1, 2. 1) ¿Toni uelis kichiuas maj tiktajtanikan Jiova “hasta kemanian”? 2) ¿Keyej techyolchikaua tein kichiujkej itekitikauan Dios ne uejkauj?

“¿HASTA kemanian, Jiova?”. Nejin netajtanil kichiujkej ome itanauatijkauan Dios akin motokaytijkej Isaías uan Habacuc (Is. 6:11; Hab. 1:2). Tekiuaj David naujpa no tajtanik nejon itech Salmo 13 (Sal. 13:1, 2). Hasta Jesucristo no ijkon tajtanik keman kiitak ke tel miakej amo takuaujtamatiaj (Mat. 17:17). Yejua ika kemansa tejuan xa no titajtaniskej nejon.

² ¿Toni uelis kichiuas maj tiktajtanikan Jiova “hasta kemanian”? Xa aksa techchiuilij teisa tein amo kuali. Xa titajyouijtokej porin tixiuejkejya oso porin tikpiaj se kokolis. Xa semi timotekipachojtokej porin tinemij itech nejin tonalmej tein semi ouijkej (2 Tim. 3:1). Oso xa techtayokoltia tikitaskej ke akin amo kitekitiliaj Jiova amo kuali monejnemiltiaj. Maski ijkon, techyolchikaua tikmatiskej ke itekitikauan Dios ne uejkauj kiluijkej keniuj momachiliayaj, uan yejuatsin amo kinajuak.

3. ¿Toni uelis techpaleuis keman tikpanouaj se ouijkayot?

³ ¿Toni uelis techpaleuis keman tikpanouaj ouijkayomej? Santiago, itakpaikniuj Jesús, ika inepaleuil Dios tayolmajxitij: “Xiyolikachiakan ne tonal keman moualuikas in Totekotsin” (Sant. 5:7). Kemaj, tinochin moneki amo tiyolijsiuiskej oso  timochiaskej. Sayoj ke ¿toni kijtosneki amo se yolijsiuis? Uan ¿keniuj uelis tiknextiskej nejin kualneskayot?

4, 5. 1) ¿Toni kijtosneki amo se yolijsiuis, uan keniuj tiknextiaj? 2) ¿Keniuj Santiago kineskayotij maj amo se yolijsiui? (Xikonita taixkopin ipeujyan tamachtilis.)

⁴ Biblia kinextia ke amo se yolijsiuis yejua se kualneskayot tein tiknextiaj keman Dios techmaka iyektikatsin espíritu. Komo amo tikpiaj inepaleuil Dios, tinochin semi techouijmaka amo tiyolijsiuiskej itech uejueyi ouijkayomej. Nejin kualneskayot se inetetayokolil Dios, uan se taman tein motelneki tein ika tiknextiaj ke tiktasojtaj Jiova uan taltikpakneminij. Keman amo ueli timochiaj oso tiyolijsiuij, kaxani netasojtalis tein timopialiaj iniuan oksekin (1 Cor. 13:4; Gál. 5:22). Amo se yolijsiuis mouika ika okseki kualneskayomej tein motelnekij. Kemej neskayot, kijtosneki se kixikos uejueyi ouijkayomej ika se kuali tanemilil (Col. 1:11; Sant. 1:3, 4). No techpaleuia maj amo tikauakan Jiova itech tein yeski ouijkayot uan maj amo timomakepakan keman titajyouiskej. Uan no, Biblia kijtoua ke moneki tiknekiskej tikajsikamatiskej ke moneki timochiaskej. Nejin se taman tein motelneki tein techmachtia Santiago 5:7, 8 (xikonixtajtolti).

⁵ ¿Keyej moneki tikajsikamatiskej ke moneki timochiaskej hasta maj Jiova kichiua tein motenkaujtok? Santiago kijtoj ke tein techpanoua tamati kemej tein kipanoua se milajtekitikej. Maski tatoka, amo ueli kichiua maj kioui nion maj moskalti tein kitokak. Amo no ueli kichiua maj tonalmej okachi ijsiujka panokan. Yejua ika kiajsikamati ke moneki mochias ika nejmachkayot maj motemaka “tasojtakilot”. No ijkon, onkak miak taman tein amo ueli tikijsiuiltiaj, yejua ika tikchixtokej maj Jiova kichiua tein motenkaujtok (Mar. 13:32, 33; Hech. 1:7). Kemej milajtekitikej, moneki timochiaskej ika nejmachkayot.

6. ¿Toni techmachtia tein kichiuak tanauatijkej Miqueas?

⁶ Tein tikpanotokej tamati kemej tein kipanok tanauatijkej Miqueas. Yejua nemik itech itonaluan tekiuaj Acaz, akin tel amo yolkuali katka. Ijkuak, mochiuaya nochi taman teikamauiltilis uan taltikpakneminij “tel kuali kimati[aj] kichiuaskej tein amo kuali” (xikonixtajtolti Miqueas 7:1-3). Kemej kimatia ke amo uelia kipataya tein mochiujtoya, kijtoj: “Nejua niksentokas nitachixtos itech Jiova. Niknextis ke niksentoka nikchia Dios akin nechmakixtia. NoDios nechkakis” (Miq. 7:7). Miqueas mochiak ika nejmachkayot, uan tejuan no moneki ijkon tikchiuaskej.

7. ¿Keyej moneki tiknekiskej tikchiaskej maj Jiova kichiua tein motenkaujtok?

⁷ Komo titakuaujtamatij kemej Miqueas, tiknekiskej tikchiaskej maj Jiova kichiua tein motenkaujtok. ¿Keyej? Maj titanemilikan itech se takat akin tsaktok uan kichixtok maj ajsi tonal keman kiixtalijkej kimiktiskej. Yejua mochia maski amo kineki maj ajsi nejon tonal. Tein techpanotok semi taman. Kemej tikmatij ke Jiova techmakas nemilis nochipaya ijkon kemej motenkaujtok uan ke kichiuas keman okachi kuali yeski, tikchiaj ika miak pakilis maj ajsi nejon tonal. Tikchiuaj kemej kijtoua nejin tayolmajxitilis: “[Xikxikokan] ika ueyi pakilis nochi tataman tajyouilis” (Col. 1:11, 12). Jiova semi amo kiyolpaktiskia maj tiktauelchiakan uan maj timokuejmolokan porin tiknemiliaj ke moteluejkaujtok (Col. 3:12).

8. Keman timomachtijtoskej tein kichiujkej itekitikauan Dios ne uejkauj, ¿toni moneki tikitaskej?

⁸ ¿Toni techpaleuis maj tiksentokakan timochiakan?  Komo tikitaj tein kichiujkej itekitikauan Dios ne uejkauj akin kichixkej ika nejmachkayot maj ytsin kichiuani tein motenkaujka (Rom. 15:4). Keman timomachtijtoskej, maj tikitakan kanachi xiujmej monekik mochiaskej, keyej kiixtalijkej mochiaskej uan toni tatiochiualismej kiselijkej porin mochixkej.

9, 10. ¿Kanachi xiujmej monekik mochiaskej Abrahán uan Sara hasta keman Jiova kichiuak seki taman tein motenkaujka?

⁹ Maj ininka tipeuakan Abrahán uan Sara. Kemej ‘takuaujtamattinenkej uan kiyolikaxikojtinenkej’ miak taman, Jiova kintatiochiuij. Biblia kijtoua ke satepan ke Abrahán “kiyolikachixtoya ne tatiochiualisme”, Jiova motenkauak ke kitatiochiuiskia uan kinmiakiltiskia ikoneuan (Heb. 6:12, 15). Uan no, tein Jiova motenkaujka mochiuaskia miak xiujmej satepan. Yejua ika Abrahán monekia kisentokas mochias. Tein Jiova motenkauak iuan Abrahán peuak mochiua itech tonal 14 metsti nisán xiuit 1943 achto itech totonaluan. Itech nejon tonal, Abrahán, Sara uan akin iniuan nemiaj kipanauijkej ueyiat Éufrates uan kalakkej itech Tal tein Dios motenkaujka kinmakas. Sayoj ke Abrahán monekik mochiasok veinticinco xiujmej hasta keman yolik ikonetsin, Isaac, itech xiuit 1918. Uan ompa monekik mochias okseki sesenta xiujmej hasta keman yolkej iixuiuan, Esaú uan Jacob, itech xiuit 1858 (Heb. 11:9).

¹⁰ ¿Kiselij Abrahán seki talmej tein pouiaj itech Tal tein Dios motenkaujka kimakas? Biblia kijtoua ke Jiova “amo kikauilij Abraham ma nikan kipia talme, uan amo no ma kipiani kan mometstalis. Pero Totajtsin Dios, kema, moyektenkauak iuan in  Abraham ke se tonal kimaktilis nijin tal. Uan no Totajtsin Dios moyektenkauak ke kinmaktilis nijin tal ikoneuan de Abraham satepan kuak mikis ya yejua, maski tech nojon tonalme Abraham ayamo kipiaya koneme” (Hech. 7:5). Satepan ke Abrahán kipanauij ueyiat Éufrates, panokej cuatrocientos treinta xiujmej hasta keman ikoneuan mopoujkej kemej altepet tein moajsiskia itech nejon tal (Éx. 12:40-42; Gál. 3:17).

11. 1) ¿Keyej mochiak Abrahán ika miak pakilis? 2) ¿Toni tatiochiualismej kiselis Abrahán porin mochiak?

¹¹ Abrahán amo kiitak keniuj mochiuak nochi tein Dios motenkaujka iuan, sayoj ke mochiak ika nejmachkayot porin takuaujtamatia iuan (xikonixtajtolti Hebreos 11:8-12). ¿Tiknemiliaj keniuj semi yolpakis keman moajokuis itech Xochital? Kimoujkaitas keniuj Biblia ika tajtoua yejua uan ikoneuan. * No semi yolpakis keman kiajsikamatis ke itechkopa mochiuak tein Jiova kiixtalijtoya ika Mesías. Tein melauj, kiitas ke maski uejkauak mochiak, amo nenkajtik.

12, 13. 1) ¿Keyej José monekik mochias ika nejmachkayot? 2) ¿Keniuj kiitaya tein kipanok?

¹² José, se iixuiuj ikoneuj Abrahán no mochiak ika nejmachkayot. Yejua semi ika mauiltijkej. Yekinika, kinamakakej kemej takeual keman kipiaya kemej 17 xiujmej. Satepan, kipantijkej ke kinekia ika mauiltis inamik iteko. Yejua ika kitsakkej, maski nejon amo melauak katka (Gén. 39:11-20; Sal. 105:17, 18). Maski nochipa kitakamatia Dios, nesia ke sayoj tajyouiaya uan amo kiseliaya tatiochiualismej. Sayoj ke trece xiujmej satepan nochi ijsiujka mopatak. José kikixtijkej kampa tsaktoya uan mochiuak ojpatika takat okachi ueyichiujkej ompa Egipto (Gén. 41:14, 37-43; Hech. 7:9, 10).

¹³ ¿Tauelmiktinemia José porin kitajyouiltijkej? ¿Kipoloj itakuaujtamatilis iuan iDios, Jiova? Amo. José mochiak ika nejmachkayot. ¿Toni kipaleuij? Yejua takuaujtamatik iuan Jiova. Kiajsikamatik ke yejuatsin uelia kipataya tein monekiskia. Yejua ika, kiniluij iikniuan: “Amo ximouikan. ¿Uelis nejua nikixpatas Dios? Maski namejuan nankinemilijtoyaj nanechijtakoskej, Dios kiixtalij kichiuas tein kuali uan kinmakixtis miakej taltikpakneminij, kemej kichiujtok axkan” (Gén. 50:19, 20). José kiitak ke amo nenkajtik nochi xiujmej tein mochiak.

14, 15. 1) ¿Keyej tikmoujkaitaj maj David mochiani ika nejmachkayot? 2) ¿Toni kipaleuij David maj mochiani ika nejmachkayot?

¹⁴ Tekiuaj David no miakpa ika mauiltijkej. Jiova kiixpejpenak keman katka telpoch maj yeskia tekiuaj ompa Israel. Sayoj ke monekik mochias kemej quince xiujmej hasta keman mochiuak tekiuaj itech kalyetouanij kampa pouia (2 Sam. 2:3, 4). Itech seki nejon xiujmej, monekik kicholuijtinemis tekiuaj Saúl, porin kinekia kimiktis. * Yejua ika, David kemansa monekik yas nemitiuj itech okse altepet oso itech ostokmej tein onkayaj taluakyan. Satepan, Saúl mikik itech se neteuilis. Maski ijkon, David monekik mochiasok kemej chikome xiuit hasta keman mochiuak tekiuaj itech nochi Israel (2 Sam. 5:4, 5).

¹⁵ ¿Keyej David mochiak ika nejmachkayot? Yejua kitemakak tanankilil itech Salmo 13, kampa naujpa kitajtanij Jiova hasta kemanian tamiskiaj ikuejmoluan. Kijtoj: “Nitakuaujtamati itech monetasojtalis tein amo tekaua; noyolo pakis itech motachiualisuan  tein ika titemakixtia. Nimokuikatis iixpan Jiova, porin yejuatsin semi ueyi taxtauil nechmakani” (Sal. 13:5, 6). David kimatia ke Jiova kitasojtaya uan ke amo keman kikauaskia. Kinemiliaya keniuj Jiova kipaleuijka achto uan kichiaya tonal keman yejuatsin kitamiskia ikuejmoluan. David kimatia ke amo nenkaj mochiaskia.

16, 17. ¿Keniuj kinextianij Jiova uan Jesús ke mochiaj ika nejmachkayot?

¹⁶ Keman Jiova technauatia maj timochiakan ika nejmachkayot, amo kichia maj tikchiuakan teisa tein yejuatsin amo kichiua. Tein melauj, yejuatsin techkauilia okachi kuali neskayot tein kinextia ke moneki timochiaskej (xikonixtajtolti 2 Pedro 3:9). Kemej neskayot, miles xiujmejya Satanás kiteajsikamatiltij itech xochital tein moajsia Edén ke Jiova amo kuali taixyekana. Jiova kichixtok ika nejmachkayot maj ajsi tonal keman itokay senkis moueyitalis. Nejon kinualkuilis tel miak tatiochiualismej “nochin akin kisentokaj itech mochiaj” (Is. 30:18).

¹⁷ Jesús no mochiani ika nejmachkayot. Keman yetoya nikan taltikpak, amo keman kikauak Dios. Itech xiuit 33, ne iluikak kimaktilij Jiova ipatiuj tein kipiak imikilis. Sayoj ke monekik mochias hasta xiuit 1914 keman peuak tekiuajti (Hech. 2:33-35; Heb. 10:12, 13). Uan monekis kisentokas mochias hasta maj tami iTekiuajyo tein uejkauas Mil Xiujmej keman nochin akin kiixnamikij senkis ixpoliuiskej (1 Cor. 15:25). Moneki uejkaua mochias, sayoj ke tikyekmatij ke amo nenkaj yeski.

18, 19. ¿Toni techpaleuis maj tiknekikan timochiaskej ika nejmachkayot?

¹⁸ Tinochin moneki tiknekiskej timochiaskej ika nejmachkayot. ¿Toni techpaleuis? Maj tiktataujtikan Dios maj techmaka iespíritu. Maj tikelnamikikan ke yektikatsin espíritu techpaleuia maj amo tiyolijsiuikan (Efes. 3:16; 6:18; 1 Tes. 5:17-19). Yejua ika moneki tiktataujtiskej Jiova maj techpaleui maj titaxikokan ika nejmachkayot.

¹⁹ Maj no tikelnamikikan ke kemej Abrahán, José uan David takuaujtamatiaj iuan Jiova, nejon kinpaleuij maj mochianij ika nejmachkayot maj kichiuani tein motenkaujka. Amo sayoj inintech tanemilijkej nion kitayekanaltijkej tein yejuan kinekiaj. Komo titanemiliaj itech tatiochiualismej tein kiselijkej techyolchikauas maj timochiakan ika nejmachkayot.

20. ¿Toni moneki tikixtalijtoskej?

²⁰ Maski tikpanoskej uejueyi ouijkayomej, moneki tikixtalijtoskej timochiaskej ika nejmachkayot. Sayoj ke, kemansa xa titajtaniskej: “¿Hasta kemanian, Jiova?” (Is. 6:11). Sayoj ke, ika inepaleuil yektikatsin espíritu uelis tikijtoskej kemej Jeremías: “Niknextis ke niksentoka nikchia” (Lam. 3:21, 24).