1, 2. Ndi ngani ri tshi fanela u haseledza nga ha nḓila ine ra nga khuthadza ngayo vho felwaho? (Sedzani tshifanyiso tsha u thoma.)

SUSI o amba uri: “Musi murwa washu a tshi lovha, ro pfa vhuṱungu vhukuma lu ṱoḓaho u vha ṅwaha.” Muṅwe Mukriste o amba zwi fanaho musi mufumakadzi wawe a tshi lovha, o ri, “vhuṱungu he nda vhu pfa a vhu ṱalutshedzei.” Zwi ṱungufhadzaho ndi uri vhaṅwe vhathu vhanzhi vha tshenzhela vhuṱungu vhu fanaho. Vhathu vhanzhi tshivhidzoni tsha Vhukriste vha nga vha vha songo lavhelela u felwa nga vhane vha vha funa kha ano maitele a zwithu. Hu sa londwi uri no no felwa nga muthu ane na mu funa kana ni ḓivha muṅwe muthu o felwaho, ni nga ḓivhudzisa uri, ‘Vhathu vho felwaho vha nga thuswa hani u sedzana na vhuṱungu vhune vha khou vhu pfa?’

² Khamusi no no pfa vhaṅwe vha tshi amba uri tshifhinga ndi dzilafho. Naho zwo ralo, naa zwa vhukuma muthu u a ḓipfa e khwine musi tshifhinga tshi tshi khou ḓi ṱanḓulukana tshi tshi ya? Iṅwe tshilikadzi yo ṱhogomela uri, “Ndo wana uri zwenezwo ndi ngoho arali muthu o felwaho a tshi fhedza tshifhinga o farakanea nga zwiṅwe zwithu.” Vhukuma, u fana na tshilonda, vhuṱungu ha  tshilonda vhu nga fhungudzea nga zwiṱuku nga zwiṱuku arali tshenetsho tshilonda tshi tshi khou ṱhogomelwa. Ndi mini zwine zwa nga thusa muthu o felwaho uri a ḓipfe e khwine kha vhuṱungu vhune a khou vhu pfa?

3, 4. Ndi ngani ri tshi nga vha na khwaṱhisedzo ya uri Yehova u a pfesesa nḓila ine muthu o felwaho a ṱoḓa ngayo khuthadzo?

³ A zwi timatimisi uri Khotsi ashu wa ṱaḓulu Yehova ndi ene ane a ri khuthadza. (Vhalani 2 Vhakorinta 1:3, 4.) Yehova ndi tsumbo yavhuḓi vhukuma ya u khathutshela nahone u khwaṱhisedza vhathu vhawe uri: “Ndi Nṋe, Ndi Nṋe ndi fhumudzaho.”—Yes. 51:12; Ps. 119:50, 52, 76.

⁴ Khotsi ashu ane a khathutshela na ene o felwa nga vhathu vhane a vha funa vha ngaho, Abrahamu, Isaka, Yakobo, Mushe na Khosi Davida. (Num. 12:6-8; Mat. 22:31, 32; Mish. 13:22) Ipfi ḽa Mudzimu ḽi ri khwaṱhisedza uri Yehova o lavhelela nga maṱo matswuku tshifhinga tshine a ḓo vha vusa ngatsho. (Yobo 14:14, 15) Vha ḓo takala na u vha na mutakalo wavhuḓi. Dovhani ni ṱhogomele uri na Murwa wa Mudzimu a funwaho, ane a mu ‘takalela’ o fa lu vhavhaho. (Mir. 8:22, 30) A huna maipfi ane a nga ṱalutshedza vhuṱungu he Yehova a vhu pfa.—Yoh. 5:20; 10:17.

5, 6. Ri nga khuthadzwa hani nga Yehova?

⁵ Ri nga vha na fulufhelo ḽa uri Yehova u ḓo ri khuthadza. Nga zwenezwo, a ro ngo fanela u timatima u vhudza Yehova nga thabelo zwi re mbiluni dzashu na zwine zwa ri dina. Zwi a khuthadza vhukuma u ḓivha uri Yehova u a pfesesa vhuṱungu vhune ra vhu pfa nahone u ri ṋea khuthadzo ine ra i ṱoḓa! Fhedzi u zwi ita hani zwenezwo?

⁶ Iṅwe nḓila ine Mudzimu a ri thusa ngayo ndi nga “u khwaṱhiswa nga muya mukhethwa.” (Mish. 9:31) Maanḓa a Mudzimu a a ri khuthadza. Yesu o fulufhedzisa uri Khotsi awe wa ṱaḓulu o ḓiimisela u “ṋea muya mukhethwa vhane vha mu humbela.” (Luka 11:13) Susi we a bulwa mathomoni o ri: “Tshifhinga tshinzhi ro vha ri tshi gwadama nga magona nahone ra rabela Yehova zwi tshi bva mbiluni uri a ri khuthadze. Tshifhinga tshoṱhe, mulalo wa Mudzimu wo tsireledza mbilu dzashu na mihumbulo yashu.”—Vhalani Vhafilipi 4:6, 7.

7, 8. Ndi ngani ri tshi nga vha na fulufhelo ḽa uri Yesu u ḓo ri khuthadza?

⁷ Musi Yesu a kha ḓi vha kha ḽifhasi, o edzisa Yehova nga zwe a vha a tshi zwi amba na zwe a vha a a tshi zwi ita. (Yoh. 5:19) Yesu o vha o rumelwa uri a khuthadze vha “dzimbilu dzo pwashakanywaho” na “vhoṱhe vha lilaho.” (Yes. 61:1, 2; Luka 4:17-21) Naho zwo ralo, o vha a tshi ḓivhiwa sa muthu ane a pfela vhuṱungu—a tshi pfesesa nḓila ine vhathu vha pfa ngayo vhuṱungu nahone o vha e na lutamo lwa u thusa vhenevho vhathu.—Vhaheb. 2:17.

⁸ Musi Yesu a tshee muṱuku, a zwi timatimisi uri o pfa vhuṱungu musi a tshi felwa nga miraḓo ya muṱa wa hawe na khonani. Zwi vhonala u nga Yosefa khotsi a Yesu a si wa malofhani vho lovha musi a tshee muṱuku. * Edzani u vhona nga maṱo a muhumbulo nḓila ye Yesu we a vha a tshee muswa kana e mathomoni a miṅwaha ya vhu-20 a pfa ngayo vhuṱungu na u vhona vhuṱungu he ha vha vhu tshi khou pfiwa nga mme awe, vharathu vhawe na khaladzi dzawe.

9. Yesu o kwamea hani musi Lazaro a tshi fa?

 ⁹ Musi Yesu e vhuḓinḓani, o sumbedza uri u a pfesesa vhathu na u vha pfela vhuṱungu. Sa tsumbo, humbulani zwe zwa itea musi Lazaro khonani ya Yesu a tshi fa. Naho Yesu o vha a tshi zwi ḓivha uri u ḓo vusa Lazaro, o pfa vhuṱungu vhukuma he ha vha vhu tshi khou pfiwa nga Maria na Marita. O vha o kwamea vhukuma lwe zwa ita uri a tsengise miṱodzi.—Yoh. 11:33-36.

10. Ndi ngani ri tshi nga vha na vhungoho ha uri Yesu u a ri khuthadza ṋamusi?

¹⁰ Nḓila ye Yesu a sumbedza ngayo u pfela vhuṱungu na u khuthadza, zwi nga ri thusa hani ṋamusi? Maṅwalo a ri khwaṱhisedza uri “Yesu Kristo u ḓi dzula o ralo mulovha na ṋamusi, na nga hu sa fheli.” (Vhaheb. 13:8) Samusi “Murangaphanḓa Muhulwane wa vhutshilo” a tshi pfesesa uri zwi hani u pfa vhuṱungu, “u a kona u thusa vhane vha khou lingwa.” (Mish. 3:15; Vhaheb. 2:10, 18) Nga zwenezwo, ri nga vha na vhungoho ha uri Kristo u kha ḓi kwamea nga vhuṱungu hashu na u pfesesa nḓila ine ra ḓipfa ngayo nahone u ḓo ri khuthadza “nga tshifhinga tsho teaho.”—Vhalani Vhaheberu 4:15, 16.

11. Ndi maṅwalo afhio ane a ni khuthadza?

¹¹ Mafhungo a ambaho nga ha nḓila ye Yesu a pfa ngayo vhuṱungu musi Lazaro a tshi fa, ndi maṅwe a mafhungo a khuthadzaho o ṅwalwaho Ipfini ḽa Mudzimu. Nahone ndi ngazwo, “zwithu zwoṱhe zwo ṅwalwaho kale zwo ṅwalelwa u ri funza, uri nga u konḓelela hashu na nga u khuthadzwa nga Maṅwalo ri vhe na fulufhelo.” (Vharoma 15:4) Arali no felwa, ni nga wana khuthadzo kha maṅwalo a tevhelaho:

• “Yehova u sendela ha vha dzimbilu dzo vunḓekanaho, u tshidza vha mimuya yo huvhalaho.”—Ps. 34:18, 19.

• “Kha mbilaelo nnzhi dze dza ndzhena, mbilu yanga yo ḓi takadzwa nga phumudzo dzau [Yehova].”—Ps. 94:19.

• “Ngavhe Murena washu Yesu Kristo na Mudzimu Khotsi ashu, we a ri funa na u ri khuthadza nga hu sa fheli na u ri ṋea fulufhelo ḽavhuḓi nga vhuthu vhuhulu hawe, a tshi ni khuthadza na u ni khwaṱhisa.”—2 Vhathes. 2:16, 17. *

12. Ndi ifhio iṅwe nḓila ya ndeme ine na nga khuthadza ngayo vhaṅwe?

¹² Vhathu vho felwaho vha nga wana khuthadzo tshivhidzoni tsha Vhukriste. (Vhalani 1 Vhathesalonika 5:11.) Ni nga khwaṱhisa na u khuthadza hani vha “ma-ḽa-mbilu”? (Mir. 17:22) Dzulani ni tshi humbula uri “u fhumula hu na tshifhinga tshaho, na u amba hu na tshifhinga tshaho.” (Muh. 3:7) Iṅwe tshilikadzi ine ya pfi Dalene, yo ri: “Vhathu vho felwaho vha ṱoḓa u amba zwi re mihumbuloni yavho na nḓila ine vha ḓipfa ngayo. Nga zwenezwo, zwithu zwa ndeme vhukuma zwine na nga zwi itela muthu o felwaho, ndi u mu thetshelesa nga vhuronwane ni sa mu dzheni haṋwani.” Junia we khaladzi awe a ḓivhulaha, o ri: “Naho ni nga si pfesese nga vhuḓalo vhuṱungu vhune vha khou vhu pfa, fhedzi zwa ndeme vhukuma ndi uri ni ṱoḓa u pfesesa nḓila ine vha ḓipfa ngayo.”

13. Ndi mini zwine ra fanela u zwi humbula nga ha vhathu vho felwaho?

¹³ Humbulani uri vhathu a vha pfi vhuṱungu kana u sumbedza nḓila ine vha ḓipfa ngayo nga nḓila i fanaho. Nga zwiṅwe zwifhinga, muthu ane a khou pfa vhuṱungu ndi ene fhedzi ane a kona u pfesesa vhuṱungu hawe nahone zwi nga mu konḓela u ṱalutshedza nḓila  ine a ḓipfa ngayo. Ipfi ḽa Mudzimu ḽi ri: “Mbilu i ḓivha maṱungu ayo; na dakalo ḽayo a ḽi dzhenwi nga u sili.” (Mir. 14:10) Naho muthu a tshi nga amba nḓila ine a ḓipfa ngayo, a zwo ngo leluwa tshifhinga tshoṱhe uri vhaṅwe vha pfesese zwine a khou lingedza u zwi amba.

14. Ri nga khuthadza hani vho felwaho?

¹⁴ Nga zwenezwo, zwi nga konḓa u ḓivha zwine ra nga zwi amba na muthu ane a khou pfa vhuṱungu. Naho zwo ralo, Bivhili i amba uri “lulimi lwa vha vhuṱali lu na dzilafho.” (Mir. 12:18) Vhathu vhanzhi vho wana maipfi ane vha nga a shumisa u khuthadza kha bugwana, Musi Ane Na Mu Funa A Tshi Fa. * Kanzhi zwithu zwi thusaho vhukuma zwine na nga zwi ita ndi u “[lila] na vhane vha lila.” (Vharoma 12:15) Gaby we a felwa nga munna wawe o ri: “Ndo vha ndi tshi sumbedza nḓila ine nda ḓipfa ngayo nga u lila. Ndi ngazwo ndi tshi khuthadzea musi khonani dzanga dzi tshi lila na nṋe. Nga tshenetsho tshifhinga, ndi ḓipfa ndi si ndoṱhe kha honoho vhuṱungu hanga.”

15. Ri nga khuthadza hani vhaṅwe arali zwi tshi ri konḓela u vha vhudza ro livhana tshifhaṱuwoni? (Sedzani bogisi “ Maipfi A Khuthadzaho.”)

¹⁵ Arali zwi tshi ni konḓela u amba na muthu no livhana zwifhaṱuwo, zwi nga ni lelutshela u ṅwala maipfi a khuthadzaho nga u rumela garaṱa, e-mail, mulaedza kana vhurifhi. Ni nga ṅwala maipfi a khuthadzaho a bvaho maṅwaloni, u amba nga ha zwiṅwe zwithu zwo khetheaho zwine na zwi humbula nga ha mufu kana zwithu zwavhuḓi zwe na zwi ita na mufu. Junia o ri: “U wana mulaedza mupfufhi u ṱuṱuwedzaho kana u rambiwa nga Vhakriste nga nṋe zwi nthusa vhukuma u fhira zwine nda nga zwi amba. Zwenezwo zwi ita uri ndi ḓipfe ndi tshi funwa na u ṱhogomelwa.”

16. Ndi ifhio iṅwe nḓila i shumaho ine ra nga khuthadza ngayo vho felwaho?

 ¹⁶ Ni songo vhuya na dzhiela fhasi nḓila ine zwa vha zwa ndeme ngayo u rabela na Vhakriste nga inwi vho felwaho na u vha rabelela. Naho zwi tshi nga ni konḓela u amba nḓila ine na ḓipfa ngayo musi ni tshi khou rabela ni kha honoho vhuimo, thabelo yaṋu i bvaho mbiluni khamusi ipfi ḽi tshi khou tetemela zwi nga kwama vhukuma muthu o felwaho. Dalene o ri: “Nga zwiṅwe zwifhinga musi vhahashu vha tshisadzini vho ḓa u nkhuthadza, ndi a vha vhudzisa arali vha tshi ḓo rabela. Kanzhi zwi a vha konḓela u amba musi vha tshi thoma u rabela, fhedzi nga murahu ha maipfi a si gathi, vha thoma u amba nga tshivhindi nahone vha amba zwi tshi bva mbiluni. Lutendo lwavho lwo khwaṱhaho, lufuno lwavho na u vha havho na ndavha, zwo nkhwaṱhisa vhukuma lutendoni.”

17-19. Ndi ngani ri tshi fanela u dzula ri tshi khuthadza vho felwaho?

¹⁷ Zwi a konḓa u ḓivha tshifhinga tshine muthu a nga tshi fhedza a tshi khou pfa vhuṱungu. Nga zwenezwo, ivhani hone tshifhinga tshoṱhe, hu si maḓuvha a si gathi fhedzi musi hu tshi kha ḓi vha na mashaka na dzikhonani, fhedzi lwa miṅwedzi yo vhalaho musi vhaṅwe vho no humela kha vhutshilo havho ho ḓoweleaho. Bivhili i ri: “Khonani ndi ṱhama ya maḓuvha oṱhe; ndi mukomana we a mbebelwa ḓuvha ḽa khombo.” (Mir. 17:17) Vhakriste nga riṋe vha nga khuthadza muthu o felwaho u swika onoyo muthu a tshi vho kona u sedzana na honoho vhuṱungu.—Vhalani 1 Vhathesalonika 3:7.

¹⁸ Humbulani uri muthu o felwaho a nga dovha a pfa vhuṱungu musi hu tshi swika tshifhinga tsha zwiṅwe zwiitea zwo khetheaho, muzika, zwinepe, zwithu zwe vha vha vha tshi zwi ita vhoṱhe kana muṅwe munukhelelo, mubvumo kana khalaṅwaha. Muthu o felwaho nga mufarisi a nga pfa vhuṱungu vhukuma musi a tshi vho thoma u ita zwithu e eṱhe e si na mufarisi wawe, zwithu zwi ngaho u ya maguvhanganoni kana Tshihumbudzoni. Muṅwe wahashu wa tshinnani o ri: “Ndo vha ndo lavhelela uri musi ḓuvha ḽe ra vhingana ngaḽo ḽi tshi swika lwa u tou thoma ndi si tsheena mufarisi ḽi ḓo vha ḽi konḓaho vhukuma. Fhedzi vhahashu vha si gathi vho dzudzanya tshimima tshiṱuku, vha ramba khonani dzanga dza tsini u itela uri ndi si vhe ndi ndoṱhe nga ḽeneḽo ḓuvha.”

¹⁹ Naho zwo ralo, dzulani ni tshi humbula uri muthu o felwaho u ṱoḓa u ṱuṱuwedzwa hu si nga zwifhinga zwo khetheaho fhedzi. Junia o ri: “Kanzhi thuso na vhukonani vhune ha vha hone musi hu si na zwiitea zwo khetheaho zwi nga vhuyedza vhukuma. Zwenezwo zwithu ndi zwa ndeme vhukuma nahone zwi a khuthadza.” Vhukuma, ri nga si kone u fhelisa vhuṱungu ha u felwa kana u ita uri muthu o felwaho a si tsha ṱuvha mufu, fhedzi ri nga khuthadza na u thusa vho felwaho nga u vha itela zwiṅwe zwithu. (1 Yoh. 3:18) Gaby o ri: “Ndi livhuha vhukuma Yehova nge a shumisa vhahulwane uri vha nthuse musi ndo sedzana na zwifhinga zwi konḓaho. Vho ita uri ndi kone u vhona uri Yehova u a mpfuna.”

20. Ndi ngani mafulufhedziso a Yehova a tshi khuthadza vhukuma?

²⁰ Zwi a khuthadza vhukuma u ḓivha uri Yehova Mudzimu wa u khuthadza hoṱhe u ḓo fhelisa vhuṱungu hoṱhe nahone u ḓo ita uri ‘vhoṱhe vha re mavhiḓani vha pfe ipfi ḽa Kristo vha bve’! (Yoh. 5:28, 29) Mudzimu u fulufhedzisa uri “lufu u ḓo lu lozwa tshoṱhe; Muṋe wa vhoṱhe Yehova u ḓo fhuluṱa maṱodzi kha zwoṱhe zwifhaṱuwo.” (Yes. 25:8) Nga zwenezwo, nṱhani ha uri ni “lile na vhane vha lila,” vhadzulapo vhoṱhe vha kha ḽifhasi vha ḓo “[takala] na vho takalaho.”—Vharoma 12:15.