1, 2. (a) Ngatta iyava-avu tam: “Kunnasi kabayag”? (b) Ngatta mapagaram ittam ta ehemplo na matalo ira nga aripan gari?

“KUNNASI kabayag?” Yatun i niyavu na matalo ira nga profeta nga da Isaias anni Habakuk. (Isa. 6:11; Hab. 1:2) Turi ta nitura ni Patul David i Salmo 13, nami-appana nga niyavu gapa: ‘Kunnasi kabayag?’ (Sal. 13:1, 2) Maski i Yafu tam nga si Jesu-Cristo, niyavuna gapa yaw turi ta kiniyuvovugna danuri totolay ta pallevuna nga awan tu pangurugda. (Mat. 17:17) Yatutta ariattam makaddag nu iyavu tam gapa yatun.

² Ngatta iyava-avu tam: “Kunnasi kabayag?” Awayyana nga meparubang ittam ta kawan na hustisia. Onu attattammattam i efekto na pallakay onu pabbako onu “ziga-riga” na pattolay taw nga “pangurianan ira nga aggaw.” (2 Tim. 3:1) Onu molang ittam ngana ta marake nga ugu-ugali na totolay ta pallevu. Maski anni paga i rason, talaga makapabannay ammuan nga i matalo ira nga aripan ni Jehova gari ay iyavuda gapa i kunnatun, ngem ari ira naporyan ta pinangiyavuda!

3. Anni i makoffun nittam nu meparubattam ta mariga ira nga situasion?

³ Anni i makoffun nittam nu meparubattam ta mariga ira nga  situasion? Nainspiran si Santiago, nga wagi ni Jesus ta yena nga itura nittam: “Wawwagì ira, mappasensia kamu gafu adde ta dattal na Yafu.” (Sant. 5:7) Wan, mawag tam ngamin i pasensia. Ngem anni i nelagum ta kapeggan tu kunnaw nga makadios nga kualidad?

4, 5. (a) Anni i nelagum ta pappasensia? (b) Ta anni nga nikumpara na disipulo nga si Santiago i tadday nga aspeto na pappasensia? (Innan i letratu ta gafu na artikulo.)

⁴ Segun ta Biblia, vunga na masanto nga espiritu i pappasensia; nu awan tu uffun na Dios, marigatan i imperfekto nga totolay nga mabbalin tu mapasensia ta mariga ira nga situasion. Regalu na Dios i pappasensia, anna importante yatun tapenu mepasingattam i aya tam sa. Pangipasingan gapa tu aya ta tanakuan i pappasensia. Nu kanayun nga awan tu pappasensia, makkafi i aya nga mamattaradday; ngem nu egga pappasensia, malladda yatun. (1 Cor. 13:4; Gal. 5:22) Nelagum ta pappasensia i karuan nga makasta nga kualidad na Cristiano. Angngariganna, konektadu yatun ta pagattam, nga makoffun nittam tapenu pasensian i mariga ira nga sirkumstansia durante nga positibo i pagimamma tam. (Col. 1:11; Sant. 1:3, 4) Nelagum gapa ta pappasensia i ari nga pangibalo maski nu natakitan anna pattalupaddian nga matuyag anna matalo maski nu anni i mesimmu. Ipagaram paga na Biblia nga sigga-paran tam nakuan nga akseptan i pakawagan nga maginnag. Nepasingan yaw nga aspeto na pappasensia ta Santiago 5:7, 8. (Bibbigan.)

⁵ Ngatta ta pasensiattam nakuan nga innaggan i pagguyu ni Jehova? Nikumpara ni Santiago i situasiottam ta tadday nga kusetcheru. Maski paga malallappo nga mammula i kusetcheru, arianna kontroladu i tiempo onu i paddakal na mulana ira. Arianna mapalistu i tiempo. Ammuna nga kawaganna nga mapasensia nga innaggan i “pavvunga na mangina ira nga mula-mula na.” Kunnatun gapa, aru nga gannug i ari tam makontrol durante nga iinnaggattam i ketuppal na promesa ira ni Jehova. (Mar. 13:32, 33; King. 1:7) Kagitta na kusetcheru, mawag tu mappasensia tam nga maginnag.

6. Anni i magigiammu tam ta ehemplo ni profeta Mikias?

⁶ Meyarig i situasiottam ta maddaggun ta situasion ta kaggawan ni profeta Mikias. Nattolay yaya turi ta pammaguray na marake nga Patul Ahaz ta tiempo nga napakaru i kinadake. Ta kakuruganna, nabbalin tu “eksperto ta pangngua tu marake” i totolay. (Bibbigan i Mikias 7:1-3.) Ammu ni Mikias nga arianna moli yatun nga paddia-paddian. Anni gafu i kuanna? Kunna: “Ngem nu meyannung niakan, ariakku magimmang nga maginnag kani Jehova. Mapasensia nga maginnag ngà ta Dios na kapaliag ku. Ginnannà na Dios ku.” (Mik. 7:7) Kagitta ni Mikias, mawag tam gapa nga “mapasensia nga maginnag.”

7. Ngatta ari laman nakuan tu basta maginnag ta ketuppal na promesa ira ni Jehova?

⁷ Nu egga i pangurug tam nga gitta ni Mikias, sigga-paran tam lallagu nga maginnag kani Jehova. Ari tu kagitta na presu i situasiottam nga maginnag laman ta affukutanna adde ta masentensian ta patay. Fuersadu yaya nga maginnag, anna arianna arrakkan i ketuppalanna. Talaga neruma yatun ta nittam! Mapasensia ittam maginnag megafu ta ammu tam nga tuppalan ni Jehova i promesana nga iddan ittam tu mannanayun nga inango ta mepangngo nga tiempo, ta kakastan nga tiempo! Nu kunnatun gafu, ‘mapasensia tam nga attamman ngamin i mesissimmu nittam, nga sigga-pagayaya.’ (Col. 1:11, 12) Nu maginnag ittam ngem marrekklamo  anna mappata-patu mabba megafu ta gittana mabayag magguyu si Jehova, ari nga makapagayaya yatun sa.​—Col. 3:12.

8. Anni i magigiammu tam ta matalo nga babbay anna lallaki gari?

⁸ Mas mappasensia ittam nga maginnag nu daddammattam i matalo nga lallaki anna babbay gari nga mapasensia nga naginnag ta pattuppal ni Jehova ta promesana ira. (Roma 15:4) Durante nga pannonopattam tu mapia i ehemploda, makasta gapa nga daddammattam nu kunnasi kabayag ira nga naginnag, nu ngatta nappasensia ira nga naginnag, anna nu anni nga bendision i nalawada ta pappasensia.

9, 10. Kunnasi kabayag nga naginnag kani Jehova da Abraham anna Sara?

⁹ Ikonsidera tam i ehemplo ni Abraham anni Sara. Ira “danuri i maninaga noka ta nitabba na Dios, megafu ta angngurug anna pasensia da.” Kagian na Katurakan nga “megafu ta pasensia” ni Abraham nga naginnag, nalawana i promesa nga bendisionan yaya ni Jehova anna pakaruanna i gakana. (Heb. 6:12, 15) Ngatta kawagan ni Abraham nga mappasensia? Megafu ta kawagan i tiempo ta ketuppal na promesa. Namegafu nga netuppal i pakkasinabban ni Jehova kani Abraham turi Nisan 14, 1943 B.C.E. Nesimmu yatun turi ta naddaki ira dua ni Sara kavulu i tangabbalayadda ta Bannag na Eufrates anna simillung ira ta Nepromesa nga Davvun. Naginnag si Abraham tu 25 dagun nige meyana na anana nga si Isaac turi 1918 B.C.E., anna naginnag mangana tu 60 dagun nige meyana na afu onu afukuna nga da Esau anni Jacob nga neyana turi 1858 B.C.E.​—Heb. 11:9.

¹⁰ Kunnasi kadakal i narensia ni Abraham  nga davvun? Mabibbig tam: “Awan vuluvuga tu niyawa na Dios [Jehova] tu davvun sa [Abraham] tu kua na laggapa maski tanga-dapag laman. Ngem nitabba na Dios tu yaw nga davvun ay iyawa na sa tuange ta gaka na ira tu tagikuad-da maski nu awan paga tu ana na gari.” (King. 7:5) Ari paga naorganisa tu nasion i gaka-gaka ni Abraham nga mangirensia tatun nga davvun, nu ari, 430 dagun paga kabalin na pinakkantayda ta Eufrates.​—Ex. 12:40-42; Gal. 3:17.

11. Ngatta sigga-paran nga maginnag si Abraham kani Jehova, anna anni noka i bendision ira ta pappasensiana?

¹¹ Sigga-paran nga maginnag si Abraham, megafu ta nebase i pappasensiana ta pangurugna kani Jehova. (Bibbigan i Hebreo 11:8-12.) Magayaya yaya nga maginnag, maski arianna nasingan i kumpleto nga ketuppal na promesa ta kaggawanna. Ngem nonopammu ngana laman i pagayaya ni Abraham sonu mapaginnolay yaya ta paraiso nga davvun. Masurpresa sangaw yaya nga mammuan nu kunnasi i karu na netura ta Biblia meyannung ta pattolena anna ta gaka-gakana. * Nonopammu i ayayana sonu malippawana i importante nga papelna ta ketuppal na gakkag na Jehova meyannung ta nepromesa nga gaka! Siguradu nga matagenona nga sulit i pinaginnagna.

12, 13. Ngatta mawag ni Jose nga mappasensia, anna anni nga kualidad i egga sa?

¹² Mapasensia gapa nga naginnag i afu ta tug ni Abraham nga si Jose. Biktima yaya na kappasirang nga kawan na hustisia. Nilaku yaya na wawwaragina ta pakka-aripan turi ta ma-17 anios. Tapus, naakusan yaya tu rape na atawa na yafuna nga narresulta ta kefukuna. (Gen. 39:11-20; Sal. 105:17, 18) Matunung i kingnguana ira, ngem nakastigo lallagu yaya imbes nga mabendisionan. Ngem alistu nga nanguli ngamin kabalin na 13 dagun. Napalawan yaya ta affukutan anna netunno yaya ta mekadua nga katannangan nga posision ta Ehipto.​—Gen. 41:14, 37-43; King. 7:9, 10.

¹³ Nattaki kari i nono ni Jose megafu ta kawan na hustisia? Nawanan kari yaya tu tiwala ta Diosna nga si Jehova? Ari. Anni i nakoffun kani Jose tapenu mapasensia nga maginnag? I pangurugna kani Jehova. Nasinganna i lima ni Jehova ta ganna-gannug. Innan nu kunnasi yaw nepasingan ta kinagina ta wawwaragina: “Ariannu maganassing. Sakan kari i Dios? Maski nu sinadyanu nga takitan ngà, ginakkag na Dios nga kuan tu mapia i resultana yatun anna tapenu mepaliag i aru nga totolay, gittana kingnguana taw nga aggaw.” (Gen. 50:19, 20) Talaga nalippawa ni Jose nga sulit i paginnagna.

14, 15. (a) Anni i kappabbaw ta pappasensia ni David? (b) Anni i nakoffun kani David tapenu mappasensia?

¹⁴ Biktima gapa na aru nga kawan na hustisia si Patul David. Maski sinunno yaya ni Jehova turi ta kabbinna nga mabbalin tu patul na Israel ta mappange, naginnag paga yaya tu 15 dagun nigena mabbalin tu patul ta mismu nga tribuna. (2 Sam. 2:3, 4) Taw nga tiempo, zinaddag na ari matalo nga si Patul Saul si David tapenu patayan yaya. * Yatutta, mattatagu yaya, nu mittan ta tanakuan nga nasion, anna nu mittan ta kueba ira ta katanapan. Maski turi ta natay si Saul ta gerra, naginnag lagapa si David tu mappitu dagun nige meyawa sa i pammaguray ta interu nga Israel.​—2 Sam. 5:4, 5.

¹⁵ Ngatta sigga-paran nga maginnag si  David? Sinabbagna yatun ta salmo nga nangiyavutanna tu nami-appa: ‘Kunnasi kabayag?’ Kunnaw i kagianna: “I pammakatalakkak-ku ay i manayun nga aya mu laman; magayaya ngà ta pamaliag mu niakan. Sikaw, O AFU, i ek-ku nga pakkansionan megafu ta kuruga mapia ka niakan.” (Sal. 13:5, 6) Nakkomfiansa si David ta matalo nga aya ni Jehova. Magayaya yaya nga naginnag ta kepaliagna, anna ninonona nu kunnasi yaya nga binala-balattan ni Jehova. Wan, ammu ni David nga sulit i maginnag.

16, 17. Kunnasi nangipasingan si Jehova anna si Jesu-Cristo tu makasta ira nga ehemplo ta paginnag?

¹⁶ Meyannung ta pappasensia, ari ekspektan ni Jehova nga kuattam i tadday nga gannug nga arianna mismu nga kuan. Nangipasingan yaya tu kakastan nga ehemplo na sigga-paran nga paginnag. (Bibbigan i 2 Pedro 3:9.) Rinivu ngana nga dagun nga magigginnag si Jehova adde sonu interamente nga matabbag i moral nga isyu nga napalattuag ta hardin na Eden. “Mapasensia nga maginnag” yaya anna “tulu-tuloy nga maginnag” ta pamakasanto noka ta ngaganna. Marresulta yatun ta ari matuku-tukug nga bendision turi ta ‘arrakkadda nga maginnag sa.’​—Isa. 30:18; ftn.

¹⁷ Sigga-paran gapa nga maginnag si Jesus. Maski nu nalampasanna i kapurueba ta integridad taw ta davvun anna nipresenta i balor na sakrifisiona nga tavvu turi ta 33 C.E., naginnag paga yaya adde ta 1914 nige nga namegafu ta pammagurena. (King. 2:33-35; Heb. 10:12, 13) Maski paga kunnatun, maginnag lagapa si Jesus adde ta ultimo na Tanga-Rivu Dagun nga Pammaguray tapenu permanente nga madaral i kalabanna ira. (1 Cor. 15:25) Mabayag paga yatun, ngem makasiguradu tam nga sulit yatun nga paginnag.

18, 19. Anni i makoffun nittam tapenu mappasensia?

¹⁸ Yatutta, sigga-paran nakuan nga maginnag i kataggi-tadday nittam, nga mangipasingan tu mapasensia nga pagimamma. Ngem anni i makoffun nittam nga kuan yatun? Ipakimallo i espiritu ni Jehova. Daddamman, aspeto na masanto nga espiritu i pappasensia. (Efe. 3:16; 6:18; 1 Tes. 5:17-19) Makimemallo ka kani Jehova tapenu mapasensia nga makapagattam.

¹⁹ Anni i nakoffun kada Abraham, Jose, anni David tapenu mapasensia nga innaggan i ketuppal na promesa ira ni Jehova? I pangurugda kani Jehova anna pattaloda ta pakilallanna nira. Ariadda naffokus ta baggida laman anna ta pammakapianadda. Durante nga nononopattam nu anni i resulta natun nira, mapagaram tam gapa nga mappasensia.

20. Anni nakuan i determinasiottam?

²⁰ Maski nu meparubang ittam ta ziga-riga anna kapurueba ira, determinadu tam nga “mapasensia nga maginnag.” Kurug, nu mittan iyava-avu tam kani Jehova, “Kunnasi paga kabayag, O Jehova?” (Isa. 6:11) Ngem megafu ta makapasikan nga pakapangngua na masanto nga espiritu na Dios, determinadu i kada tadday nittam nga parigan i pakkagi ni Jeremias: “Si Jehova i billè, . . . Yatutta mapasensia nga maginnag ngà sa.”​—Sila. 3:21, 24.