1, 2. Чьрʹа лазьм ә бәр дьле ԝанда бен, йед кӧ мәрьве хԝәйи незик ӧнда кьрьнә? (Бьньһерʹә шькле әʹԝльн.)

ХУШКӘКӘ мә бь наве Сузи гот: «Паши мьрьна кӧрʹе мә, ԝәкә саләке мә ешәкә гәләк гьран дькʹьшанд». Бьраки мә жи гьли кьр, кӧ чахе жьна ԝи ньшкева мьр, әԝи «еша физикийә әʹщеб гьран дькʹьшанд». Сәд һʹәйф, иро гәләк мәрьв рʹасти дәрде ӧса гьран тен. У иро гәләк Мәсиһи жи һивийе нибун кӧ мәрьве ԝани незик ԝе бьмьрә. Дьԛәԝьмә мәрьве ԝәйи незик мьрийә, йан жи мәрьве ԝи кʹе һун нас дькьн. Дьбәкә һун хԝәрʹа дьфькьрьн: «Кәсе кӧ мәрьве хԝә ӧнда кьрийә, ча дькарә бәр дәрдәки ӧса гьран тәйах кә у бәрдьлийе бьстинә?»

² Дьԛәԝьмә ԝә бьһистийә кӧ ԝәʹдә бьрина дьл ԛәнщ дькә. Ле гәло рʹасти ӧса нә, кӧ ԝәʹдә дәрбаз бә у еша дьл ԝе хԝәха ԛәнщ бә? Жьнәбике гот: «Һе рʹаст ә бежьн ԝәки чахе кәсәк ԝәʹде хԝә хәрщ дькә сәва али йед дьн бькә, әԝ ԝәʹдә бьрине дьл ԛәнщ дькә». Бәле, чаԝа бьринәкә бәдәнерʹа ԝәʹдә у дәрманкьрьн лазьм ә сәва ԛәнщ бә, ӧса жи бьринед дьлрʹа ԝәʹдә у бәрдьли лазьм ә. Гәло әԝед кӧ мәрьве хԝә ӧнда кьрьнә, ча дькарьн еша дьле хԝә ԛәнщ кьн?

3, 4. Әм жь кʹӧ заньн ԝәки Йаһоԝа һʹале ԝан, кʹе шине дькә, фәʹм дькә?

³ Баве мә Йаһоԝа гәләк дьлшәԝат ә у бәре әʹԝльн әԝ бәр дьле мәда те ԝәʹде лазьмда. (Бьхунә 2 Корьнтʹи 1:3, 4.) Йаһоԝа һәри дьлован ә у щьмәʹта хԝәрʹа әԝи соз дайә: «Әз ьм, йе кӧ бәр дьле ԝәда те» (Иша. 51:12, ДТʹ; Зәб. 119:50, 52, 76).

⁴ Баве мәйи дьлшәԝат жи мәрьвед хԝәйи незик ӧнда кьрийә у дәрд кʹьшандийә, мәсәлә, чахе Бьраһим, Исһаԛ, Аԛуб, Муса у пʹадша Даԝьд мьрьн (Жьмар 12:6-8; Мәт. 22:31, 32; Кʹар. Шанд. 13:22). Кʹьтеба Пироз дьбежә кӧ Йаһоԝа бь дьл у щан һивийе йә, гава әԝ ԝана жь мьрьне рʹакә (Иб. 14:14, 15). Әԝана ԝе бәхтәԝар бьн у сьһʹәт-ԛәԝата ԝан бекемаси бә. Ле биньн бира хԝә, кӧ Йаһоԝа ӧса жи мьрьна Кӧрʹе хԝәйи дәлал дитийә, кʹижан кӧ «шабуна ԝи бу» (Мәтʹлк. 8:22, 30). Бь гьлийа әм нькарьн бежьн кӧ чьԛас дьле Йаһоԝа дешийа гава берʹәʹмти Кӧрʹе ԝи кӧштьн (Йуһʹн. 5:20; 10:17).

5, 6. Ча Йаһоԝа бәрдьлийе дьдә мә?

⁵ Әм гәрәке сәд сәләфи баԝәр бьн кӧ Йаһоԝа ԝе әʹсә али мә бькә. Ләма жи лазьм ә әм дӧада дьле хԝә жерʹа вәкьн у дәрд-кӧлед хԝә гьли кьн. Әм чьԛас дьлгәрм дьбьн кӧ Йаһоԝа һʹале мә фәʹм дькә у дьле мә дәрман дькә у рʹьһʹәт дькә! Ле чь щурʹәйи әԝ әве йәке дькә?

⁶ Бәре әʹԝльн Йаһоԝа «бь дьлдайина рʹӧһʹе Пироз» али мә дькә (Кʹар. Шанд. 9:31). Бәле, ԛәԝата Хԝәде канийа бәрдьлийа мәзьн ә. Иса соз да кӧ Баве мәйи әʹзмана ԝе әʹсә «рʹӧһʹе пироз бьдә әԝед кӧ жь ԝи дьхԝазьн» (Луԛа 11:13). Сузи, бәʹса кʹижани мә жоре кьр, дьбежә: «Гәләк щар әм һʹаләки ӧсада бун, кӧ мә сәр чока жь Йаһоԝа лавайи дькьр сәва бәрдьлийе бьдә мә. У һәр гав әʹдьлайа Хԝәде дьле мә у һʹьше мә рʹьһʹәт дькьр». (Бьхунә Филипи 4:6, 7.)

7, 8. Чьрʹа әм дькарьн дӧдьли нәбьн кӧ Иса ԝе бәр дьле мәда бе?

⁷ Гава Иса сәр әʹрде бу, әԝи дьлшәԝатийеда бь тʹәмами чʹәʹв дьда Баве хԝә Йаһоԝа. Иса һьн бь гьлийед хԝә, һьн жи бь кьред хԝә чʹәʹв дьда ви һʹӧнӧре Баве хԝә (Йуһʹн. 5:19). Йаһоԝа хԝәха Иса шандә сәр әʹрде, сәва бәрдьлийе бьдә йед «дьлшькәсти» у «һʹәму кәсед бь шин» (Иша. 61:1, 2; Луԛа 4:17-21). Мәрьва, Иса ча кәсе дьлшәԝат нас дькьрьн, чьмки әԝи дәрде ԝан фәʹм дькьр у бь дьл у щан дьхԝәст али ԝан бькә (Ибрн. 2:17).

⁸ Чахе Иса зарʹ бу, дьԛәԝьмә әԝи мәрьве хԝәйи незик ӧнда кьрьбу. Мәсәлә, ча те кʹьфше Иса һе зарʹ бу чахе баве ԝи Усьв мьр. * Бьдьнә бәр чʹәʹве хԝә, кӧ ча Исарʹа чәтьн бу бәр ԝи дәрде хԝә тәйах кә у бьвинә ча дьле де, хушк у бьред ԝи дьшәԝьтә.

9. Чахе Лазар мьр, Иса ча дьлшәԝати да кʹьфше?

⁹ Иса ԝәʹде хьзмәтийа хԝә әʹйан дькьр, ԝәки әԝ һʹал у дәрде мәрьва фәʹм дькә. Мәсәлә, биньн бира хԝә ве  дәрәще, чахе һәвале ԝийи дәлал Лазар мьр. Рʹаст ә Иса заньбу, ԝәки әԝ ԝе Лазар жь мьрьне рʹакә, ле йәкә кʹәсәра кʹур һатә ԝи гава әԝ чʹәʹв гьрийе Мәрйәме у Мәртʹайе кʹәт. Дьле Иса ӧса шәԝьти, кӧ һесьр чʹәʹве ԝи һат (Йуһʹн. 11:33-36).

10. Чьрʹа әм дькарьн дьлрʹьһʹәт бьн кӧ Иса һʹале мә фәʹм дькә?

¹⁰ Гәло иро Иса ча дькарә бәрдьли у аликʹарийе бьдә мә? Кʹьтеба Пироз зәлал дьбежә, кӧ «Иса Мәсиһ дӧһӧ, иро у һʹәта-һʹәтайе йәк ә» (Ибрн. 13:8). Ӧса жи Кʹьтеба Пироз дьбежә кӧ әԝ «Чʹәʹвканийе жийине» йә, демәк дькарә рʹе вәкә сәва әм һʹәта-һʹәтайе бьжин. Иса занә дәрд чь йә у ләма «дькарә аликʹарийа ԝан бькә, йед кӧ дькʹәвьнә нава щерʹьбандьне» (Кʹар. Шанд. 3:15; Ибрн. 2:10, 18). Ләма жи әм дькарьн ԛә дӧдьли нәбьн, ԝәки Мәсиһ дькʹәвә һʹале мәрьва, дәрде ԝан фәʹм дькә у ԝәʹде лазьмда ԝе бәрдьлийе бьдә ԝан. (Бьхунә Ибрани 4:15, 16.)

11. Кʹижан рʹезед жь Кʹьтеба Пироз гәләк дьл дьдьнә ԝә?

¹¹ Хенщи ве сәрһатийа дәрһәԛа Иса кӧ әԝи Лазар сах кьр, Хәбәра Хԝәдеда диса гәләк рʹез һәнә кӧ бәрдьлийе дьдьнә мә. Бешьк, «чь кӧ пешда кʹьтебада һатә ньвисаре, бона һинбуна мә һатә ньвисаре, ԝәки әм бь сәбьре у ԝан готьнед ньвисарада кӧ бине дьдьнә бәр мә», хԝәйиһеви бьн (Рʹом. 15:4). Һәрге ԝә мәрьве хԝәйи незик ӧнда кьрийә, әԝ рʹез кӧ жере тенә дайине, дькарьн дьле ԝә гәрм кьн:

• «Хӧдан незики дьлшкәстийа йә у мәʹрьм-бәләнгаза дьдәбьрине» (Зәб. 34:18, 19).

• «Дәма дәрд-кӧл дьле мьнда зедә дьбьн, барьстанийед тә . . . [Йаһоԝа] нәфса мьн ша дькьн» (Зәб. 94:19).

• «Бьра Хӧдане мә Иса Мәсиһ бь хԝә у Баве мә Хԝәде йе кӧ жь мә һʹьз кьрийә у бь кʹәрәме һана һәрһәйи у һевийа ԛәнщ дайә мә, бәр дьле ԝәда бе у ԝә . . . ԛайим бькә» (2 Тʹеслн. 2:16, 17, ИМ). *

12. Әм ча дькарьн бәр дьле мәрьвада бен?

¹² Щьват дькарә бәрдьлийа мәзьн бьдә ԝан, йед кӧ мәрьвед хԝәйи незик ӧнда кьрьнә. (Бьхунә 1 Тʹесалоники 5:11.) Ле һун ча дькарьн йед бь «дьле хәм» дьлгәрм кьн у ԛәԝи кьн? (Мәтʹлк. 17:22) Фәрз ә әм бир нәкьн кӧ «ԝәхта һʹьшбуне һәйә у ԝәхта готьне һәйә» (Ԝаиз 3:7). Жьнәбикә бь наве Дален дьбежә: «Әԝе кӧ мәрьве хԝә ӧнда кьрийә, гәрәке кʹәла дьле хԝә бьрʹежә. Ләма жи йа лапә фәрз әԝ ә, кӧ гӧһ бьдьнә ԝи мәрьви у хәбәрдана ԝи нәбьрьн». Щунйа, бьре кʹижани хԝә кӧшт, зедә дькә: «Һәрге жи һун бь тʹәмами нькарьн дәрде ԝи кәси фәʹм бькьн, ле сәри әԝ ә кӧ һун дьхԝазьн һʹале ԝи фәʹм кьн».

13. Әм чь гәрәке бьзаньбьн дәрһәԛа дәрд?

¹³ Әм гәрәке бир нәкьн, кӧ һʹәму мәрьв нә мина һәв бәр дәрде хԝә тәйах дькә у дәрде хԝә әʹйан дькә. Щарна мәрьврʹа чәтьн ә дьле хԝә бьрʹежә у тʹәне әԝ хԝәха кӧла дьле хԝә занә. Хәбәра Хԝәде дьбежә: «Һәр дьл дәрд у кӧлед хԝә занә у кәсәк тʹәви шабуна ԝи набә» (Мәтʹлк.  14:10). Ле һәрге жи кәсәк кʹәла дьле хԝә дьрʹежә, йәкә йед дьн һәр гав нькарьн бь тʹәмами фәʹм кьн әԝ чь сәр хԝә тʹәхмин дькә.

14. Әм чь дькарьн бежьн ԝанрʹа йед кӧ шине дькьн?

¹⁴ Щара ньзани чь бежи ԝан йед кӧ шине дькьн. Ле Кʹьтеба Пироз дьбежә: «Зьмане сәрԝахта дәрмане дьла йә» (Мәтʹлк. 12:18). Гәләк хушк-бьра жь брошура «Чахе Мәрьве Тәйи Незик Дьмьрә», фькьред баш дитьнә сәва хԝә. * Ле гәләк щар әм дькарьн бәрдьлийа мәзьн бьдьнә ԝан, һәрге «тʹәви йед дьгьрин бьгьрин» (Рʹом. 12:15). Габи, кʹижан кӧ би майә, дьбежә: «Әз ида бь һесьра кӧла дьле хԝә дьрʹежьм у чахе һәвалед мьн тʹәви мьн дьгьрин, әԝ һьнәки дәрде мьн сьвьк дькә. У ԝи чахи дьле мьн рʹьһʹәт дьбә кӧ әз тʹәне нә мамә».

15. Һәрге бь хәбәрдан мәрʹа чәтьн ә бәр дьле мәрьвада бен, әм чь дькарьн бькьн? (Бьньһерʹьн чаргошә « Гьлийед Ширьн кӧ Дькарьн Бәрдьлийе Бьдьн»)

¹⁵ Һәрге ԝәрʹа чәтьн ә бь хәбәрдан бәр дьле ԝанда бен, ԝе баш бә кӧ бь нәʹмәке, йан емаиле, йан жи пе тʹеле ԝанрʹа бьньвисьн. Бәʹса хәбәре, нәʹмәкеда дькарьн ԝан рʹезед жь Кʹьтеба Пироз бьньвисьн, йед кӧ бәрдьлийе дьдьн, йан жи бьньвисьн дәрһәԛа хәйсәт-һʹӧнӧред баш йед мьри, йан жи дәрһәԛа ԝи ԛәԝьмандьнәкә һʹәԝас гьли кьн кʹижан кӧ бира ԝәда майә. Щунйа дьбежә: «Чахе әз нәʹмәке дьстиньм кӧ гьлийед ширьн ньвисар ьн, йан жи кʹәнге хушк-бьра мьн тʹәглиф дькьн сәва тʹәвайи ԝәʹдә дәрбаз кьн, бона  мьн әԝ аликʹарийа гәләк мәзьн ә. У әз гәләк дьлгәрм дьбьм чахе дьвиньм кӧ мьн һʹьз дькьн у бона мьн хәм дькьн».

16. Ча әм дькарьн дьле ԝан гәрм кьн, йед кӧ мәрьве хԝә ӧнда кьрьнә?

¹⁶ Дӧайед мә жи дькарьн аликʹарийа мәзьн бьдьнә хушк йан бьре кӧ шине дькә. Ԝе гәләк баш бә һәрге әм бона ԝи дӧа бькьн у ӧса жи тʹәви ԝи. Һәрге жи ԝәрʹа чәтьн ә бәр ԝи дӧа бькьн, чьмки дьле ԝә дьшәԝьтә у гьрийе ԝә те, хԝә нәгьрьн дӧа бькьн. Әв дӧа бь рʹастийе дькарә ԛәԝатәкә мәзьн бьдә ԝи у дәрде ԝи дәрман кә. Дален тинә бира хԝә: «Чахе хушк тенә щәм мьн сәва мьн дьлгәрм кьн, щара әз ԝанрʹа дьбежьм кӧ дӧа бькьн. Чахе әԝана дӧа дькьн, пешийе хԝә дьгьрьн, ле паши чәнд гьлийа дәнге ԝан ԛайим дьбә у әԝана жь кʹәла дьле хԝә дӧа дькьн. Баԝәрийа ԝанә ԛәԝи, һʹьзкьрьна ԝан, у бәрдьлийа ԝан гәләк баԝәрийа мьн ԛәԝи дькьн».

¹⁷ Һьнәк мәрьв гәләк ԝәʹдә дьнәʹльн кʹәрбе мьрийед хԝә. Чахе кәсәк тʹәзә мьрийә, ԝи чахи гәләк һәвал у мәрьвед незик тенә сәр шине. Ле паши чʹәлкьрьне, ида гьшк дьчьнә мал-һʹалед хԝә у хԝәйе мьри тʹәне дьминә. Ләма һьнге жи ԝанрʹа бәрдьли лазьм ә. «Һәвал һәр гав һʹьз дькә, бьра буйә бона рʹожа охьрме гьран» (Мәтʹлк. 17:17). Бәле, әм гәрәке тʹьме ԝан хушк-бьра дьлгәрм кьн, һʹәта кӧ еша дьле ԝан дайнә. (Бьхунә 1 Тʹесалоники 3:7.)

¹⁸ Бир нәкьн кӧ дәрд-кӧле хԝәйе мьри дькарә ньшкева диса тʹәзә бә. Мәсәлә, әԝ йәк дькарә бьԛәԝьмә ԝәʹде рʹожа зәԝаща ԝан, йан жь бо бьһистьна кʹьламәке, дитьна шькла, йан жи ԝәʹде сезонәкә сале. Әԝе кӧ малхе хԝә йан кʹӧлфәта хԝә ӧнда кьрийә, гәләк тьшт щара пешьн тʹәне дькә, бәʹса хәбәре, те сәр щьвата мәзьн йан сәр Евара Биранине, у әԝ йәк дькарә ешәкә гьран бинә. Бьраки мә гьли дькә: «Мьн заньбу кӧ рʹожа сәрсала зәԝаща мә, ԝе мьнрʹа гәләк чәтьн бә бей жьна мьн. Ле ве рʹоже чәнд хушк-бьра у һәвалед мьнә незик тʹәви мьн тʹоп бун, сәва кӧ әз тʹәне нибьм».

¹⁹ Әм гәрәке нә кӧ тʹәне рʹожед мәхсус бәр дьле ԝанда бен, ле рʹожед дьн жи. Щунйа дьбежә: «Чахе мәрьв һивийе нинә у аликʹари у бәрдьлийе дьстинә, әԝ кʹарәкә гәләк мәзьн тинә. Әԝ йәк гәләк ԛимәт ә у бәрдьлийа мәзьн дьдә». Рʹаст ә әм нькарьн ӧса бькьн, ԝәки әԝана бь тʹәмами тʹәнебуне тʹәхмин нәкьн, ле әм дькарьн аликʹарийе у дьлбинийе бьдьнә ԝан (1 Йуһʹн. 3:18). Габи гьли дькә: «Әз жь Йаһоԝа гәләк рʹази мә бона рʹуспийед дәлал, йед кӧ ԝәʹде дәрд-кӧле мьн кʹеләка мьн бун. Бь сайа ԝан мьн тʹәхмин дькьр кӧ Йаһоԝа ча мьн һʹьз дькә у бәр дьле мьнда те».

20. Чьрʹа созед Йаһоԝа бәрдьлийа мәзьн дьдьнә мә?

²⁰ Чьԛас дьле мә гәрм дьбә кӧ әм заньн, ԝәки Йаһоԝа Хԝәдейе һʹәму бәрдьлийе ԝе һʹәму кӧл-дәрда кʹӧта кә у «һʹәмуйед тʹьрбада ԝе дәнге . . . [Мәсиһ] бьбьһен . . . рʹабьн» (Йуһʹн. 5:28, 29). Хԝәде соз дьдә кӧ ԝе мьрьне кʹӧта кә у жь һʹәму мәрьва «һесьред чʹәʹва паԛьж бькә» (Иша. 25:8). У паше әме нә кӧ «тʹәви йед дьгьрин бьгьрин», ле «тʹәви йед ша дьбьн ша бьн» (Рʹом. 12:15).