1, 2. (a) Ngaa makapamangkot kita: “Tubtob san-o”? (b) Ngaa mapalig-on kita sang halimbawa sang matutom nga mga alagad sang una?

“TUBTOB san-o?” Amo ini ang ginpamangkot sang matutom nga mga manalagna nga sanday Isaias kag Habacuc. (Isa. 6:11; Hab. 1:2) Sang ginsulat ni Hari David ang Salmo 13, apat ka beses man sia nga namangkot: “Tubtob san-o?” (Sal. 13:1, 2) Ginpamangkot man ini sang aton Ginuong Jesucristo bangod wala sing pagtuo ang mga tawo sa palibot niya. (Mat. 17:17) Mahimo nga napamangkot man naton ini kon kaisa.

² Ngaa makapamangkot kita: “Tubtob san-o”? Basi nabiktima kita sang inhustisya. Ukon basi tigulang na kita kag nagabalatian ukon na-stress kita sa pagkabuhi sa sining “makahalanguyos nga mga tion nga mabudlay atubangon.” (2 Tim. 3:1) Ukon basi nagaluya ang aton buot bangod sang malain nga panimuot sang mga tawo sa palibot naton. Ano man ang rason, makapalig-on gid mahibaluan nga wala ginpakamalaut ni Jehova ang iya matutom nga mga alagad sang una sang ginpamangkot nila ini.

3. Ano ang makabulig sa aton kon ara kita sa mabudlay nga sitwasyon?

³ Pero ano ang makabulig sa aton kon ara kita sa mabudlay  nga sitwasyon? Gintuytuyan sang Dios si disipulo Santiago, ang utod ni Jesus sa iloy, nga laygayan kita: “Mga kauturan, mangin mapinasensiahon kamo tubtob sa presensia sang Ginuo.” (Sant. 5:7) Huo, dapat kita tanan mangin mapinasensiahon. Pero ano ini nga kinaiya, kag paano naton ini mapakita?

4, 5. (a) Ano ang pagkamapinasensiahon, kag paano naton ini mapakita? (b) Paano ginpaathag ni disipulo Santiago ang pagkamapinasensiahon? (Tan-awa ang piktyur sa umpisa sini nga artikulo.)

⁴ Suno sa Biblia, ang pagkamapinasensiahon isa ka kinaiya nga ginapatubas sang balaan nga espiritu. Kinahanglan gid sang indi perpekto nga mga tawo ang bulig sang Dios para makapasensia sila sa mabudlay nga sitwasyon. Ang pagkamapinasensiahon isa ka regalo sang Dios, kag isa ini ka paagi para mapamatud-an naton ang aton gugma kay Jehova kag sa iban. Kon mapinasensiahon kita, magabakod ini nga gugma, pero kon indi, magatahaw ini. (1 Cor. 13:4; Gal. 5:22) May kaangtanan ang pagkamapinasensiahon sa iban pa nga Cristianong mga kinaiya. Halimbawa, kinahanglan ang pagbatas para maatubang ang mabudlay nga sitwasyon kag mangin positibo. (Col. 1:11; Sant. 1:3, 4) Mapinasensiahon man kita kon indi kita magbalos bisan pa ginhimuan kita sing malain kag nagapabilin kita nga malig-on ano man ang aton problema. Isa pa, ginsiling sang Biblia nga dapat handa kita maghulat. Ginpaathag ini sa Santiago 5:7, 8. (Basaha.)

⁵ Ngaa dapat handa kita maghulat kay Jehova? Ginsiling ni Santiago nga pareho sa mangunguma ang aton sitwasyon. Bisan pa nagpangabudlay sa pagtanom ang mangunguma, indi niya kontrolado ang tiempo ukon ang pagtubo sang tanom. Indi niya mapadasig ang tion. Dapat sia maghulat sing mapinasensiahon para sa “hamili nga bunga sang duta.” Gani may madamo man nga butang nga indi naton kontrolado samtang ginahulat naton nga matuman ang mga promisa ni Jehova. (Mar. 13:32, 33; Binu. 1:7) Pareho sa mangunguma, dapat kita maghulat sing mapinasensiahon.

6. Ano ang matun-an naton sa halimbawa ni manalagna Miqueas?

⁶ Ang kahimtangan naton subong pareho anay sang tion ni manalagna Miqueas. Nagkabuhi sia sang naggahom ang malain nga si Hari Ahaz, kag ginahimo sadto ang tanan nga sahi sang kalautan. Nangin ‘maayo gid sa paghimo sing malain’ ang mga tawo. (Basaha ang Miqueas 7:1-3.) Nahibaluan ni Miqueas nga indi niya mabag-o ini nga kahimtangan. Gani ano ang mahimo niya? Nagsiling sia: “Magabantay ako nga nagahulat kay Jehova. Ipakita ko ang nagahulat nga panimuot [“Magahulat ako sing mapinasensiahon,” footnote] sa Dios nga magaluwas sa akon. Pamatian ako sang akon Dios.” (Miq. 7:7) Pareho kay Miqueas, dapat man kita ‘maghulat.’

7. Ano dapat ang aton panimuot samtang ginahulat naton nga matuman ang mga promisa ni Jehova?

⁷ Kon may pagtuo kita pareho kay Miqueas, mangin handa kita maghulat kay Jehova. Indi kita pareho sa isa ka priso nga nagahulat sa adlaw nga patyon na sia. Napilitan lang sia nga maghulat, kag wala niya ini ginakalangkagan. Indi gid kita pareho sina! Handa kita maghulat kay Jehova bangod nahibaluan naton nga tumanon niya ang ginpromisa niya sa aton nga kabuhi nga wala sing katapusan sa husto gid nga tion! Gani ‘nagabatas kita sing bug-os nga may pagpailob kag kalipay.’ (Col. 1:11, 12) Kon nagahulat kita, wala kita nagareklamo kag  nagakumod nga kadugay kay Jehova, bangod indi ini makapahamuot sa iya.—Col. 3:12.

8. Ano ang dumdumon naton samtang ginapamalandungan naton ang halimbawa sang matutom nga mga alagad ni Jehova sang una?

⁸ Mangin handa kita sa paghulat kon dumdumon naton ang matutom nga mga alagad ni Jehova sang una nga naghulat sing mapinasensiahon nga matuman ang iya mga promisa. (Roma 15:4) Samtang ginapamalandungan naton ang ila halimbawa, dumdumon naton kon ano kalawig sila naghulat, kon ngaa handa sila maghulat, kag kon paano sila ginpakamaayo.

9, 10. Ano kalawig naghulat sanday Abraham kag Sara kay Jehova?

⁹ Binagbinaga ang halimbawa nanday Abraham kag Sara. Nalakip sila sa ‘mga nagpanubli sang mga saad paagi sa pagtuo kag paghulat sing mapinasensiahon.’ Nagsiling ang Kasulatan nga “sa tapos naghulat sing mapinasensiahon si Abraham,” nabaton niya ang saad nga pakamaayuhon sia ni Jehova kag padamuon ang iya kaliwat. (Heb. 6:12, 15) Ngaa dapat mangin mapinasensiahon si Abraham? Bangod magaligad pa ang malawig nga tion antes matuman ini nga saad. Nagsugod nga matuman ang katipan ni Jehova kay Abraham sang Nisan 14, 1943 B.C.E., sang magtabok sila ni Sara upod ang ila panimalay sa Suba Eufrates kag nagsulod sa Ginsaad nga Duta. Naghulat pa gid si Abraham sing 25 ka tuig antes matawo ang iya anak nga si Isaac sang 1918 B.C.E., kag sing 60 pa ka tuig antes matawo ang iya mga apo nga sanday Esau kag Jacob sang 1858 B.C.E.—Heb. 11:9.

 ¹⁰ Ano kalapad nga duta ang napanubli ni Abraham? Ang Biblia nagsiling: “Wala sia [si Abraham] ginhatagan sang Dios sing bisan gamay lang nga bahin sini nga duta. Apang nagsaad sia nga ihatag sa iya ini nga duta kag magapabilin ini nga iya duta, kag para sa iya mga kaliwat. Wala pa sing anak si Abraham sang ginsiling ini sang Dios sa iya.” (Binu. 7:5) Pagligad pa sang 430 ka tuig sa tapos magtabok si Abraham sa Eufrates nga nangin pungsod ang iya mga kaliwat nga magapanag-iya sang duta.—Ex. 12:40-42; Gal. 3:17.

11. Ngaa handa si Abraham maghulat kay Jehova, kag ano ang iya mga pagpakamaayo bangod nangin mapinasensiahon sia?

¹¹ Handa si Abraham maghulat sing mapinasensiahon bangod nagtuo sia kay Jehova. (Basaha ang Hebreo 11:8-12.) Nalipay si Abraham sa paghulat, bisan pa wala niya makita ang iban nga saad sang Dios antes sia napatay. Pero handurawa ang kalipay ni Abraham kon banhawon na sia sa paraiso nga duta. Makibot gid sia nga mahibaluan nga nasulat sa Biblia ang sugilanon sang iya kabuhi kag sang iya mga kaliwat. * Handurawa ang iya kalipay nga mahangpan ang iya bahin sa katumanan sang katuyuan ni Jehova parte sa ginsaad nga kaliwat! Sigurado nga malipay gid sia bisan pa naghulat sia sing malawig.

12, 13. Ngaa dapat mangin mapinasensiahon si Jose, kag ano ang iya maayo nga panimuot?

¹² Handa man maghulat ang apo sa tuhod ni Abraham nga si Jose. Nangin biktima sia sang grabe nga inhustisya. Una, ginbaligya sia sang iya mga utod bilang ulipon sang mga 17 anyos sia. Dayon, ginsumbong sia nga gusto niya kuno luguson ang asawa sang iya agalon, gani ginpriso sia. (Gen. 39:11-20; Sal. 105:17, 18) Ginhimo niya ang matarong, pero daw ginsilutan pa sia sa baylo nga pakamaayuhon. Pero pagligad sang 13 ka tuig, nagbag-o ini sing hinali. Ginpagua sia sa prisuhan kag ginhatag sa iya ang ikaduha sa pinakamataas nga posisyon sa Egipto.—Gen. 41:14, 37-43; Binu. 7:9, 10.

¹³ Naakig bala si Jose bangod sini nga inhustisya? Nadula bala ang iya pagsalig sa iya Dios nga si Jehova? Wala. Ano ang nakabulig kay Jose nga maghulat sing mapinasensiahon? Ang iya pagtuo kay Jehova. Nakita niya nga kontrolado ni Jehova ang nagakatabo. Maathag ini sa ginsiling niya sa iya mga utod: “Indi kamo magkahadlok. Ako bala ang Dios? Bisan pa gintuyo ninyo nga halitan ako, gintuyo sang Dios nga mangin maayo ang resulta sini agod luwason ang madamo nga katawhan, pareho sang ginahimo niya subong.” (Gen. 50:19, 20) Para kay Jose, maayo gid kay naghulat sia.

14, 15. (a) Ngaa talalupangdon ang pagkamapinasensiahon ni David? (b) Ano ang nakabulig kay David nga maghulat sing mapinasensiahon?

¹⁴ Nangin biktima man sang inhustisya si Hari David. Pamatan-on pa sia sang ginpili sia ni Jehova para mangin hari sang Israel, pero naghulat pa sia sing mga 15 ka tuig antes sia mangin hari sa iya tribo. (2 Sam. 2:3, 4) Sa sini nga tion, gusto sia patyon ni Hari Saul nga nangin indi matutom. * Gani dapat magpalagyo si David sa iban nga pungsod ukon magpanago sa mga kueba sa desyerto. Bisan pa napatay na si Saul sa inaway, naghulat pa si David sing mga pito ka tuig antes sia mangin hari sa bilog nga pungsod sang Israel.—2 Sam. 5:4, 5.

 ¹⁵ Ngaa handa si David maghulat sing mapinasensiahon? Ang iya sabat makita man sa salmo diin namangkot sia: “Tubtob san-o?” Nagsiling sia: “Nagasalig ako sa imo mainunungon nga gugma; magakalipay ang akon tagipusuon kay luwason mo ako. Magaamba ako kay Jehova, kay ginpadyaan niya ako sing bugana.” (Sal. 13:5, 6) Nagsalig si David sa mainunungon nga gugma ni Jehova. Malipayon niya nga ginpaabot nga luwason sia, kag ginpamalandungan niya kon paano sia ginbuligan ni Jehova sang una. Para kay David, maayo gid kon maghulat sia.

16, 17. Paano ginpakita ni Jehova nga Dios kag ni Jesucristo nga handa gid sila maghulat?

¹⁶ Wala ginapahimo sa aton ni Jehova ang indi niya gusto himuon. Matuod ini bisan parte sa pagkamapinasensiahon. Sia ang pinakamaayo nga halimbawa sang handa maghulat. (Basaha ang 2 Pedro 3:9.) Linibo na ka tuig nga nagahulat si Jehova sing mapinasensiahon para masolbar sing bug-os ang importante nga mga hulusayon nga natabo sa hardin sang Eden. “Nagahulat [sia] sing mapailubon” kag “padayon nga nagalaum” sa pag-abot sang tion nga pakabalaanon sing bug-os ang iya ngalan. Magaresulta ini sa matahom nga mga pagpakamaayo sa mga “malangkagon nga nagahulat sa iya.”—Isa. 30:18; footnote.

¹⁷ Handa man si Jesus maghulat. Sang ari sia sa duta, nangin matutom sia asta sa iya kamatayon. Sang 33 C.E., ginpresentar niya ang balor sang iya halad-gawad, pero naghulat pa sia asta sang 1914 para magsugod sa paggahom. (Binu. 2:33-35; Heb. 10:12, 13) Pagkatapos pa sang Isa ka Libo ka Tuig nga Paggahom ni Jesus nga malaglag ang tanan niya nga kaaway. (1 Cor. 15:25) Malawig ini nga paghulat, pero para gid ini sa aton kaayuhan.

18, 19. Ano ang makabulig sa aton nga mangin handa sa paghulat?

¹⁸ Gani dapat gid kita tanan mangin handa sa paghulat. Pero ano ang makabulig sa aton para mahimo ini? Dapat naton ipangamuyo nga hatagan kita sang espiritu sang Dios. Dumduma nga ang pagkamapinasensiahon isa ka kinaiya nga ginapatubas sang espiritu. (Efe. 3:16; 6:18; 1 Tes. 5:17-19) Ipangabay kay Jehova nga buligan ka nga magbatas sing mapinasensiahon.

¹⁹ Dumduma man ang nakabulig kanday Abraham, Jose, kag David nga maghulat sing mapinasensiahon sa pagtuman ni Jehova sang iya mga promisa. Nabuligan sila sang ila pagtuo kag pagsalig kay Jehova. Wala nila ginpensar ang ila lang kaugalingon kag ang ila kasulhayan. Kon pamalandungan naton kon paano sila ginpakamaayo, mapalig-on man kita nga maghulat.

20. Ano ang determinado naton nga himuon?

²⁰ Gani determinado kita nga ‘maghulat’ bisan pa makaatubang kita sang mga pagtilaw. Kon kaisa, basi makapamangkot kita: “O Jehova, tubtob san-o?” (Isa. 6:11) Pero paagi sa bulig sang balaan nga espiritu sang Dios, determinado kita nga sundon ang ginsiling ni Jeremias: “Si Jehova amo ang akon palanublion, gani magahulat ako sa iya.”—Pan. 3:21, 24.