1, 2. Bõe yĩng tɩ d na n gom sũ-sãang rãmbã sẽn tõe n paam belsg to-to wã yelle? (Ges-y fotã sẽn be yĩngrã.)

PAG yʋʋr sẽn boond t’a Suzi yeelame: “Tõnd bi-riblã kũum poore, maana yʋʋmd la bal tɩ toogã la sũ-sãangã ket n namsd tõnd wʋsgo.” Saam-biig a ye me yeelame t’a pa tõe n bãng n bilg a pagã kaalem sẽn sãam a sũur to-to wã ye. Neb wʋsg yãa toog a woto buudu. D tẽed-n-taas wʋsg neb n maan kaalem, tɩ b yaool n da saagdẽ tɩ b na n naaga taab n põs Armagedõ zabrã sasa, n kẽ dũni-paalgã pʋgẽ. Tõe tɩ yãmb mengã ned n maan kaalem, wall yaa y miting n be sũ-sãang pʋga, tɩ y sokd y meng yaa: ‘Ned sẽn be sũ-sãang a woto pʋgẽ maanda wãn n paam belsgo?’

² Kẽer nong n yetame tɩ baa f sũ-sãang sẽn yaa to-to fãa, tarẽ-n-tarẽ, wat n saame. La rẽ yĩnga sã n kaoos bala, sũ-sãangã sata a toor bɩ? Ad pʋg-kõor a ye sẽn yeele: “Yaa f sẽn maand bũmb ninsã n na n sõng tɩ tarẽ-n-tarẽ bɩ f sũ-sãangã wa booge. Woto la b segd n yeele.” Ned sã n pogle, nodrã wat n maagame, la yaa a sã n paam tɩpg sõma. Woto me, sũ-sãang buud fãa wat n saame, la yaa a soab sã n paam  sõngre. La bõe n tõe n bels sẽn be-b sũ-sãang pʋgẽ wã?

3, 4. Bõe yĩng tɩ d tõe n kɩs sɩd t’a Zeova mii ned kaalem sẽn sãamd sũur to-to wã?

³ Yaa d saasẽ Ba a Zeova sẽn kʋmd d nimbãanegã nengẽ la d paamd belsg n tɩ yɩɩda. (Karm-y 2 Korẽnt-rãmb 1:3, 4.) A nimbãan-zoeerã ka to ye. A yeta tõnd ned kam fãa yaa: “Yaa maam bala, maam m yembr bal n belsd foom.”—Eza. 51:12; Yɩɩn. 119:50, 52, 76.

⁴ Tõnd Ba wã sẽn yaa nimbãan-zoɛtã mii ned kaalem sẽn sãamd sũur to-to wã, bala neb yẽ mengã sẽn nong maana kaalem. Wala makre, a Abrahaam, a Izaake, a Zakoobe, a Moyiiz la rĩm a Davɩɩd. (Sõd. 12:6-8; Mat. 22:31, 32; Tʋʋ. 13:22) Biiblã wilgda vẽeneg t’a Zeova ratame tɩ wakat ning a sẽn yãk n na n vʋʋg-bã ta tao-tao, t’a paam n vʋʋg-ba. (Zoob 14:13, 15) B vʋʋgrã poore, b na n tara sũ-noog la keelem. A Zeezi kũumã me sãama a Zeova sũur wʋsgo. Biiblã yeelame t’a sẽn wa n be saasẽ wã, a ra kõta a Ba wã “sũ-noog daar fãa.” (Yel. 8:22, 30) D pa tõe n bãng n bilg a Zeezi kũumã sẽn yɩ kũ-toaagã sẽn sãam a Zeova sũur to-to ye.—Zã 5:20; 10:17.

5, 6. Bõe la a Zeova maand n belsd tõndo?

⁵ D ned sã n maan kaalem, d tõe n kɩsa sɩd zãng-zãng t’a Zeova na n maana bũmb n sõng-do. Rẽ n so tɩ d segd pʋʋs-a wakat fãa, n pelg d pʋg n togs-a sũ-sãangã sẽn namsd tõnd to-to wã. D sẽn mi t’a Zeova mii d sũ-sãangã sẽn ta zĩig ningã, la t’a na n maana bũmb n bels-dã, kengda d raoodo. La a maanda wãn n belsd tõndo?

⁶ Bũmb a ye a Zeova sẽn maand n belsd tõnd yaa a sẽn tũnugd ne a vʋʋsem sõngã n sõngd tõndã. (Tʋʋ. 9:31) A Zeezi yeelame tɩ ned ning fãa sẽn na n kos d saasẽ Ba wã a vʋʋsem sõngã, a na n kõ-a lame. (Luk 11:13) A Suzi yeelame: “Naoor ka tɛka, tõnd kong n yĩgimdame n pʋʋs a Zeova, n yõk a sɛɛg t’a sõng-do, n sigs d sũyã. La wakat fãa, Wẽnnaam laafɩ wã sɩd gũu tõnd sũyã la d tagsa wã.”—Karm-y Filip-rãmb 4:6, 7.

7, 8. Bõe yĩng tɩ d tõe n kɩs sɩd t’a Zeezi kʋmda d nimbãanega, la t’a na n bels-d lame?

⁷ A Zeezi sẽn wa n be tẽngã zugã, a rɩka a Ba wã togs-n-taar a no-goamã la a tʋʋm-tʋmdɩ wã fãa pʋgẽ, n da kʋmd nebã nimbãanega. (Zã 5:19) A Zeova sẽn tʋm a Zeezi wã yaa sẽn na yɩl t’a wa “bels sũ-sãang rãmbã.” (Eza. 61:1, 2; Luk 4:17-21) A Zeezi sɩd ra kʋmda nebã nimbãanega. A ra mii b zu-loeesã sẽn namsd-b to-to wã, n da rat ne a sũur fãa n sõng-b tɩ b paam yolsgo.—Ebre. 2:17.

⁸ A Zeezi ra tog n mii ned kũum sẽn zabd to-to wã. A sẽn wa n yaa bilfã, tõe tɩ b zakã ned wall b mitins n maan kaalem. Wõnda a ba-wubdg a Zozɛf maana kaalem t’a Zeezi ket n yaa bi-bɩɩga. * Tõe t’a ra zemsa yʋʋm 20 bɩ pa ta rẽ meng ye. Yẽ mengã ra segd n tõoga toogo, la a sõng a ma wã ne a yaopã tɩ b tõog toogo. Mams-y n ges-y sẽn yɩ toog to-to ne a Zeezi sẽn yaa nimbãan-zoetã!

9. A Lazaar sẽn wa n maan kaalmã, bõe la a Zeezi maan tɩ wilg t’a kʋmda nebã?

⁹ A Zeezi sẽn wa n sɩng koɛɛgã moonegã t’a ra zoe n mii yɛl wʋsg sẽn  namsd nebã, la a sẽn tõe n wilg to-to t’a kʋmd-b lame. D tẽeg a manesem sẽn yɩ to-to a zoa a Lazaar sẽn wa n maan kaalmã. Baa a sẽn da mi t’a na n vʋʋga a Lazaarã, a sẽn yã a Maari ne a Mart sũ-sãangã, reeg n namsa yẽ mengã. B nimbãaneg yõk-a lame, hal t’a yãbe.—Zã 11:33-36.

10. Bõe yĩng tɩ d tõe n kɩs sɩd tɩ baa rũndã-rũndã a Zeezi kʋmda d nimbãanega?

¹⁰ Wãn to la a Zeezi sẽn gom goam nins n keng nebã raood la a bels-bã nafd tõnd rũndã-rũndã? Biiblã wilga vẽeneg t’a pa toeem ye. Ad b sẽn yeele: “A Zeezi Kirist yaa yembr zaamẽ la rũndã la wakat sẽn kõn sa.” (Ebre. 13:8) Biiblã pʋgẽ, b boonda a Zeezi tɩ “vɩɩm-naabã,” bala yaa a sẽn sak n ki wã n kɩt tɩ d tõe n wa paam n vɩɩmd wakat sẽn kõn sa. Sẽn mik me t’a mii ned kũum sẽn zabd to-to wã, a “tõe n sõnga neb nins sẽn paamd makrã.” (Tʋʋ. 3:15; Ebre. 2:10, 18) Rẽnd d tõe n kɩsa sɩd t’a Zeezi sã n ne d sẽn be sũ-sãang pʋgẽ, sãamda a sũuri. A mii yellã sẽn namsd tõnd to-to wã, la a tõe n sõngame tɩ d paam belsg “wakat ning d sẽn tog n paame.”—Karm-y Ebre-rãmb 4:15, 16.

11. Biiblã vɛrse-bʋs n belsd yãmb n tɩ yɩɩda?

¹¹ A Lazaar kũumã kibar sɩd wilgdame t’a Zeezi ra kʋmda nebã. La Biiblã tara kibay wʋsg sẽn belsd sũ-sãang rãmbã. Rẽ pa bũmb sẽn lingd tõnd ye. Bala, Biiblã meng yetame tɩ “bũmb nins b sẽn pĩnd n gʋlsã gʋlsa tõnd zãmsg yĩnga, tɩ tõnd tõe n paam saag-sõngo, sũ-mare la belsg ning Wẽnnaam gʋls-sõamyã sẽn kõtã yĩnga.” (Rom. 15:4) Y sã n wa be sũ-sãang pʋgẽ, bɩ y bas y yam tɩ y tõe n paama belsg Biiblã pʋgẽ. Ad vɛrse-rãmb kẽer sẽn belsd neda:

• “Sẽn-Ka-Saab pẽe sũ-sãang rãmbã, la b fãagda sũ-pa-noaang rãmbã.”—Yɩɩn. 34:19, 20.

• “Yɛl wʋsg sã n wa n be m pʋgẽ n namsd-ma, yãmb sẽn belsd maamã kõt-m-la sũ-noogo.”—Yɩɩn. 94:19.

• “Bɩ tõnd Zu-soab a Zeezi Kiris mengã, la tõnd ba a Wẽnnaam sẽn nong tõndo, n bels tõnd ne belsg sẽn kõn sa, bãmb nimbãan-zoeerã yĩnga, la b kõ tõnd saag-sõngã bels yãmb sũyã, la b kɩt tɩ y pɛlg yɩ kãenkãe.”—2 Tes. 2:16, 17. *

12. Bõe la d tõe n maan n keng “sũ-sãang” rãmbã raood la d bels-ba?

¹² Sũ-sãang rãmbã tõe n paama belsg tigingã pʋgẽ. (Karm-y 1 Tesalonik-rãmbã 5:11.) Bõe la d tõe n maan n keng “sũ-sãang” rãmbã raood la d bels-ba? (Yel. 17:22) D ra yĩm tɩ “sĩndim wakat beeme, la goam wakat me beeme” ye. (Koɛ. 3:7) A Delinn yaa pʋg-kõore. A yeelame: “Sũ-sãang rãmbã raab yaa b togs yellã sẽn namsd-b to-to, la sẽn be b sũurẽ wã. Rẽ wã, y sẽn tõe n maan tɩ sõng sũ-sãang soab n tɩ yɩɩda, yaa y maag y yĩng n kelg-a, n da kʋʋg a goamã ye.” A Yuniya ma-biig n yãk a mengã yõore. A Yuniya yeelame: “Tõe tɩ d pa wʋmd sẽn be-b sũ-sãang pʋgẽ wã toogã zãng ye. La sẽn tar yõod n yɩɩdã yaa d manesmã sẽn na n wilgdẽ tɩ d rat n bãnga yellã sẽn namsd-b to-to wã.”

13. Nebã sẽn wilgd b sũ-sãang to-to wã wɛɛngẽ, bõe la d pa segd n yĩmi?

¹³ D tẽeg me tɩ nebã sẽn wilgd b sũ-sãang to-to wã pa yembr ye. Wakat ninga, nina pʋd n pa tõe n bilg  a sũ-sãangã bɩ a toogã ye. Wẽnnaam Gomdã yeelame: “Sũ-toog sã n tar neda, yẽnda a yembr bal n mi. A sũur sã n noomẽ me, a ka tõe n yãk n kõ ned a to ye.” (Yel. 14:10) Baa a sã n mak n na n bilg me, pa wakat fãa la yaa nana ne neb a taabã tɩ b wʋm a sẽn yetã võor ye.

14. Bõe la d tõe n maan n paam goam sẽn na n bels sẽn be-b sũ-sãang pʋgẽ wã?

¹⁴ Sũ-sãangã wilgr sẽn pa yembrã kɩtame tɩ wakat ninga, d pa mi d sẽn na n yeel n bels sũ-sãang soab ye. La Biiblã yeelame tɩ “yam soab goam wata ne maagre.” (Yel. 12:18) Neb wʋsg karma Kũum sã n dɩk ned y sẽn nonge * sebrã, n yã goam b sẽn tõe n yeel n keng sũ-sãang rãmbã raood la b bels-ba. La naoor wʋsgo, wa Biiblã sẽn sagendã, d sã n ‘yãb ne neb nins sẽn yãbdã,’ rẽ sõngd-b lame n yɩɩda. (Rom. 12:15) A Gabi sɩdã maana kaalem. A yeelame tɩ wakat ninga, yaa ne yãbrã bal la a tõe n wilg a sũ-sãangã. A paasame: “Rẽ n so tɩ m sã n wa yãbd tɩ m zo-rãmb naag-m n yãbe, belsd-m-la bilfu. Kɩtdame tɩ m neẽ tɩ toogã yaa bãmb me toogo.”

15. Y sã n getẽ tɩ yaa toog tɩ y tɩ bãng n gom n bels neda, bõe la y tõe n maane? (Ges-y zĩ-gũbr ning gom zug sẽn yaa: “Goam sẽn boogd sũ-sãanga.”)

¹⁵ Y sã n getẽ tɩ yaa toog tɩ y tɩ bãng n gom n bels ned sẽn be sũ-sãang pʋgẽ, y tõe n baoo kart n gʋls n tool-a wall y gʋls mesaaz pa rẽ bɩ lɛtr n tool a soabã. Y tõe n baoo Biiblã gomd sẽn belsde, wall y tẽeg kiidã zʋg-sõng ninga, pa rẽ bɩ bũmb a sẽn da maan tɩ yɩ-y noogo, n gʋls n toole. Ad a Yuniya sẽn yeele: “M tẽed-n-taag sã n da tool-m mesaaz sẽn kengd raoodo, wall a bool-m tɩ d na n sõs la d maan bũmb  a taaba, belsda maam sõma, hal tɩ m pa tõe n bãng n bilg ye. Kɩtdame tɩ m miẽ tɩ b nong-m lame, la tɩ m yell pak-b lame.”

16. Bõe me la y tõe n maan n bels sũ-sãang rãmbã?

¹⁶ D ra yĩm me tɩ ned sã n be sũ-sãang pʋgẽ tɩ d pʋʋs a yĩng wall d naag-a n pʋʋse, sõngda wʋsg ye. Yaa sɩd tɩ sũ-sãangã tõe n kɩtame tɩ goamã yaa toogo, wall kɩt tɩ y gomd la y yãbda. La y goamã na n talla pãng la bels sũ-sãangã soab wʋsgo, bala yaa goam sẽn yit y sũurẽ. A Delinn yeelame: “Saam-bi-pogsã sã n da wa n na n bels-ma, m mi n kosame tɩ d naag taab n pʋʋse. Naoor wʋsgo, sẽn na n pʋʋs-a wã sã n sɩnge, goamã pa wat nana ye. La pa yãt n kaoos la a koɛɛgã pãng paase, t’a goamã kẽed sũur ye. B tẽebã la b nonglmã, n paas b sẽn da wilgd tɩ m yellã pak-b lame wã kenga m tẽebã wʋsgo.”

17-19. Bõe yĩng tɩ d segd n ket n belsd sũ-sãang rãmbã?

¹⁷ Ned fãa sũ-sãang sẽn kaoosd to-to wã pa yembr ye. Ned sã n maan kaalem, zo-rãmbã la mitinsã wata wʋsgo, n na n bels a nebã. La rasem a wãn poore, b wɩlgdame n bas-ba, tɩ b yaool n ket n dat belsgo. Yɩta sõma tɩ sã n tõe bɩ y sõng-b wakat kãnga. Biiblã yetame tɩ ned zoa hakɩɩk nong-a-la “wakat fãa.” (Yel. 17:17) Baa kaoosda, segdame tɩ d bels d tẽed-n-taas nins sẽn be sũ-sãang pʋgẽ wã, hal tɩ b sũyã wa sigi.—Karm-y 1 Tesalonik-rãmbã 3:7.

¹⁸ D ra yĩm me tɩ bũmb kẽer tõe n tẽega nina a ned kaalem, t’a sũur le sãame. Wala makre, daar ning a nedã sẽn maan kalmã sã n wa kolgdẽ, b kãadmã tẽegr daare, reem kẽere, foto-rãmba, bũmb kẽer b sẽn da naag taab n maane, bʋrgo, la bũmb ning yũugu. Ned pag wall a sɩd kaalem poore, pipi tigis-kãseng a sẽn na n kẽng tõe n yɩɩ toog wʋsg ne-a, a sẽn lebg a yembrã yĩnga. A Zeezi kũumã tẽegr la bũmb a taab me b sẽn da naagd taab n maandẽ wã tõe n yɩɩ toogo. Ad saam-biig a ye sẽn yeele: “M pagã kaalmã poore, m da miime tɩ d kãadmã tẽegr ning sẽn na n pʋglã na n yɩɩ toog wʋsgo. Sɩd me, pa yɩ nana ye. La sẽn na yɩl tɩ m da yɩ m yembre, m tẽed-n-taas a wãn n yã taaba, n bool m zo-rãmb kẽer tɩ d naag taab n sõs baraarã.”

¹⁹ Yɩta sõma tɩ d tẽeg me tɩ pa wakat kẽer bal la sẽn be-b sũ-sãang pʋgẽ wã rat raood kengr ye. A Yuniya yeelame: “Naoor wʋsgo, f sã n paam tɩ nina maan bũmb n kõ-fo, wall f paam tɩ f zoa wa be ne-fo, baa yaa sasa sẽn pa seg ne yell sẽn tẽegd f nedã kaalmã, sõngda wʋsgo. Sõngr a woto buud kengda ned sõma, la belsd-a hal wʋsgo.” Yaa sɩd tɩ ned sã n be sũ-sãang pʋgẽ, tõnd pa tõe t’a nedã kaalem ra nams-a, d pa tõe me t’a sũ-sãangã sa fasɩ ye. La d tõe n maana bũmb kẽer n bels-a. (1 Zã 3:18) A Gabi yeelame: “M pʋʋsda a Zeova bark wʋsgo, kãsem-dãmbã sẽn sõng-m ne nonglem m sũ-sãangã wakate, n teel-m zu-loɛɛg buud fãa pʋgẽ wã. Kɩtame tɩ m yamẽ, ra yaa wa a Zeova meng n mobg-m ne a nusi.”

20. Bõe yĩng tɩ bũmb nins a Zeova sẽn pʋlem t’a na n maaname wã belsd tõnd hal wʋsgo?

²⁰ D sẽn mi tɩ wakat n wat tɩ Wẽnnaam a Zeova sẽn belsd nebã wakat fãa wã na n vʋʋg sẽn ki-bã, tɩ sũ-sãamsã sa fasɩ wã kengda d pɛlga. (Zã 5:28, 29) Wẽnnaam pʋlmame t’a “na n sãama kũum pãng wakat sẽn ka sɛt yĩnga.” A paasame t’a “na n yẽesa nemsã fãa nintãmã.” (Eza. 25:8) Wakat kãnga, d pa na n le ‘yãb ne neb sẽn yãbd’ ye. Tẽngã nebã fãa na n ‘maana sũ-noog ne neb sẽn maand sũ-noogo.’—Rom. 12:15.