1. Ino ncinzi mukubusi ncayelede kusala kujatikizya buumi bwakwe bwakumbele, pele nkaambo nzi ncocitayandiki kuciindizya kulibilika? (Amubone cifwanikiso icili kumatalikilo aacibalo.)

NYWEBO nobakubusi, mulakonzya kuzuminizya kuti muntu katanapanga lweendo, ncamaano kulibambila nkwawunka, tee kayi? Buumi buli mbuli lweendo alimwi ciindi nomweelede kulibambila nkomuyanda kuunka ndileelyo nomucili bana. Masimpe, kutalika kulibambila cilakonzya kukatazya. Musimbi wazina lya Heather wakaamba kuti: “Cilayoosya kulibambila nkaambo weelede kusala ncoyoocita mubuumi bwako boonse.” Pele mutayoowi pe. Mboobu Jehova mbwabaambila bantu bakwe: “Utalibiliki pe, nkaambo ndime Leza wako. Ndilakuyumya, inzya ndilakugwasya.”—Is. 41:10.

2. Ino muzyi buti kuti Jehova uyanda kuti mulibambile buumi bukkomanisya kumbele?

² Jehova umukulwaizya kuti mulibambile kabotu kujatikizya buumi bwanu bwakumbele. (Muk. 12:1; Mt. 6:20) Uyanda kuti kamukkomene. Eeci cilalibonya muzintu nzyotubona, nzyotumvwa alimwi azintu zimwi buyo zyalo izilibonya muzintu nzyaakalenga. Alimwi amubone mbwatulanganya alimwi ambwatuyiisya kupona buumi bwiinda kubota. Jehova waamba boobu kuli baabo ibakaka kulaigwa anguwe: “Mwakasala cintu icatakali kundikkomanisya. . . . Amubone! Babelesi bangu bayoosekelela, pele nywebo muyoofwa nsoni. Amubone! Babelesi bangu  bayakoongolola cakukondwa akaambo kakukkomana kwamyoyo yabo.” (Is. 65:12-14) Jehova ulalemekwa kapati ciindi bantu bakwe nobasala camaano mubuumi.—Tus. 27:11.

3. Ino ncinzi Jehova ncayanda kuti mucite?

³ Ino Jehova uyanda kuti mube amakanze aali buti? Wakalenga bantu kuti kabajana lukkomano kwiinda mukumuzyiba alimwi akumubelekela cakusyomeka. (Int. 128:1; Mt. 5:3) Eeci ciliindene kapati abanyama mbaakalenga, balo ibazyi buyo kulya, kunywa alimwi akuzyalana. Leza uyanda kuti mujane lukkomano kwiinda mukukanza kucita zintu ziindene azyeezyo nzyobazyi banyama. Mulengi wanu ngu “Leza siluyando,” ngu “Leza uukkomene” walo iwakalenga bantu “mucinkozya cakwe.” (2Kor. 13:11; 1Tim. 1:11; Matl. 1:27) Munookkomene ikuti mwamwiiya Leza wesu siluyando. Sena mwakaabona kale mbwaali aamasimpe majwi aali kulugwalo ilwaamba kuti: “Kupa kulakkomanisya kapati kwiinda kupegwa”? (Mil. 20:35) Majwi aaya ngamasimpe kujatikizya buumi mbobapona bantu. Aboobo, Jehova uyanda kuti makanze aanu kaagamikide mukutondezya kuti mulamuyanda Leza alimwi akuti mulabayanda bantu bamwi.—Amubale Matayo 22:36-39.

4, 5. Ino ncinzi cakapa kuti Jesu akkomane?

⁴ Jesu Kristo wakamusiila cikozyanyo cilondokede nywebo nobakubusi. Cakutadooneka, naakacili mwana wakali kusobana alimwi akulikondelezya. Jwi lya Leza lyaamba kuti kuli “ciindi cakuseka . . . aciindi cakuzyana.” (Muk. 3:4) Alimwi Jesu wakajisi cilongwe cibotu a Jehova kwiinda mukwiiya Magwalo. Naakacili amyaka iili 12, bamayi kutempele bakalijata kumulomo akaambo “kabusongo mbwaakajisi alimwi ambwaakali kwiingula” kujatikizya zintu zyakumuuya.—Lk. 2:42, 46, 47.

⁵ Jesu wakakomena akuba muntu uukkomene. Ino ncinzi icakamupa kuti kakkomene? Nokuba kuti nzinji nzyaakeelede kucita, Leza wakali kuyanda kuti Jesu ‘aambile bacete makani mabotu . . . akwaangununwa kwaboofwu.’ (Lk. 4:18) Ikucita ncaakamwaambila Leza kwakapa kuti Jesu akkomane. Lugwalo lwa Intembauzyo 40:8 lulaamba mbwaakali kulimvwa noluti: “Ndilakukkomanina kucita kuyanda kwako, O Leza wangu.” Jesu wakali kukukkomanina kuyiisya bantu kujatikizya Usyi wakujulu. (Amubale Luka 10:21.) Aciindi cimwi naakamana kuyiisya mukaintu umwi kujatikizya bukombi bwakasimpe, Jesu wakaambila basikwiiya bakwe kuti: “Cakulya cangu nkucita kuyanda kwayooyo wakandituma alimwi akumanizya mulimo wakwe.” (Joh. 4:31-34) Ikutondezya kuti wakali kumuyanda Leza alimwi abantu kwakapa kuti Jesu akkomane. Andinywe kulakonzya kumupa kuti mukkomane.

6. Ino nkaambo nzi ncocigwasya kubandika makanze aanu aakumbele a Banakristo basimide?

⁶ Banakristo banji balajana lukkomano mubukubusi bwabo kwiinda mukubeleka kabali bapainiya. Sena inga mwabandika abamwi babo kujatikizya makanze aanu? “Makanze alanyongana ikuti kakunyina kubandika, pele ikuti kakuli basikulaya banji kulaba kuzwidilila.” (Tus. 15:22) Bantu bali boobo inga bamwaambila kuti mulimo waciindi coonse upa lwiiyo ilukonzya kumugwasya mubuumi bwanu boonse. Naakamana kuyiisyigwa aba Usyi kujulu, Jesu wakazumanana kwiiya ciindi naakali kucita mulimo wakwe anyika. Mucikozyanyo, wakaiya bubotu buboola kwiinda mukubasika aamoyo bantu amakani mabotu alimwi alukkomano iluboola kwiinda mukuzumanana kusyomeka mumasunko. (Amubale Isaya 50:4; Heb. 5:8; 12:2) Atulange-lange zibeela zimwi zyamulimo waciindi coonse izikonzya kumupa kukkomana kapati.

7. Nkaambo nzi bakubusi banji ncobakukkomanina kuyiisya bantu kuba basikwiiya?

⁷ Jesu wakati: “Kamuya mukayiisye bantu . . . kuti babe basikwiiya.” (Mt. 28:19, 20) Ikuti naa mukanza kutalika kuyiisya bantu kuba basikwiiya, muyoosala mulimo uukkomanisya kapati, ooyo uupa kuti Leza alemekwe. Mbubwenya mbuli mulimo uuli woonse, muyandika ciindi kutegwa mube muntu uucibwene. Calino-lino buyo, mukwesu wazina lya Timothy, iwakatalika bupainiya kacili mukubusi wakati: “Ndilakkomana  kubelekela Jehova mumulimo waciindi coonse akaambo kakuti njenzila mbonditondezya luyando ndondijisi kulinguwe. Kumatalikilo, ndakaalilwa kutalika ciiyo ca Bbaibbele nociba comwe, pele kumbele ndakalongela kucilawo cimbi, mpoonya mumwezi buyo omwe ndakatalisya ziiyo zinji. Sikwiiya Bbaibbele umwi wakatalika kuboola ku Ŋanda ya Bwami. Nondakajanika kwamyezi yobilo ku Cikolo Cakwiiya Bbaibbele ca Bakwesu Batakwete, * ndakatumwa kuyoobelekela kubusena bumbi ooko nkondakatalisya ziiyo zyone. Ndilakukkomanina kuyiisya bantu, akaambo kakuti ndilakonzya kubona kuti muuya uusalala uli mukubacinca.”—1Tes. 2:19.

8. Ino mbuti bakubusi Banakristo mbobatola lubazu cakumaninina mukuyiisya bantu kuti babe basikwiiya?

⁸ Banakristo bamwi bakubusi bakaiya mwaambo umbi. Mucikozyanyo, Jacob uuzwa ku North America wakalemba kuti: “Ciindi nondakali amyaka yakuzyalwa iili ciloba, basicikoloma banji bakali kuzwa ku Vietnam. Ndakali kuyanda kubaambila kujatikizya Jehova, aboobo ndakapanga bubambe bwakuti ndiiye mwaambo wabo. Bunji bwaziindi, ndakali kwiiya kwiinda mukukozyanisya zibalo zyamu Ngazi Yamulindizi yamu Chingisi ayamu Chivietnamese. Alimwi ndakaba abalongwe mumbungano yakali afwaafwi iyakali kubelesya mwaambo wa Chivietnamese. Nondakakkwanya myaka yakuzyalwa iili 18, ndakatalika bupainiya. Mukuya kwaciindi, ndakanjila Cikolo Cakwiiya Bbaibbele ca Bakwesu Batakwete. Cikolo eeci candigwasya kubeleka mulimo wabupainiya kubusena nkondakatumwa, ooko nkondili mwaalu endikke mukabunga kabelesya mwaambo wa Chivietnamese. Bantu banji baku Vietnam balagambwa kuti ndakawiiya mwaambo wabo. Ciindi nondikambauka inga balanditambula kabotu alimwi kanji-kanji inga ndilaiya Bbaibbele ambabo. Bamwi bayaambele kusika antaamu yakubabbapatizyigwa.”—Amweezyanisye Milimo 2:7, 8.

9. Ino mbuti mulimo wakugwasya bantu kuba basikwiiya mboupa lwiiyo lubotu?

⁹ Mulimo wakugwasya bantu kuba basikwiiya ulakonzya kumuyiisya kuba bankutwe mumulimo, kuzyiba kubandika kabotu abantu, kubandika cabusicamba alimwi cabupampu. (Tus. 21:5; 2Tim. 2:24, bupanduluzi buyungizyidwe) Pele kugwasya bantu kuba basikwiiya ikapati kulakkomanisya akaambo kakuti kumugwasya kuzyiba twaambo twamu Magwalo itumupa kuba alusyomo. Alimwi kucita boobo kumuyiisya kubelekela antoomwe a Jehova.—1Kor. 3:9.

10. Ino mbuti mbomukonzya kujana lukkomano mumulimo wakugwasya bantu kuba basikwiiya nomuba muzilawo zikatazya?

¹⁰ Mulakonzya kuukkomanina mulimo wakugwasya bantu kuba basikwiiya nokuba kuti mbasyoonto ibazumina makani mabotu mucilawo canu. Kugwasya bantu kuba basikwiiya mulimo uucitwa abantu banji. Mbungano yoonse ilatola lubazu mukuyandaula bantu babombe myoyo. Nokuba kuti mukwesu buyo omwe naa mucizyi nguukonzya kujana muntu ooyo walo mukuya kwaciindi uukonzya kuba sikwiiya, boonse buyo balatola lubazu mumulimo wakuyandaula alimwi boonse inga bakkomana caantoomwe. Mucikozyanyo, ba Brandon bakabeleka myaka iili fwuka mumulimo wabupainiya mucilawo oomo bantu mobatakali kukatambula kasimpe. Bakaamba kuti: “Ndilayanda kukambauka makani mabotu akaambo kakuti ngomulimo Jehova ngwayanda kuti tubeleke. Ndakatalika bupainiya mbondakamanina buyo cikolo. Ndilakkomana kukulwaizya bakwesu ibakubusi mumbungano yesu alimwi akubabona kabayaambele kumuuya. Nondakanjila Cikolo Cakwiiya Bbaibbele ca Bakwesu Batakwete, ndakatumwa kuyoobelekela kubusena bumbi. Masimpe ngakuti tandinajanide muntu mucilawo cangu iwakayaambele mane kubbapatizyigwa, pele bambi bakajana. Ndilikkomene kuti ndakalibambila ikutola lubazu cakumaninina mumulimo wakugwasya bantu kuba basikwiiya.”—Muk. 11:6.

11. Ino mulimo nzi uusetekene bakubusi banji ngobakkomanina kubeleka?

¹¹ Kuli nzila zinji motukonzya kumubelekela Jehova. Mucikozyanyo, bakubusi banji balagwasyilizya mumulimo wakuyaka. Kuyandika Maanda aa  Bwami manji mapya. Kuyaka Maanda aa Bwami aaya, mulimo uusetekene uulemeka Leza alimwi ulakonzya kumupa kukkomana. Mbubwenya mbuli milimo iimbi iisetekene, kuyanzana ababelesima kulakkomanisya kapati. Alimwi kuyaka masena aakucitila zintu zyakumuuya kulayiisya, kulakonzya kumuyiisya mbociyandika kulikwabilila kuntenda, kuba mubelesi munkutwe alimwi akubelekela antoomwe abaabo ibasololela mumulimo.

12. Ino nzyoolwe nzi izikonzya kuboola akaambo kamulimo wabupainiya?

¹² Mukwesu wazina lya Kevin wakaamba boobu: “Kuzwa ciindi nondakacili muniini, ndakali kulombozya kuti kumbele aamazuba ndikamubelekele Jehova mumulimo waciindi coonse. Nondakakkwanya myaka iili 19 yakuzyalwa, ndakatalika kucita bupainiya. Ndakali kujana mali aakuligwasya kwiinda mukubeleka kumukwesu walo iwakali sikuyaka. Ndakaiya kubikka ziluli, mawindo alimwi amilyango. Mukuya kwaciindi, ndakabeleka kwamyaka yobilo munkamu yabasikugwasyilizya nokwacitika ntenda, ikuyakulula Maanda aa Bwami alimwi amaanda aabakwesu. Nondakamvwa kuti kuyandika basikuyaka kucisi ca South Africa, ndakalembela mpoonya ndakatambulwa kuyoobelekela nkuko. Omuno mu Africa, inga tulalonga twamana kuyaka Ŋanda ya Bwami imwi akuunka kuyooyaka imbi kumasena aambi munsondo zisyoonto buyo. Mukakamu kabasikuyaka mondibede, twakaile kuba buyo mbuli mukwasyi. Tukkala antoomwe, tulaiya Bbaibbele antoomwe alimwi tubelekela antoomwe. Alimwi nsondo ansondo ndilakkomana kapati kubeleka mubukambausi abakwesu bakubusena ooko nkotubede. Makanze ngondakajisi kandicili muniini andiletela lukkomano munzila nzyondatakali kuyeeyela.”

13. Ino mbuti mulimo waku Beteli mboubakkomanisya bakubusi?

¹³ Bamwi ibakabeleka canguzu kwaazuzikizya makanze aabo kubelekela Jehova ciindi coonse lino bali ku Beteli. Mulimo waku Beteli ulakkomanisya kapati nkaambo zyoonse izicitwa  ookuya, zicitilwa Jehova. Mukwasyi wa Beteli ulagwasyilizya mukwaabila cakulya cakumuuya. Mukwesu uubelekela ku Beteli wazina lya Dustin wakaamba kuti: “Ndakaba ambaakani yakubeleka mumulimo waciindi coonse nondakali amyaka iili fwuka, mpoonya ndakatalika bupainiya nondakamana cikolo. Nokwakainda mwaka omwe acisela, ndakatambwa kuyoobelekela ku Beteli kwalo nkondakaiya kubelesya muncini wakusimbya mabbuku mpoonya mukuya kwaciindi ndakaiya mulimo wamakkompyuta. Ku Beteli, ndilakkomana ikulimvwida kujatikizya mulimo wakugwasya bantu kuba basikwiiya mpoweendela nyika yoonse. Kubelekela okuno ndilakukkomanina nkaambo mulimo ngotucita ugwasya bantu kuba balongwe ba Jehova.”

14. Mbuti mbomukonzya kulibambila kunjila mumulimo waciindi coonse?

¹⁴ Ino mbuti mbomukonzya kulibambila kuba mubelesi mumulimo waciindi coonse wa Bunakristo? Iciyandika kwiinda, nkuba abube bwakumuuya bwalo ibuyoomugwasya kuzwidilila mukubelekela Jehova cakumaninina. Aboobo amube basungu ciindi nomwiiya Jwi lya Leza, amuzinzibale kuyeeya ncolyaamba mpoonya amujane nzila mbomukonzya kutondezya lusyomo lwanu lyamiswaangano yambungano. Mumyaka nomucili kucikolo, mulakonzya kuyungizya luzyibo kamuli bakambausi bamakani mabotu. Amwiiye kubabikkila maano bantu kwiinda mukubabuzya cabupampu kujatikizya mbobayeeya kutwaambo tumwi alimwi akuswiilila bwiinguzi mbobapa. Kuyungizya waawo, mulakonzya kulyaaba kucita zintu zimwi mumbungano, mbuli kusalazya alimwi akubamba ziyandika a Ŋanda ya Bwami. Jehova ulakkomana kubelesya bantu ibalicesya, aabo ibajisi muuya wakulisungula. (Amubale Intembauzyo 110:3; Mil. 6:1-3) Mwaapostolo Paulo wakatamba Timoteyo mumulimo wabumisyinali akaambo kakuti “wakali kulumbaizyigwa abakwesu.”—Mil. 16:1-5.

15. Ino mbuti mbomukonzya kulibambila kutegwa kamujana mali aakuligwasyilizya?

¹⁵ Babelesi baciindi coonse beelede kujana mali aakuligwasyilizya. (Mil. 18:2, 3) Andiza kkoosi iitola buyo ciindi cisyoonto inga yamugwasya kujana mulimo uubelekwa mawoola masyoonto buyo kubusena nkomukkala. Nomukanza kujatikizya nzyomuyanda kucita, amubandike amulangizi wabbazu alimwi abapainiya ibali mubbazu lyanu. Amubabuzye kujatikizya mulimo uukonzya kweelela kubapainiya. Alimwi kweelana ambolyaamba Bbaibbele, ‘amubikke milimo yanu yoonse mumaanza aa Jehova, eelyo makanze aanu ayoozwidilila.”—Tus. 16:3; 20:18.

16. Ino mbuti kubelekela Jehova mumulimo waciindi coonse nomucili bakubusi mbokukonzya kumugwasya kulibambila mikuli iimbi yakumbele?

¹⁶ Mulakonzya kusyoma kuti Jehova uyanda kuti nywebo ‘mujatisye’ buumi bubotu bwakumbele. (Amubale 1 Timoteyo 6:18, 19.) Mulimo waciindi coonse uyoomupa coolwe cakuyanzana ababelesinyoko ibali mumulimo waciindi coonse alimwi akumugwasya kuba Banakristo basimide. Alimwi banji bakajana kuti kubelekela Jehova mumulimo waciindi coonse nobakacili bakubusi kwabagwasya kuzwidilila mucikwati. Kanji-kanji, aabo ibakabeleka kabali bapainiya kabatanakwata naa kukwatwa bacikonzya kuzumanana mumulimo ooyu noliba leelyo nobakwata naa kukwatwa.—Rom. 16:3, 4.

17, 18. Ino moyo wanu ujatikizyigwa buti ciindi nomukanza kucita zintu mubuumi?

¹⁷ Ciindi nomukanza kucita zintu mubuumi, moyo wanu awalo ulajatikizyigwa. Lugwalo lwa Intembauzyo 20:4 lwaamba boobu kujatikizya Jehova: “Aakupe nzyoyanda mumoyo wako akuzuzikizya makanze aako oonse.” Aboobo amuyeeye kujatikizya ncomuyanda kunoocita mubuumi bwanu. Amubone zintu nzyacita Jehova mazuba aano alimwi acoolwe ncomujisi kutegwa mutole lubazu mumulimo wakwe. Mpoonya amukanze kucita icikonzya kumukkomanisya Leza.

¹⁸ Ikubelekela Jehova cakumaninina kuyoomuletela lukkomano lunji kapati nkaambo eeyi njenzila iilemeka Leza. Inzya, ‘amubotelwe kapati muli Jehova, eelyo walo uyoomupa nzyouyanda moyo wanu.’—Int. 37:4.