1, 2. Ang’o momiyo dwarore ni wanon kaka wanyalo hoyo joma wedegi otho? (Ne picha man malo.)

NYAMINWA moro miluongo ni Susi wacho kama: “Bang’ tho wuodwa ne wawinjo malit ahinya kuom higa achiel kama.” Owadwa moro wacho ni nobedo gi “rem mang’eny ahinya” ka ne chiege otho. Gima lit en ni ji mang’eny bende nigi chandruok ma kamano. Jokristo mang’eny ne ok par ni wedegi nyalo tho ka Har–Magedon pok ochopo. Kata bed ni in e ma watni otho kata ing’eyo ng’at ma watne otho, gima wanyalo penjore en ni, ‘Ere kaka wanyalo konyo ng’at ma olalo watne e tho mondo onyagre gi lit ma kamano?’

² Nyalo bedo ni isewinjo ka ji wachoga ni kaka ndalo medo kalo e kaka lit ma ng’ato nigo medo rumo. Kata kamano, be lit ma kamano biro mana rumo kende nikech koro ndalo osekadho mang’eny? Nyaminwa moro ma jaode notho nowacho niya, “Asefwenyo ni gima ng’ato timo kaka kinde medo kalo e ma biro konye mondo lit ma en-go odog chien.” Mana kaka adhola chango mos mos ka othiedhe maber, mano e kaka lit ma ng’ato nigo e chunye nyalo rumo mos mos ka okonye e yo  mang’won. En ang’o ma nyalo konyo joma wedegi otho mondo lit ma gin-go odog chien?

3, 4. Ang’o momiyo wanyalo bedo gadier ni Jehova ong’eyo gimomiyo ber hoyo ng’at ma watne otho?

³ Onge kiawa ni Jehova Wuonwa manie polo e Nyasach hoch duto. (Som 2 Jo-Korintho 1:3, 4.) Nikech Jehova kecho joge ahinya mano e momiyo nonyisogi niya: “An awuon ema ahoyou.”​—Isa. 51:12, The Bible in Luo, 1976; Zab. 119:50, 52, 76.

⁴ Jehova Wuonwa ma jang’wono bende nowinjo malit ka ne osiepene mogeno ahinya otho. Moko kuomgi ne gin Ibrahim, Isaka, Jakobo, Musa, kod Ruoth Daudi. (Kwan 12:6-8; Mat. 22:31, 32; Tich 13:22) Wach Nyasaye nyisowa ni Jehova gombo ahinya kinde ma obiro chierogie mondo gibed ma ngima kendo. (Ayub 14:14, 15) Jogo biro bedo ma mor kendo ngimagi biro bedo maber. Par bende ni wuod Nyasaye mohero ahinya kendo ‘ma nomorgo pile’ notho malit. (Nge. 8:22, 30) Lit ma Jehova nowinjo ok nyal wach wachre.​—Joh. 5:20; 10:17.

5, 6. Ere kaka Jehova hoyowa?

⁵ Wanyalo bedo gadier ni Jehova biro hoyowa. Kuom mano, onego wanyis Jehova lit duto manie chunywa sama walemo. Wamor ahinya ni Jehova ong’eyo lit ma wabedogago kendo oikore hoyowa sama wan gi kuyo! To ere kaka Jehova hoyowa?

⁶ Yo achiel ma Nyasaye konyowago en kokalo kuom “hoch mar roho maler.” (Tich 9:31) Roho maler mar Nyasaye nyalo hoyowa. Yesu nosingo ni Wuon-gi manie polo oikore ‘chiwo roho maler ne joma kwaye.’ (Luka 11:13) Susi, ma ne osewuo kuome motelo wacho niya: “Kinde mang’eny ne walemoga ka wasayo Jehova mondo ohowa. Kinde duto kuwe mar Nyasaye norito chunywa kod pachwa gadier.”​—Som Jo-Filipi 4:6, 7.

7, 8. Ang’o ma nyalo miyo wabed gadier ni Yesu nyalo hoyowa?

⁷ Gik ma Yesu nowacho kendo timo ka ne en e piny nonyiso maler ni Jehova en Nyasaye ma kecho ji. (Joh. 5:19) Jehova ne ooro Yesu e piny mondo obi oho “jogo maneno masira e chunygi” kod “jogo duto mayuagore.” (Isa. 61:1, 2; Luka 4:17-21) Yesu ne kecho ji ahinya kendo nong’eyo chandruok ma ji ne nigo, to mano e momiyo notimo duto monyalo mondo otieknegi chandruogego.​—Hib. 2:17.

⁸ Ka ne Yesu pod tin, wedene kaachiel gi joma ne ong’eyo notho. Nyalo bedo ni Josef, ma en wuon-gi ma ne opidhe, ne otho ka pod en rawera. * Bedo ni Yesu ne en ng’at ma kecho ji, pod ne onyagore gi kuyo ma mare owuon, mar min-gi, kaachiel gi mar owetene kod nyiminene.

9. Yesu nonyiso nade ni nowinjo malit ahinya ka ne Lazaro otho?

⁹ Ka ne Yesu ochako tij lendo nonyiso maler ni nong’eyo chandruoge ma ji ne nigo to mano e momiyo ne odewogi ahinya. Kuom ranyisi, par ane kinde ma  osiepne ma Lazaro notho. Kata obedo ni Yesu nong’eyo maler ni odhi chiero Lazaro, pod ne owinjo malit bang’ neno kaka Maria gi Maritha ne ywak. Wachno ne litne ahinya mi noywak.​—Joh. 11:33-36.

10. Ang’o momiyo wan gadier ni Yesu pod nyalo hoyowa kata mana e kindegi?

¹⁰ Yo ma Yesu ne kechogo ji kendo hoyogigo nyalo konyowa nade e kindegi? Ndiko nyisowa ni “Yesu Kristo siko kaka en, nyoro kod kawuono, kendo nyaka chieng’.” (Hib. 13:8) Nikech Yesu ma en “Jatelo Maduong’ moseket mondo ochiw ngima” ong’eyo lit ma ng’ato bedogo sama watne otho, “en gi nyalo mar konyo joma kalo e tem.” (Tich 3:15; Hib. 2:10, 18) Kuom mano, wan gadier ni Kristo pod winjo malit sama oneno ka ji chandore, ong’eyo kuyo ma gin-go, kendo oikore hoyogi “e kinde mowinjore.”—Som Jo-Hibrania 4:15, 16.

11. Gin ndiko mage ma hoyiga ahinya?

¹¹ Weche ma nyiso kaka Yesu nowinjo malit ka ne Lazaro otho, gin moko kuom weche mathoth ma hoyowa ma yudore e Muma. Mano e momiyo Muma wacho ni “weche duto ma ne ondik chon, ne ondikgi mondo gipuonjwa, mondo kokalo kuom nano ma wanyiso, kendo kokalo kuom hoch moa e Ndiko, wabed gi geno.” (Rumi 15:4) Ka dipo ni ng’at ma igeno otho, kare ndiko maluwogi nyalo hoyi:

• ‘Jehova chiegni gi jo ma chunygi onyosore chuth, kendo oreso jogo ma chunygi lokore kuom richogi.’​—Zab. 34:18, 19.

• “Ka an gi parruok, kendo kihondko omaka, to ikueyo chunya, kendo imiya bedo mamor.”​—Zab 94:19, Luo, 1976.

• “Ruodhwa Yesu Kristo owuon kod Nyasaye Wuonwa ma noherowa kendo nochiwonwa hoch ma nyaka chieng’ kod geno ma jaber kokalo kuom ng’wono mogundho, mondo oho chunyu kendo otegu.”​—2 The. 2:16, 17. *

12. Yo achiel ma wanyalo hoyogo jomamoko en mane?

¹² Kama chielo ma joma wedegi kod osiepegi otho nyalo yudoe hoch en kanyakla mar Jokristo. (Som 1 Jo-Thesalonika 5:11.) Inyalo timo ang’o mondo ijiw kendo iho joma ‘chunygi onyosore’? (Nge. 17:22) Ng’e ni nitie “chieng’ ling’, kendo chieng’ wuoyo.” (Ekl. 3:7) Nyaminwa moro miluongo ni Dalene ma chwore notho wacho niya: “Joma osiepegi kata wedegi otho, onego owach kaka giwinjo e chunygi. Kuom mano, gima ber ma inyalo timo ne ng’at ma kamano en chikone iti ma ok ing’ade sama owuoyo.” Junia, ma owadgi ne odere wacho kama: “Kata obedo ni ok inyal winjo lit e okang’ ma giwinjee, gima duong’ en ni idwaro ng’eyo kaka giwinjo.”

13. En ang’o monego wapar e wi joma okuyo?

¹³ Gima onego wapar en ni ji winjo lit e okang’ mopogore opogore kendo ginyiso litno e yore mopogore. Nitie kinde ma ng’ato owuon e ma ong’eyo lit mowinjo e chunye kendo nyalo bedo matek nyiso ng’at machielo gik moko duto mowinjo e chunye. Wach Nyasaye wacho kama: “Chuny ng’ato e mong’eyo wach malitne; kendo ng’a mawendo ok odeu morne.” (Nge. 14:10) Kata sama ng’ato  wacho kaka owinjo, ok yot mondo jomoko owinj gima otemo wacho gadier.

14. Ere kama wanyalo yudee weche ma wahoyogo joma okuyo?

¹⁴ Omiyo, nenore maler ni nyalo bedo matek ng’eyo gima wanyalo wacho ne joma okuyo nikech wedegi otho. Kata kamano, Muma wacho ni ‘weche mag jo mariek kelo ngima.’ (Nge. 12:18) Ji mang’eny oseyudo weche ma beyo ma ginyalo hoyogo jomamoko e brosua mar Ka Ng’at Mihero Otho. * Kata kamano, gima berie moloyo minyalo timo en ‘ywak gi jo ma ywak.’ (Rumi 12:15) Nyaminwa miluongo ni Gaby ma chwore notho wacho kama: “Ywak e ma osebedo ka konya. Mano e momiyo sama osiepega ywak koda awinjo ka chunya okuwe. Kinde kaka mago, anenoga ni kare nitie joma dewa.”

15. Kapo ni wuoyo gi ng’at ma okuyo teknwa, ang’o ma wanyalo timo? (Ne bende sanduku ma wacho ni “ Weche ma Beyo ma Hoyo Chuny.”)

¹⁵ Ka hoyo ng’ato sama in kode tekni, inyalo kowone kad ma indikee weche ma nyalo jiwe, inyalo ndikone e-mail, sms, kata barua. Bende, inyalo ketone ndiko moro ma nigi weche ma hoyo chuny, kata inyalo nyise kido moro maber ma ng’at mothono ne nigo, kata gimoro maber ma notimo. Junia wacho niya: “Sama ng’ato oorona ote moro machuok kata sama Jakristo wadwa ogwela mondo wadhi wago mbaka kanyachiel, mano jiwa matek. Gik ma kamago miyo aneno ni gihera kendo gidewa.”

16. En yo mane maber ahinya mar chiwo hoch?

¹⁶ Par bende ni lemo ne owete gi nyimine mokuyo en gima nyalo konyogi.  Wanyalo lemo ka wan kodgi kata wanyalo lemonegi ka wan kendwa. En adier ni wacho weche manie chunyi sama ilemo ka in gi ng’at ma kamano nyalo bedo matek. Kata kamano, lemonegi kowuok e chunyi kata obedo ni pi wang’i nyalo chuer to dwondi be nyalo tetni nyalo konyogi mondo lit ma giwinjo odog chien. Dalene wacho niya: “Sama nyimine obiro jiwa, akwayogiga mondo gilemna. Sama gichako lemo ok giwuo moriere, en mana ni kaka gimedo wuoyo e kaka weche ma giwacho bende bedo mabeyo kendo lamogino jiwo chunya ahinya. Yie motegno ma gin-go, hera ma giherago, kod kaka gidewa osebedo ka miya teko.”

17-19. Ang’o momiyo hoyo joma wedegi otho en gima dwarore kinde duto?

¹⁷ Yo ma ji kuyogo nyalo pogore nikech ji bende ok chal. Omiyo, bed machiegni gi ng’at mokuyono ahinya ahinya e kinde ma wede kod osiepe mang’eny osedok e tijegi mapile, to ok mana e kinde ma wede kod osiepe pod ni kode. “Osiep ng’ato ohere ndalo duto; kendo omin ng’ato nonyuole mondo okonye chieng’ chandruok.” (Nge. 17:17) Onego wadhi nyime hoyo Jokristo wetewa kata obedo ni timo kamano biro kawo kinde malach maromo nade.​—Som 1 Jo-Thesalonika 3:7.

¹⁸ Onego wapar ni ng’at ma chwore kata chiege otho nyalo bedo gi kuyo ma kinde ka kinde sama oparo odiechieng’ ma ne gikendoree, thumbe moko ma ne gihero, pichni ma ne gigoyo, gik ma ne gitimoga kanyachiel, suya moro mamit, kata duol moro. Gik mang’eny ma ng’at ma chwore kata chiege otho chako timo kende ka jaode osetho nyalo kelone kuyo ahinya. Gigo nyalo bedo dhi e chokruok mar alwora kata Rapar ka en kende. Owadwa moro ma jaode notho nowacho niya: “Ne ang’eyo ni chieng’ ma ne onego waparie tarik ma ne wakendoree ne ok dhi bedo mayot. Kata kamano, owete gi nyimine moko manok nolima e odiechiengno mondo kik abed kenda ahinya.”

¹⁹ Onego wapar bende ni joma wedegi kata osiepegi otho onego ojiw kinde duto to ok mana e odiechienge moko makende. Junia wacho kama: “Kony ma owete miyowa kod limbe ma gi limowago en gima ber ahinya. Ok ochuno ni gitim kamano mana e kinde moko makende. Kony kod limbe ma kinde ka kinde kaka mago konyowa kendo hoyowa ahinya.” En adier ni ok wanyal tieko chuth kuyo ma joma wedegi otho nigo kata ok wanyal pong’o bugo ma ng’at ma othono oweyo, kata kamano, gik ma watimo mondo wakonygi nyalo hoyo chunygi. (1 Joh. 3:18) Gaby wacho kama: “Agoyo ne Jehova erokamano maduong’ nikech jodongo nokonya ahinya e kinde matekno. Yo ma ne gikonyago nomiyo aneno kaka Jehova ohera.”

20. Ang’o momiyo gik ma Jehova osingonwa hoyowa?

²⁰ To mano kaka wamor ng’eyo ni Jehova ma Nyasach hoch duto, biro golo kuyo kendo obiro miyowa hoch mosiko e kinde ma “ji duto manie liete nowinj [dwond Kristo] mi giniwuog oko”! (Joh. 5:28, 29) Nyasaye singo ni obiro golo ‘tho nyaka chieng’, kendo Ruoth Nyasaye noyue pi wang’ kuom wenge duto.’ (Isa. 25:8) Kae to e kindeno, kar ‘ywak kanyachiel gi joma ywak,’ ji duto ma biro dak e piny biro bedo ma ‘mor kanyachiel gi joma mor.’​—Rumi 12:15.