1, 2. Зианджын адӕймагӕн нӕ бон баххуыс кӕнын куыд у, ууыл цӕмӕн хъӕуы аныхас кӕнын? (Кӕс нывмӕ статьяйы райдианы.)

«НӔ ЛӔППУ куы амард, уый фӕстӕ афӕдзы бӕрц нӕ зӕрдӕты хъӕдгом дудгӕ рыст кодта ӕмӕ ӕппындӕр не ’гас кодта»,– загъта Сьюси. Иу ӕфсымӕр куыд зӕгъы, афтӕмӕй, йӕ бинойнаг ӕнӕнхъӕлӕджы куы амард, уӕд суанг йӕ буар дӕр ахӕм рыст кодта, ӕмӕ йын зӕгъӕн дӕр нӕй. Хъыгагӕн, ахӕм зӕрдӕрыст бирӕтӕ бавзӕрстой. Нӕ хотӕй ӕмӕ не ’фсымӕртӕй дӕр бирӕтӕ уый ӕнхъӕл нӕ уыдысты, ӕмӕ сӕ хиуӕттӕй исчи Армагеддоны размӕ амӕлдзӕн. Чи зоны, дӕуӕн дӕр исчи амард кӕнӕ дӕ зонгӕтӕй искӕуыл зиан ӕрцыд. Ӕмӕ, ӕвӕццӕгӕн, хъуыды кӕныс: «Зианджын адӕймагӕн цы баххуыс кӕндзӕн, цӕмӕй ахӕм маст сфӕраза?»

² Рӕстӕг хъӕдгӕмттӕ дзӕбӕхгӕнӕг у, фӕзӕгъынц. Фӕлӕ цымӕ уый ӕрмӕстдӕр рӕстӕгӕй аразгӕ у? Иу идӕдз сылгоймаг загъта: «Мӕнмӕ гӕсгӕ, растдӕр уаид зӕгъын, адӕймаг йӕхӕдӕг цы аразы, уымӕй кӕнгӕ у, рӕстӕг ӕй сдзӕбӕх кӕндзӕн ӕви нӕ». Цӕмӕй буары хъӕдгом байгас уа, уый тыххӕй хъӕуы рӕстӕг, стӕй йӕ хъӕуы истӕмӕй дзӕбӕх кӕнын. Раст афтӕ, цӕмӕй зӕрдӕйы хъӕдгом байгас уа, уый тыххӕй дӕр хъӕуы рӕстӕг,  стӕй уый дӕр хъӕуы «дзӕбӕх» кӕнын. Уӕдӕ, зиан кӕуыл ӕрцыд, уыдонӕн сӕ зӕрдӕйы рыст цӕй фӕрцы фӕсабырдӕр уыдзӕн?

3, 4. Цӕмӕн ис фидарӕй зӕгъӕн, ӕмӕ нын Йегъовӕ нӕ рыст ӕмбары?

³ Дзырд дӕр ыл нӕй, ӕппӕты тынгдӕр нын нӕ зӕрдӕтӕ ӕрсабыр кӕны нӕ тӕригъӕдгӕнаг Фыд Йегъовӕ, уый нын ратты ӕцӕг удӕнцой. (Бакӕс 2 Коринфӕгтӕм 1:3, 4.) Уый хуызӕн адӕймаджы рыст ничи ӕмбары, ӕмӕ йӕ адӕмӕн зӕрдӕ ӕвӕры: «Ӕз, ӕз уын мӕхӕдӕг рӕвдауын уӕ зӕрдӕтӕ» (Ис. 51:12; Пс. 119:50, 52, 76).

⁴ Нӕ тӕригъӕдгӕнаг, фӕлмӕнзӕрдӕ Фыд йӕхӕдӕг дӕр зоны, куыд зын у, зынаргъ дын чи у, уый куы амӕла, уӕд. Зӕгъӕм, нал сты йӕ лӕггадгӕнджытӕ Авраам, Исахъ, Иаков, Моисей ӕмӕ паддзах Давид (Ным. 12:6–8; Матф. 22:31, 32; Хъуыд. 13:22). Библийы фыст ис, Йегъовӕ кӕй бӕллы, уыцы иузӕрдион лӕггадгӕнджыты кӕд райгас кӕндзӕн, уыцы бонмӕ (Иов 14:14, 15). Уыдон зӕххыл дзӕнӕты уыдзысты амондджын ӕмӕ саг-сӕгуытау ӕнӕниз. Уымӕй уӕлдай, Йегъовӕйӕн йӕ зынаргъ Фырт – «йе стыр цин» чи уыд, уый – амард хъизӕмайраг мардӕй (Ӕмб. 8:22, 30). Уый Йегъовӕйӕн куыд зын уыдаид, уый, ӕвӕццӕгӕн, кӕронмӕ ничи бамбардзӕн (Иоан. 5:20; 10:17).

5, 6. Йегъовӕ нын нӕ зӕрдӕтӕ куыд ӕрсабыр кӕны?

⁵ Хъуамӕ ӕппындӕр ма дызӕрдыг кӕнӕм, Йегъовӕ нын кӕй баххуыс кӕндзӕн, ууыл. Ӕмӕ-иу хъуамӕ ма ’фсӕрмы кӕнӕм, нӕ зӕрдӕйы цы маст ӕмӕ рыст ис, уый йын ӕргом кӕнын. Йегъовӕ нӕ кӕй ӕмбары ӕмӕ нын нӕ зӕрдӕтӕ кӕй ӕрсабыр кӕны, уый нын стыр удӕнцой хӕссы! Фӕлӕ уый тыххӕй цы саразы?

⁶ Йегъовӕ нын алыхуызӕтты ӕххуыс кӕны, зӕгъӕм нын ӕххуыс кӕны йӕ сыгъдӕг тыхы фӕрцы (Хъуыд. 9:31). Йесо загъта, нӕ уӕларвон Фыд кӕй ратдзӕн йӕ хъомысджын сыгъдӕг тых, «чи дзы куры, уыдонӕн» (Лук. 11:13). Гыццыл раздӕр кӕй кой кодтам, уыцы Сьюси ма афтӕ загъта: «Бирӕ хӕттыты-иу нӕ уӕрджытыл ӕрлӕууыдыстӕм ӕмӕ-иу Йегъовӕйӕн лӕгъстӕ кодтам, цӕмӕй нын нӕ зӕрдӕтӕ ӕрсабыр кодтаид. Ӕмӕ-иу нын Хуыцауы фарн алы хатт дӕр нӕ зӕрдӕтӕ ӕмӕ нӕ зонд бахъахъхъӕдта». (Бакӕс Филиппӕгтӕм 4:6, 7.)

7, 8. Кӕцӕй йӕ зонӕм, Йесойӕн йӕ бон кӕй у, ӕмӕ нын удӕнцой ратта?

⁷ Йесо зӕххыл куы уыд, уӕд йӕ ныхӕстӕй ӕмӕ йӕ хъуыддӕгтӕй фӕзмыдта Йегъовӕйы ӕмӕ равдыста, йӕ Фыд куыд тӕригъӕдгӕнаг ӕмӕ фӕлмӕнзӕрдӕ у, уый (Иоан. 5:19). Йегъовӕ Йесойы зӕхмӕ уый тыххӕй рарвыста, цӕмӕй «зӕрдӕсаст адӕмӕн» удӕнцой хастаид ӕмӕ-иу, «маст чидӕриддӕр кодта, уыдоны зӕрдӕтӕ» ӕрсабыр кодтаид (Ис. 61:1, 2; Лук. 4:17–21). Адӕм ӕй зыдтой, Йесо сын сӕ хъизӕмӕрттӕ кӕй ӕмбӕрста ӕмӕ йӕ зӕрдиагӕй кӕй фӕндыд, цӕмӕй-иу сын сӕ зын фӕрогдӕр кодтаид (Дзут. 2:17).

⁸ Йесо, ӕвӕццӕгӕн, ӕрыгонӕй базыдта, хионы кӕнӕ ӕмбалы мӕлӕт цы у, уый. Куыд зыны, афтӕмӕй йӕ зӕххон фыд Иосиф амард, Йесо нырма бынтон ӕрыгон куы уыд, уӕд *. Ӕмӕ-ма ахъуыды кӕн, куыд зын уыдаид уыцы тӕригъӕдгӕнаг лӕппуйӕн йӕ маст сфӕразын, стӕй йӕ мад, йе ’фсымӕртӕ ӕмӕ йӕ хотӕ куыд хъыг кӕнынц, уымӕ кӕсын.

9. Лазӕр куы амард, уӕд Йесо куыд равдыста, иннӕты рыст ӕм кӕй хъардта, уый?

⁹ Йесо лӕггад кӕнын куы райдыдта, уӕд равдыста, адӕмы хорз кӕй ӕмбӕрста ӕмӕ йӕм сӕ рыст кӕй хъардта, уый. Йӕ зынаргъ ӕмбал  Лазӕр куы амард, уӕд ыл Марийӕ ӕмӕ Марфӕ тынг маст кодтой. Ӕмӕ сыл Йесойы зӕрдӕ афтӕ тынг фӕрыст, ӕмӕ ма кӕугӕ дӕр скодта, кӕд ӕмӕ йӕ зыдта, Лазӕры кӕй райгас кӕндзӕн, уӕддӕр (Иоан. 11:33–36).

10. Кӕцӕй йӕ зонӕм, Йесомӕ абон дӕр нӕ рыст кӕй хъары?

¹⁰ Йесойы ныхӕстӕ нын абон ныфс ӕмӕ удӕнцойы хос куыд сты? Библи дзуры, Йесо кӕй нӕ фӕивта. Фыст дзы ис: «Йесо Чырысти уыцы иухуызон у – знон дӕр, абон дӕр ӕмӕ ӕнустӕм дӕр» (Дзут. 13:8). Йесо у, «адӕмы цардмӕ чи кӕны, Уый», уымӕн ӕмӕ йӕ фӕрцы нӕ бон у ӕнустӕм цӕрын. Стӕй ма Йесо йӕхӕдӕг дӕр маст бавзӕрста, ӕмӕ «йӕ бон баххуыс кӕнын у, фӕлварӕнты чи ис, уыдонӕн» (Хъуыд. 3:15; Дзут. 2:10, 18). Уымӕ гӕсгӕ хъуамӕ ма дызӕрдыг кӕнӕм, абон дӕр ӕм иннӕты рыст кӕй хъары, йӕ зӕрдӕ сыл кӕй фӕриссы ӕмӕ йӕ бон кӕй у адӕймагӕн «бахъуаджы сахат» удӕнцой раттын. (Бакӕс Дзуттӕгтӕм 4:15, 16.)

11. Дӕуӕн удӕнцойы хос уӕлдайдӕр цавӕр стихтӕ сты?

¹¹ Йесо Лазӕрыл куыд тынг фӕмаст кодта, уый тыххӕй кӕм ис фыст, уыцы стихтӕй уӕлдай ма Хуыцауы Ныхасы ис бирӕ ӕндӕр зӕрдӕфидаргӕнӕн стихтӕ. Ӕмӕ уый диссаг дӕр нӕу, уымӕн ӕмӕ, «раздӕр цыдӕриддӕр фыст ӕрцыд, уый... фыст ӕрцыд махӕн зонд бацамонынӕн, цӕмӕй нӕ нӕ фидардзинады фӕрцы ӕмӕ, Фыстад цы удӕнцой дӕтты, уый фӕрцы уа ныфс» (Ром. 15:4). Кӕд дӕуӕн дӕр исчи фӕзиан, уӕд дын мӕнӕ ацы стихтӕ дӕ зӕрдӕйы рыст фӕсабырдӕр кӕндзысты:

• «Йегъовӕ хӕстӕг у, зӕрдӕсаст чи у, уыдонмӕ, ӕмӕ, ныфссаст чи у, уыдоны ирвӕзын кӕны» (Пс. 34:18, 19).

• «Тыхст хъуыдытӕ мын-иу ӕнцой куы нал лӕвӕрдтой, уӕд мын дӕ зӕрдӕфидаргӕнӕн ныхӕстӕ рӕвдыдтой мӕ уд» (Пс. 94:19).

• «Ӕмӕ уын уадз ӕмӕ нӕ Хицау Йесо Чырысти йӕхӕдӕг ӕмӕ нӕ Фыд Хуыцау, мах чи бауарзта ӕмӕ нын йе стыр хорзӕхы фӕрцы ӕнӕкӕрон удӕнцой ӕмӕ диссаджы ныфс чи радта, уыцы Хуыцау, уӕ зӕрдӕтӕ барӕвдауӕнт ӕмӕ уӕ бафидар кӕнӕнт» (2 Фес. 2:16, 17) *.

12. Нӕ бон цы у аразын, цӕмӕй иннӕтӕн удӕнцой хӕссӕм?

¹² Зиан кӕуыл ӕрцӕуы, уыдон ма удӕнцой ссарынц чырыстон ӕмбырды дӕр. (Бакӕс 1 Фессалоникӕгтӕм 5:11.) Дӕ бон куыд у, ныфссаст чи у, уымӕн йӕ зӕрдӕ бафидар кӕнын ӕмӕ йын удӕнцой раттын? (Ӕмб. 17:22). Дӕ зӕрдыл дар, кӕй ис «рӕстӕг хъусӕй лӕууынӕн ӕмӕ рӕстӕг дзурынӕн» (Еккл. 3:7). Иу идӕдз хо, Далин, зӕгъы: «Зиан кӕуыл ӕрцыд, уыдоны фӕхъӕуы, цӕуылты хъуыды кӕнынц ӕмӕ цы ’нкъарынц, уый искӕмӕн радзурын. Ӕмӕ уымӕ гӕсгӕ ӕппӕты ахсджиагдӕр вӕййы, цӕмӕй зӕрдӕрыст адӕймагмӕ байхъусай, дӕхӕдӕг мацы дзур, афтӕмӕй». Юнийӕн йе ’фсымӕр йӕхи амардта, ӕмӕ Юни афтӕ зӕгъы: «Зиан кӕуыл ӕрцыд, уыдонӕн сӕ зӕрдӕйы рыст, чи зоны, кӕронмӕ ма бамбарай. Фӕлӕ ахсджиаг уый у, ӕмӕ дӕ фӕндгӕ кӕй кӕны, цӕмӕй сӕ бамбарай».

13. Нӕ зӕрдыл цы хъуамӕ дарӕм?

¹³ Хъуамӕ нӕ зӕрдыл дарӕм, зиан кӕуыл ӕрцӕуы, уыдонӕн сӕ зӕрдӕйы рыст иухуызон кӕй нӕ вӕййы, стӕй, сӕ зӕрдӕйы цы ис, уый дӕр иухуызон кӕй нӕ фӕдзурынц. Хатт ӕй адӕймагӕн ӕрмӕстдӕр йӕхи зӕрдӕ фӕзоны, цы дудгӕ рыст кӕны, уый, ӕмӕ йӕ иннӕтӕн бамбарын кӕнын йӕ бон нӕ вӕййы. Хуыцауы Ныхасы фыст ис: «Адӕймаджы зӕрдӕ зоны йӕ уды рыст ӕмӕ йын иннӕ адӕймаг йӕ цин нӕ бамбардзӕн» (Ӕмб. 14:10). Афтӕ дӕр вӕййы, ӕмӕ адӕймаг фӕдзуры, йӕ зӕрдӕйы  цы ис, уый, фӕлӕ уӕддӕр иннӕтӕн алы хатт ӕнцон нӕ вӕййы, цы зӕгъинаг у, уый бамбарын.

14. Зӕрдӕрыст адӕймагӕн йӕ зӕрдӕ кӕуыл фӕлӕууа, ахӕм ныхӕстӕ нӕ бон кӕм у ссарын?

¹⁴ Хатгай ма адӕймаг нӕ фӕзоны, зӕрдӕрыст адӕймагӕн, йӕ зӕрдӕ цӕуыл фӕлӕууа, ахӕмӕй цы зӕгъа, уый дӕр. Фӕлӕ Библи зӕгъы, «зондджыны ӕвзаг... у ӕвдадзы хос», зӕгъгӕ (Ӕмб. 12:18). Бирӕтӕн стыр ӕххуыс фесты, брошюрӕйы «Адӕймагыл зиан куы ’рцӕуы...» цы хорз хъуыдытӕ ис, уыдон *. Фӕлӕ арӕх ӕрмӕстдӕр фӕхъӕуы, «кӕугӕ чи кӕны, уыдонимӕ... кӕуын» (Ром. 12:15). Габи, йӕ лӕг кӕмӕн амард, иу ахӕм хо, зӕгъы: «Мӕ цӕссыгтӕ фӕзӕгъынц, мӕ зӕрдӕйы цы ис, уый. Ӕмӕ ме ’мбӕлттӕ дӕр мемӕ куы фӕкӕуынц, уӕд мын фенцондӕр вӕййы. Уӕд мӕм афтӕ нал фӕкӕсы, ӕмӕ иунӕг дӕн».

15. Адӕймагӕн йӕхицӕн цы зӕгъӕм, уый куы нӕ зонӕм, уӕд нӕ бон цы у саразын? (Ноджыдӕр кӕс рамкӕ « Ныфсы ныхӕстӕ».)

¹⁵ Адӕймагӕн йӕхицӕн цы зӕгъай, уый куы нӕ зонай, уӕд та дӕ бон у, ӕмӕ йӕм арвитай открыткӕ, писмо, СМС кӕнӕ та йӕм интернетӕй фыстӕг ныффыссай. Дӕ бон дзы у, йӕ зӕрдӕ йын чи бафидар кӕндзӕн, ахӕм стих ныффыссын, чи амард, уымӕ цы хорз миниуджытӕ уыд, уыдонӕй кӕцыдӕры кой скӕнын кӕнӕ, хорзӕй цы сарӕзта, уый тыххӕй ныффыссын. Юни зӕгъы: «Чи мӕ бафидар кӕны, ахӕм цыбыр фыстӕг куы райсын кӕнӕ мӕ хотӕй исчи йемӕ рӕстӕг арвитынмӕ куы фӕхоны, уӕд мын уый тынг баххуыс кӕны. Уыдӕттӕ мын ууыл дзурӕг сты, ӕмӕ мӕ иннӕтӕ уарзынц ӕмӕ сын уӕлдайаг нӕ дӕн».

16. Нӕ бон ма куыд у адӕймагӕн йӕ зӕрдӕйы рыст фӕрогдӕр кӕнын?

¹⁶ Зиан кӕуыл ӕрцыд, уыцы чырыстонӕн ма стыр ӕххуыс уыдзысты нӕ куывдтытӕ дӕр. Нӕ бон у нӕ хойы кӕнӕ не ’фсымӕры тыххӕй  хибарӕй скувын ӕмӕ ма йемӕ дӕр иумӕ скувын. Чи зоны, кувгӕ-кувын дӕ зӕрдӕ уынгӕг кӕндзӕн, дӕ хъӕлӕс зыр-зыр кӕндзӕн, ӕмӕ дын дзурын ӕнцон нӕ уыдзӕн. Фӕлӕ уыцы адӕймагӕн дӕ зӕрдиаг куывд стыр удӕнцой ӕрхӕсдзӕн. Далин дзуры: «Хотӕ мӕм бӕрӕггӕнӕг куы ’рбацӕуынц, уӕд сын хатт фӕзӕгъын, цӕмӕй Йегъовӕмӕ скувой. Ӕмӕ кувын куы райдайынц, уӕд сын фыццаг дзурын зын вӕййы. Фӕлӕ гыццыл фӕстӕдӕр сӕ хъӕлӕс фӕфидардӕр вӕййы, ӕмӕ ахӕм ныхӕстӕ фӕзӕгъынц, ӕмӕ зӕрдӕйы арф ахизынц. Сӕ фидар уырнындзинад, сӕ уарзондзинад ӕмӕ мыл кӕй тыхсынц, уый уынгӕйӕ мӕ уырнындзинад тынг бафидар вӕййы».

17–19. Зӕрдӕрыст адӕймагӕн-иу дарддӕр дӕр йӕ фарсмӕ цӕмӕн хъуамӕ ӕрбалӕууӕм?

¹⁷ Алы адӕймаг дӕр йӕ зианыл цас маст кӕндзӕн, уый нӕй базонӕн. Фыццаг бонты зианджынӕн йе ’мбӕлттӕ, йӕ хӕстӕджытӕ йӕ фарсмӕ вӕййынц, фӕлӕ стӕй фӕстӕмӕ сӕхи царды кӕйттӕ кӕнын райдайынц. Уымӕ гӕсгӕ-иу цӕттӕ у йӕ фарсмӕ ӕрбалӕууынмӕ ӕрмӕст фыццаг цалдӕр боны нӕ, фӕлӕ, чи зоны, уый фӕстӕ цалдӕр мӕйы дӕр. «Ӕцӕг ӕмбал алкӕддӕр уарзы. Уый у, зын сахат адӕймаджы фарсмӕ ӕрбалӕууынӕн чи райгуыры, ахӕм ӕфсымӕр» (Ӕмб. 17:17). Хъуамӕ зӕрдӕрыст адӕймагӕн удӕнцойы хос уӕм, цалынмӕ йӕ зӕрдӕйы хъӕдгом нӕ байгас уа, уӕдмӕ. (Бакӕс 1 Фессалоникӕгтӕм 3:7.)

¹⁸ Афтӕ дӕр вӕййы, ӕмӕ зӕрдӕрыст адӕймагӕн ӕвиппайды йӕ зӕрдӕ ӕрбауынгӕг вӕййы, зӕгъӕм, сӕ чындзӕхсӕвы бон куы ралӕууы кӕнӕ къамтӕ куы фены, кӕцыдӕр музыкӕ куы фехъусы, цыдӕр куы фӕаразы, науӕд ма суанг цыдӕр тӕф йӕ фындзыл куы ауайы, уӕд, кӕнӕ уый вӕййы афӕдзы кӕцыдӕр афон. Йӕ цардӕмбал кӕмӕн фӕзиан вӕййы, уый фыццаг хатт иунӕгӕй исты куы фӕаразы, зӕгъӕм, конгресмӕ кӕнӕ Ӕрымысӕн изӕрмӕ куы ацӕуы, уӕд ын уый уӕлдай зын вӕййы. Иу ӕфсымӕр загъта: «Мӕ бинойнаджы зианы фӕстӕ нӕ чындзӕхсӕвы бон куы ралӕууыд, уӕд ӕнхъӕлдтон, ӕмӕ йӕ не сфӕраздзынӕн, ӕмӕ мын ӕцӕгдӕр тынг зын уыд. Фӕлӕ ме ’ввахсдӕр ӕмбӕлттӕ ӕрӕмбырд сты, цӕмӕй уыцы бон иунӕгӕй ма уыдаин».

¹⁹ Фӕлӕ зианджын адӕймагӕн йӕ фарсмӕ ӕрбалӕууын ӕрмӕст кӕцыдӕр бӕлвырд бонты нӕ фӕхъӕуы. Юни афтӕ зӕгъы: «Иннӕтӕ мӕ ӕнӕуи бонты дӕр кӕй нӕ рох кӕнынц ӕмӕ мӕ фарсмӕ кӕй ӕрбалӕууынц, уый мын стыр ӕххуыс фӕвӕййы, мӕ ныфсыл ныфс бафты. Ахӕм цӕмӕндӕрты тынг аргъ кӕнын». Кӕй зӕгъын ӕй хъӕуы, нӕ бон нӕу афтӕ бакӕнын, ӕмӕ адӕймагӕй йӕ маст бынтондӕр ферох уа, стӕй нӕ бон нӕу, чи йын нал ис, уыцы адӕймаджы баивын. Фӕлӕ нӕ бон у, ӕмӕ йӕм истӕмӕй фӕкӕсӕм ӕмӕ йын афтӕмӕй йӕ зӕрдӕйы рыст фӕрогдӕр кӕнӕм (1 Иоан. 3:18). Габи зӕгъы: «Йегъовӕйӕ тынг бузныг дӕн, чи мын ӕххуыс кодта, уыцы фӕлмӕнзӕрдӕ хистӕр нӕлгоймӕгты тыххӕй. Уыдон уыдысты мӕ фарсмӕ ӕмӕ мын ӕххуыс кодтой алы зын къахдзӕф дӕр саразынӕн. Сӕ фӕрцы йӕ ӕнкъардтон, Йегъовӕ мӕ йӕ фӕлмӕн хъӕбысы куыд ӕрбакодта, уый».

20. Йегъовӕйы зӕрдӕвӕрдтӕ нын стыр удӕнцойы хос цӕмӕн сты?

²⁰ Мах ӕй зонӕм, Йегъовӕ, удӕнцойдӕттӕг Хуыцау, мӕрдты куы райгас кӕна, уӕд рыст ӕмӕ мастӕн сӕ кой дӕр кӕй нал уыдзӕн. Ӕмӕ нын уый стыр удӕнцой хӕссы (Иоан. 5:28, 29). Хуыцау зӕрдӕ бавӕрдта, кӕй «фесафдзӕн мӕлӕт ӕнустӕм, Дунедарӕг Хуыцау Йегъовӕ се ’ппӕтӕн дӕр сӕ цӕссыгтӕ сӕ рустӕй [кӕй] ныссӕрфдзӕн» (Ис. 25:8). Ӕмӕ уӕд, «кӕугӕ чи кӕны, уыдонимӕ» кӕуын нал хъӕудзӕн, фӕлӕ зӕххыл цӕрӕг адӕм иууылдӕр цин кӕндзысты, «цин чи кӕны, уыдонимӕ» (Ром. 12:15).