Soqqamaasinchu Phaawuloosi Sheexaanu totai gawajjannoha ikkinota huwatino; ikkollana tenne huwatinohu baalanka Kiristaana diꞌꞌikkino. Lawishshaho, Qorontoosi heeꞌrannohu mitu Kiristaani, umonsa quwa sae addaxxinoha lawanno; insa halaale seekke cuꞌmirino daafira horo uwa dandaannokkihu gede asse hedino. (1 Qor. 10:12) Phaawuloosi togo yee qorowisiisinohu iseraati: “Hamashshu Heewani xagare soꞌrisiisinte gede, miteekkitine kiꞌne hedoꞌne baꞌeenna Kiristoosira nooꞌneta taalonna xalala ammanamaꞌne agurtinanni yee waajjeemmo.”—2 Qor. 11:3.

Phaawuloosi tenne hajo aana illachishasi, deseꞌe yaa hasiissannonkekkita leellishshannote. Konnira, Sheexaanu hedokki gawajjara kayisanno ola qeela hasiꞌrittoro, isi totai gawajjannoha ikkinota afanna umokki agadha dandaatto gara wodancha hasiissannohe.

Totau maati? Konni birxichi giddo totao yaanno qaale, halaale wirre woy gara ikkinokkire coyiꞌne mannu hedonna assannore soorrate yine assinanni assoote kulate horoonsiꞌnoonni. Mitu manni totau, “dogate, halaale wirre coyiꞌrate, awaawurate, manna xixxiiwate woy wolu manni hedo soorrate woꞌnaalate” ledo xaado afiꞌrinota coyiꞌranno; konni daafira, totau “gara ikkinokkiho, gawajjannohonna xagarrote assooteeti” yaanno.—Piropagaanda Endi Persiweeshiini.

 Totau mageeshshi geeshsha gawajjanno? Illete leeltannokkitenna foole afidhinokkite hadhaame ayyare gede, totau hendummokkinni tiianke gawajjara dandaanno. Totau lowo geeshsha gawajjannota ninke huwanteemmokkiha ikkara dandaanno; ikkollana mannu akata xiinxallannohu Vaarsi Pakaardi yinanni egennaami totau “ninke hendeemmohunni aleenni gawajjanni” noonketa coyiꞌrino. Qoleno wolu fullahaanchi yiino garinni lowo manni, meentuno labballuno, totao adda assiꞌre, “lowo geeshsha busha coye assino”; kuri giddo mitu, ‘sircho gudate mixiꞌre kaꞌꞌate, olaho, ammaꞌno kulle giwatenna wole garimale assooteeti.’—Iizilii Ledi—E Historii Ovi Piropagaanda.

Ninke gedee manni totainsanni doga dandaannoha ikkiro, Sheexaanu hakkiinni roore doga didandaanno? Isi mannu kalaqami warinni kayise mannu akata xiinxallanni keeshshino. Qoleno, “gobba gudisante” isi hunda no. Isi kaphosi tuqisate gobbate woy alamete aana noore baala horoonsiꞌranno. (1 Yoh. 5:19; Yoh. 8:44) Sheexaanu lowo manni “wodana ballisino” daafira, ‘kalqe baala soꞌrisiisanni’ no. (2 Qor. 4:4; Aju. 12:9) Ikkina, isi totao gargadha dandaattohu hiittoonniiti?

Yesuusi totao gargadha dandiinannita mitte teeꞌlitinokki doogo kulino; togo yiino: “Halaale affinanni; halaaluno borojjimmatenni fushshannoꞌne.” (Yoh. 8:31, 32) Olu iibbe noowa olantanno olamaasine gara ikkitino mashalaqqe afiꞌra hasiissannonsa; hatteente gede diinikki ate dogate assannore huwatate gara ikkitino mashalaqqe afiꞌra hasiissannohe. Yihowa tenne assa dandiinanni gara kulino. Qullaawu Maxaafi giddo, Sheexaanu totao gargadhate kaaꞌlitanno amaale afiꞌratto.—2 Xim. 3:16, 17.

Totaoho egennaminohu Sheexaanuno tenne afino. Isi tenne busha alame horoonsiꞌre, Qullaawa Maxaafa nabbambeemmokkinna xiinxallineemmokki gede assanno. Sheexaanu konni garinni xagarahera wodhitooti! (Efe. 6:11) Halaale seekkite ‘buuxate’ sharrami. (Efe. 3:18) Togo assa shota ikkitinokkiti egennantinote. Ikkirono, Noaami Chomiskii yinanni manchi coyiꞌrinori gara ikkinota ammane adha hasiissanno: “Halaalu wodanikkira dadhe eanno gede assa dandaannohu dino. Halaale hasse afiꞌra hasiissannohehu ateeti.” Hakko daafira, “barru barrunkunni qullaawa borro seekkite” xiinxallite, “halaale hasse afiꞌrate” sharrami.—Soq. 17:11.

 Sheexaanu garunni hedattora woy macciishshatto coyi gara ikkasinna teꞌee afattora hasiꞌrannokkita deꞌooti. Mayira? Mitte borro yitino garinni totau “roore gawajjara dandaannohu, mannu garunni heda dandaannokki yannaraati.” (Miidiya Endi Sosayitii Ini Ze Tiwentiinzi Sencherii) Hakko daafira, macciishshatto coye buuxittokki ammantooti. (Law. 14:15) Halaalu xawe leellannohe gede, Maganu uyinoheta coye heeshshi gotti asse hedate dandookki horoonsiꞌri.—Law. 2:10-15; Rom. 12:1, 2.

Wottaaddaru hayyo afidhinori, totao horoonsidhe olamaasine wolqa baꞌannonna olama gibbanno gede assitara dandiitanno. Insa diinnansa wido ikkino wottaaddari mimmitinsawa olamanno woy olantotewiinni baxxanno gede assate woꞌnaaltanno. Jarmanennihu mittu olu sooreessi, Jarmane Umihu Alamete Oli yannara qeelantanno gede assino coyi giddo mittu, “hamashshu hilleessa jallaagishe” amaddannonte gede, mannu “diinu naqanno totainni jalli yiino daafiraati” yiino yinanni. Sheexaanu mereeronke babbadooshshe kalaqate hattoo hayyo horoonsiꞌranno; lawishshaho ammanate roduuwi mereero gibbo kaꞌanno gede assate woy Yihowa dirijjite taashsho xeinore assitino yee hede songotewiinni xeertiꞌranno gede assate woꞌnaalanno.

Dogantooti! Maganu Qaali massagannohe gede assiꞌri. Lawishshaho, Qullaawu Maxaafi roduuwinke mereero noo mittimma baꞌannokki gede assate, ‘koffi assinonke coye baala’ mulla agurreemmonna togoo coye mulenni tireemmo gede amaalannonke. (Qol. 3:13, 14; Mat. 5:23, 24) Qoleno, songotewiinni xeertiꞌneemmokki gede qorowisiisannonke. (Law. 18:1) Konnira Sheexaanu totao qeelate ammanakki mageeshshitero layiꞌri. Ateneeto togo yite xaꞌmi: ‘Muli yannara togoo coyi iillie yannara maa assummo? Alamete doogo harunsummunso Maganu ayyaani massagannoe gede assummo?’—Gal. 5:16-26; Efe. 2:2, 3.

Gaadisaanchonsa huluullamanno olamaanchi jawaate diolamanno. Hakko daafira diinnansa olamaasinete mereero mitiimma heedhannokki gede assatenna gaadisaanonsa ammantannokki gede assate woꞌnaltanno. Insa togo yitara dandiitanno: “Gaadisaanoꞌne addaxxitinoonte! Insa yitannore adhitine qarru giddora einoonte!” Insa coye bushiishate  gaadisaano loossino soꞌro luphi assite kultannoha ikkara dandaanno. Sheexaanuno tenne hayyo horoonsiꞌrano. Isi Yihowa albisa ikkitara shoominore huluullamatto gede assate sharramanno.

Tenne gargadha dandaattohu hiittoonniiti? Yihowa dirijjite seekkite cuꞌmiꞌrate murciꞌri; qoleno guuntete xeꞌne noonsare ikkiturono, isi mannasi massaggara shoominorira hajajami. (1 Tes. 5:12, 13) Kaadaasinenna awaawurtannori Maganu dirijjite bushiishshe coyidhannoha ikkara dandaanno; insa yitannori gara lawannoha ikkiro nafa, ‘shiimurinni hembeelamattokki gede’ qorophi. (2 Tes. 2:2; Tit. 1:10) Phaawuloosi aju beetti Ximootewoosira amaalino amaale harunsi. Rosootto halaale seekkite cuꞌmiri; hattono mama rosoottoro qaagi. (2 Xim. 3:14, 15) Ee, Yihowa ninke halaalu doogora massagate xibbe meddisanno diro horoonsiꞌrino dirijjite addaxxatto gede assannohu ikkadu korkaati no.—Mat. 24:45-47; Ibi. 13:7, 17.

Sheexaanu totai goꞌlinoha calla ikkinokkita deꞌooti. Isi mito wote, waajjishiishate woꞌnaalanno; isi “hundi yannanni kayise horoonsiꞌranno totai” giddo mitte waajjishiishate. (Iizilii Ledi—E Historii Ovi Piropagaanda) Lawishshaho, Biritaaniyu gobbahu Pirofeeseri Filippi M. Teyileri, Asooru daga diinnansa qeeltinohu, “totao coyidhenna waajjishiishsheeti” yee borreessino. Sheexaanu manna, darte, reyonna wolere waajjite Yihowara soqqama aguratto gede assate woꞌnaalanno.—Isa. 8:12; Erm. 42:11; Ibi. 2:15.

Waajja wolqa baꞌꞌatto gedenna Maganoho ammanante heeꞌrattokki gede assitahera wodhitooti. Yesuusi togo yino: “Maala shaa agurranna wolere assa dandiitannokkire waajjitinoonte!” (Luq. 12:4) Yihowa towaataheranna ‘jawa wolqasi’ aahera, hattono waajjite qeelamatto gede assannori iillanno wote kaaꞌlahera qaale einota woꞌmunni woꞌma ammani.—2 Qor. 4:7-9; 1 Phe. 3:14.

Mito wote waajjishannori woy wolqa baꞌꞌatto gede assannori iillahera dandaanno. Togoo yannara Yihowa Iyyaasura coyiꞌrinoha jawaachishanno qaale qaagi: “Haꞌratto darga baalaho ani Kaaliiqi Maganikki ledokki noommona ‘Bashshi yitooti! Jawaati!’ . . . Horonta waajjitooti! Hexxono mudhitooti!” (Iya. 1:9) Yaachishannohe coyi iillihero, hakkawontenni baalanka coye Yihowara huuccattotenni kuli. Hatto assittoro, Maganu keeri . . . wodanakkinna hedokki agarannohe;’ tini Sheexaanu totao baala gargadhate kaaꞌlitanno jawaante afiꞌratto gede assitannohe.—Fil. 4:6, 7, 13.

Asooru olanto gaadisaanchi Rabshaaqu, Maganu manna waajjishiishate coyiꞌrino totao qaagatto? Isi coyiꞌrinori togo yiinohu gedeeti: ‘Asoori anganni gatisannoꞌnehu dino. Maganiꞌne Yihowa nafa kiꞌne gatisate asse afannori dino.’ Isi lede togo yiino: “Tenne gobba gaade daye gudeemmo gede hajajinoehu umisi Kaaliiqaatiwe!” Tennera Yihowa mayyiiyya? Togo yiino: “Asoori moote soyino manni xoninoe xono daafira waajjitooti.” (2 Mot. 18:22-25; 19:6) Hakkiinnino Yihowa mitto sokkaancho soye mitto hashsha 185,000 Asooru olanto gudanno gede assino.—2 Mot. 19:35.

Filmete giddo mannu wole mancho doganna woy xagaranna laꞌe egennootto? Hattee yannara wodanikkinni “Insa dogganni noohena yitannore adhitooti!’ yite egennootto? Atino gara ikkinokkire macciishshatto wote sokkaano, “Sheexaanu kapho macciishshite dogantooti!” yitannohehu gede assite hedi.

Konni daafira, Sheexaanu totao macciishshitooti. (Law. 26:24, 25) Yihowa yaannore macciishshi; hattono assatto coyi baalunkunni iso addaxxattota leellishi. (Law. 3:5-7) Isi baxillunni togo yee amaalino amaale adhi: “Beettoꞌya, xontannoerira dawaro qola dandeemmo gede, egennaamo ikki; aneno hagiirsiisie. (Law. 27:11) Hatto assattoha ikkiro, Sheexaanu hedokki gawajjate kayisanno ola qeela dandaatto!