura, kakatora ndalama izi na kuzipeleka ku ntchito yakupharazga. Mubali munyake ku India wali na munda wa vipambi vya kokonati. Iyo wakupeleka kokonati munandi ku ofesi yakung’anamulirako mabuku ku Malayalam. Wakuwona kuti ntchiwemi kupeleka kokonati m’malo mwa kupeleka ndalama chifukwa para wangaŵapa ndalama, ŵangakagura kokonati mwakudura. Ivi ni vinjeru. Kweniso, ŵabali ŵanyake ku Greece ŵakupeleka mafuta ghakuphikira, chizi (mkaka wakukhoma), na vyakurya vinyake ku Beteli.

⁹ Mubali munyake ku Sri Lanka uyo pasono wakukhala ku charu chinyake, wali kupeleka nyumba zake kuti ŵabali ŵachitirengemo maungano gha mpingo, gha dera, kweniso kuti mukhalenge ŵabali awo ŵakuchita uteŵeti wanyengozose. Mubali uyu mphanyi wakusanga ndalama zinandi na nyumba izi, kweni wali kupeleka kuti zovwirenge ŵabali na ŵadumbu awo mbakavu. Mu vyaru ivyo ntchito yithu njakukanizgika, ŵabali ŵakupeleka nyumba zawo kuti ŵachitirengemo maungano gha mpingo. Ivi vikovwira ŵapayiniya ŵanandi na ŵapharazgi awo mbakavu kuti ŵaŵe na malo ghakuwunganapo kwambura kulipira.

10. Kasi tikusanga vitumbiko wuli para tikupeleka?

¹⁰ Viyelezgero ivyo tawona vikulongora kuti ŵateŵeti ŵa Chiuta ‘mbakugomezgeka mu vichoko.’ Ŵakulongora kuti mbakugomezgeka na umo ŵakuchitira na usambazi wawo wakuthupi, uwo ngwakuzirwa chomene yayi pakuyaniska na usambazi wauzimu. (Luka 16:10) Kasi ŵabwezi ŵa Yehova aŵa ŵakujipulika wuli chifukwa cha kuchita nthena? Ŵakumanya makora kuti para ŵakupeleka, ŵakusanga “usambazi weneko.” (Luka 16:11) Mudumbu munyake uyo nyengo zose wakovwirapo pa ntchito ya Ufumu wakalongosora umo watumbikikira. Wakati: “Chifukwa cha kuŵa na mtima wakupeleka, nawona nekha umo Chiuta wanitumbikira vyaka vyose ivi. Nasanga kuti para nkhupeleka vinthu ku ŵanthu, mtima wakuti nichitirenge ŵanyane viwemi ukukura. Nkhutemwa chomene kugowokera ŵanyane para ŵanibudira, ndipo nkhuzikira pakuchita vinthu na ŵanyane. Kweniso ndine wakunozgeka kupokera ulongozgi.” Ŵanandi ŵawona kuti ŵakutumbikika chomene mwauzimu para ŵakupeleka.—Sal. 112:5; Zinth. 22:9.

11. (a) Kasi para tikupeleka mwawanangwa, tikulongora wuli kuti tikuchita vinthu “mwavinjeru”? (b) Kasi pakati pa ŵanthu ŵa Chiuta pali kuyana wuli? (Wonani chithuzithuzi chakwamba.)

¹¹ Paliso chifukwa chinyake icho tingayowoyera kuti para tikupeleka ivyo tili navyo kuti ntchito ya Ufumu yilute panthazi, ndikuti tikuchita vinthu “mwavinjeru.” Chuma icho tili nacho tikovwira nacho ŵanyithu. Awo ŵali na chuma kweni ŵangafiska yayi uteŵeti wanyengozose panji kukateŵetera ku charu chinyake, ŵakukondwa chomene kumanya kuti ivyo ŵakupeleka vikovwira ŵanyawo kuti ŵachite uteŵeti. (Zinth. 19:17) Vyawanangwa ivyo tikupeleka vikovwira kuti vyaru vikavu visange mabuku. Kweniso vikovwira kuti ntchito yakupharazga yende makora mu vyaru ivi umo ŵanthu ŵanandi ŵakukhumba  kusambira unenesko. Mu vyaru nga Congo, Madagascar, na Rwanda, Mabaibolo ngakudura chomene. Kwa vyaka vinandi, kuti mubali wasange Baibolo wakeneranga kugwira ganyu sabata panji mwezi. Kanandi ŵabali ŵakachitanga kusankha icho ŵakwenera kugura, Baibolo panji chakurya. Ntheura chifukwa cha vyakupeleka vya ŵabali kweniso kuti “kuyana kuŵepo,” gulu la Yehova lang’anamura Mabaibolo ghanandi kuti waliyose mu banja waŵe nalo kwawanangwa, kweniso awo ŵakusambira nawo Baibolo. (Ŵerengani 2 Ŵakorinte 8:13-15.) Lekani awo ŵakupeleka na awo ŵakupokera, wose ŵakuŵa paubwezi na Yehova.

12. Kasi Abrahamu wakalongora wuli kuti wakagomezganga Chiuta?

¹² Nthowa yinyake iyo tingaŵira paubwezi na Yehova, ni para tikuleka kutangwanika chomene na malonda gha mu charu ichi. Kweni tigwiliskirenge ntchito ivyo tili navyo kuti tipenje usambazi “weneko.” Abrahamu, munthu wachipulikano wa mu nyengo yakale wakaleka charu chisambazi cha Uri, na kukakhala mu mahema kuti waŵe paubwezi na Yehova. (Heb. 11:8-10) Nyengo zose wakagomezganga Chiuta uyo ni mwenecho wa usambazi. Wakapenjanga usambazi yayi uwo ungamutondeska kugomezgeka kwa Chiuta. (Gen. 14:22, 23) Yesu wakachiska ŵanthu kuti ŵaŵe na chipulikano nga cha Abrahamu. Wakaphalira munyamata munyake musambazi kuti: “Usange ukukhumba kuŵa wakufikapo, luta ukaguliske ivyo uli navyo na kupeleka ku ŵakavu ndipo uŵenge na usambazi kuchanya. Wize uŵe mulondezgi wane.” (Mat. 19:21) Munyamata uyu wakaŵavya chipulikano chakukhora nga cha Abrahamu. Kweni pali ŵanyake awo ŵakugomezga chomene Chiuta.

13. (a) Kasi Paulosi wakapeleka ulongozgi wuli kwa Timote? (b) Kasi tingalondezga wuli ulongozgi wa Paulosi?

¹³ Timote wakaŵa munthu wachipulikano. Paulosi wakati wachema Timote kuti ni “msilikari muwemi wa Khristu Yesu,” wakamuphalira kuti: “Palije munthu uyo wakugwira ntchito ya usilikari wakuchitaso malonda mu umoyo uwu, mwakuti wakondweske uyo wakamulemba usilikari.” (2 Tim. 2:3, 4) Awo ŵakulondezga Yesu mazuŵa ghano, pamoza na ŵabali na ŵadumbu ŵakujumpha 1,000,000 awo ŵakuchita uteŵeti wanyengozose, ŵakulondezga ulongozgi wa Paulosi. Iwo ŵakukana kukopeka na ivyo ŵamalonda ŵakusaska mu charu ichi. Ŵakumanya fundo yakuti: “Uyo wakongora ni muzga wa uyo wamukongozga.” (Zinth. 22:7) Satana wakukhumba kuti tiŵe ŵazga ŵa malonda mu charu chake na kumalira nyengo na nkhongono zithu pa vinthu vyawakawaka. Vinthu vinyake ivyo tingasankha vingatipangiska kuti tiŵe na ngongoli vyaka vinandi. Ŵanyake ŵakutora ngongoli yikuru kuti ŵazengere nyumba, ŵalipire sukulu, ŵagulire galimoto yakudura, kweniso ŵachitire maukwati ghapachanya. Ngongoli izi zikuŵatangwaniska chomene kuti ŵawezge. Tikulongora vinjeru para tikuleka kukhumba vinandi pa umoyo withu, para tikuchepeskako ngongoli na vinthu vinyake ivyo tikugura. Kweniso para tikuteŵetera Chiuta mwakukwana m’malo mwa kutangwanika waka na malonda mu charu ichi.—1 Tim. 6:10.

14. Kasi tikwenera kuŵikapo mtima kuchita vichi? Yowoyani chiyelezgero.

¹⁴ Kuti tiŵe na umoyo wambura kukhumba vinandi tikwenera kuŵika pakwamba Ufumu wa Chiuta. Banja linyake likaŵa na bizinesi iyo yikendanga makora ndipo ŵakasanganga phindu likuru. Kweni chifukwa cha kukhumba kwambiraso uteŵeti wanyengozose, ŵakaguliska bizinesi yawo, boti, na vinthu vinyake ivyo ŵakaŵa navyo. Pamanyuma ŵakajipeleka kuti ŵakawovwirepo pa kuzenga likuru la Ŵakaboni ŵa Yehova ku Warwick, New York. Ŵakakondwa chomene kuteŵetera pa Beteli pamoza na mwana wawo na mukweni kwa masabata ghachoko waka. Kweniso ŵakateŵetera lumoza na adada ŵa mukweni wawo ku Warwick. Mudumbu munyake uyo ni mupayiniya ku Colorado, U.S.A., wakasanga ntchito ku banki, iyo wakagwiranga mazuŵa ghachoko waka. Mabwana ku  ntchito kwake ŵakakondwa nayo chomene ndipo ŵakati wambe kugwira mazuŵa ghose. Kweniso ŵakati ŵamukwezgerengeko malipiro katatu. Kweni wakamanya kuti ichi ntchiyezgo. Wakakana ntchito iyi, chifukwa wakamanya kuti yimutangwaniskenge kuchita makora uteŵeti. Tayowoyapo viyelezgero vichoko waka vyakulongora umo ŵateŵeti ŵa Yehova ŵakujipelekera. Para tikuŵika vya Ufumu pakwamba, tikulongora kuti tikuwona kuti kuŵa paubwezi na Chiuta ndicho ntchakuzirwa chomene. Kweniso ndikuti tikumanya kuti kuŵa musambazi mwauzimu ndicho ntchakuzirwa chomene kuluska usambazi wa mu charu ichi.

15. Kasi mbusambazi wuli uwo ungatovwira kuŵa ŵakukondwa?

¹⁵ Para tili ŵasambazi, mbukaboni wakuti Chiuta watitumbika yayi. Yehova wakutumbika awo ‘mbasambazi mu milimo yiwemi.’ (Ŵerengani 1 Timote 6:17-19.) Mwachiyelezgero, Lucia * wakati wamanya kuti ku Albania kukukhumbikwira ŵapharazgi ŵanandi, wakasama ku Italy mu 1993 uku walije ndalama. Kweni wakagomezganga kuti Yehova wamumupwelelera ku Albania. Wakati wafika, wakasambira chiyowoyero cha Albania ndipo wakasambizga unenesko ŵanthu ŵakujumpha 60 m’paka ŵakabatizika. Ŵateŵeti ŵanandi ŵa Chiuta ŵakupharazga mu malo ghanthena agha yayi, uko ŵanthu ŵanandi ŵakutemwa unenesko. Kweni chilichose icho tikuchita kuti tovwire ŵanyithu kuti ŵamanye unenesko na kulutilira kwenda pa nthowa yakuya ku umoyo wamuyirayira, ntchakuzirwa chomene. Iwo na ise wuwo tiŵenge ŵakukondwa.—Mat. 6:20.

16. (a) Ntchivichi chichitikirenge charu cha malonda ichi? (b) Kasi tikwenera kuchiwona wuli chuma pakumanya ivyo vichitikenge munthazi?

¹⁶ Apo Yesu wakati, “Para [usambazi wambura urunji] uwu wamara,” wakang’anamuranga kuti usambazi uwu uzamumara nadi. (Luka 16:9) Mazuŵa ghano, mabanki ghanjira pasi kweniso chuma chawa mu charu ichi. Kweni vikulongora kuti sonosono apa vinthu vinangikirengethu mu charu. Vinthu vyose vya mu charu cha Satana ichi, nga ni ndyali, visopa, na malonda vimalenge. Ntchimi Ezekiyeli na Zefaniya ŵakayowoyerathu kuti golide, siliva na malonda agho ghakuchitika mu charu ichi vizamuŵavya ntchito. (Ezek. 7:19; Zef. 1:18) Kasi tingazakajipulika wuli para tachekura na kuwona kuti tikapenjisiska chomene “usambazi wambura urunji” wa mu charu ichi, m’malo mwa usambazi weneko? Tingazakajipulika nga ni munthu uyo wakalimbikira kugwira ntchito umoyo wake wose kuti wasange vindalama vinandi, kweni paumaliro wakasanga kuti ni zude (ndalama zautesi). (Zinth. 18:11) Uwu mbunenesko, usambazi wa mu charu ichi umalenge sonosono apa. Ntheura usambazi tikwenera kupangira “ŵabwezi” kuchanya. Chilichose icho tikuchita kuti vinthu vyakukhwaskana na Ufumu wa Yehova vilute panthazi, chikutovwira kuŵa ŵasambazi mwauzimu.

17, 18. Kasi ŵabwezi ŵa Chiuta ŵakulindilira vichi?

¹⁷ Para Ufumu wa Chiuta wiza, palije uyo wazamulipiranga renti panji kutora ngongoli. Chakurya chizamuŵa chaulere, ndipo chizamuŵa chinandi chomene. Vipatala kuzamuŵavya. Banja la Yehova la pa charu chapasi lizamukondwanga na chilichose icho chizamuŵa mu charu. Golide, siliva, na malibwe ghanyake ghakudura vizamuŵa vyakuguliska yayi kweni vyakutoweskera waka. Mathabwa ghawemi chomene, malibwe, kweniso visulo vizamuŵa vyaulere kuti tizengere nyumba zakutowa. Ŵabwezi ŵithu ŵazamuŵa ŵakukondwa kutovwira kwambura kukhumba malipiro. Vinthu ivyo vizamuŵa mu charu tizamugaŵananga mwakuyana.

¹⁸ Ŵanthu awo ŵakupanga mabwezi ghawo kuchanya ndiwo ŵazamukondwa na vitumbiko ivi. Awo ŵakusopa Yehova pa charu chapasi ŵazamukondwa chomene apo Yesu wazamuyowoya kuti: “Zaninge, imwe mwatumbikika na Adada, muhare Ufumu uwo ukanozgekera imwe kufuma apo charu chikambira.”—Mat. 25:34.