1, 2. (a) Ano an puwedeng magin dahilan na maihapot ta: “Sagkod nuarin”? (b) Taano ta puwede kitang mapakusog kan halimbawa kan maimbod na mga lingkod kaidto?

‘SAGKOD nuarin?’ Iyan an ihinapot kan maimbod na mga propetang si Isaias asin Habacuc. (Isa. 6:11; Hab. 1:2) Kan isinurat ni Hading David an Salmo 13, apat na beses man niyang ihinapot: ‘Sagkod nuarin?’ (Sal. 13:1, 2) Dawa an satong Kagurangnan na Jesu-Cristo ihinapot man iyan kaidtong napapalibutan siya nin mga tawong mayong pagtubod. (Mat. 17:17) Kaya, dai niyato dapat ipagngalas kun may mga panahon na naihahapot man niyato an mismong hapot na iyan.

² Ano an puwedeng magin dahilan na maihapot ta: ‘Sagkod nuarin?’ Tibaad may nangyari sa satong inhustisya. O tibaad may minamati kitang hilang o mga problema huli sa paggurang. Tibaad nasasakitan kitang mamuhay sa “delikado asin [talagang] masakit na mga panahon” na ini. (2 Tim. 3:1) O tibaad nadidisganar kita huli sa bakong magayon na mga ugali kan mga tawo sa palibot niyato. Ano man an dahilan, nakakapakusog nanggad na maaraman na dai nag-alangan an maimbod na mga lingkod ni Jehova kaidto na maghapot kaiyan, asin dai naanggot sa sainda an Diyos!

3. Ano an makakatabang sa sato kun napapaatubang kita sa masakit na mga sitwasyon?

 ³ Pero, ano an makakatabang sa sato kun mapaatubang kita sa arog kaiyan kasakit na mga sitwasyon? An disipulong si Santiago, na tugang ni Jesus sa ina, pinasabngan na sabihon sa sato: “Magi kamong mapasensiya, mga tugang, sagkod sa presensiya kan Kagurangnan.” (Sant. 5:7) Iyo, kaipuhan niyato gabos na magin mapasensiya. Pero ano an buot sabihon kan pagigin mapasensiya, asin paano ta maipapahiling an magayunon na kuwalidad na ini?

4, 5. (a) Ano an kalabot sa pagigin mapasensiya? (b) Paano ipinaliwanag kan disipulong si Santiago an pagigin mapasensiya? (Hilingon an ritrato sa kapinunan kan artikulo.)

⁴ Sigun sa Bibliya, produkto kan banal na espiritu an pakatios o pagigin mapasensiya; kun mayo an tabang nin Diyos, masasakitan an bakong perpektong mga tawo na magin mapasensiya sa masakiton na mga sitwasyon. An pagigin mapasensiya regalo nin Diyos, asin kaipuhan na marhay iyan tanganing maipahiling niyato na namumutan ta siya. Kapahayagan man iyan kan pagkamuot niyato sa iba. An kawaran pirmi nin pasensiya nagpapaluya sa pagkamuot asin relasyon niyato sa iba, pero an pagigin mapasensiya nagpapakusog kaiyan. (1 Cor. 13:4; Gal. 5:22) Kalabot sa pagigin mapasensiya an iba pang mahalagang marhay na kuwalidad nin sarong Kristiyano. Halimbawa, konektadong marhay iyan sa pakatagal, na nagpapangyari sa sato na tiuson an masakit na mga kamugtakan mantang nagdadanay na positibo. (Col. 1:11; Sant. 1:3, 4) Kalabot man sa pagigin mapasensiya an dai pagbalos nin maraot dawa nagsasakit saka pagdadanay na marigon ano man na problema an umabot. Dugang pa, dinadagka kita kan Bibliya na magin andam na akuon na kaipuhan niyatong maghalat. Idinuon an aspektong ini nin pagigin mapasensiya sa Santiago 5:7, 8. (Basahon.)

⁵ Taano ta dapat na magin andam kitang maghalat na humiro si Jehova? Iinagid ni Santiago an satong sitwasyon sa sarong parauma. Dawa maigot sa pagtanom an parauma, dai niya kontrolado an klima asin an pagtubo kan mga tinanom. Dai niya mapaparikas an panahon. Aram niyang kaipuhan niyang mapasensiyang maghalat para makamtan an “mahalagang bunga kan daga.” Kaagid kaiyan, dakul na bagay man an dai niyato kontrolado mantang hinahalat niyato an kautuban kan mga panuga ni Jehova. (Mar. 13:32, 33; Gibo 1:7) Arog kan parauma, kaipuhan niyato na mapasensiyang maghalat.

6. Ano an manunudan niyato sa halimbawa ni propeta Miqueas?

⁶ An sitwasyon niyato ngunyan kaagid kan panahon ni propeta Miqueas. Nabuhay siya kan panahon na an maraot na si Hading Ahaz an namamahala, kan lakop an gabos na klase nin karatan sa banwaan. Sa katunayan, an mga tawo nagin eksperto sa paggibo nin maraot. (Basahon an Miqueas 7:1-3.) Narealisar ni Miqueas na dai niya kayang baguhon an sitwasyon, pero may kaya siyang gibuhon. Ano iyan? Sinabi niya sa sato: ‘Alagad maghahalat ako sa Kagurangnan, padagos akong maglalaom sa Diyos na maligtas sako. Dadangugon ako kan sakong Diyos.’ (Mik. 7:7, BPV) * Arog ni Miqueas, kaipuhan man kitang mapasensiyang maghalat.

7. Taano ta bako lang basta paghalat na utubon ni Jehova an saiyang mga panuga an kaipuhan niyatong gibuhon?

⁷ Kun may pagtubod kitang arog kan ki Miqueas, magigin andam kitang maghalat ki Jehova. An sitwasyon niyato bakong arog sa sarong preso na nasa selda niya asin naghahalat sa sentensiya sa saiya na kagadanan. Mayo siyang magigibo kundi maghalat, asin dai niya gusto na umabot iyan. Iba nanggad iyan sa sitwasyon ta! Andam kitang maghalat ki Jehova huling aram niyato na uutubon niya an saiyang panuga na buhay na daing katapusan sa tama asin sa eksaktong panahon!  Kaya, ‘tinatagalan niyato an gabos na bagay na may pakatios asin kaugmahan.’ (Col. 1:11, 12) Kun naghahalat kita pero nagpaparareklamo na haluyon man maghiro si Jehova, dai iyan makakapaugma sa saiya.—Col. 3:12.

8. Ano an kaipuhan niyatong girumdumon mantang hinuhurop-hurop niyato an mga halimbawa nin maimbod na mga lalaki asin babayi kaidto?

⁸ Magigin mas andam kitang maghalat kun gigirumdumon niyato an maimbod na mga lalaki asin babayi kaidto na mapasensiyang naghalat na utubon ni Jehova an saiyang mga panuga. (Roma 15:4) Mantang hinuhurop-hurop niyato an saindang halimbawa, mahalagang girumdumon ta kun gurano sinda kahaloy na naghalat, kun taano ta andam sindang maghalat, asin kun anong mga bendisyon an nakamtan ninda huli sa pagigin nindang mapasensiya.

9, 10. Gurano kahaloy na naghalat si Abraham asin Sara ki Jehova?

⁹ Pag-isipan an halimbawa ni Abraham asin Sara. Kabilang sinda “sa mga uminako kan mga panuga dahil sa pagtubod asin pakatios.” Sinasabi sa sato kan Kasuratan na “pagkatapos . . . magpahiling nin pakatios” ni Abraham, inako niya an panuga ni Jehova na bebendisyunan siya asin papadakulon an saiyang mga gikan. (Heb. 6:12, 15) Taano ta kinaipuhan ni Abraham na magpahiling nin pakatios o magin mapasensiya? Huling kaipuhan nin panahon para mautob an panugang iyan. An tipan ni Jehova ki Abraham nagin balido kan Nisan 14, 1943 B.C.E. Nangyari iyan kan magbalyo sinda ni Sara, pati an mga kairiba ninda sa harong, sa Salog nin Eufrates asin maglaog sa Dagang Panuga. Dangan, kinaipuhan pang maghalat ni Abraham nin 25 taon bago namundag an aki niyang si Isaac kan 1918 B.C.E., asin nin 60 taon pa bago namundag an mga makuapo niyang si Esau asin Jacob kan 1858 B.C.E.​—Heb. 11:9.

 ¹⁰ Gurano kahiwas kan dagang minana ni Abraham? Ini an sabi kan Bibliya: “Alagad ta dai niya [ni Jehova] siya [si Abraham] tinawan nin ano man na mana sa dagang iyan, dai, maski su puwede lamang matungtungan kan saiyang bitis; pero nanuga siya na itatao niya iyan tanganing magin pagsadiri niya dangan kan mga magikan sa saiya, dawa ngani dai pa siyang aki kaidto.” (Gibo 7:5) Kaidto sanang 430 taon pagkabalyo ni Abraham sa Eufrates naorganisar an saiyang mga gikan bilang sarong nasyon na maistar sa dagang iyan.—Ex. 12:40-42; Gal. 3:17.

11. Taano ta andam si Abraham na maghalat ki Jehova, asin anong mga bendisyon an makakamtan niya huli sa saiyang pakatios?

¹¹ Andam si Abraham na maghalat huling an saiyang pakatios nakabasar sa pagtubod niya ki Jehova. (Basahon an Hebreo 11:8-12.) Maugma si Abraham na maghalat, dawa dai niya nahiling na nautob an gabos na panuga nin Diyos bago siya nagadan. Pero isipa na sana an kaugmahan na mamamatian ni Abraham pag binuhay na siya liwat sa paraisong daga. Mangangalas siya pag maaraman niyang mababasa sa dakul na porsiyon kan Bibliya an istorya kan buhay niya asin kan mga naggikan sa saiya. * Talagang mauugma siya pag masabutan na niya an mahalagang papel niya sa kautuban kan katuyuhan ni Jehova may koneksiyon sa ipinanugang banhi! Iyo, siguradong mamamatian niyang sulit nanggad an haloy na panahon na paghalat niya.

12, 13. Taano ta kinaipuhan ni Jose na magpahiling nin pakatios, asin anong marahay na kaisipan an igwa siya?

¹² An makuapo sa tuhod ni Abraham na si Jose nagin andam man na magpahiling nin pakatios. Nagin biktima siya nin grabeng mga inhustisya. Inot, ipinabakal siya kan mga tugang niya bilang uripon kan mga 17 anyos siya. Dangan, sinahutan siya na pinurbaran daa niyang luguson an agom kan saiyang kagurangnan kaya ibinilanggo siya. (Gen. 39:11-20; Sal. 105:17, 18) Sa ibong kan saiyang kaimbudan sa Diyos, garo baga padusa pa an inaako niya imbes na bendisyon. Pero pakalihis nin 13 taon, biglang nabaliktad an sitwasyon. Pinaluwas siya sa bilangguan asin itinao sa saiya an ikaduwang pinakahalangkaw na posisyon sa Ehipto.—Gen. 41:14, 37-43; Gibo 7:9, 10.

¹³ Naghinanakit daw si Jose huli sa mga inhustisyang inagihan niya? Naisip daw niya na pinabayaan na siya kan saiyang Diyos na si Jehova? Dai. Ano an nakatabang ki Jose na mapasensiyang maghalat? An pagtubod niya ki Jehova. Nahiling niya na kontrolado ni Jehova an mga bagay-bagay. Mahihiling ta ini sa sinabi niya sa saiyang mga tugang: “Dai kamo matakot. Ako daw an Diyos? Dawa nagplano kamo nin maraot laban sako, katuyuhan nin Diyos na magin marahay an kaluwasan kaiyan asin na pagdanayon na buhay an dakul na tawo, arog kan ginigibo niya ngunyan.” (Gen. 50:19, 20, NW) Aram ni Jose na talagang sulit an paghalat niya.

14, 15. (a) Taano ta kahanga-hanga an pakatios na ipinahiling ni David? (b) Ano an nakatabang ki David na mapasensiyang maghalat?

¹⁴ Nagin biktima man si Hading David nin dakul na inhustisya. Dawa linahidan na siya ni Jehova kan hoben pa siya para magin an sunod na hadi kan Israel, kinaipuhan pa ni David na maghalat nin mga 15 taon bago siya nagin hadi sa sadiri niyang tribo. (2 Sam. 2:3, 4) Kan panahon na iyan, linalapag si David kan bakong maimbod na si Hading Saul tanganing gadanon. * Kaya, kinaipuhan ni David na mamuhay bilang dulag, kun minsan sa ibang nasyon o sa mga kuweba sa kaawagan. Dawa kaidtong nagadan na si Saul sa pakikipaglaban, kinaipuhan pa man giraray ni David na maghalat nin mga pito pang taon bago siya nagin hadi sa bilog na nasyon nin Israel.—2 Sam. 5:4, 5.

 ¹⁵ Taano ta andam si David na mapasensiyang maghalat? Sinabi niya sa sato an simbag sa mismong salmo na diyan apat na beses niyang ihinapot: ‘Sagkod nuarin?’ Ini an sabi niya: ‘Minasarig ako sa danay mong pagkamuot; mag-uugma an puso ko sa saimong kaligtasan. Mag-aawit ako sa Kagurangnan, huli ta nagin marahayon siya sako.’ (Sal. 13:5, 6, BPV) Nagtiwala si David sa maimbod na pagkamuot ni Jehova. Maugma niyang hinalat an panahon na tatapuson na ni Jehova an saiyang pagsakit, asin inisip-isip man niya kun paano siya tinabangan ni Jehova kaidto. Iyo, namatian ni David na talagang sulit an paghalat niya.

16, 17. Paano nagin marahayon na halimbawa an Diyos na Jehova asin si Jesu-Cristo kun dapit sa pagigin andam na maghalat?

¹⁶ Kun dapit sa pagpahiling nin pakatios, dai ni Jehova hahagadon sa sato na gibuhon an sarong bagay na maski siya habo niyang gibuhon. Siya an pinakamarahay na halimbawa sa pagigin andam na maghalat. (Basahon an 2 Pedro 3:9.) Haluyon nang mapasensiyang naghahalat si Jehova tanganing lubos na masimbag pag-abot nin panahon an mahalagang mga isyu na ibinangon sa hardin nin Eden. Mapasensiyang ‘hinahalat’ ni Jehova an panahon na diyan lubos nang mapapakangbanal an ngaran niya. Maresulta ini sa pambihirang mga bendisyon para sa mga padagos na “naghahalat sa saiya.”—Isa. 30:18.

¹⁷ Ipinahiling man ni Jesus na andam siyang maghalat. Dawa ngani mapanggana na niyang naatubang an mga pagbalo sa saiyang pagtubod kan siya yaon digdi sa daga asin iprinesentar na niya kan 33 C.E. an halaga kan saiyang atang na pantubos, kinaipuhan pa man giraray niyang maghalat sagkod 1914 bago tumukaw bilang Hadi. (Gibo 2:33-35; Heb. 10:12, 13) Dangan, mahalat pa si Jesus sagkod na matapos an saiyang Sangribong Taon na Pamamahala bago mapara an gabos niyang kaiwal. (1 Cor. 15:25) Haloy na panahon na paghalat iyan, pero makakasigurado kita na magigin sulit nanggad iyan.

18, 19. Ano an makakatabang sa sato na magin andam na maghalat na may pakatios?

¹⁸ Kaya mayong duda na an kada saro sa sato kaipuhan na magin andam na maghalat, na magpahiling nin pakatios. Pero ano an makakatabang sa sato na magibo ini? Hagadon sa pamibi an banal na espiritu nin Diyos. Tandaan na an pakatios sarong aspekto kan bunga kan espiritu. (Efe. 3:16; 6:18; 1 Tes. 5:17-19) Makimahirak ki Jehova na tabangan kang magtagal na may pakatios.

¹⁹ Girumdumon man kun ano an nakatabang ki Abraham, ki Jose, asin ki David na mapasensiyang maghalat sa kautuban kan mga panuga ni Jehova. Nakatabang sainda an pagtubod ki Jehova asin pagtitiwala sa Saiya huli sa mga ginibo Niya para sa sainda. Dai sana sinda nagpokus sa saindang sadiri asin sa mga kagustuhan ninda. Mantang hinuhurop-hurop ta kun paano nagin marahay an kinaluwasan kan mga nangyari sa sainda, madadagka man kita na mapasensiyang maghalat.

20. Ano an dapat na determinado niyatong gibuhon?

²⁰ Kaya dawa napapaatubang kita sa mga pagbalo asin kasakitan, determinado kitang mapasensiyang maghalat. Iyo, kun minsan tibaad maihapot ta: ‘Sagkod nuarin, Jehova?’ (Isa. 6:11) Pero sa tabang kan nakakapakusog na puwersa kan banal na espiritu nin Diyos, puwede man niyatong arugon si propeta Jeremias asin magsabi: ‘An sakuyang kahirasan iyo si Jehova. Kaya ngani [padagos] akong maglalaom sa saiya.’—Lam. 3:21, 24.