1, 2. Misamaanay hano lengoen ita to sasamaanen a mihinom ko mapatayay ko salawina a tamdaw? (Nengnengen ko satapangan coka.)

O CECAY fafahiyan ci Susi, sanay cingra: “Mangataayto cecay miheca mapatay ko wawa ako, mararomayho kako.” O cecay salikaka, fahal sa mapatay ko fafahi, “tada misemsemay” cingra. Kadayayan i, ˈalomanay tamdaw tahalifaay to matiniay a somad no falocoˈ. Ano o salikakato, cowa ko kafanaˈan to mamapatay ko kanonoˈan a salawina, iˈayaw no aira ko Armakiton. Alatek kiso tahalifaayto, anca mafanaˈay to cima iraay ko mapatayay. Ano hatiraay i, saan kiso a miharateng alatek: “Ano mapatay ko salawina i, icowa a mikilim to sahinom hani?”

² Alatek matengilay iso ko hatiniay a sowal: “O toki, o sangaˈayay a sapiadah.” Soˈlinay han? O sowal no cecay maponengay: “Soˈlinay a sowal i, mamiadah ko toki hokira, ora noka misamaan cingra kalasaka dademak to toki ko piˈarawan.” Hay, o rarom no falocoˈ no mapatayay ko salawina tamdaw, mahecaday to dokaˈ, o sasongilaˈen a midimokos, hongaˈ mataˈlifto ko toki palidlid sato maadah. O manan ko papadama  to mapatayay ko salawina, miadah to adada no falocoˈ hani?

3, 4. Misamaanay hano pakasoˈlin kita, mafanaˈay ci Yihofa to misaaliay to sahinom ko mararomay a tamdaw?

³ Awaay ko sasa, o cisidaˈitay a Wama Yihofa o mamihinom kitanan. (ˈOsien ko 2 Korinto 1:3, 4.) Ci Yihofa, o sangaˈayay a taˈarawan ita mipaihekal to siniˈadaay. Sanay mikiˈok to finawlan Ningra: “Kako ko mihinomay tisowanan.”—Isaya 51:12; ˈOlic 119:50, 52, 76.

⁴ Ci Yihofa milifetay to nika patay no madimadiay a sikawdan, ci Apraham, Isak, Yakop, Mosi aci Tafiti. (Saˈosi 12:6-8; Matay 22:31, 32; Dmak 13:22) Ihekalay a mikiˈok ko Fangcalay Cudad, hinatalaay ci Yihofa to sapatikoraw paˈorip to madimadiay a sikawdan Ningra. (Yopu 14:14, 15) O mamahemek cangra maˈorip ato tatariktikto ko tireng. O sowal no Fangcalay Cudad, “o sakalipahak Ningra to romiˈamiˈad [ci Yis],” sanay. (Taneng 8:22, 30) Haratengen hena, tiya misemsem ci Yis a mapatay i, hakowa ko nika rarom no falocoˈ ni Yihofa saw.​—Yohani 5:20; 10:17.

5, 6. Mamisamaan ci Yihofa mihinom kitanan?

⁵ Wa ngaˈay pakasoˈlinen ita ci Yihofa, o papadama Cingra kitanan. Mankora, pakaynien i pitolon a mifowah to somad ato roray no falocoˈ. Mafanaˈ to cipinangay to falocoˈ no mita ci Yihofa, hanaca o papadama kitanan, tada rihadayay ko falocoˈ ita! Hay, mamisamaan Cingra a padama kitanan hani?

⁶ O cecay a sapadama no Kawas i, pakaynian i fangcalay saocor. (Dmak 9:31) Tada ciˈicelay ko fangcalay saocor no Kawas, o ngangaˈay midopil to dokaˈ no falocoˈ ita. Mikiˈokay ci Yis, “Wama i kakarayan papafeli to [fangcalay saocor] i milongocay i Cingraan.” (Luka 11:13) Ya nisowalan isalakat a salikaka ci Susi, sanay ko sowal: “Kinapina pinaay kami mipitoros a mitolon mingitangit to sahinom ni Yihofa, sapafeli Ningra a rihaday misimaway to falocoˈ ato harateng niyam.”​—ˈOsien ko Filipi 4:6, 7.

7, 8. Misamaanay hano pakasoˈlin kita, mamihinom kitanan ci Yis?

⁷ Misahecian ni Yis mitodong ci Yihofa, mansa, o sowal o demak ningra patahekalay to siniˈadaay. (Yohani 5:19) Miocoran ni Yihofa ci Yis tayni i sera, mihinom to “mararomay a tamdaw.” (Isaya 61:1, 2; Luka 4:17-21) Mihaenay, mikiharay ato siniˈadaay ci Yis to mararomay tamdaw, misayar to roray no falocoˈ nangra.​—Hipray 2:17.

⁸ Kaemangho ci Yis milifetayto to patay no salawina. Midipotay a wama ci Yosif, kaemangayho ci Yis mapatayayto. * Itiya maedeng 10-20 ko mihecaan ningra alatek, mamisiˈayaw to adada no falocoˈ no niyah, hanaca mamihinomho to safasafa ningra, cowa ko kahemaway.

9. Ya mapatay ci Lacarus i, samaanay paihekal ci Yis to siniˈada to tamdaw?

⁹ Ya mitosil ci Yis i hekal i, cipinangay to falocoˈ no tamdaw, siniˈada i cangranan. Patinakoen, ya mapatay ko widang ci Lacarus i, soˈlin mafanaˈay to papalowaden ningra ci Lacarus, kawra mahapinangay ningra ko adada no falocoˈ ni  Mariya aci Marta, rowis sanay ko losaˈ ningra.​—Yohani 11:33-36.

10. Hano ngangaˈay pakasoˈlin kita, o papadotoc ci Yis siniˈada to mararomay a tamdaw?

¹⁰ O nika siniˈada ni Yis a mihinom to tamdaw, samaanay padama to aniniay a tamdaw hani? O sowal no Fangcalay Cudad, “ano inacilato, ano aninito, ano tahadaˈocto i, caay ko mamafalic ci Yis Kristo.” (Hipray 13:8) O “tatapangan no ˈorip” ci Yis, milifetay to nika patay no salawina, o mamafanaˈ cingra “padama anini to mapadesay a tamdaw.” (Dmak 3:15; Hipray 2:10, 18) Mihaenay, ngangaˈay pakasoˈlinen ita, o papadotoc ci Kristo nohatini a siniˈada to mararomay a tamdaw, o mamihinom cingra i matatodongay a tatokian.​—ˈOsien ko Hipray 4:15, 16.

11. Iraay ko manan a sinael ngaˈayay mihinom tisowanan?

¹¹ Matiliday i Fangcalay Cudad, tada mararomay ci Yis tiya mapatay ci Lacarus sanay. Cowa koninian aca, adihayayho i Fangcalay Cudad ko mihinomay to tamdaw a tinakoan, samanen “o matiliday i Fangcalay Cudad a maemin i, o sapasifanaˈ i titaanan to sakakodait ita, ta mapaˈicel no Fangcalay Cudad kita,” ira ko hatokel noikor. (Loma 15:4) Ano mararomay kiso to nika patay no salawina i, ngaˈay kiso mikitira tora ilaenoay sinael a milifok to sahinom:

• “Patihien [ni Yihofa] ko mararomay matoleday a tamdaw, paˈoripen Ningra ko makesemay ko falocoˈ a tamdaw.”​—ˈOlic 34:18,19.

• “Yo adihay ko rawraw ato rarom no falocoˈ ako i, mihinom Kiso i takowanan, saka, malipahak kako.”​—ˈOlic 94:19.

• “Nanay o siniˈadaay, o mihinomay a patanektek to falocoˈ ita a papipasoˈlin a Tapang ita ci Yis Kristo ato maolahay titaanan a Wama ita a Kawas ko mihinomay tamowanan a patanektek to falocoˈ namo.”​—2 Tisalonika 2:16, 17. *

12. Samaanen ita mihinom ko mararomay a tamdaw hani?

¹² Papakaynien no Kawas to kasakopang a mihinom ko mapatayay ko salawina a tamdaw. (ˈOsien ko 1 Tisalonika 5:11.) Samaanen iso paˈicel ato mihinom ko mararomay ko falocoˈ a tamdaw hani? (Taneng 17:22) Patnakay 3:7 sanay ko sowal: “Ira ko katomerepan, ira ko kacaciyawan a romiˈad.” Mapatay ko faˈinay ni Talin i, sanay ko sowal: “Mapatayay ko salawina a tamdaw, sadaken a mifowah ko harateng ato falocoˈ sanay. Mansa, tengil hanca iso ano pasowal cangra.” Ci Yuniya, kinasoˈotay ko kaka ningra, sanay ko sowal: “Nolatek awaay ko pinang iso to hakowaay ko adada no falocoˈ nangra, kawra o kalimlaan i, makahi kiso a mitinako a mihapinang to falocoˈ nangra ngaˈ.”

13. Hano cowa ko mamahidepec ita a cipinang ko falocoˈ no tao?

¹³ Haratengen, o kahacecay tamdaw cowa ka hecahecad ko nika paihekal to rarom no falocoˈ. Nolatek, edengan ora citirengay a tamdaw ko mamafanaˈ to hakowaay ko nika adada no falocoˈ, latek pasangaran nanay tano sowal a patahekal to kemod no falocoˈ. Sowal no Fangcalay Cudad: “Caay ko mamaˈisal no tao ko roray no falocoˈ iso, caay ko mamikapot ko tao a lipahak to lipahak no falocoˈ  iso.” (Taneng 14:10) Ano soˈlinto pasowal cangra to harateng, alatek cowa ko mamahidepec ko tao cipinang to hasasowalen nangra.

14. Samaanen ita ko sowal mihinom to mapatayay ko salawina a tamdaw?

¹⁴ Manaokaniw, cowa ka fanaˈ kita to sasamaanen ko sowal wangaˈ. Kawra, somowalay ko Taneng 12:18: “O citanengay a sowal i, matiya o ngaˈayay a sapaiyo a miadah,” sanay. Nengnengen ko Ano Mapatay ko Kanonoˈan Iso a Tamdaw. * Itini toni cudad, iraay ko sapaini to papadama cangranan misamaan a mihinom to tao. ˈArawhan, o sangaˈayay pakayraan i, “kihatiyaen a tomangic ko tomangicay a tamdaw.” (Loma 12:15) Mapatay ko faˈinay ni Kapi, sanay ko sowal: “O losaˈ aca ko patadoay takowanan a pasowal to falocoˈ ako. Ano pacafay ko widang a tomangic i, masayaray ko falocoˈ, samanen cowa ko kako aca ko mararomay.”

15. Ano pasangaran nanay kiso tano sowal a mihinom to tao, samaanen iso ko demak? (Nengnengen ko sapatongal lalakaw,  “Misayaray to Falocoˈ a Sowal.”)

¹⁵ Ano pasangaran nanay kiso tano sowal a mihinom to tao, ngaˈayay tilid han i kalidokap, patikamien a mihinom cangra. Alaen iso ko cecay a sinael, sowalen to manan ngaˈayay a capeling nora mapatayay, anca lomalen ko kahemekan a demak itiyaho. Saan pasowal ci Yuniya: “Ano ˈapotopoto ko sapakowad a sowal no salikaka, anca mala cafay komaen ato salikaka, tada mikowaday i takowanan. Matinakoay ako ko olah ato siniˈada nangra.”

16. O manan ngaˈayay pakayraan mamihinom to tao?

¹⁶ Aka misakahemaw to ˈicel no  mitolonay. Pacafayen ita ko mapatayay ko salawina a tamdaw a mitolon, anca patado mitolon saki cangranan. Itiya, alatek masomad kiso, fokil saan to sowal, ano soˈlinto tomangic a mitolon kiso caka sadak ko sowal, ora mikifalocoˈay iso a satolon, o mamihinom cangranan. Sanay milomal ci Talin: “Tayni ko fafahiyan salikaka mihinom i, licayen ako cangra makahi mitolon saki takowanan hokira. Nolatek naˈemetan nangra ko somad ngaˈ, masadakay ko sowal, kawra ikor fanekfekayto ko sowal, misemer to falocoˈ ako. O nika pasoˈlin no falocoˈ no salikaka, olah nangra padamaay takowanan mitiˈer ci Yihofaan.”

17-19. Misamanay hano padadotoc kita mihinom to mapatayay ko salawina a tamdaw hani?

¹⁷ O kahacecay a tamdaw cowa ka hecad ko toki a maadah ko somad no falocoˈ. Saˈayaˈayaw ˈalomanay ko salawinawina anca widang tayra mipadang, kawra ikor no pina folad awaayto ko mikiharay a tamdaw. Sanay ko sowal no Fangcalay Cudad: ‘O soˈlinay widang marariday patahekal to olah, matira o salikaka no tireng a mipadang i kapadesan.’ (Taneng 17:17) Mihaenay haw i, ano cahoka masaysay ko falocoˈ nangra i, o papadotoc kita mihinom cangranan.​—ˈOsien ko 1 Tisalonika 3:7.

¹⁸ Adihayay a demakan mamikidat to somad no mapatayay ko salawina a tamdaw, patinakoen, o sasing, kararamodan a romiˈad, radiw, anca hanek no manan, ngihaˈ, madodemay anca maˈoraday a romiˈad. Ikor no patay no raramod, sakina cecay a mirienang to taykay anca piharatengan to patay ni Yis a saˈopo, tada o mamasomad ko tamdaw. O sowal no cecay faˈinayan salikaka: “O harateng ako i, ikor no patay no fafahi, toya kararamodan a romiˈad, o mamararom kako sa kako. ˈArawhan, iraay ko papina kangaˈayan ako salikaka mipohay takowanan, hato cowato ka tada matoˈol kako.”

¹⁹ Nikawrira, cowa ko aitini aca i mikiriwiˈay a romiˈad, ngaˈ misaaliay to sahinom ko tamdaw. O sowal ni Yuniya: “Cowa ka itiya aca mikiriwiˈay piharatengan a romiˈad, to kalo a romiˈad ano iraay ko pacafayay takowanan i, tada paˈicelay takowanan. Ano mikiˈayaw ko tao mikihar takowanan, soˈlinay masayar ko falocoˈ ako.” Soˈlina cowa ko mamapadeng ita ko somad no mapatayay ko salawina a tamdaw, miadah to tafihaw no falocoˈ nangra, kawra ngaˈayay tano demaken ita mipadang ato mihinom cangranan. (1 Yohani 3:18) Sanay milomal ci Kapi: “Miakoˈiday kako pafeli ci Yihofa to malohemay malitengay, mihadidi cangra pacafay takowanan, mitaˈlif toya kasomadan a romiˈad. Mahapinangay ako ko olah ni Yihofa a mitakec takowanan.”

20. O papalaˈosien no Kawas ko mikiˈokan Ningra, hano mamihinom to falocoˈ ita aki?

²⁰ Oya mihinomay a Kawas ci Yihofa, o papatikor a paˈorip to mapatayay tamdaw, palahedaw to somad, mafanaˈ tonini, tada masayaray ko falocoˈ ita. Sowal itini Yohani 5:28, 29: “O mamatengil no matademay a tamdamdaw ko ngihaˈ [ni Kristo], ta masadak cangra.” Mikiˈokay ko Kawas “palasawaden Ningra ko patay a tahadaˈoc, sisiten Ningra a miˈicang ko losaˈ no kahacecacecay a tamdaw.” (Isaya 25:8) Tahirato itiya, o tamdamdaw cowato ka “kihatiyaen a tomangic ko tomangicay a tamdaw”, ao “kihatiyaen a malipahak ko lipahakay a tamdaw.”​—Loma 12:15.