1-3. (a) Si nawira gupai nga i ake Atambuahe 147 ti gini regbo? (b) Ginipai rengbe ani ka wirikaha ti wisigo Atambuahe 147?

HO BORO namangi gu sunge ni i nafuhe funi wenengai watadu ho ni nayugu wene sino ni nga ga aKristano, si rẽarẽ i fu tambuahe funi. Ka si du nga wo du si aida pai du tipa aboro, gure tie nga ani na badungu nduapai berani ka fu tambuahe fu Yekova Mbori! Ani rengbe ka fu tambuahe fuko mbiko gu bakere ome du ko na ni, a wa ani abihe ti gu iʹiriwo ahe ko akusihe, watadu ani rengbe ka tambuako tipa wai ko amangapai na aboro ngba wene gene, a wa duhe ni yuguyuguhe ti wai ko afu Wiriko ni motumo tumorii.

² Apai afõngbadu bake Atambuahe 147 ko tambua Yekova. Ko angarasi kura aboro a i kodi tiyo na ko ka tambua Yekova.—Oni gedi Atambuahe 147:1, 7, 12.

³ Ani ainongo gu boro naake gi papara Atambuahe re te, ono si nawira gupai nga gu boro naakehe araki bara ti gu regbo Yekova akaraga aYisaraere Babera yo ku Yerusarema yo. (Tam. 147:2) Pa karaga ga Mbori aboro ku rogo gayo ba ndikidi irisombori aima du nirengo ni gupai naafõngbadu gu bake papara Atambuahe re  ko tambua Yekova. Ono ko aima pe kura nduapai berewe a nga gu naasa ko ko tambua Yekova. Gini nduapai du naadu? Gini nduapai duho rengbe ka sa roni oni “támbua Yekova!” rogo gaoni raka yo?—Tam. 147:1.

4. Ho Bakindo Kurese akusi aYisaraere ni Babera yo, wai du i arengbe kadu, na tipagine?

⁴ Oni berẽnga pa wai agu aYisaraere naadu ni zizi yo Babera yo adu. Agu aboro nazi yo anaamoma yo ni ya: “Oni bi bia sa fu rani nga ga Siona.” Ti gu regbo re, Yerusarema nangia gayo bangbarago kuti Yekova adu ni kina kungboho. (Tam. 137:1-3, 6) Nyemu bibia aadunga ti aYudo te. I adu na rungo kpotoyo yo, na i aida wasa gbiati ngarasaro. Ono tie, ringbisihe kuti gupai Mbori apehe kumbatayo, bata aye vurube Kurese, nangia bakindo aParaso. Ko adibe Babera na ki takipande gupai nga: “Yekova . . . arugu re mi dua bambu fu ko Yerusarema yo . . . Gu ni du dagba roni yo nga gako aboro dunduko, Yekova gani Mbori du na ni. Ni ndu ko yo.” (2 Peka 36:23) Nairiwo gu wene sangbanapai gipai re adu na ni kurii agu aYisaraere naaraka Babera yo!

5. Ginipai Bake papara Atambuahe abihe nibipa gu ome husa du Yekova na ni?

⁵ Yekova aafunga wasa sa fu aYisaraere kina wa i angia rikaaboro te, ono ko afu wasa fuyo ni basasa dunduko a. Kina gu bangisapai re du areme a. Bake papara Atambuahe akepai tipa Mbori ki ya: “Ko nahusa agu yo du na rungo kpotoyo yo, ki vodi gayo aoro a.” (Tam. 147:3) Nirengo, Yekova nangera angera fuo agu aboro du rogo fudifudiapai, singia gu fudifudiapai du ti kpotose watadu gu du kpotose yo a. Areme, Yekova na nyemu ka fu wasa furani na ka zeresa agu aoro du kpotorani yo. (Tam. 34:18; Yes. 57:15) Ko nafu tatamana na ome furani tipa ani sovura kuti agu akpakarapai rengbe ani kadu rogoho dunduko.—Yak. 1:5.

6. Wai du rengbe ani ka gbia undo ti gupai bake papara Atambuahe atona fugo tipaha rogo Atambuahe 147:4? (Oni bi gu sura duti tonatonaha.)

⁶ Sidu, bake papara Atambuahe aʹaria berãko kuti agu ahe du ngbangbaturũ yo, ki pe gupai furani nga Yekova “nageda akerekuru” na “ki niyambu rimo kuti ra dunduko.” (Tam. 147:4) Tipagine du ko aʹaria tiko ti ni ti gupai ko aafura tipaha, kini tona fura tipa agu ahe du ngbangbaturũ yo? Oni berẽnga kurii gipai re: Gu bake papara Atambuahe re aima rengba ka bi akerekuru na bangiriko, ono ko aainongo bangera te. Vuru agu agarã yo susi, bange agu akerekuru rengbe ani ka bira ima nge kisusi. Kura aboro naberãha nga abirioni akerekuru du rogo gu badona akerekuru nisaha ani abihe nga Milky Way galaxy. Na si nawira wa bange abadona akerekuru rogo zegino dunduko ima susa abirioni! Ka ani gedinga akerekuru te nirengo! Ono Bakusiahe nayamba rimo kuti ra dunduko. Gere nayugo gupai nga akerekuru dunduko ni bakiakia bangiri Yekova. (1 Kor. 15:41) Na ginipai du tipa agu aboro ko akusiyo ku auru kpotosende? Gu Mbori naima ino gu ba du ai kerekuru rogoho ti ai regbo ima ino ro, ko ima ino gu ndikidi ba du mo rogoho, wai du mo na gupai mo aidaha ti ai regbo!

7, 8. (a) Ho Yekova abatasa gako aboro ni be fudifudiapai, ginipai ko amaaha ku berãko yo? (b) Oni funga kpiapai nga gu nayugo wai du Yekova na nunga ho ko aundo kpakpa aboro ni.

⁷ Anga kina nyemu ro sa du ti Yekova te, ono ko a na gu ome gbiati nunga si aidaha tipa ka undo ro rogo gu fudifudiapai nga ga raka. (Oni gedi Atambuahe 147:5.) Mo ima rengba ka bihe nga gu pai du mo rogoho ima kpakara ni kerehe na gu tindiro du kuriro ima roa ni kerehe. Yekova ima inopa gamo azangarengba, na ko ‘natingida paro atinga ya nvutu sende nga mo.’ (Tam. 103:14) Mbiko gupai nga ani nga kpakpa aboro, ani namanga aingahe dedede. Nairiwo wai rago naagberã tirani nga ani naainga ngbarani yo, ani na gu nyemuapai tirani nga ga borose,  watadu ani na gu sino tirani nga kaa kpi aboro tipa agu ahe du beyo! Yekova amanganga ngbatunga agu aingahe re te; ono wa vura duhe wo, gako rugatinapai tipa rani ni basukosuko ho na ka i rugunga tise na paha te!—Yes. 40:28.

⁸ Si ima rengba kadu nga mo aima bi wai bee Yekova du ni nyanyakihe aundo ro mo dibe fudifudipai. (Yes. 41:10, 13) Oni bingo gu kpiapai nga ga wirina ni nazakigene du rimori nga Kyoko, nga guri naadu rogo kere gberãrago fuo fuyo vovo sunge furi. Wai du Yekova ayugu gupai nga ko aima rugatiko na gari fudifudiapai? Ho Kyoko adu ni tingba gari vovo sunge, ri abi gupai nga ri adu dagba agu aboro narengbe ka giatiyo na gari akpakarapai. Ri abi gupai nga Yekova aaya furi wẽ: “Mi ima kpinyemu ro, angianga kina mbiko gupai sa nga mo nga nazakigene ya, ono mbiko gupai nga mo nga wire na ni gu boro naima kpara tini fere. Mi naida mo gbia ngbarago rogo raka yo ni boro sa dagba gimi aDezire!” Tipa ro tigamo, wai du gu Mbori Du na Tanduapai Dũ nayugu gupai nga “gako rugatinapai ni basukasuka ha”?

9, 10. Ginihe ani agbiaha mbata ho Yekova aundo rani ni? Oni funga kpiapai.

⁹ Ti kura aregbo, agu apai du mo na zingoho ima rengba kadu nga ga borose. Ni kpiapai, mo ima rengba kaa bakabangiro nga riahe adunga bero ni rengberengbehe tipa rihe te. Ono tie, Yekova du nakusi agu ahe si aidaha tipa ka rũ agu ahe ani arihe! (Oni gedi Atambuahe 147:8, 9.) Ka si du nga Yekova nafu riahe kindi fu azire, mo ima rengba kadu na kido nga ko nika fu agu ahe afu foro nga ga borose mo aidaha.—Tam. 37:25.

¹⁰ Gupai nyakipaha gbe nga, Yekova nafu agu aundo nga ga toro furani, kini fu “gu zereda nga ga Mbori nagasi rugatinapai dunduko.” (Frp. 4:6, 7) Oni bingo gu kpiapai nga ga Mutsuo na diako nga aguyo Yekova amangisunge na gako ome ka undo yo tingbafuo gu bakere sungburosungburo baime nga tsunami naamangi Japan yo rogo 2011. I abiti kurii bambu yo tipa ka bata be gu bakere sungburosungburo baime re. Rogo gu uru re, badungu gayo ahe paha agberẽ. I api rogo bitimo rogo kere zere, rogo gayo bambu naima kpataka. Ho rago agiri ni, i agbata gupai ka ngarasi yo rogo toro yo. Gu yangara buku i arengbe ka bihe angia Buku Garã Nga ga ADezire Yekova Nga ga 2006. Bangiri Mutsuo ati nibasa ti gu riipai nga “The Deadliest Tsunamis Ever Recorded.” Si aafura tipa gu bazigizo naamangi Sumatra yo rogo 2004 nga gu naye na gu kere sungburosungburo ime naamanga mbata rogo zegino ya. Mutsuo na diako aakpara ho i aageda pa agu apai ni namangi ti gu regbo re. I abi gupai nga Yekova du naafu gu ngarasaro nga ga toro re fuyo ti gu regbo i aaidaha re. Yekova aima ngerafuo yo a rogo borose yo. Akurayo aidipase aima fuka ahe fuyo. Ono gupai nanyakasi yo gbe angia pa ye agu aboro narukuba gu riigbu nga ga Mbori ku rogo gayo dungurati. Mutsuo aya: “Si adu wa ka i ya Yekova adu kina boro pati rani kaa ngerafuo rani. Nairiwo gu wasa ani agbiaha re!” Mbori nafu gu undo nga ga toro mbata furani, fuani, ko kini ru ka fu gu nga ga borose.

11. Ginipai si aidaha be agu aboro du na maabangirise ka gbia undo ti gu ome batasa he nga ga Mbori?

¹¹ Yekova ti aregbo dũ nga regerege ka ‘tumba bayee aboro kuari.’ (Tam. 147:6a) Ono wai rengbe ani ka gbia undo ti gako du regerege ka undo rani? Si naida ani du na wene pagume dagbarani na ko. Tipa kadu na wene pagume na ko, si naida ani sonosi gu sino nga ga umbasitise. (Zef. 2:3) Aboro umbasitise napido Mbori ko rugusi ai gu irairapai kadu ho, na ki di gu fudifudiapai kusayo i agbia  tiyo na ni. Yekova ima ida na gu ngbatunga aboro re.

12, 13. (a) Tipa ka gbia undo be Mbori, ginipai si aida ani nehe? (b) Ada rago angba ti Yekova na yo?

¹² Tipa gbegberẽ aboro tigayo, Mbori “namefa [yo] ku sande.” (Tam. 147:6b) Kere nyanyaki afugo du du re! Tipa ka gbia undo ti ga Yekova bangabanga nyemuse na ki banda tirani be gako zinga, si naida ani sogo gupai ko asogaha. (Tam. 97:10) Ni kpiapai, si naida ani ne bari na meteka. Naida ka ya si naida ani ne agu apai dunduko rengbe ka sarani ani mangi gu irairapai re, kodihe na agu ahe nazingisa nyemu kodaba. (Tam. 119:37; Mt. 5:28) Si ima rengba kadu ni mbumbuhe ka sovura kuti gipai re, ono gbia ga Yekova maku ima kio ti gu ome ani ka mangaha ka diabehe.

¹³ Wa ani aso gi vura re, si naida ani du na kido kuti Yekova angianga kuti tirani ya. Ya mo ko adu na ngbarago ka ani asadi ka batasa tirani na gu “ngarã nga ga farasi,” yo aboro naagbata undo ni? Oó! Na si aidanga a ani kido kuti “ndu boro,” kini mangi wa ka i ya ani watadu kura boro ima rengba ka batasa rani te. (Tam. 147:10) Kuba gure, si naida ani fura na Yekova ki sana ko ko undo rani. Omeko abatanga be gaani akparakpee, wa agu abafurugute nga wiri aboro te, ka ani vura ka kpara fuko tipa undo bara dunguhe vurũ. “Rago nangba ti Yekova kina be agu yo nagunde ti ko, nga agu yo namaa bangiriyo kuti gako weneringise.” (Tam. 147:11) Ani ima rengba kadu na kido nga rogo gako bangabanga nyemuse yo, ko nika ka aka kuti rani na ki undo rani ani dibe gaani iraira nyemuapai.

14. Ginipai nanyakasi bake papara Atambuahe?

¹⁴ Yekova nafu gu ndupai furani si aida ani idi ti ni nzunzu kuti gupai nga ko nika undo gako aboro aundo ho i nika ida undo ni. Ho bake papara Atambuahe aberãpa bungia Yerusarema ni, ko abibia tipa Yekova ki ya: “Ko nanyakasa angbongbo susu gaoni akpuguru; ko nafu maku fu agu awironi nadu rogo roni yo. Ko nafu zereda kuti gaoni ababandarago.” (Tam. 147:13, 14) Nairiwo gu pa kido nangia ha fu bake papara Atambuahe ka ino gupai nga Mbori nika nyakasa angbongbo susu akpuguru tipa ka banda airisiko!

15-17. (a) Wai du rengbe ani ti kura aregbo kaa bi gaani akpakarapai, ono wai du Yekova amangasunge na Fugoko ka undo rani? (b) Oni funga kpiapai tipa wai ‘Fugo Mbori aora ni ipo.’

¹⁵ Mo ima rengba ka gbia tiro na akpakarapai nga gu rengbe ka saro mo du rogo bakabangirise. Yekova ima rengba ka fu gu tatamana foro mo aidaha tipa ka sovura kuti agu akpakarapai re. Bake papara Atambuahe aya tipa gako Mbori wẽ “ko nakeda sangbako ku auru kpotosende; gako pai naora ni ipo.” Fuo gure, ho bake papara Atambuahe aafura ni tipa Yekova ki ya ko ‘nafu kputakputa mai, kini gbandaka dododo kputakputa ndomo, na kini bafu zerarago,’ ko asanahe ki ya: “Da rengbe ka ru ti rago gako zerarago?” Ko aya berewe wẽ, Yekova “nakeda gako pai ki nizaragasi he.” (Tam. 147:15-18) Gaani tatamanatatamana Mbori, du na bakere ome tiko, nga guko du na ome kurii morogumba gbiati zerarago ima rengba ka undo ro mo dibe agu akpakarapai dunduko rengbe mo ka gbia tiro na ni.

¹⁶ Areme, Yekova nanungusa rani na Fugoko, nga Ziazia Kekeapai. Na “gako pai naora ni ipo” rogo gu gene nga ko na nyemu ka fu arugapai nga ga toro furani ho ani aidaha ni. Mo berẽnga pa wai mo agbia undo ti geda Ziazia Kekeapai, ti geda agu awaraga nga ga ‘ruru kangara moyambu,’ ti bi JW Broadcasting, ti ndu ku rogo jw.org, ti fura na abaakumba, na ti koda tiro na akuaro aKristano. (Mt. 24:45) Ya mo mo abingo gupai nga Yekova na nyemu ka fu undo foro ni ipo te?

¹⁷ Wirina nga Simone ima bi gu ome nga ga Fugo Mbori rogo gari raka. Ri anaabi tiri nga sunge ti ri te, si ki sari ri tona kaa kapa akapa  singia ri nga ngbatunga gu boro rengbe Mbori ka ida na ni. Ono tie, ti agu aregbo ri anidu rogo gberãrago, ri ani kpatagara kuti kparakpee, kini sana Yekova tipa undo. Ri anaamanga gari wisigopai nisase nga ga Ziazia Kekeapai a. Ri aya, “Mi aadunga mbata rogo pai yo ka mi abingo Yekova ko nafu ome fere gbiati undo ya te.” Gipai re ima undo ri ri du na wene bipai.

18. Tipagine oni abihe ti ni nga Mbori ima ngba na oni, na gini nduapai du beroni ka kpara kuari nga ‘Ani támbua Yekova!’?

¹⁸ Bake papara Atambuahe aima ino pa wai Mbori angba na gu gako aboro naadu mbata. Kina yo sa nangia gu yangara rikaaboro Mbori afu “gako pai” na “gako rugaapai na gako asarangbanga” fuyo. (Oni gedi Atambuahe 147:19, 20.) Areme, si ni pa maku furani kadu ni gu yangara aboro auru kpotosende du rimo Mbori rirani. Mbiko pa ino ani Yekova na pa mbu ani Fugoko si nimangisunge rogo gaani raka yo, ani ima ye kadu na wene pagume na ko. Wa kina bake Atambuahe 147, ya mo anga oni na dungu nduapai beroni ka ya ‘Ani támbua Yekova!’ na kini ngarasi kura aboro i mangi kina gu bangisa pai re te?