1^—3. ა) მუჟამ შილებე იჭარკო 147-ა ფსალმუნქ? ბ) მუშ გურაფა შემლებნა 147-ა ფსალმუნშე?

მუჟამსით პიროვნება ჯგირო ორთ მუშა მენდებულ საქმეს ვარდა ნამდგაინ ქრისტიანულ თვისებას გიმირჩქინანს, შემლებნა ფთქუათ, ცქვაფაშ ღირს რე. თეს კოჩი ქიმსახურენს-და, ბრელით მეტ მიზეზი მიღნა, განვადიდათ იეჰოვა ღორონთი! თის განვადიდენთ უზომე ძალაშენ, ნამუთ იძირე თიშ გუნაჭყეფშე. თეწკუმა ართო, თიშ გურშენ ხოლო ვადიდენთ, ნამდა ხალხიშ ჸოროფა გიმირჩქინ დო მუშ სქუა შეწირ ცოდეფიშ გიშაჸიდირალო.

² იეჰოვაშ განდიდებაშ მიზეზ უღუდ 147-ა ფსალმუნიშ მაჭარალს. თინა შხვეფს ხოლო ელუჩანდ განადიდესკო ღორონთი (წეკითხით ფსალმუნი 147:1, 7, 12). *

³ ჩქი ვამჩქუნა, მიქ ჭარ თე ფსალმუნი, მარა მუჭოთ იძირენ, ფსალმუნმაბირე ცხოვრენდ თი დროს, მუჟამსით იეჰოვაქ ებრაელეფ ბაბილონიშ ტყვეობაშე ირსხ დო იერუსალიმშა დართინუ (ფსალმ. 147:2). ფსალმუნმაბირე განადიდენდ იეჰოვას, მუშენდა  ღორონთიშ ჭყოლოფათ ებრაელეფქ დირთეს მუნეფიშ ქიანაშა დო შეულებდეს თიშ თაყვანიშცემა. თეშ გარდა თიქ, ღორონთიშ განდიდებაშ შხვა მიზეზეფ ხოლო მიჸონ. მუ რდუ თე მიზეზეფ? თქვა მუ მიზეზეფ გიღნა, ადიდადთ იეჰოვა? (ფსალმ. 147:1).

4. მუჭო იგინანდეს დუც ისრაელეფი, მუჟამსით მეფე კიროს ირსხენდ თინეფს ტყვეობაშე დო მუშენ?

⁴ წერმიდგინით, მუჭო გინაფლენდეს დუც ებრაელეფ ბაბილონიშ ტყვეობას. ბაბილონელეფ თინეფს გიაძიცენდეს: „ქომბირით სიონიშ ნამდგაინ ობირეში“. თიმ დროს იერუსალიმ, ნამუთ ხალხშო მთავარ მიზეზ რდუ, იეჰოვათ იხარესკონ, მოჯალაგერ რდუ (ფსალმ. 137:1—3, 6). ათეშგურშენ იუდეველეფს ბირაშ დუდ ვა უღდეს. თინეფ გურგოტახილ რდეს დო გურიშ ექექაფა ოსაჭირდეს. ღორონც წინასწარ აფუდ ნარაგად, ნამდა სპარსეთიშ მეფე კიროსი ირსხენდ თინეფს. თიქ ბაბილონიშ ხეშა ეშაჸოთამაშ უკულ თქუ: „იეჰოვაქ . . . დუმავალ ჸუდე ამშენებუდკო მუშა იერუსალიმს . . . თქვან შკას თიშ ხალხშე მითინ ქორენ-და, იეჰოვა, თიშ ღორონთი ქორდას თიწკუმა დო მიდართას“ (2 მატ. 36:23). მუჭო ეუქექუანდ გურშა საქმეშ თეშნერო ულა ბაბილონს რდესინ თი ისრაელეფს?

5. მუს იჩიებ ფსალმუნმაბირე იეჰოვაშ ძალაშენ, ნამუსით სკილადა შეულებ?

⁵ იეჰოვა, მუჭოთ მთელ ისრაელ ერს თეშ, თითოულ პიროვნებას ხოლო ეუქექუანდ გურშა. ღორონთი ამდღა ხოლო თაშ იქციებ. ფსალმუნმაბირექ ღორონთშენ ჭარ: „თინა ოსკილიდუანს გურგოტახილეფს; უკირუნს ნაჭკირა ადგილეფს“ (ფსალმ. 147:3). იეჰოვა ომინჯ თინეფს, მიდგას ფიზიკურ დო ემოციურ პრობლემეფ უღუ. იეჰოვას ოკო გურშა ემქექუან დო დუმოსკილიდუან ემოციურ ჭუაშე (ფსალმ. 34:18; ეს. 57:15). ათეშენ მარზენა სიბრძნეს დო ძალას, ქუგურზათ პრობლემეფს, ნამდგას შეთმოფხვადუთ (იაკ. 1:5).

6. მუს მოგურუანა ფსალმუნიშ 147:4? (ქოძირით სურათ მა-17 გვერდის).

⁶ თეშ უკულ ფსალმუნმაბირეს ყურადღება გინუღ ზეცაშა დო იჩიებ, ნამდა იეჰოვა „კოროცხუნს მურიცხეფს“ დო „თითოულს სახელით უძახ“ (ფსალმ. 147:4). მუშენ თირუ ფსალმუნმაბირექ თემა დო მუშენ გინიღ ყურადღება ზეცაშა? დეფიფქრათ: ფსალმუნმაბირეს შეულებუდ უჯინკო მურიცხეფს, მარა ვეშულებუდ ქიგეგკო, სინამდვილეს მუსხი მურიცხ არსებენდ ზეცას. მუთ წანეფ მიკურს თეშ, მურიცხეფიშ რიცხვ ირიათო იძინანს. ნამთინე ფიქრენს, ნამდა ჩქინ გალაქტიკას მილიარდობით მურიცხ რე დო შილებე სამყაროშ შხვა გალაქტიკეფს ტრილიონობით მურიცხ ხოლო რდას. ჩქი ვა მაკოროცხენა თინეფი, მარა გუმაჭყაფალს თითოულშა სახელ უჯოხო დო დანიშნულება აფუ მეჩამილ. თავრეშე იძირე, ნამდა ღორონთშო თითოულ მურიცხ განსაკუთრებულ რე (1 კორ. 15:41). მუშ რაგად შემლებნა ღორონთიშ გუნაჭყეფ კათაშენ? ღორონც ზუსტას უჩქუ, მუ დროს, სო რე თითოულ მურიცხი. თეგვარო თინა ხოლო ზუსტას უჩქუ, სო რეთ პირადო თქვა, მუს გინაფლენთ დო მუ გოსაჭირნა!

7, 8. ა) მუს ითვალისწინენს იეჰოვა, მუჟამსით ოხვარ მუშ ხალხის პრობლემეფიშ დროს? ბ) ქიმიჸონით მაგალით, მუჭო ოხვარ იეჰოვა არასრულყოფილ კათას.

⁷ იეჰოვას თითოულიშ პრობლემა გურშა მეუღ დო თეწკუმა ართო ძალა ხოლო უღუ, თე დროს ქიმგეხვარან (წეკითხით ფსალმუნი 147:5). * შილებე ფიქრენდათ, ნამდა მანგარ რთულ სიტუაციას რეთ დო მეტიშ გარზება ვეშეილებნა. მარა ღორონც უჩქ, მუსხი გიმანტირენა დო „ვაჭყორდუ, ნამდა ტვერ ვორეთ“ (ფსალმ.  103:14). არასრულყოფილებაშ გურშენ მინშა ართ დო იგივე შეცთომეფს ვუშვენთ. ალბათ ბნარღენთ, მუჟამსით მუდგაინ მწარეს ფთქუანთ, სწორ ვარენ ფერს მიბკორინუანთ ვარდა მიდგაინიშ მონჯარნა. მართალ რე, იეჰოვას თეცალ კილი ვა უღუ, მარა იშენ ბოლოშა ესმებ ჩქინ დო უჩქ მუჭო ბგინაფლენთ დუც (ეს. 40:28).

⁸ შილებე გუნამორსებ გაფდან, მუჭო მიგეხვარეს იეჰოვაქ პრობლემეფიშ დროს მუშ ძალიერ ხეთ (ეს. 41:10, 13). მაგალთო, ართ პიონერ და კიოკოს ხიოლქ მეუდინ, მუჟამსით მსახურებათ შხვა ტერიტორიას დანიშნეს. მუჭო ოძირუ იეჰოვაქ, ნამდა არჩქილედ თიშ? ახალ კრებას ბრელ და დო ჯიმაქ გემშართ თიშ მდგომარეობაშა. კიოკო თეშ გინაფლენდ დუც, ითამ იეჰოვა ურაგადუდ: „ჩქიმდა მეძღვინელ სქუა რექ თიშენ მიჸორქ, დო ვართ ხოლო პიონერ რექ თიშენ. მოკო ბედნერ რდე, მუჭოთ ართ-ართ ჩქიმ მოწმე!“. თქვან შემთხვევას სოვრეშე იძირე, ნამდა ირფელიშ შემალებე ღორონც ბოლოშა არჩქილე თქვან?

9, 10. პირველ რიგის, მუჭო მუკმოჯინენა იეჰოვა? ქიმიჸონით მაგალით.

⁹ მინშა ჩქინ ოფიქრებელ ფიზიკურ საჭიროებეფ რე. მაგალთო, შილებე ბწუხენდათ თიშენ, ნამდა დასაბაღ ოჭკომალქ ვა მაღვენუან. მარა იეჰოვაქ თეშ გაჭყ დედამიწა, ნამდა ოჭკომალ დასაბაღ რდას არძაშო, ყვარიაშ მართვეშო ხოლო (წეკითხით ფსალმუნი 147:8, 9). * იეჰოვას ყვარიეფ ქოშ დო ოჭკომალს ვარკენს-და, შემლებნა ბჯერდან, ნამდა თინა ჩქი ხოლო ვამმარკენა მუთუნს, მუთ მოსაჭირნა (ფსალმ. 37:25).

¹⁰ მუთ არძაშ უმოს მნიშვნელოვან რენ, იეჰოვა ირფელს ორთ ჩქინ სულიერობაშენ დო მარზენა „მშვიდობას, ნამუთ ირნერ აზრიშე უმოს რე“ (ფილ. 4:6, 7). მაგალთო, ართ მოწმე მუცუოქ დო მუშ ოჯახობაქ მუნეფიშ დუდშა გამორსეს იეჰოვაშ ძალა, მუჟამსით 2011 წანას იაპონიას ცუნამქ მოხვად. დუდიშ გინასკილიდაფარო, მუნეფიშ ჸუდეშ ორთვალშა გეშართეს. თიმ დღას, მუთ ქუღდესინ, ირფელ მიოდინეს. მთელ სერ გვერდო აკოცუმილ ჸუდეშ მაჟია სართულს, გოჸინილ ოთახის გათანუეს. ოჭმარეს თიშნერ მუდგარენიშ გორუა ქიდიჭყეს, ნამუთ გურშა ელუკინანდეს. თინეფქ 2006 წანაშ „იეჰოვაშ მოწმეეფიშ წელიწდეული“ ქოძირეს. მუცუოს თოლშა ქუმუოლ სათაურქ „ცუნამი, ნამუსით ბრელ კოჩიშ ღურაქ მაჸუნ“. თე სტატიას ჭარუდ, მიწისძვრაშე, ნამუთიქ 2004 წანას მოხვად სუმატრას, მუდგას ცუნამქ ქუმაჸუნ დო ბრელ გოჭყორდ. მუჟამსით თე ისტორიას კითხულენდესინ, მუცუო დო მუშ ოჯახობას ჩილამურეფ ელაჸუნდეს. თინეფქ ქიგინეს იეჰოვაშ ელარნა ზუსტას თი დროს, მუჟამსით ოსაჭირდეს. თეს გეძინელ, იეჰოვაქ მატერიალურო ხოლო ქუმკაჯინ თინეფს. სულიერ და დო ჯიმალეფქ, მუსით ოხვილდესინ, ირფელ ქუმუღეს. მარა არძაშ უმოსო თინეფს გურშა ელუკინ ფილიალიშ კომიტეტიშ წევრეფიშ მეულაქ დო ძირაფაქ. მუცუო იჩიებ: „ვორწყედით, ნამდა იეჰოვა ელამრდეს დო მომინჯუდეს. თექ მანგარო ემქექუეს გურშა!“. თაშ ნამდა, იეჰოვა პირველ რიგის სულიერო მუკმოჯინენა დო უკულ ფიზიკურო.

11. მუ რე საჭირო ღორონთშე მოხვარაშ მიოღებელო?

¹¹ იეჰოვა ირიათო მზათ რე მეხვარას მორჩილ კათას (ფსალმ. 147:6 ა). ღორონთიშ მოხვარა მიბღათინ, ჯგირ ურთიერთობა ოკო მიღდან თიწკუმა. თეშო მორჩილება რე საჭირო (სოფ. 2:3). მორჩილ კათა  იეჰოვას უჯინე, მუჟამ მაგვარენს პრობლემეფს დო ბოლოს მუღენს თინეფიშ ტანჯებას. იეჰოვა იწონუანს თეცალ კათას.

12, 13. ა) მუს ოკო ეუჩილითუათ დუდ, ქუმოკონა ღორონთიქ ქიმმეხვარან-და? ბ) მუნერ ხალხი ახარენს იეჰოვას?

¹² ღორონთი მუთუნო ვემირჩქინანს უბადოეფს (ფსალმ. 147:6 ბ). ათეშენ, ქუმოკონა ღორონთიქ ქომიჸოროფუან დო თიშ რისხუას დუდ ეუჩილითუათ-და, გიბჯოგუათ თინა, მუთ ღორონც ჯოგუ (ფსალმ. 97:10). მაგალთო, ბჯოგუდან ოკო სექსუალურ უზნეობა. თენა თის ნიშნენს, ნამდა ვემკვანჭათ მუთუნს, მუთ მემიჸონანა თეცალ საქციელშა, მაგალთო, პორნოგრაფიას (ფსალმ. 119:37; მათ. 5:28). თენა შილებე ადვილ ვა რდას, მარა ჩქინ მონდომა ღირ იეჰოვაშ ხვამაშ მიოღებელო.

¹³ იეჰოვაშ მოხვარაშ უმშო სწორ ვარენ ფერ კორნებეფშა ვამმარიებენა, ათეშენ ოკო მივენდათ თის. ქუმოწონსო ღორონც, მუჟამსით ჩქინ დუდიშ ვარდა შხვეფიშ მენდო ვორეთ? მუშო ოკო რაგად, ვარ. მუჭოთ ბიბლია იჩიებუნ, იეჰოვა „ვართ ცხენიშ ძალათ ხარენს დო ვართ ჩქარას გილმაულარ კუჩხი სიამოვნენს“ (ფსალმ. 147:10). ჩქი იეჰოვას ოკო ბთხუათ მოხვარა. კათაშ გინოწონს, იეჰოვა დღას ვა შურდუ ქიმირჩქილუას ჩქინ ხვეწინ, თიმწკუმა ხოლო, მუჟამსით ართ დო იგივეს ბთხინთ. „იეჰოვას მუშ მოშიშეფ ახარენა, თინეფ მით თიშე ელნა ჯგირობუას“ (ფსალმ. 147:11). ღორონთი ართგურ რე დო თის ვუჸორთ, ათეშგურშენ შემლებნა ბჯერდან, ნამდა ქიმმეხვარებნა გივორჯგინათ სწორ ვარენ ფერ კორნებეფს.

14. მუ უმანგარენდ რწმენას ფსალმუნმაბირეს?

¹⁴ იეჰოვა მარწმუნენა, ნამდა საჭირო დროს მეხვარებ მუშ ხალხის. მუჟამსით იერუსალიმიშ აღდგენაშენ ფიქრენდუნ, ფსალმუნმაბირექ იეჰოვას უბირ: „თიქ გამანგარ სქან ქალაქშა მინაულარ კარეფიშ ოკილარეფ; თიქ დოხვამ თიშ ქომოლსქუალეფი. მშვიდობას არზენს სქან კუნთხუს“ (ფსალმ. 147:13, 14). ფსალმუნმაბირეშო იმენდიშ მუმაჩამალ იჸიდ თიშ რჩქინა, ნამდა ღორონთი გამანგარენდ ქალაქშა მინაულარ კარეფიშ ოკილარეფს დო დეცვენდ მუშ თაყვანიშმცემელეფს!

15^—17. ა) მუჭო შილებე იბგინათ დუდ პრობლემეფიშ დროს, მარა მუჭო მიმეხვარებნა იეჰოვა მუშ სიტყვათ? ბ) მუ გაგებათ „მინჭუაფ ღორონთიშ სიტყვა“?

¹⁵ შილებე თიცალ პრობლემეფ გიღუდან, ნამუთ მანგარო გაწუხენდან. იეჰოვა მერჩანა სიბრძნეს, ნამდა მერუათ თინეფს. ფსალმუნმაბირექ ღორონთიშ გურშენ თქუ, ნამდა „მუშ სიტყვას უტენს დედამიწაშა, მინჭუაფ თიშ სიტყვა“. თეშ უკულ თინა იჩიებ, ნამდა იეჰოვა „ირზენს თირს, ეკმოფაჩუნს გოჸინილ ცუნდის, ორღვანს ჸინს“. ფსალმუნმაბირე კითხვას სვენს: „მის გარზინე თიშ ჸინშა?“. თეშ უკულ თინა იჩიებ, ნამდა იეჰოვა უტენს მუშ სიტყვას დო ონდღულუანს თინეფს (ფსალმ. 147:15—18). ირფელიშ შემალებე დო ირფელ უჩქუნ ფერ ღორონც, ნამუთ ჸინ დო თირს აკონტროლენსინ, შეულებ ქიმგეხვარან, გურზათ ირნერ პრობლემას.

¹⁶ ამდღა იეჰოვა მუშ სიტყვა ბიბლიათ მარზენა ხემძღვანელობას. „თიშ სიტყვა მინჭუაფ“ თით, ნამდა საჭირო დროს სულიერო ბხემძღვანელენა. დეფიქრით, მუჭო მიგეხვარებნა ბიბლიაშ კითხირ, ართგურ დო გონიერ მონაშ მომზადებულ პუბლიკაციეფიშ გიმორკვიება, JW მაუწყებლობაშ ჯინა, jw.org ვებ-გვერდიშ გიმორნაფა, უხუცესეფწკუმა რაგად დო თანაქრისტიანეფწკუმა ურთიერთობა (მათ. 24:45). ქარწყეთ დო ვარ თქვან ცხოვრებას იეჰოვაშ ხეს?

¹⁷ საიმონქ მუშ დუდშა გამორს ღორონთიშ სიტყვაშ ძალა. თის თიშ მანწარათ აწუხენდ უღირსობაშ გრძნობა, ნამდა ოეჭუდ, ქორდ დო ვარ ღორონთიშ თოლს მოსაწონ. მარა რთულ პერიოდის თის ლოცვა  ვემუტებ დო ირიათო თხინდ იეჰოვას მოხვარას. პირად გურაფას ხოლო რეგულარულო ატარენდ. თინა რაგადანს: „დღას ვა პჸოფექ თიცალ სიტუაციას, იეჰოვაშ ძალა დო ხემძღვანელობა ვებგინკონ“. საიმონს თექ მეხვარ, ვა უდინკო ხიოლქ.

18. მუშენ ფიქრენთ, ნამდა ღორონთიშ ხალხი ხვამელ რე დო მუ მიზეზეფ გიღნა, „განადიდათ იაჰი“?

¹⁸ ფსალმუნმაბირეს უჩქუდ, ნამდა ისრაელეფი ღორონთიშ გიშნაგორა რდუ. თინეფ მთელ დედამიწას ხვალე ართ რჯულა რდუ, ნამდგაშა ღორონც მეჩამილ აფუდ მუშ სიტყვა, წესეფ დო სამართალი (წეკითხით ფსალმუნი 147:19, 20). * ამდღა მთელ დედამიწას ხვამელ ხალხი ვორეთ, მუშენდა ხვალე ჩქი გებძნა ღორონთიშ სახელი. მარდულ ვორეთ, მუშენდა იბჩინენთ იეჰოვას, მიღნა თიშ სიტყვა, ნამუსით გიმიბრინუანთ დო ბხარენთ ღორონთწკუმა ხოლოშიან ურთიერთობათ. 147-ა ფსალმუნიშ მაჭარალცალო, ჩქი ხოლო ბრელ მიზეზ მიღნა, „განვადიდათ იაჰი“ დო შხვეფს ხოლო მივეხვარათ თიშ განდიდებას.