1, 2. ¿Xiñee caquiiñeʼ guininu de ximodo zanda quixhedxinu ladxidóʼ cani maʼ guti tuuxa binni ni nadxii? (Biiyaʼ foto ni zeeda ra ruzulú tema riʼ).

TI HERMANA láʼ Susi guníʼ: «Guti si xiiñidu, biaʼ ti iza biʼniʼ sentirdu ti yuubaʼ nabé naná». Ne ti hermanu ni gutiʼ xheelaʼ ni málasi ná gupa «ti yuubaʼ nabé naná dede qué ñanda nusiene ximodo ni». Triste ni, peru stale binni rizaaca ca cosa ni gúninu riʼ. Zándaca nuu stale xpinni Dios ni cadi cabeza ñati tuuxa binni ni nadxii ante gueeda Armagedón. Pa lii o pa tuuxa binni runibiaʼluʼ maʼ guti ti binnilidxi o ti xhamigu, zándaca guinabadiidxaluʼ: «¿Ximodo zanda gacanenu ora guizaaca tuuxa nga yaʼ?».

² Zándaca huayunadiáganu guiníʼ binni tiempu ca racané guiaandaʼ intiica yuubaʼ. Peru, ¿ñee zacá raca ni guiráʼ biaje la? Ti hermana viuda guníʼ: «Zuluáʼ jma jneza guininu ni racané guiaandaʼ ca yuubaʼ ca nga modo iquiiñeluʼ tiempu stiluʼ». Cásica ora ñápanu ti herida ládinu nga ora cayuubaʼ ladxidoʼno: pa guni tendernu cani né cariñu la? chaahuiʼ chaahuiʼ zianda cani. Yanna, ¿xi zanda gúninu para gacanenu tuuxa gutiʼ ti binni ni nadxii para cadi guni sentir stale yuubaʼ yaʼ?

3, 4. ¿Xiñee nuunu seguru riene Jiobá yuubaʼ runi sentirnu ora gatiʼ ti binni ni nadxiinu?

³ Nanna dxíchinu ni jma zanda quixhedxí ladxidoʼno nga Jiobá, Bixhózenu ni riá laanu (biindaʼ 2 Corintios 1:3, 4). Ejemplu stibe nga ni jma galán chinándanu purtiʼ laabe runi sentirbe ni runi sentir sti binni. Dios cudii stiidxaʼ ca xpinni: «Naapiaʼ nga caguixhedxiéʼ ladxidoʼto» (Is. 51:12; Sal. 119:50, 52, 76).

⁴ Laaca maʼ guti caadxi binni ni nadxii Bixhózenu ni riá laanu, casi Abrahán, Isaac, Jacob, Moisés ne rey David (Núm. 12:6-8; Mat. 22:31, 32; Hech. 13:22). Biblia ná racalaʼdxiʼ Dios guedandá dxi gusibani laacabe sti biaje (Job 14:14, 15). Tiempu ca, zabánicabe nayecheʼ ne maʼ qué zaca huarácabe. Cadi guiaandaʼ laanu laaca biiyaʼ Dios pabiáʼ feu modo biiticabe Xiiñiʼ ni nadxii, ni «nabé gunnaxhiibe cada dxi» (Prov. 8:22, 30). Qué zanda guiníʼ íquenu pabiáʼ naroʼbaʼ yuubaʼ biʼniʼ sentir Jiobá (Juan 5:20; 10:17).

5, 6. ¿Ximodo riguixhedxí Dios ladxidoʼno?

⁵ Zanda gápanu confianza zacané Jiobá laanu. Nga runi guxhélenu ladxidoʼno nezalube ne gábinu laabe guiráʼ ni runi sentirnu. Riéchenu gánnanu riénebe ca yuubaʼ stinu ne riguixhedxibe ladxidoʼno órapeʼ caquiiñenu ni. Peru, ¿ximodo rúnibe ni yaʼ?

⁶ Ti modo rúnibe ni nga riquiiñebe espíritu santu para quixhedxí ladxidoʼno (Hech. 9:31). Jesús bidii stiidxaʼ zudii Bixhózenu ni nuu guibáʼ espíritu santu ni guinabaʼ ni laa (Luc. 11:13). Susi, gunaa bizéʼtenu lu primé párrafo que ná: «Stale biaje dede zuxíbidu gunábadu Jiobá quixhedxí ladxidoʼdo. Ne cada biaje que biʼniʼ sentirdu gudixhedxí Dios xquendabiaanidu ne ladxidoʼdo» (biindaʼ Filipenses 4:6, 7).

7, 8. ¿Xiñee zanda gápanu confianza zaguixhedxí Jesús ladxidoʼno?

⁷ Guiráʼ ni biʼniʼ Jesús ne ni guníʼ dxi guyuu lu Guidxilayú bisihuinni nadxii, riene ne runi sentir ni runi sentir binni cásica Bixhoze, Jiobá (Juan 5:19). Biseendaʼ Dios laabe lu Guidxilayú para gacanebe «cani cayuubaʼ ladxidóʼ» ne «cani cayuubaʼ» (Is. 61:1, 2; Luc. 4:17-21). Guiráʼ tu biʼyaʼ pabiáʼ riá Jesús binni, biénebe laacaʼ ora cayacanacaʼ ne biale de laabe gacanebe laacaʼ (Heb. 2:17).

⁸ Dxi guca Jesús joven, nánnanu laaca gudíʼdibe yuubaʼ ridiʼdiʼ binni ora gatiʼ tuuxa xfamilia o tuuxa xhamigu. Zándaca guti José, hombre guca bixhózebe lu Guidxilayú riʼ, dxi nápabe biaʼ 20 iza. * Guiníʼ íquesinu pabiáʼ nagana guca para Jesús, ti binni ni guizáʼ nadxii, gudxiilú yuubaʼ stiʼ ne gacané jñaa, ca biʼchiʼ ne ca bizaʼnaʼ.

9. Dxi gutiʼ Lázaro, ¿ximodo bisihuinni Jesús runi sentir ni runi sentir binni?

⁹ Dxi bicheeche Jesús diidxaʼ, bisihuinni riene binni ne runi sentir ni runi sentírcabe. Casi dxi gutiʼ Lázaro, xhamígube ni nadxiibe, nánnabe zusibánibe laa sti biaje. Neca zaqué, ora bíʼyabe pabiáʼ naná nuu María ne Marta gucaná ladxidoʼbe de qué ñanda nucueezabe laabe ne biinabe (Juan 11:33-36).

10. ¿Xiñee nuunu seguru racanaruʼ Jesús ora guʼyaʼ cayacananu?

¹⁰ Ni biʼniʼ Jesús dxiqué, ¿ximodo racané ni laanu yanna? Biblia ná: «Qué ziuu dxi idxaa Jesucristu de ni naca. Cásica  laabe neegueʼ, zaqueca yanadxí, ne zaqué si guiaana be» (Heb. 13:8). Laabe nga «ni rudii enda nabani» ne nánnabe ximodo nga guni sentir binni yuubaʼ. Nga runi, zanda gacanebe «cani cuquiinde binidxaba laa» (Hech. 3:15; Heb. 2:10, 18). Nga runi zanda chuʼnu seguru racanárube ora gúʼyabe cayacananu. Riénebe laanu ora cadídinu yuubaʼ ne riguixhedxibe ladxidoʼno «ora caquiʼñe nu tu acané laanu» (biindaʼ Hebreos 4:15, 16).

11. ¿Xi versículo jma riguixhedxí ladxidoʼloʼ?

¹¹ Aparte de relatu stiʼ Lázaro, ni nabé bininá Jesús, lu Biblia zeedaruʼ stale versículo ni zanda quixhedxí ladxidoʼno. Ne qué ridxagayaanu ni, purtiʼ «irá ni ucuá lu Xquiʼchi Dios ucuá para usiidi laanu, ti pur laani gata dxí ladxidóʼ no ne cadi ixhacalaʼdxi nu. Ne zacá cadi guiaana nu de icá lú nu Dios» (Rom. 15:4). ¿Ñee maʼ guti tuuxa binni ni nadxiiluʼ la? Pa zacá ni, zanda quixhedxí ca versículo riʼ ladxidoʼloʼ:

• «Jiobá nuu gaxha de cani maʼ gucadé ladxidóʼ; ne rulabe cani maʼ biree gana» (Sal. 34:18, 19).

• «Ora bidale cani ruchiiñaʼ xquendabiaaneʼ, lii gudixhedxiluʼ xhialmaʼ pur guiráʼ ni gúdxiluʼ naa» (Sal. 94:19).

• «Ne Dios Bixhózenu, ni nadxii laanu ne ni riguixhedxí ladxidoʼno ne rudii laanu ti esperanza pur guendanachaʼhuiʼ stiʼ, laa né Señor Jesucristu quixhedxicaʼ ladxidoʼto ne gúnicaʼ laatu naguidxi» (2 Tes. 2:16, 17, TNM). *

12. ¿Xi ti modo risaca zanda quixhedxinu ladxidóʼ xcaadxi?

¹² Cani maʼ guti binnilidxi zanda guidxélacaʼ tu quixhedxí ladxidoʼcaʼ ndaaniʼ congregación. Biblia ná: «Laquixhedxisaa ladxidoʼto cásica cayúnitu ni ne cada tobi guyubi guzuhuaa chaahuiʼ stobi» (1 Tesalonicenses 5:11, TNM). ¿Ximodo zanda guquídxinu ne quixhedxinu ladxidóʼ ca «binni nuu triste» yaʼ? (Prov. 17:22). Cadi guiaandaʼ laanu nuu «tiempu para cadi guininu ne tiempu para guininu» (Ecl. 3:7). Guidúʼyanu xi guníʼ chupa hermana. Ti viuda láʼ Dalene cusiene: «Ca binni ni naná nuu caquiiñecaʼ guiniʼcaʼ xi riníʼ íquecaʼ ne ni runi sentircaʼ. Nga runi, ni jma risaca gúninu pur laacabe nga gucaʼdiáganu sin gucueezanu laacabe». Ti hermana láʼ Junia, gupa ti bizaʼnaʼ ni biiti laca laa, ná: «Zándaca nuu biaje qué ziénenu xi guiráʼ cayuni sentir tuuxa ni gutiʼ ti binni ni nadxii, ni jma risaca nga racaláʼdxinu guiénenu laabe».

13. ¿Xi naquiiñeʼ gánnanu?

¹³ Laaca naquiiñeʼ gánnanu gadxé gadxé modo rusihuinni binni yuubaʼ ni cayuni sentir. Nuu biaje, binni si ni cayacaná ca nga nanna pabiáʼ naná yuubaʼ ni cadiʼdiʼ, ne zándaca gaca nagana para laabe gusiénebe ni. Ngapeʼ nga ni ná Biblia ora ruzeeteʼ: «Nanna dxichi ladxidoʼno xi runiná laa, ne qué ziechené ni tutiica si ni qué runibiáʼ ni» (Prov. 14:10). Ne pa guiníʼ binni ca ni cayuni sentir, zándaca qué ziene xcaadxi ni racaláʼdxibe guiniʼbe.

14. ¿Xiruʼ zanda gúninu para quixhedxinu ladxidóʼ cani cayacaná?

¹⁴ Pur guiráʼ ndiʼ, zándaca gaca nagana para laanu guidxélanu xi gábinu cani  naná nuu ladxidóʼ pur yuubaʼ ni cadíʼdicaʼ. Neca zacá, Biblia ná «diidxaʼ ni riníʼ binni nuu xpiaaniʼ zeeda gaca casi remediu» (Prov. 12:18). Stale xpinni Cristu ridxélacaʼ diidxaʼ para quixhedxicaʼ ladxidóʼ xcaadxi lu folletu Cuando muere un ser querido. * Neca zacá, stale biaje, ni jma jneza gúninu nga chinándanu ni ná conseju riʼ: «Laguuna né cani cayuunaʼ» (Rom. 12:15). Ti hermana viuda láʼ Gaby ná: «Ora guunaʼ nga rusihuinneʼ ni runeʼ sentir. Nga runi, ratadxí ladxiduáʼ ora guʼnané ca xhamiguaʼ naa. Qué runeʼ sentir nuaaʼ stubeʼ lu ca yuubaʼ ca».

15. Pa raca nagana para laanu gábinu xiixa ti binni ora cadúʼyanu laa, ¿xi zanda gúninu para quixhedxinu ladxidóʼ binni? (Biiyaʼ cuadru ni láʼ « Xi zanda guininu para quixhedxinu ladxidóʼ xcaadxi binni»).

¹⁵ Pa raca nagana para laanu gábinu xiixa ti binni ora cadúʼyanu laa, zándaca jma nagueenda gábinu ni laabe lu ti tarjeta, ti correu electrónicu, ti mensaje de textu o ti carta. Zanda gucaʼnu ti versículo para quixhedxí ladxidoʼbe, guininu xiixa galán de binni ni gutiʼ ca o guininu de xiixa ni rietenaláʼdxinu né stale cariñu. Junia ná: «Qué ridxelaʼ diidxaʼ para guinieeʼ pabiáʼ riuaaʼ gana ora gudiicabe naa ti nota ne nabé racané ni naa zaqueca ora guni invitar tuuxa hermana naa para chuʼdu juntu ti ratu. Ca cosahuiiniʼ riʼ nga ni rusietenalaʼdxiʼ naa nuu tu nadxii naa ne rapa naa».

16. ¿Xi sti modo jma galán zanda quixhedxinu ladxidóʼ tuuxa?

¹⁶ Laaca naquiiñeʼ guni orarnu pur cani cayacaná ne guni orarnenu laacabe. Nánnanu nagana nga guni orarnu  ora rizaaca ca ndiʼ. Zándaca zúʼnanu ne dede guilaa stídxinu. Peru ca oración ni rúninu de guidubi ladxidoʼno zanda gacané cani para cadi tan guniná yuubaʼ stícabe laacabe. Dalene, ni bizéʼtenu lu párrafo 12 que, rietenalaʼdxiʼ: «Nuu biaje ora maʼ zeeda ganna ca hermana naa para quixhedxicaʼ ladxiduáʼ, rabeʼ laacaʼ pa zanda gúnicaʼ ti oración. Ora guzulú guni orárcabe, raca nagana para laacabe guiníʼcabe. Peru chaahuiʼ chaahuiʼ maʼ randa riníʼcabe galán ne riluxe rúnicabe ti oración ni rindá ndaaniʼ ladxiduáʼ. Fe stícabe, guendarannaxhii ni nápacabe ne modo rizaaláʼdxicabe naa nabé ruquidxi cani fe stinneʼ».

17-19. ¿Xiñee cadi naquiiñeʼ gusaana de quixhedxinu ladxidóʼ ca hermanu stinu?

¹⁷ Cumu gadxé gadxé nga cada binni la? nuu tu laa jma rindaa para tiidiʼ yuubaʼ ni napa pur guti binnilidxi. Nga runi, cadi ora si nacubi guizaaca xiixa nga chuʼnu ra nuucabe, purtiʼ óraca nuu stale xfamíliacabe ne xhamígucabe. Laaca naquiiñeʼ gacanenu laacabe lu xcaadxi beeu ni tiidiʼ, ora maʼ guirútipeʼ nuu ra nuucabe. Proverbios 17:17 ná: «Ni dxandíʼ xhamígunu la? guiráʼ ora nadxii laanu, ne zácabe ti bíchinu o ti bizánanu ora nápanu xiixa guendananá». Naquiiñeʼ quixhedxinu ladxidóʼ tuuxa biaʼ tiempu caquiiñeʼ gúninu ni (biindaʼ 1 Tesalonicenses 3:7).

¹⁸ Cadi guiaandaʼ laanu ora tiica si zanda guibiguetaʼ chuʼ tuuxa triste. Zanda gaca ni pur ti aniversariu, pur ti canción, ti foto, ora maʼ cayúnibe xiixa o zanda gaca ni pur ti xhoʼ, ti ridxi o lu intiica beeu stiʼ iza. Para binni guti xheelaʼ ca la? zándaca gaca nagana para laabe gúnibe caadxi cosa primé biaje sin xheelabe, casi chebe ti asamblea o Conmemoración. Ti hermanu viudu ná: «Guníʼ iqueʼ nabé naná zaca para naa primé biaje maʼ sin xheelaʼ chigusaʼdu iza de bichaganadu ne zaqué guca ni. Peru biʼniʼ organizar caadxi hermanu ne cani jma xhamiguaʼ ti reuniónhuiiniʼ para cadi chuaaʼ stubeʼ».

¹⁹ Cadi guiaandaʼ laanu cadi ora si ganda xiixa fecha nga zaquiiñeʼ binni ca tu cuʼ gana laa. Junia cusiene: «Nabé galán ora qué rusaanacabe laanu ne racanécabe laanu neca cadi caquiiñeʼ ganda ti aniversariu para gúnicabe ni. Guizáʼ risaca nga ora málasi chigánnacabe laanu ne riguixhedxí ni ladxidoʼno». Dxandíʼ, qué zanda diʼ cueenu yuubaʼ runi sentir tuuxa pur guti ti binni ni nadxii o pur cayuni sentir nuu stubi. Peru zanda gúninu stale cosa para quixhedxinu ladxidoʼbe (1 Juan 3:18). Sicaríʼ rietenalaʼdxiʼ Gaby: «Rudieeʼ xquíxepeʼ Jiobá purtiʼ gucané ca ancianu naa né stale guendarannaxhii ne qué nusaanacaʼ naa órapeʼ cadideʼ lu guendanagana. Bicaacabe naa guneʼ sentir guiidxi dxiichiʼ Jiobá naa guiráʼ ora».

20. ¿Xiñee riguixhedxí ca promesa stiʼ Jiobá ladxidoʼno?

²⁰ Ratadxí ladxidoʼno gánnanu xi chiguni Jiobá, Dios ni riguixhedxí ladxidoʼno, zabeebe guiráʼ yuubaʼ ca tobi si tiru dxi gunadiaga «irá cani nuu ndaani baʼ» stidxi Cristu ne guibánicaʼ sti biaje (Juan 5:28, 29). Maʼ bidii stiidxaʼ Dios zabi «guendaguti ne maʼ qué ziuu dxi chuʼ ni» ne «zuchaa nisa rieeteʼ lú guiráʼ binni» (Is. 25:8). Ora guedandá dxi ca, lugar de guʼnanécabe «cani cayuunaʼ», cani nabani lu Guidxilayú riʼ ziechenecaʼ «cani cayecheʼ» (Rom. 12:15).