1, 2. Shiiꞌrino manna sheshifachisha dandiinanni gara hasaawa hasiissannonkehu mayiraati? (Hanafote noo misile lai.)

 SUUSI yinanni rodoo togo yitino: “Beettinke reyihunni mitto diro meddi yitanno yanna geeshsha lowo geeshsha xissiisiꞌnoommo.” Minaamasi hedeweelcho shiiꞌrinohu wolu Kiristaanchino, ‘lowo geeshsha xissiisiꞌrinota’ coyiꞌrino. Alamete aana heeꞌrannohu kiirre gundannikki mannira togoo qarri iillannonsa; tini dadillissannote. Kiristaanu songo giddo lowo manni shiiꞌnummokki Armagedooni saꞌneemmo yee hedinoha ikkara dandaanno. Kiꞌne shiidhinoonniha woy affinoonnihu shiiꞌrino manni nooha ikkiro togo yitine heddinanniha ikkara dandaanno: ‘Shiiꞌrino manni shesho afiꞌra dandaannohu hiittoonniiti?’

² Yanna saꞌanno wote, saꞌuta hambannilla yinanna macciishshitinoonniha ikkara dandaanno. Ikkina, yanna saꞌinohura calla shiiꞌre xissiisiꞌrino manni shesho afiꞌranno yaateni? Mitte minaannase shiidhinoti, mittu manchi shesho afiꞌranno gede assannori yanna saꞌu kiiro shesho afiꞌrate assannore ikkinota coyidhino. Ee, bisu mada xaginsiro galte hossanni hurtannonte gede, wodanu madano danchu garinni amandanniha ikkiro galte hossanni hurtanno. Ikkina, shiiꞌre xissiisiꞌrino manna shesho afiꞌrate kaaꞌlannonsari maati?

3, 4. Yihowa shiiꞌrino manchira shesho hasiissannosita afino yineemmohu mayiraati?

³ Dadillitinore baalunkunni roore sheshifachishannohu, shaqqado iimi Annanke Yihowa ikkinoti dihuluullissannote. (2 Qor. 1:3, 4 nabbawi.) Yihowa togo yee coyiꞌrasi tenne leellishshanno: “Wodanaꞌne diggi asseemmohu aneeti.”—Isa. 51:12; Far. 119:50, 52, 76.

⁴ Mararanno Anninke, baxanno manna lawishshaho Abirihaami, Yisihaaqi, Yaiqoobi, Musenna Moote Daawiti shiiꞌrino. (Kir. 12:6-8; Mat. 22:31, 32; Soq. 13:22) Qullaawu Maxaafi Yihowa insa kayisanno yanna quqquxame agaranni noota kulanno. (Iyo. 14:14, 15) Insa reyotenni kaꞌe hagiidhitanni, hattono ordu fayyimma afidhe heedhanno. Qoleno, Maganu lubbora baxannohunna ‘hagiidhanno’ gede assannosi Beettisino lowo geeshsha qarrame reyinota qaaga dandiitinanni. (Law. 8:22, 30) Hattee yannara Yihowa lowo geeshsha xissiisiꞌrinoti dihuluullissannote.—Yoh. 5:20; 10:17.

5, 6. Yihowa sheshifachishannonkehu hiittoonniiti?

⁵ Yihowa ninke kaaꞌlannonketa horo dihuluullammeemmo. Hakko daafira xissonke baala ruxxi yinummokki isira huuccattotenni kuꞌla hasiissannonke. Yihowara wodaninke xisso leeltannositanna kaaꞌlannonketa afa lowo geeshsha sheshifachishshannote! Ikkina, isi sheshifachishannonkehu hiittoonniiti?

⁶ Isi ninke kaaꞌlanno doogga giddo mitte “Qullaawu Ayyaaninni jawaante [woy shesho]” aate. (Soq. 9:31) Maganu ayyaani lowo geeshsha sheshifachishannonke. Yesuusi iimi Anni “huuccidhannosirira Qullaawa Ayyaana” aannota coyiꞌrino. (Luq. 11:13) Hanafote qummi assiniti Suusi togo yitino: “Yihowa sheshifachishannonke gede duucha hinge guluphine giddonketa isira kulle huucciꞌnoommo. Huucciꞌnummo kiiro Maganu salaame wodanankenna surrenke agartinonke.”—Filiphisiyusi Sokka 4:6, 7 nabbawi.

7, 8. Yesuusi sheshifachishannonke yineemmohu mayiraati?

⁷ Manna mararannohu Yihowa Beetti Yesuusi uullate noo yannara isi lawishsha harunsino; isi coyiꞌrinorinna assinorinni manna sheshifachishino. (Yoh. 5:19) Yesuusi iiminni soqqame dayinohu ‘wodana hiiqqantinorenna wiꞌlitannore baala’ sheshifachishateeti. (Isa. 61:1, 2; Luq. 4:17-21) Mannu xisso leeltinosihunna iillannonsa qarrinni gatte fooliishsho afidhanno gede assa hasiꞌrinohu iseraati.—Ibi. 2:17.

⁸ Yesuusi anje noo yannara, maatensa miilanna afino manna shiiꞌre dadillinoti dihuluullissannote. Lossinosi annisi Yooseefi isi anje heeꞌreenna reyinoha ikkikki digatino. a Hattee yannara, 20 diri balla woy hakkuyi woroo ikkannosihu manna mararannohu Yesuusi, isira, amasira, hattono meyanna labbaa roduuwisira iillino dadille dandee saꞌꞌa hasiissinosi.

9. Yesuusi Aliaazaari reyi yannara manna mararannota leellishinohu hiittoonniiti?

⁹ Yesuusi soqqansho hanafi yannara, mannu qarri leellinosi hattono insa mararino. Lowo geeshsha baxanno jaalisi Aliaazaari reyi yannara assinore lawishsha assine adhino. Yesuusi Aliaazaari kayisannota afinoha ikkirono, reyo  Maariyaaminna Maarta baasa xissiisidhanno gede assitinota lae isino xissiisiꞌrino. Isi insa lowo geeshsha mararinohura wiꞌlino.—Yoh. 11:33-36.

10. Yesuusi yannankerano manna mararanno yineemmohu mayiraati?

¹⁰ Yesuusi manna mararannotanna sheshifachisha hasiꞌrannota leellishanno qaali kaaꞌlannonkehu hiittoonniiti? Qullaawa Borro togo yitanno: “Yesuusi Kiristoosi beꞌrono techono hegere geeshsha isoontilla.” (Ibi. 13:8) Isi “Qara Heeshshote Riqiwaanchonna” shiiꞌro lowo geeshsha dadillissannota afinoha ikkino daafira, “qarru jifannore kaaꞌla dandaanno.” (Soq. 3:15, NW; Ibi. 2:10, 18) Hakko daafira, yannankerano Kiristoosi dadillanno manna marara, xissonsa afanna “hasiissanno yannara” sheshifachisha dandaannota dihuluullammeemmo.—Ibiraawoota 4:15, 16 nabbawi.

11. Ate baalantenni roore sheshifachishannohe qummeeshshi hiikkonneeti?

¹¹ Yesuusi Aliaazaari reyi yannara xissiisiꞌrinota kultanno xagge, Maganu Qaali giddo noote sheshifachishshanno qummeeshshuwa giddo mittetella. Hakko daafira togo yaa garaho: “Umo assine Qullaawa Maxaaffa giddo borreessinoonnire baala rosiisankera borreessinoonni. Qullaawa Maxaaffa widoonni afiꞌneemmo cincanna jawaante hexxo uyitannonke.” (Rom. 15:4) Atino shiidhe xissiisidhe noottoha ikkiro, aante noo qummeeshshuwa sheshifachishshannohe:

• “Kaaliiqi dadillunni hiiqqantinorira mule noonsa; hexxo hoogginore gatisannonsa.”—Far. 34:18, 19.

• “Yaaddonna dadillu amadie yannara, [Yihowa] sheshifachishshe, hagiirsiisoottoe.”—Far. 94:19.

• “Mootichinke Yesuusi Kiristoosinni, qoleno baxinonkehunna eltosinni hegere jawaantenna dancha hexxo uyinonkehu Maganu Anninke, . . . wodanaꞌne jawaachishonna kaajjisho.”—2 Tes. 2:16, 17. b

12. Manna sheshifachisha dandiineemmo doogga giddo mitte hiitteeti?

¹² Kiristaanu songono Shiiꞌrino manna lowo geeshsha sheshifachishshanno. (1 Teselonqe 5:11 nabbawi.) Ati ‘dadillino wodani’ noonsare sheshifachisha woy dhaabbachisha dandaattohu hiittoonniiti? (Law. 17:22) Qullaawu Maxaafi “sammi yaate yanna no; hasaawate yanna no” yaannota qaagi. (Ros. 3:7) Daaleni yinanniti minaanna shiidhinoti togo yitino: “Shiiꞌrino manni hedonsanna giddonsata hasaapha hasiꞌranno. Hakko daafira, shiiꞌrino manna baalunkunni roore kaaꞌlitannoti insa hasaaphanno wote mereeroho eꞌnikkinni macciishshate.” Rodoose shiidhinoti Juniyano togo yitino: “Kiꞌne xissonsa guddine afa hoogginirono, giddonsata afate hasidhinannita leellisha calla jawaachishshannonsa.”

13. Shiiꞌre xissiisiꞌrino manna sheshifachinsheemmo wote dea hasiissannonkekki coyi maati?

¹³ Shiiꞌrino manni xissiisiꞌrannona xissonsa kuꞌlanno gari babbaxxannotano qaaga hasiissanno. Mito wote mittu manchi mageeshsha xissiisiꞌrinoro woꞌmunni woꞌma afannohu iso callaati; isi xissosi coyiꞌre fushshiꞌra hoogara dandaanno. Maganu Qaali togo yaanno: “Dadillenna hagiirre annu wodanilla afanno; wolu mittuno gutamannohu diheeꞌranno.” (Law. 14:10) Mitu manni giddonsata hasaaphiro nafa, insa  yaara hasiꞌrinori wolu mannira xawe leella hoogara dandaanno.

14. Shiiꞌrino manna sheshifachisha dandiineemmohu hiittoonniiti?

¹⁴ Mito wote, shiiꞌre xissiisiꞌrino manna mayine sheshifachinsheemmoro afa hoongammora dandiineemmo. Ikkirono Qullaawu Maxaafi, “egennaamu arrawi kayinni hursanno” yaanno. (Law. 12:18) Lowo manna, Baxxinanni Manni Reyaannoꞌne Wote yinanni biroshere shiiꞌrino manna sheshifachishate kaaꞌlitinonsa. c Ikkirono, shiiꞌrino manna sheshifachishate kaaꞌlitannoti baalantenni roortino doogo ‘wiꞌlannohu ledo wiꞌlate.’ (Rom. 12:15) Gabii yinanniti minaannase shiidhinoti, mito wote wiꞌla agurranna giddoseta kuꞌlite affannokkita coyidhino. Ise ledde togo yitino: “Wolu manni ledoꞌya wiꞌlanno wote sheshifateemmahu iseraati. Hattee yannara xissiisiꞌroommati ane calla ikkoommakkita afeemma.”

15. Shiiꞌrino manniwa marre sheshifachishannore coyiꞌra hoongummoro maa assa dandiineemmo? (Qoleno, “ Sheshifachishshanno Hedo” yitanno saaxine lai.)

¹⁵ Shiiꞌrino manchiwa marte sheshifachishannore coyiꞌra hoogittoro, sheshifachishannore kaardete aana borreessite aa, iimeeletenni, silketenni woy borrote sokkanni soya dandaatto. Sheshifachishanno qummeeshsha borreessite soya, reyi manchiha hambannikki akata woy isi ledo assitinoonniha hagiirsiisanno coye kayisse borreessa dandaatto. Juniya togo yitino: “Ayyaanaamittete roduuwiꞌya jawaachishshanno sokka borreessite woy ledoꞌya yanna sayisse lowo geeshsha sheshifachishshinoe. Tini, insa ane baxxannoetanna towaattannoeta huwateemma gede assitino.”

16. Shiiꞌrino manna kaaꞌlitannoti baalantenni woyyitino doogo hiitteeti?

 ¹⁶ Shiiꞌrinohu ammanate roduuwinkera huucca woy ledonsa huuccatto assiꞌrano lowore kaaꞌlitanno. Hatte yannara coyidhe fushshiꞌra hoogittoro nafa, hindiiddo qalxitannahe insa daafira eeggifatte assatto huuccatto, shiiꞌrino mancho dhaabbanno. Daaleni togo yitino: “Roduuwu ane sheshifachishate daanno wote, huuccatto assenke yeemma. Insa huuccatto assa hanafanno wote yaannori baꞌꞌannonsaha ikkirono, shiima yanna gedensaanni qoonqo fushshe huucca hanafanno; hattono giddonsanni huuccanno. Ammanansa, baxillinsanna anera hedannota leellishate assannori ammanaꞌya jawaachishino.”

17-19. Shiiꞌrino manna ganyine sheshifachisha hasiissannohu mayiraati?

¹⁷ Shiiꞌrino manni xissiisiꞌre keeshshanno yanna manchu manchu garinni babbaxxitanno. Hakko daafira, jaallanna fiixu ledonsa heeꞌrannote boode barruwa geeshsha calla ikkikkinni, insa wiꞌlatenni kae loosiꞌra hanafihu gedensaannino sheshifachisha hasiissanno. “Jaalu woꞌmanka wote jaalaholla;” isi qarru barrira ilamino rodii gedeeti. (Law. 17:17) Mittu Kiristaanchi xissiisiꞌre keeshshanno yanna baxxu geeshshita ikkiturono, ammanate roduuwisi iso ganye sheshifachisha hasiissannonsa.—1 Teselonqe 3:7 nabbawi.

¹⁸ Shiiꞌrino manni adhamansa ayirrisanno barri, muuziiqu, foto, alba mitteenni assannori, baxxino fooli, qoonqo woy diru wogga reyi mancho qaage dadillanno gede assitannonsaha ikkara dandaanno. Galte shiiꞌrinohu alba mitteenni assanno coye callootinsa assanno wote, lawishshaho jawu gambooshshira woy Qaagooshshu Ayyaanira callootinsa haꞌranno wote lowo geeshsha dadillara dandaanno. Mittu rodii togo yiino: “[Minaamaꞌya reyitu gedensaanni] adhamaꞌya barra mite yee calliꞌya sayiseemmo wote, lowo geeshsha dadilleemmo yee hedoommo; hedummonte gede dadillaꞌya digattino. Ikkollana, hakko barra callateemmokki gede boodu labbaanna meya roduuwi boode muli jaallaꞌya gamba assite anewa waartino.”

¹⁹ Shiiꞌrino manna jawaachisha hasiissannohu baxxino barra calla diꞌꞌikkino. Juniya togo yitino: “Ganyine kaaꞌlanna baxxino barra calla ikkikki wole woteno shiiꞌrino manniwa waara lowo geeshsha kaaꞌlitanno. Konni garinni ganyine kaaꞌla lowore assitanno hattono baasa sheshifachishshanno.” Hige xisso gudisante hawantanno gede assa woy reyo abbitino callimma woꞌmunni woꞌma huna didandiinanni; ikkirono, mitore assine shiiꞌrino manna sheshifachishanna dhaabbachisha dandiineemmo. (1 Yoh. 3:18) Gabii, shiiꞌro iillituse yannara Yihowa, cimeeyye mulisenni faffukkinni kaaꞌlitannose gede assinohura iso galaxxitannota coyidhino. Ise ledde togo yitino: “Insa Yihowa dancha angasinni amadinoehu gede asse hedeemma gede assitinoe.”

20. Yihowa eino qaali sheshifachishannoho yineemmohu mayiraati?

²⁰ Shesho baalate Magani Yihowa, dadille baala hune, “waammate giddo noori huurosi [Kiristoosita] macciishshitanno” yanna dagganno gede asse, shiiꞌrino manna hegerera sheshifachishannota afa lowo geeshsha sheshifachishshannote! (Yoh. 5:28, 29) Maganu ‘reyo coꞌo asse hunatenna mannu baalunku albinni hindiiddo feyate’ qaale eino. (Isa. 25:8) Hattee yannara ‘wiꞌlitannori ledo wiꞌlate’ yinanniri diheeꞌranno; korkaatuno uullate aana heeꞌrannohu baalu ‘hagiidhitannori ledo hagiidhanno.’—Rom. 12:15.