1. Ania ti masapul a desisionan dagiti agtutubo, ngem apay nga awan ti masapul a pagdanaganda? (Kitaen ti ladawan iti rugi ti artikulo.)

DAKAYO nga agtutubo, sigurado nga agplanokayo nga umuna sakbay nga agbiahekayo. Ti biag ket kas iti panagbiahe, ket ti panawen ti panagplano no sadino ti kayatyo a pangiturongan iti biagyo ket bayat nga agtutubokayo pay. Siempre, saan a kas karina ti agplano. Kuna ti balasang a ni Heather: “Makapadanag ta masapul nga agdesisionka no ania ti pangusaram iti intero a biagmo.” Ngem saankay nga agdanag. Kuna ni Jehova kadagiti agdaydayaw kenkuana: “Dika agtalangkiaw [wenno, agdanag], ta siak ti Diosmo. Patibkerenkanto. Pudno a tulongankanto.”—Isa. 41:10.

2. Apay a makunam a kayat ni Jehova nga agplanoka iti naragsak a masakbayan?

² Ibagbaga ni Jehova kenka nga iplanom a naimbag ti masakbayam. (Ecl. 12:1; Mat. 6:20) Kayatna a naragsakka. Makitam dayta iti kinapintas, uni, ken raman dagiti pinarsuana. Panunotem ti panangaywanna kadatayo ken no kasano nga isursuronatayo iti kasayaatan a pangusarantayo iti biagtayo. Kuna ni Jehova kadagiti saan a mangsursurot iti balakadna: “Piniliyo ti banag a saanko idi a pagragsakan. . . . Adtoy! Dagiti bukodko nga adipen agrag-odanto, ngem dakayo agsagabakayto iti pannakaibabain. Adtoy! Dagiti  bukodko nga adipen agdir-idanto a sirarag-o gapu iti nasayaat a kasasaad ti puso.” (Isa. 65:12-14) Maidaydayaw ni Jehova no nasayaat ti desision dagiti adipenna.—Prov. 27:11.

3. Ania ti irekomenda ni Jehova kenka?

³ Ania dagiti plano nga irekomenda ni Jehova kenka? Pinarsuana ti tao nga agbalin a naragsak babaen ti panangam-ammo iti Dios ken ti matalek a panagserbida kenkuana. (Sal. 128:1; Mat. 5:3) Dayta ti dakkel a nakaidumaanda kadagiti animal, a naragsakdan a mangan, uminum, ken agpaadu. Kayat ti Dios nga agbalinka a naragsak babaen ti panangiplanom saan la a kadagiti banag a mangparparagsak kadagiti animal. Ti Nangparsua kenka ket ti “Dios ti ayat,” ken “naragsak a Dios,” a nangaramid iti tao “iti ladawanna.” (2 Cor. 13:11; 1 Tim. 1:11; Gen. 1:27) Agbalinka a naragsak no tuladem ti naayat a Diostayo. Nariknam kadin nga agpayso ti ibagbaga ti Biblia nga, “Ad-adu ti kinaragsak iti panangted ngem iti panangawat”? (Ara. 20:35) Pudno dayta iti biag ti tao. Talaga a kayat ni Jehova a nakasentro dagiti planom iti panangayat iti dadduma ken iti Dios.—Basaen ti Mateo 22:36-39.

4, 5. Ania ti nangparagsak ken Jesus?

⁴ Ni Jesu-Kristo ti perpekto a pagtuladanyo nga agtutubo. Nakiay-ayam met ken nagragragsak ni Jesus idi ubing. Kuna ti Biblia nga adda ‘tiempo ti panagkatawa ken tiempo ti panaglagtolagto.’ (Ecl. 3:4) Nagbalin met a nadekket ni Jesus ken Jehova babaen ti panangadalna iti Kasuratan. Idi 12 ti tawenna, nasdaaw dagiti agisursuro idiay templo iti “pannakaawatna ken kadagiti sungbatna” maipapan kadagiti naespirituan a banag.—Luc. 2:42, 46, 47.

⁵ Naragsak ni Jesus uray idi adulton. Apay? Ammona a kayat ti Dios nga ‘ideklarana ti naimbag a damag kadagiti napanglaw ken isublina ti panagkita dagiti bulsek.’ (Luc. 4:18) Ti panagtulnogna iti Dios ti nangparagsak kenkuana. Kuna ti Salmo 40:8 maipapan iti rikriknana: “Ti panangaramid iti pagayatam, O Diosko, nagragsakak.” Naragsakan ni Jesus a mangisuro kadagiti tattao maipapan ken Amana. (Basaen ti Lucas 10:21.) Naminsan, kalpasan a sinuruan ni Jesus ti maysa a babai maipapan iti pudno a panagdayaw, kinunana kadagiti adalanna: “Ti taraonko isu ti panangaramidko iti pagayatan daydiay nangibaon kaniak ken panangturposko iti trabahona.” (Juan 4:31-34) Ti panangayat ni Jesus iti Dios ken iti dadduma ti nangparagsak kenkuana. Rumagsakka met no aramidem ti inaramidna.

6. Apay a nasayaat no makisaritaka kadagiti naespirituan a Kristiano maipapan kadagiti planom?

⁶ Naragsak ti panagbalin nga agtutubo ti adu a Kristiano gapu ta nagpayunirda bayat nga agtutuboda. Apay a dimo padasen a kasarita ti dadduma kadakuada maipapan kadagiti planom? ‘Adda pannakapaay dagiti gakat [wenno, plano] no awan ti kompidensial a saritaan, ngem iti kinaadu dagiti manangbalakad adda maitungpal.’ (Prov. 15:22) Mabalin nga ibaga dagita a naespirituan a tattao a dakkel ti masursurom iti panagpayunirmo a makatulong iti biagmo. Kalpasan a nagsursuro ni Jesus iti Amana idiay langit, intultuloyna ti nagsursuro bayat ti ministeriona. Kas pagarigan, nariknana ti ragsak ti panangasaba ken ti panagtalinaed a matalek uray iti narigat a kasasaad. (Basaen ti Isaias 50:4; Heb. 5:8; 12:2) Kitaentayo ti dadduma a pamay-an ti panagserbi iti amin-tiempo a mabalin a mangparagsak kenka.

7. Apay nga adu nga agtutubo ti maragragsakan iti panagaramid iti adalan?

⁷ Imbilin ni Jesus a ‘mangaramidtayo iti ad-adalan’ ken isurotayo ida. (Mat.  28:19, 20) No planom dayta, pilpiliem ti kararagsakan a pangusaram iti biagmo ta maidaydayawmo ti Dios. Kas iti dadduma a trabaho, kasapulan ti panawen tapno lumaingka iti dayta. Kuna ni Timothy, a nagpayunir idi tin-edyer pay: “Magustuak ti agserbi ken Jehova iti amin-tiempo ta maipakitak ti ayatko kenkuana. Idi damo, awan ti mayadalak iti Biblia, ngem awan pay makabulan kalpasan nga immakarak iti teritoria, addan sumagmamano nga iyad-adalak. Maysa kadakuada ti makigimgimongen. Kalpasan ti panagadalko iti dua a bulan iti Bible School for Single Brothers, * naibaonak iti sabali a lugar ket uppat ti nairugik nga iyadalan iti Biblia. Magusgustuak nga isuro dagiti tattao aglalo no makitak a tultulongan ida ti nasantuan nga espiritu nga agbalbaliw.”—1 Tes. 2:19.

8. Ania ti inaramid ti dadduma nga agtutubo a Kristiano tapno ad-adu ti matulonganda nga agbalin nga adalan?

⁸ Adda met dagiti kakabsat a nagsursuro iti sabali a lengguahe. Kas pagarigan, kuna ni Jacob a taga-North America: “Idi agtawenak iti pito, adu ti klasmeytko a Vietnamese. Kayatko a kasarita ida maipapan ken Jehova, isu a sinursurok ti lengguaheda. Dakkel ti naitulong ti panangikomparak ti English a Pagwanawanan iti Vietnamese. Nakigayyemak met kadagiti kakabsat iti Vietnamese a kongregasion iti asidegmi. Nagpayunirak idi 18 ti tawenko. Idi agangay, nagadalak iti Bible School for Single Brothers. Nakatulong kaniak dayta iti teritoriak ita kas payunir. Siak laeng ti panglakayen iti grupo nga agsasao iti Vietnamese ditoy. Adu a Vietnamese ti masmasdaaw ta nasursurok ti lengguaheda. Pastrekendak iti balayda, ket masansan a mayadalak ida. Nagpabautisaren ti dadduma kadakuada.”—Idilig ti Aramid 2:7, 8.

9. Kasano a makaited iti nasayaat nga edukasion ti panagaramid iti adalan?

⁹ Nagsayaat nga edukasion ti maited ti panagaramid iti adalan ta suruannaka nga agbalin a nagaget, nalaing a makisarita, nataktika, ken dumakkel ti kompiansam iti bagim. (Prov. 21:5; 2 Tim. 2:24) Tulongannaka pay nga agbalin a mas pamiliar kadagiti nakaibasaran ti pammatim iti Biblia. Masursurom met no kasano ti agbalin a nadekdekket a katrabahuan ni Jehova.—1 Cor. 3:9.

10. Kasano nga agbalinka a naragsak iti panagaramid iti adalan uray no manmano ti interesado iti teritoriayo?

¹⁰ Mabalinmo latta ti agbalin a naragsak iti panangaramid iti adalan uray no manmano ti interesado iti lugaryo. Agkasapulan dayta iti panagtitinnulong. Agkakadua ti intero a kongregasion a mangbirok kadagiti interesado. Uray maysa laeng a kabsat ti makasapul iti agbalin nga adalan, maragsakantayo amin ta timmulong ti intero a kongregasion iti panagbirok. Kas pagarigan, siam a tawen a nangaskasaba ni Brandon iti teritoria a manmano ti interesado. Kunana: “Magustuak ti mangasaba ta ipapaaramid dayta ni Jehova. Nagpayunirak kalpasan a naghayskulak. Naragsakak a mangparparegta kadagiti agtutubo iti kongregasion ken makakitkita iti panagrang-ayda. Kalpasan ti panagadalko iti Bible School for Single Brothers, naibaonak nga agpayunir iti sabali a lugar. Awan a pulos kadagiti iyad-adalak iti dayta a teritoria ti nagbautisar, ngem adda nagbautisar nga iyad-adalan ti dadduma. Naragsakak ta implanok idi ti ad-adda pay a makiraman iti panangaramid iti adalan.”—Ecl. 11:6.

11. Ania a sagrado a panagserbi ti pagragsakan nga ar-aramiden ti adu nga agtutubo?

¹¹ Adu ti pamay-an a makapagserbitayo ken Jehova. Kas pagarigan, adu nga agtutubo  ti agbolboluntario iti konstruksion. Ginasut a Kingdom Hall ti kasapulan. Sagrado a panagserbi dayta a mangidaydayaw iti Dios ken mangparagsak kenka. Kas iti dadduma a pamay-an ti panagserbi, makaparagsak ti pannakilangen kadagiti kaduatayo nga agtrabaho. Makasursuroka met iti trabaho a panagibangon. Tulongannaka nga agbalin a sipapanunot iti kinatalged iti panagtrabaho, agbalin a nagaget, ken makitinnulong kadagiti mangidadaulo.

12. Ania ti dadduma nga oportunidad a mabalin a pangiturongan kenka ti panagpayunir?

¹² Kuna ni Kevin: “Idi ubingak, pampanunotekon ti agserbi ken Jehova iti amin-tiempo. Nakapagpayunirak met laengen idi 19 ti tawenko. Sinuportarak ti bagik babaen ti panag-sideline-ko iti karpintero a kabsat. Nasursurok ti agikapet iti atep, tawa, ken ridaw. Idi agangay, dua a tawen a nakikaduaak iti relief team a tumultulong kadagiti nabagyo, ket nagipatakder ken nagtarimaankami kadagiti Kingdom Hall ken balay dagiti kakabsat. Idi naammuak nga agkasapulan ti South Africa kadagiti boluntario iti konstruksion, nagaplayak ket naawisak. Ditoy Africa, kalpasan ti sumagmamano a lawas a panagtrabahok iti maipatpatakder a Kingdom Hall, umakarak manen iti sabali. Kaslakam la agkakapamilia iti grupomi. Agkakaduakami iti pagyanan, iti panagadal iti Biblia, ken iti panagtrabaho. Naragsakak met a makikadua kadagiti kakabsat a mangasaba iti kada lawas. Dagiti planok idi ubingak ti nangyeg iti adu a ragsak a diak pulos ninamnama.”

13. Apay a maragragsakan dagiti agtutubo nga agserserbi iti Bethel?

¹³ Adda itan iti Bethel ti dadduma a nagplano idi nga agserbi ken Jehova iti amin-tiempo. Naragsak ti agserbi iti Bethel ta para ken Apo Jehova ti amin nga aramidem sadiay. Tumultulong ti Bethel tapno  maisagana dagiti naespirituan a taraon. Kuna ti Bethelite a ni Dustin: “Idi siam ti tawenko, implanok ti agserbi iti amin-tiempo, ket nagpayunirak idi nagleppasak iti hayskul. Kalpasan ti maysa ket kagudua a tawen, naawisak iti Bethel. Nasursurok ti computer programming ken ti agusar iti printing press. Naragsakak ditoy Bethel ta maam-ammuak a mismo ti panagrang-ay ti trabaho a panangaramid iti adalan iti intero a lubong. Magustuak ti agserbi ditoy ta makatulong ti ar-aramidenmi kadagiti tattao tapno mayasidegda ken Jehova.”

14. Ania ti aramidem tapno makapagserbika iti amin-tiempo?

¹⁴ Kasanoka a makapagplano tapno makapagserbika iti amin-tiempo? Nakapatpateg a maaddaanka kadagiti naespirituan a kababalin tapno ad-adda a makapagserbika ken Jehova. Ipasnekmo ngarud nga adalen ti Sao ti Dios, utobem a naimbag ti kaipapananna, ken mangbirokka kadagiti pamay-an a maipakitam ti pammatim kadagiti gimong. Bayat nga ages-eskuelaka, mabalin a masursurom dagiti abilidad a makatulong tapno lumaingka a mangasaba. Sursuruem nga ipakita ti interesmo kadagiti tattao babaen ti naannad a panangammom iti opinionda ken ti panangdengngegmo a naimbag kadakuada. Mabalinmo met ti agboluntario iti kongregasion, kas iti panangdalus ken panangmantener iti Kingdom Hall. Maragsakan ni Jehova a mangusar kadagiti napakumbaba ken sisasagana nga agpausar. (Basaen ti Salmo 110:3; Ara. 6:1-3) Inawis ni apostol Pablo ni Timoteo iti panagmisionero ta “naimbag ti damagna kadagiti kakabsat.”—Ara. 16:1-5.

15. Kasanoka a makapagsagana tapno adda pangsuportam iti bagim?

¹⁵ Gagangay a kasapulan dagiti payunir ti pangsuportada iti bagida. (Ara. 18:2, 3) Mabalin a makatulong ti ababa a kurso tapno makastrekka iti part-time a trabaho a kasapulan iti lugaryo. Bayat nga agplamplanoka, kasaritam ti manangaywan iti sirkitoyo ken dagiti payunir iti lugaryo. Damagem no ania a trabaho ti kasayaatan kadagiti payunir. Ken kuna ti Biblia nga “iyadanim dagiti aramidmo ken Jehova a mismo ket dagiti gakatmo [wenno, planom] maipasdekto a sititibker.”—Prov. 16:3; 20:18.

16. Kasano a ti panagserbim ken Jehova iti amin-tiempo bayat nga ubingka pay isagananaka kadagiti responsabilidad iti masanguanan?

¹⁶ Kayat ni Jehova a “mapetpetam” a naimbag ti naragsak a masakbayan. (Basaen ti 1 Timoteo 6:18, 19.) No agserbika iti amin-tiempo, adu ti maam-ammom a kas kenka ket makatulong dayta tapno agmataenganka iti naespirituan. Adu ti nakapaneknek a gapu ta naan-anay a nagserbida ken Jehova bayat nga agtutuboda, nagbalin a naragragsak ti panagasawada. Kaaduanna a dagiti nagpayunir sakbay a nagasawada ket nakapagtultuloy a payunir kas agassawa.—Roma 16:3, 4.

17, 18. Kasano a karaman ti pusom iti panagplano?

¹⁷ Karaman ti puso iti panagplano. Kuna ti Salmo 20:4 maipapan ken Jehova: “Isu mangted koma kenka maitunos iti pusom, ket ti isuamin a pammatigmaanmo tungpalenna koma [pagballigienna koma ti amin a planom, nwt-E].” Panunotem koma ngarud a naimbag no ania ti pangusaram iti biagmo. Utobem dagiti ar-aramiden ita ni Jehova ken no kasano a makatulongka iti dayta. Sa iplanom nga aramiden ti mangparagsak kenkuana.

¹⁸ Sigurado a maragsakanka unay no aramidem ti amin nga agserbi ken Jehova ta dayta a panagbiag ti mangidaydayaw iti Dios. Wen, “agragsakka iti napalalo ken Jehova, ket itdennanto kenka dagiti kiddaw ta pusom.”—Sal. 37:4.