Ndumetume Paulo ŵamanyililaga kuti unami wa Satana uli wakogoya mnope. Nambo ngaŵa kuti Aklistu acimjakwe wosope ŵamanyililaga yeleyi. Mwambone, Aklistu ŵane ku Kolinto ŵaganisyaga kuti ŵaliji ŵakulimba mwamti nganaŵa agwile mwausimu. (1 Akoli. 10:12) Ni ligongo lyakwe Paulo ŵapele camuko cakuti, “Ngogopa kuti mwine, mpela mwele lijoka lyamnyenjelele Hawa ni ukalamusi wakwe, nganisyo syenu mpaka sisokonecele nikuleka kuŵa ŵakuwona mtima soni ŵaswela mpela mwamkusosekwa kutendela kwa Klistu.”—2 Akoli. 11:3.

Maloŵe ga Pauloga, gakulosya kuti ngatukusosekwa kulijegamilaga. Naga tukusaka kupunda ngondo jamunganisyo jakulimbana ni unami wa Satana, tukusosekwa kumanyilila kogoya kwa unami wa Satanawo soni kulola mwampaka tuŵambalile.

Ana unami uli cici? Mungani ajino, unami uli kusala ngani janganijiŵa jisyesyene pakusaka kusokonasya kaganisye ka ŵandu soni yakutenda yawo. Buku jine jikusasala kuti “unami uli ungakulupicika, kutenda yindu yakwawulasya ŵane soni kamulicisya masengo matala gaunami pakusaka kupata yawukusaka.”—Propaganda and Persuasion.

Ana unami uli wakogoya camtuli? Mpela mwayikusaŵela ni mpweya wakogoya wanganituŵa tuwuweni soni wangapikanika liwungo, unami uli wakogoya ligongo ukusajinjilila mpaka munganisyo mwetu. Mundu jwine jwamlijiganye mnope ya ndamo sya ŵandu lina lyakwe Vance Packard ŵaŵecete kuti, “Unami mpaka ukwaye katende ketu ka yindu.” Mundu jwinesoni ŵasasile kuti unami utendekasisye ŵandu kutenda ndamo syakusakala  mnope, mpela ‘kuwulagana, ngondo, ungakamulana ligongo lyakulekangana mtundu, soni dini.’

Naga ŵandu mpaka atuloŵesye ni unami wawo, kuli wuli Satana? Jwalakwe akusasimanyilila cenene ndamo sya ŵandu kutandila pajwapanganyidwe mundu. Nambosoni, jwalakwe ni jwakulamulila “cilambo cosope.” M’yoyo, mpaka akamulicisye masengo mbali jilijose ja cilambo pakusaka kuwandisya unami wakwe. (1 Yoh. 5:19; Yoh. 8:44.) Satana ‘aŵisile m’cipi nganisyo sya ŵandu’ ni unami wakwe, mwamti apano jwalakwe ‘akusokonasya cilambo cosope kulikose kwakutama ŵandu.’ (2 Akoli. 4:4; Ciu. 12:9) Ana wawojo mpaka aŵambale camtuli unami wakwe?

Yesu ŵatusalile litala lyangasawusya lyampaka litukamucisye kulimbana ni unami wa Satana. Jwalakwe wasasile kuti, “Cacimanyilila usyesyene, soni usyesyene ucagopola.” (Yoh. 8:31, 32) Ku ngondo, msilikali akusasosekwa kumanyilila kwampaka ajegamile kuti amanyilile yisyesyene yakuti ayikuye ligongo mmagongo jwakwe mpaka awandisye yaunami ni cakulinga cakusaka kumsokonasya nganisyo. Ni ana ŵani ŵampaka atusalile yisyesyene? Yehofa ni jwakusatusalila yindu yisyesyeneyi kupitila m’Maloŵe gakwe, Baibulo. M’Baibulomu mpaka tupate yosope yakusosecela kuti tulimbane ni unami wa Satana.—2 Tim. 3:16, 17.

Satana jwali mmagongo jwamkulungwa akumanyilila yeleyi. M’yoyo, jwalakwe akukamulicisya masengo cilambo cakucilamulilaci pakusaka kutusokonasya soni kututengusya kuti tukaŵalangaga soni kulijiganya Baibulo. Akasakunda kuti Satana ŵasokonasye ni yitendo yakwe. (Aef. 6:11) Tukusosekwa kuwupikanicisyaga cenene usyesyene wa m’Baibulo. (Aef. 3:18) Kuti yeleyi yikombolece, tukusosekwa kola mtawu mnope. Tukusosekwasoni kumbucilaga songa jakuwona jaŵaŵecete mundu jwine lina lyakwe Noam Chomsky kuti, “Pangali jwalijose jwampaka aŵice usyesyene mumtwe mwetu. Jwalijose akusasosekwa kuwupata jika.” M’yoyo, mpaka “tuwupate jika mwakulijiganya Malemba mwakusamala lisiku lililyose.”—Mase. 17:11.

Akumbucileje kuti Satana jwangasaka kuti wawojo aganisyeje cenene kapena kupikanicisya cenene usyesyene. Ligongo cici? Buku jine jasasile kuti, unami “mpaka wasokonasye ŵandu mwangasawusya naga atengwice.” M’yoyo ngatukusosekwa kwambaga kwikutila kapena kwiticisya yiliyose yatupikene. (Miy. 14:15) Mlungu ŵatupele  lunda lwakuganisya soni macili gakuganisya, m’yoyo tukusosekwa kuyikamulicisyaga masengo pakulimbisya cikulupi cetu.—Miy. 2:10-15; Alo. 12:1, 2.

Asilikali papikene yindu yaunami mpaka atande kutenda woga soni kunandiya mtawu wawo pangondo. Mpaka atandesoni kumenyana acimsyenepe kapena kulilekanganya ni asilikali acimjawo. Mundu jwine juŵalongolelaga pangondo ku Germany ŵasasile kuti cilambo ca Germany calepele kupunda pa ngondo jandanda japacilambo cosope ligongo lyakuti acimmagongo ŵawo ŵaloŵesye. Masiku agano, Satana akukamulicisyasoni masengo matala gakulandanago pakusokonasya mkamulano wa Aklistu. Mwambone, jwalakwe akulinjilila kutandisya ungapikangana pasikati pa abale ni alongo. Akwatendekasyasoni Aklistu kuganisya kuti likuga lya Yehofa liŵele lili mkutenda yindu yangali cilungamo kapena lilemwesye yineyakwe. Satana akutenda yeleyi pakusaka kwatendekasya ŵandu kuti atyoce mu likugali.

M’yoyo, akasakunda kuti Satana ŵaloŵesye! Akamulicisyeje masengo Maloŵe ga Mlungu kuti galongoleleje. Mwambone, pangani jakwendelecela kuŵa ŵakamulana ni abale ni alongo, Baibulo jikusatulimbikasya kuti tujendelecele “kululucilana ni mtima wosope” soni kumasya mwacitema ungapikangana naga tutindene nganisyo ni mjetu. (Akolo. 3:13, 14; Mat. 5:23, 24) Baibulo jikusatulimbikasya kuti tukalilekanganya ni mpingo. (Miy. 18:1) Tukusosekwa kulolecesya kuti tuli ŵakoseka kulimbana ni unami wa Satana. Mpaka tuliwusye kuti, ‘Panatindene nganisyo ni Mklistu mjangu, ana namjanjile m’litala lyakumsangalasya Mlungu kapena Satana?’ (Aga. 5:16-26; Aef. 2:2, 3)

Msilikali jwali jwangakulupicika kwa mlongola jwakwe nganaŵa aputile cenene ngondo. M’yoyo, acimmagongo akusakamulicisya masengo unami pakusaka kumtendekasya msilikali kuti akakulupililaga jwakumlongolela. Naga acimlongola atesile yine yakwe mwakulemwesya, acimmagongowo mpaka aŵecete kuti, “Mkajegamilaga acimlongola ŵenu! Mkakunda kuti jemanjaji amtendekasye kuti msimane ni yakusawusya!” Satana akusatendasoni yakulandanayi. Jwalakwe akusalingalinga kunandiya cikulupi cetu kuti tulece kwakulupilila ŵandu ŵele Yehofa akwakamulicisya masengo pakulongolela ŵandu ŵakwe.

 Ana mpaka tutende wuli kuti tulicenjele? Tukusosekwa kusimicisya kuŵape m’likuga lya Yehofa, soni tujendelecelepe kuŵa ŵakulupicika kwa acalume ŵasagulidwe ni Mlungu kuti ŵalongoleleje ŵandu ŵakwe atamose kuti jemanjaji ali ŵangali umlama. (1 Ates. 5:12, 13) Ŵandu ŵakusapuka soni ŵaunami mpaka alijimucile likuga lya Yehofa. (Tito 1:10) Atamose yili yiwonece mpela kuti yakusalayo yili yisyene, nambo ngatukusosekwa ‘kutenganyika mwacitema munganisyo mwetu.’ (2 Ates. 2:2) Tukusosekwa kuyaga camuko cele Paulo ŵampele Timoteyo cakuti, “Mjendelecele kuya yindu yamwalijigenye,” soni mkumbucileje “juŵamjiganyisye.” (2 Tim. 3:14, 15) Agambe ganicisya maumboni gosope gagapali gakututendekasya kumkulupilila kapolo jwakulupicika jwele Yehofa aŵele ali mkumkamulicisya masengo kwa yaka ciŵandika 100 sambano, pakusaka kutujiganya usyesyene!—Mat. 24:45-47; Ahe. 13:7, 17.

Tukumbucileje kuti ndaŵi sine unami wa Satana nganituŵa tuwukopocele mwacitema. Ndaŵi syejinji, jwalakwe akusakamulicisya masengo yindu yakututendekasya woga. Mwambone, mundu jwine jwa ku Braitan lina lyakwe Philip M. Taylor, ŵalembile kuti, Asiliya ŵagomekaga acimmagongo ŵawo pakamulicisya masengo unami soni kwatendekasya woga. Satana cacikamulicisya masengo kogopa ŵandu, kulagasidwa soni ciwa, pakusaka kututendekasya kuti tulece kumtumicila Yehofa.—Yes. 8:12; Yer. 42:11; Ahe. 2:15.

Tukakunda kuti Satana atutendekasye kuleka kulupicika kwa Yehofa ligongo lya woga. Yesu ŵasasile kuti, ‘Akasajogopaga ŵandu ŵampaka agambe kuwulaga cilupe, ŵanganaŵa akombwele kutenda yakupunda pelepa.’ (Luk. 12:4) Tukoleje cikulupi cakulimba cakuti Yehofa cacitenda yaŵalagucisye yakuti cacitusamalila, kutupa “macili gakupunda gacipagwa,” soni kutukamucisya kuti tukombole kana yindu yiliyose yampaka yitutendekasye woga.—2 Akoli. 4:7-9; 1 Pet. 3:14.

Yili yisyene kuti ndaŵi sine mpaka tusimaneje ni yindu yakututendekasya woga soni yakutengusya. Nambo tukusosekwa kumbucila maloŵe ga Yehofa gaŵamsalile Yoswa kuti, “M’ŵe jwakulimba mtima soni mlimbangane. Mkatenda woga, ligongo Yehofa Mlungu jwenu ali ni mmwejo kulikose kwacimjawule.” (Yos. 1:9) Naga tulagasice nganisyo, mwacitema tukusosekwa kupopela kwa Yehofa ni kumsalila yayikutulagasya nganisyoyo. Mpaka tuŵe ŵakusimicisya kuti, ‘Mtendele wa Mlungu . . . ucicenjela mitima jetu soni nganisyo syetu’ kuti tukole macili gakulimbanila ni unami wa Satana.—Afi. 4:6, 7, 13.

Ana akukumbucila unami waŵakamulicisye masengo jwakutumicila jwa Mwenye jwa Asiliya lina lyakwe Labisake, pakwajogoya ŵandu ŵa Mlungu? Jwalakwe ŵasalile kuti pangali cilicose campaka cacenjele atamose Yehofa nganaŵa ŵacenjele. Mwakulimba mtima, jwalakwe ŵasasilesoni kuti Yehofa msyene ŵasalile Asiliya kuti ŵajonanje Ayuda. Ana Yehofa ŵatesile cici paŵapikene yeleyi? Jwalakwe ŵatite, ‘Akasatenda woga ni maloŵe galigose gapikene gele ŵakutumicila ŵa mwenye jwa Asiliya anyosisye nago une.’ (2 Maf. 18:22-25; 19:6) Kaneko, Yehofa ŵatumisye lilayika lyalyawuleje asilikali ŵa Asiliya ŵakwana 185,000 cilo cimope.—2 Maf. 19:35.

Ana pakwete palolelele filimu jakulosya mundu jwine jwangakumanyilila kuti ŵane akumlambusya? Ana wawojo nganasakaga ali agumisile kuti, ‘Mkakulupilila yeleyo, akumlambusya!’ Agambe ganicisya Malayika gali mkusala yakulandanayo kwa wawojo kuti, “Mkakunda kuti Satana amlambusye!”

Tukusosekwa kuwugala mawiwi getu kuti tukapikanaga unami wa Satana. (Miy. 26:24, 25) Tumpikanileje Yehofa soni tumkulupilileje pa yindu yosope yatukusatenda. (Miy. 3:5-7) Jwalakwe akusatunonyela soni akusatulimbikasya kuti, “Mwanangu, m’ŵeje jwalunda, ni m’wusangalasye mtima wangu.” (Miy. 27:11) Naga tukutenda yeleyi, tucikombola kupunda ngondo jamunganisyo jakulimbana ni unami wa Satana.