1, 2. (a) Yumanyi yikutukojeja kwihula netu: “Kushika nimpinjinyi”? (b) Tunateli kukundejewa ñahi nayuma yeliliwu ambuña ashinshika akunyima?

ATUPROFWETU ashinshika Isaya niHabakuki enhwili ilu lwihu nawu: “Kumwakanyi?” (Isa. 6:11; Hab. 1:2) Mwanta Davidi niyena wehwili lwihu lwolumu kapampa kawana hampinji yasonekeliyi Masamu 13, nindi: “Nikumwaka wudihi?” (Mas. 13:1, 2) NiMwanta wetu Yesu Kristu wehwili ilu lwihu. Walwihwili hampinji yenjili nakumutobweshawu kudi antu abula chikuhwelelu. (Mat. 17:17) Chidi hohu chiwahi ninetu kwihula ilu lwihu mpinji yikwawu neyi tudi mukukala.

² Yumanyi yikutukojeja kwihula netu: “Kushika nimpinjinyi”? Hadaha anakutwila chatama. Indi kwiji tunakukabakana muloña wawushinakaji niyikatu hela kukala kutunakumona ‘mumpinji jakala.’ (2 Tim. 3:1) Hadaha tunakuneña nayilwilu yatama yawantu. Kudi yuma yayivulu yaleteshaña kwihula ilu lwihu. Hela chochu, twakundejewaña kwiluka netu ambuña aYehova ashinshika akunyima ehwili lwihu lwolumu. Ilaña ayizuwilili wanyi chehwiliwu.

3. Yumanyi yikutukwasha neyi tumona kukala?

 ³ Hanu dinu yumanyi yikutukwasha neyi tumona kukala kwamuchidiwu? Kambanji Yakoba, manakwaYesu amoneneni kusoneka nawu: “Diwunjikenuña kushika nimpinji yakwikalahu kwaMwanta.” (Yak. 5:7) Mwamweni, wejima wetu twatela kudiwunjika. Hanu dinu yumanyi yabombela mukwikala nanichi chilwilu chachiwahi?

4, 5. (a) Yumanyi yabombela mukudiwunjika? (b) Kambanji Yakoba walumbulula ñahi chumichi? (Talenu mwevulu wakutachikilahu.)

⁴ Bayibolu yatulejaña nawu kudiwunjika himukabu waspiritu yajila. Etu antu abula kuwanina hitukutwesha kudiwunjika chakubula wukwashu waNzambiku. Kudiwunjika hichawaana chatwinkayi Nzambi. Nawa hakwila nawu tumwekeshi netu twamukeña, twatela kudiwunjika. Kudiwunjika kwamwekeshaña cheñi nawu twakeña akwetu. Neyi tutwalekahu kubula kudiwunjika kukutukojeja kubula kukeña akwetu. Ilaña neyi tukwikala adiwunjika tukuyikeña. (1 Kor. 13:4; Ñal. 5:22) Mukudiwunjika mwabombela cheñi yilwilu yikwawu yawakwaKristu yalema. Chakutalilahu, mukudiwunjika mwabombela kuumika. Kuumika kwatukwashaña kushinda neyi tudi mukukala chakubula kutooba. (Kol. 1:11; Yak. 1:3, 4) Kudiwunjika kwakeñekaña cheñi kukabakana chakubula kwaboka nikwikala akola hela tukumona kukala kwasweja. Kubombelahu, Bayibolu yatulejaña kuhembelela mukudiwunjika. Kuhembelela kwamuchidiwu akushimuna haYakoba 5:7, 8. (Tañenu.)

⁵ Muloñadi chitwatelela kumuhembelela Yehova kumanisha kukala? Yakoba wesekejeli chihandilu chetu nachandimi. Ndimi wazataña nañovu kudima mbutu yindi. Ilaña watweshaña wanyi kuhimpa yilaaka hela kukulisha swayi mbutu yindi. Hakutwesha kwendesha mpinji kulonda yañuli swayiku. Weluka nindi watela kudiwunjika hampinji yinakuhembelelayi “nyikabu yayiwahi yahamaseki.” Ninetu kudi yuma yayivulu yitukukañanya kwila chitunakuhembelela mpinji yikashikijayi Yehova yikaninu yindi. (Maku 13:32, 33; Yil. 1:7) Twatela kuhembelela nikudiwunjika neyi chelañayi ndimi.

6. Yumanyi yitwatela kudizila kudi kaprofwetu Mika?

⁶ Nshakaminu yamakonu yidi neyi yamumafuku akaprofwetu Mika. Wadiñaku hampinji yayulileñayi mwanta watama Ahazi. Haniyi mpinji majika kanwa adiña kwejima. Antu adiña ankuluñaña ‘mukukoña yuma yatama.’ (Tañenu Mika 7:1-3.) Mika welukili nindi wukutwesha wanyi kufumishahu yuma yatama. Dichi wadi kwiladi? Wahosheli nindi: “Hakwila ami nukutala kudi Yehova; nukuchiñilila Nzambi yawamwinu wami. Nzambi yami wukutiya.” (Mika 7:7) Dichi ninetu twatela ‘kuchiñilila’ neyi cheliliyi Mika.

7. Yumanyi yitwatela kwila hampinji yitunakumuhembelela Yehova kushikija yikaninu yindi?

⁷ Neyi chikuhwelelu chetu chidi neyi chadiña naMika tukuhembelelaña tukufwilaña kuhembelela wukwashu waYehova. Etu tudi wanyi neyi kayili wunakuhembelela kumujaha. Yena anamukanjikiji kuhembelela nawa hanakukeña kutoñojoka yuma yikumumwekenaku. Etu tunambuki naniwu muntu. Etu tunakufwila kumuhembelela Yehova muloña tuneluki netu wukashikija chikaninu chindi chakutwinka wumi wahaya nyaaka hampinji yayiwahi nawa yatelela. Dichi, etu ‘twomikaña chikupu nakuwunda nimuzañalu.’ (Kol. 1:11, 12) Neyi tukuhembelela iku tunakutoba nikudiladila netu Yehova nalabi, Nzambi yetu wukutiya kutama.—Kol. 3:12.

8. Yumanyi yitwatela kwanuka hampinji yitunakutoñojoka chikupu hadi amayala nawambanda ashinshika?

⁸ Neyi twanuka amayala nawambanda ashinshika amuhembeleli Yehova kushikija yikaninu yindi, chikutukwasha ninetu kuhembelela. (Rom. 15:4) Chitukutoñojokaña hayakutalilahu yawu, twatela kwiluka kuleha kwampinji yahembeleleliwu, chuma chaletesheli ahembeleli ninkisu yafumini mukudiwunjika kwawu.

9, 10. Abarahama naSara amuhembeleleli Yehova kushika mpinjinyi?

⁹ Toñojokenu yuma yeliliwu aAbarahama naSara. Adi hakachi kawantu “akaswana yuma yakanawu muloña wachikuhwelelu nikudiwunjika kwawu.” Nsona yatulejaña nawu, “Abarahama chadiwunjikiliyi,” watambwilili ichi chikaninu chakaniniyi Yehova nindi wakamukiswila nikumuvulishila anyanindi. (Heb. 6:12, 15) Muloñadi Abarahama chateleleliyi kudiwunjika? Muloña hakwila nawu ichi chikaninu chishikijewi hateleleli kuhita mpinji. Chitiyañenu chakwatiliyi Yehova naAbarahama chatachikili kuzatika haNisani 14, 1943 B.C.E. Iyi yadiña mpinji yelili yena niSara niamwitala dawu azambuki Kaloña Yufurati nakwiñila Mwituña daChikaninu. Dichi, Abarahama wahembeleli hadi yaaka 25 hakwila nawu mwanindi Isaka yavwaliki mu 1918 B.C.E. Nawa wahembeleli cheñi yaaka 60 hakwila nawu ejikulwindi aEsawu naYakoba avwaliki mu 1858 B.C.E.—Heb. 11:9.

¹⁰ Ituña daswaniniyi Abarahama datoheli kushika hadi? Bayibolu yahosha nawu: “Hela chochu, yena [Yehova] hamwinkelihu [Abarahama] wuswana wudi wejima  mudina ituña hela hakudata mwendu windiku; ilaña wamukanini kumwinka dinu ituña kwikala dindi nawa neyi nafwi dehi, dikashali nawanyanindi, hela chakwila hanoyu mpinji hadiñahu namwanaku.” (Yilw. 7:5) Kufuma hazambukiliyi Abarahama kaloña Yufurati hahitili yaaka 430. Haniyi mpinji anyanindi adiloñesheli kwikala muza wakaswana ituña.—Kwid. 12:40-42; Ñal. 3:17.

11. Muloñadi Abarahama chahembeleliyi hadi Yehova, nawa yumanyi yakafumamu nachadiwunjikiliyi?

¹¹ Abarahama wahembeleleli muloña wadiwunjikili. Kudiwunjika kwindi kwashindameneni hakumukuhwelela Yehova. (Tañenu Aheberu 11:8-12.) Abarahama waneñeli wanyi hampinji yahembeleleñayi kushikijewa kwaniyi yikaninu hela chakwila wamweni kushikijewa kwantesha. Chakadi nikujina, Abarahama wakatiya kuwaha neyi anamusañuli dehi muparadisa hamaseki. Wakahayama hakwiluka nindi nsañu yayivulu yashimunawu muBayibolu yahosha hachihandilu chindi nichawanyanindi. * Watela wakatiya kuwaha hakwiluka nindi wazatili mudimu weneni hakushikija nkeñelu yaYehova kutalisha halubutu lwakaniniwu. Chakadi nikujina, wakeluka nindi welili chiwahi kuhembelela.

12, 13. Muloñadi Yosefu chakeñekeleñayi kudiwunjika, nawa chilwilwinyi chachiwahi chamwekesheliyi?

¹² Yosefu mwana kamwijikulu waAbarahama niyena wahembeleleli nakudiwunjika. Amwilili chatama. Chatachi, hadiñayi nayaaka 17 amanakwindi amulandishili nakwikala nduñu. Kuhiñahu amutwambilili nawu wakeñeleña kukaama ñoda mwanta windi chakukanjikija nawa chafuminimu amukamikili muyikuñu mukaleya. (Kutach. 39:11-20; Mas. 105:17, 18) Chidi neyi amubabesheli hamuloña wakashinshi kindi chatela amukiswili. Ilaña chimwahitili yaaka 13, yuma yejima yahimpikili mukunyakashana. Amufumishili mukaleya nakumwinka chifulu cheneni chakwikala wamuchiyedi kudi mwanta muEjipitu.—Kutach. 41:14, 37-43; Yil. 7:9, 10.

¹³ Komana Yosefu wahilili chamwililiwu chatama? Komana walekeli kumukuhwelela Nzambi yindi Yehova? Inehi. Chumanyi chamukwashili Yosefu kuhembelela mukudiwunjika? Muloña wamukuhweleleli Yehova. Wamweni chikasa chaYehova chichamukwashileña. Chumichi chamwekeni hampinji yalejeliyi amanakwindi nindi: “Bayi mutiyaña womaku, ochu ami yami Nzambi? Ilaña enu mwatoñojokeli kuñila chatama, hakwinza Nzambi watoñojokeli kwila chachiwahi, nindi ahandishi antu amavulu neyi chitunamoni lelu.” (Kutach. 50:19, 20) Nkumininaku Yosefu wamweni nindi welili chiwahi kuhembelela.

14, 15. (a) Chumanyi chinayitishi kuwaha kutalisha hakudiwunjika kwaDavidi? (b) Chumanyi chamukwashili Davidi kuhembelela mukudiwunjika?

¹⁴ Mwanta Davidi niyena amwilili chatama. Davidi amuwayishili kudi Yehova iku wuchidi kansi kulonda yakekali mwanta wawaIsarela. Wahembeleleli hadi yaaka 15 hakwila nawu yekali mwanta wamutaña wawu. (2 Sam. 2:3, 4) Hadiña nakuhembelelayi, mpinji yimu Mwanta Sawulu wabula kushinshika wakeñeleña kumujaha. * Dichi, Davidi watemukili. Wayili nakushakama mwituña dacheñi nawa mpinji yikwawu wakaamineña mumayeñu muyinkalampata. Nichelili Sawulu anamujahi dehi kunjita,  Davidi wahembeleleli yaaka 7 hakwila nawu yekali mwanta wamuza wawaIsarela.—2 Sam. 5:4, 5.

¹⁵ Muloñadi Davidi chahembeleleliyi mukudiwunjika? Ñakwilu wayishimwini mwisamu dodimu mwehwiliyi kapampa kawana nindi: “Nikumwaka wudihi?” Wahosheli nindi: “Ami kwami nakuhweleli luwi lweyi; muchima wami wakatiya kuwaha nawamwinu weyi. Nukumwimbila Yehova tumina, nanichi chinawani wuselewa kudi yena.” (Mas. 13:5, 6) Davidi wamukuhweleleli Yehova muloña waluwi lwindi. Wadiña nakuhembelela kumupulwisha nawa watoñojokeleña chamukwashiliwu kudi Yehova. Davidi wamweni nindi welili chiwahi kuhembelela.

16, 17. Yehova naYesu amwekesha ñahi muchima wakuhembelela?

¹⁶ Kutalisha kukudiwunjika, Yehova wakeñaña wanyi nindi twileña yuma yakwila yomweni hayilañaku. Yena wadiwunjika.(Tañenu 2 Petulu 3:9.) Yehova nahembeleli hadi yaaka yayivulu kulonda kukala kwamwekeni mwitempa daEdeni yakakwimanishi munjila yayiwahi. ‘Nakuchiñilila’ mpinji yakajilikawu chikupu ijina dindi. Nawa mwakafuma nkisu yasweja yikatambwilawu antu ejima ‘amuhembelelaña.’—Isa. 30:18

¹⁷ Yesu niyena wahembeleleli. Wadiña mukweseka hampinji yadiñayi hamaseki kushika nimpinji yahaniniyi mulambu windi wefutu danyiloña mu 33 C.E. Ilaña wahembeleli kushika mu 1914 hatachikiliyi kuyuula. (Yil 2:33-35; Heb. 10:12, 13) Wukuhembelela kushika nimpinji yakajilumunawu ayilumbu jindi ejima kumakumishilu akuyuula kwindi kwaYaaka Ikombakaji. (1 Kor. 15:25) Wukuhembelela hadi yaaka yayivulu, ilaña tunakuhweleli netu kuhembelela kwindi kwakuwahi.

18, 19. Yumanyi yikutukwasha kuhembelela nakudiwunjika?

¹⁸ Chakadi nikujina, wejima wetu hamuntu-hamuntu twatela kuhembelela nikumwekesha yilwilu yakudiwunjika. Hanu dinu yumanyi yikutukwasha kwila mwenimu? Kulomba spiritu yaNzambi. Ilukenu nenu kudiwunjika hichilwilu chamukaabu waspiritu. (Efwes. 3:16; 6:18; 1 Tes. 5:17-19) Lembenu kudi Yehova kulonda yayikwashi kuumika nakudiwunjika.

¹⁹ Anukenuña cheñi yuma yamukwashili Abarahama, Yosefu niDavidi kuhembelela mukudiwunjika kushikijewa kwayikaninu yaYehova. Amukuhweleleli Yehova nawa elukili nawu wukuyikwasha. Hiyadishindameneni hela kusha maana hayuma yakuditiyisha aweni kuwahaku. Kutoñojoka yuma yayiwahi yafuminimu chikutukwasha ninetu kwikala namuchima wakuhembelela.

20. Yumanyi yitwatela kwila hamuntu-hamuntu?

²⁰ Dichi, hela chakwila tudi mukweseka hela mukukala kwamuchidinyi, twatela kumwekesha muchima ‘wakuchiñilila.’ Mpinji yikwawu neyi tudi mukukala tunateli kuhosha netu, “nikumwaka wudihi, eyi Yehova?” (Isa. 6:11) Ilaña spiritu yajila yaNzambi yikutukwasha. Nawa twatela kumwimbujola Yeremiya wahosheli nindi: “Yehova diyi iseka dami, dichi chinukumukuhwelela.”—Mukeŋa 3:21, 24.