1-3. (a) Kuonekaga Thaburi 147 yandĩkirũo rĩ? (b) Tũngĩĩruta atĩa kuumana na gũthuthuria Thaburi 147?

MŨNDŨ angĩka wega wĩra-inĩ ũrĩa aheetwo, kana onanie ngumo njega ya Gĩkristiano nĩ abataraga kũgaathĩrĩrio. Angĩkorũo ũguo nĩguo kũrĩ harĩ andũ-rĩ, na githĩ tũtikĩrĩ na gĩtũmi gĩa kũgaatha Jehova Ngai o na makĩria? No tũmũgaathe kana tũmũgooce nĩ ũndũ wa hinya wake mũnene, ũrĩa wonekaga kũgerera magegania ma ũũmbi, kana nĩ ũndũ wa ũrĩa ahiũranagia na andũ na njĩra ya wendo, ta ũrĩa onanirie kũgerera kũruta Mũrũ wake arĩ igongona rĩa ũkũũri.

² Mwandĩki wa Thaburi 147 nĩ aatindĩkirũo kũgooca Jehova. Ningĩ nĩ eekĩrire ngoro arĩa angĩ manyitanĩre nake harĩ kũgooca Ngai.—Thoma Thaburi 147:1, 7, 12.

³ Tũtiũĩ nũ wandĩkire Thaburi ĩyo ya 147, no kuonekaga ta mwandĩki ũcio aatũũraga ihinda rĩrĩa Jehova aacokirie Aisiraeli Jerusalemu kuuma ithamĩrio Babuloni. (Thab. 147:2) No mũhaka mwandĩki wa Thaburi angĩatindĩkirũo kũgooca Jehova tondũ andũ a Ngai nĩ maacokete itũũra-inĩ rĩrĩa mangĩahotire gũthiĩ na mbere na ũthathaiya wa ma. O na kũrĩ ũguo, mwandĩki ũcio wa Thaburi no onanirie itũmi ingĩ cia kũgooca Jehova.  Ciarĩ irĩkũ? Ũrĩ na itũmi irĩkũ cia kwanĩrĩra “Haleluya!” ũtũũro-inĩ waku?—Thab. 147:1; Kũg. 19:1.

4. Aisiraeli arĩa maahonokirio nĩ Mũthamaki Kurusu kuuma ithamĩrio-inĩ maaiguire atĩa, na nĩkĩ?

⁴ Ta wĩcirie ũrĩa Aisiraeli maaiguaga rĩrĩa maarĩ ithamĩrio Babuloni. Arĩa maamatwarĩte ithamĩrio mamanyũrũragia makĩmeeraga ũũ: “Tũinĩrei rũĩmbo rũa Zayuni!” Hĩndĩ ĩyo, Jerusalemu, ĩrĩa yarĩ gĩtũmi kĩao kĩnene gĩa kũgooca Jehova, nĩ yaniinĩtwo. (Thab. 137:1-3, 6) Ayahudi matiaiguaga makĩenda kũina. Nĩ maakuĩte ngoro na nĩ maabataraga kũũmĩrĩrio. O na kũrĩ ũguo, Ngai nĩ aahingirie ũrathi wake na akĩmahonokia kũgerera Kurusu, mũthamaki wa Perisia. Kurusu nĩ aahootire Babuloni na akĩanĩrĩra ũũ: “Jehova . . . nĩanjathĩte ngamwakĩre nyũmba Jerusalemu . . . Tondũ ũcio, mũndũ o wothe wa andũ ake ũrĩa wĩ thĩinĩ wanyu-rĩ, Jehova Ngai wake aroikara hamwe nake, nake nĩaambate athiĩ kuo.” (2 Maũ. 36:23) Na githĩ to mũhaka Aisiraeli arĩa maarĩ Babuloni makorũo nĩ momĩrĩirio mũno nĩ ũndũ ũcio?

5. Nĩ ũndũ ũrĩkũ mwandĩki wa Thaburi onire wĩgiĩ hinya wa Jehova wa kũhonania?

⁵ Jehova omĩrĩirie Aisiraeli, ti marĩ o rũrĩrĩ tu no nĩ nginya marĩ mũndũ ũmwe ũmwe. Ũguo noguo kũrĩ o na ũmũthĩ. Mwandĩki wa Thaburi aandĩkire ũũ ũhoro-inĩ wĩgiĩ Ngai: “Andũ arĩa athuthĩku ngoro, nĩ kũhonia amahonagia, akamoha nguraro ciao.” (Thab. 147:3) Jehova nĩ arũmbũyagia arĩa marĩ na mathĩna, makorũo marĩ ma mwĩrĩ kana ma ngoro. Ũmũthĩ, Jehova nĩ akoragwo ehaarĩirie gũtũũmĩrĩria na kũhooreria ironda citũ cia ngoro. (Thab. 34:18; Isa. 57:15) Nĩ atũheaga ũũgĩ na hinya nĩguo tũhote kũhiũrania na thĩna o wothe tũngĩcemania naguo.—Jak. 1:5.

6. Tũngĩgunĩka atĩa nĩ ũhoro ũrĩa mwandĩki wa Thaburi aarĩrĩirie thĩinĩ wa Thaburi 147:4? (Rora mbica kĩambĩrĩria-inĩ gĩa gĩcunjĩ gĩkĩ.)

⁶ Mwandĩki wa Thaburi aracoka akerekeria meciria make igũrũ agatwĩra atĩ Jehova “ataraga njata o ũrĩa ciigana” na “ciothe akaitua marĩĩtwa.” (Thab. 147:4) Nĩ kĩĩ gĩatũmire mwandĩki wa Thaburi ahaane ta agarũra ũhoro akĩambĩrĩria kwarĩrĩria ũhoro wĩgiĩ indo iria irĩ igũrũ? Ta wĩcirie ũndũ ũyũ: Mwandĩki wa Thaburi nĩ angĩahotire kuona njata na maitho make, no ndangĩamenyire kũrĩ njata cigana. Mĩaka-inĩ ĩrĩa ĩhĩtũkĩte, njata iria tũngĩhota kuona na maitho nĩ cingĩhĩte mũno. Andũ amwe meciragia atĩ ngalaksĩ itũ ya Milky Way ĩrĩ iki ĩkoragwo na njata bilioni nyingĩ. Na no gũkorũo na ngalaksĩ tiririoni nyingĩ. Ithuĩ tũtingĩhota gũtara njata. No Mũũmbi aciheaga rĩĩtwa ciothe. Ũguo nĩ kuonania atĩ Jehova onaga o njata ĩrĩ ya mwanya. (1 Kor. 15:41) Ĩ nao andũ arĩa marĩ gũkũ thĩ? Ngai ũrĩa ũmenyaga harĩa o njata ĩrĩ hĩndĩ o yothe nĩ akũũĩ ũrĩ mũndũ kĩũmbe, akamenya harĩa ũrĩ, ũrĩa ũraigua, na kĩrĩa ũrabatara hĩndĩ o yothe.

7, 8. (a) Nĩ maũndũ marĩkũ Jehova aririkanaga akĩhonokia andũ ake kuuma magerio-inĩ? (b) Heana ngerekano ĩronania ũrĩa Jehova onanagia tha agĩteithia andũ matarĩ akinyanĩru.

⁷ Jehova nĩ akuonaga ũrĩ wa bata na makĩria ma ũguo, nĩ arĩ tha na nĩ akoragwo na hinya wa gũgũteithia kũhiũrania na mathĩna ma ũtũũro. (Thoma Thaburi 147:5.) No ũigue ta thĩna ũrĩa ũrĩ naguo ũrĩ mũnene mũno na mũrigo waku ta ũrĩ mũritũ mũno ũndũ ũtangĩhota gũkuua. Ngai nĩ ataũkagĩrũo nĩ maũndũ marĩa ũtangĩhota kũhingia ‘akaririkana atĩ ũrĩ o rũkũngũ.’ (Thab. 103:14) Tondũ tũtirĩ akinyanĩru nĩ tũcokagĩra mahĩtia o marĩa marĩa. Nĩ twĩriraga mũno nĩ ũndũ wa kũhũthĩra rũrĩmĩ rwitũ ũũru, gũkorũo na merirĩria matarĩ mega marĩa mokaga rĩmwe na rĩmwe, kana kũiguĩra ũiru arĩa angĩ nĩ ũndũ wa indo iria marĩ  nacio. Jehova ndahiũranagia na mathĩna ta macio, no nĩ ataũkagĩrũo nĩ ithuĩ na njĩra nene tũtangĩhota gũtuĩria.—Isa. 40:28.

⁸ No ũkorũo wanona ũrĩa guoko kwa Jehova kũrĩ hinya gwagũteithirie kũhiũrania na igerio rĩna na ũgĩtooria. (Isa. 41:10, 13) Ta wĩcirie ngerekano ya mwarĩ wa Ithe witũ painia wĩtagwo Kyoko, ũrĩa wakuire ngoro mũno thutha wa gũtũmwo agatungate kũndũ kũngĩ. Jehova onanirie atĩa atĩ nĩ aataũkagĩrũo nĩ mathĩna marĩa mwarĩ wa Ithe witũ ũcio aahiũranagia namo? Aathamĩra kuũ, Kyoko eekorire athiũrũrũkĩirio nĩ aarĩ na ariũ a Ithe witũ maataũkagĩrũo nĩ ũrĩa aaiguaga. Aiguaga Jehova akĩmwĩra ũũ: “Nĩ ngwendete, ti tondũ tu ũrĩ painia no nĩ tondũ ũrĩ mwarĩ wakwa na nĩ wĩyamũrĩte harĩ niĩ. Ndĩrenda ũkenere ũtũũro waku ũrĩ Mũira wakwa.” Mwene-Hinya-Wothe eyonanĩtie atĩa atĩ “ũmenyi wake ndũrĩ gĩturi” ũhoro-inĩ waku?

9, 10. Nĩ kĩĩ Jehova atũheaga mbere rĩrĩa aratũteithia? Heana ngerekano.

⁹ Rĩmwe mabataro maku no makorũo marĩ ma kĩĩmwĩrĩ. Kwa ngerekano, no ũkorũo ũgĩĩtigĩra atĩ nĩ ũkwaga irio cia kũigana. No Jehova nĩwe wombire mũthiũrũrũko wa ndũire ũrĩa ũtũmaga irio ikũre nginya cia twana twa mahuru rĩrĩa twakaya tũheo irio. (Thoma Thaburi 147:8, 9.) Angĩkorũo Jehova nĩ aheaga mahuru irio, no ũmwĩhoke atĩ nĩ arĩkũheaga mabataro maku ma kĩĩmwĩrĩ o nawe.—Thab. 37:25.

¹⁰ Ũndũ ũrĩa wa bata makĩria nĩ atĩ Jehova nĩ atũrũmbũyagia kĩĩroho, agatũhe “thayũ wa Ngai ũrĩa ũkĩrĩte ũtaũku wothe.” (Afil. 4:6, 7) Ta wĩcirie ngerekano ya mũrũ wa Ithe witũ Mutsuo na mũtumia wake, arĩa monire hinya wa Jehova wa kũmomĩrĩria thutha wa tsunami ya mwaka wa 2011 bũrũri-inĩ wa Japan. Maahonokire gĩkuũ ciarera thutha wa kũhaica nyũmba igũrũ. O na kũrĩ ũguo, nĩ morirũo nĩ hakuhĩ indo ciothe iria maarĩ nacio. Ũtukũ ũcio ũrĩa warĩ na nduma na heho, maikarire rumu yarĩ ngoroba-inĩ ya kerĩ ya nyũmba yao ĩrĩa yathũkangĩtio. Rũcinĩ nĩ maacaririe ũndũ wa kĩĩroho wa kũmekĩra ngoro. Monire o ibuku rĩa Kitabu cha Mwaka cha Mashahidi wa Yehova—2006. O rĩo Mutsuo akĩona gĩcunjĩ kĩrĩ na kĩongo kĩroiga “Tsunami Mbaya Sana Kuwahi Kurekodiwa”. Kĩaragĩrĩria ũhoro wa gĩthingithia kĩrĩa gĩekĩkĩte gĩcigĩrĩra-inĩ gĩa Sumatra mwaka-inĩ wa 2004 na gĩgĩtũma kũgĩe na tsunami ĩrĩa njũru mũno yanoneka thĩinĩ wa thĩ. Mutsuo na mũtumia wake maathomire icunjĩ icio magĩitaga maithori. Nĩ maiguire ũrĩa Jehova omanagĩrĩria kĩĩroho na njĩra ya wendo na ya tha o hĩndĩ ĩrĩa maabataraga kũũmĩrĩrio. Jehova ningĩ nĩ aamaheire mabataro mao ma kĩĩmwĩrĩ. Nĩ aamaheire ũteithio wa irio na nguo kũgerera aarĩ na ariũ a Ithe witũ. No kĩrĩa kĩamomĩrĩirie mũno nĩ gũceererũo kĩũngano-inĩ nĩ ariũ a Ithe witũ a Kamĩtĩ ya Wabici ya Rũhonge. Mutsuo oigaga ũũ: “Ndaiguaga Jehova arĩ hamwe na o ũmwe witũ agĩtũrũmbũiya. Nĩ twomĩrĩirio mũno.” Jehova ambaga gũtũũmĩrĩria na njĩra ya kĩĩroho agacoka agatũhingĩria mabataro maitũ ma kĩĩmwĩrĩ.

11. Arĩa marerĩgĩrĩra kũgunĩka kuumana na hinya wa Ngai wa kũhonokania magĩrĩirũo gwĩka atĩa?

¹¹ Hĩndĩ ciothe Jehova akoragwo ehaarĩirie ‘kũnyitĩrĩra arĩa ahoreri.’ (Thab. 147:6a) No tũngĩgunĩka atĩa nĩ ũteithio ũcio Jehova akoragwo ehaarĩirie gũtũhe? No mũhaka tũkorũo na ũrata mwega hamwe nake. Nĩguo tũkorũo na ũrata ũcio, nĩ tũrabatara gũkũria ngumo ya ũhoreri. (Zef. 2:3) Andũ ahoreri metagĩrĩra Jehova athondeke maũndũ na amateithie rĩrĩa mekĩtwo  maũndũ moru. Jehova nĩ akenagio nĩ andũ ta acio na akametĩkĩra.

12, 13. (a) Nĩ kĩĩ twagĩrĩirũo gwĩthema nĩguo tũgunĩke kuumana na ũteithio wa Ngai? (b) Jehova akenagio nĩ andũ arĩkũ?

¹² Ngũrani na ũguo, “andũ arĩa aaganu [Ngai] nĩ kũharũrũkia amaharũrũkagia o nginya tĩri-inĩ.” (Thab. 147:6b) Ciugo icio ciagĩrĩire kuoywo na ũritũ. Nĩguo tũgunĩke nĩ ũtugi wa Jehova na twĩtheme marakara make, no mũhaka tũthũũre maũndũ marĩa athũire. (Thab. 97:10) Kwa ngerekano, nĩ twagĩrĩirũo gũthũũra ngomanio itagĩrĩire. Ũguo nĩ kuuga no mũhaka twĩtheme ũndũ o wothe ũngĩtũingĩria mehia-inĩ macio, o hamwe na kwĩrorera mbica na maũndũ ma ũũra thoni. (Thab. 119:37; Mat. 5:28) Ũndũ ũcio no ũkorũo ũtarĩ mũhũthũ, ĩndĩ nĩ twagĩrĩirũo kwĩrutanĩria ũrĩa wothe tũngĩhota nĩguo tũgĩe na irathimo cia Jehova.

¹³ Nĩguo tũtoorie mbaara ĩyo, twagĩrĩirũo kwĩhoka Jehova no ti kwĩĩhoka ithuĩ ene. Hihi Jehova no akene tũngĩgeria kwĩhonokia kũgerera “hinya ta wa mbarathi,” ũguo nĩ kuuga, hinya ũrĩa andũ mehokaga? Ndangĩkena. O na tũtiagĩrĩirũo kwĩhoka “magũrũ ma mũndũ,” tũgetua ta tũngĩhota kwĩhonokia kana ta harĩ mũndũ ũngĩ ũngĩtũhonokia. (Thab. 147:10) Handũ ha ũguo, no mũhaka tũhoe Jehova, tũmũthaithe atũteithie. Ngũrani na ataarani a andũ, Jehova ndanogaga nĩ kũigua mathaithana maitũ, o na rĩrĩa tũrahoya atũteithie maita maingĩ. “Jehova-rĩ, aiguaga wega no ũndũ wa arĩa amwĩtigĩri, o arĩa maikaraga metereire ũtugi wake.” (Thab. 147:11) No twĩhoke atĩ nĩ ũndũ wa ũtugi wake, nĩ arĩnyitanaga na ithuĩ na agatũteithia gũtooria merirĩria maitũ moru.

14. Nĩ ũũma ũrĩkũ wekĩrire mwandĩki wa Thaburi hinya?

¹⁴ Jehova nĩ atũheaga mũthingi wa gũkorũo na ma atĩ nĩ arĩteithagia andũ ake hĩndĩ ĩrĩa marabatara ũteithio. Mwandĩki wa Thaburi agĩciria ũhoro wa gũcokio kwa Aisiraeli Jerusalemu, ainire ũũ ũhoro-inĩ wĩgiĩ Jehova: “Amu mĩgĩĩko ya ihingo ciaku nĩamĩĩkĩrĩte hinya; kũu gwaku thĩinĩ-rĩ, nĩarathimĩte ciana ciaku. Atũmĩte gwaku gũtũũre thayũ o nginya ndere.” (Thab. 147:13, 14) No mũhaka mwandĩki wa Thaburi akorũo nĩ omĩrĩirio mũno nĩ kũmenya atĩ Ngai nĩ angĩekĩrire hinya ihingo cia itũũra nĩguo agitĩre athathaiya ake.

15-17. (a) Kwahoteka tũigue atĩa rĩmwe nĩ ũndũ wa magerio maitũ, no Jehova ahũthagĩra Kiugo gĩake atĩa gũtũteithia? (b) Heana ngerekano ĩronania ũrĩa ‘ũhoro wa Ngai ũhanyũkaga narua mũno.’

¹⁵ No ũcemanie na moritũ maratũma ũtangĩke. Jehova no akũhe ũũgĩ wa kũhiũrania na moritũ macio. Mwandĩki wa Thaburi oigire atĩ Ngai wake “arekagia uuge wake ũgakinya gũkũ thĩ; ũhoro wake nĩũhanyũkaga narua mũno.” Ningĩ akĩaria ũhoro wa Jehova gũkorũo arĩ we ‘ũtũmaga kuure tharunji, akahura mbaa, na agaita mbura ya mbembe,’ mwandĩki ũcio wa Thaburi oririe ũũ: “Heho ĩo yake-rĩ nũ ũngĩhota kũmĩĩtiirĩrĩria?” Aacokire akĩongerera atĩ Jehova arekagia “ũhoro wake agatũma itwekũke.” (Thab. 147:15-18) Ngai witũ ũrĩa ũrĩ ũũgĩ wothe na hinya wothe, o we ũgiragĩrĩria mbura ya mbembe na tharunji, no agũteithie gũtooria moritũ o mothe ũngĩcemania namo.

¹⁶ Ũmũthĩ, Jehova atũtongoragia kũgerera Kiugo gĩake, Bibilia. Na “ũhoro wake nĩũhanyũkaga narua mũno” na njĩra ya atĩ akoragwo ehaarĩirie gũtũhe ũtongoria wa kĩĩroho hĩndĩ ĩrĩa tũraũbatara. Ta wĩcirie ũrĩa ũgunĩkaga nĩ ũndũ wa gũthoma Bibilia, gũthuthuria mabuku ma “ngombo ĩrĩa njĩhokeku na njũgĩ,” kwĩrorera JW Broadcasting, gũthoma ũhoro kuuma jw.org, kwaranĩria na athuri a kĩũngano, na kũnyitanĩra na Akristiano arĩa angĩ. (Mat. 24:45) Na githĩ nduonete atĩ Jehova nĩ ahiũhaga narua gũkũhe ũtongoria wake?

¹⁷ Mwarĩ wa Ithe witũ wĩtagwo Simone nĩ  eyoneire hinya wa Kiugo kĩa Ngai. Eeiguaga atarĩ kĩene o na hanini nginya agekĩrĩra nganja kana Jehova no etĩkĩre mũndũ take. O na kũrĩ ũguo, nĩ aahoyaga ategũtigithĩria hĩndĩ ĩrĩa aigua akuĩte ngoro, nĩguo Jehova amũteithie. Ningĩ ndaatiganĩirie wĩruti wake wa Bibilia. Oigaga, “Gũtirĩ hĩndĩ ndĩ ndekora ũndũ-inĩ mũritũ ngaga kuona hinya wa Jehova na ũtongoria wake.” Ũndũ ũcio nĩ ũmũteithĩtie kwĩrutanĩria o ũrĩa angĩhota gũtũũria muonere mwega.

18. Nĩ kĩĩ gĩtũmaga ũigue atĩ nĩ wendetwo nĩ Ngai, na ũrĩ na itũmi irĩkũ cia kwanĩrĩra ‘Goocai Jehova!’?

¹⁸ Mwandĩki wa Thaburi nĩ aamenyaga ũrĩa andũ a Ngai a tene meekagwo maũndũ mega. No o tu maarĩ rũrĩrĩ rũrĩa rwahetwo “ũhoro” wa Ngai, na makamenyithio “mĩtugo ĩrĩa aathanĩte, o na matua marĩa atuĩte.” (Thoma Thaburi 147:19, 20.) Ũmũthĩ, nĩ tũrathimĩtwo tondũ no ithuĩ tu thĩinĩ wa thĩ twĩtanĩtio na rĩĩtwa rĩa Ngai. Tondũ nĩ tũmenyete Jehova na Kiugo gĩake nĩ kĩrutaga wĩra ũtũũro-inĩ witũ, nĩ tũkenagĩra gũkorũo na ũrata wa mwanya hamwe nake. Githĩ ndũrĩ na itũmi nyingĩ njega cia kwanĩrĩra “Goocai Jehova”! na gwĩkĩra arĩa angĩ ngoro o nao manĩrĩre ũguo o ta mwandĩki wa Thaburi ya 147?