1, 2. a) Ka gayaraabei ladügün lun wálügüdüni Heowá “ídaba san”? b) Ka uagu ru lubéi hénpulu le híchugubei lubúeingu Bungiu ha lílana binadu dan gurasu woun?

“ÁTIRIBEIGIA dan ladurarun katei le?”. Anihán álügüdahani le ladügübei profeta Isaíasi lun Heowá. Ani álügüdahati giñe profeta Abakúku: “Bungiu Baba, ídaba san?” (Isa. 6:11; Abak. 1:2). Adüga lumuti giñe urúei Dawidi álügüdahani le gádürü wéiyaasu lidan Sálumu 13 (Sal. 13:1, 2). Íbini Hesukrístu adügati aban álügüdahani ítarati dan larihinbalin lilouguan hafiñen ha geyegubaña lau (Mat. 17:17). Ligía moun lumuti lubéi taweiridun wanigi anhein achülüra dan lun wadügüni álügüdahani le.

² Ka gayaraabei ladügün lun wálügüdüni Heowá “ídaba san”? Háfuga súfurihadiwa lan somu marichaü. O háfuga wasufuriruña lan ladüga aweiyaduni o ladüga somu sandi. Másiñati gayaraabei lan wasandirun saragu idiheri ladüga wawinwanduña lan lidan “weyu hénrenguti” (2 Tim. 3:1). O háfuga gayara lan weferidiruni waguraasun dan le warihini luriban hagaburi gürigia ha geyegubaña wau. Meberesenga ka lan wásügürübei, ruti gurasu woun wasubudiruni ariñaga hamani lubúeingu Bungiu ha lílana binadu dan le hasandirubei  furangu ani masíadirun lumutiña Heowá lau hadügüni.

3. Ka gayaraabei líderaguniwa danme wásügürün lídangiñe turobuli hénrenguti?

³ Ka gayaraabei líderaguniwa danme wásügürün lídangiñe turóbuli hénrenguti kéiburi le? Ruti Santiagu le lamulen Hesusu tuéigiñe lúguchu aban adundehani lau lídehan Bungiu, ariñagati: “Ligía lubeiti, niduheñu, gaguraasun humá darime liabin Wabureme” (Sant. 5:7). Súngubei wagía lunti gaguraasun wamá. Gama lumoun, ka san gaguraasunibei ani ida luba warufuduni igaburi Kristiánu le?

4, 5. a) Katei san gaguraasuni ani ida luba warufuduni? b) Ka lafuranguagüdübei Santiagu luagu gaguraasuni? (Ariha humoun iyawaü to lídanboun lagumeseha arütíkulu).

⁴ Según le tariñagubei Bíbülia, arufudatiwa gaguraasuni dan le líchuguni Bungiu lani sífiri sandu woun. Anhein ua lubéi lídehan wama, kei gürigia gafigountiña, hénrengubei wibihini gurasu le wemegeirubei. Aban idewesei lúmagiñe Bungiu igaburi le ani lau gaguraasun wamá warufudubei hínsiñe lan Heowá hama ha híbiri gürigia woun. Dan le maguraasun wamá aba ledebilidun ínsiñeni le wasandirubei hawagu amu (1 Ko. 13:4; Gal. 5:22). Úaraguati gaguraasuni luma amu burí igaburi kristiánu le wéiribei lisudinin. Kei hénpulu, mini lan gaguraasuni wawandun luma wagagibudagun luma sügǘ hénrenguti lau aban igaburi buiti (Kol. 1:11; Sant. 1:3, 4). Mini lan giñe wasufurirun sin wafayeiragüdüniña amu luagu le hadügübei woun, úaragua wagíame meberesenga ka lan asuseredubei. Luagu amu oubaü, ariñagatu Bíbülia mosu lan wánharun luagu megei wamá wagurabahan. Furendei wamuti arufudahani súdiniti le lidan Santiagu 5:7, 8 (aliiha huméi).

⁵ Ka uagu mosu lubéi wánharun luagu megei wamá wagurabahan lun laransehani Heowá katei? Ariñagati Santiagu genegegua lan gádantiwa luma aban ábunaguti. Ka uagu? Ladüga adüga lumuti aban ábunaguti sun liyaraati lun lábunaguni ilaü, gama lumoun, siñati gamanihari lani ligaburi dan ni ligaburi laweiridun nadü. Siñati giñe ladügün lun lásügürün dan furese. Ligía mosu lubéi lagurabahan lau gurasu lun líchuguni múa “alubahani buiti”. Ítarameme, wagurabahañein lagunfuliruni Heowá le füramase lubéi, gama lumoun, anihein saragu katei le siñabei wasansiruni (Mar. 13:32, 33; Adü. 1:7). Ítara kei ábunaguti mosu wagurabahan lau gurasu.

6. Ka wafurendeirubei lúmagiñe profeta Mikeasi?

⁶ Genegeguati le gádanbaliwa uguñe weyu luma le asuseredubei lun profeta Mikeasi. Wínwanti meha lidan luéyuri urúei würibati Aasi. Anihein meha sun luwuyeri wuribani lidan dan ligía darí lun máisturugu haaña lan meha gürigia lidan “ladügǘn wuribati” (aliiha huméi Mikeasi 7:1-3). Kei subudi lani meha Mikeasi siñá lan lasansiraguni katei, ariñagati: “Anhein au, nagurabahaba lúmagiñe Wabureme, níchugubei nemenigin luagu Bungiu le nesefuragüle, ladüga laganbubadina” (Mik. 7:7). Agurabahati Mikeasi lau gurasu ani lunti giñe wadügüni ligiaméme.

7. Ka uagu mosu lubéi aranseñu wamá lun wagurabahani lagunfuliruni Heowá le füramase lubéi lau aban igaburi buiti?

⁷ Anhein ítara liña lubéi wafiñen kei lafiñen Mikeasi, wagurabahaba lau aban igaburi buiti lun ladügüni Heowá le füramase lubéi. Ka uagu? Lun gunfuranda wamani, samina wamá luagun aban adaürǘti le agurabahabalin luéyuri lafarún. Íbini mabusenrun lan lun lachülürün weyu ligía, siñati ladügün amu katei luéidigia lagurabahan. Mítaranti gádantiwa. Kei subudi wabalin lagunfulirubei lan Heowá lani füramasei lun líchugun ibagari magumuchaditi woun ani luagu ladügübei lan lidan dan, agurabahatiwa lau sun wagundan lun ladügüni. Falá wamuti adundehani  luagu lunti lan wawanduni sun katei “lau saragu gurasu luma ugundani” (Kol. 1:11, 12). Hírubei hamuga lasandiragun Heowá lungua lau lasubudiruni wagurabahaña lan lau aban igaburi wuribati o wekeharuña lan luagu hanarime lan ladarasarun (Kol. 3:12).

8. Lidan awanha lan akutihei hénpulu le híchugubei wügüriña hama würiña ha úaraguabaña lun Heowá lidan binadu dan, ka lunbei gabaroun wamani?

⁸ Kaba íderaguawa lúntima aranseñu wamá lun wagurabahan? Líderagubadiwa wakutihani hénpulu le híchugubei wügüriña hama würiña ha úaraguabaña lun Heowá lidan binadu dan ani aba hagurabahan lau gaguraasuni lun lagunfulirun le füramase lubéi (Rom. 15:4). Lidan awanha lan akutihei hani hénpulu, samina wamá átiriñein lan dan hau agurabaha, ka lan uagu hagurabaha luma ka lan abiniruni heresibirubei.

9, 10. Átiriñein dan lau Abüraámü tuma Sara agurabaha lagunfulirun Heowá fiú lídangiñe lani füramasei?

⁹ Gumese wamá ayanuha luagu Abüraámü tuma sara. Kei le arufuda habéi meha afiñeni luagu Bungiu, “aba heresibiruni le füramase lubéi Bungiu houn”. Ariñagatu Bíbülia lárigiñe lan lagurabahan Abüraámü “lau gurasu” resibi lani füramasei luagu labinirubei lan Heowá ani ladügüba lan meha lun hagibedagun ladügawagun (Ebü. 6:12, 15). Ani lásügürüba meha saragu dan lubá lagunfulirun füramasei ligía. Ligía mosu lubéi meha lasigirun Abüraámü agurabaha lau gurasu. Gumeseti daradu le ladügübei Heowá luma Abüraámü agunfulira weyu 14 lidan hati nisán irumu 1943 lubaragiñe lidaani Hesusu. Weyuméme ligía, aba hánhiñuraguni Abüraámü Sara hama sun ha hámabaña duna Éufüratesi ani aba hebelurun lidoun Fulasu Füramasewati. Gama lumoun, mosu meha lagurabahan Abüraámü  wein-seingü irumu lun nasirua lan Isaakü le lisaani lidan irumu 1918 lb.l.H. Ani lárigiñe, mosu meha lagurabahan ǘrüwa-wein irumu lanwoun lun nasirua hamá libañan Esaú luma Hakobu lidan irumu 1858 lb.l.H (Ebü. 11:9).

¹⁰ Ibihati funa san Abüraámü somu fánreinti lídangiñe Fulasu Füramasewati keisi alagan? Ariñagatu Bíbülia luagu míchugun lan Heowá “ni murusun múa lun lidan fulasu le; ariñagarügüti lun luagu lachülürüba lan dan lun lánibei lan ageiraü le hau sun ladügawagun, lau sun meha marahüñügili lan Abüraámü lidan dan ligía” (Adü. 7:5). Sügüti 430 irumu lárigiñe lánhiñuraguni Abüraámü duna Éufüratesi lun hóundaragun ladügawagun keisi aban néchani lun hawinwandun lidan fulasu ligía (Afu. 12:40-42; Gal. 3:17).

11. a) Ka uagu busén lubéi meha Abüraámü lagurabahan? b) Kaba burí abiniruni leresibira Abüraámü lúmagiñe Heowá ladüga gaguraasun lan?

¹¹ Lidan sun libagari Abüraámü marihin lumuti lagunfulirun sun le füramase lubéi Heowá lun, gama lumoun, kei afiñe lubéi meha luagu Heowá, agurabahati lau aban igaburi buiti luma lau gaguraasuni (aliiha huméi Ebüréu 11:8-12). Mame lugundan Abüraámü danme láguyugun lidan Paraísu! Taweiriduba lanigi danme larihini sun le tariñagubei Bíbülia luagu libagari luma hawagu ladügawagun. * Gúndaabei giñe danme gunfuranda lani lisudinin fánreinti le lagunfulirubei lidan lisuuni Heowá luma lidan luáguti adügawaguni le füramase wáalibei. Chóuruti larihibei lan luagu buidu lan meha lagurabahan.

12, 13. a) Ka uagu megei lubéi meha Hosé lagurabahan lau gurasu? b) Ka igaburi buiti larufudubei Hosé?

¹² Arufudati giñe aban lílawa Abüraámü gaguraasun lan. Hosé meha líribei ani súfuriti saragu marichaü. Furumiñe, aba lalugurún kei idamuni dan meha 17 lubéi irumu lau. Lárigiñe, aba lariñawagún luagu busén lan meha láguragunu lani liyubudiri weiriou. Iyeeni meha le ariñawagúbei luagu, lau sun lira aba ladaürǘn Hosé (Agu. 39:11-20; Sal. 105:17, 18). Íbini aban lan meha wügüri úaraguati Hosé, lubaragiñe leresibirun abiniruni genegeti resibirügü lan abeichúni. Gama lumoun, sánsiti sun katei lárigiñe 13 irumu. Aba láfuridun Hosé tídangiñe furisun ani aba ligía lan gürigia le súdinitimabei Ehiptu lárigiñe urúei (Agu. 41:14, 37-43; Adü. 7:9, 10).

¹³ Aba san tagahüdün lanigi Hosé luagu marichaü le lasufurirubei? Mafiñenhali meha san luagu Heowá le Lubungiute? Uá. Ka uagu gayara lubéi meha lagurabahan lau gurasu? Ladüga afiñe lan meha luagu Heowá. Aba líchugun fe luagu Bungiu lan gamaniharibei lau sun katei. Ligía aba lubéi lariñagun houn líbirigu: “Manufudeda humá, siñati níchaagun nungua kei Bungiu. Saminatün yebe meha hadügün wuribati nun, gama lumoun aba lasansiruni Bungiu wuribati ligía luagu buiti, lun ladügüni le warihubei uguñe weyu, lun lesefuruni habagari saragu gürigia” (Agu. 50:19, 20). Lagumuhóun, ariha lumuti Hosé buidu lan meha lagurabahan.

14, 15. a) Ka uagu taweirida wanigi dan le wasaminarun luagun gaguraasuni le meha larufudubei Dawidi? b) Ka íderagubalin Dawidi lun lagurabahan lau gurasu?

¹⁴ Súfuriti giñe urúei Dawidi saragu marichaü. Lau sun aba lan meha lanúadiruni Heowá dan le nibureingili lun ligíaba lan lurúeite Ísüraeli, mosu meha lagurabahan Dawidi kéiburi 15 irumu lubá urúei lan lidan lani türibu (2 Sam. 2:3, 4). Lidan burí dan ligía, mosu meha lanurahan luéi urúei Saulu ladüga busenti meha láfaruni hilagubei. * Ligía mosu lubéi meha lásügürün saragu dan bóugudi luéi lageira  o lagadábugiñe wübü lidan fulasu mageirawati. Lau lásügürün dan, aba lounwen urúei Saulu lidan aban wuribu. Íbini ítara, mosu meha lagurabahan Dawidi kéiburi sedü irumu lun ligía lan urúei lidan sun néchani Ísüraeli (2 Sam. 5:4, 5).

¹⁵ Ka uagu lagurabahanbei Dawidi lau gurasu? Ru lumuti óunabagülei lidan Sálumu 13 le ídanbei lálügüdei Heowá gádürü wéiyaasu ídaba lan meha lagumucha sun lituróbulin. Ariñagati: “Hemenigitina luagu bínsiñehabu; gúndaatu nanigi ladüga besefurunina. Neremuhaba lun Nabureme luagu ubuiduni le adüga láalibei nun!” (Sal. 13:5, 6). Afiñeti meha Dawidi luagu línsiñehabu Heowá. Agurabaha lumuti meha lachülürün weyu lun lagumuchaguagüdüni Heowá lituróbulin. Saminati giñe luagu ligaburi líderaguni Heowá. Furanguti subudi lani Dawidi buidu lan meha lagurabahan.

16, 17. Ida liña larufuduni Heowá luma Hesusu busén hamá hagurabahan?

¹⁶ Dan le lamuriahan Heowá lun gagurabaguadi wamá, magurabahanti lun wadügün somu katei le lunbei madügün lani. Ligía hénpulu le buídutimabei lánina gaguraasuni (aliiha huméi 2 Féduru 3:9). Sügühali Heowá saragu milu irumu agurabaha lau gurasu lun larufudún iyeeni lan le lariñagubei Satanási lidan fuluri-agei Edén. Lagurabahañein Heowá dan lun larumadahani liri sunsuinagubei. Gíbebei abiniruni heresibirun ha agurabahabaña lau gurasu darí lun siñá lan wasaminarun luagun (Isa. 30:18).

¹⁷ Agurabahaali giñe Hesusu saragu. Úaraguati darí lounwen dan le ya lubéi ubouagu. Lida irumu 33, ru lumuti lebegi lani sákürifisiu liñúarü Heowá sielu. Gama lumoun, mosu meha lagurabahan darí irumu 1914 lun lagumeserun arúeiha (Adü. 2:33-35; Ebü. 10:12, 13). Ani mósume lasigirun agurabaha darí lagumuchun Larúeihan le lánina Milu Irumu lun hagünrinchawagun láganiñu sunsuinagubei (1 Ko. 15:25). Migifebei agurabahani, gama lumoun, chouru wamuti buídubei lan le lunbei liabin.

18, 19. Kaba íderaguawa lun busén wamá wagurabahan lau gurasu?

¹⁸ Furanguti mosu lan gaguraasun wamá ani gagurabaguadi wagíame. Kaba íderaguawa? Wafurieidun lun Heowá lun líchuguni lani sífiri sandu woun. Mosu waritaguni megei wamá sífiri sandu lun gaguraasun wamá (Efe. 3:16; 6:18; 1 Tesa. 5:17-19). Ligía mosu lubéi wayumuragun lun Heowá íderagua láamugawa awanda lau gaguraasuni.

¹⁹ Haritagua waméi giñe ka lan íderagubalin Abüraámü, Hosé luma Dawidi agurabaha lau gurasu lun lagunfuliruni Heowá lani füramasei. Agurabahatiña ladüga afiñe hamá meha luagu Heowá luma luagu ligaburi ladügüni katei. Masaminaruntiña hawougua ni luagu le buídutimabei houn. Ínchaha lumutiwa wasaminarun luagun abiniruni le heresibirubei lun gaguraasun wamá.

20. Ka lunbei desidírü wamani?

²⁰ Mosu desidírü wamá wagurabahan lau gurasu íbini wagagibudagun luma lénrengunga. Aniheinbei dan wálügüdagun woungua: “Bungiu Baba, ídaba san?” (Abak. 1:2). Gama lumoun, lau lubafu sífiri sandu gayaraabei wariñagun kei Heremíasi: “Wabureme [...] sun káteibei nun; ligía hemenigi nubéi luagu!” (Aya. 3:21, 24).