1. Ӕригонӕй цӕхуӕн унаффӕ гъӕуй рахӕссун ӕма уомӕй тӕрсун цӕмӕннӕ гъӕуй? (Кӕсӕ хузӕмӕ статьяй райдайӕни.)

БАЛЦИЙ рандӕ ун ку исфӕндӕ кӕнай, уӕд бал расагъӕс кӕндзӕнӕ, кумӕ дӕ фӕндуй фӕццӕун, уобӕл. Нӕ цард дӕр ӕнгъезуй, уӕхӕн балций хӕццӕ рабарун. Дӕ рази цӕхуӕн нисӕнттӕ исӕвӕрдзӕнӕ, уой тӕккӕ хуӕздӕр уодзӕй ниллух кӕнун де ’ригон бонти. Ке зӕгъун ӕй гъӕуй, уӕхӕн унаффӕ рахӕссун ӕнцон нӕй. Еу хуӕрӕ, Хезер, зӕгъгӕ, загъта: «Де ’гас цард дӕр дӕ гъӕуй испълан кӕнун. Айдагъ ӕ сагъӕсӕй дӕр адӕймаг фӕттӕрсуй». Фал тӕрсун нӕ гъӕуй, уомӕн ӕма Йеговӕ ӕ лӕггадгӕнгутӕн зӕрдӕ ӕвӕруй: «Ма тӕрсӕ, уомӕн ӕма ӕз дӕ хӕццӕ дӕн. Тарст ракӕсӕ-бакӕсӕ ма кӕнӕ, уомӕн ӕма ӕз дӕ Хуцау дӕн. Ӕз дӕ бафедар кӕндзӕн. Ӕз дин банхус кӕндзӕн» (Ис. 41:10).

2. Кӕцӕй ӕй зонӕн, Йегови уотӕ ке фӕндуй, цӕмӕй нӕ рази ӕвӕрӕн, амондгун нӕ ка искӕндзӕй, уӕхӕн нисӕнттӕ?

² Йеговӕ дӕ уомӕ разӕнгард кӕнуй, цӕмӕй дӕ царди раст нисӕнттӕ ӕвӕрай (Еккл. 12:1; Матф. 6:20). Фӕндуй ӕй, цӕмӕй амондгун уай. Цӕмӕн ес уотӕ зӕгъӕн? Е бӕрӕг ӕй  дуйне куд рӕсугъд искодта, уомӕй. Уомӕй уӕлдай ма нин Йеговӕ амонуй, царди цӕхуӕн над хуӕздӕр адтайдӕ равзарун, уой. Ӕ унаффитӕмӕ ин ка нӕ игъосуй, уони туххӕй Йеговӕ зӕгъуй: «Сумах... ӕвзурстайтӕ, мӕ зӕрдӕмӕ ци нӕ цӕуй, уой. [...] Мӕ лӕггадгӕнгутӕ цийнӕ кӕндзӕнцӕ, сумахӕн ба фурходуйнагӕй уӕ цӕсгон содздзӕй. Мӕ лӕггадгӕнгутӕ цийни гъӕр кӕндзӕнцӕ, сӕ зӕрдӕ ке ирайдзӕй, уой туххӕй» (Ис. 65:12–14). Зундгин унаффитӕ ку фӕххӕссӕн, уӕд уомӕй Йеговӕн кадӕ кӕнӕн (Ӕмб. 27:11).

3. Йеговӕ ӕригӕнтти цӕхуӕн нисӕнттӕмӕ разӕнгард кӕнуй?

³ Йеговӕ ӕригӕнтти цӕхуӕн нисӕнттӕмӕ разӕнгард кӕнуй? Махӕн нӕ конд уотӕ ӕй, ӕма цӕмӕй амондгун уӕн, уой туххӕй гъӕуй, Хуцауи базонун ӕма ин лӕггадӕ кӕнун (Пс. 128:1; Матф. 5:3). Цӕрӕгойтӕй дӕр уомӕй хецӕн кӕнӕн. Уонӕн сӕ сӕйраг мӕтӕ ӕй, сӕхецӕн хуӕруйнаг иссерун ӕма бӕдӕлттӕ рауадзун. Фал нӕ Хуцау уотӕ не ’скодта, цӕмӕй нӕ амонд айдагъ еци гъуддӕгтӕй кӕнгӕ уа. Не Сфӕлдесӕг ӕй «уарзондзийнади... Хуцау», «адӕймаги ӕхемӕ гӕсгӕ» ка сфӕлдиста, еци «амондгун Хуцау» (2 Кор. 13:11; 1 Тим. 1:11; Райд. 1:27). Мадта нӕ уарзӕгой Хуцауи ку фӕнзӕн, уӕд амондгун уодзиан. «Райсунӕй раттун амондгундӕр гъуддаг ӕй». Аци дзурдтӕ ескӕд дӕхебӕл бавзурстай? (Гъуд. 20:35). Айӕ ӕй царди сӕйраг уагӕвӕрдтӕй сӕ еу. Ӕма Йегови дӕр уой туххӕй фӕндуй, цӕмӕй дӕ разӕй ци нисӕнттӕ ӕвӕрис, уонӕй бӕрӕг уа, Хуцауи ӕма адӕни ке уарзис, е. (Бакӕсӕ Матфеййи 22:36–39.)

4, 5. Йесо амондгун цӕй фӕрци адтӕй?

⁴ Йесо Киристе ӕригӕнттӕн хуарз цӕветтон ниууагъта. Сувӕллон ма ку адтӕй, уӕд е дӕр иннӕ сувӕллӕнтти хӕццӕ гъазта. Хуцауи Дзурди финст ес, зӕгъгӕ, «ес рӕстӕг ходунмӕ... ӕмӕ рӕстӕг кафунмӕ» (Еккл. 3:4). Уомӕй уӕлдай ма Йесо Финстадӕ ӕртаста ӕма Йеговӕмӕ хӕстӕг кодта. 12 анзи ибӕл ку цудӕй, уӕд ковӕндони ахургӕнгути хӕццӕ дзубанди кодта ӕма «сӕ десӕн кӕрон дӕр нӕбал адтӕй, куд лӕдӕргӕ ӕй ӕма ци дзуӕппитӕ дӕттуй, зӕгъгӕ» (Лук. 2:42, 46, 47).

⁵ Ку исустур ӕй, удта ин цийнӕдзийнадӕ ци хаста? Йесо ӕй зудта, Хуцауи уотӕ ке фӕндуй, цӕмӕй «мӕгуртӕн хуарз хабар» игъосун кӕна ӕма «хъӕрӕутӕн – цӕстӕй ке ракӕсдзӕнцӕ», уой дзора (Лук. 4:18). Хуцауи фӕндон ӕнхӕст кӕнун Йесойӕн хъӕбӕр устур цийнӕдзийнадӕ хаста. Ӕма ’й цӕхуӕн зӕрдӕй ӕнхӕст кодта, уой туххӕй Псалом 40:8 финст ес: «О мӕ Хуцау, дӕ фӕндон ӕнхӕст кӕнун мин ӕй цийни хуасӕ». Йесо уарзта ӕ уӕларвон Фиди туххӕй адӕнӕн дзорун. (Бакӕсӕ Лукай 10:21.) Еухатт еу силгоймаги хӕццӕ дзурдта рӕстдзийнади туххӕй, уой фӕсте ба ӕ ахуркӕнуйнӕгтӕн загъта: «Мӕнӕн мӕ хуӕруйнаг ӕй, ка мӕ рарвиста, уомӕн ӕ фӕндон ӕнхӕст кӕнун ӕма ин ӕ гъуддаг кӕронмӕ рахъӕртун кӕнун» (Иоан. 4:31–34). Йесо Хуцауи ӕма адӕни ке уарзта, уой фӕрци амондгун адтӕй. Мадта дӕу бон дӕр ӕй амондгун ун.

6. Хуарз цӕмӕн уайдӕ, дӕ нисӕнтти туххӕй фӕлтӕрдгун хуӕртӕ ма ӕнсувӕрти хӕццӕ радзорун?

⁶ Киристӕнттӕй беретӕ хъӕбӕр амондгун иссӕнцӕ, ӕригонӕй пионертӕй лӕггадӕ кӕнун ке райдӕдтонцӕ, уой фӕрци. Хуарз уайдӕ дӕ нисӕнтти туххӕй уӕхӕн хуӕртӕ ма ӕнсувӕрти хӕццӕ радзорун.  Библий финст ес: «Ӕргом дзурд кӕми нӕ уа, уоми фӕндтӕ фехӕлдзӕнцӕ, берӕ унаффӕгӕнгутӕ кӕми уа, уоми ба алцидӕр рауайдзӕй» (Ӕмб. 15:22). Еци хуӕртӕ ма ӕнсувӕртӕ дин, ӕвӕдзи, зӕгъдзӕнцӕ, пионерӕй лӕггадӕ кӕнгӕй берӕ цӕбӕлдӕрти ке исахур уодзӕнӕ ӕма дин е царди устур ӕнхус ке уодзӕй. Йесо уӕлӕрвти ку адтӕй, уӕд ӕ Фидӕй берӕ цӕбӕлдӕрти исахур ӕй. Ӕма зӕнхӕбӕл ку лӕггадӕ кодта, уӕд дӕр ма нӕуӕг цидӕртӕ базудта. Зӕгъӕн, базудта, адӕнӕн хуарз хабар игъосун кӕнун устур цийнӕдзийнадӕ ке хӕссуй, уой. Удта фӕлварӕнти Хуцаубӕл еузӕрдонӕй ке байзадӕй, е дӕр ин цийни хуасӕ адтӕй. (Бакӕсӕ Исай 50:4; Дзиуит. 5:8; 12:2.) Мадта ӕркӕсӕн, пионерӕй лӕггадӕ кӕнгӕй адӕймаг амондгун цӕмӕн фӕууй, уомӕ.

7. Ӕригӕнттӕй берети зӕрдӕмӕ цӕмӕн цӕуй ахуркӕнуйнӕгтӕ цӕттӕ кӕнуни гъуддаги архайун?

⁷ Йесо загъта: «Цотӕ ӕма мин... цӕттӕ кӕнтӕ ахуркӕнуйнӕгтӕ [...] ӕма сӕ ахур кӕнтӕ» (Матф. 28:19, 20). Де ’гас хъауритӕ дӕр аци гъуддагмӕ ку исаразай, уӕд Хуцауӕн кадӕ кӕндзӕнӕ ӕма дӕ цардӕй дӕ зӕрдӕ рохс кӕндзӕй. Ке зӕгъун ӕй гъӕуй, цӕмӕй аци гъуддаги исдӕсни уай, уой туххӕй рӕстӕг гъӕуй. Еу ӕнсувӕр, Тимоти, зӕгъгӕ, пионерӕй лӕггадӕ кӕнун райдӕдта 19 анзи ибӕл ку цудӕй, уӕд. Е зӕгъуй: «Мӕ зӕрдӕмӕ хъӕбӕр цӕуй Йеговӕн ӕнхӕстрӕстӕг лӕггадӕ кӕнун, уомӕн ӕма ин уотемӕй мӕ бон ӕй бавдесун, куд ӕй уарзун, уой. Фиццаг рӕстӕгути мин нӕ уадӕй Библий ахур иссерун. Фал уой фӕсте ба ӕндӕр рауӕнмӕ игъосун кӕнунмӕ рандӕ дӕн, ӕма еу мӕйи фӕсте цалдӕр адӕймагей хӕццӕ Библи ахур кӕнун райдӕдтон. Ке хӕццӕ ахур кодтон, уонӕй сӕ еу ӕмбурдтӕмӕ цӕун дӕр райдӕдта. Фӕстӕдӕр дууӕ мӕйи фӕййахур кодтон Скъолай ӕнӕуосӕ ӕнсувӕртӕн * ӕма мӕ иснисан кодтонцӕ ӕндӕр ӕмбурдмӕ. Уоми ба Библи ахур кӕнун райдӕдтон цуппар адӕймагей хӕццӕ. Мӕ зӕрдӕмӕ хъӕбӕр цӕуй адӕнӕн рӕстдзийнадӕ амонун, уомӕн ӕма ’й уинун, сугъдӕг хъаури фӕрци куд ӕййевгӕ цӕунцӕ, уой» (1 Фес. 2:19).

8. Еуӕй-еу ӕригӕнттӕ ма ци фӕккӕнунцӕ, цӕмӕй фулдӕр адӕнӕн игъосун кӕнонцӕ?

⁸ Еуӕй-еу ӕригӕнттӕ ба ӕндӕр ӕвзаг исахур кодтонцӕ. Зӕгъӕн, еу ӕнсувӕр Цӕгат Америкӕй, Джейкоб, зӕгъгӕ, финсуй: «Авд анзи мӕбӕл ку цудӕй, уӕд мӕ къласи берӕ вьетнаймӕгтӕ ахур кодта. Ӕма мӕ хъӕбӕр фӕндидӕ сӕ хӕццӕ Йегови туххӕй радзорун. Уомӕ гӕсгӕ рӕстӕг ку рацудӕй, уӕд исфӕндӕ кодтон вьетнаймаг ӕвзаг исахур кӕнун. Ӕвзаг ахур кодтон сӕйрагидӕр англисаг ӕма вьетнаймаг «Гъӕуайгӕнӕн мӕсуги» статьятӕ кӕрӕдзей хӕццӕ ке барстон, уой фӕрци. Уомӕй уӕлдай ма балимӕн дӕн вьетнаймаг ӕмбурди хуӕртӕ ӕма ӕнсувӕрти хӕццӕ. 18 анзи мӕбӕл ку исӕнхӕст ӕй, уӕдта пионерӕй лӕггадӕ кӕнун райдӕдтон. Уой фӕсте ба фӕдтӕн Скъола ӕнӕуосӕ ӕнсувӕртӕн. Ӕма нур лӕггадӕ кӕнун пионерӕй, удта ма вьетнаймаг къуари еунӕг хестӕр нӕлгоймагӕй. Вьетнаймӕгтӕ арӕх фӕддес кӕнунцӕ се ’взаг син ке исахур кодтон, уобӕл. Медӕмӕ дӕр мин фӕззӕгъунцӕ ӕма мин арӕх рауайуй Библий ахур райдайун. Кадӕртӕ си донаргъуд дӕр райстонцӕ». (Рабарӕ Гъуддӕгтӕ 2:7, 8.)

9. Ахуркӕнуйнӕгтӕ цӕттӕ кӕнуни гъуддаги архайгӕй цӕбӕл исахур уодзӕнӕ?

 ⁹ Ахуркӕнуйнӕгтӕ цӕттӕ кӕнгӕй берӕ цӕбӕлдӕрти исахур уодзӕнӕ, зӕгъӕн, кустмӕ раст цӕстӕй кӕсун ӕма адӕни хӕццӕ дзорун, удта ма фӕннифсгундӕр уодзӕнцӕ (Ӕмб. 21:5; 2 Тим. 2:24, феп.). Фал ма дин еци куст кӕнун уӕлдай ӕхцӕуӕндӕр уодзӕй еу гъуддаги туххӕй: де ’ууӕндундзийнадӕн федар бундор ке ес, уой никки хуӕздӕр лӕдӕрдзӕнӕ. Уомӕй уӕлдай ма ахур кӕндзӕнӕ Йегови хӕццӕ ӕмгуст кӕнунбӕл (1 Кор. 3:9).

10. Адӕн рӕстдзийнадӕмӕ лӕгъуз ку игъосонцӕ, уӕддӕр ахуркӕнуйнӕгтӕ цӕттӕ кӕнуни гъуддаг цийнӕдзийнадӕ цӕмӕн хӕссуй?

¹⁰ Кӕми игъосун кӕнис, уоми адӕн рӕстдзийнадӕмӕ лӕгъуз ку игъосонцӕ, уӕддӕр дин ахуркӕнуйнӕгтӕ цӕттӕ кӕнуни гъуддаг цийнӕдзийнадӕ хӕсдзӕй. Еци куст ӕгас ӕмбурд дӕр еумӕйагӕй фӕккӕнунцӕ. Ке зӕгъун ӕй гъӕуй, ка байгъуста ӕма фӕстӕдӕр киристон ка иссӕй, уӕхӕн адӕймаги хӕццӕ Библи еунӕг кадӕр фӕййахур кӕнуй, фал ибӕл цийнӕ ба еугурӕйдӕр фӕккӕнунцӕ, уомӕн ӕма ’й ӕмбурдемӕй агурдтонцӕ. Зӕгъӕн, Брендон фараст анзи пионерӕй лӕггадӕ кодта, адӕн лӕгъуз кӕми игъустонцӕ, уӕхӕн рауӕн ӕма загъта: «Ӕз уарзун игъосун кӕнун, уомӕн ӕма е Йегови фӕдзӕхст ӕй. Пионерӕй лӕггадӕ кӕнун райдӕдтон, скъола ку фӕдтӕн, уӕд. Мӕ зӕрдӕмӕ хъӕбӕр цӕуй ӕригон ӕнсувӕрти раст нисӕнттӕмӕ разӕнгард кӕнун ӕма мин ӕхцӕуӕн фӕууй сӕ къохи ку бафтуйунцӕ, уӕд. Скъола ӕнӕуосӕ ӕнсувӕртӕн ку рацудтӕн, уӕд мӕ ӕндӕр рауӕнмӕ иснисан кодтонцӕ. Библи ке хӕццӕ ахур кодтон, уонӕй донаргъуд неке райста, фал иннӕ хуӕртӕ ма ӕнсувӕртӕмӕ ба уӕхӕнттӕ адтӕй. Ахуркӕнуйнӕгтӕ цӕттӕ кӕнуни гъуддаги ӕгас хъауритӕй ке архайун, уой фӕрци хъӕбӕр амондгун дӕн» (Еккл. 11:6).

11. Ӕригӕнттӕн ма цӕхуӕн фадуат ес лӕггадӕ кӕнунмӕ?

¹¹ Йеговӕн лӕггадӕ кӕнунмӕ аллихузи фадуӕттӕ ес. Зӕгъӕн, берӕ ӕригӕнттӕ ӕнхус кӕнунцӕ арӕзтадон кустити. Нур ма сӕдӕгай залтӕ гъӕуй аразун. Еци куст дӕр Хуцауи кадгин кӕнуй ӕма дин хъӕбӕр устур цийнӕдзийнадӕ хӕсдзӕй. Расагъӕс кӕнӕ, аллихузи хуӕртӕ ӕма ӕнсувӕрти хӕццӕ косун дӕр куд ӕхцӕуӕн ӕй. Арӕзтадон гъуддӕгти архайгӕй берӕ цӕбӕлдӕрти исахур уодзӕнӕ, зӕгъӕн, фидбилизӕй хе хезун, уодуӕлдаййӕй косун ӕма проектбӕл дзуапп ка дӕттуй, уони хӕццӕ ӕмгуст кӕнун.

12. Пионерӕй ка лӕггадӕ кӕнуй, уонӕн ма лӕггадӕ кӕнунмӕ цӕхуӕн фадуӕттӕ фӕззиннуй?

¹² Еу ӕнсувӕр, Кевин, зӕгъгӕ, зӕгъуй: «Пионерӕй лӕггадӕ кӕнун мӕ минкъийӕй ардӕмӕ фӕндадтӕй. Гъема мӕбӕл 19 анзи ку исӕнхӕст ӕй, уӕд мӕ фӕндӕ мӕ къохи бафтудӕй. Бони ’рдӕг кустон, хӕдзӕрттӕ ка кодта, уӕхӕн ӕнсувӕрмӕ. Уоми исахур дӕн хӕдзари сӕртӕ ӕвӕрун, удта къӕрӕзгитӕ ӕма дуӕрттӕ садзун. Фӕстӕдӕр дууӕ анзей дӕргъи кустон, тухдунги фӕсте залтӕ, удта хуӕртӕ ма ӕнсувӕрти хӕдзӕрттӕ ка рӕвдзӕ кодта, еци бригади. Хонсар Африкаг Республики арӕзтадон гъуддӕгти ӕнхус ке гъӕуй, уой ку базудтон, уӕд ӕз дӕр курдиадӕ ниффинстон ӕма мӕмӕ фӕдздзурдтонцӕ. Ами лӕггадӕ кӕнгӕй алли цалдӕр къуӕрей фӕсте дӕр ӕндӕр рауӕнмӕ рандӕ ун. Еу рауӕн зал арӕзт ку ’рцӕуй, уӕд рандӕ ун иннемӕ. Ци къуари  хӕццӕ косун, етӕ мин бийнонти хузӕн иссӕнцӕ. Цӕргӕ дӕр еумӕ кӕнӕн, Библи дӕр еумӕ фӕййахур кӕнӕн ӕма косгӕ дӕр еумӕ кӕнӕн. Уомӕй уӕлдай ма мӕ зӕрдӕмӕ хъӕбӕр цӕуй алли къуӕре дӕр бунӕттон ӕнсувӕрти хӕццӕ игъосун кӕнун. Сагъӕс дӕр некӕд ракодтайнӕ, сувӕллонӕй мин ци нисӕнттӕ адтӕй, етӕ мин уойбӕрцӕ цийнӕдзийнадӕ ке ӕрхӕсдзӕнцӕ».

13. Вефили лӕггадӕ кӕнун ӕригӕнтти зӕрдӕмӕ цӕмӕн цӕуй?

¹³ Пионерӕй ка лӕггадӕ кодта, уонӕй беретӕ нур Вефили лӕггадӕ кӕнунцӕ. Еци лӕггадӕ син хъӕбӕр берӕ цийнӕдзийнадӕ хӕссуй, уомӕн ӕма цидӕриддӕр кӕнунцӕ, уой Йеговӕн кӕнунцӕ. Сӕ хъиамӕти фӕрци хуӕртӕ ма ӕнсувӕртӕн, удта иннӕ адӕнӕн дӕр ес ӕууӕндундзийнадӕ федаргӕнӕн хуӕруйнаг. Вефили ка лӕггадӕ кӕнуй, уӕхӕн ӕнсувӕр, Дастин, зӕгъгӕ, зӕгъуй: «Фараст анзи мӕбӕл ку цудӕй, уӕд мӕхецӕн загътон, ӕнхӕстрӕстӕг лӕггадгӕнӕг ке исуодзӕн. Гъема скъола ку фӕдтӕн, уӕд пионерӕй лӕггадӕ кӕнун райдӕдтон. Анз ӕма ӕрдӕги фӕсте мӕ Вефилмӕ фӕххудтонцӕ. Уоми исахур дӕн мухургӕнӕн станокбӕл косун, фӕстӕдӕр ба компьютери программити хӕццӕ архайун. Вефили лӕггадӕ кӕнгӕй тӕккӕ фиццаг базонӕн, ӕгас дуйнебӕл игъосун кӕнуни гъуддаг размӕ куд цӕуй, уой, ӕма мин е хъӕбӕр ӕхцӕуӕн ӕй. Мӕ зӕрдӕмӕ  хъӕбӕр цӕуй ами лӕггадӕ кӕнун, уомӕн ӕма нӕ куст ӕнхӕст кӕнгӕй адӕнӕн ӕнхус кӕнӕн Йеговӕмӕ хӕстӕг кӕнун».

14. Цӕмӕй ӕнхӕстрӕстӕг лӕггадгӕнӕг исуай, уой туххӕй дӕ ци кӕнун гъӕуй?

¹⁴ Дӕ бон куд ӕй дӕхе бацӕттӕ кӕнун, цӕмӕй ӕнхӕстрӕстӕг лӕггадгӕнӕг исуай? Фиццагидӕр гъӕуама архайай киристон менеугутӕбӕл. Уомӕ гӕсгӕ ба Хуцауи Дзурд лӕмбунӕг ахур кӕнӕ, арф ибӕл сагъӕс кӕнӕ, удта архайӕ ӕмбурдти дзуапп дӕттун. Цалинмӕ скъолай ахур кӕнис, уӕдмӕ дӕ бон ӕй иннетӕн хуарз хабар игъосун кӕнун, цӕмӕй арӕхстгундӕр кӕнай. Дӕхе ахур кӕнӕ адӕни хӕццӕ дзоргӕй зундӕй архайун: сӕ гъудибӕл сӕ уӕзданӕй бафӕрсисӕ, уой фӕсте ба сӕмӕ лӕмбунӕг игъосӕ. Уомӕй уӕлдай мӕ дӕ бон ӕй ӕмбурди гъуддӕгти дӕр ӕнхус кӕнун, зӕгъӕн, рафснайун кенӕ ести барӕвдзӕ кӕнун ку гъӕуа. Сӕрниллӕгдзийнадӕ дӕмӕ ку уа ӕма иннетӕн ӕнхус кӕнунмӕ цӕттӕ ку уай, уӕд Йеговӕн хъӕбӕр ӕхцӕуӕн уодзӕй, дӕ барӕ ма дин ӕндӕр ихӕстӕ дӕр бакӕнун. (Бакӕсӕ Псалом 110:3; Гъуд. 6:1–3.) Ӕнсувӕртӕ Тимофеййи «хъӕбӕр ӕстудтонцӕ» ӕма ’й уомӕ гӕсгӕ апостол Павел ӕ хӕццӕ ӕндӕр рауӕнти игъосун кӕнунмӕ райста (Гъуд. 16:1–5).

15. Дӕ бон ци ӕй бакӕнун, цӕмӕй федӕни дӕхе дарунгъон уай?

¹⁵ Ӕнхӕстрӕстӕг ка лӕггадӕ кӕнуй, етӕ арӕхдӕр сӕхе фӕддаруни фагӕ сӕхуӕдтӕ фӕккосунцӕ (Гъуд. 18:2, 3). Кӕд гӕнӕн ес, уӕд цалинмӕ скъоламӕ цӕуис, уӕдмӕ ести кустбӕл райахур кӕнӕ, цӕмӕй уой фӕсте, пионерӕй лӕггадӕ кӕнгӕй, ӕгас бон косун дӕ кӕми нӕ гъӕуа, уӕхӕн куст иссерай. Унаффӕ рахӕссуни разӕй районон цӕстӕдарӕги кенӕ бунӕттон пионерти хӕццӕ радзубанди кӕнӕ. Етӕ дин райамондзӕнцӕ, лӕггадӕ кӕнунмӕ дӕ ка нӕ хъор кӕндзӕй, уӕхӕн куститӕ. Библи зӕгъуй: «Дӕ гъуддӕгтӕ Йегови барӕ бакӕнӕ, ӕма дӕ фӕндтӕ дӕ къохи бафтуйдзӕнцӕ» (Ӕмб. 16:3; 20:18).

16. Ӕригонӕй ӕнхӕстрӕстӕг ку лӕггадӕ кӕнай, уӕд дӕ е федӕни ӕндӕр ихӕстӕмӕ куд бацӕттӕ кӕндзӕй?

¹⁶ Йегови фӕндуй, цӕмӕй федар хуӕцай «ӕцӕг цардбӕл», федӕни дӕ ци амондгун цард хезуй, уобӕл. (Бакӕсӕ 1 Тимофеймӕ 6:18, 19.) Ӕнхӕстрӕстӕг ку лӕггадӕ кӕнай, уӕд ӕмгуст кӕндзӕнӕ иннӕ пионерти хӕццӕ, ӕма уой фӕрци де ’ууӕндундзийнадӕ дӕр федардӕр кӕндзӕй. Беретӕ пионертӕй ке лӕггадӕ кодтонцӕ, уой фӕрци федар бийнонтӕ искодтонцӕ. Бийнонтӕ искӕнуни разӕй пионерӕй ка лӕггадӕ кодта, уонӕй беретӕ уой фӕсте идарддӕр дӕр лӕггадӕ кодтонцӕ сӕ цардӕмбӕлтти хӕццӕ (Ром. 16:3, 4).

17, 18. «Дӕ зӕрди фӕндтӕ» дӕ нисӕнттӕбӕл куд рабӕрӕг уодзӕнцӕ?

¹⁷ Псаломи 20:4 Йегови туххӕй финст ӕй: «Дӕхе зӕрди фӕндонмӕ гӕсгӕ дӕ фӕккӕнӕд ӕма дин дӕ фӕндтӕ еугурӕйдӕр исӕнхӕст кӕнӕд». Мадта дӕ дӕ царди цӕхуӕн нисӕнттӕ фӕндуй исӕвӕрун? Расагъӕс кӕнӕ, мах рӕстӕги Йеговӕ цӕхуӕн куст кӕнуй ӕма си дӕу бон дӕр куд ӕй архайун, уобӕл. Уой фӕсте ба дӕ рази исӕвӕрӕ, ӕ зӕрдӕ ин ка рохс кӕндзӕй, уӕхӕн нисӕнттӕ.

¹⁸ Де ’гас хъауритӕ дӕр Йеговӕн лӕггадӕ кӕнунмӕ ку исаразай, уӕд хъӕбӕр амондгун уодзӕнӕ, уомӕн ӕма дӕ цардӕй Хуцауи кадгин кӕндзӕнӕ. Мадта «Йеговӕ уӕд де ’стур цийнӕ, ӕма дин дӕ зӕрди фӕндтӕ исӕнхӕст кӕндзӕй» (Пс. 37:4).