1, 2. ¿Baʼaxten jach yaan óotsilil teʼ yóokʼol kaabaʼ?

BEJLAʼEʼ maas yaʼab máak óotsil yaan. Le táankelem paalaloʼoboʼ minaʼan meyajtiʼob. Yaʼab máakeʼ, kex sajbeʼentsileʼ, ku bin táanxel luʼumil utiaʼal u maas náajal. Tak teʼ luʼumiloʼob tuʼux yaan ayikʼaliloʼ yaʼab óotsiloʼob yaniʼ. Le máaxoʼob ayikʼaloʼoboʼ táan u maas ayikʼaltaloʼob, le máaxoʼob óotsiloʼoboʼ táan u maas óotsiltaloʼob. Ku tuklaʼaleʼ tiʼ cada cien máakeʼ chéen juntúul maas ayikʼaliʼ, u taakʼineʼ maas yaʼab tiʼ le noventinueve u túulaloʼ. Kex maʼ ojéelaʼan wa jach beyoʼ, baʼax ojéelaʼaneʼ u millonesil máakoʼobeʼ jach táaj óotsiloʼob. Yaan máakeʼ yaan taakʼin tak utiaʼal u pʼat tiʼ u paalal u yáabiloʼob. Le oʼolal Jesuseʼ tu yaʼalaj: «Le óotsiloʼoboʼ mantatsʼ tiʼ yaan ta wiknaleʼexeʼ» (Mar. 14:7). ¿Baʼaxten bey yanil le yóokʼol kaabaʼ?

² Jesuseʼ u yojel yaan u pʼáatal minaʼan u biilal u taakʼin le yóokʼol kaab ken taalak u Reino Diosoʼ. Apocalipsis 18:3, ku tʼaan tiʼ «u j-koonoliloʼob yóokʼol kaab», leloʼobaʼ letiʼe máaxoʼob controlartik u taakʼin tuláakal le yóokʼol kaabaʼ. U ayikʼalil le yóokʼol kaab, le política yéetel le maʼ jaajil religionoʼoboʼ táakaʼanoʼob ichil u yóokʼol kaab Satanás. Le máaxoʼob meyajtik Diosoʼ jach junpuliʼ maʼatech u yoksikubaʼob tiʼ política mix tiʼ le maʼ jaajil religionoʼ. Baʼaleʼ tiʼ tuláakal ku meyaj le taakʼin yaan tu kʼasaʼan yóokʼol kaab Satanasoʼ.

3. ¿Baʼax kʼáatchiʼiloʼob ken k-núuke?

³ Le máaxoʼob meyajtik Diosoʼ jach unaj u tuukuloʼob tiʼ bix u  yilkoʼob le ayikʼaliloʼob yaan teʼ yóokʼol kaabaʼ. Maʼalob ka k-tukle: «¿Bix jeʼel u meyajten le baʼaxoʼob yaanten utiaʼal in weʼesik chúukaʼan in wóol in meyajt Diosoʼ? ¿Baʼax unaj in beetik utiaʼal in kanáantik maʼ in bin chéen tu paach ayikʼaliloʼob? ¿Bix jeʼel u yáantkoʼon le baʼaxoʼob ku beetik le máaxoʼob jach ku kʼubik u yóoloʼob tiʼ Diosoʼ?».

4, 5. 1) ¿Baʼax úuch tiʼ le máak kanáantik u ayikʼalil u tsʼuulil tu tsikbaltaj Jesusoʼ? 2) ¿Baʼax tsolnuʼukil tu tsʼáaj Jesús tiʼ u disipuloʼob?

⁴ (Xok Lucas 16:1-9.) U tsikbalil le máak kanáantik u ayikʼalil u tsʼuuliloʼ yaan baʼax ku kaʼansiktoʼon. Jesuseʼ tu yaʼaleʼ yaan u luʼsaʼal meyaj tiʼ le máakoʼ, tumen taʼak u pool táan u xuʼuxupik u taakʼin u tsʼuulil. * Letiʼ túuneʼ «tu yeʼesaj jach yaan u naʼat», tumen tu amigota le máaxoʼob jeʼel u yáantik ken luʼsaʼak meyajtiʼoʼ. ¿Táan wa u yaʼalik kaʼach Jesús tiʼ u disipuloʼob ka u beetoʼob baʼax maʼ maʼalob utiaʼal u kaxtik u kuxtaloʼobiʼ? Maʼatech. Le oʼolal tu yaʼaleʼ, le máaxoʼob beetik lelaʼ «u paalal le yóokʼol kaabaʼ», wa letiʼe máaxoʼob maʼatech u meyajtikoʼob Diosoʼ. Jesuseʼ chéen tu tsikbaltaj utiaʼal u kaʼansiktoʼon junpʼéel baʼax jach kʼaʼanaʼan.

⁵ Le baʼax úuch tiʼ le máakaʼ maʼ chéen chʼaʼabiliʼ. Tak Jesuseʼ u yojel u maas yaʼabil u disipuloʼobeʼ maʼ chéen chʼaʼabil ken u kaxtil u kuxtaloʼob teʼ kʼasaʼan yóokʼol kaabaʼ. Le oʼolal tu yaʼalaj: «Meyajnakteʼex le ayikʼaliloʼob yaan teʼ yóokʼol kaab utiaʼal a beetkeʼex amigoʼoboʼ». Beyoʼ ken xuʼuluk u meyajoʼobeʼ, Jéeoba yéetel Jesuseʼ yaan u kʼamkoʼonoʼob «teʼ kúuchiloʼob mix bikʼin kun xuʼulultiʼoboʼ». ¿Baʼax k-kanik tiʼ le baʼax tu yaʼalaj Jesusaʼ?

6. ¿Baʼaxten k-aʼalikeʼ maʼ u tukultmaj kaʼach Dios wa yaan u meyaj taakʼin tiʼ máak utiaʼal u koonol wa u maaniʼ?

⁶ ¿Baʼaxten Jesuseʼ tu yaʼaleʼ le taakʼinoʼ u ‹ayikʼaliloʼob yóokʼol kaab›? Le Bibliaoʼ maʼatech u yaʼalik, baʼaleʼ ku yeʼesikeʼ maʼ u tukultmaj kaʼach Dios wa yaan u meyaj taakʼin tiʼ máak utiaʼal u koonol wa u maaniʼ. ¿Baʼaxten k-aʼalik lelaʼ? Tumen tu jardinil Edeneʼ tu tsʼáaj tiʼ Adán yéetel Eva tuláakal baʼax kʼaʼabéettiʼob (Gén. 2:15, 16). Tsʼoʼoleʼ le ka tu wekaj u kiliʼich muukʼ yóokʼol le máaxoʼob tu yéeyaj teʼ yáax siglooʼ, «mix juntúul tiʼ letiʼob xan ku yaʼalik kaʼach wa chéen letiʼ tiaʼalintik le baʼaxoʼob yaantiʼoʼ, baʼaxeʼ tiʼ tuláakal kaʼach ku meyaj le baʼaxoʼob yaantiʼoboʼ» (Bax. 4:32). Tsʼoʼoleʼ profeta Isaíaseʼ ku yaʼalikeʼ yaan u kʼuchul u kʼiinil u disfrutartik tuláakal máak le baʼaxoʼob ku tsʼáaik le Luʼumaʼ (Isa. 25:6-9; 65:21, 22). Le maʼ úuchuk lelaʼ, u disipuloʼob Jesuseʼ unaj u yeʼeskoʼob «jach yaan u naʼat[oʼob]» ken meyajnaktiʼob tubeel u ‹ayikʼaliloʼob yóokʼol kaab› yéetel ken u beetoʼob baʼax maʼalob tu táan Dios.

7. ¿Baʼax ku kaʼansiktoʼon Lucas 16:10 tak 13?

⁷ (Xok Lucas 16:10-13.) Le máak kanáantik u ayikʼalil u tsʼuuliloʼ tu amigotaj le máakoʼob utiaʼal u yutsiloʼ. Baʼaleʼ Jesuseʼ tu yaʼalaj tiʼ u disipuloʼob ka u amigotoʼob le máaxoʼob yanoʼob teʼ kaʼanoʼ, chéen baʼaleʼ maʼ chéen utiaʼal u kaxtik u yutsiloʼobiʼ. Le baʼaxoʼob ku seguer u yaʼalikoʼ ku yeʼesikeʼ le bix kun meyajtoʼon u ‹ayikʼaliloʼob le yóokʼol kaabaʼ› ku yeʼesik wa chúukaʼan k-óol tiʼ Dios wa maʼ.

8, 9. ¿Bix u meyaj le «ayikʼaliloʼob yaan teʼ yóokʼol kaab» tiʼ jujuntúul sukuʼunoʼoboʼ?

⁸ Junpʼéel bix jeʼel k-eʼesik chúukaʼan k-óol k-meyajt Dioseʼ, letiʼe ka meyajnaktoʼon le baʼaxoʼob yaantoʼon utiaʼal u kʼaʼaytaʼal le maʼalob péektsil tuláakal yóokʼol kaab, jeʼex tu yaʼalil Jesusoʼ (Mat. 24:14). Koʼoneʼex ilik bix u beetik jujuntúul sukuʼunoʼob. Tu luʼumil Indiaeʼ,  juntúul chan x-chʼúupaleʼ yaan kaʼach junpʼéel chan caja tuʼux ku líiʼsik u taakʼin. Xuʼul tak u manik u báaxaloʼob. Le ka chuʼup le chan cajaoʼ, tu síiaj le taakʼin utiaʼal u kʼaʼaytaʼal le maʼalob péektsiloʼ. Juntúul sukuʼun kajaʼan teʼ luʼumil xanoʼ tu yeʼesaj jach «yaan u naʼat», letiʼeʼ u pakʼmaj yaʼab cocoʼob. Le oʼolal juntéenjeakeʼ tu síiaj yaʼab coco teʼ oficina tuʼux ku traducirtaʼal malayálamoʼ. Ku yaʼalikeʼ tumen kʼaʼabéet teʼ oficinaoʼ maas maʼalob u yilik u síiktiʼob, ke u tsʼáaik taakʼin utiaʼal ka maʼanak. Le sukuʼunoʼob xan kajaʼanoʼob Greciaoʼ suuk u síikoʼob u aceiteil oliva, queso yéetel uláakʼ baʼaxoʼob kʼaʼabéet tiʼ le betelitaʼoboʼ.

⁹ Koʼoneʼex ilik baʼax ku beetik juntúul sukuʼun líikʼ Sri Lanka, baʼaleʼ táanxel tuʼux kajaʼan. Letiʼeʼ ku tsʼáaik u yotoch yéetel u terreno utiaʼal u beetaʼal muchʼtáambaloʼob yéetel asambleaʼob, tsʼoʼoleʼ tiʼ xan kajaʼan le sukuʼunoʼob ku xupkubaʼob u meyajtoʼob Diosoʼ. Kex yaʼab ku tojoltik tiʼeʼ, ku yáantik le sukuʼunoʼob óotsiloʼoboʼ. Teʼ tuʼuxoʼob maʼ tu chaʼabal u yúuchul kʼaʼaytajoʼ, le sukuʼunoʼoboʼ ku meyaj u yotochoʼob utiaʼal u beetaʼal muchʼtáambal. Beyoʼ yaʼab precursoroʼob yéetel j-kʼaʼaytajoʼob óotsiloʼobeʼ, maʼatech u rentarkoʼob tuʼux ku muchʼkubaʼob.

10. ¿Baʼax utsiloʼob ku taasik u síik máak baʼaxoʼob yaantiʼ?

¹⁰ Le bix u meyaj tiʼ le sukuʼunoʼob le «ayikʼaliloʼob yaan teʼ yóokʼol kaab[aʼ]», ku yeʼesik chúukaʼan u yóoloʼob tak «tiʼ baʼaloʼob mejentak», beyoʼ ku yeʼeskoʼob maas nojoch baʼal le adoración ku tsʼáaikoʼob tiʼ Diosoʼ (Luc. 16:10). ¿Bix u yilik le sukuʼunoʼob le baʼaxoʼob ku beetkoʼob utiaʼal u maas biskubaʼob yéetel Jéeobaoʼ? Letiʼobeʼ u yojloʼobeʼ u síikoʼob le baʼaxoʼob yaantiʼoboʼ, junpʼéel bix u kaxtikoʼob «le maas maʼalob ayikʼaliloʼoboʼ» (Luc. 16:11). Juntúul kiik suuk u síik u taakʼin utiaʼal u kʼaʼaytaʼal le maʼalob péektsiloʼ, ku yaʼalikeʼ tsʼoʼok u kʼamik yaʼab bendición ichil le jaʼaboʼob joʼopʼok u beetkoʼ. Letiʼeʼ ku yaʼalik: «Tsʼoʼok in wilkeʼ wa maas kin síik le baʼaxoʼob yaantenoʼ, maas maʼ talam in perdonartik baʼax ku beetaʼalteniʼ, maas maʼatech in séeb kʼuuxil, kin kʼamik le tsolnuʼukoʼob ku tsʼaʼabaltenoʼ yéetel maʼatech u lúubul in wóol ken úuchuk junpʼéel baʼax maʼ jeʼex in páaʼtikoʼ». Yaʼab sukuʼunoʼobeʼ tsʼoʼok u yilkoʼobeʼ, ku kʼamkoʼob yaʼab bendición ikil u síikoʼob baʼax yaantiʼob (Sal. 112:5; Pro. 22:9).

11. 1) ¿Baʼaxten k-aʼalik u síik máak baʼaxoʼob yaantiʼeʼ junpʼéel bix u yeʼesik ‹yaan u naʼat›? 2) ¿Baʼax ku beetik u kaajal Dios utiaʼal u yantal tiʼ tuláakal le baʼaxoʼob kʼaʼabéetoʼ? (Ilawil le foto yaan tu káajbal le xookaʼ.)

¹¹ Uláakʼ bix k-eʼesik ‹jach yaan k-naʼateʼ›, letiʼe u meyajtoʼon le baʼaxoʼob yaantoʼon utiaʼal k-áantik u maasiloʼ. Yaan sukuʼunoʼobeʼ kex yaan taakʼin tiʼobeʼ, maʼ tu páajtal u maas xupkubaʼob u meyajtoʼob Dios wa u binoʼob áantaj táanxel luʼumil. Kex beyoʼ ku síik u taakʼinoʼob yéetel kiʼimak óolal utiaʼal u maas kʼaʼaytaʼal le maʼalob péektsiloʼ (Pro. 19:17). Yéetel le taakʼin k-síikoʼ ku beetaʼal yéetel ku tʼoʼoxol publicacionoʼob, tsʼoʼoleʼ k-áantaj utiaʼal u bisaʼal le maʼalob péektsil teʼ kaajoʼob jach óotsiltakoʼoboʼ. Jeʼex tu luʼumiloʼob Congo, Madagascar yéetel Ruandaeʼ, ich yaʼab añoseʼ, le sukuʼunoʼoboʼ kʼaʼabéetchaj u yéeyikoʼob u manikoʼob baʼal u jaantoʼob wa u manik u bibliaʼob, tumen jeʼel tak u tojoltik u náajalil junpʼéel semana wa junpʼéel meseʼ.  Baʼaleʼ le taakʼin ku síik le sukuʼunoʼoboʼ ku yáantaj utiaʼal u yantal xan tiʼ letiʼobiʼ. Yoʼolal lelaʼ u kaajal Jéeobaeʼ tsʼoʼok u traducirtir le Bibliaoʼ yéetel tsʼoʼok u túuxtik tiʼ tuláakal le sukuʼunoʼob yéetel uláakʼ máaxoʼob u kʼáat u kʼaj óoloʼob Diosoʼ (xok 2 Corintoiloʼob 8:13-15). Beyoʼ le máaxoʼob síik yéetel le máaxoʼob kʼamkoʼ jeʼel u páajtal u biskubaʼob yéetel Jéeobaeʼ.

12. ¿Bix úuchik u yeʼesik Abrahán jach ku kʼubik u yóol tiʼ Dios?

¹² Uláakʼ bix jeʼel k-beetikba amigoil tiʼ Jéeobaeʼ, letiʼe k-kanáantik maʼ k-bin tu paach chéen ayikʼaliloʼoboʼ, baʼaxeʼ k-ilik bix jeʼel k-maas tsʼáaik k-óol meyajteʼ. Lelaʼ bey tu beetil Abrahán úuchjeakil. Tumen u kʼáat u amigot Jéeobaeʼ, tu pʼataj u kaajil Ur utiaʼal u kajtal tiʼ najoʼob beetaʼanoʼob yéetel nookʼ (Heb. 11:8-10). Letiʼeʼ u yojel tiʼ Jéeoba u taal le jaajil ayikʼaliloʼ. Le oʼolal maʼ tu kʼamaj mix baʼal tiʼ yaanal máak utiaʼal u ayikʼalkúuntikubaiʼ, tumen wa ku beetkeʼ ku yeʼesik minaʼan u fe (Gén. 14:22, 23). Ka máan kʼiineʼ Jesuseʼ tu yaʼalaj tiʼ juntúul táankelem xiʼipal ka yanaktiʼ junpʼéel fe beyoʼ. Tu yaʼalajtiʼ: «Wa a kʼáat utsil chúukaʼantaleʼ, xeen, kon le baʼaxoʼob yaantechoʼ ka a tsʼáa tiʼ le óotsiloʼoboʼ, beyoʼ yaan u yantaltech ayikʼaliloʼob teʼ kaʼanoʼ; tsʼoʼoleʼ, koʼoten, ka taalakech tin paach» (Mat. 19:21). Le xiʼipaloʼ tu yeʼesaj minaʼan u fe jeʼex le anchaj tiʼ Abrahanoʼ, baʼaleʼ yaan uláakʼ máakoʼob tsʼoʼok u yeʼeskoʼob jach ku kʼubik u yóoloʼob tiʼ Jéeoba.

13. 1) ¿Baʼax tu yaʼalaj Pablo tiʼ Timoteo? 2) ¿Bix jeʼel k-beetik xan le baʼax tu yaʼalaj Pablooʼ?

¹³ Timoteoeʼ tu yeʼesaj yaan xan u fe. Pabloeʼ tu yaʼalajtiʼ: «Jach maʼalob soldadoech tiʼ Cristo». Tsʼoʼoleʼ ka tu yaʼalajtiʼ: «Juntúul máak táan u beetik u soldadoileʼ, utiaʼal ka páajchajak u lúubul utsil tiʼ le máax tʼan u beet u soldadoiloʼ, mix juntéen ku yoksikuba tiʼ yaanal baʼaloʼob» (2 Tim. 2:3, 4). Le máaxoʼob tsaypachtik Jesús teʼ kʼiinoʼobaʼ ku beetkoʼob xan le baʼax tu yaʼalaj Pabloaʼ. Ichiloʼobeʼ yaan maas tiʼ junpʼéel millón sukuʼunoʼob jach ku xupkubaʼob u meyajtoʼob Jéeoba. Letiʼobeʼ maʼatech u chaʼik u táabsaʼaloʼob tumen le baʼaxoʼob ku sen koʼonoloʼ mix tech u yoksikubaʼob tiʼ u ayikʼaliloʼob le yóokʼol kaabaʼ, tumen u yojloʼobeʼ wa ku chʼaʼikoʼob majnil wa baʼaxeʼ ku palitsiltaʼaloʼob tumen le máax tsʼáaiktiʼoboʼ (Pro. 22:7). Satanaseʼ jach u kʼáat ka k-xupba meyaj utiaʼal ka xiʼikoʼon tu paach le baʼaxoʼob ku tsʼáaik le yóokʼol kaabaʼ. Yaan sukuʼunoʼobeʼ ku pʼaxkoʼob yaʼab taakʼin utiaʼal u manik u yotochoʼob, junpʼéel coche, u boʼotik u xookoʼob tiʼ universidad wa utiaʼal u beetkoʼob junpʼéel nojoch tsʼoʼokol beel. Wa maʼ k-tuklik tubeel baʼax k-beetkeʼ jeʼel u máan yaʼab años táan k-boʼotik k-pʼaaxeʼ. Wa k-eʼesik ‹yaan k-naʼateʼ› yaan u kiʼimaktal k-óol chéen yéetel junpʼíit baʼal, beyoʼ maʼ ken k-sen pʼaxba yéetel maʼ ken k-xuʼuxup k-taakʼin chéen minaʼan u cuentail. Beyoʼ yaan k-maas tsʼáaik k-óol k-meyajt Dios yéetel maʼ ken bin tu paach le ayikʼaliloʼoboʼ (1 Tim. 6:10).

14. ¿Baʼax tsʼoʼok k-chʼaʼtuklik k-beetik? Tsikbalt baʼax tsʼoʼok u beetik jujuntúul sukuʼunoʼob.

¹⁴ Wa k-kʼáat kuxtal chéen yéetel junpʼíit baʼaleʼ, unaj k-tsʼáaik táanil le baʼaxoʼob maas kʼaʼanaʼantakoʼ. Juntúul sukuʼun yéetel u yataneʼ jach yaʼab taakʼin ku náajaltikoʼob kaʼachi. Baʼaleʼ letiʼobeʼ taakchaj u maas áantajoʼob ichil u kaajal Jéeoba, jeʼex u beetkoʼob kaʼacheʼ. Ka tu konaj u lanchaʼob yéetel tuláakal le baʼaxoʼob yaantiʼoboʼ. Ka binoʼob áantaj teʼ meyajoʼob ku beetaʼal tu Betelil Warwick, Nueva Yorkoʼ. Letiʼobeʼ jach utschaj tu yichoʼob, tumen béeychaj u múul meyajoʼob Betel yéetel u hijaʼob bey xan yéetel u jaʼanoʼob. Tsʼoʼoleʼ ich yaʼab semanaʼobeʼ múul meyajnajoʼob Warwick yéetel u taataʼob le sukuʼunoʼ. Tu kaajil Colorado (Estados Unidoseʼ), juntúul precursoraeʼ ook meyaj tiʼ junpʼéel banco. Yoʼolal bix u meyajeʼ, u patronoʼobeʼ tu yaʼaloʼobtiʼ ka meyajnak bul semana utiaʼal u náajaltik óoxtéen  u maas yaʼabil tiʼ le ku náajaltik kaʼachoʼ. Baʼaleʼ letiʼeʼ maʼ tu yóotiʼ, tumen u yojel jeʼel u beetik u xuʼulul u tsʼáaik u yóol teʼ kʼaʼaytajoʼ. Lelaʼ chéen kaʼapʼéel tiʼ le bukaʼaj baʼaxoʼob ku beetik yaʼab sukuʼunoʼob utiaʼal u xupkubaʼob u meyajtoʼob Jéeobaoʼ. Wa k-chʼaʼtukultmaj k-tsʼáaik le Reino táanil ichil k-kuxtaloʼ, yaan k-eʼesik maas jatsʼuts k-ilik k-bisikba yéetel Dios, ke ka xiʼikoʼon tu paach le ayikʼaliloʼob ku tsʼáaik le yóokʼol kaabaʼ.

15. ¿Máakalmáak le ayikʼalil maas ku beetik u kiʼimak k-óoloʼ?

¹⁵ U ayikʼaltal máakeʼ maʼ u kʼáat u yaʼal wa táan u bendecirtaʼal tumen Diosiʼ. Tumen letiʼeʼ maas ku bendecirtik le máaxoʼob beetik «baʼaloʼob maʼalobtak[oʼ]» (xok 1 Timoteo 6:17-19). Koʼoneʼex ilik baʼax tu beetaj juntúul kiik ku kʼaabaʼtik Lucia, kajakbal Italia. * Le ka tu yojéeltaj kʼaʼabéet j-kʼaʼaytajoʼob tu luʼumil Albaniaeʼ, kex minaʼan taakʼin tiʼeʼ, tu kʼubaj u yóol tiʼ Jéeobaeʼ ka bin tu jaʼabil 1993. Tu kanaj le idioma albanesoʼ yéetel tsʼoʼok u yáantik maas tiʼ 60 máakoʼob utiaʼal ka okjaʼanakoʼob. Maʼ xaaneʼ toʼoneʼ maʼ béeyak k-áantik le bukaʼaj máakoʼob teʼ tuʼux k-kʼaʼaytajoʼ. Baʼaleʼ jeʼel baʼaxak ka k-beet utiaʼal k-áantik u maasil utiaʼal u kaxtikoʼob u jaajil yéetel utiaʼal ka xíimbalnakoʼob tu bejil le kuxtaloʼ, letiʼe ayikʼalil maas maʼalob jeʼel u páajtal u yantaltiʼoboʼ bey xan tiʼ toʼon (Mat. 6:20).

16. 1) ¿Baʼax kun úuchul tiʼ u ayikʼalil le yóokʼol kaabaʼ? 2) ¿Bix unaj u meyajtoʼon u ayikʼalil le yóokʼol kaaboʼ?

¹⁶ Jesuseʼ u taatsʼ úuchik u yaʼalik yaan u pʼáatal «minaʼan» u biilal le ayikʼaliloʼoboʼ (Luc. 16:9). Le u kʼaʼalal jujunpʼéel bancoʼob yéetel u sen koʼojtal tuláakal baʼal teʼ tu tsʼook kʼiinoʼobaʼ, mix baʼal tu tséel le baʼax ku taal u kʼiinoʼ. Yaan u lúubul u muukʼ u ayikʼalil le yóokʼol kaabaʼ, le politicaoʼ yéetel le maʼ jaajil religionoʼob ku nuʼuktaʼal tumen Satanasoʼ. Profeta Ezequiel yéetel Sofoníaseʼ tu yaʼaloʼobeʼ, le oro yéetel le plataoʼ yaan u pʼáatal mix baʼal u biilal kex úuch joʼopʼok u meyajoʼob (Eze. 7:19; Sof. 1:18). ¿Bix jeʼel u yuʼubikuba máak wa ka aʼalaʼaktiʼ nukaʼaj kíimil, baʼaleʼ chéen tu tsʼáaj u yóol u kaxt ayikʼaliloʼob tu lugar u meyajtik Jéeobaeʼ? Jeʼel u yuʼubikuba chéen tu kíimsuba meyaj utiaʼal náajaltik yaʼab taakʼin, tsʼoʼoleʼ ku tsʼáaik cuenta láaj falsoeʼ (Pro. 18:11). U ayikʼalil le yóokʼol kaabaʼ yaan u pʼáatal mix baʼal u biilal. Le oʼolal teʼ kʼiinoʼobaʼ unaj u meyajtoʼon utiaʼal k-kaxtik amigoʼob teʼ kaʼanoʼ. Jeʼel baʼaxak ka k-beet utiaʼal k-tsʼáaik táanil le Reino ichil k-kuxtaloʼ yaan u yáantkoʼon utiaʼal k-maas bisikba yéetel Jéeoba.

17, 18. ¿Bix le kuxtal kun antal tiʼ le máaxoʼob ku biskubaʼob yéetel Diosoʼ?

¹⁷ Ken káajak u gobernar u Reino Dioseʼ, mix máak kun boʼotik renta, ken u páay taakʼin, u bin yiknal doctor mix u manik u tsʼaak. Yaan u siʼibil yaʼabkach baʼal u jaant tuláakal máak. Le máaxoʼob meyajtik Jéeobaoʼ yaan u jaantkoʼob u yich le baʼaxoʼob maʼalobtak ken u tsʼáa le Luʼumoʼ. Maʼ ken u chéen líiʼs máak oro, plata yéetel uláakʼ baʼaxoʼob jatsʼutstak, baʼaxeʼ yaan u usartik sáamsamal. Tuláakal máak ken u beet u yotoch yéetel jatsʼuts cheʼob, tuunich yéetel uláakʼ baʼaloʼob jach maʼalobtak. Tsʼoʼoleʼ yaan k-áantaʼal tumen k-amigoʼob, tumen u kʼáat u beetoʼob, maʼ tumen wa yaan k-boʼotkoʼobiʼ. Yaan u múul meyajtoʼon tuláakal le baʼaxoʼob ken u tsʼáa le Luʼumoʼ.

¹⁸ Tuláakal lelaʼ chéen junpʼíit tiʼ le bukaʼaj baʼaxoʼob ken u kʼam tuláakal le máaxoʼob ku kaxtikoʼob u amigoʼob teʼ kaʼanoʼ. Tuláakal le máaxoʼob meyajtik Jéeobaoʼ yaan u kiʼimaktal u yóoloʼob ken u yuʼuboʼob u yaʼalaʼal tumen Jesús: «Koʼoteneʼex, teʼex tsʼoʼok a kiʼikiʼtʼantaʼaleʼex tumen in Taata, tiaʼalinteʼex le Reino beetaʼab a tiaʼaleʼex desde ka káaj u síijil wíinik way yóokʼol kaabeʼ» (Mat. 25:34).