Aposel Pol i kliagut long olsem wanem ol tok giaman bilong Satan inap bagarapim tingting bilong man, tasol sampela Kristen i no kliagut long dispela samting. Sampela Kristen long Korin i ting ol i stap strong long bilip na ol i no inap pundaun. (1 Kor. 10:12) Olsem na Pol i tok: “Mi tingim pasin trik bilong snek long giamanim Iv na mi pret, nogut long wankain pasin ol man i bagarapim tingting bilong yupela na yupela i lusim pasin bilong givim bel tru na pasin holi em yupela i mas mekim long Krais.”—2 Kor. 11:3.

Tok bilong Pol i soim olsem yumi no ken bilip tumas long save bilong yumi yet. Sapos yumi laik winim pait bilong tingting, yumi mas luksave long ol hevi inap kamap sapos yumi bilipim ol tok giaman, na yumi mas mekim ol samting bilong lukautim yumi yet.

Tok giaman i makim wanem samting? Ol man i mekim ol tok giaman bilong stiaim tingting na pasin bilong ol narapela. Sampela man i tok em pasin bilong “haitim tok, trikim man, bosim tingting bilong ol narapela,” na tu, “pasin bilong mekim ol tok we i bagarapim ol narapela.”—Propaganda and Persuasion.

Olsem wanem ol tok giaman inap nogutim yumi? Ol tok giaman i no samting we yu inap luksave long en hariap. Em i olsem win nogut we inap kilim yu i dai. Olsem na saveman Vance Packard i tok: “Ol tok giaman i pulim tingting bilong planti manmeri, na ol yet i no luksave long dispela samting.” Wanpela saveman i tok, ol tok giaman i pulim  tingting bilong planti manmeri “na dispela i kirapim ol long insait long ol pasin i nogut tru”—olsem ‘woa, pasin bilong pait na pinisim wanpela lain olgeta, heitim ol man bilong narapela skin kala, birua long narapela lotu, na planti narapela pasin nogut.’—Easily Led—A History of Propaganda.

Sapos ol man inap mekim ol tok giaman, orait Satan inap mekim wanem? Satan i skelim gut tru pasin bilong ol man kirap long taim God i wokim Adam na Iv. Baibel i tok: “Graun olgeta i stap long han bilong Satan.” Olsem na em inap stiaim ol man long mekim ol tok bilong giamanim yumi. (1 Jon 5:19; Jon 8:44) Satan i “pasim tingting” na “giamanim olgeta manmeri bilong graun.” (2 Kor. 4:4; Rev. 12:9) Olsem wanem yu inap sakim ol tok giaman bilong Satan?

Jisas i tok: “Yupela bai save long tok i tru, na tok i tru bai mekim yupela i kamap fri.” (Jon 8:31, 32) Paslain long ol soldia i go pait, ol i mas save gut long ol birua bilong ol, na long dispela rot ol birua i no inap giamanim ol. Olsem tasol, Jehova i tokim yumi long olsem wanem yumi inap sakim Satan. Baibel i gat olgeta tok bilong helpim yumi long sakim ol tok giaman bilong Satan.—2 Tim. 3:16, 17.

Satan em man bilong tok giaman. Em i yusim ol samting bilong dispela graun long pasim yumi long ritim Baibel na mekim pesenel stadi. Yumi mas sanap strong na sakim ol pasin trik bilong Satan! (Efe. 6:11) Na tu, yumi mas “save gut tru” long ol tok i tru bilong Baibel. (Efe. 3:18) Yumi mas wok strong long mekim olsem. Noam Chomsky em man bilong raitim ol buk. Em i tok: “I no gat man bai putim tok i tru i go insait long kru bilong yu. Yu yet i mas mekim ol wok painimaut.” Olsem na yu mas givim bel long “skelim gut ol Rait Holi long olgeta de.”—Apo. 17:11.

Satan i no laik bai yu kliagut long ol samting. Bilong wanem? Wanpela buk (Media and Society in the Twentieth Century) i tok: Ol tok giaman “i gat strong long paulim tingting bilong ol man, . . . na ol i no inap long skelim gut ol samting.” Olsem na no ken hariap long bilipim olgeta kain tok yu harim. (Snd. 14:15) Yusim gutpela tingting God i givim na pasin bilong skelim gut ol samting na  bai yu inap save long ol tok i tru.—Snd. 2:10-15; Rom 12:1, 2.

Ol saveman bilong pait i save mekim ol tok giaman bilong bagarapim tingting bilong ol birua na daunim ol. Ol inap giamanim ol birua na mekim ol i pait namel long ol yet, o ating ol i trikim ol bambai ol i stap ol yet na ol i no bung wantaim lain bilong pait. Wanpela bikman long ami bilong Jemani i tok ol i no winim pait bilong Wol Woa 1 bikos ol i “bilipim ol tok giaman bilong ol birua wankain olsem snek i giamanim rabit na i kaikaim em.” Satan i yusim ol trik pasin bilong brukim lain namel long ol Kristen bambai ol i no stap wanbel. Ating tok pait i kamap namel long ol bratasista, o wanpela brata o sista i no bung moa wantaim oganaisesen bilong Jehova, long wanem, em i pilim olsem ol brata i mekim wansait pasin o ol i no tingim hevi em i karim.

Yu mas larim Tok Bilong God i stiaim yu, na no ken larim Satan i giamanim yu! Baibel i kirapim yumi long wok yet long “amamas long fogivim narapela” na hariap long stretim ol hevi. Long dispela rot, pasin wanbel bai stap yet namel long ol bratasista. (Kol. 3:13, 14; Mat. 5:23, 24) Baibel i tok lukaut long pasin bilong i no bung wantaim kongrigesen. (Snd. 18:1) Olsem wanem? Yu inap sakim ol tok giaman bilong Satan? Askim yu yet: ‘Wanem samting i stiaim tingting bilong mi taim mi bungim wankain hevi long pastaim? Mi larim holi spirit bilong God o tingting bilong ol man i stiaim mi?’—Gal. 5:16-26; Efe. 2:2, 3.

Sapos wanpela soldia i no stap gut long komanda, orait em i no inap pait gut. Olsem na ol birua i save mekim ol tok giaman bilong bagarapim pasin bilong soldia long trastim komanda bilong em. Ating ol bai tok olsem: “Yu no ken trastim ol lida bilong yu!” na “Yu no ken larim ol i stiaim yu i go painim hevi!” Ol bai strongim ol dispela tok giaman, na kolim sampela popaia bilong ol lida. Satan i save mekim wankain pasin. Oltaim em i wok strong long bagarapim pasin bilong yu long bilip long wok bos bilong Jehova.

 Sampela taim ol lain i go pas inap mekim sampela popaia, tasol yu mas tingting strong long i stap gut long oganaisesen bilong Jehova na sapotim wok bos bilong em. (1 Tes. 5:12, 13) Taim ol apostet o ol man bilong tok giaman i laik paulim tingting bilong yupela, “yupela i no ken larim gutpela tingting bilong yupela i paul hariap”—maski i luk olsem tok bilong ol i tru. (2 Tes. 2:2; Tai. 1:10) Bihainim gutpela tok em Pol i givim long yangpela Timoti. Bihainim yet ol tok i tru em yu bin lainim, na oltaim tingim olsem ol dispela tok i kam long Baibel. (2 Tim. 3:14, 15) Yumi inap trastim tru rot Jehova i yusim inap 100 yia nau bilong skulim yumi long tok i tru.—Mat. 24:45-47; Hib. 13:7, 17.

Sampela taim, yu no inap luksave long ol tok giaman bilong Satan. Em inap yusim ol samting bilong pretim yumi. Wanpela buk (Easily Led—A History of Propaganda) i tok: “Long bipo yet na i kam inap long nau, ol man i yusim dispela rot bilong giamanim ol narapela.” Profesa Philip M. Taylor bilong Inglan i tok, ol Asiria i daunim ol birua “taim ol i mekim ol tok giaman bilong pretim ol.” Satan i yusim ol kain rot olsem, pasin bilong pret long man, pret long dai, na ol narapela tingting kranki bilong paulim tingting bilong yu na yu bai lusim wok bilong Jehova.—Ais. 8:12; Jer. 42:11; Hib. 2:15.

No ken larim Satan i yusim pasin bilong pret long daunim bilip bilong yu. Jisas i tok: “No ken pret long ol man husat inap kilim i dai bodi na bihain ol i no inap mekim wanpela samting moa.” (Luk 12:4) Yu mas bilip tru olsem Jehova bai lukautim yu na givim yu “strong i winim strong bilong yumi ol man.” Em bai helpim yu long sanap strong na sakim ol tok giaman ol man i mekim bilong pretim yu.—2 Kor. 4:7-9; 1 Pita 3:14.

Yu inap bungim ol hevi we bai mekim yu pret nogut tru. Tasol tingim tok Jehova i mekim bilong strongim Josua. Em i tok: “Yu mas sanap strong na yu no ken pret, na yu no ken surik long wanpela samting. Long wanem, mi God, Bikpela bilong yu, bai mi go wantaim yu long olgeta hap.” (Jos. 1:9) Sapos yu bel hevi, kwiktaim yu mas beten long Jehova na kamapim olgeta tingting bilong yu long em. Yu inap bilip tru olsem ‘bel isi bilong God bai lukautim bel na tingting bilong yu’ bambai yu inap sakim ol tok giaman bilong Satan.—Fili. 4:6, 7, 13.

Rabsake em man Asiria husat i bringim tok i go long lain bilong God, na em i tok, ‘I no gat wanpela samting bai lukautim yupela long han bilong ol Asiria. God bilong yupela, Jehova, i no inap kisim bek yupela. Em yet i tokim mipela long bagarapim taun bilong yupela.’ Tasol Jehova i tok: “Yu no ken pret na tingting planti long ol dispela tok nogut, em ol wokboi nating bilong king bilong Asiria i bin mekim long mi.” (2 Kin. 18:22-25; 19:6) God i salim wanpela ensel bilong kilim i dai 185 tausen soldia bilong Asiria insait long wanpela nait tasol!—2 Kin. 19:35.

Olsem wanem? Wanpela taim yu watsim muvi we wanpela man i wok long giamanim narapela? Ating yu mekim kain tok olsem: ‘No ken bilipim tok bilong em! Ol i wok long giamanim yu!’ Piksaim long tingting olsem ol ensel i mekim dispela tok long yu: “No ken bilipim ol tok giaman bilong Satan!”

Yu mas sakim ol tok giaman bilong Satan. (Snd. 26:24, 25) Harim tok bilong Jehova na trastim em long olgeta samting yu mekim. (Snd. 3:5-7) Tingim dispela gutpela tok: “Pikinini bilong mi, yu mas kisim gutpela tingting na save na bai mi belgut tru.” (Snd. 27:11) Long dispela rot, yu bai winim dispela pait bilong tingting!