1. (1) Ta eo jo̦dikdik ro rej aikuj pepe kake kõn ilju im jekl̦aj eo aer? (2) Ta eo emaroñ jipañ er bwe en jab l̦ap aer mijak im inepata? (Lale pija eo itulõñ.)

 KOM̦ jo̦dikdik ro bõlen kom̦ij errã bwe m̦okta jãn ami etal ilo juon ial̦, em̦m̦an ñe kom̦ij pepe m̦okta kõn ia eo kom̦ naaj jibadekl̦o̦k. Mour ko ad rej ãinwõt juon ial̦, im iien eo em̦m̦an jej aikuj kõm̦m̦an pepe kõn ia eo jenaaj ilo̦k ñane ak pepe kõn mour ko ad, ej ilo iien eo jej jo̦dikdik. Alikkar bwe ad kõm̦m̦an pepe rot kein ejjab juon men eo epidodo. Juon jiroñ etan Heather ej ba: “Men in elukkuun pen im kaamijak. Kwõj aikuj pepe kõn ta eo kwõnaaj kõm̦m̦ane ilo aolepen mour eo am̦.” El̦aññe kwõj bar bõk ejja eñjake rot in, keememej bwe Jeova ej ba ñan armej ro an: “Kwõn jab lõl̦ño̦ñ, bwe Ña am̦ Anij; Inaaj kõkajoor eok, aet, Inaaj jipañ eok.”​—Ais. 41:10.

2. Etke kwõjel̦ã bwe Jeova ekõn̦aan bwe kwõn pepe kõn juon am̦ ilju im jekl̦aj em̦m̦an?

² Jeova ej rõjañ kwe bwe kwõn mãlõtlõt im pepe kõn ilju im jekl̦aj eo am̦. (Ekl. 12:1, UBS; Matu 6:20) Ekõn̦aan bwe kwõn m̦õn̦õn̦õ im ealikkar men in ilo am̦ loi, roñjaki, im edjoñi men ko ear kõm̦anm̦ani. Jeova ej bar kwal̦o̦k an kea kake kõj ilo elõñ wãween ko. Ej litok naanin kakapilõklõk ko im katakin kõj bwe jen mour ilo wãween eo em̦m̦antata. Kõn men in, ejjab m̦õn̦õn̦õ ñe armej ro rej kõjekdo̦o̦ni naanin kakapilõklõk ko an. Im ej jiroñ armej ro rejjab kõn̦aan l̦oori  naanin tõl ko an im ba: “Kom̦ar kããlõt men eo ijjab m̦õn̦õn̦õ kake. . . . Lo, ro rũkarejera renaaj lañlõñ, a kom̦ naaj jook. Lo ro rũkarejera renaaj al kõn lañlõñ an bõro.” (Ais. 65:12-14) Armej ro an Jeova rej bõktok nõbar im aiboojoj ñan e, ñe rej kõm̦m̦ani pepe ko rem̦m̦an ilo mour ko aer.​—JK. 27:11.

3. Ta eo Jeova ekõn̦aan bwe kwõn kõm̦m̦ane?

³ Pepe rot ko Jeova ekõn̦aan bwe kwõn kõm̦m̦ani? Eokwe, Jeova ear kõm̦anm̦an armej ro ilo juon wãween me remaroñ lo m̦õn̦õn̦õ ilo aer jel̦ã kajjien, im ilo aer karejar im tiljek wõt ñane. (Sam 128:1; Matu 5:3, UBS) El̦ap ad oktak jãn menninmour ko kõnke men ko de kein rej kõm̦m̦ani, m̦õñã, idaak, im neji. Ak Jeova ekõn̦aan bwe kwõn kõm̦m̦ani pepe ko ewõr tokjãer, im renaaj kõm̦m̦an bwe kwõn m̦õn̦õn̦õ ilo mour n̦e am̦. Rũkõm̦anm̦an eo am̦ ej juon “Anij in yokwe,” im “Anij em̦õn̦õn̦õ,” me ear kõm̦anm̦an armej “ilo wãween wõt E.” (2 Ko. 13:11; 1 Ti. 1:11; Jen. 1:27) Kwõnaaj m̦õn̦õn̦õ ñe kwõj anõke Anij eo ad me el̦ap yokwe ippãn. Im em̦õj ke am̦ lo an m̦ool eoon in me ej ba: “El̦apl̦o̦k m̦õn̦õn̦õ ilo lel̦o̦k jãn bõk”? (Jrb. 20:35, UBS) Men in ej juon men em̦ool kõn kõj armej. Kõn men in, Jeova ekõn̦aan bwe pepe ko ad ren pedped ioon ad kwal̦o̦k yokwe ñan ro jet im ñan e.​—Riit Matu 22:36-39.

4, 5. Ta eo ear kõm̦m̦an bwe Jijej en m̦õn̦õn̦õ?

⁴ Jijej Kũraij ear kõm̦m̦ane joñak eo em̦m̦antata ñan kom̦ jo̦dikdik ro. Ejjel̦o̦k pere bwe ke ear juon ajri ear iukkure im kõm̦m̦an men ko relimo. Naanin Anij ej ba bwe ewõr “juon iien ettõñ . . . im juon iien eb.” (Ekl. 3:4) Bõtab Jijej ear bareinwõt epaake Jeova kõn an kar katak Jeje ko. Ke ear 12 an iiõ, rũkaki ro ilo tampel̦ eo rar lukkuun bwilõñ kõn an kar ‘mãlõtlõt im kõn naanin uwaak’ ko an.​—Luk 2:42, 46, 47.

⁵ Jijej ear rũttol̦o̦k im juon eo em̦õn̦õn̦õ. Ta eo ear kõm̦m̦an bwe en m̦õn̦õn̦õ? Ear jel̦ã bwe jet iaan men ko Anij ear kõn̦aan bwe en kõm̦m̦ani, ej bwe en “kwal̦o̦k kõn naan em̦m̦an ñan ro rejeram̦õl . . . im kalol̦o̦kjen̦ ro repilo.” (Luk 4:18, UBS) Jijej ear lo m̦õn̦õn̦õ ke ear kõm̦m̦ani men ko Anij ear kõn̦aan bwe en kõm̦m̦ani. Bokin Sam 40:8 ej kwal̦o̦k kõn eñjake ko an ilo an kar ba: “I lañlõñ in kõm̦anm̦an ankilaam̦, O aõ Anij.” Jijej ear m̦õn̦õn̦õ ke ear katakin armej ro kõn Jemãn. (Riit Luk 10:21, UBS.) Juon iien, ãlikin an kar katakin juon kõrã kõn kabuñ eo em̦ool, Jijej ear ba ñan rũkal̦oor ro an: “M̦õñã eo kijõ eñin: bwe in kõm̦anm̦an ankilaan eo ear jilkintok eõ, im kam̦õjl̦o̦k jerbal eo ear letok ñan eõ.” (Jon 4:31-34, UBS) Jijej ear lo m̦õn̦õn̦õ kõn an kar kwal̦o̦k an yokwe Anij im ro jet, im kwõmaroñ bar m̦õn̦õn̦õ el̦aññe kwõj kõm̦m̦ane men in.

6. Etke elukkuun wõr tokjãn bwe kwõn kõnono kõn pepe ko am̦ kõn ilju im jekl̦aj ippãn Kũrjin ro jeim̦ im jatũm̦ me el̦ap imminene ippãer?

⁶ Elõñ Kũrjin ro jeid im jatid rar lo m̦õn̦õn̦õ ke rar bainier ilo iien eo rar jo̦dikdik. Kwõmaroñ ke bar kõnono ippãn rein im kwal̦o̦k kõn pepe ko am̦? Baibõl̦ ej ba: “Ijo ejjel̦o̦k pepe, em̦õj kajettokjãn l̦õmn̦ak ko m̦okta; a ijo elõñ ripepe, em̦õj kapen l̦õmn̦ak ko.” (JK. 15:22) Rein jeim̦ im jatũm̦ renaaj kwal̦o̦k ñan kwe bwe jerbalin bainier enaaj lewaj jel̦ãl̦o̦kjen̦ eo enaaj jipañ eok ilo aolepen mour eo am̦. Elõñ men ko Jijej ear katak jãn Jemãn ke ear pãd ilañ. Innem, ke ear kõm̦m̦ane jerbalin kwal̦o̦k naan eo ijin ioon lal̦, ebar wõr men ko ear wõnm̦aanl̦o̦k im katak. Ñan waanjoñak, ear lo m̦õn̦õn̦õ kõn an kar tõpar bũruon armej ro kõn nuuj eo em̦m̦an, im bareinwõt kõn an kar tiljek wõt ium̦win mãlejjoñ ko ear iiooni. (Riit Aiseia 50:4; Hi. 5:8, UBS; 12:2, UBS) Jen lale etke kwõnaaj m̦õn̦õn̦õ ilo am̦ naaj kal̦apl̦o̦k ijo kun̦aam̦ im jerbal ñan Jeova.

7. Etke elõñ jo̦dikdik rej m̦õn̦õn̦õ ilo aer kõm̦m̦ane jerbalin kwal̦o̦k naan ak kõm̦m̦an rũkal̦oor?

⁷ Jijej ear ba: “Kom̦win ilo̦k im kõm̦m̦an riaelõñ ko otemjej bwe ren rũkal̦oora . . . im katakin er.” (Matu 28:19, 20) Ñe kwõj pepe in  bõk kun̦aam̦ ilo jerbal in ñan kõm̦m̦an rũkal̦oor, alikkar bwe kwõnaaj kããlõt jerbal eo ekam̦õn̦õn̦õ tata me ej bõktok nõbar im aiboojoj ñan Anij. Ãinwõt jerbal ko jet, enaaj bõk iien bwe kwõn imminene ak bwe kwõn jel̦ã kõm̦m̦ane jerbal eo. Juon jeid im jatid etan Timothy, eo im ear jino bainier ke ear jo̦dikdik ear ba: “Elukkuun em̦m̦an ippa aõ karejar ñan Jeova im kal̦apl̦o̦k ijo kun̦aõ im jerbal ñane, kõnke ej juon wãween ij kwal̦o̦k bwe ij yokwe e. Ilo jinoin, ekar ejjel̦o̦k aõ rũkkatak, ak ke iar em̦m̦akũt im jerbal ilo bar juon teretore, ilowaan wõt juon allõñ ak ear wõr jejjo aõ rũkkatak. Im juon iaaer ear jino itok im kweilo̦k. Ãlikin aõ kar etal ñan Jikuul̦in Baibõl̦ ñan L̦õm̦aro me Ejjel̦o̦k Pãleer, kar kajjitõk bwe in em̦m̦akũt ñan bar juon teretore in jipañ. Ewõr emãn armej iar jino katak Baibõl̦ ippãer ijin.  * (Lale kõmel̦el̦e eo itulal̦.) Elukkuun em̦m̦an ippa katakin armej kõn Baibõl̦ eo, im ij kile bwe jetõb kwõjarjar eo ej ukot er.”​—1 Te. 2:19, UBS.

8. Ta ko em̦õj an jet jo̦dikdik kõm̦m̦ani bwe ren maroñ tõpar elõñl̦o̦k armej ilo jerbalin kwal̦o̦k naan?

⁸ Jet iaan jo̦dikdik ro ilo doulul in rar katak bar juon kajin. Ñan waanjoñak, Jacob, jãn Amedka ear je im ba: “Ke ear 7 aõ iiõ, elõñ iaan rijikuul̦ ro iar jikuul̦ ippãer rar itok jãn Vietnam. Ilukkuun kar kõn̦aan kwal̦o̦k ñan er kõn Jeova, innem iar pepe in katak kajin eo aer. Men eo el̦ap aõ kar kõm̦m̦ane ke iar katak kajin in, ej ilo aõ kar keidi Naan in keeañ eo ilo kajin pãlle ippãn kajin Vietnam. Ekar bar wõr ro m̦õtta ilo eklejia eo ej kõnono kajin Vietnam me epaake ijo ij pãd ie. Iar jino bainier ke ear 18 aõ iiõ im tokãlik, iar etal im pãd ilo Jikuul̦in Baibõl̦ ñan L̦õm̦aro me Ejjel̦o̦k Pãleer. Jikuul̦ in ear jipañ eõ ilo jerbal eo aõ kiiõ ãinwõt juon bainier me ij make wõt em̦m̦aan eo ej lale eklejia ilo kurub eo ej kõnono kajin Vietnam. Elõñ RiVietnam rej bwilõñ kõn aõ jel̦ã kajin eo aer. Rej m̦õn̦õn̦õ in kadel̦o̦ñ eõ ilo m̦õko im̦weer, im ekkã aõ katak Baibõl̦ ippãer. Im jet iaaer em̦õj aer peptaij.”​—Keidi Jrb. 2:7, 8.

9. Ta eo jerbalin kõm̦m̦an rũkal̦oor ej katakini kõj?

⁹ Jerbal in kwal̦o̦k naan ak kõm̦m̦an rũkal̦oor ej letok jel̦ãl̦o̦kjen̦ eo em̦m̦an im ej jipañ kõj. Ñan waanjoñak, ej katakin kõj bwe jen niknik im em̦m̦an ad jerbal, jel̦ã kõnono ippãn ro jet, im bwe jen kõnono ñan ro jet ilo jouj im jab pere kõj make. (JK. 21:5; 2 Ti. 2:24.) Bõtab jerbal in ñan kõm̦m̦an rũkal̦oor el̦aptata an kalañlõñ kõnke ej jipañ eok ñan jel̦ã wãween kwõmaroñ kam̦ooli katak ko kwõj tõmaki jãn Baibõl̦. Kwõj bar katak bwe kwõn jel̦ã jerbal ippãn Jeova ilo am̦ kõm̦m̦ane jerbal in.​—1 Ko. 3:9.

10. Ewi wãween bwe kwõn m̦õn̦õn̦õ ilo am̦ kõm̦m̦an rũkal̦oor meñe epen ilo teretore eo am̦?

¹⁰ Kwõmaroñ m̦õn̦õn̦õ ilo am̦ kõm̦m̦an rũkal̦oor meñe jet wõt ilo teretore eo am̦ rej m̦õn̦õn̦õ in katak Baibõl̦. Jej jerbal im kõm̦m̦an rũkal̦oor ippãn doon ãinwõt juon tiim. Aolep ro ilo eklejia eo rej kappukot ro em̦ool bũrueer. Meñe emaroñ juon wõt iaan em̦m̦aan ak kõrã ro jeid im jatid rej loe juon armej me ej oktak im erom juon rũkal̦oor, ak jemaroñ aolep m̦õn̦õn̦õ kõnke jaar bõk kun̦aad im kappukot ro em̦ool bũrueer. Ñan waanjoñak, Brandon, eo ear bainier ium̦win 9 iiõ ilo juon jikin me jejjo wõt armej rej katak Baibõl̦, ej ba: “Ilukkuun m̦õn̦õn̦õ in kwal̦o̦k kõn ennaan eo em̦m̦an kõnke eñin ej men eo Jeova ej kajjitõk bwe jen kõm̦m̦ane. Iar jino bainier ãlikin wõt an kar m̦õj aõ jikuul̦. Elukkuun em̦m̦an ippa ñe ij rõjañ likao ro ilo eklejia eo ammim im lo aer kõm̦m̦an wõnm̦aanl̦o̦k. Ãlikin aõ kar etal ñan Jikuul̦in Baibõl̦ ñan L̦õm̦aro me Ejjel̦o̦k Pãleer, iar bainier ilo bar juon teretore. Em̦ool bwe ijjañin kar lo juon armej ilo teretore eo me ear kõm̦m̦an wõnm̦aanl̦o̦k im peptaij, meñe ro jet rar. Ijoke ilukkuun m̦õn̦õn̦õ bwe iar pepe bwe in kal̦apl̦o̦k ijo kun̦aõ ilo jerbal in ñan kõm̦m̦an rũkal̦oor.”​—Ekl. 11:6, UBS.

11. Ta juon iaan wãween ko elõñ jo̦dikdik rar m̦õn̦õn̦õ in bõk kun̦aaer ie ñan karejar ñan Jeova?

¹¹ Elukkuun lõñ jerbal ko repel̦l̦o̦k ilo doulul  in me jemaroñ bõk kun̦aad ie im jerbal ñan Jeova. Ñan waanjoñak, elõñ jo̦dikdik rej bõk kun̦aaer ilo jerbalin ekkal. Elõñ bukwi Im̦õn Kweilo̦k ko jej aikuji. Im̦õn kweilo̦k kein rej bõktok nõbar ñan Jeova, im jej m̦õn̦õn̦õ ñe jej bõk kun̦aad im jipañ im kalõki. Kwõmaroñ bar m̦õn̦õn̦õ ilo am̦ jerbal ippãn em̦m̦aan im kõrã ro jet jeim̦ im jatũm̦. Bareinwõt elõñ men ko jet kwõmaroñ katak, ãinwõt ñan jel̦ã kilen jerbal im kõjparok bwe en jab wal̦o̦k jorrããn, im jel̦ã jerbal ippãn overseer ak ro rej loloorjake jerbal eo.

12. Ewi wãween jerbalin bainier emaroñ kõm̦m̦an bwe kwõn bõk jeraam̦m̦an ko jet?

¹² Juon jeid im jatid em̦m̦aan etan Kevin ej ba: “Jãn ke iar juon l̦adik jidikdik, iar kõn̦aan kal̦apl̦o̦k ijo kun̦aõ im jerbal ñan Jeova. Innem, iar jino bainier ke ej 19 aõ iiõ. Ear wõr juon aõ jerbalin baat taim̦ ippãn juon jeid im jatid em̦m̦aan me ej juon kaam̦tõ ñan make kabwe aikuj ko aõ. Iar katak kilen kõl̦l̦aak bõrwaj, wũntõ, im kõjãm. Tokãlik, iar jerbal ruo iiõ ippãn kumi eo ej jipañ kalõk Im̦õn Kweilo̦k ko im m̦õko rejorrããn im̦õn ro jeid im jatid, me rej iioon jorrããn jãn taibuun im l̦añ ko rel̦l̦ap. Ke iar roñ kõn an l̦ap aikuj rijjipañ ilo jerbalin ekkal eo ilo South Africa, iar kanne aõ application im rar kũr eõ bwe in etal. Ijin ilo Africa, l̦o̦kun jilu l̦o̦k ñan emãn wiik ij em̦m̦akũt jãn juon Im̦õn Kweilo̦k ñan bar juon. Kõm aolep ro rar pãd ilo jerbalin ekkal eo kõmij ãinwõt juon baam̦le. Kõmij jokwe ippãn doon, katak Baibõl̦ ippãn doon, im jerbal ippãn doon. Ij bar m̦õn̦õn̦õ ilo aõ jerbalin kwal̦o̦k naan kajjojo wiik ippãn ro jeiũ im jatũ ijin. Pepe ko iar kõm̦m̦ani ke iar juon l̦adik jidikdik wõt rar kõm̦m̦an bwe in lo m̦õn̦õn̦õ ilo elõñ wãween ko me iar jab kõtmãne kaki.”

13. Etke elõñ jo̦dikdik rej m̦õn̦õn̦õ ilo aer jerbal ñan Jeova ilo Betel̦?

¹³ Ewõr jet rar bainier im kiiõ rej jerbal ilo Betel̦. Jerbal ilo Betel̦ ej kõm̦m̦an bwe jen m̦õn̦õn̦õ kõnke aolep men ko jej kõm̦m̦ani ijin rej ñan Jeova. Ro rej jerbal ilo Betel̦ rej jipañ im litok Baibõl̦ kab bok ko rej pedped ioon Baibõl̦, ñan jipañ armej ro bwe ren jel̦ã kõn m̦ool eo.  Juon iaan rein ej Dustin, ej ba: “Ke ear 9 aõ iiõ iar kõm̦m̦ane juon aõ mejãnkajjik bwe in kal̦apl̦o̦k ijo kun̦aõ ilo doulul eo an Jeova, innem iar jino bainier ke ear jem̦l̦o̦k aõ jikuul̦. Ãlikin kar juon jimattan iiõ in aõ bainier, kar kũr eõ bwe in etal im jerbal ilo Betel̦, ijo iar katak kilen kõjerbal kein bũriin ko im tokãlik katak kilen bũrookraam̦i kampiutõr ko. Ilo Betel̦, ij m̦õn̦õn̦õ in roñ kõn wõnm̦aanl̦o̦k ko rej wal̦o̦k ilo jerbal eo ñan kõm̦m̦an rũkal̦oor ipel̦aakin lal̦ in. Elukkuun em̦m̦an ippa jerbal ilo ijin kõnke men ko jej kõm̦m̦ani, rej jipañ armej ro bwe ren epaake Jeova.”

14. Ta eo kwõmaroñ kõm̦m̦ane kiiõ bwe kwõn pojak in kal̦apl̦o̦k ijo kun̦aam̦ ilo jerbalin bainier?

¹⁴ Ewi wãween kwõmaroñ kõpooj kwe bwe kwõn pojak in kal̦apl̦o̦k ijo kun̦aam̦ im bainier? Eokwe, bwe en em̦m̦an am̦ karejar ñan Jeova, kwõj aikuj kwal̦o̦k wãween ko rem̦m̦an an juon Kũrjin. Kwõj aikuj niknik ilo am̦ katak Naanin Anij, lukkuun kõl̦mãnl̦o̦kjen̦ kake, im pukot wãween ko kwõmaroñ kwal̦o̦k tõmak eo am̦ ilo iien kweilo̦k ko. Ilo iiõ in jikuul̦ ko am̦, kwõmaroñ bar kakõm̦anm̦anl̦o̦k wãween am̦ kõnnaan ippãn ro jet kõn ennaan eo em̦m̦an. Bareinwõt, kwõmaroñ katak bwe kwõn jel̦ã kilen kãitoklimoik armej ro ikijjeen am̦ kajjitõk kõn l̦õmn̦ak ko aer ilo juon wãween ejouj, im roñjake uwaak ko aer. Kwõmaroñ bar jipañ im kõm̦m̦ani men ko ilowaan eklejia eo ãinwõt karreo, im kõm̦m̦ani men ko im jikin ko rejorrããn ilo Im̦õn Kweilo̦k eo. Jeova elukkuun m̦õn̦õn̦õ in kõjerbal ro ettã bũrueer im rem̦õn̦õn̦õ in jipañ. (Riit Sam 110:3; Jrb. 6:1-3, UBS) Rijjilõk Paul ear kũr Timote ñan bõk jerbalin mijinede kõnke ‘aolep ro jein im jatin rar nõbar Timote ilo aer kõnnaan.’​—Jrb. 16:1-5, UBS.

15. Bwe kwõn maroñ lo juon am̦ jerbal, ta pepe ko kwõmaroñ kõm̦m̦ani?

¹⁵ Ro rej kal̦apl̦o̦k ijo kun̦aaer ilo jerbalin bainier, rej aikuj pukot juon aer jerbal ñan kabwe aikuj ko aer. (Jrb. 18:2, 3, UBS) Bõlen kwõmaroñ bõk jet kilaaj ko rejjab lukkuun aetok kũtieer ilo jikuul̦, me renaaj jipañ eok bwe kwõn bõk juon jerbal baat taim̦ ilo jikin eo kwõj pãd ie. Ilo iien eo kwõj kõm̦m̦an am̦ pepe, em̦m̦an kwõn kajjitõk jipañ ippãn em̦m̦aan eo ej lol̦o̦k eklejia ko, im ippãn bainier ro jet ijo kwõj pãd ie. Innem ãinwõt an Baibõl̦ ba, kwõj aikuj ‘kajjitõk ippãn Jeova bwe en kõjeraam̦m̦an pepe ko am̦, innem kwõnaaj jeraam̦m̦an ilo am̦ kõm̦m̦ani.’​—JK. 16:3, UBS; 20:18.

16. Ewi wãween am̦ kal̦apl̦o̦k ijo kun̦aam̦ im jerbal ñan Jeova ilo iien am̦ jo̦dikdik, enaaj jipañ eok kõn eddo ko jet am̦ ilju im jekl̦aj?

¹⁶ Kwõmaroñ lõke bwe Jeova ekõn̦aan bwe kwõn “bõk” juon ilju im jekl̦aj elem̦õn̦õn̦õ. (Riit 1 Timote 6:18, 19, UBS.) Kwõnaaj rũttol̦o̦k ilo tõmak ilo am̦ jerbal ippãn ro jet jeim̦ im jatũm̦ ikijjeen am̦ kal̦apl̦o̦k ijo kun̦aam̦ im jerbal ñan Jeova. Elõñ rar lo bwe ke rar kal̦apl̦o̦k ijo kun̦aaer im jerbal ñan Jeova ilo iien eo rar jo̦dikdik, men in ear jipañ er tokãlik ilo mour in m̦are eo aer. Ekkã an ro me rar bainier m̦okta jãn aer kar m̦are, wõnm̦aanl̦o̦k wõt im bainier ippãn eo pãleer ãlikin aer m̦are.​—Rom 16:3, 4, UBS.

17, 18. Etke pepe ko ad rejjab aikuj itok wõt jãn l̦õmn̦ak ko ad ak rej aikuj bar itok jãn bũruod?

¹⁷ Pepe ko jej kõm̦m̦ani ilo mour ko ad rejjab itok wõt jãn men ko jej l̦õmn̦ak kaki, ak rej aikuj bar itok jãn men ko jekõn̦aan kõm̦m̦ani ak ta ko rej pãd ilo bũruod. Sam 20:4 ej ba men in kõn Jeova: “En lewaj ñan eok kõn̦aan ko am̦, im kõjeraam̦m̦an aolep pepe ko am̦.” Ilo am̦ pepe kõn ilju im jekl̦aj eo am̦, l̦õmn̦ak kõn ta eo kwõlukkuun kõn̦aan kõm̦m̦ane ilo mour eo am̦. Bareinwõt, l̦õmn̦ak kõn ta eo Jeova ej kõm̦m̦ane ilo raan kein ad, im ta ko kwõmaroñ kõm̦m̦ani ilo jerbal eo an, im kõm̦m̦ani pepe ko renaaj kabuñbũruon.

¹⁸ Kwõnaaj lukkuun m̦õn̦õn̦õ ñe kwõj kal̦apl̦o̦k ijo kun̦aam̦ im jerbal ñan Jeova, kõnke eñin ej wãween mour eo me ej bõktok nõbar ñan e. Alikkar bwe kwõnaaj lo “lañlõñ ilo Jeova, im enaaj lewaj menin kajjitõk ko an bũruom̦.”​—Sam 37:4.