1-3. (a) Omarẹ ọke vọ yen e vwo si Une Rẹ Ejiro 147 na? (b) Die yen e se yono nẹ Une Rẹ Ejiro 147?

OHWO da nabọ ruiruo ra vwọ kẹ, yẹrẹ o de dje uruemu oyoyovwin ọvo phia kerẹ Onenikristi, ke jiro. E de se jiri ohworakpọ fikirẹ obo ro ruru, kọyen ofori dẹn re vwo jiri Jihova Ọghẹnẹ! Avwanre se jiro fikirẹ ẹgba rọyen rọ basa-an, ra sa mrẹ womarẹ obo rọ mare; e ji se jiro fikirẹ ẹguọnọ ro dje kẹ ihworakpọ, rọ nabọ teyenphia womarẹ izobo ọtanhirhe rẹ Ọmọ rọyen.

² Ohwo ro si Une Rẹ Ejiro 147 na, nabọ jiri Jihova. O de ji durhie ihwo efa nẹ, e rhi nene ọyen jiro.​—Se Une Rẹ Ejiro 147:1, 7, 12.

³ Avwanre ghwe vughe ohwo ro si une nana-a, ẹkẹvuọvo ọ họhọre nẹ ohwo ro siro, diarọ ọke rẹ ihwo rẹ Izrẹl vwo rhivwin rhe Jesusalẹm vwo nẹ ẹdia rẹ eviẹn vwẹ Babilọn. (Une 147:2) Ọ sa dianẹ aghọghọ ro rhere ọke rẹ ihwo rẹ Ọghẹnẹ vwọ rhoma rhivwin rhe asan rẹ ayen da sa nabọ ga Ọghẹnẹ, yen muro vwo jiri Jihova. Ẹkẹvuọvo, o ji djunute erọnvwọn  efa ri muro vwo ru ọtiọyen. Die yen erọnvwọn na? Die yen se mu we vwo kperi phia nẹ “jiri Ọrovwohwo”?​—Une 147:1.

4. Mavọ yen oma ru ihwo rẹ Izrẹl ọke rẹ Sairọs vwo siobọnu ayen, kẹ diesorọ?

⁴ Di roro ẹdia rẹ ihwo rẹ Izrẹl mrẹ oma rayen phiyọ ọke rẹ ayen vwọ hẹ eviẹn vwẹ Babilọn. Ihwo ri mu ayen na ke vwẹ ayen vwọ jehwẹ, rẹ ayen vwọ ta: “So une ọvo ri Zayọn na kẹ avwanre.” Ọke yena, jẹ a ghwọrọ Jerusalẹm re, rọ dia esiri rẹ aghọghọ rayen. (Une 137:1-3, 6) Ihwo rẹ Ju rhe vwo ẹwẹn rẹ ayen vwọ so une-e. Udu rayen vwirhirin, uchebro vẹ ọbọngan yen ayen guọnọre. Ọke wọ yanran na, vwo nene aroẹmrẹ rẹ Ọghẹnẹ, Sairọs rọ dia ovie rẹ Pẹsha de sivwin ayen. O vwo phi Babilọn kparobọ nu, ọ da ta: “Ọrovwohwo na, . . . nẹ me bọn uwevwi kẹ vwi Jerusalẹm . . . Kohwo kohwo vwẹ ohri rẹ ihwo rọye, Ọrovwohwo Ọghẹnẹ rọye nene dia. E jo kpo.” (2 Ikun 36:23) O muẹro dẹn nẹ eta yena nẹrhẹ oma vwerhen ihwo rẹ Izrẹl rehẹ Babilọn!

5. Die yen ọbuine na ta kpahen ẹgba rẹ esivwon rẹ Jihova?

⁵ Dede nẹ Jihova vwẹ ọbọngan kẹ ẹgborho rẹ Izrẹl kerẹ ẹko, ọ je bọn ohwo vuọvo gan. Ọtiọyen ọ je hepha nonẹna. Vwọ kpahen Ọghẹnẹ, ọbuine na de si: “O sivwe ohwo rẹ udu rọye vwirhiri, ọ gba era rayen.” (Une 147:3) Vwọrẹ uyota, Jihova vwẹrote ihwo ri hirharoku ebẹnbẹn, owenẹ ọ dia ọ rẹ ugboma yẹrẹ ọ rẹ iroro. Jihova muegbe ro vwo bru avwanre uche ji ru udu rẹ avwanre gan. (Une 34:18; Aiz. 57:15) Ọ kẹ avwanre aghwanre vẹ ẹgba rere e se vwo yerin ghene koka koka rẹ ebẹnbẹn re hirharoku.​—Jems 1:5.

6. Erere vọ yen avwanre sa mrẹ vwo nẹ ota rẹ ọbuine na vwẹ Une Rẹ Ejiro 147:4? (Ni uhoho rẹsosuọ na.)

⁶ Ọbuine na de ku ota rọyen rhẹriẹ kpo obo idjuvwu na, rọ vwọ tanẹ Jihova “riẹn unu rẹ isio na, o mu odẹ kẹ ayen ejobi.” (Une 147:4) Die nẹrhẹ ọbuine na ku ota rọyen rhẹriẹ kpo obo idjuvwu na? Di roro: Ọbuine na sa mrẹ isio rehẹ obenu na, ẹkẹvuọvo ọ riẹn uche isio re herọ-ọ. Nonẹna, isio rẹ avwanre mrẹ, rhoma rhi bunphiyọ. Ihwo evo tare nẹ isio rehẹ evun rẹ ekrun rẹ isio re se Milky Way, te ima buebun. Ekrun rẹ isio sansan tiọyen re herọ, te oduduru buebun! Vwẹ ẹro rẹ ohworakpọ, e che se kere aye-en; ẹkẹvuọvo, Ọmemama na mu odẹ kẹ ayen eje. Ọnana djerephia nẹ isio na eje pha ghanghanre kẹ Jihova. (1 Kọr. 15:41) Kẹ avwanre ihworakpọ vwo? Jihova rọ nabọ riẹn oborẹ isio ọvuọvo yan wan, je riẹn asan wọ hepha, obo re da wẹ, vẹ oborẹ wọ guọnọre!

7, 8. (a) Ọmrẹvughe vọ yen Jihova vwo kpahen avwanre? (b) Djudje rẹ oborẹ Jihova gbe arodọnvwẹ kẹ ihworakpọ ri jẹgba.

⁷ Jihova vwo ẹgba, o ji vwo uruemu erorokẹ vẹ ẹguọnọ, ọtiọyena ọ sa chọn wẹ uko vwo yerin ghene ebẹnbẹn wẹn. (Se Une Rẹ Ejiro 147:5.) Wo se no nẹ oborẹ wo hirharoku na vrẹ wẹ oma, oghwa wẹn họhọ nọ kẹ wẹ. Ẹkẹvuọvo, Ọghẹnẹ riẹn asan rẹ ẹgba wẹn teri, “ọ karohọ nẹ avwanre iwurhie.” (Une 103:14) Jẹgba sa nẹrhẹ avwanre vwariẹn oruchọ evo abọ buebun. Ọ da ohwo, siẹrẹ a da ta chọ, nenesi rẹ urhurusivwe rẹ ugboma, yẹrẹ rioma kpahen ihwo efa! O gbe ohwo unu mamọ nẹ Jihova nabọ vwo ẹruọ rẹ ẹdia avwanre, dede nẹ ọ ta chọ yẹrẹ ruẹ chọ-ọ!​—Aiz. 40:28.

 ⁸ Ọ sa dianẹ wẹwẹ komobọ rhiẹromrẹ ukẹcha rẹ Jihova ọke ọvo rọ wanre wo vwo hirharoku ebẹnbẹn evo. (Aiz. 41:10, 13) Kerẹ udje, ọke rẹ oniọvo aye ọvo re se Kyoko rọ ga kerẹ ọkobaro vwọ kua kpo ẹkuotọ ọfa re ghwoghwo, ofu de dje. Mavọ yen Jihova vwo djephia nẹ ọyen vwo ẹruọ rẹ ẹdia rọyen? Kyoko niroso nẹ iniọvo na bicha ọyen, ayen je nabọ vwo ẹruọ rẹ ẹdia rọ hẹpha. Kọ ghwa họhọ nẹ Jihova ta kẹ nẹ, “me vwo ẹguọnọ wẹ, ọ dia fikiridie nẹ wẹwẹ ọkobaro-o, ẹkẹvuọvo kidie wẹwẹ ọmọ mẹ rọ vwomakpahotọ kẹ vwẹ. Me guọnọre nẹ oma vwerhen owẹ kerẹ ọvo usun rẹ Iseri mẹ!” Mavọ yen Jihova vwo djephia vwẹ akpeyeren wẹn nẹ, “ẹruọ rọye vwo oba-a”?

9, 10. Ukẹcha vọ yen Jihova vwọ kobaro? Dje kpahọn.

⁹ Ọkiọvo, wọ sa guọnọ ukẹcha rẹ ugboma. Kerẹ udje, ọ sa dianẹ wọ ro ẹnwan rẹ oborẹ wọ cha re. Ẹkẹvuọvo, Jihova ma otọ na rere emephran kerẹ ikpemu dede sa vwọ mrẹ emu re! (Se Une Rẹ Ejiro 147:8, 9.) Jihova da sa vwẹ emu re kẹdẹ kẹdẹ kẹ ikpemu na, gbe jẹ o muwẹro nẹ ọ cha kẹ wẹ oborẹ wọ ghene guọnọ.​—Une 37:25.

¹⁰ Obo re ma ghanre rẹ Jihova vwọ kẹ avwanre yehẹ erọnvwọn re sa nẹrhẹ esegbuyota avwanre gan, rere avwanre se vwo “ufuoma rẹ Ọghẹnẹ rọ nọ ẹruọ ejobi.” (Fil. 4:6, 7) Kerẹ udje, oniọvo Mutsuo vẹ aye rọyen mrẹ ukẹcha rẹ Jihova ọke rẹ oghwe rode ọvo vwo ku Japan vwẹ 2011. Enu uwevwin rayen rẹ ayen yenri, yen sivwin ayen. Ẹkẹvuọvo, ọgbogho na guọghọ ekuakua rayen eje. Uvun otete ọvo rọhẹ ubruwevwin obenu rẹ uwevwin rayen rọ guọghọre na, kọyen ayen sherhẹn kọkirhie. Asan na djirori, o ji mu ebri. Ọke vwo rhie, kẹ ayen guọnọ oborẹ ayen se vwo ru esegbuyota rayen gan. 2006 Yearbook of Jehovah’s Witnesses kọyen ayen mrẹre. Mutsuo vwo rhie ọbe na, ọ da mrẹ uyovwinrota na, “The Deadliest Tsunamis Ever Recorded.” O shekpahen otọ ro shuru vwẹ Sumatra vwẹ ukpe rẹ 2004, rọ so oghwe rode ra je mrẹ ọkpọ rọyen dẹvo-o. Mutsuo vẹ aye rọyen ke viẹ, rẹ ayen vwo se ikuegbe na. Ayen da rhe mrẹ nẹ Jihova vwọ ẹguọnọ rayen mamọ, rọ vwọ nẹrhẹ ayen mrẹ ọbọngan rẹ ayen ghwa guọnọ dẹn. Jihova je ghẹrẹ ayen vwọrẹ ugboma. Iniọvo na toro emu vẹ ekuakua efa vwo rhe ayen. Jẹ, obo re ma bọn ayen gan, kẹ ọrhuẹrẹphiyotọ rẹ iniọvo evo re ga vwẹ Umẹ Rọvwẹrote Oghọn Ukoko na vwo bru ayen rhe. Mutsuo da ta: “Kọ ghwa họhọ nẹ Jihova mudia kẹrẹ avwanre ohwo vuọvo, rọ vwọ vwẹrote avwanre. Ẹwẹn avwanre ko rhi totọ!” Ọghẹnẹ da bọn esegbuyota avwanre gan nu, kọ kẹ avwanre ukẹcha rẹ ugboma.

11. Die yen ofori nẹ e ru rere a sa vwọ mrẹ ukẹcha rẹ Ọghẹnẹ?

¹¹ Jihova choma ọkeneje rọ vwọ “kpara ohwo re chiyi muotọ vrẹn.” (Une 147:6a) Ẹkẹvuọvo, mavọ yen a sa vwọ mrẹ erere nẹ ukẹcha rọyen? Ofori nẹ e vwo omamọ oyerinkugbe vẹ Ọghẹnẹ. Omaevwokpotọ yen cha nẹrhẹ e se vwo oyerinkugbe tiọyen. (Zẹf. 2:3) Ihwo ri vwo uruemu rẹ omaevwokpotọ, e nabọ chirakon hẹrhẹ ọke rẹ Ọghẹnẹ che vwo phioba phiyọ oshenyẹ vẹ oja rẹ ayen ria. Oma rẹ ihwo tiọyena vwerhen Jihova.

12, 13. (a) Die yen avwanre kẹnoma kẹ, rere a sa vwọ mrẹ ukẹcha rẹ Ọghẹnẹ? (b) Amono yen Jihova vwo omavwerhovwẹn kpahen?

 ¹² Vwọba, Ọghẹnẹ cha “vwẹ ohwo umwemwu phiotọ.” (Une 147:6b) Eta yena vwo ọkpan! Avwanre da guọnọ mrẹ erere vwo nẹ ẹguọnọ ro jẹ rhẹriẹ rẹ Jihova je vrabọ rẹ ophu rọyen, kẹ avwanre vwo utuoma rẹ obo ro vwo utuoma kpahen. (Une 97:10) Kerẹ udje, ofori nẹ avwanre vwo utuoma kpahen ọfanrhiẹn. Ọnana mudiaphiyọ nẹ avwanre me kẹnoma vwọ kẹ kemu kemu rọ sa kpare urhurusivwe rẹ ọfanrhiẹn, ọnana ji churobọ si ihoho rẹ ihwo re banphiyọ. (Une 119:37; Mat. 5:28) Jẹ, ọ cha ghwa lọhọ-ọ, ẹkẹvuọvo ebruphiyọ rẹ Jihova ghanre vrẹ ẹgbaẹdavwọn rẹ avwanre.

¹³ E se vwo phi ẹdia nana kparobọ, kẹ avwanre vwẹroso Jihova. Oma cha sa vwerhọn siẹrẹ avwanre da vwẹroso oborẹ ihwo rẹ akpọ na vwẹroso, yẹrẹ “ogangan rẹ iyesi-i.” O ji fo nẹ a vwẹroso “igbawọ rẹ ohwo-o,” kerẹ asan ra da mrẹ nẹ usivwin se nẹ obọ rẹ avwanre yẹrẹ ihwo efa rhe. (Une 147:10) Ukperẹ ọtiọyen, e jẹ avwanre yare ukẹcha rẹ Jihova. Vwọ fẹnẹ ibruche rẹ akpọ na, ofu ẹrhovwo avwanre che se dje Jihova-a, ọ da tobọ dianẹ avwanre nọkpẹn rẹ ukẹcha mie abọ buebun. “Ọrovwohwo vwo omavwerhe kpahe otu re djẹ oshọ rọye, re vwẹ ẹro so ẹguọnọ rọye ro jẹ rhẹriẹ na.” (Une 147:11) Fikirẹ ẹguọnọ ro jẹ rhẹriẹ rọyen, o muẹro dẹn nẹ o che se chukoku avwanre-e, ọ cha chọn avwanre uko vwo phi iroro echọchọ kparobọ.

14. Imuẹro vọ yen kẹ ọbuine na uduephiophiyawọ?

¹⁴ Jihova kẹ avwanre imuẹro nẹ ọyen cha chọn avwanre uko. Ihwo rẹ Izrẹl vwo rhivwin rhe Jerusalẹm, ọbuine na da so une nana kpahen Jihova: “Ọ vwẹ ogangan kẹ ogbẹn rẹ anurhoro wẹn; ọ vwẹ ebruba kẹ emọ rẹ evun wẹn. O phi ufuoma phihọ ughwru wẹn.” (Une 147:13, 14) Oma vwerhen ọbuine na mamọ rọ vwọ riẹn nẹ Jihova che ru anurhoro rẹ orere na gan rere oma se fu ihwo rọyen!

15-17. (a) Ẹwẹn vọ yen e se vwo kpahen ebẹnbẹn avwanre ọkiọvo, kẹ mavọ yen Jihova vwọ chọn avwanre uko womarẹ Baibol na? (b) Djudje rẹ oborẹ ota rẹ Ọghẹnẹ “djẹ ghwraghwraghwra.”

¹⁵ Dede nẹ ebẹnbẹn evo sa so ẹnwan kẹ wẹ, Jihova sa kẹ wẹ aghwanre wo se vwo yerin ghene ayen. Vwọ kpahen Ọghẹnẹ, ọbuine na da ta: “O ji urhi rọye ro akpọ na ejobi; ota rọye djẹ ghwraghwraghwra.” Ọke ro vwo djisẹ rẹ Jihova kerẹ ohwo ro “siobọ nẹ imicho,” “hra evwru,” je “phi imicho kpokẹ kpokẹ kufia,” ọbuine na da nọ: “Kono se mudia ekpahe rọye?” Vwọba, ọ da je tanẹ Jihova “si unu nẹ ota rọye ọ da wran ayen.” (Une 147:15-18) Ọghẹnẹ rẹ avwanre ro me vwo aghwanre vẹ ẹgba, ro suẹn imicho vẹ evwru na, sa chọn wẹ uko vwo phi koka koka rẹ ebẹnbẹn kparobọ.

¹⁶ Nonẹna, Jihova suẹn avwanre womarẹ Baibol na. “Ota rọyen djẹ ghwraghwraghwra,” kidie kpakpata yen ọ vwọ reyọ odjekẹ rẹ avwanre guọnọre, vwọ kẹ avwanre. Di roro kpahen erere ra mrẹ vwo nẹ Baibol na, ẹbe vẹ erọnvwọn efa rẹ “odibo esiri na” teyan phia, JW Broadcasting re nẹ, wẹbsaiti rẹ jw.org na, ekpako ukoko re chọn avwanre uko, kugbe obicha rẹ ọkieje rẹ iniọvo rẹ ukoko na. (Mat. 24:45) Aphro herọ-ọ, Jihova ghene vwẹ odjekẹ ra guọnọre, vwọ kẹ avwanre kpakpata.

¹⁷ Simone rhiẹromrẹ ẹgba rẹ Ota rẹ Ọghẹnẹ. O nẹ oma rọyen kueku, nẹ  Jihova che se vwo omavwerhovwẹn kpahen ọye-en. Ẹkẹvuọvo, ọke rẹ ofu de dje, kọ nẹrhovwo rhe Ọghẹnẹ nẹ ọ chọn ọyen uko. O ji se Baibol na kọke kọke. Ukuko na, ọ da ta: “Me mrẹ ukẹcha rẹ Jihova vwẹ kẹdia kẹdia ri mi hirharoku.” Ọnana chọn rọ uko vwọ vwẹ ẹro abavo vwo ni oma rọyen.

18. Die yen kẹ wẹ imuẹro nẹ Jihova si we te oma, kẹ die yen se mu we vwo kperi phia nẹ, “Jiri Ọrovwohwo na!”?

¹⁸ Ọbuine na riẹnre nẹ ihwo rẹ Ọghẹnẹ ọvo yen vwo aroesiri rọyen. Ayen ọvo yen Ọghẹnẹ vwẹ “ota,” “ẹgha vẹ irhi rọye kẹ.” (Se Une Rẹ Ejiro 147:19, 20.) Nonẹna, ọyen okpuphẹn rode ra vwọ vwẹ odẹ rẹ Ọghẹnẹ vwo se avwanre. Avwanre vwo omamọ oyerinkugbe vẹ Ọghẹnẹ kidie avwanre riẹn Jihova, avwanre je vwẹ Ota rọyen vwo ruiruo vwẹ akpeyeren avwanre. Kerẹ ọbuine ro si Une Rẹ Ejiro 147 na, erọnvwọn buebun herọ ri se mu we vwo kperi phia nẹ, “Jiri Ọrovwohwo na!” wo mi ji durhie ihwo efa nẹ ayen nene uwe ru ọtiọyen.