1, 2. მუშენ რე მნიშვნელოვან, მიჩქუდან, მუჭო ეუქექუათ გურშა თინეფს, მიდგას საჸოროფო პიროვნება აფუ ღურელ? (ქოძირით სურათ თე გვერდის).

„ჩქინ სქუაშ ღურაშე დახე ართ წანა რე მიკულირ, მარა იშენით მანგარ ჭუას ბგინაფლენთ“, — იჩიებ სიუზი. ართ ჯიმა რაგადანს, ნამდა ნინათ ვეგნიჩინედ ფერ ჭუას გინაფლენდ, მუჟამსით ოჯახობაქ ველუდუნ თეშ დუღურ. სანარღოთ, ბრელ და დო ჯიმა რე თეცალ მდგომარეობას. ბრელ ქრისტიან არმაგედონშახ შილებე შურო ველდას ხოლოშიან კოჩიშ ღურას. შილებე თქვა ხოლო გაფდან ნაღურა ხოლოშიან კოჩი ვარდა იჩინენდათ თეცალ მითინს დო გოინტერესდან თე კითხვაშ პასუხ: მუ მეხვარებ თინეფს, მიდგას საჸოროფო პიროვნება აფუ ღურელ, მერუან მუნეფიშ გურჭუას?

² შილებე გუნაგებ გაფდან თეცალ სიტყვეფი: „დრო ოსკილიდუანს“. მარა ქეშულებნო დროს მუშით დასკილიდუას ელაჭვილ გურ? ართ ქომონჯ ღურელ ოსურ იჩიებ: „სინამდვილეს გურჭუას ოსქილიდუანს თინა, მუჭო გიმიბრინუანთ თე დროს“. დრო ხანიშ უკულ, ჯგირო ქიმკვოჯინით-და, მუჭოთ ფიზიკურ ჭრილობან თეშ, ემოციურ ჭრილობა ხოლო ეკმირდუ. მუ მეხვარებ თინეფს, მიდგას საჸოროფო პიროვნება აფუ ღურელ, მერუან ემოციურ ჭუას?

3, 4. მუჭო შემლებნა ვორდათ დარწმუნებულ, ნამდა იეჰოვას არჩქილე თი კათაშ გურჭუა, მიდგას საჸოროფო პიროვნება აფუ ღურელ?

³ ჩქინ ზეციერ მუმას იეჰოვას, ნამუთ ირნერ გურიშ ექექაფაშ მუმა რე, შეულებ გურშა ემქექუან (წეკითხით 2 კორინთელები 1:3, 4). * თინა მუშ ხალხის მაგალითის არზენს, მუჭო მიღან გურშა შხვეფიშ გაჭირება დო არწმუნენს: „მა, მა ეიქექუანთ გურშა“ (ეს. 51:12; ფსალმ. 119:50, 52, 76).

⁴ ჩქინ ზეციერ მუმას, იეჰოვას ხოლო აფუ გინნაღელ საჸოროფო კათაშ მაგალთო, აბრაამიშ, ისაკიშ, იაკობიშ, მოსეშ, მეფე დავითიშ ღურა დო არჩქილე, მუს ნიშნენს ხოლოშიან კოჩიშ ღურა (რიცხ. 12:6—8; მათ. 22:31, 32; საქ. 13:22). ღორონთიშ სიტყვა მარწმუნენა, ნამდა იეჰოვა უჯინე თი დროს, მუჟამსით კინ დურთინუანს სიცოცხლეს თინეფს (იობ. 14:14, 15). გათელებულეფს აღვენუნა სრულყოფილ ჯამრთელობა დო ბედნერეფ იჸუაფნა. დეფიფქრათ თიშე ხოლო, ნამდა ღორონთიშ საჸოროფო სქუაქ, ნამუთ არძაშ უმოსო უჸორდუნ, წამებულო ღურ (იგავ. 8:22, 30). სიტყვეფით ვეგნიჩინე, მუ ჭუა გინიღ იეჰოვაქ თე დროს (იოან. 5:20; 10:17).

5, 6. მუჭო შეულებ იეჰოვას გურშა ემქექუან?

⁵ შემლებნა დარწმუნებულ ვორდათ, ნამდა იეჰოვა ქიმმეხვარებნა, მარა ვედიბზარუათ ოკო გურ გეგნუფაჩათ ლოცვას დო ჩქინ გაჭირებაშ გურშენ ქივეჩუათ. გურშა ელამკინანა თიშ რჩქინა, ნამდა იეჰოვას არჩქილე ჩქინ ჭუა დო გურშა ემქექუანა. მარა მუჭო ორთ ზეციერ მუმა თეს?

⁶ ართ-ართ საშვალება, ნამუსით ღორონთი გურიშ ეიოქექაფალო გიმირინუანსინ, წმინდა შურ რე (საქ. 9:31). ღორონთიშ წმინდა შურს დიდ ძალა უღუ. იესოქ მუშ მიმაჸუნალეფს სიტყვა მეჩ, ნამდა ზეციერ მუმა „ქიმეჩანს წმინდა შურს თინეფს, მიდგა ითხინს!“ (ლუკ. 11:13). ჟიშე მოშინაფილ სიუზი იჩიებ: „მუსხიშა ვორდით თიცალ მდგომარეობას, მუჟამსით ბირგულდოშქუმალირ ვოხვეწუდით ღორონც გურიშ ექექაფას. ბგინაფლენთდით, ნამდა მშვიდობაშ ღორონთი ირიათო იცვენდ ჩქინ გურს დო გონებას“ (წეკითხით ფილიპელები 4:6, 7). *

7, 8. სოვრეშე მიჩქნა, ნამდა იესოს შეულებ გურშა ემქექუან?

⁷ იესო ქრისტე დედამიწას რდუნ, თიშ სიტყვეფშე დო მოქმედებეფშე იძირედ იეჰოვაშ ძვირფას თვისებეფი (იოან. 5:19). ღორონთიქ იესო თიშენ მაშკუ დედამიწაშა, ნამდა გურშა ეუქექუკო „გურგოტახილეფს“ დო „შურაკოჭირებულეფს“ (ეს. 61:1, 2; ლუკ. 4:17—21). იესოს არძა თით იჩინენდ, ნამდა არჩქილედ ხალხიშ გურჭუა დო ოკოდ თინეფიშ მოხვარა (ებრ. 2:17).

⁸ მუჟამსით იესო ახალგაზრდა რდუნ, ალბათ გინნაღელ აჸიდ ოჯახიშ წევრეფიშ ვარდა ხოლოშიანეფიშ ღურა. საეგებიოთ, იესო ახალგაზრდა რდუ, მუჟამსით მუმაჸონერ იოსებიქ უღურ. * წერმიდგინით, მუჭო ქელაჭუდ გურ დო მუნერ გინაღალარ აჸიდ თე ირფელ იესოს, ნამუთ თიმ დროს შილებე 20 წანერ ხოლო ვარდკონ; თეწკუმა ართო, თიქ მუშ დიდას დო და დო  ჯიმალეფს ხოლო ოკო ქელუდირთკო თე ამბეშ გინოღალას.

9. მუჭო ოძირუ იესოქ ლაზარეშ ღურაშ დროს, ნამდა არჩქილედ შხვეფიშ გურჭუა?

⁹ იესოქ მსახურებაშ დროს ქაძირუ, ნამდა ხალხიშ არჩქილედ დო თინეფიშ ჭუა გურშა მეუღუდ. დეფიფქრათ, მუჭო მიქცუ იესოქ, მუჟამსით თიშ მეგობარ ლაზარექ დოღურ. იესოს უჩქუდ, თის გათელენდუნ, მარა ჯგირო არჩქილედ, მუშმანწარა ჭუას გინაფლენდეს ლაზარეშ დალეფ, მართა დო მარიამ. იესოქ თიშმანწარათ მიღ თინეფიშ ამბე გურშა, ქანგარინ (იოან. 11:33—36).

10. მუშენ შემლებნა ვორდათ დარწმუნებულ, ნამდა იესო ამდღა ხოლო ემქექუანა გურშა?

¹⁰ მუჭო მოხვარნა იესოშ გურიშ ემაქექაფალ სიტყვეფი? ბიბლია მარწმუნენა, ნამდა „იესო ქრისტე მუთ გოღა რდუნ თინა რე, ამდღა დო მარადიულო“ (ებრ. 13:8). მუჭოთ „სიცოცხლეშ მადუდე“, თის ჯგირო არჩქილე შხვეფიშ გურჭუა დო „შეულებ მეხვარას თინეფს, მით ამდღა გიმიცადებ“ (საქ. 3:15; ებრ. 2:10, 18). თეგვარო, შემლებნა დარწმუნებულ ვორდათ, ნამდა იესოს ამდღა ხოლო გურშა მეუღ შხვეფიშ გაჭირება, არჩქილე თინეფიშ დო დროულო ეუქექუანს გურშა (წეკითხით ებრაელები 4:15, 16). *

11. არძაშ უმოსო ნამ ბიბლიურ მუხლეფ ეიქექუანა გურშა?

¹¹ იესოქ ლაზარეშ ღურაშ დროს გურჭუა გიმირჩქინ. თენა ართ-ართ რე თი ბრელ გურიშ ემაკინალ მაგალითეფ შკას, ნამუთ ღორონთიშ სიტყვას რე მოშინაფილ. თექ ვაგამკვირდან ოკო, მუშენდა „ირფელქ, მუთ ადრე იჭარუნ, ჩქინ ოგურაფალო იჭარ, ნამდა მოთვინებათ დო წმინდა წერილეფშე მეღებულ გურიშ ექექაფათ მიღდან იმენდი“ (რომ. 15:4). თქვა ხოლო მუთუნიშ გურშენ გურგოტახილ ქორეთ-და, თუდო მოშინაფილ ბიბლიურ მუხლეფ გურშა ეიქექუანა:

• „იეჰოვა ხოლოს რე გურგოტახილეფწკუმა; თინა ირსხენს შურაკოჭირებულეფს“ (ფსალმ. 34:18, 19).

•  „მუჟამსით გლახა ფიქრეფ მისოფუანდუნ, სი ელამქექე გურშა დო დუმაწყნარი“ (ფსალმ. 94:19).

• „მორთი, ჩქინ უფალ იესო ქრისტექ დო ჩქინ ღორონთიქ დო მუმაქ, ნამუთიქ ქომიჸოროფუეს, მუშ ჭყოლოფათ მარადიულ გურიშ ექექაფა დო ჯგირ იმენდ მუჩესინ, გურშა ეიქექუან, გუგამანგარან ირ ჯგირ საქმეს დო სიტყვას“ (2 თეს. 2:16, 17). *

12. მუ რე ართ-ართ საშვალება, ნამდა გურშა ეუქექუათ შხვეფს?

¹² ხოლო ართ საშვალება, ნამუთ გურშა ემქექუანან, რე კრებაშ შეხვალამეფი (წეკითხით 1 თესალონიკელები 5:11). * მუჭო შეილებნა გამანგარათ დო გურშა ეუქექუათ თინეფს, მიდგას საჸოროფო პიროვნება აფუ ღურელ? (იგავ. 17:22). ვაგგოჭყორდან, ნამდა რე „რაგადიშ დრო დო ხონარ ვეკიღენ თიშ დრო“ (ეკლ. 3:7). ართ ოსურ დელინ, ნამუსით ქომონჯ აფუ ღურელინ, იჩიებ: „ხოლოშიან კოჩიშ ღურათ გურ ელაჭვილ პიროვნებას ოსაჭირ ქორაგადუას, მუს გინაფლენს. თე დროს არძაშ უჯგუშ მუდგაშ კეთება შეილებნან, თენა რე ბოლოშა ქუმურჩქილუათ თეცალ კოც“. ჟუნია, ნამუშ ჯიმაქ დუდ იჸვილუნ, იჩიებ: „შილებე ბოლოშა ვა გარჩქილედან თეცალ პიროვნებაშ გურჭუა, მარა მთავარ თინა რე, გოკონა ქუგუგათ თინეფს“.

13. მუ ოკო ფშუდან, მუჟამსით შხვეფ გურჭუას გიმოხანტუნა?

 ¹³ არძა შხვადოშხვანერო გინაფლენს დო გიმოხანტუნს გურჭუას. მინშა პიროვნება მანგარ ემოციურ ჭუას გინაფლენს, მარა უჭირს თეშ გიმოხანტუა. ღორონთიშ სიტყვას ჭარ: „გურ გინაფლენს შურიშ სიმწარეს; თიშ ხიოლს შხვა ვენანჭუ“ (იგავ. 14:10). თიმწკუმა ხოლო, მუჟამსით პიროვნება მუშ გურჭუას გიმოხანტუნსინ, ირიათო ადვილ ვა რე, ქუგუგე მუშ რაგად ოკო თის.

14. მუჭო შემლებნა გურშა ეუქექუათ თინეფს, მიდგას საჸოროფო პიროვნება აფუ ღურელ?

¹⁴ შილებე ვამჩქუდან, მუ ვუწუათ თინეფს, მიდგას საჸოროფო პიროვნება აფუ ღურელ. მარა ბიბლია იჩიებ, ნამდა „ბრძენიშ ნინა ოსკილიდუანს“ (იგავ. 12:18). ბრელს გურშა ეუქექუ სიტყვეფქ, ნამუთ მოშინაფილ რე ბროშურას „მუჟამსით საჸოროფო პიროვნება მიღურუნა“. * ხშირას, არძაშ უჯგუშ, მუდგაშ კეთება შეილებნან, რე „მანგარალეფწკუმა ინგარათ“ (რომ. 12:15). გაბი, ნამუსით ქომონჯ აფუ ღურელინ, იჩიებ: „მინშა ჩქიმ გურჭუაშ გიმოხანტუა ხვალე ჩილამურეფით შემლებუდ. ათეშგურშენ გურშა ემქექუანდ, მუჟამსით მეგობრეფ ჩქიმწკუმა ართო ინგარდეს. თე დროს ხვალახეთ ვა ბგინაფლენდ დუც“.

15. მუჭო შემლებნა მიფქცუათ, მუჟამსით პირადო მიჭირა გურიშ ემაქექაფალ სიტყვეფიშ რაგად? (ქოძირით ჩარჩო „გურიშ ემაქექაფალ სიტყვეფი“).

¹⁵ პირადო მუთუნ ვაგარაგადენან-და, შეილებნა გურიშ ემაქექაფალ სიტყვეფ იმეილით, ტელეფონით ვარდა წერილით ქიმეჭარათ. შეილებნა უბრალოთ ბიბლიურ მუხლი, თი პიროვნებაშ ჯგირ თვისებეფ ვარდა მუდგაინ სასიამოვნო შემთხვევა ქიმეჭარათ. „მანგარო მოხვარ, მუჟამსით თანაქრისტიანეფშე გურიშ ემაკინალ ჭიჭე  წერილს ბღებულენქ ვარდა სოდგაინ მაპეჯენა. თავრეშე ვორწყექ, მაფასენა დო ფიქრენა ჩქიმო“, — იჩიებ ჟუნია.

16. მუ რე შხვეფიშ გურიშ ექექაფაშ არძაშ უჯგუშ საშვალება?

¹⁶ ჩქინ ლოცვეფს შეულებ მეხვარას და დო ჯიმალეფს, მიდგას საჸოროფო პიროვნება აფუ ღურელ. ათეშგურშენ, იბლოცათ თინეფშო, მუჭოთ ცალკენ თეშ, თინეფწკუმა ართო ხოლო. შილებე ლოცვაშ დროს განგარინედან დო გაიჭირდან საჭირო სიტყვეფიშ გორუაქ, მარა შურ დო გურით ნათქუელ ლოცვა, მანგარო ეუქექუანს გურშა თინეფს. დელინ იშინანს: „დალეფ ჩქიმდა მიშესინ, ბთხინდ ქილოცესკო ჩქიმ გურშენ. მართალ რე, დუდშე უჭირდეს სიტყვეფიშ გორუა, მარა მუსხირენ წინადადებაშ უკულ მთელ შურ დო გურით იჭყანდეს ლოცვას. თინეფიშ რწმენა, ჸოროფა დო მზრუნველობა მანგარო მამანგარენდ“.

17^—19. მუშენ ოკო ვემვოტუათ შხვეფიშ გურიშ ექექაფა?

¹⁷ ნამთინეს მეტ დრო ოსაჭირ, ნამთინეს — ნაკლებ, მერუას გურჭუას, ნამუთ საჸოროფო პიროვნებაშ ღურას მოჸუნს. პირველ მუსხირენ დღას მეგობრეფ დო მოჯგირეფ ხოლო ელურენა თინეფს, მარა ჩქი მზათ ოკო ვორდათ, თეცალ თანაქრისტიანეფს უკულ ხოლო ქელუდირთათ, მუჟამსით არძა მუშუშ ცხოვრებას დართუ. „ნამდვილ მეგობარ ირიათო ჸოროფას გიმირჩქინანს; თინა გაჭირებაშო დაბადებულ ჯიმა რე“ (იგავ. 17:17). თანაქრისტიანეფს შეულებნა გურშა ეუქექუან თინეფს, მიდგას საჸოროფო პიროვნება აფუ ღურელ დო ელარნა ოსაჭირ (წეკითხით 1 თესალონიკელები 3:7). *

¹⁸ ვაგგოჭყორდან, ნამდა პიროვნებას შილებე უცფას გურქ შეჭირას დო თეშ მიზეზი რდას ქორწინებაშ წანაშ დუდი, მუსიკა, სურათეფ, მუდგარენ საქმეეფ, ნაჩინებ შურ, ხონარ ვარდა წარმოწანაშ ნამდგაინ დრო. დუდშე არძაშ უმოსო შილებე თიცალ ადგილეფშა გუჭირდას გილულაქ, ნამდგაშა ართო გილეშეს მაგალთო, კონგრესეფ ვარდა ქრისტეშ გოშინაშ ონჯუა. „მანგარო გამჭირდ, მუჟამსით ქორწინებაშ წანაშ დუდის პირველო შეფხვად მეუღლეშ უმშო. მარა დუდი ხვალე ვებგინკონ თიშენ, მუსხირენ და დო ჯიმაქ ხოლოშიან მეგობრეფწკუმა ართო გურიშ ემაკინალ ჭიჭე შაყარუა მომინწყუეს“, — იშინანს ართ ჯიმა.

¹⁹ გურიშელაკინა ხვალე განსაკუთრებულ შემთხვევეფიშ დროს ვა რე დასაბაღ. „უმოს ჯგირობუა მოუღ ელარნას დო ურთიერთობას, ნამუსით თანაქრისტიანეფ ჩვეულებრივ სიტუაციეფიშ დროს გიმირჩქინანა. თენა უმოს დასაფასებელ დო გურიშ ემაქექაფალ რე“,— იჩიებ ჟუნია. მართალ რე, ჩქი ბოლოშა ვამმაშორებენა შხვეფშა გურჭუა დო ვემაფშინენა ნარკულობა, ნამუთ საჸოროფო პიროვნებაშ ღურას მოჸუნს, მარა შემლებნა გურშა ეუქექუათ, მუჟამსით ქელუდირთუთ დო პრაქტიკულო ქიმვეხვარებუთ (1 იოან. 3:18). გაბი იშინანს: „იეჰოვაშ მარდულ ვორექ თი მოჸოროფე უხუცესეფიშ, მით რთულ პერიოდის ირიათო ხასლას ელამრედეს. თინეფქ იეჰოვაშ მოჸოროფე ხელეფ ქუმოგინაფეს“.

20. მუშენ რე იეჰოვაშ დუნაპირებ გურიშ ემაქექაფალ?

²⁰ გურშა ემქექუანა თიშ რჩქინა, ნამდა იეჰოვა, ირნერ გურიშ ექექაფაშ მუმა, მოსპუნს გურჭუას დო გურშა ელამკინანა, „მუჟამსით არძა, მით ონთხორუეს რენან, თიშ [იესოშ] ხონარს ქიგეგონენა დო კილელენა“ (იოან. 5:28, 29). ღორონთი მოპირნა, ნამდა „სადღამუშოთ მოსპუნს ღურას დო არძა სახეშე მოწიმინდანს ჩილამურს უზენაეს უფალი იეჰოვა“ (ეს. 25:8). თეშ უკულ ნგარა დღას ვეჸუაფ დო დედამიწაშ მახორუეფ მარადიულო გეხარებნა (რომ. 12:15).