1, 2. (a) Tanbasá mak ita husu: “Toʼo bainhira”? (b) Tanbasá mak la sala atu husu pergunta hanesan neʼe?

“TOʼO bainhira?” Neʼe mak pergunta neʼebé profeta Isaías no Habacuc husu. (Isaías [Yesaya] 6:11; Habacuque [Habakuk] 1:2) Iha tempu Liurai David hakerek Salmo 13, nia mós husu pergunta neʼebé hanesan ba dala haat. (Salmo [Mazmur] 13:1, 2) No bainhira ema sira neʼebé fiar-laek hobur Jesus Kristu, nia husu: “Tempu hira tan?” (Mateus 17:17) Ohin loron, karik ita mós husu pergunta hanesan neʼe.

² Tanbasá ita husu: “Toʼo bainhira?” Karik tanba hasoru situasaun la justisa ruma. Ka tanba ita moras ka idade aumenta. Ka karik estrese neʼebé ita hasoru tanba moris ho “problema barak neʼebé susar atu tahan”. (2 Timóteo 3:1) Ka karik tanba ema nia hahalok ladiʼak neʼebé halo ita sente kole no laran-tun. Maski iha razaun oioin neʼebé book ita atu husu pergunta neʼe, maibé diʼak atu hatene katak Jeová la hirus bainhira ninia atan sira husu pergunta hanesan neʼe.

3. Saida mak bele ajuda ita bainhira ita hasoru situasaun neʼebé susar?

³ Saida mak bele ajuda ita bainhira ita hasoru situasaun  neʼebé susar atu tahan? Espíritu santu leno dixípulu Tiago hodi dehan: “Maun-alin sira, hatudu pasiénsia bá toʼo tempu neʼebé Naʼi toʼo ona mai.” (Tiago 5:7) Tan neʼe, ita hotu presiza pasiénsia. Maibé, saida mak pasiénsia no oinsá mak ita bele hatudu pasiénsia?

4, 5. (a) Pasiénsia envolve saida deʼit? (b) Oinsá mak Tiago esplika kona-ba pasiénsia? (Haree dezeñu iha pájina 3.)

⁴ Bíblia hatudu katak hahalok pasiénsia mai husi Maromak nia espíritu santu. Tan neʼe mak se la liuhusi Maromak nia ajuda, difisil ba ita ema la perfeitu atu hatudu pasiénsia iha situasaun neʼebé susar. Pasiénsia mak prezente ida husi Maromak, no ita bele hatudu ita-nia domin ba Jeová no ba ema seluk liuhusi hatudu pasiénsia. Se ita mak la iha pasiénsia, neʼe sei halo fraku ita-nia domin ba ema seluk. (1 Korinto 13:4; Galásia 5:22) Pasiénsia envolve saida deʼit? Pasiénsia envolve tahan iha situasaun neʼebé susar no hatudu nafatin hahalok diʼak. (Koloso 1:11; Tiago 1:3, 4) Pasiénsia mós bele ajuda ita hatudu laran-metin ba Jeová maski hasoru daudauk problema oioin. Pasiénsia bele ajuda ita atu la selu aat ba ema. Bíblia hatete katak ita tenke iha pasiénsia atu hein. Tuir Tiago 5:7, 8, pasiénsia mak hahalok neʼebé importante tebes. (Lee.)

⁵ Tanbasá mak ita hakarak hein ba Jeová? Tiago kompara ita-nia situasaun hanesan ho toʼos-naʼin. Maski toʼos-naʼin serbisu makaʼas atu kuda fini, maibé nia la iha kbiit atu kontrola klima ka atu halo fini sira moris lalais. Nia mós la iha kbiit atu kontrola tempu. Nia presiza hein deʼit ho pasiénsia toʼo “rai fó fuan neʼebé folin boot”. Hanesan neʼe mós ho ita. Iha buat barak mak ita la iha kbiit atu kontrola nuʼudar ita hein ba Jeová atu halo ninia hakarak sira hodi sai loos. (Marcos 13:32, 33; Apóstolu 1:7) Ita hanesan toʼos-naʼin neʼebé presiza hein deʼit ho pasiénsia.

6. Ita bele aprende saida husi profeta Miquéias?

⁶ Profeta Miquéias mós presiza tahan hasoru situasaun susar hanesan ita ohin loron. Nia moris iha Liurai Akabe nia ukun. Akabe mak liurai neʼebé aat tebes. Tan neʼe mak iha tempu neʼebá, rai tomak nakonu ho korrupsaun. Situasaun sai aat tebes toʼo Bíblia hatete katak ema hotu “prontu atu halo buat neʼebé aat”. (Lee Miquéias [Mikha] 7:1-3. *) Miquéias rekoñese katak nia la iha kbiit atu troka situasaun neʼe. Entaun, nia halo saida? Nia dehan: “Kona-ba haʼu, haʼu sei kontinua hein ba Jeová. Haʼu sei hein ho pasiénsia ba Maromak neʼebé salva haʼu. Haʼu-nia Maromak sei rona haʼu.” (Miquéias [Mikha] 7:7) Hanesan Miquéias, ita mós presiza “hein ho pasiénsia”.

7. Tanbasá mak ita kontente hein ho laran?

⁷ Se ita mak iha fiar hanesan Miquéias, ita sei kontente atu hein ho laran ba Jeová. Ita-nia situasaun la hanesan ho dadur neʼebé hein deʼit iha kadeia toʼo simu kastigu mate, tanba situasaun mak obriga nia atu hein no nia lakohi haree ba loron kastigu neʼe atu toʼo mai. Ita-nia situasaun la hanesan neʼe! Ita kontente hein ho laran ba Jeová tanba ita hatene katak iha tempu neʼebé nia deside ona, nia sei kumpre ninia promesa atu fó moris rohan-laek ba  ita! Tan neʼe mak ita hakarak “tahan buat hotu ho pasiénsia no ksolok”. (Koloso 1:11, 12) Maibé nuʼudar ita hein, ita la bele muramura kona-ba tansá mak Jeová seidauk halo buat ruma. Se ita halo nuneʼe, Jeová sei la kontente ho ita.—Koloso 3:12.

8. Ita sei aprende saida husi Jeová nia atan sira iha tempu antigu?

⁸ Saida mak bele ajuda ita atu hein ho laran? Diʼak atu hanoin kona-ba Jeová nia atan sira iha tempu antigu neʼebé hein ho pasiénsia ba Jeová nia promesa atu sai loos. (Roma 15:4) Ita sei aprende kona-ba tempu hira mak sira presiza hein, tanbasá mak sira hakarak hein ho laran, no oinsá mak Jeová fó bensaun ba sira tanba sira hatudu pasiénsia.

9, 10. Ba tempu hira mak Abraão no Sara presiza hein ba Jeová?

⁹ Haree toʼok ezemplu ida kona-ba Abraão no Sara. Sira “simu promesa nuʼudar liman-rohan” tanba sira hatudu tiha “fiar no pasiénsia”. Bíblia hatete katak bainhira “Abraão hatudu tiha pasiénsia”, Jeová promete katak nia sei fó bensaun no halo nia sai aman ba nasaun boot ida. (Ebreu 6:12, 15) Tanbasá mak Abraão presiza hatudu pasiénsia? Tanba presiza tempu naruk hodi promesa neʼe atu sai loos. Iha loron 14 fulan-Nisan, tinan 1943 molok Kristu, Abraão, Sara ho ema hotu husi sira-nia umakain hakur Mota Eufrates hodi tama ba rai neʼebé Maromak promete. Maibé Abraão presiza hein ba tinan 25 tan atu haree ninia oan-mane Isaac moris mai, depois hein tan tinan 60 atu haree ninia bei-oan Esaú no Jacob moris mai.—Ebreu 11:9.

 ¹⁰ Husi rai neʼebé Maromak promete, saida mak Abraão simu? Bíblia dehan katak Jeová “la fó ba nia liman-rohan ida iha rai neʼe, rai rohan ida mós lae; maibé Maromak promete atu fó rai neʼe ba nia atu sai ninian, no ba ninia bei-oan sira depois nia, maski nia seidauk iha oan”. (Apóstolu 7:5) Sin, tinan 430 liutiha husi tempu neʼebé Abraão hakur Mota Eufrates mak ninia bei-oan sira foin sai nuʼudar nasaun hodi okupa rai neʼe.—Êxodo (Keluaran) 12:40-42; Galásia 3:17.

11. Tanbasá mak Abraão hakarak hein ho laran ba Jeová, no nia sei haree bensaun saida deʼit iha futuru?

¹¹ Abraão hakarak hein tanba nia hatene katak Jeová sei kumpre ninia promesa sira. Nia iha fiar ba Jeová. (Lee Ebreu 11:8-12.) Abraão kontente atu hein maski nia la konsege haree Maromak nia promesa hotu sai loos toʼo nia mate. Maibé hanoin toʼok Abraão nia ksolok bainhira nia hetan fali moris-hiʼas iha rai. Nia sei hakfodak hodi lee kona-ba nia rasik ho ninia família nia istória neʼebé hakerek iha Bíblia. * Hanoin toʼok ninia ksolok hodi hatene katak Jeová halo ninia planu kona-ba Mesias sai loos liuhusi nia! Ita bele fiar Abraão sei sente katak nia la hein ho saugati deʼit.

12, 13. Tanbasá mak José presiza hein ho pasiénsia, no nia hatudu hahalok diʼak saida deʼit?

¹² Abraão nia bei-oan nia oan José mós hatudu pasiénsia hodi hein ho laran. Nia sai vítima ba hahalok neʼebé la justisa. Foufoun, ninia maun sira faʼan nia hodi sai atan bainhira nia maizumenus tinan 17. Tuirmai, ema duun-matak katak nia atu estraga ninia patraun nia feen no ema hatama nia ba komarka. (Gênesis [Kejadian] 39:11-20; Salmo [Mazmur] 105:17, 18) Maski José mak laran-metin ba Maromak, haree hanesan nia simu fali kastigu duké hetan bensaun. Maibé liutiha tinan 13, situasaun troka. José sai husi komarka no nia hetan pozisaun nuʼudar ema segundu iha rai-Ejitu tomak.—Gênesis (Kejadian) 41:14, 37-43; Apóstolu 7:9, 10.

¹³ José hola ba lia ka lae kona-ba hahalok la justisa neʼebé nia hasoru? Nia iha hanoin katak Maromak Jeová mak husik nia ka lae? Lae. Entaun saida mak ajuda José hodi hein ho pasiénsia? Ninia fiar ba Jeová. Nia rekoñese katak Jeová mak iha kbiit atu kontrola buat hotu. Ita bele hatene ida-neʼe liuhusi buat neʼebé nia koʼalia ba ninia maun sira, nia dehan: “Keta taʼuk! Haʼu laʼós Maromak atu tesi-lia ba imi, loos ka lae? Maski uluk imi hakarak atu halo aat ba haʼu, maibé Maromak troka fali ida-neʼe hodi sai buat diʼak no salva ema barak nia moris, hanesan nia halo agora daudaun.” (Gênesis [Kejadian] 50:19, 20) José hatene katak hodi hein ba Jeová, neʼe sei la sai saugati deʼit.

14, 15. (a) Saida mak hatudu katak David iha pasiénsia boot? (b) Saida mak ajuda David hodi hein ho pasiénsia?

¹⁴ Liurai David mós hasoru ona hahalok la justisa barak. Bainhira nia sei joven, Jeová hili nia atu sai liurai ba nasaun Izraél. Maski atu sai liurai ba ninia suku deʼit mós David presiza hein ba tinan 15. (2 Samuel 2:3, 4) Iha tempu neʼebé nia hein, nia tenke halai subar husi Liurai Saul tanba Saul hakarak oho nia. * Tan neʼe mak David la iha uma iha tempu neʼebá no nia tenke hela deʼit iha ema nia rai ka hela iha fatuk-kuak iha rai-fuik sira. Ikusmai  Saul mate iha funu. Maibé David presiza hein tan ba tinan hitu liu atu bele sai liurai ba nasaun Izraél tomak.—2 Samuel 5:4, 5.

¹⁵ Tanbasá mak David hakarak hein ho laran? Ita bele hetan ninia resposta husi Salmo 13 neʼebé nia uza pergunta “Toʼo bainhira?” ba dala haat. David dehan: “Kona-ba haʼu, haʼu tau fiar ba Ita-nia domin neʼebé laran-metin; Haʼu-nia laran sei haksolok tanba salvasaun husi Ita. Haʼu sei kanta ba Jeová, tanba nia hatudu ona laran-luak boot mai haʼu.” (Salmo [Mazmur] 13:5, 6) David hatene katak Jeová hadomi nia no Jeová sei nunka husik nia. Nia mós hanoin kona-ba tempu uluk oinsá Jeová ajuda ona nia no nia hein ba tempu neʼebé Jeová sei halakon ninia terus hotu. Sin, David mós fiar katak hodi hein ba Jeová, neʼe sei la sai saugati deʼit.

16, 17. Oinsá mak Jeová no Jesus hatudu ezemplu diʼak kona-ba hein ho laran?

¹⁶ Jeová nunka husu ita atu halo buat ruma neʼebé nia rasik lakohi halo. Nia mós hatudu ezemplu neʼebé diʼak kona-ba hein ho laran. (Lee 2 Pedro 3:9.) Porezemplu, tinan rihun ba rihun liubá iha jardín Eden, Satanás duun katak Jeová la iha hahalok justisa. Jeová “hein ho pasiénsia” ba tempu neʼebé nia sei hamoos fali ninia naran santu. Bainhira tempu neʼe toʼo mai, neʼe sei sai bensaun boot ida ba ema hotu neʼebé “hein nafatin ba nia”.—Isaías (Yesaya) 30:18.

¹⁷ Jesus mós hein ho laran. Bainhira nia moris iha rai, nia hatudu laran-metin toʼo mate. Iha tinan 33, nia entrega folin husi ninia sakrifísiu ba Jeová iha lalehan. Maibé nia presiza hein toʼo 1914 mak foin bele ukun nuʼudar liurai. (Apóstolu 2:33-35; Ebreu 10:12, 13) Jesus mós presiza hein toʼo ninia Ukun ba Tinan Rihun Ida ramata mak foin halakon ninia inimigu hotu. (1 Korinto 15:25) Neʼe mak tempu neʼebé naruk duni. Maibé neʼe sei la sai saugati deʼit.

18, 19. Saida mak bele ajuda ita atu hein ho pasiénsia?

¹⁸ Jeová hakarak ita atu hatudu pasiénsia hodi hein ho laran. Saida mak bele ajuda ita atu halo nuneʼe? Ita presiza halo orasaun husu Maromak fó ninia espíritu santu. Tenke hanoin-hetan katak pasiénsia mak hahalok neʼebé mai husi Maromak nia espíritu santu. (Éfeso 3:16; 6:18; 1 Tesalónika 5:17-19) Tan neʼe husu beibeik ba Jeová atu ajuda Ita hodi tahan ho pasiénsia!

¹⁹ Hanoin mós buat neʼebé ajuda Abraão, José, no David hodi hein ho pasiénsia ba Jeová nia promesa sira atu sai loos. Sira tau fiar ba Jeová. Sira la hanoin kona-ba sira-nia an deʼit ka kona-ba saida mak sira hakarak. Se ita hanoin kona-ba bensaun neʼebé sira simu, neʼe mós bele fó laran-manas ba ita atu hatudu hahalok pasiénsia.

20. Ita hakarak hatudu hahalok saida?

²⁰ Tan neʼe mak maski ita hasoru daudauk terus, ita hakarak “hein ho pasiénsia”. Karik dala ruma ita bele husu, “Oh Jeová, toʼo bainhira?” (Isaías [Yesaya] 6:11) Liuhusi Maromak nia espíritu santu nia ajuda, ita bele halo tuir profeta Jeremias neʼebé dehan kona-ba Jeová: “Haʼu sei hein nia ho pasiénsia.”—Lamentações (Ratapan) 3:21, 24.