Na apostel Paulus ben e luku bun nanga den leitori fu Satan. Ma a no ala Kresten brada nanga sisa ben e du dati. Fu eksempre, son Kresten na ini Korente ben e frutrow tumusi furu tapu densrefi. Den ben denki taki a bribi fu den ben tranga nofo èn taki den no ben o naki futu noiti (1 Kor. 10:12). Dati meki Paulus gi den a warskow disi: „Mi e frede taki sma kan pori un frustan, neleki fa a sneki ben kori Eva na wan triki fasi. Dan unu no o de reti-ati sma èn krin sma moro soleki fa un musu de gi Krestes.”​—2 Kor. 11:3.

A fasi fa Paulus ben e broko en ede nanga a tori disi e sori taki wi no musu denki taki Satan no o man kori wi. Efu wi wani kibri wi frustan, dan wi musu sabi san kan pasa te wi e bribi leitori èn wi musu kibri wisrefi gi den sani dati.

Na ini na artikel disi, wi o taki fu den leitori di sma e gebroiki fu kori trawan noso fu abi krakti tapu a fasi fa den e denki noso e tyari densrefi. A buku Propaganda and Persuasion, e taki dati den sortu sani disi „no fiti, den e tyari takru bakapisi kon gi sma èn den e bedrigi sma”. Den sma di e du den sortu sani disi „e lei, den e du kruktudu, den e bedrigi trawan, den e drai sma ede èn den e basi a denki fu trawan”.

Wi musu luku bun nanga den leitori disi fu di den kan pori a denki fu wi safrisafri  sondro taki wi sabi. Wi kan agersi en nanga wan gas di wi no man smeri, ma di kan kiri sma. Vance Packard, wan sabiman di e ondrosuku fa libisma e tyari densrefi, ben taki: „Leitori kan abi krakti tapu furu fu wi èn den e kori wi tu sondro fu wi sabi dati.” Wan tra sabiman e taki dati den leitori disi meki taki furu man nanga uma „du den moro ogri” sani. Fu eksempre, ’sma suku fu kiri wan heri ras, a wan pipel feti nanga a trawan, sma frufolgu trawan fu a bribi fu den ede èn sma du tra sortu ogri nanga makandra’.​—Easily Led​—A History of Propaganda.

We, efu libisma man kori wi nanga den leitori fu den, dan prakseri san Satan man du nanga wi. Sensi di libisma meki, Satan e luku fa den e tyari densrefi. Now „heri grontapu” de na ini a makti fu en. A kan gebroiki iniwan pisi fu a grontapu fu en fu prati den lei fu en (1 Yoh. 5:19; Yoh. 8:44). Satan ben man ’breni a frustan fu sma’ so bun taki now a e „kori sma na heri grontapu” (2 Kor. 4:4; Openb. 12:9). Fa yu kan kakafutu gi den leitori disi?

Yesus ben gi wi a krin rai disi di o yepi wi fu kakafutu gi leitori. A ben taki: „Sabi san tru èn dati o meki unu kon fri” (Yoh. 8:31, 32). Te feti de, dan wan srudati musu sorgu taki wan fasi de fa a kan kon sabi san tru, fu di a feanti o du sani fu kori en. Sobun, fa yu kan kon sabi san tru? Yehovah e meki wi kon sabi den sani dati nanga yepi fu en Wortu, Bijbel.​—2 Tim. 3:16, 17.

A no de fu taki, dati a bigi leiman, Satan, sabi disi. Dati meki a e meki den sani fu a sistema disi hari wi prakseri puru fu Bijbel, so taki wi no e leisi noso studeri Bijbel. No meki a kori yu nanga den triki fu en! (Ef. 6:11) Yu musu de wan sma di e „frustan finifini” san na den tru leri fu Gado (Ef. 3:18). Yu o abi fu meki muiti fu kon frustan den sani dati. Ma hori a prenspari sani disi na prakseri di a skrifiman Noam Chomsky taki: „Nowan sma o kanti tru tori go na ini yu frustan. Yu srefi musu du muiti fu kon sabi san tru.” Sobun, „ondrosuku Gado Buku finifini” fu kon sabi gi yusrefi san tru.​—Tori 17:11.

 Hori na prakseri taki Satan no wani taki yu si sani krin noso taki yu e frustan sani bun. Fu san ede? Fu di sma o ’bribi leitori moro makriki te den no e teki ten fu luku efu den sani dati tru’ (Media and Society in the Twentieth Century). Sobun, no de gaw fu bribi iniwan sani di yu e yere, sondro fu ondrosuku efu a sani dati tru (Odo 14:15). Gebroiki a „frustan” di Gado gi yu fu kon sabi efu den sani di yu e bribi na tru tori.​—Odo 2:10-15; Rom. 12:1, 2.

Te feti de, dan a feanti kan gebroiki leitori fu meki den srudati lasi-ati, so taki den no o wani feti moro. Kande den e meki srudati fu a feanti feti nanga makandra, noso den kan kori den fu no wroko makandra nanga a bigi grupu. Soleki fa wan legre-edeman fu Doisrikondre ben taki, dan wan fu den sani di meki taki Doisrikondre lasi a strei na ini a Fosi Grontapufeti, na leitori di ben bruya a frustan fu den srudati. Na den srefi sortu sani disi Satan e du fu tyari prati kon. Fu eksempre, a e pruberi fu tyari trobi kon na mindri Kresten brada nanga sisa, noso a e gi den deki-ati fu hori densrefi aparti fu Yehovah en organisâsi. Kande den e du dati fu di den feni taki wan sma du wan ogri nanga den, noso taki a du wan hati sani nanga den.

No meki Satan kori yu! Meki Gado Wortu tiri yu. Fu eksempre, Bijbel e gi wi deki-ati fu tan „gi makandra pardon nanga [wi] heri ati”, èn fu de gaw fu lusu trobi. Na so wi o tan na ini wánfasi nanga wi Kresten brada nanga sisa (Kol. 3:13, 14; Mat. 5:23, 24). Bijbel e gi wi a seryusu warskow taki wi no musu de sma di e hori wisrefi aparti fu a gemeente (Odo 18:1). Luku efu yu de srekasreka fu kakafutu gi den leitori fu Satan. Aksi yusrefi: ’San ben e tiri a denki fu mi a lasti leisi di mi ben de na ini so wan situwâsi? Na a yeye fu grontapu noso a yeye fu Gado?’​—Gal. 5:16-26; Ef. 2:2, 3.

Wan srudati di no wani horibaka moro gi a fesiman fu en, no o feti nanga deki-ati moro. Dati meki a feanti e pruberi fu meki wan srudati lasi a frutrow di a ben abi na ini a legre-edeman fu en. Kande den e fruteri lei soleki: „Un no musu frutrow den  fesiman fu unu!” nanga „no meki den tyari unu go dede!” Èn fu meki sani moro ogri, den e gebroiki ibri fowtu fu den fesiman dati fu pori den nen. Na dati Satan e du. A e tan du muiti nomonomo fu meki yu lasi frutrow na ini den sma di Yehovah poti fu teki fesi.

Fa yu kan kibri yusrefi? Tan krosibei fu Yehovah en organisâsi awansi san e pasa èn tan horibaka gi den wan di a poti fu teki fesi (1 Tes. 5:12, 13). Efu sma di fadon komoto na bribi e taki sani fu pori a bribi fu yu, dan yu no musu gi pasi taki den ’bruya yu denki so esi’, awansi a gersi leki den sani di den e taki tru (2 Tes. 2:2; Tit. 1:10). Gi yesi na a rai di a yonguman Timoteyus ben kisi. Tan bribi den tru tori di yu leri èn no frigiti pe yu leri den (2 Tim. 3:14, 15). A no de fu taki dati nofo buweisi de di e sori taki yu kan frutrow na organisâsi di Yehovah e gebroiki sowan wán hondro yari kaba fu leri wi den tru tori fu en.​—Mat. 24:45-47; Hebr. 13:7, 17.

A no ala ten Satan e pruberi fu kisi wi kibrikibri. Son leisi, a e tapu skreki gi wi. Dati na „wan fu den moro owru triki fu en” (Easily Led​—A History of Propaganda). Soleki fa Professor Philip M. Taylor fu Ingrisikondre ben skrifi, dan den Asiriasma ben e tapu skreki gi den feanti fu den èn den ben e kori den. Na so den ben man basi den. Satan wani taki wi frede libisma, taki wi frede frufolgu, taki wi frede dede èn taki wi frede tra sani tu. Ala den sani disi na fu tapu skreki gi wi so taki wi drai baka gi Yehovah.​—Yes. 8:12; Yer. 42:11; Hebr. 2:15.

No meki Satan du den sani disi nanga yu. Yesus ben taki: „No frede den sma di kan kiri yu èn baka dati den no man du noti moro” (Luk. 12:4). Abi a frutrow taki Yehovah e luku yu fu kan gi yu „a krakti di bigi pasa marki”. A wani yepi yu tu fu kakafutu gi iniwan sani di Satan e du fu frede yu so taki a kan basi yu.​—2 Kor. 4:7-9; 1 Petr. 3:14.

Son leisi a kan pasa taki yu e firi brokosaka, noso kande yu e frede. Ma hori na prakseri san Yehovah ben pramisi Yosua: ’Abi deki-ati èn no frede. No meki sma tapu skreki gi yu èn no beifi, bika Yehovah yu Gado de nanga yu, awinsi pe yu e go’ (Yos. 1:9). Te yu e frede, dan no draidrai fu taigi Yehovah na ini begi san de na tapu yu ati. Yu kan de seiker taki ’a freide fu Gado o kibri yu ati nanga yu frustan’, èn na so yu o kisi krakti fu kakafutu gi ala den lei fu Satan.​—Fil. 4:6, 7, 13.

Yu sabi ete fa a Rabsakei, a boskopuman fu den Asiriasma, ben wani kori a pipel fu Gado? Te yu luku en bun, dan a ben taigi den: ’Noti no man kibri unu teige Asiria. Srefi Yehovah, a Gado fu unu, no man du noti gi unu.’ A ben prefuru fu taigi den: ’Yehovah srefi taigi wi fu pori a kondre disi.’ Luku san Yehovah taigi a pipel fu en: „No arki den sani di den futuboi fu a kownu fu Asiria taki fu spotu mi. No meki den frede yu” (2 Kow. 18:22-25; 19:6). Baka dati Yehovah seni wan engel di kiri 185.000 Asiriasma na ini wán neti!​—2 Kow. 19:35.

Oiti yu si wan felem pe wan sma ben e kori wan trawan sondro taki a trawan sabi? Yu no ben wani bari: ’No bribi en! A e lei gi yu!’ We, prakseri taki den engel e bari tu gi yu: „No meki Satan kori yu nanga den lei fu en!”

Sobun, no arki den leitori fu Satan (Odo 26:24, 25). Gi yesi na Yehovah èn frutrow na en tapu na ini ala san yu e du (Odo 3:5-7). Na ini Odo 27:11 a e taki: „Mi manpikin, de koni èn meki mi ati prisiri.” Te yu gi yesi na a rai disi, dan Satan no o man kori yu!