1, 2. (a) Finshi fingalenga twaipusha Yehova atuti: “Kufika lilali”? (b) Mulandu nshi ukutontonkanya pa fyo ababomfi ba kwa Yehova baipwishe kwingatukoselesesha?

“KUFIKA lilali mwe Yehova?” Ici e cipusho bakasesema abali ne cishinka Esaya na Habakuki baipwishe. (Esa. 6:11; Haba. 1:2) Ilyo Imfumu Davidi yalelemba Amalumbo 13, nayo yalipwishe pa miku ine aiti: “Kufika lilali?” (Amalu. 13:1, 2) Nangu fye ni Shikulwifwe Yesu Kristu alipwishe ici cipusho ilyo abasambi bakwe balangile ukuti tabali na icitetekelo. (Mat. 17:17) Kanshi tatulingile ukupapa nga ca kuti inshita shimo twaipusha icipusho cimo cine.

² Finshi fingalenga twaipusha Yehova atuti: “Kufika lilali?” Nalimo kuti balitufyenga. Nelyo kuti tuleshipikisha amafya ya mu bukote, tulalwalilila nelyo twaliba na mafya pa mulandu wa kuti tuleikala mu “nshita ishayafya nga nshi.” (2 Tim. 3:1) Nelyo nalimo imibele iyabipa iyo abantu bakwata ilelenga tulefilwa ukushipikisha. Nampo nge fi e fingalenga mwaipusha ici cipusho nelyo iyo, tulakoseleshiwa ukwishiba ukuti ababomfi ba kwa Yehova aba ku kale tabali no mwenso wa kwipusha ici cipusho ico  na ifwe twingepusha, kabili Yehova tabakalipile!

3. Finshi fingatwafwa nga twaba na mafya?

³ Finshi fingatwafwa ukushipikisha nga twaba na mafya aya twalandapo? Umusambi Yakobo, munyina wa kwa Yesu alandile ati: “Tekanyeni, mwe bamunyinane, ukufika ku kubapo kwa kwa Shikulu.” (Yako. 5:7) Kwena bonse fye tufwile ukuba abatekanya. Lelo bushe ukutekanya e cinshi, kabili kuti twalanga shani ukuti twalitekanya?

4, 5. (a) Finshi fyaba mu kutekanya? (b) Cintu nshi cimo ico umusambi Yakobo alandilepo icaba mu kutekanya? (Moneni icikope pa ntendekelo ya cino cipande.)

⁴ Baibolo itweba ukuti ukutekanya cisabo ca mupashi wa mushilo; abantunse abashapwililika te kuti babe abatekanya ukufikapo nga ca kuti Lesa tabafwile. Ukutekanya bupe ubo Lesa atupeela, kabili nga tuli abatekanya ninshi tulelanga ukuti twalimutemwa, no kuti twalitemwa abantu bambi. Nga tatuli abatekanya ukutemwa kuti kwacepa, lelo nga tuli abatekanya ukutemwa kuti kwakulilako. (1 Kor. 13:4; Gal. 5:22) Mu kuba abatekanya mwaba ne mibele na imbi iyo Abena Kristu balingile ukukwata. Ku ca kumwenako, ukutekanya kwalyampana no kushipikisha ukulenga tuleshishimisha nga twakwata amafya no kutwalilila ukuba ne nsansa. (Kol. 1:11; Yako. 1:3, 4) Na kabili mu kuba abatekanya mwaliba no kukanalandula ilyo baletucusha no kutwalilila ukuba abashipa nangu ifintu fibipe shani. Nangu ni pali Yakobo 5:7, 8, Baibolo itukoselesha ukulaitemenwa ukulolela. (Belengeni.)

⁵ Mulandu nshi tulingile ukuitemenwa ukulolela Yehova ukucitapo cimo? Yakobo alingenye ifitucitikila ku ficitikila umulimi. Nangu ca kuti umulimi alabombesha pa kubyala ifilimwa, takwata amaka pa miceele nelyo pa fyo ifilimwa fikula. Umulimi te kuti alenge ifilimwa fyapya bwangu. Alishiba ukuti alingile ukutekanya ilyo alelolela “ifisabo ifisuma ifya pano isonde.” E fyo caba na kuli ifwe, kwaliba ifintu ifingi ifyo tushingalula ilyo tulelolela ukuti Yehova afikilishe ifyo atulaya. (Marko 13:32, 33; Imil. 1:7) Nga filya umulimi acita, na ifwe tulingile ukuba abatekanya ilyo tulelolela.

6. Finshi tulesambilila kuli kasesema Mika?

⁶ Ificitika muno nshiku fyalipalana ne fyalecitika mu nshiku sha kwa kasesema Mika. Mika aliko ilyo Imfumu Ahasi iyalecita ifyabipa yaleteka, pali ilya nshita abantu balecita sana ifyabipa. Na kuba abantu balicenjele ku kucita ifyabipa. (Belengeni Mika 7:1-3.) Mika alilwike ukutila te kuti alule ifyo ifintu fyali. Cinshi acitile? Atweba ati: “Ine nakulalolela Yehova. Nakulalindilila [Nkatekanya pa kulolela] Lesa we pusukilo lyandi. Lesa wandi akang’umfwa.” (Mika 7:7) Nga filya Mika acitile, na ifwe tulingile ‘ukulalindilila.’

7. Mulandu nshi uo tulingile ukuitemenwa ukulolela Yehova ukufikilisha ifyo atulaya?

⁷ Nga twalikwata icitetekelo nge co Mika akwete, tukalaitemenwa ukulolela Yehova. Ifwe tatwaba kwati mufungwa uulelolela ukwipaiwa. Umufungwa bamupatikisha fye ukulolela, kabili tatemwa ifyalamucitikila. Lelo ifwe te fyo caba! Tulaitemenwa ukulolela Yehova pantu twalishiba ukuti akatupeela umweo wa muyayaya uo atulaya pa nshita ilya ine apekanya! Kanshi ‘tulashipikisha muli fyonse no kushishimisha pamo no kusekelela.’ (Kol. 1:11, 12) Nomba ilyo tulelolela, nga tuleilishanya ukuti Yehova aleshingashinga ukufikilisha ifyo atulaya, tukalamukalifya.—Kol. 3:12.

8. Finshi tulingile ukulaibukisha ilyo tuletontonkanya pa baume na banakashi aba ku kale abali ne cishinka?

⁸ Nga tuleibukisha abaume na banakashi aba cishinka abali abatekanya kabili abalelolela ukuti Yehova afikilishe ifyo alaile kuti tuleitemenwa ukulolela. (Rom. 15:4) Ilyo tuletontonkanya pa fyo bacitile, kuti cawama no kwishiba inshita yapitilepo ukutula apo batendekele ukulolela, icalengele baitemenwe ukulolela, e lyo ne fyo bapaalilwe pa mulandu wa kuti balitekenye ilyo balelolela.

9, 10. Myaka inga Abrahamu na Sara bali no kulolela pa kuti Yehova afikilishe ifyo abalaile?

⁹ Natulande pali Abrahamu na Sara. Aba baba pa bantu “abapokelele ifyalaiwe pantu balitetekele kabili balitekenye.” Amalembo yatweba ukuti apo “Abrahamu alitekenye,” alipokelele ubulayo bwa kuti Yehova ali no kumupaala kabili ali no kufusha abana bakwe. (Heb. 6:12, 15) Mulandu nshi Abrahamu alingile ukuba uwatekanya? Kuti twatila fye pantu paali no kupita inshita pa kuti Yehova afikilishe ifyo amulaile. Icipangano Yehova apangene na Abrahamu catendeke ukubomba pa Nisani 14, mu 1943 ninshi Yesu talaisa pano calo. Pali iyi nshita e lyo Abrahamu na Sara na ba mu ng’anda yabo bayabwike Umumana wa Yufrate no kwingila mu Calo ca Bulayo. Lyena Abrahamu ali no kulolela pa myaka 25 pa kuti umwana wakwe Isaki afyalwe mu 1918 ninshi Yesu talaisa pano calo. Na kabili ali no kulolela imyaka na imbi 60 pa kuti abeshikulu bakwe Esau na Yakobo bafyelwe mu mwaka wa 1858 ninshi Yesu talaisa pano calo.—Heb. 11:9.

¹⁰ Bushe impanga iyo Abrahamu apyene  yakulile shani? Baibolo itila: “Lelo tamupeelemo impanga, nangu apa kunyanta ulukasa; lelo ilyo aali acili talakwata no mwana Lesa amulaile ukumupeela ino mpanga ukuti ikabe yakwe, pamo na bana bakwe abali no kumukonkapo.” (Imil. 7:5) Palitile imyaka 430 ukutula apo Abrahamu ayabukile Umumana wa Yufrate pa kuti abana bakwe babe uluko ulwali no kulaikala mu mpanga bamulaile.—Ukufu. 12:40-42; Gal. 3:17.

11. Mulandu nshi Abrahamu aitemenwe ukulolela Yehova, kabili mapaalo nshi akapokelela pa mulandu wa kuti alitekenye?

¹¹ Abrahamu aliitemenwe ukulolela pantu alitetekele sana Yehova. (Belengeni AbaHebere 11:8-12.) Abrahamu aliitemenwe ukulolela nangu ca kuti afwile ilyo Yehova ashilafikilisha fyonse ifyo amulaile. Lelo elenganyeni ifyo Abrahamu akatemwa ilyo akabuushiwa mu paradaise pano isonde. Akapapa ilyo akeshiba ukuti amabuuku ayengi aya mu Baibolo yalilanda sana pa lyashi lyakwe na pa bana bakwe. * Elenganyeni ne fyo akatemwa ilyo akeshiba pa muku wa kubalilapo umulimo abombele mu kufikilisha ubufwayo bwa kwa Yehova ubwakumine umwana walaiwe! Ukwabula no kutwishika akomfwa bwino ukuti alicitile fye bwino ukulolela pa myaka iingi.

12, 13. Cinshi Yosefe alingile ukubela uwatekanya, kabili mibele nshi iisuma iyo akwete?

¹² Yosefe uwali icishikulula ca kwa Abrahamu na o alitekenye. Balimufyengele sana. Ica kubalilapo bandume nankwe balimushitishe mu busha ilyo ali ne myaka nalimo 17. Ilyo ali mu busha, balimubepeshe ukuti alefwaya ukucenda umukashi wa kwa shikulu wakwe, kabili balimupoosele mu cifungo. (Ukute. 39:11-20; Amalu. 105:17, 18) Calemoneka kwati balemukandila pa fisuma ifyo alecita mu cifulo ca kumupaalilapo. Lelo ilyo papitile imyaka 13 ifintu fyalyalwike bwangu sana. Yosefe balimufumishe mu cifungo, kabili bamusontele ukuba cilolo mu Egupti.—Ukute. 41:14, 37-43; Imil. 7:9, 10.

¹³ Bushe Yosefe aleenda ne cikonko ku mukoshi pa mulandu wa kuti balimufyengele? Bushe alilekele ukucetekela Lesa wakwe Yehova? Awe. Cinshi cayafwile Yosefe ukutekanya ilyo alelolela? Alitetekele Yehova. Alimwene ukuti Yehova alemwafwa muli fyonse ifyalemucitikila. Ifyo aebele bandume nankwe e filanga ukuti Yehova e walemwafwa, abebele ati: “Mwitiina, bushe nine Lesa? Imwe mwali ne pange libi pali ine. Lesa afwaile ubusuma pa kuti acite nge fyo acita buno bushiku no kupususha imyeo ya bantu abengi.” (Ukute. 50:19, 20) Ukwabula no kutwishika Yosefe alilwike ukuti alicitile fye bwino ukulolela.

14, 15. (a) Bushe ukutekanya kwa kwa Davidi kwali shani ukwaibela? (b) Cinshi cayafwile Davidi ukutekanya ilyo alelolela?

¹⁴ Imfumu Davidi na yo baliifyengele pa miku iingi. Nangu ca kuti Yehova asubile Davidi ukuba imfumu mu Israele ninshi ali fye umwaice, ali no kulolela imyaka nalimo 15 pa kuti bamubike pa bufumu pa mukowa wakwe. (2 Sam. 2:3, 4) Muli iyi myaka, Imfumu Shauli yalefwaya ukumwipaya. * Ici calengele Davidi abe imbutushi, limo alebutukila mu fyalo fimbi kabili inshita shimo aleikala mu ncengo isha mu matololo. Nangu fye ni lintu Shauli bamwipeye mu bulwi, Davidi alilolelele imyaka na imbi nalimo 7 pa kuti abe imfumu pa luko lwa bena Israele.—2 Sam. 5:4, 5.

 ¹⁵ Mulandu nshi Davidi aitemenwe ukuba uwatekanya ilyo alelolela? Alitweba icalengele mwi lumbo limo line umo aipwishe imiku ine ati: “Kufika lilali?” Alandile ati: “Lelo ine, mu cikuuku cenu e mo natetekela; lekeni umutima wandi usekelele mu kupususha kwenu. Ndeimbila Yehova, pantu nanambula.” (Amalu. 13:5, 6) Davidi alitetekele Yehova uwaba ne cikuuku. Alefwaisha ukuti Yehova akamulubule, kabili aletontonkanya pa fyo alemwafwa mu fintu fyonse. Ukwabula no kutwishika Davidi alishibe ukuti ali no kupaalwa nga alolela.

16, 17. Finshi filanga ukuti Yehova na Yesu e bapulamo mu kuitemenwa ukulolela?

¹⁶ Yehova na o wine alitekanya, na kuba te kuti atwebe ukucita ifyo ena ashicita. Yehova e o tulingile ukulapashanya pantu aliitemenwa ukulolela. (Belengeni 2 Petro 3:9.) Yehova alilolela pa myaka iingi nga nshi pa kuti apwishe umulandu uwakuma imitekele yakwe uwaimine mwi bala lya Edeni. “Yehova akatwalilila ukulolela” kabili alalolela inshita ilyo ishina lyakwe likaba ilya mushilo umupwilapo. Ici nga cacitika, bonse “abamulolela” bakapaalwa nga nshi.—Esa. 30:18.

¹⁷ Yesu na o aliitemenwa ukulolela. Nangu ca kuti alitwalilile ukuba uwa cishinka ilyo ali pano isonde mpaka na lintu afwile, kabili ailepeela Yehova ubumi bwakwe ubwapwililika ilyo abwelele ku muulu mu mwaka wa 33, alilolelele mpaka mu 1914 e lyo atendeke ukuteka. (Imil. 2:33-35; Heb. 10:12, 13) Na kabili akatwalilila ukulolela mpaka Imyaka Ikana Limo ikapwe ilyo abalwani bakwe bonse bakonaulwa umupwilapo. (1 Kor. 15:25) Imyaka akalolela pa kuti ifi fikacitike ingi nga nshi lelo te kuti tutwishike ukuti akatemwa ukuti alilolelele.

18, 19. Finshi fingatwafwa ukuitemenwa ukulolela?

¹⁸ Ukwabula no kutwishika bonse fye tulingile ukulaitemenwa ukulolela pa kuti tulelanga ukuti twalitekanya. Nomba finshi fingatwafwa ukucita ifi? Tulingile ukulapepa ukuti Lesa aletupeela umupashi wakwe. Muleibukisha ukuti ukutekanya cisabo ca mupashi wa mushilo. (Efes. 3:16; 6:18; 1 Tes. 5:17-19) Mulepapaata Yehova ukuti alemwafwa ukuba abatekanya ilyo muleshipikisha.

¹⁹ Na kabili muleibukisha ifyayafwile Abrahamu, Yosefe na Davidi ukuba abatekanya ilyo balelolela ukuti Yehova afikilishe ifyo alaile. Icabafwile ni co balitetekele Yehova kabili balimwene ukuti alebafwa. Tababikile fye amano ku fyo balefwaya abene na ku fya kuisekesha. Nga tuletontonkanya pa fyo Yehova abapaalile, na ifwe bene tukalaitemenwa ukulolela.

20. Finshi tulingile ukulafwaisha ukucita?

²⁰ Kanshi nangu tukwate amesho, tulingile ‘ukulalolela.’ Kwena inshita shimo kuti twalailishanya atuti: “Kufika lilali, mwe Yehova?” (Esa. 6:11) Lelo umupashi wa mushilo uwa kwa Lesa nga watukosha, bonse fye kuti twalanda amashiwi ayo Yeremia alandile aya kuti: “Yehova e o nasala [e cakaniko candi]. . . e o nkalolela.”—Inyimbo 3:21, 24.