Ɛzoanvolɛ Pɔɔlo nwunle esiane mɔɔ wɔ Seetan adalɛ edwɛkɛ ne anu la, noko ɔ mediema Kilisienema mɔɔ ɛha la annwu ye zɔ. Kɛ neazo la, Kɔlentema bie mɔ liele bɛ nwo lile somaa​—bɛdwenlenle kɛ bɛgyi boɛ wɔ nɔhalɛ ne anu, ɔti bɛnrɛdɔ aze ɛlɛ. (1 Kɔl. 10:12) Ɛhye ati, Pɔɔlo bɔle bɛ kɔkɔ kɛ: “Mesulo kɛ wɔ adenle bie azo, kɛ mɔɔ ɛwɔlɛ ne luale nrɛlɛbɛ adenle zo bɛlɛbɛlale Yive la, bɛbazɛkye bɛ adwenle wɔ nɔhalɛlilɛ nee anwodelɛ mɔɔ fɛta Kelaese la anwo.”​—2 Kɔl. 11:3.

Pɔɔlo edwɛkɛ ne maa yɛnwu kɛ ɔnle kɛ yɛdie yɛ nwo yɛdi somaa. Amaa yɛahola yɛakpo Seetan adalɛ edwɛkɛ ne la, ɔwɔ kɛ yɛnwu esiane mɔɔ wɔ nu la na yɛbɔ yɛ nwo bane yɛfi nwo.

Duzu a le adalɛ edwɛkɛ? Wɔ edwɛkɛ ɛhye anu, ɔkile edwɛkɛ mɔɔ bɛsi ɔ ti aze anzɛɛ bɛfa bɛbɛlɛbɛla menli bɛmaa bɛkakyi bɛ adwenle nee bɛ nyɛleɛ la. Buluku bie ka kɛ, “ɔle subane mɔɔ ɛnle kpalɛ yɛɛ ɔboda.” Menli fa edwɛkɛ agbɔkɛ le kɛ “adalɛ nee mɛlɛbɛla ka edwɛkɛ mɔɔ sɛkye menli adwenle la anwo edwɛkɛ.”

Esiane boni a wɔ adalɛ edwɛkɛ nu a? Esiane wɔ nu​—ɔle kɛ gaase mɔɔ kola ku sonla la, bɛnnwu ye yɛɛ bɛnde ye nvoanle​—ɔkola ɔsɛkye adwenle ne. Abɔlɔba Vance Packard mɔɔ ze kɛzi sonla subane de la hanle kɛ: “Adalɛ edwɛkɛ ɛnyia yɛ nuhua dɔɔnwo nyɛleɛ zo tumi ɛdɛla kɛzi yɛnwu ye la.” Abɔlɔba ko hanle kɛ, yenyia  mrenyia nee mraalɛ anwo zo tumi yemaa “bɛla subane ɛtane ali”​—‘menli dɔɔnwo ɛhunlɛ, konle, ɛkpɔlɛ, abusua mɔɔ awie vi nu anzɛɛ ɛzonlenlɛ mɔɔ awie wɔ nu nee subane dɔɔnwo mɔɔ ɛnle kpalɛ la.’

Saa menli bɔbɔ kola ka adalɛ edwɛkɛ bɛlɛbɛla yɛ a, ɛnee duzu a Seetan ɛnrɛhola ye yɛ a? Yezukoa sonla subane ɔvi mekɛ mɔɔ bɛbɔle alesama la. “Ewiade amuala” wɔ ye tumi bo. Ɔkola ɔdua ye ewiade ne foa biala azo ɔtɛlɛ ye adalɛ edwɛkɛ ne anu. (1 Dwɔn 5:19; Dwɔn 8:44) Ɛhye ati, Seetan ɛhola “ɛzi bɛdabɛ mɔɔ bɛnlie bɛnli la adwenle ne anye,” yɛɛ ‘ɔlɛbɛlɛbɛla azɛlɛ ye azo amra amuala.’ (2 Kɔl. 4:4; Yek. 12:9) Kɛ ɔkɛyɛ na wɔakpo ye adalɛ edwɛkɛ ne ɛ?

Gyisɛse maanle yɛ adehilelɛ sikalɛ bie mɔɔ bamaa yɛakpo adalɛ edwɛkɛ la: “Bɛbanwu nɔhalɛ ne, na nɔhalɛ ne bamaa bɛanyia fanwodi.” (Dwɔn 8:31, 32) Kɛ sogyanli mɔɔ ɛwɔ konle nu la, ɔwɔ kɛ ɛnwu ɛleka mɔɔ ɛbade nɔhalɛ edwɛkɛ wɔavi la, amaa wɔava wɔazi kpɔvolɛ ne adenle na yeanva ye adalɛ edwɛkɛ ne yeambɛlɛbɛla wɔ. Gyihova ɛmaa yɛnyia ɛhye wɔ ye Edwɛkɛ ne anu. Ɛbanwu edwɛkɛ mɔɔ ɛhyia nwo mɔɔ bamaa wɔakpo Seetan adalɛ edwɛkɛ mɔɔ ɔka la wɔ Baebolo ne anu.​—2 Tim. 3:16, 17.

Nɔhalɛ nu, Seetan mɔɔ ɛbe wɔ mɛlɛbɛla nu la ze ɛhye. Ɔti, ɔbɔ mɔdenle kɛ ɔdua ye ewiade ne azo yeamaa yɛagyakyi Baebolo ne ɛgengalɛ nee ye ɛzukoalɛ. Mmatɔ ye ngane ne mɔ anu! (Ɛfɛ. 6:11, ɔbdw.) Yɛnyia mɔlebɛbo ngilehilelɛ ne anwo ndelebɛbo a ɛnee yɛtɛwiele. Ɔwɔ kɛ yɛbɔ mɔdenle yɛnyia nɔhalɛ ne anwo ndelebɛbo mɔɔ anu pi. (Ɛfɛ. 3:18) Noko kakye nɔhalɛ edwɛkɛ ɛhye mɔɔ buluku kɛlɛvo Noam Chomsky hanle la: “Awie biala ɛnrɛva nɔhalɛ ne ɛnrɛwula ɛ ti anu. Kyesɛ ɛdawɔ mumua ne ɛkpondɛ na wɔanwu ye.” Ɔti, “ɛdawɔ mumua ne kpondɛ” ɔlua ‘Ngɛlɛlera ne mɔɔ ɛbanleɛnlea nu kpalɛ dahuu’ la azo.​—Gyi. 17:11.

Seetan ɛngulo kɛ ɛnyia adwenle mɔɔ tenrɛ na wɔade nɔhalɛ ne abo. Duzu ati ɔ? Ɔluakɛ, buluku bie ka kɛ: “Saa menli asa  nu to na bɛandwenle kpalɛ a, adalɛ edwɛkɛ bahola anyia bɛ nwo zo tumi.” Yemɔti, mmadie edwɛkɛ bie ɛdi wɔ mekɛ mɔɔ ɛtɛdwenlenle nwolɛ kpalɛ la. (Mrɛ. 14:15) Fa wɔ adwenle ne mɔɔ Nyamenle ɛva ɛmaa wɔ la suzu edwɛkɛ nwo kpalɛ, na fa nɔhalɛ ne yɛ wɔ ɛdeɛ.​—Mrɛ. 2:10-15; Wlo. 12:1, 2.

Sogyama mɔɔ bɛbɛlɛbɛla bɛ la ahonle tu, na ɔmmaa bɛnyia ɛhulolɛ kɛ bɛbaho. Adalɛ edwɛkɛ kola maa bɛko bɛtia bɛ nwo anzɛɛ tete bɛ nu fi sogya ekpunli mɔɔ ɛha la anwo. Germany sogya kpanyinli ko hanle kɛ: Deɛmɔti bɛlile Germany anwo zo konim wɔ Ewiade Konle I anu la a le kɛ “bɛ agbɔvolɛ hanle adalɛ edwɛkɛ vale liele bɛ nye, ɔti, yeammaa bɛandwenle konim mɔɔ ɔwɔ kɛ bɛdi la anwo.” Seetan dua adenle ko ne ala azo sɛkye koyɛlɛ mɔɔ wɔ Kilisienema avinli la. Kɛ neazo la, ɔmaa akɛsakɛsa ba mediema avinli. Ɔmaa bɛnyia adwenle kɛ Gyihova ahyehyɛdeɛ ne nee bɛ anli ye boɛ anzɛɛ ɛyɛ debie ɛtia bɛ, ɔti ɔwɔ kɛ bɛfi ahyehyɛdeɛ ne anu.

Mmamaa bɛbɛlɛbɛla wɔ! Di folɛdulɛ mɔɔ wɔ Nyamenle Edwɛkɛ ne anu la azo amaa koyɛlɛ ara ɛ nee ɛ mediema avinli. Kɛ neazo la, Baebolo ne maa yɛ anwosesebɛ kɛ, “bɛva [ɛtane] bɛhyɛ bɛ nwo bɔkɔɔ,” na bɛbɔ mɔdenle kɛ bɛbaziezie akɛsakɛsa biala. (Kɔl. 3:13, 14; Mat. 5:23, 24) Ɔbɔ yɛ kɔkɔ kɛ yɛmmatwe yɛ nwo yɛfi asafo ne anwo. (Mrɛ. 18:1) Nwu ye kɛ wɔziezie ɛ nwo kɛ ɛbakpo Seetan adalɛ edwɛkɛ ne. Biza ɛ nwo kɛ: ‘Mekɛ mɔɔ li amozi mɔɔ me diema bie vonle me la, asoo kɛzi menyɛle me debie la maanle Nyamenle anye liele anzɛɛ Seetan?’​—Gal. 5:16-26; Ɛfɛ. 2:2, 3.

Sogyanli mɔɔ ɔnli nɔhalɛ ɔmmaa ye kpanyinli ne la ɛnrɛho kpalɛ. Yemɔti agbɔvolɛ ka adalɛ edwɛkɛ fa sɛkye anwodozo nee diedi mɔɔ sogyama lɛ wɔ bɛ mgbanyima anu la. Saa bɛ kpanyinli bie fo a, agbɔvolɛ gyinla zo ka kɛ: “Bɛmmadie bɛ bɛdi!” yɛɛ “Bɛmmamaa bɛfa bɛ ngoane bɛto esiane nu!” Zɔhane ala a Seetan yɛ a. Ɔmkpondɛ kɛ ɛnyia menli mɔɔ Gyihova ɛlɛmaa bɛali ye menli ne anyunlu la anu anwodozo.

 Kɛzi ɛbahola wɔabɔ ɛ nwo bane ɛ? Bɔ kpɔkɛ kɛ ɛbadɛnla Gyihova ahyehyɛdeɛ ne anu. Di nɔhalɛ dahuu na boa menli mɔɔ li Nyamenle menli ne anyunlu la, ɔnva nwo kɛ bɛnli munli la. (1 Tɛs. 5:12, 13) Kpɔkyevolɛma nee menli mɔɔ le mɛlɛbɛla la badendɛ atia ahyehyɛdeɛ ne. Saa ɔzɔho kɛ mɔɔ bɛka la le nɔhalɛ bɔbɔ a, bɛmmamaa “bɛsɛkye bɛ adwenle ndɛndɛ.” (2 Tɛs. 2:2; Tae. 1:10) Di folɛ mɔɔ Pɔɔlo dule Timote la azo: “Kɔ zo di ninyɛne mɔɔ wɔzukoa” la anzi, na kakye “menli mɔɔ ɛzukoale ɛvile bɛ ɛkɛ ne la.” (2 Tim. 3:14, 15) Dwenle daselɛ mɔɔ kile kɛ ɛbahola wɔalie akɛlɛ nɔhavo ne mɔɔ Gyihova ɛlua ɔ nwo zo ɛhilehile yɛ nɔhalɛ ne kɛyɛ ɛvolɛ ɛya ko wɔali la anwo.​—Mat. 24:45-47; Hib. 13:7, 17.

Tɛ mekɛ ne amuala a Seetan ka adalɛ edwɛkɛ fa bɛlɛbɛla yɛ a. Ɔdwu mekɛ ne bie a ɔfa ɛnwunlonwunlanlɛ mɔɔ boka “ndenle ngakyile mɔɔ yeva yeli gyima yehyɛ kpalɛ la anwo, amaa ɔ sa aha yɛ.” Kɛ neazo la, Britian Abɔlɔba Philip M. Taylor hɛlɛle kɛ: “Aseleama vale ɛnwunlonwunlanlɛ nee adalɛ edwɛkɛ lile gyima kɛ bɛfa bɛali bɛ agbɔvolɛ anwo zo konim. Seetan bava sonla nwo ɛzulolɛ, ɛkpɔlɛ nee ewule yeali gyima yeava yeanwunlonwunla yɛ amaa yɛagyakyi Gyihova ɛzonlenlɛ.”​—Aye. 8:12; Gyɛ. 42:11; Hib. 2:15.

Mmamaa Seetan maa ɛhye bie to wɔ! Gyisɛse hanle kɛ: “Bɛmmasulo bɛdabɛ mɔɔ bɛku sonlabaka ne na yemɔ anzi bɛngola bɛnyɛ debie bieko la.” (Luku 12:4) Nyia anwodozo bɔkɔɔ kɛ Gyihova bali ɛwɔkɛ mɔɔ yebɔ kɛ ɔbanlea wɔ, yeamaa wɔ “tumi bedevinli ne” na yeaboa wɔ yeamaa wɔagyinla ɛkpɔlɛ biala mɔɔ Seetan bava ara ɛ nwo zo la anloa.​—2 Kɔl. 4:7-9; 1 Pita 3:14.

Nɔhalɛ nu, ɔdwu mekɛ ne bie a ɛyɛ bɛtɛɛ anzɛɛ wɔ ahonle tu. Noko kakye edwɛkɛ mɔɔ Gyihova hanle hilele Dwɔhyua la: “Mmamaa wɔ ahonle tu yɛɛ mmamaa ɛ nwo bubu wɔ, ɔluakɛ medame, [Gyihova] wɔ Nyamenle ne, me nee wɔ lua ɛleka biala mɔɔ ɛkɔ la.” (Dwɔh. 1:9) Saa ɛzulolɛ ka wɔ a, ka wɔ ngyegyelɛ ne kile Gyihova wɔ asɔneyɛlɛ nu. Ɛbanwu ye kɛ, ‘Nyamenle anzodwolɛ ne babɔ wɔ ahonle nee wɔ adwenle nzuzulɛ nwo bane.’ Akee ɛbanyia anwosesebɛ wɔakpo Seetan adalɛ edwɛkɛ biala.​—Fel. 4:6, 7, 13.

Ɛkakye adalɛ edwɛkɛ mɔɔ Aseleama soanvolɛ ne, Relabehyaki hanle vale nwunlonwunlanle Nyamenle menli ne la ɔ? Ɛnee ɔkulo kɛ bɛnyia adwenle kɛ awie biala, bɔbɔ Gyihova, ɛnrɛhola ɛnrɛbɔ bɛ nwo bane ɛnrɛvi Aseleama asa nu. Ɔhanle bɔbɔ kɛ Gyihova a zele yɛ kɛ yɛazɛkye Gyɛlusalɛm a. Mualɛ boni a Gyihova vale maanle a? “[Gyihova] se ɛmmamaa Aseleama nwunlonwunla wɔ kɛ ɔdaye [Gyihova] ɔnrɛhola wɔ die.” (2 Arl. 18:22-25; 19:6) Akee ɔzoanle ye anwumabɔvolɛ ɔmaanle ɔhɔhunle Aseleama 185,000 kenle ko ne nɔe ne!​—2 Arl. 19:35.

Asoo wɔnlea video bie ɛlɛ mɔɔ bɛlɛbɛlɛbɛla awie noko yeanwu ye ɔ? Ɛnee ɛkulo kɛ ɛtea nu kɛ: ‘Mmadie mɔɔ bɛlɛka la edi! Bɛlɛbɛlɛbɛla wɔ!’ Pɛ ye nvoninli wɔ wɔ adwenle nu kɛ, anwumabɔvolɛma ɛlɛka edwɛkɛ ko ne ala bie ahile wɔ: “Mmamaa Seetan fa ye adalɛ edwɛkɛ ne bɛlɛbɛla wɔ!”

Ɔti, mmatie Seetan adalɛ edwɛkɛ ne. (Mrɛ. 26:24, 25) Tie Gyihova na fa ɛ nwo to ɔ nwo zo wɔ debie biala mɔɔ ɛbayɛ la anu. (Mrɛ. 3:5-7) Tie ye folɛdulɛ ɛhye: “Me ra nrenya, nwu nrɛlɛbɛ na maa me nye ɛlie.” (Mrɛ. 27:11) Ɛyɛ ɛhye a, bɛnrɛhola wɔ bɛlɛbɛla!