1-3. (a) San-o mahimo ginsulat ang Salmo 147? (b) Ano ang matun-an naton sa pagbinagbinag sa Salmo 147?

KON ang isa ka tawo may maayo nga nahimo ukon may maayo nga kinaiya bilang Cristiano, ginadayaw gid sia. Kon ginahimo ini sa tawo, mas labi nga dapat dayawon si Jehova nga Dios! Ginadayaw naton sia bangod gamhanan gid sia, kag makita naton ini sa iya matahom nga mga tinuga. Ginadayaw man naton sia bangod sang pagpalangga niya sa mga tawo sang ginhatag niya ang iya Anak bilang halad-gawad.

² Gindayaw sang manunulat sang Salmo 147 si Jehova. Ginpalig-on man niya ang iban nga mag-upod sa iya sa pagdayaw sa Dios.—Basaha ang Salmo 147:1, 7, 12.

³ Indi naton kilala ang nagsulat sini nga salmo, pero mahimo gid nga nagkabuhi sia sang ginpabalik na ni Jehova ang mga Israelinhon sa Jerusalem halin sa pagkaulipon sa Babilonia. (Sal. 147:2) Gindayaw sang salmista si Jehova bangod nagbalik na ang katawhan sang Dios sa ila duta para sa matuod nga pagsimba. Pero may gindugang pa sia nga mga rason sa pagdayaw kay Jehova. Ano ini? Sa imo bahin, ano ang imo mga rason sa pagsiling sing “Hallelujah!”?—Sal. 147:1, footnote.

4. Sang ginhilway ni Hari Ciro ang mga Israelinhon, ano mahimo ang ila ginbatyag, kag ngaa?

⁴ Handurawa kon ano ang ginbatyag sang gin-ulipon nga mga Israelinhon sa Babilonia. Ginyaguta sila sang mga nagbihag sa ila: “Kantahi ninyo kami sing ambahanon tuhoy sa Sion.” Ginlaglag sadto nga tion ang Jerusalem, ang ila panguna nga kabangdanan sa pagkalipay kay Jehova. (Sal. 137:1-3, 6) Indi makakanta ang mga Judiyo kay nasubuan gid sila, kag nagakinahanglan sila sang lugpay. Pero natuman ang gintagna sang pulong sang Dios sang ginhilway sila ni Ciro nga hari sang Persia. Ginpierde ni Ciro ang Babilonia kag nagsiling sia: “Ginsugo [ako ni Jehova] nga magtukod sing balay para sa iya sa Jerusalem . . . Kabay pa nga mangin kaupod ni Jehova nga iya Dios ang bisan sin-o sa inyo nga nagaalagad sa iya, kag magbalik sia didto.” (2 Cron. 36:23) Nalugpayan gid sa sini ang mga Israelinhon nga nagaistar sa Babilonia!

5. Ano ang ginsiling sang salmista parte sa gahom ni Jehova sa pag-ayo sa aton?

⁵ Ginlugpayan ni Jehova indi lang ang pungsod sang Israel kundi ang kada Israelinhon. Ginalugpayan man ni Jehova ang kada isa sa aton subong. Nagsulat ang salmista parte sa Dios: “Ginaayo niya ang buong sing tagipusuon; kag ginabugkusan niya ang ila mga pilas.” (Sal. 147:3) Nagaulikid gid si Jehova sa mga nagabalatian ukon sa mga nasubuan. Gusto gid ni Jehova nga lugpayan kita kag pahaganhaganon ang aton ginabatyag nga kasakit. (Sal. 34:18; Isa. 57:15) Nagahatag sia sa aton sing kaalam kag kabakod para maatubang naton ang aton mga problema.—Sant. 1:5.

6. Ano ang matun-an naton sa ginsiling sang salmista sa Salmo 147:4? (Tan-awa ang piktyur sa umpisa sini nga artikulo.)

⁶ Nagtulok dayon ang salmista sa langit kag nagsiling nga “ginaisip [ni Jehova] ang kadamuon sang mga bituon” kag “ginatawag niya sila tanan sa ngalan.” (Sal. 147:4) Ngaa ginsambit sang salmista ang mga bituon? Binagbinaga ini: Makita sang salmista ang mga bituon, pero wala sia makahibalo kon daw ano ini kadamo. Subong, mas madamo na gid nga bituon ang puede naton makita. Ginbulubanta sang iban nga binilyon ang bituon sa aton Milky Way nga galaksiya. Kag mahimo nga may mga trilyon ka galaksiya sa uniberso! Indi gid naton maisip ang mga bituon! Pero ang Manunuga naghatag sa ila tanan sing ngalan. Buot silingon, ginatamod ni Jehova nga pinasahi ang kada bituon. (1 Cor. 15:41) Kamusta naman ang mga tawo sa duta nga gintuga niya? Ang Dios nga nakahibalo kon diin subong ang kada bituon nakakilala man sa imo bilang indibiduwal. Nahibaluan gid niya kon diin ka, kon ano ang ginabatyag mo, kag kon ano ang kinahanglan mo!

7, 8. (a) Ano ang nahangpan ni Jehova parte sa aton? (b) Maghatag sing halimbawa nga nahangpan gid ni Jehova ang indi himpit nga mga tawo nga ginabuligan niya.

⁷ Wala lamang nabalaka si Jehova sa imo, kundi nahangpan man niya ang imo kahimtangan kag masarangan niya ikaw buligan sa imo mga problema. (Basaha ang Salmo 147:5.) Basi pamatyag mo indi mo na masarangan ang imo problema. Pero nahibaluan sang Dios kon ano lang ang imo masarangan, kag ‘ginadumdom niya nga ikaw yab-ok lamang.’ (Sal. 103:14) Indi kita himpit, gani sulitsulit kita nga makasala. Nasubuan gid kita kon may nahambal kita nga malain sa iban, may kaluyahon kita nga nagabalikbalik, ukon nahisa kita sa iban. Matuod, wala sing kaluyahon  si Jehova, pero nahangpan gid niya ang ginabatyag naton!—Isa. 40:28.

⁸ Mahimo nga naeksperiensiahan mo na nga ginbuligan ka ni Jehova sang may problema ka. (Isa. 41:10, 13) Halimbawa, naluyahan gid sang buot ang payunir nga si Kyoko sang nagbag-o ang iya asaynment. Paano ginpakita ni Jehova nga nahangpan niya ang problema ni Kyoko? Sa bag-o nga kongregasyon ni Kyoko, madamo nga kauturan ang nakaintiende sang iya ginabatyag. Para sa iya, daw ginasilingan sia ni Jehova: “Palangga ko ikaw, indi lang bangod payunir ka, kundi bangod anak ko ikaw kag nagdedikar ka sa akon. Gusto ko nga mangin malipayon ka bilang akon Saksi!” Sa imo bahin, paano ginpakita sang Labing Gamhanan nga nahangpan ka niya bangod “indi matungkad ang iya kaalam”?

9, 10. Ano ang una nga ginahatag ni Jehova kon nagabulig sia sa aton? Maghatag sing halimbawa.

⁹ May materyal kita nga kinahanglanon. Halimbawa, mahimo ginapaligban mo ang inyo kalan-on. Pero si Jehova ang nagtuga sang duta nga makapatubas sang bastante nga pagkaon, bisan para sa mga boto sang uwak! (Basaha ang Salmo 147:8, 9.) Kon ginapakaon ni Jehova ang mga uwak, makasalig ka nga ihatag man niya ang imo materyal nga mga kinahanglanon.—Sal. 37:25.

¹⁰ Ang pinakaimportante nga ginahatag ni Jehova amo ang aton espirituwal nga kinahanglanon, lakip sa sini “ang paghidait sang Dios nga labaw sa tanan nga paghangop.” (Fil. 4:6, 7) Halimbawa, nabatyagan ni Mutsuo kag sang iya asawa ang pagbulig sa ila ni Jehova sang nag-tsunami sa Japan sang 2011. Maayo na lang kay nakasaka sila sa atop sang ila balay. Pero nadula ang halos tanan nila nga pagkabutang sadto nga adlaw. Nagpaligad sila sang gab-i sa madulom kag matugnaw nga kuarto sa ikaduha nga panalgan sang ila naguba nga balay. Pagkaaga, nangita sila sang bisan ano nga makapalig-on sa ila. Ang nakita lang nila amo ang 2006 Tuigan nga Libro sang mga Saksi ni Jehova. Nabasahan dayon ni Mutsuo ang tig-ulo nga “Ang Labing Malaglagon nga Tsunami sa Kasaysayan.” Parte ini sa linog sa Sumatra sang 2004 nga gintunaan sang tsunami kag madamo gid ang napatay. Amo ini ang pinakamadamo nga napatay sa tsunami. Nagahibi si Mutsuo kag ang iya asawa samtang ginabasa nila ang mga eksperiensia sang mga kauturan. Nabatyagan nila ang pagpalangga kag pag-atipan sang Dios sa ila kay ginhatag niya ang kinahanglan gid nila nga pagpalig-on. Mahigugmaon man nga ginhatag ni Jehova ang ila materyal nga kinahanglanon. Nakabaton sila sing pagkaon kag mga bayo halin sa ila mga kauturan. Pero napalig-on gid sila sang ginduaw sang mga representante sang organisasyon sang Dios ang mga kongregasyon. Nagsiling si Mutsuo: “Daw tupad lang namon si Jehova nga nagaatipan sa kada isa sa amon. Nalugpayan gid kami!” Una nga ginahatag sang Dios ang aton espirituwal nga kinahanglanon, dayon ang aton materyal nga kinahanglanon.

11. Ano ang dapat naton himuon para mabaton naton ang bulig sang Dios?

¹¹ Handa pirme si Jehova sa pagbulig kag sa ‘pagbayaw sa mahagop.’ (Sal. 147:6a) Pero paano naton mabaton ang bulig niya sa aton? Dapat may mabakod kita nga kaangtanan sa iya. Para matigayon ini, dapat kita mangin mahagop. (Sof. 2:3) Ang mga mahagop nagasalig nga ang Dios amo ang magadula sang tanan nga kalautan kag halit nga ginhimo sa ila. Nahamuot gid si Jehova sa ila.

12, 13. (a) Para mabaton ang bulig sang Dios, ano ang dapat naton likawan? (b) Kay sin-o nagakalipay si Jehova?

 ¹² Pero ‘paubson sang Dios ang malauton sa duta.’ (Sal. 147:6b) Indi gid naton gusto nga matabo ini sa aton! Para mabaton naton ang mainunungon nga gugma ni Jehova kag malikawan ang iya kaakig, dapat naton dumtan ang iya ginadumtan. (Sal. 97:10) Halimbawa, dapat naton dumtan ang seksuwal nga imoralidad. Buot silingon, dapat naton likawan ang bisan ano nga makaimpluwensia sa aton nga himuon ini, lakip ang pornograpiya. (Sal. 119:37; Mat. 5:28) Mabudlay gid ini, pero sigurado gid nga pakamaayuhon kita ni Jehova sa aton pagpanikasog.

¹³ Para magmadinalag-on, dapat kita magsalig kay Jehova, indi sa aton kaugalingon. Malipay ayhan sia kon magsalig kita sa “kusog sang kabayo,” nga nagapatuhoy sa ginasaligan sang mga tawo? Indi! Indi man kita dapat magsalig sa “kadasigon sang tawo,” nga daw makahatag kita ukon ang iban nga tawo sing kaluwasan. (Sal. 147:10) Sa baylo, dapat kita magpangayo sing bulig kay Jehova. Indi sia pareho sang mga tawo, kay wala sia natak-an sa pagpamati sa aton mga pangamuyo, bisan pa sulitsulit kita nga nagapangabay sa iya nga buligan kita. “Nagakalipay si Jehova sa mga nagakahadlok sa iya, sa mga nagahulat sang iya mainunungon nga gugma.” (Sal. 147:11) Bangod mainunungon ang iya gugma, makasalig kita nga unungan niya kita kag buligan nga madaug ang aton makasasala nga mga handum.

14. Ano ang nagpalig-on sa salmista?

¹⁴ Ginhatagan kita ni Jehova sang rason para makumbinsi nga buligan niya ang iya katawhan kon may problema sila. Ginpatuhuyan sang salmista ang pagbalik sang mga Israelinhon sa Jerusalem sang nag-amba sia parte kay Jehova: “Ginapabakod niya ang mga pintal sang mga gawang sang imo siudad; ginapakamaayo niya ang imo mga anak sa sulod mo. Nagahatag sia sing paghidait sa imo teritoryo.” (Sal. 147:13, 14) Napalig-on gid ang salmista kay nahibaluan niya nga pabakuron sang Dios ang mga gawang sang siudad para maproteksionan ang mga sumilimba sang Dios.

15-17. (a) Kon kaisa, ano ang ginabatyag naton sa aton mga problema, pero paano ginagamit ni Jehova ang iya Pulong sa pagbulig sa aton? (b) Maghatag sing halimbawa nga nagapakita nga ‘madasig nga nakalab-ot’ ang pulong sang Dios.

¹⁵ Basi nabalaka gid ikaw sa imo mga problema. Mahatagan ka ni Jehova sing kaalam para maatubang ini. Nagsiling ang salmista nga ang iya Dios ‘nagapadala sang iya sugo sa duta; madasig ini nga nakalab-ot didto.’ Dayon, nagsiling sia nga ‘ginatabunan ni Jehova ang duta sang niebe, ginalapta niya ang mapino nga yelo, kag ginapaulan niya ang iya mga yelo,’ kag namangkot ang salmista: “Sin-o ang makaagwanta sang katugnaw sini?” Nagsiling pa sia nga si Jehova ‘nagasugo, kag nagakatunaw ang yelo.’ (Sal. 147:15-18) Ang aton labing maalam kag labing gamhanan nga Dios, nga may gahom sa ulan nga yelo kag niebe, makabulig sa imo nga malampuwasan ang bisan ano nga problema.

¹⁶ Subong, ginagiyahan kita ni Jehova paagi sa iya Pulong, ang Biblia. Kag “madasig ini nga nakalab-ot” sa aton bangod nagahatag dayon sia sing panuytoy kon kinahanglan naton ini. Hunahunaa kon paano ka nabuligan sang Biblia, mga publikasyon sang “matutom kag mainandamon nga ulipon,” JW Broadcasting, jw.org, mga gulang, kag iban pa nga kauturan. (Mat. 24:45) Indi bala kadasig gid kay Jehova sa paggiya sa imo?

¹⁷ Naeksperiensiahan ni Simone ang gahom sang Pulong sang Dios. Nagbatyag anay sia nga wala sia sing pulos, kag nagduhaduha  pa gani sia kon bala nahamuot ang Dios sa iya. Pero kon ginaluyahan sia sing buot, padayon sia nga nagapangamuyo kay Jehova kag nagapangayo sing bulig. Padayon man sia nga nagatuon sang Biblia. Nagsiling sia, “Pirme ko gid mabatyagan ang ginahatag ni Jehova nga kabakod kag panuytoy.” Nakabulig ini sa iya nga mangin malipayon.

18. Ngaa masiling mo nga ginapakamaayo ka sang Dios, kag ano ang imo mga rason nga ‘dayawon si Jah’?

¹⁸ Nahibaluan sang salmista nga ginpakamaayo gid sang Dios ang iya katawhan sang una. Sila lang ang pungsod nga ginhatagan sang Dios sang iya “pulong” kag sang “iya mga pagsulundan kag mga sugo.” (Basaha ang Salmo 147:19, 20.) Subong, ginpakamaayo kita bangod kita lang ang ginatawag sa ngalan sang Dios. Bangod nakilala naton si Jehova kag nagapagiya kita sa iya Pulong, may suod kita nga kaangtanan sa iya. Pareho sa manunulat sang Salmo 147, indi bala madamo ka man sing rason nga ‘dayawon si Jah’ kag palig-unon ang iban nga dayawon sia?