1. Ki buitukiso mañi bobaswanela kueza babanca ka za bupilo bwabona bwa kwapili, kono ki kabakalañi habasa swaneli kubilaela hahulu? (Mubone siswaniso sesi fahalimu.)

BABANCA, mwendi mwalumela taba ya kuli mutu utokwa kueza buitukiso pili asika tama kale musipili. Bupilo buswana sina musipili, mi mukona kuitukiseza hande musipili wamina hamusali babanca. Ki niti, kueza buitukiso bobucwalo kukona kuba taata. Musizana yomuñwi wa libizo la Heather ubulela kuli: “Kueza likatulo ki nto yesabisa. Mutu utokwa kuziba zakaeza mwa bupilo bwahae kaufela.” Kono musike mwasaba. Jehova ubulelela batu bahae kuli: “Usike wabilaela, kakuli ki na Mulimu wahao. Nika kutiisa, ee, nika kutusa.”—Isa. 41:10.

2. Muziba cwañi kuli Jehova ubata kuli mube ni milelo yeka mifumanisa tabo kwapili?

² Jehova umisusueza kuli mulele hande lika zemubata kueza kwapili. (Muek. 12:1; Mat. 6:20) Ubata kuli mube babatabile. Lika zende zebonahala mwa pupo, lika zeluutwa, ni lika zeñwi zabupile lifa bupaki bo. Hape mulemuhe kuli waluisa pilu mi ulubonisa mwakupilela bupilo bobunde ka kufitisisa. Jehova utaluseza babasa lati kumamela kelezo yahae kuli: “Mwaiketela kueza zesa nitabisi. . . . Hamubone! Batanga baka bakanyakalala, kono mina mukaswaba. Hamubone! Batanga baka bakahuweleza ka tabo kabakala buiketo bwa lipilu zabona.”  (Isa. 65:12-14) Haiba batanga ba Jehova baeza likatulo zende mwa bupilo bwabona, baka mulumbekehisa.—Liprov. 27:11.

3. Jehova ubata kuli mube ni milelo yecwañi?

³ Jehova ubata kuli mube ni milelo yecwañi? Naabupile batu kuli babe ni tabo haiba bamuziba ni kumusebeleza ka busepahali. (Samu 128:1; Mat. 5:3) Taba yeo ishutuna hahulu ni molibupezwi lifolofolo, zetokwanga feela kuca ni kunwa ni kupepa bana. Mulimu ubata kuli mube ni tabo ka kuba ni milelo ya kueza lika zeñwi, ili zelisa koni kueza lifolofolo. Mubupi wamina ki “Mulimu wa lilato,” “Mulimu yatabile,” yanaabupile batu “ka siswaniso sahae.” (2 Makor. 13:11; 1 Tim. 1:11; Gen. 1:27) Haiba mulikanyisa Mulimu waluna yalilato, mukaba ni tabo. Kana muiponezi buniti bwa liñolo le, lelibulela kuli: “Kunani tabo yetuna mwa kufana yefita ye mwa kufiwa”? (Lik. 20:35) Batu babañata baiponezi buniti bwa taba yeo. Kacwalo, Jehova ubata kuli milelo yamina ibe ya kubonisa lilato kwa batu babañwi ni ku Mulimu.—Mubale Mateu 22:36-39.

4, 5. Ki sika mañi sene sitahisize kuli Jesu abe ni tabo?

⁴ Jesu Kreste naatomezi babanca mutala omunde. Kusina kukakanya hanaasali mwanana, naaezanga lipapali mi naaitabisanga. Linzwi la Mulimu libulela kuli kunani “nako ya kuseha. . . ni nako ya kubina.” (Muek. 3:4) Jesu hape naasutelezi ku Jehova ka kuituta Mañolo. Hanaali wa lilimo ze 12, baluti ba kwa tempele nebakomokisizwe hahulu ki “kutwisiso yahae ni likalabo zahae” ka za lika za kwa moya.—Luka 2:42, 46, 47.

⁵ Jesu naanani tabo niha nasaahulile kuba mutu yomuhulu. Ki sika mañi sene sitahisize kuli abe ni tabo? Naaziba kuli Mulimu naamutokwa kuli ‘ashaele taba yende kwa babotana ni kukutaza libofu kuli likabona.’ (Luka 4:18) Kueza lika zanaa mutokwa Mulimu kuli aeze, nekutahisize kuli Jesu abe ni tabo. Samu 40:8 ibonisa maikuto anaanani ona, aali: “Nitabela kueza tato yahao, wena Mulimu waka.” Jesu naatabela hahulu kuluta babañwi ka za Ndatahe wa kwa lihalimu. (Mubale Luka 10:21.) Zazi leliñwi, hamulaho wa kuluta musali yomuñwi ka za bulapeli bwa niti, Jesu naabulelezi balutiwa bahae kuli: “Sico saka ki kueza tato ya yena yanilumile ni kufeleleza musebezi wahae.” (Joa. 4:31-34) Kulata Mulimu ni batu babañwi nekutahisize kuli Jesu abe ni tabo. Kueza nto yeswana, kukona kutahisa kuli ni mina mube ni tabo.

6. Ki kabakalañi hakuli kwa butokwa kuikambota za milelo yamina ni Bakreste babahulile kwa moya?

⁶ Bakreste babañata bafumani tabo mwa bunca bwabona ka kusebeza sina mapaina. Mukaeza hande kuikambota ni bona ka za milelo yamina. “Milelo haikondangi hakusina kulelisana, kono lika zakonda hakunani baelezi babañata.” (Liprov. 15:22) Batu babacwalo babahulile kwa moya mwendi baka mitaluseza kuli kuba mwa sebelezo ya nako kaufela kuka miluta lituto zeka mitusa mwa bupilo bwamina kaufela. Hamulaho wa kulutiwa ki Ndatahe wa kwa lihalimu, Jesu naazwezipili kuituta hanaaeza bukombwa bwahae fa lifasi. Ka mutala, naaitutile kuli kutaluseza babañwi taba yende ni kutiyela miliko ka busepahali, kukona kutahiseza mutu tabo yetuna. (Mubale Isaya 50:4; Maheb. 5:8; 12:2) Halunyakisiseñi likalulo zeñwi za sebelezo ya nako kaufela zekona kutahisa kuli mube ni tabo yetuna.

7. Ki kabakalañi babanca babañata habaikola musebezi wa kuluta batu kuba balutiwa?

⁷ Jesu naabulezi kuli: “Hamuye . . . mulute batu . . . kuba balutiwa . . . mubalute.” (Mat. 28:19, 20) Haiba mulelo wamina ki wa kuli mulute batu kuba balutiwa, foo muiketezi musebezi omunde ka kufitisisa, ili musebezi olumbekehisa Mulimu. Sina feela mokuinezi kwa misebezi yemiñwi, mukatokwa nako kuli muzibe hande mwakupetela musebezi wo. Cwanoñu fa, muzwale yomuñwi yabizwa Timothy, yanaakalisize kueza bupaina inze anani lilimo ze 19, naabulezi kuli: “Nitabela kusebeleza Jehova ka nako kaufela bakeñisa kuli kueza cwalo ki nzila yenibonisa ka yona kuli namulata. Kwa  makalelo, nenisina nihaiba tuto iliñwi ya Bibele, kono hasamulaho natutela kwa sibaka sisili, mi mwa kweli iliñwi feela naba ni lituto zeñata. Yomuñwi wa batu bane niituta ni bona Bibele naakalisize kufumanehanga kwa mikopano kwa Ndu ya Mubuso. Hamulaho wa kukena Sikolo sa Bibele sa Mizwale ba Makwasha * ka likweli zepeli, nafiwa musebezi wa kuyo sebeleza kwa sibaka sisili, mi kwateñi nakalisa lituto zeene za Bibele. Nitabela kuituta ni batu, kakuli nibonanga mo moya okenile ucincezanga bupilo bwabona.”—1 Mates. 2:19.

8. Bakreste babañwi babanca batusize cwañi ka kutala mwa musebezi wa kuluta batu kuba balutiwa?

⁸ Bakreste babañwi babanca baitutile lipuo zeñwi. Ka mutala, bo Jacob ba kwa North America bañozi kuli: “Hane ninani lilimo ze 7, batu babañata bane nikena ni bona mwa kilasi yeswana nebabulela puo ya kwa Vietnam. Nenibata kubaluta ka za Jehova, kacwalo hamulaho wa nako, naituta puo yabona. Nenikonile kuituta puo yeo sihulu ka kubapanyanga litaba za Tawala ya Mulibeleli ya Sikuwa ni Tawala ya Mulibeleli ye mwa puo ya kwa Vietnam. Hape nenifumani balikani mwa puteho yeneli bukaufi, ili yeneeitusisa puo ya kwa Vietnam. Hane ninani lilimo ze 18, nakalisa kueza bupaina. Hasamulaho, nayo kena Sikolo sa Bibele sa Mizwale ba Makwasha. Sikolo seo nesi nitusize kuba ni buanyu mwa musebezi wa bupaina onisweli kupeta ka nako ye, mi ki na feela muuna-muhulu mwa sikwata seniswalisana ni sona, sesiitusisa puo ya kwa Vietnam. Batu babañata ba kwa Vietnam bakomokile kuli nikonile kuituta puo yabona. Hanikutazanga ku bona, baniamuhelanga mwa mandu abona, mi hañata niitutanga Bibele ni bona. Babañwi ba baituti bao bafitile fa kukolobezwa.”—Mubapanye Lik. 2:7, 8.

9. Musebezi wa kuluta batu kuba balutiwa uluta lituto mañi zende?

⁹ Musebezi wa kuluta batu kuba balutiwa wakona kumitusa kuba babeleki babande, kuziba mwakuambolela hande ni batu babañwi, kuba ni bundume, ni kuba ni maseme. (Liprov. 21:5; 2 Tim. 2:24, litaluso ze kwatasi) Kono musebezi wo, ukona kumitahiseza tabo yetuna sihulu bakeñisa kuli umitusa kuziba hande Mañolo, ili fona foitomile tumelo yamina. Hape musebezi wo, utahisa kuli musebelisane hahulu ni Jehova.—1 Makor. 3:9.

10. Ki kabakalañi hamukona kuba ni tabo mwa musebezi wa kuluta batu kuba balutiwa niha mukutaleza mwa kalulo ya simu mo batu babañata basaamuheli taba yende?

¹⁰ Mwakona kuikola kueza musebezi wa kuluta batu kuba balutiwa, nihaikaba kuli ki basikai feela babaamuhela taba yende yemukutaza mwa kalulo yamina ya simu. Musebezi wo uama batu babañwi. Puteho kaufela itusanga kubata batu ba lipilu zende. Nihaike kuli ki muzwale kamba kaizeli alimuñwi yakona kufumana mutu yaamuhela niti ni kuba mulutiwa hasamulaho, niti kikuli ba mwa puteho kaufela batusize kubata mutu yo, mi kaufelaa bona bakaba ni tabo. Ka mutala, bo Brandon nebatandile lilimo ze 9 inze baeza bupaina mwa sibaka mokunani batu bane basatabeli taba yende. Batalusa kuli: “Nitabela kukutaza taba yende bakeñisa kuli ki Jehova yabata kuli lueze cwalo. Nenikalisize kueza musebezi wa bupaina hamulaho feela wa kufeza sikolo. Niikolanga kususueza mizwale babanca mwa puteho yaluna, mi kwatabisa kubabona habaeza zwelopili ya kwa moya. Hamulaho wa kukena Sikolo sa Bibele sa Mizwale ba Makwasha, nalumiwa kuyo sebeleza kwa sibaka sisili sina paina. Nihaike kuli hanisika fumana mutu yakonile kueza zwelopili ya kufita fa kukolobezwa, babañwi bona bafumani batu babacwalo. Ninani tabo yetuna kakuli neniikatulezi kuli nituse ka kutala mwa musebezi wa kuluta batu kuba balutiwa.”—Muek. 11:6.

11. Babanca babañata baikozi kusebeleza Mulimu ka nzila ifi?

¹¹ Lukona kusebeleza Jehova ka linzila zeshutana-shutana. Ka mutala, babanca babañata baitatelanga kutusa mwa musebezi wa buyahi. Kunani Mandu A Mubuso amañata atokwa kuyahiwa. Kutusa mwa musebezi wa kuyaha mandu ao  ki sebelezo yekenile, yelumbekehisa Mulimu, mi musebezi wo, wakona kumitahiseza tabo. Hape nto yeñwi yeka mitusa kuba ni tabo ki siango semuka ikola ni mizwale ni likaizeli babañwi, sina mokubelanga hakuezwa misebezi yemiñwi ya Jehova. Hape musebezi wa kuyaha miyaho yeitusiswa kwa kulapela Mulimu wakona kumiluta lituto zeñwi, zecwale ka kuba ni tokomelo mutu haasebeza, kusebeza ka taata ni kuswalisana ni babafilwe maata a kuzamaisa.

12. Kusebeza sina paina kukona kulibisa kwa matohonolo afi amañwi?

¹² Muzwale yomuñwi yabizwa Kevin utalusa kuli: “Kuzwa feela kwa bwanana bwaka, neninani takazo ya kusebeleza Jehova ka nako kaufela. Hase nikwanisize lilimo ze 19, nakalisa kusebeza sina paina. Neniipilisanga ka musebezi one nieza wa kusebeza ka nakonyana ku muzwale yomuñwi yanaali muyahi. Neniitutile mwakubeyela situwa, mahaulo, ni likwalo. Hasamulaho, nenitandile lilimo zepeli inze nisebelisana hamoho ni sikwata sene situsa kwa kuyaha sinca Mandu A Mubuso ni mandu a mizwale anaasinyizwe ki ñuli. Hane niutwile kuli nekutokwahala bayahi kwa South Africa, nakupa kuyo tusa mwa musebezi wo, mi naamuhelwa. Mwa Africa, kuluungelanga lisunda lisikai feela kuyaha Ndu ya Mubuso, mi hasamulaho lushimbulukelanga kwa sibaka sesiñwi. Sikwata sa bayahi benisebeza ni bona siswana feela sina lubasi lwaka. Lupila hamoho, luitutanga Bibele hamoho, mi lusebezanga hamoho. Hape niikolanga kukutaza ni mizwale ba mwa naha yeo sunda ni sunda. Milelo yene nibile ni yona hane nisali mwanana, initusize kuba ni tabo ka nzila yene nisika libelela.”

13. Kusebelaza fa Betele kutusa cwañi babanca kuba ni tabo?

¹³ Babañwi bane banani mulelo wa kusebeleza Jehova ka nako kaufela, sebali fa Betele ka nako yacwale. Kusebeleza fa Betele kukona kumitahiseza tabo mwa bupilo bakeñisa kuli misebezi kaufela yeezwa fateñi iezezwa Jehova. Lubasi lwa fa Betele lutusa kwa kulukisa sico sa kwa moya. Muzwale yomuñwi yasebeleza fa Betele yabizwa  Dustin ubulela kuli: “Nenibile ni milelo ya kuba mwa sebelezo ya nako kaufela hane ninani lilimo ze 9, mi hamulaho wa kufeza sikolo, nakalisa kueza bupaina. Hamulaho wa kueza bupaina ka silimo ni licika, nakupiwa kuyo sebeleza fa Betele, mi teñi ko, nalutiwa mwakusebeliseza mishini yeitusiswa kwa kuhatisa, mi hasamulaho nenilutilwe mwakupangela liprogilamu za fa kompyuta. Kuba fa Betele kunitusa kuziba hande zwelopili yeezahala mwa lifasi kaufela mwa musebezi wa kuluta batu kuba balutiwa, mi nto yeo inifanga tabo yetuna. Nitabela hahulu kusebeleza fa Betele bakeñisa kuli musebezi olueza utusa batu kusutelela ku Jehova.”

14. Ki buitukiso bufi bomuswanela kueza hamunze munahana za kukena mwa sebelezo ya nako kaufela?

¹⁴ Ki buitukiso bufi bomuswanela kueza hamunze munahana za kukena mwa sebelezo ya nako kaufela? Nto ya butokwa hahulu yeka mitusa kukondisa mwa sebelezo yamina ku Jehova ki kuba ni tulemeno twa kwa moya. Kacwalo, muitutange Linzwi la Mulimu kamita, kunahanisisanga litaba zemubala mwateñi, ni kubonisa tumelo yamina ka kuabana mwa mikopano ya puteho. Ka nako yemusali kwa sikolo, muitwaeze kukutazanga kwa batu babañwi, ilikuli mukone kuba bakutazi babande ba taba yende. Muitute kubonisa kuli mwaisa pilu babañwi ka kubakupa ka maseme kuli bataluse maikuto abona mi mubateeleze habanze baalaba. Hape, mwakona kuitatela kueza misebezi yemiñwi mwa puteho yecwale ka kutusa kwa kukenisa ni kulukisa Ndu ya Mubuso. Jehova utabela kuitusisa batu babaikokobeza ni babatabela kuifana. (Mubale Samu 110:3; Lik. 6:1-3) Muapositola Paulusi naamemile Timotea kuli asebeze ni yena mwa musebezi wa bulumiwa bakeñisa kuli Timotea “naapakwa hande ki mizwale.”—Lik. 16:1-5.

15. Ki buitukiso bufi bomuswanela kueza hamulukisa za momuka ipiliseza?

¹⁵ Baba mwa sebelezo ya nako kaufela fokuñwi batokwanga kueza lika zeñwi kuli bakone kuipilisa. (Lik. 18:2, 3) Mwendi fokuñwi mutokwa kueza kosi yeñwi yekuswani kuli mukone kufumana misebezi yeliteñi mwa sibaka semupila ku sona, ilikuli musebezange feela ka nako yekuswani. Hamunze mueza buitukiso bo, mwakona kubuza muokameli wamina wa mupotoloho ni mapaina baba mwa mupotoloho wamina. Mubabuze ka za musebezi obakona kueza mapaina ili oswanela. Mi sina moiboniseza Bibele, ‘mubeye lika kaufela zemueza mwa mazoho a Jehova, mi milelo yamina ikakonda.’—Liprov. 16:3; 20:18.

16. Kusebeleza Jehova ka kutala hamusali babanca kukona kumitusa cwañi kuitukiseza kupeta buikalabelo bobuñwi kwapili?

¹⁶ Mwakona kuba ni buikolwiso bwa kuli Jehova ubata kuli ‘muswale ka taata’ bupilo bobunde bwa kwapili. (Mubale 1 Timotea 6:18, 19.) Kuba mwa sebelezo ya nako kaufela kukona kutahisa kuli muswalisane ni batu babañwi baba mwa sebelezo ya nako kaufela, ni kumitusa kuba Bakreste babahulile kwa moya. Batu babañwi babañata bafumani kuli kusebeleza Jehova ka kutala habasali babanca, hape kubatusize kuli bakondise mwa manyalo abona. Hañata, batu babañwi bane babanga mapaina basika kena kale mwa linyalo bakonile kuzwelapili kueza cwalo niha sebanyalani ni bakubona.—Maro. 16:3, 4.

17, 18. Pilu yamina iamiwa cwañi hamulela kueza lika zeñwi mwa bupilo bwamina?

¹⁷ Pilu yamina yaamiwa hamulela kueza lika zeñwi mwa bupilo bwamina. Samu 20:4 ibulela cwana ka za Jehova kuli: “Akufe zeilakaza pilu yahao mi akutuse kukondisa milelo yahao kaufela.” Kacwalo, munahane ka za lika zemubata kueza mwa bupilo bwamina. Munyakisise zasweli kueza Jehova mwa linako zaluna ni momukona kutuseza mwa sebelezo yahae. Mi mueze lika zeka mutabisa.

¹⁸ Kusebeleza Jehova ka kutala kuka mitahiseza tabo yetuna bakeñisa kuli kueza cwalo kukutekehisa Mulimu. Kacwalo, ‘mutabe hahulu kabakala Jehova, mi uka mifa zeilakaza pilu yamina.’—Samu 37:4.