1, 2. (a) San kan meki taki wi e aksi Yehovah „o langa” wi musu wakti ete? (b) Fu san ede den eksempre fu owruten futuboi kan de wan deki-ati gi wi?

„O LANGA?” Na a sani disi den profeiti Yesaya nanga Habakuk ben aksi (Yes. 6:11; Hab. 1:2). Di Kownu David ben skrifi Psalm 13, dan a aksi Yehovah a srefi sani dati feifi leisi tu (Ps. 13:1, 2). Srefi wi Masra Yesus Krestes ben aksi a sani dati di a kon si taki den sma na en lontu no ben abi bribi kwetikweti (Mat. 17:17). Dati meki a no musu fruwondru wi efu son leisi wi e aksi Gado o langa a o teki fosi a du wan sani.

² San kan meki taki wi e aksi Yehovah o langa wi musu wakti fosi a du wan sani? Kande sma du wan ogri nanga wi. Noso kande wi owru noso wi e siki. Kande a hebi gi wi fu horidoro na ini a „muilek ten” disi di „tranga fu pasa” (2 Tim. 3:1). Noso kande den takru sani di sma na wi lontu e du e meki wi firi brokosaka. Awansi fa a no fa, a e gi wi deki-ati trutru fu sabi taki Yehovah no ben krutu den owruten futuboi fu en di ben aksi en o langa den ben abi fu wakti.

3. San kan yepi wi te wi e feni wisrefi na ini muilek situwâsi?

 ³ Ma san kan yepi wi te wi e feni wisrefi na ini den muilek situwâsi dati? Santa yeye ben meki a disipel Yakobus, na afu-brada fu Yesus, skrifi: „Brada, abi pasensi teleki Masra kon” (Yak. 5:7). Iya, wi alamala musu abi pasensi. Ma san a wani taki fu abi a moi fasi disi?

4, 5. (a) San a wani taki fu abi pasensi? (b) Fa a disipel Yakobus e sori wi san a wani taki fu abi pasensi? (Luku a prenki na a bigin fu na artikel.)

⁴ Soleki fa Bijbel e sori, dan pasensi na wan fasi di santa yeye e meki sma kisi. Sondro a yepi fu Gado, sondu libisma no man hori pasensi na ini muilek situwâsi. Pasensi na wan sani di Gado e gi wi èn te wi abi a fasi disi, dan wi e sori taki wi lobi en. Te wi abi pasensi, dan wi e sori tu taki wi lobi trawan. Efu wi no e leri fu abi pasensi, dan a no o makriki gi wi fu sori lobi gi trawan (1 Kor. 13:4; Gal. 5:22). San a wani taki fu abi pasensi? We, te wi abi pasensi, dan dati o yepi wi fu horidoro te problema e miti wi sondro taki wi e lasi prisiri (Kol. 1:11; Yak. 1:3, 4). Wan sma di abi pasensi man nyan pina sondro taki a e pai ogri nanga ogri èn a e tan tanapu kánkan awansi san e pasa. Boiti dati, Bijbel e gi wi deki-ati fu de klariklari fu wakti. Na dati wi e leisi na Yakobus 5:7, 8. (Leisi en.)

⁵ Fu san ede wi musu de klariklari fu wakti Yehovah? Yakobus ben agersi a situwâsi fu wi nanga a di fu wan gronman. Aladi wan gronman e wroko tranga fu prani sani, toku a no man meki alen fadon èn a no man meki den sani gro. A no man meki a ten go moro esi. A e frustan taki a musu wakti nanga pasensi tapu „a bun nyanyan di a gron e gi”. Na so a de tu taki furu sani de di wi no man du fu meki sani go moro esi, aladi wi e wakti a ten te den pramisi fu Yehovah o kon tru (Mark. 13:32, 33; Tori 1:7). Neleki a gronman, wi musu wakti nanga pasensi.

6. San wi kan leri fu a profeiti Mika?

⁶ Den sani di e pasa na ini a ten disi, na den srefi sortu sani di ben e pasa na ini a ten fu a profeiti Mika. A profeiti disi ben e libi na a ten di na ogri Kownu Akas ben e tiri. Na a ten dati sma ben e du wan lo kruktudu. Fu taki en leti, a pipel ben ’sabi fa fu du ogri’. (Leisi Mika 7:1-3.) Mika ben frustan taki ensrefi no ben o man kenki a situwâsi dati. Sobun, san a ben kan du? A taki: „Mi dati o wakti Yehovah. Nanga pasensi mi o wakti mi Gado di o frulusu mi. Mi Gado o yere mi” (Mika 7:7). Neleki Mika, wi musu abi „pasensi” tu.

7. Fu san ede moro de fanowdu leki fu tan wakti nomo teleki Yehovah du san a pramisi?

⁷ Efu wi abi bribi neleki Mika, dan wi o de klariklari fu wakti Yehovah. A situwâsi fu wi no de leki a di fu wan strafuman di e wakti fu kisi dedestrafu. A musu wakti, ma a no e wakti nanga prisiri. Ma sani de heri tra fasi gi wi. Wi de klariklari fu wakti Yehovah fu di wi sabi taki a o gi wi têgo libi na a yoisti ten! Dati meki wi e „horidoro nanga pasensi èn nanga prisiri awinsi san e pasa” (Kol. 1:11, 12). Ma efu wi ben o wakti aladi wi e krutukrutu taki Yehovah e teki tumusi langa, dan Gado no ben o feni dati bun.​—Kol. 3:12.

8. San wi musu hori na prakseri te wi e luku den eksempre fu man nanga uma fu owruten?

⁸ A o moro makriki gi wi fu wakti te wi e prakseri man nanga uma fu owruten di ben e wakti nanga pasensi teleki Yehovah du san a pramisi (Rom. 15:4). Te wi e luku den eksempre fu den sma disi, dan a bun taki wi hori na prakseri o langa den sma disi ben wakti, fu san ede den ben de klariklari fu wakti èn sortu blesi den kisi fu di den ben abi pasensi.

9, 10. O langa Abraham nanga Sara ben musu wakti tapu Yehovah?

⁹ Luku na eksempre fu Abraham nanga Sara. Den ben de tu fu den sma „di kisi den sani di Gado pramisi den, fu di den ben abi bribi èn fu di den ben abi pasensi”. Bijbel e taki dati „baka di Abraham hori pasensi” Yehovah pramisi en taki a ben o blesi en èn taki a ben o meki a kisi bun furu bakapikin (Hebr. 6:12, 15). A ben o teki ten fosi Yehovah du san a pramisi Abraham. Sobun, Abraham ben abi fu wakti baka. A frubontu di Yehovah ben meki nanga Abraham bigin wroko tapu 14 Nisan 1943 Fosi Krestes. Na a dei dati Abraham, Sara, nanga na osofamiri fu den abra Eufraat-liba fu go na ini a Pramisi Kondre. Baka dati, Abraham ben musu wakti 25 yari fosi en manpikin Isak gebore na ini 1918 Fosi Krestes. Èn a ben musu wakti ete 60 yari fosi den granpikin fu en, Esau nanga Yakob, gebore na ini 1858 Fosi Krestes.​—Hebr. 11:9.

 ¹⁰ Abraham ben kisi wan pisi fu a kondre leki gudu? Bijbel e taki: „Toku Gado no ben gi en [Abraham] nowan enkri pisi fu a kondre disi, nôno, a no gi en wan pikin pisi srefi. Ma a pramisi en taki a ben o gi en nanga den bakapikin fu en a kondre disi, aladi a no ben abi pikin ete” (Tori 7:5). Baka di Abraham abra Eufraat-liba, dan 430 yari pasa fosi den bakapikin fu en tron wan pipel di teki a kondre abra.​—Eks. 12:40-42; Gal. 3:17.

11. Fu san ede Abraham ben de klariklari fu wakti Yehovah èn sortu blesi a o kisi fu di a ben abi pasensi?

¹¹ Abraham ben de klariklari fu wakti fu di a ben e bribi na ini Yehovah. (Leisi Hebrewsma 11:8-12.) Abraham ben wakti nanga prisiri aladi den sani di Gado ben pramisi en no kon tru na ini a ten di a ben de na libi. Ma prakseri fa Abraham o breiti te a kisi wan opobaka te grontapu tron wan paradijs. A o fruwondru fu si taki a tori fu en nanga en famiri skrifi na ini furu pisi fu Bijbel. * Prakseri fa a o breiti te a kon sabi fu a fosi leisi fa Yehovah gebroiki en fu meki a wani fu en kon tru! A no de fu taki dati a no o denki taki na fu soso a wakti so langa.

12, 13. Fu san ede Yosef ben musu abi pasensi èn fa a sori taki a ben e si sani na wan yoisti fasi?

¹² Abraham en granpikin Yosef ben de klariklari tu fu wakti. Sma ben du wan tu seryusu ogri nanga en. Na a fosi presi, den brada fu en seri en leki srafu di a ben abi 17 yari nomo. Baka dati, sma lei gi en taki a pruberi fu abi seks nanga a wefi fu en basi. Na so a doro na strafu-oso (Gen. 39:11-20; Ps. 105:17, 18). Aladi a ben e tan du san bun, toku a ben gersi leki a ben kisi strafu na presi fu blesi. Ma baka 13 yari, ala sani kenki wantronso. Yosef komoto na strafu-oso èn a tron a di fu tu tiriman fu Egepte.​—Gen. 41:14, 37-43; Tori 7:9, 10.

¹³ Yosef ben kisi bita-ati, fu di sma ben du den ogri disi nanga en? A lasi frutrow na ini Yehovah, a Gado fu en? Nôno. San yepi Yosef fu wakti nanga pasensi? Na a bribi di a ben abi na ini Yehovah. A ben si fa Yehovah ben e tiri sani. Wi kan si dati te wi e luku san a taigi den brada fu en: „No frede. Mi na Gado? Aladi unu ben wani du mi ogri, toku Gado ben wani taki na ogri disi tron wan bun èn a ben wani hori furu sma na libi, soleki fa a e du tide” (Gen. 50:19, 20). Te fu kaba, Yosef kon si taki a no ben wakti fu soso.

14, 15. (a) San wi e leri fu a pasensi fu David? (b) San yepi David fu wakti nanga pasensi?

¹⁴ Sma ben du furu ogri tu nanga Kownu David. Aladi Yehovah ben salfu David leki kownu fu Israel di a ben yongu ete, toku a ben musu wakti sowan 15 yari fosi a tron kownu fu en eigi lo (2 Sam. 2:3, 4). Na a ten dati, Kownu Saul di ben drai baka gi Yehovah, bigin frufolgu David èn a ben wani kiri en. * A sani dati meki taki David ben musu libi leki wan loweman. Son leisi a ben e tan na ini wan tra kondre èn tra leisi baka a ben e tan na ini bergi-olo na ini  a sabana. Te fu kaba Saul dede na ini wan feti. Ma toku David ben musu wakti sowan seibi yari fosi a tron kownu fu a heri pipel Israel.​—2 Sam. 5:4, 5.

¹⁵ Fu san ede David ben de klariklari fu wakti? A e gi wi a piki na ini a srefi psalm pe a aksi Yehovah feifi leisi o langa a musu wakti ete. Luku san a e taki: „Mi sabi taki yu o sori mi bun-ati. Meki mi ati prisiri, fu di yu frulusu mi. Mi o singi gi Yehovah, fu di a blesi mi” (Ps. 13:5, 6). David ben abi a frutrow taki Yehovah ben o tan sori lobi gi en. A ben e wakti nanga prisiri teleki a ben o kisi frulusu èn a ben e prakseri fa Yehovah ben blesi en kaba. Iya, David ben e bribi taki a no ben o wakti fu soso.

16, 17. Fa Yehovah Gado nanga Yesus Krestes sori taki den ben de klariklari fu wakti?

¹⁶ Yehovah no e fruwakti taki wi e du wan sani di en srefi no ben o wani du. Dati meki te a abi fu du nanga pasensi, Yehovah na a moro bun eksempre. (Leisi 2 Petrus 3:9.) Dusundusun yari kaba Yehovah e wakti nanga pasensi so taki den aksi di ben opo kon na ini a dyari fu Eden kan kisi piki krinkrin. A e „tan wakti” a ten te a nen fu en o kon santa dorodoro. A sani disi o tyari bigi blesi kon gi den wan di e „tan wakti en”.​—Yes. 30:18.

¹⁷ Yesus ben de klariklari tu fu wakti. Di a ben de na grontapu, dan a tan gi yesi na Gado te na dede. Na ini a yari 33, a gi Yehovah a waarde fu a frulusu-ofrandi, ma a ben musu wakti teleki 1914, fosi a bigin tiri leki kownu (Tori 2:33-35; Hebr. 10:12, 13). Toku Yesus o abi fu wakti teleki a kaba fu a Dusun Yari Tiri, fosi ala den feanti fu en kisi pori dorodoro (1 Kor. 15:25). Dati na wan langa pisi ten fu wakti. Ma wi kan de seiker taki a no o wakti fu soso.

18, 19. San o yepi wi fu tan wakti nanga pasensi?

¹⁸ A no de fu taki dati ibriwan fu wi musu de klariklari fu wakti èn fu hori pasensi. Ma san o yepi wi fu du disi? Wi musu begi fu kisi a yeye fu Gado. Hori na prakseri taki pasensi na wan fu den fasi di a yeye e meki sma kisi (Ef. 3:16; 6:18; 1 Tes. 5:17-19). Begi Gado fu yepi yu fu tan wakti nanga pasensi.

¹⁹ No frigiti tu san yepi Abraham, Yosef, nanga David fu wakti nanga pasensi teleki den pramisi fu Yehovah kon tru. Na fu di den ben e bribi na ini Yehovah èn fu di den ben e frutrow na en tapu. Den no ben e denki densrefi nomo. Te wi e prakseri den blesi di den kisi, dan dati e gi wi deki-ati tu fu tan wakti Gado.

20. San wi musu de klariklari fu du?

²⁰ Sobun, awansi wi e kisi fu du nanga tesi, wi musu de klariklari fu „wakti” Yehovah. Iya, kande wi e bari son leisi: „Yehovah, o langa disi o tan so?” (Yes. 6:11) Ma nanga yepi fu a krakti di wi e kisi fu a yeye fu Gado, wi kan taki a srefi sani disi di a profeiti Yeremia ben taki: „Yehovah na a gudu di mi musu kisi. Dati meki mi o wakti en.”​—Sari 3:21, 24.