1, 2. 1) ¿Kunatsa “kunapachkamänisa” sasin Jehová Diosar jisktʼsna? 2) ¿Kunatsa Diosan nayra servirinakapat yatiñajj wal chuymachistu?

ISAÍAS profetasa Habacuc profetasa, “¿kunapachkamarakïni ukasti, Tata?” sasaw Jehová Diosar jisktʼapjjäna (Isa. 6:11; Hab. 1:2). Salmo 13 qellqatarjamajja, David reyis ukhamwa Diosarojj phesqa kuti jisktʼäna (Sal. 13:1, 2). Jesucristosa, ukhamarakiw jaqenakan Diosar jan confiyapjjatap uñjasajj jisktʼäna (Mat. 17:17). Jiwasas ukhamwa awisajj jisktʼasiraksna, ukham jisktʼasiñajj janis walïkaspa ukham janiw amuyañasäkiti.

² ¿Kunatsa “kunapachkamarakïni ukasti, Tata” sasin jisktʼassna? Inas ina chʼusat tʼaqesiyata uñjasstan, chuymankipstatästan jan ukajj usuntatästan ukatwa ukham jisktʼassna. Maysa toqetjja, ‘chʼama tukuña jan wali tiemponakan’ jakatasatwa wali llakit uñjasiraksna (2 Tim. 3:1). Akapachanjja, jan wali jaqenak taypinwa jaktanjja ukatwa llakit uñjasiraksna. Jehová Diosan nayra servirinakapajj kunja llakitäpjjänsa uk Jupar yatiyapjjerïnwa, ukampis Diosajj janiw ukham sapjjatapat juchañchkänti. Uk yatiñajj wal chuymachistu.

3. ¿Kunas jan walinakan uñjassna ukhajj yanaptʼistaspa?

 ³ Ukham jan walinakan uñjassna ukhajj ¿kunas yanaptʼistaspa? Jesusan Santiago jilapajj akham sasaw Diosan amuytʼayatajj qellqäna: “Ukhamajj jilatanaka, Tatitojj kuttʼankani uka tiempokamajj wali paciencianïpjjam” sasa (Sant. 5:7). Ukhamawa, taqeniw paciencianïñasa. Ukampis ¿kunjamas pacienciani jaqejja? ¿Kunjamsa paciencianïtas uñachtʼaysna?

4, 5. 1) ¿Kunjamas pacienciani jaqejja? 2) ¿Kunjamsa paciencianïtas uñachtʼaysna? 3) ¿Kamsänsa Santiagojj paciencianïñ toqetjja? (página 3 ukankir foto uñjjattʼäta)

⁴ Bibliarjamajja, espíritu santow paciencianïñatakejj yanaptʼistu. Diosan jan uka yanaptʼapampejja, paciencianïñajj wali chʼamäspawa. Cheqas paciencianïñajj Diosan regalopawa, ukham jaqësaw Jupar munasitassa jaqe masisar munasitassa uñachtʼaytanjja. Ukampis jan paciencianïksna ukhajj janiw maynit maynikam munasiñajj utj-jjaspati (1 Cor. 13:4; Gál. 5:22). Cristianjam sum sarnaqañatakejja, paciencianïñajj wali wakiskiriwa. Sañäni, ukaw jan walinakan aguantañatakisa, jan walinakaru kusisit chuymampi saykatañatakis yanaptʼistani (Col. 1:11; Sant. 1:3, 4). Ukatjja, jan walinak luratajj jan ukhamat ukham kuttʼayañatakiw yanaptʼarakistani, kunayman jan waltʼäwinakan uñjaskasas janipuniw Jehová Diosat jitheqtkañäniti. Maysa toqetjja, suytʼañajj kunja wakiskirisa uk yateqañasatakiw Bibliajj ewjjtʼistu, ukwa Santiago 5:7, 8 (liytʼañataki) textot yateqtanjja.

⁵ ¿Kunatsa Jehová Diosar suytʼañajj wali wakiskiri? Sarnaqäwisajj mä yapuchirin sarnaqäwipar uñtasitawa sasaw Santiagojj säna. ¿Kunatsa ukham sispachäna? Mä yapuchirejja, phawañatakisa jan ukajj satañatakis wal chʼamachasi, ukampis jallojj puriniti janicha ukajj janiw jupatäjjeti. Janirakiw kunapachas yapu apthapiñ horasajj purinini ukas jupatäjjeti. Antisas yapojj achoqkani ukapachkamaw wali pacienciampi suytʼañapa. Jiwasajj ukhamarakiw Jehová Diosan arunakap phoqasiñap suyasktanjja. Ukampis kunjamsa Diosajj arunakap phoqani ukajj janiw jiwasatäjjeti (Mar. 13:32, 33; Hech. 1:7). Ukhamasti, yapuchirjamarakiw pacienciampi suytʼañasa.

6. ¿Kunsa Miqueas profetat yateqassna?

⁶ Jichhürunakanjja, jiwasajj niya Miqueas profetjamarakiw uñjastanjja. Jupajj jan walinak luriri Acaz reyejj apnaqkäna uka tiemponwa jakäna. Uka urunakanjja, kunayman jan walinakaw utjäna, jaqenakajj ‘jan walinak lurañatakejj sintïpjjapunïnwa’ (Miqueas 7:1-3 liytʼañataki). Miqueas profetajj ukanak janiw askichkaspänti, uk jupajj sum yatïna, ukatwa akham säna: “Ukampis nayajj [Jehová] Tatiturukiw suytʼä, qhespiyiri Diosajjarukiw taqe confiansajja uskusirakï, jupasti nayarojj istʼitaniwa” sasa (Miq. 7:7). Miqueasajj pacienciampiw suytʼäna, jiwasajj ukhamarakiw pacienciampi suytʼañasa.

7. ¿Kunatsa Jehová Diosan amtanakap phoqasiñapjja pacienciampi suyañasa?

⁷ Jiwasatï Miqueas profetjam Jehová Diosar confiyañänejja, Juparojj pacienciampiw taqe chuyma suytʼañäni. Uk sum amuytʼañatakejj carcelankir mä jaqet parltʼañäni, jupajj jiwayatäñwa suyaski. Janis uka uru puriniñap munkchejja, mun jan munaw suyañapa. Ukampis jiwasajj janiw uka jaqjam suyktanti. Jan ukasti, taqe chuymaw Jehová Diosajj wiñay jakañ churapjjäma siskistu uk phoqasiñap suytanjja. Ukatwa “taqe kunsa pacienciampi, wali kusisita aguan[ttanjja]” (Col. 1:11, 12). Jiwasatï Diosan urupajj janiw  jankʼak purinkiti sasin colersna, janirak taqe chuym suyksna ukhajja, Jehová Diosaruw chuym ustʼaysna (Col. 3:12).

8. Diosan nayra servirinakapat yatjjatkasajja, ¿kunanakatsa amuytʼañasa?

⁸ ¿Kunas pacienciampi suytʼañatak yanaptʼistani? Jehová Diosan nayra servirinakapajj pacienciampiw Diosan amtanakap phoqasiñap suyapjjäna (Rom. 15:4). Jupanakat yatjjatkasajja, qhawqha tiempos suyapjjäna, kunatsa pacienciampi suyapjjäna, kuna bendicionanaksa pacienciampi suyapjjatapat katoqapjjäna ukanakatwa amuytʼañasa.

9, 10. Jehová Diosan arsutap phoqasiñapjja, ¿qhawqha tiempos Abrahanampi Sarampejj suyapjjañapäna?

⁹ Nayraqatajja, Abrahanampit Sara esposapampit parltʼañäni. Jupanakajj ‘Diosar confiyapjjatap layku, paciencianïpjjatap laykuw’ “Diosan promesap” katoqapjjäna. Kunjamtï Biblian siskejja, “Abrahanajj paciencianïtap uñachtʼaykäna uka qhepatwa” Diosajj bendisïmawa, familiamsa waljaptayäwa sasin säna (Heb. 6:12, 15). ¿Kunatsa Abrahanajj wali paciencianïñapäna? Diosan arsutapajja, jan ukajj promesapajj walja maranak qhepatwa phoqasiskañapäna. Jehová Diosajj Abrahanampi lurkäna uka pactojja, 14 de nisán uruna 1943 (antes de Cristo [a.C.]) maranwa phoqasiñ qalltäna. Uka uruw Abrahanampi, Sarampi, jupanakamp chika jakirinakampejj Éufrates jawira paskatasin Suma Oraqer mantapjjäna. Ukampis Abrahanajj 25 maranakaw Isaac wawapan nasiñapkamajj suyañapäna. Isaacajj 1918 (a.C.) maranwa nasïna. Ukatjja, Esaú, Jacob allchhinakapa nasiñapkamajj 60 maranakampwa suyañapäna, jupanakajj 1858 (a.C.) maranwa nasipjjäna (Heb. 11:9).

 ¹⁰ ¿Abrahanajj mä jukʼsa Suma Oraqet katoqänti? Bibliajj akham siwa: “Janiw kuna oraqsa juparojj herenciat churkänti, ni kayu taktʼasiñ ukchʼaksa churkänti. Ukampis Diosajj arsünwa, uka oraq jupar churañataki, uka qhepatjja wawanakapar churañataki, uksti janïr Abrahanajj wawanïkäna ukhaw arsüna” sasa (Hech. 7:5). Abrahanajj Éufrates jawir paskatkäna ukhatjja, 430 maranak qhepatwa wawanakapajj mä markäjjäna, jupanakajj Suma Oraqenwa jakapjjañapäna (Éxo. 12:40-42; Gál. 3:17).

11. 1) ¿Kunatsa Abrahanajj pacienciampi suytʼäna? 2) Pacienciampi suyatapatjja, ¿kuna bendicionanaksa Abrahanajj jutïrin katoqani?

¹¹ Abrahanajj jiwañapkamas janiw Diosan arsutanakap phoqasir uñjkänti. Ukampis Jehová Diosar taqe chuyma confiyatapatjja, pacienciampiw suytʼäna (Hebreos 11:8-12 liytʼañataki). Abrahanajj Paraison jaktanjjani ukhajja, Diosajj kuntï jupatsa wawanakapatsa siskäna ukanak phoqasitap yatisajj walpun kusispachäni. * Jutaniw sat Wawajj familiapatwa jutäna, ukhamatwa Diosan amtanakap phoqasiñapatakejj yanaptʼäna, uk yatisajj walpun kusisini. Pacienciampi suytʼatapajj jan inamayätapsa yatirakiniwa.

12, 13. 1) ¿Kunatsa Joseajj paciencianïñapäna? 2) ¿Kunatsa Joseajj Diosatak jan colerkäna?

¹² Abrahanan allchhipan mä wawapas ukhamarakiw pacienciampi suytʼäna. Jupajj José satänwa. Joseajj kunayman jan walinakanwa uñjasïna, 17 maraniskäna ukhajja, mä esclavjamwa aljapjjäna. Uka qhepatsti, uywiripan warmiparus violkaspa ukhamwa ina chʼusat kʼarintapjjarakïna. Ukatwa carcelar llawintapjjäna (Gén. 39:11-20; Sal. 105:17, 18). Diosar jan jitheqtasas sirvkchïnjja, bendicionanak lantejj castigonaksa katoqkaspa ukhamänwa. Ukampis 13 maranak qhepatjja, akatjamatwa taqe kunas mayjtʼäna. Carcelat mistjjasinjja, Egipto marka apnaqerit uttʼayatänwa, Faraonakiw jupat jukʼamp munañanïnjja (Gén. 41:14, 37-43; Hech. 7:9, 10).

¹³ ¿Jan walinakan uñjasisajja, Joseajj Diosatak colerpachänti? ¿Janit Diosapar confiyjjäna? Janiw ukham lurkänti. Joseajj Diosar taqe chuymaw confiyäna, ukatwa pacienciampi suytʼäna. Diosaw taqe kunsa uñjaski sasaw amuyäna, ukatwa jilanakaparus akham säna: “Jan ajjsarapjjamti. Janiw nayajj Dios lanti tukkiristti. Jumanakajj nayarojj jan walinak lurañ munapjjäyätajja, ukampis Diosaw uka jan wal[jja] askiru tukuyjje, kuntejj jichhajj uñjktan uka lurañataki: walja jaqenakan jakañanakapa qhespiyañataki” sasa (Gén. 50:19, 20). Josean pacienciampi suytʼatapajj janiw inamayäkänti.

14, 15. 1) ¿Kunatsa Davidan pacienciampi suytʼatapajj wali musparkañajja? 2) ¿Kunas pacienciampi suytʼañatakejj Davidar yanaptʼäna?

¹⁴ David reyejj ukhamarakiw jan walinakan uñjasïna. Wawäkäna ukhas Israel markan reyïñapatak Diosajj ajllkchïnjja, 15 maranakaw tribupjjaru reyjam apnaqañatakejj suyañapäna (2 Sam. 2:3, 4). Suyaskäna uka maranakanjja, Saúl reyiw jiwayañ munäna, ukatwa markapat yaqha cheqanakar sarjjäna. * Awisajja, wasaranwa qollo pʼiyanakan jakirïna. Tiempompejj mä guerransa Saúl reyejj jiwjjchïnjja, Israel markpacha apnaqañatakejj paqallqo maranakampwa Davidajj suyañapäna (2 Sam. 5:4, 5).

¹⁵ ¿Kunatsa Davidajj pacienciampi suytʼäna? Salmo 13 capitulonwa Davidajj uk qhanañchäna.  Uka capitulorjamajja, kunapachkamaraki jan walinakan uñjasëjja sasin phesqa kutiw Jehová Diosar jisktʼäna. Ukatsti akham sarakïnwa: “Nayajj khuyapayasiñamaruw taqe chuymamp iyawsta: chuymajjajj nayar qhespiyatamat kusisi. ¡Tatituruw nayar aski luratapat qʼochü!” sasa (Sal. 13:5, 6). Jehová Diosajj wal munasitu, janirakiw jaytkitaniti sasaw Davidajj taqe chuyma confiyäna. Diosaw jan waltʼäwinakaj askichjjani sasaw suytʼäna. Nayrajj kunjamsa Jehová Diosajj yanaptʼatayna ukanaksa amtarakpachänwa, ukatwa Diosar pacienciampi suytʼäna.

16, 17. Jehová Diosas Jesusasa, ¿kunjamsa suytʼirïpjjatap uñachtʼayapjje?

¹⁶ Pacienciampiw suytʼapjjañama sasinjja, Diosajj janiw kuntï jupajj jan lurañ munki uk maykistuti. Taqenit sipansa wali paciencianiwa, Jupatwa yateqasiñasa (2 Pedro 3:9 liytʼañataki). Amuytʼañataki, Jehová Diosajja, Supayajj Edén Jardinan kʼarinak parlkäna uk qhanstañap waranq waranqa maranakaw suytʼaski. Sutip qʼomachasiñapsa wal suyaskaraki. Uka uru purinini ukhajja, ‘Jupar suytʼirinakajj’ walja bendicionanakwa katoqapjjani (Isa. 30:18).

¹⁷ Jesusajj ukhamarakiw pacienciampi suytʼäna. Aka oraqenkaskäna ukhajj jiwañkamaw Diosarojj jan jitheqtas servïna. 33 maranjja, kuntï jiwatapampejj jikjjatawaykäna ukwa Jehová Diosarojj alajjpachan loqtäna. Ukampis 1914 marakamaw apnaqañ qalltañatakejj suytʼañapäna (Hech. 2:33-35; Heb. 10:12, 13). Uñisirinakapajj taqeni tukjatäñapatakejja, Waranqa Maranak Apnaqañ tukuyjjani ukapachkamaw suytʼañaparaki (1 Cor. 15:25). Uka uru puriniñapkamajj walja maranakaw Jesusajj suyañapa, ukampis suyatapajj janiw inamayäkaniti.

18, 19. ¿Kunas pacienciampi suytʼañatak yanaptʼistani?

¹⁸ Cheqas taqeniw pacienciampi suytʼañ yateqañasa. ¿Kunas ukatakejj yanaptʼistani? Jehová Diosaruw espíritu santo mayiñasa, ukaw paciencianïñataki yanaptʼistani, uk amtañasapuniwa (Efe. 3:16; 6:18; 1 Tes. 5:17-19). Ukhamasti, Jehová Diosaruw pacienciampi aguantañatak yanaptʼa mayiñasa.

¹⁹ Maysa toqetjja ak amtañasarakiwa, Abrahanasa, Joseasa, David chachasa, taqe chuymaw Jehová Diosar confiyapjjäna, Jupajj kunjam Diosasa uksa sum yatipjjarakïna. Ukatwa Diosan arsutanakap phoqasiñapjja pacienciampi suytʼapjjäna. Jupanakajj janiw jupanakatak llakisipkänti, ni kunsa katoqapjjani ukanakatsa llakisipkänti. Jan ukasti pacienciampi suytʼapjjatapatwa bendicionanak katoqapjjäna. Ukanakat amuytʼañaw pacienciampi suytʼañatak yanaptʼistani.

20. ¿Kun lurañsa amtañasa?

²⁰ Jan walinakansa uñjaskchiñänejja, pacienciampi taqe chuyma ‘suyañwa’ amtañasa. Inas awisajj “¿kunapachkamarakïni ukasti, Tata?” sasin jisktʼassna (Isa. 6:11). Ukampis espíritu santon yanaptʼapampejj Jeremías profetjamarakiw sissna, jupajj akham sänwa: ‘Nayatakejj Jehová Diosakiw taqe kunajja; ukatpï juparu suytʼaraktjja’ sasa (Lam. 3:21, 24, NM).